Monday, December 29, 2008

غزة


والله ياجماعه إحنا طلع لسه عندنا شوية دم وأخيرا وافقوا علي دخول المساعدات الإنسانيه لغزة عبر معبر رفح بعد مافضحونا إمبارح ورجعوا طيارات قطر وليبيا وبعد مادول العالم حتي السودان اتظاهروا قدام سفارتنا
ربنا يكسفكم زي ماكسفتونا قدام دول العالم كله

الظابط المصري اللي اتقتل علي الحدود علي عيني وراسي , بس خلاص كده تنفيذ الأوامر علي رقابتنا
لما يكون أخويا بيموت من الجوع وأنا مارضاش أفتحله الباب وأقول عندي أوامر بكده
تبقي تنحرق الأوامر واللي مديها
وساعتها مش هبقي أخوه وهبقي عدوه وطبيعي انه يرفع عليا السلاح
قبل ماحد يقول طالما معاهم رصاص مابيضرقبوش اليهود ليه
أحب أقول علي أساس ان الرصاص له أجنحه وهيطير ولا اللي بيقولو كده مش أخدين بالهم إن غزة بتدك بالقصف الجوي ولسه مفيش حد إجتاحها بري

قبل مأي حد يقولي كله مصر كله مصر واشمعني مصر
اه كله مصر بقي
مش هي اللي في كل مكان تقول أنا الاخت الكبيرة وأم الأمة العربية
ده غير إن دول الدنيا تبعت مساعدات واحنا نستعبط ومانرضاش ننزلهم المطار أصلا


سؤال برئ للكابتن أبو مازن
هو حضرتك مش ناوي تتكسف علي دمك و تلبس البدله العسكرية إن شاء الله ولا ايه؟
طب فهمنا إن فلسطين مكنتش في حالة حرب يوم مامسكتها وإن أبو عمار كان بيلبسها عياقه عشان شكله فيها حلو
ايه لسه مفيش حرب في فلسطين؟
لسه لابس مدني ليه
انت بجد مش مكسوف من نفسك؟؟؟؟

قبل ماحد يتكلم عن كلام حسن نصر الله
والله الراجل كتر خيره اوي
ومحدش يقدر يتكلم عن موقفه ولا موقف لبنان
ماهو مش لازم لبنان هي اللي تشيل الليله كل مره
حرب 2006 حسن نصرالله بدأها بدري عشان يخفف الضغط عن غزة اللي كانت بتضرب بردو أيامها
ولبنان شالت الليله لوحدها, وشكلها والله مفيش حد هيشيلها غيرها المره دي بردو
فنتكسف من نفسنا بقي ومحدش يجيب سيرة حزب الله ولا حسن نصرالله, وياريت اعلامنا هو اللي يحط لسانه جوه بقه, مايقولوش الحقيقه , بس علي الأقل يسكتوا بلاش يكدبوا علي الشعب عشان معدش في حد بيتفرج علي القنوات الأرضيه

Saturday, December 27, 2008

إبادة جماعيه في غزة


مش عارفه أقول ايه

هنقول تاني اننا شايلين ذنبهم, وإن دمهم في ايدينا؟

ولا هنقول إن وجود الفلسطنين في غزة ورام الله بكثافة غلط لأن أي حد لازم يفهم ان تكدسهم في المناطق دي بس عشان يوم مايضربوها يقدروا انهم يبيدوهم كلهم

هنقول ان لو الدور النهارده علي حماس وغزة فهو بكره علي رام الله وفتح؟

هنقول ان الحكام العرب مصيرهم لمزبلة التاريخ بسبب سكوتهم وتواطئهم

طب دي مزبلة التاريخ معدش فيها مكان

هنبعت نستوردلهم واحده يعني ولا ايه؟

هنقول إن الناس اللي مامتتش من القصف ماتت من قلة الأدويه ونقص العلاج ولسه المعابر مقفوله

هنقول إن مفيش دوله مدت الناس دي بالسلاح عشان تحمي نفسها

هنستني إن حزب الله يضربهم عشان يخفف الضغط عن غزة ويتدوروا علي لبنان؟

هنقول إن حكامنا كانو عارفين إنهم هيبيدوا الفلسطنين في غزة ومحدش اتكلم

اه اللي بيحصل في غزة مش مذبحه ولا مجزرة ولا غارات

اللي بيحصل في غزة إباده جماعيه للفلسطنين

القمة العربيه هتنعقد عشان تنجب وتدين وتستنكر

وكلنا عارفين إن الاباده إستحاله تتعمل من غير إخطارهم وموافقتهم ولو صمتا علي الأقل

يعني هم بيقتلوا القتيل وهيمشوا في جنازته يستنكروا

الأطفال الصغيرين واقفين علي أبواب مدارسهم بيعيطوا من الرعب

الأطفال دول كانو ممكن يكونوا اخواتي أو اخواتك أو أولادنا أو أولاد علاء وجمال

بس إحنا كالمعتاد هيصعب عليا الأولاد الصغيرين وهنقول ياحرام وربنا ينتقم من اللي كان السبب

لكن الأولاد دول عمرهم ماهينسوا اليوم ده

الأولاد دول هيكبروا عشان ياخدوا حقهم ويحرروا أرضهم وينتقموا من كل اللي ظلموهم

حكامنا ممكن تتكسفوا مننا شويه

لو مش بتتكسفوا مننا خافو علي أسمائكم وازاي هيذكرها التاريخ

اعملوا أي حاجه انقذوا بيها نفسكم قبل ماتكونوا بتنقذوا أولاد غزة

Thursday, December 25, 2008

...التدوينة البيضاء

Saturday, December 20, 2008

...سيبني شوية



سيبني شويه لوحدي عشان متضايقة شويه
ماتقلبش عليا مواجعي وتتعب فيا
ده أنا علي أد مانفسي أتكلم وأشتكي منك
خايفه لتيجي علي جرحي وتزودها عليا
ليه هو انت فاضيلي عشان أجي وأحكي معاك
ده إنت بتبقي معايا وجنبي ومش لقياك
واللي مأثر فيا بجد إن أنا شيفاك
أبعد واحد عني وأقرب واحد ليا
شايله بقلبي أنا منك بس أنا مخبيه
راضيه معاك بقليلي وبتستهر بيا
ليه وإزاي تبقي أنت أهم الناس في حياتي
وتحسسني إني ماليش أي أهميه
ليه هو أنت فاضيلي عشان أجي وأحكي معاك
ده أنت بتبقي معايا وجنبي ومش لقياك
واللي مأثر فيا بجد إن أنا شيفاك
أبعد واحد عني وأقرب واحد ليا

----------------------

أغنية: سيبني شوية
غناء: لطيفة

Monday, December 15, 2008

...رجالة العراق


الرجاله لسه ماماتوش
لسه في رجاله في العراق

Tuesday, December 9, 2008

...قال عيد قال هأو



قبل العيد بيومين أعلنت اني مش هعيط ورغم ان نصايح ناس كتير كانت بتقول العكس الا اني صممت علي موقفي والتزمت بيه لحد دلوقتي ورغم ان ناس كتيييير حذروني من العواقب بس انا لسه مصممه

قبل العيد بيوم عرفت انه بيكدب عليا صدمتي فيه كانت أكبر بكتير مما ممكن أتخيل, الصدمه الأكبر انه قدر يكدب تاني وثالث لأنه مايعرفش اني عرفت الحقيقه

ليلة العيد كنت متأكده ان هي كمان عيدها باظ
بس رغم ده أنا سعيده بصداقتي ليها اللي بدأت تاخد منحني قوي

أول يوم العيد كلمتني اول ماصحيت عشان تعرفني ان مش عيدي انا بس اللي باظ من قبل مايبدأ وان عيدها هي كمان باظ من أول يوم كل اللي قلته مش كان كفايه عيدي يعني
علي كل حال الحمدلله

وانتهي اليوم باتهامي اني مكنش موقف دعم له
وساعدت في انهاء يوم سئ بنهايه أكثر سوءا

مش عارفه هو العيد جاي غريب عليا وعلي اللي حواليا انا بس ولا علي كل الناس اتمني ان عيدكم يكون أسعد

--------------------

العنوان نيك نايم للهواري

Thursday, December 4, 2008

...مش هعيط


مش هعيط

عنادا فيك مش هعيط

Monday, November 24, 2008

...الحرية لمحمد عادل


ده محمد عادل, مدون عنده 19 سنة ومخطوف من يومين

معرفش يعني ايه الأمن يخطف مواطن من الشارع ويفضل يومين محدش يعرف عنه حاجه

يعني ايه الدوله تخطف المواطنين من الشارع, من غير حتي أمر اعتقال, هو احنا بقينا فين؟؟؟

محمد طلعله قرار الاعتقال النهارده وأخيرا عرفنا انه دلوقتي في لاظوغلي

أنا معرفش محمد معرفه شخصيه, ومعتقدش اننا محتاجين نعرفه عشان نقول ان اللي بيحصل مش عاجبنا واننا معترضين عليه

لمتاعبة أخر الأخبار عن اختفاءه ادخل هنا

Saturday, November 22, 2008

... تلك القواعد


الحياة أقصر من أن نتبع تلك القواعد


-------------------

Denny

Grey's Anatomy

Friday, November 14, 2008

...امتحانات


أحمد و سها و عماد والمتكاظين كلهم هيبدأو امتحانات بكره 15/11 ان شاء الله

ودي امتحانات البكالوريوس يعني هيخلصو من الكليه دي بقي

الامتحانات هتيدأ بكره ان شاء الله وهتخلص 31/12

ادعلولهم ان ربنا يوفقهم عشان يرجعوا ينوروا عالم التدوين من تاني

واهو لما كل واحد فيهم يتخصص في مجال مختلف نبقي نلاقي حد يعالجنا ببلاش
وياسلام بقي لو حد فيهم اتخصص نفسي, يبقي كتر خيره
(:

ادعوا بضمير واتوضوا الاول

Sunday, November 9, 2008

...أن الأوان

إهداء: لكل الناس المجروحين والمكتئبين والمتضايقين

لو قابلت الحزن جايلك
سيبه وامشي
وانت ماشي داري قلبك
وابتسمله وعرفه انك خلاص بقيت بتضحك
ده لو قابلته
أن الأولان تفرح وتمسح كل جرح وأه
ان الاوان تبدأ تعشق زي خلق الله
لو حبيبك يجرحك
اثبت باقلبي مطرحك
انسي الجراح انساه
وانسي اللي راح وياه
وأكيد في يوم تلقي حبيب يخاف عليك
ويمد ايده يفرحك
أن الأولان تفرح وتمسح كل جرح وأه
أن الأوان تبدأ تعشق زي خلق الله
--------------------------
أن الأوان
غناء: علي حسين

Tuesday, November 4, 2008

...My Heart

Your Heart Is Green



Love completes you, but that doesn't mean you seek it out.
When love comes your way, you integrate it peacefully into the rest of you life.
Your flirting style: Laid back
Your lucky first date: Walking around aimlessly and talking
Your dream lover: Is both enthusiastic and calm
What you bring to relationships: Balance

Friday, October 31, 2008

...بتفرج وبس


لأول مره أحس اني واقفه في نص الطريق ومش عارفه أمشي في أنهي اتجاه

دايما كنت عارفه الخطوه اللي عايزاها بعد كده ايه؟

دلوقتي لما حد بيسألني وهتعملي ايه؟ بقول معرفش أنا حاليا واقفه أتفرج, بتفرج وبس


يارب إشارة

Saturday, October 25, 2008

...في بيتنا فأر


أه والله بيتنا الشريف العفيف الطاهر كان فيه فار
يوم الأحد اللي فات كانت ماما وأحمد مش موجودين ومنة مسافره وأفنان بتتفرج علي التليفزيون وتسنيم قاعدة علي الكومبيوتر وأنا قاعده قاعدتي المفضله علي الكنبه وبتكلم في التليفون
شويه واتخيلت ان في حاجه بتتحرك تحت الكنبة اللي قصادي اتعدلت عشان أعرف أراقب الموقف فملقتش حاجه
أنا لموره صاحبتي: انتي مادتنيش كومنتات لحد دلوقتي
مروه: أنا رأيي زي رأي صافي أختي بالظبط
أنا: تسنيم احنا في بيتنا فار
مروه وتسنيم في نفس الوقت: ايه ده انتي بتتكلمي جد
أنا للاتنين: أها كان تحت الكنبه دي دلوقتي وتقريبا استخبي ورا الدفاية
تسنيم قفلت باب الطرقه ودخلت معرفش راحت فين
مروه: مش يمكن بيتهيألك؟
انا: مانا كنت فاكره كده لحد ماشفته كويس واتأكدت, أنا مش عارفه تسنيم راحت فين
مروه: هي سابتك لوحدك؟
:( أنا : لأ, أنا مش لوحدي , معايا الفار
جت تسنيم ومعاها مبيدين حشريين( اها مبيدات حشريه مش حيوانيه)ومقشه
أنا : فين بابا
(تسنيم: بابا نايم مش هنصحيه (ياسلام علي بر البنت بباباها
انا: أمال هنعمل ايه هنموته برش الصراصير والنمل؟
تسنيم بكل شجاعه: لأ, احنا هنوجهه بس وبعدين نضربه علي راسه ومثلت المشهد بالمقشه (اللي يشوف شجاعة التخطيط
(مايشوفش التنفيذ
أنا لمروه اللي كانت لسه علي التليفون: روحي دلوقتي يابنتي ولما نشوف هنعمل ايه مع الفار هبقي ارنلك
لبست زي المقاومه ورشيت جنب الدفاية عشان يطلع وفعلا خرج من الجنب التاني واستخبي تحت تربيزة الركن
(تسنيم: تعالي رشيه هنا:(أمال الشجاعه راحت فين بس ياربي
أنا: علي فكره انتي معاكي رش زي بالظبط
تسنيم: اه صح
ورشته رشه وانا روحت كملت فطلع هو يجري نحيتي, طبعا انا وقفت اتنطط عشان مايدخلش في هدومي( ماهو مش ناقص غير كده بقي)وتسنيم بدل ماتراقبه وقفت جنبي تؤازرني وتتفرج عليا
تسنيم: هو راح فين؟
(أنا: جري تحت الكنبه دي(كنت بتنطط أه لكن متابعه الموقف
طبعا كان اختفي ومعدش له أي أثر
أنا: بصي احنا نسيب البلكونه مفتوحه شويه عشان يخرج ونتصل بماما نقولها تجيب لزق فران وهي جايه(طيبه انا قلت
(لزق عشان نبقي نخرجه مفكرتش في اننا نقتله
أنا: أيوه ياماما ازيك( لازم نمهد للست بردو) ايه انتي فين؟
سوسو: انا عند خالتك
أنا: طيب وانتي جايه ابقي هاتلنا معاكي لزق فران
سوسو بكل براءه: ليه, عايزه لزق فران ليه؟
أنا: عشان عندنا فار في البيت
سوسو بصدمه: فار جه منين ده
أنا: بما ان شباك المطبخ مقفول يبقي والله أعلم من البلكونه
وبدات دار الافتاء الجاديه
خالتي: الفار صغير ولا كبير
أنا: لأ صغير
خالتي: اه لو صغير اللزق ممكن لكن الكبير ماينفعش
بنت خالتي: لأ ولا الصغير حتي بينفع مفيش غير السم
ماشاء الله خلاص كلكم بقيتو خبراء في مكافحة الفيران
بابا جاب السم لما نزل يصلي الفجر والفار اختفي اختفاء تام ,الاعتقاد اللي ساد انه خرج من البلكونه تاني
يوم الثلاثاء باليل والبيت كله نايم ومفيش حد صاحي غيري قمت 3 ونص الفجؤ ادخل الحمام لما قفلت الباب سمعت صوت (عادي حد صحي) شويه وصوت حاجه بتقع عشان ألاقي سعادة الفار كان فوق الباب(مش عارفه بيعمل ايه الصراحه)واتخض ووقع وطلع يجري استخبي ورا الغساله
انا بكل دهشه: هو انت لسه في البيت؟؟؟؟
خرجت وسبت النور مفتوح(عشان يحسبني لسه موجوده) ونورت نور الطرقه والمطبخ(عشان يحسب البيت صاحي
(ومايتحركش من مكانه
أربعه الا تلت تسنيم صحت
(أنا :لو عايزه تدخلي الحمام فالفار جوه(طبعا جت قعدت جنبي
ماما صحت لقتنا احنا الاتنين قاعدين: أمال مين اللي في الحمام
أنا ببراءة الأطفال: الفار
ماما في صدمه(ياعيني عيلها والله) هو لسه موجود
أنا: اها وحكيتلها اللي
صحت بابا اللي لبس زي المقاومه ودخل وبعد ماقلب الدنيا خرج عشان يعلن انه مش موجود(نجح في الهرب للمره الثانيه علي التوالي وبكده يبقي مفيش مكان أمن في البيت غير أوضتنا
(وأوضة ماما
انا قبل مادخل انام:كده ضيعتو الفار اللي أنا لقيته
ماما: لقتيه!! مش كنتي موتيه بأي حاجه(ماشاء الله دي تسنيم
(أخده منها شجاعة التخطيط بقي.. نتفرج وقت الجد
يوم الأربعاء بعد المغرب
تسنيم وأحمد بره البيت, منة مازالت مسافره , بابا نايم, ماما في أوضتها, وأنا وأفنان في أوضتنا وطبعا الابواب مقفوله وأفنان ماخرجتش من الاوضه طول النهار أصلا
أنا خرجت أشوف حاجه بره ولقيت البوتجاز والع قلت أشوف ايه لتكون ماما ناسيه حاجه
أفتح النور عشان ألاقيه ميت قدام البوتاجازبعد مأكل أكل مسموم
(هو مفيش حد غيري في البيت ده ولا ايه؟)
أروح لماما: الفار مات
ماما: مات طب استني أصحي بابا يجي يشيله
وياسلام وهي بتبصلة نظرات الاشمئزاز بعد مابقي جثه هامده مانا كنت لسه الفجر ماموتوش ليه؟ ,أفنان جت تعاين الجثه عشان تتأكد انه مات واننا مش بنضحك عليها
أفنان: حرام عليكم ده صغير ليه تموتوه كده؟
أنا: حرام!! أمال مين اللي مكنش راضي يخرج من الأوضه ياربي

Sunday, October 19, 2008

...درب الجنون


أسير علي درب الجنون بخطي واثقة

Tuesday, October 14, 2008

...إعلان غير مدفوع الأجر


مودي رجع يامينز

مودي رجع تاني بمدونة عالم مودي , المدونة الأولي له

بجد أنا كنت بحب المدونة دي جدا

كان فيها كده روح وعالم مختلفين

حمدالله علي سلامتك يامحمود

ونورت عالمنا الافتراضي من جديد

بس انت عارف لو مسحت المدونة دي تاني هعمل فيك ايه؟

مش هقولك بقي هخليها مفجأه

يالا الكل يروح عنده يباركله

Sunday, October 12, 2008

Epitaph Lost her blog !!

We are a group of Egyptian bloggers really bothered by the blockage of the two-year-old blog "Epitaph_87" ( http://www.epitaph-87.blogspot.com/) along her gmail account (epitaph87@gmail.com), since October, 4th , 2008.
She has sent you her problem and requests on Google Help Center and Blogger Support, but in vain.
We wish that you'd help us retrieve that blog and account and answer the requests of our fellow blogress, sending you from (epitaph_1987@hotmail.com), and hopefully ASAP!
Just for notice, we have published this problem on our blogs!!
Thank you!

Thursday, October 9, 2008

...ملهمها


أخبرتها الممرضه أن هناك شخص ينتظر الدخول, وأنه رفض تعريف نفسه إلا من كونه صديق قديم

فسمحت لها بأن تدخله
عندما مر من الباب شعرت بأن الزمان يسير للخلف مع كل خطوه يخطوها
سألها عن أحوالها , وأخبرها أنه رفض تعريف نفسه خشية ألا تقابله, ابتسمت له ولم تجبه
هنائها علي نجاحها الباهر فشكرته علي ذلك
أخبرها أنه سعيد لأنها أصبحت إحدي أشهر أطباء جراحة القلوب, ونادرا مايخلو مؤتمر عن أمراض القلب من ذكر اسمها رغم صغر سنها
قال لابد أنها تمتلك هدفا واضح تريد أن تصبو إليه وعزيمة قوية لكي تصل إلي تلك المكانة في هذه المده القصيرة
سألها إن كانت فكرت في هذا التخصص عندما كانا معا؟
فهمت من سؤاله أنه يريد أن يعلم إن كان هو ملهمها وسبب نجاحها فهو دائما ماكان , وأن ذلك هو سبب الزيارة الحقيقي
لكنها لم تجبه عن معني السؤال وأجابته عن الصيغه
أخبرته أنها لم تقرر ذلك, بل أنها لم تفكر فيه إلا بعد إنفصاله عنها
ابتسم فلمحت خيبة الأمل تطل من عينيه وتمني لها التوفيق ثم غادرها
أرادت ان تستوقفه لتخبره أنه هو ملهمها وسر نجاحها , فقلد قررت مداواة القلوب المريضه عندما منحها هو قلب مجروح , ولكنها تراجعت في اللحظه الأخيره
تمت

Saturday, October 4, 2008


قـال إنـه مـش مـرتـاح مـن غيري

والدنيا بعدي خلاص فضيت عليه

راح شـاف حـيـاتـه مـع حد غيري

إيـه جابه تاني وهو أنـا دخـلي إيه

Tuesday, September 30, 2008

...عيد سعيد


كل عيد وانتم طيبين

ويارب يكون عيد سعيد عليكم كلكم

Sunday, September 21, 2008

...بسم الله



ابدأها دايما
بسم الله
رزقي ورزقك علي الله
وانسي همومك مين هيلومك
وماتلجأش لغير الله
خلي تكالك علي الرحمن
دي الصحرا تبقي بامره طوفان
لو جوه قلبك نار بركان
مين هينجيك غير الله
يمكن بروح مليانه ايمان
تشوف رسول الله في منام
وتنول رضا ربك وأوام
تلاقيها فرح باذن الله
واه لو تبت كده لله وبكيت
وربنا خليك زرت البيت
وجنب رسول الله صليت
تشكر مين بقي غير الله

-----------------
بسم الله
غناء: محمد فؤاد

Tuesday, September 16, 2008

...ممكن؟


هو ممكن حاجه راحت وادفنت من زمن

نرجع ندور عليها ونحيها من تاني؟؟؟

Wednesday, September 10, 2008

... انا لله وانا اليه راجعون


أبرار بنوته في ثانية ثانوي من مدرستنا وأخت واحده صاحبتي

كانت بتعدي السكه علي الطريق السريع امبارح فعربيه خبطتها وربنا استرد أمانته

ادعولها بالرحمه والمغفره وان ربنا يثبتها ويصبر أهلها

Thursday, September 4, 2008

...أنا سامحت


رمضان بدأ والشيطان بقاله أربعة أيام محبوس, وأظن إن كل الناس أخدوا بالهم من الفرق بين وجوده وعدمه

كلنا عارفين إن شوشو بيتحبس في رمضان , بس مش إحنا بس اللي عارفين ده , هو كمان عارف ده كويس

يمكن نكون لاحظنا كمية الخلافات اللي حصلت بينا وبين ناس حوالينا في أخر 3 شهور

أنا عن نفسي خلال الثلاث شهور دول سمعت عن كمية خناقات ومشاكل وانفصالات كثيره جدا, دول اللي أنا سمعتهم شوفوا اللي ماسمعتهمش بقي وانا أصلا مش بسمع كويس

لأن الشيطان عارف انه هيتحبس في شهر رمضان كامل فحضرته بيكثف شغله في أخر 3 شهور قبل رمضان, وبيكون شهر شعبان أكثر كثافه, بيعمل مشاكل كثيرة, و دايما بيوصلها لطريق مسدود وبطريقة ماينفعش انها تتصلح, ما هو مش يتعب طول الشهور دي وانتم تصلحوا كل حاجه بمجرد مايتحبس هو, لأ هو بيبوظ الدنيا بجد عشان تبقي خلاص اتقفلت بجد

المشكله الوحيده اللي عرفتها قبل ماتخلض قلت لأطرافها كلها يومين وشوشو يتحبس, استنوا بس وشوفو ايه اللي هيحصل, والحمدلله المشكله فعلا اتحلت

طب ايه بقي؟ احنا عرفنا اننا مكناش احنا اللي بنتخانق في الثلاث شهور دول

يمكن أغلبنا وصل لطريق مسدود في المشاكل دي, لكن هو ده اللي الشيطان كان بيخططله قبل مايتحبس

ايه, هنسيبه يمشينا زي ماهو عايز للمرة الثانيه؟

هو دلوقتي مش موجود واللي بيقوي نزعة الشر جوانا النفس الأمارة بالسوء ودي مقدور عليها

صالح وسامح وافتح صفحه جديده مع الناس كلها وقول للشيطان انت ماقدرتش تهزمني

بص للسماء وقول أنا سامحت عشانك يارب فسامحني انت

افتح صفحه جديده مع كل اللي حواليك وان شاء الله هتكون صفحه سعيده

كل رمضان وأنتم بخير

Tuesday, September 2, 2008

...اللهم تقبل منا رمضان



عندي احساس ان رمضان ده هيكون جميل بجد

يمكن لأنه أعلن عن وجوده بالنسبه ليا من ليلته
عندي شعور إني لقيت حاجه كانت ضايعه مني بقالها فتره

أنا كنت عارفه إن رمضان ده هيكون جميل لكن مكنتش اعرف ان ده هيحصل من ليلة أول أيامه

رمضان جميل اوي ياجماعه, جميل اوي بجد, انا مش عارفه هو مجاش من بدري ليه؟

يارب رمضان يكون سعيد عليكم كلكم , ويارب ربنا يريح كل قلب تعبان ويسعد أي حد حزين

Sunday, August 31, 2008

...هلال رمضان

رمضان كريم

ورب رمضان أكرم

كل عام وأنتم بخبر

Thursday, August 14, 2008

...بكره ممكن يكون متأخر أوييي

تحديث
في ناس قلقت عليا واعتقدت اني عيانه او اني هموت بسبب البوست ده
بس انا مكتبتوش بسببي, أنا الحمدلله كويسه
في حد أعرفه ربنا أختاره بنفس الطريقه اللي توفي بيها بن خالتي, ربنا يرحمهم هم الاتنين
فالموضوع فكرني بيوم ماكتشفت ان بكره بقي متأخر أوي
--------------------

رغم إيمانا التام بأن الموت ممكن يجي في أي لحظه, وإنه معندوش أي قواعد أو مقايس وإن مفيش فرق بين العجوز أو الطفل أو شاب في عمر الورد

رغم إننا مؤمنين إن النفس اللي بنخرجه مانضمنش ندخله تاني, ولا إن قلبنا يدق بعد الدقه دي مرة تانية إلا إننا مابنتعاملش مع الناس علي أساس إن دي ممكن تكون أخر لحظه في حياتهم ولا إن ده ممكن يكون أخر يوم في عمرهم

مابنفكرش إن اللي ظلمناه أو جرحناه أو وجعناه, دي ممكن تكون أخر حاجه نعملها معاه

مابنفكرش إن ممكن يكون وجعنا له أخر لحظه في حياته

تصرفاتنا وكلامنا هيختلفو كتير لو فكرنا إن قرارانا ده ممكن يكون أخر لحظه في حياة أقرب الناس لينا

معرفش ليه لازم الحد ده يعمل حادثه ويعيش منها بمعجزه عشان نفتكر إن الموت بيجي في لحظه وعشان ساعتها بس ناخد بالنا إننا مانقدرش نعيش علي الارض وهو مش عليها

قليلون جدا هم المحظوظين اللي مش بيقولو جملة ياريته كان عاش وانا كنت عوضته عن أي ألم سببتهوله في يوم من الايام

لأن قليلين اوي هم اللي بيعيشو بعد الحادثه وبيكون عمرهم لسه ماخلصش لما عملوها

العمر أقصر بكتير من إننا نضيعه في حاجات مالهاش أي لازمه

فكر من منظور تاني وأكيد هتعيش الحياة بشكل مختلف


فكر إن لو ده أخر يوم ليك هنا علي الأرض هتعمل فيه ايه ومع مين؟ بغض النظر عن الظروف لأن الظروف إحنا اللي بنخلقها

فكر لو ده أخر يوم ودي أخر لحظه في حياة أقرب ماليك في الدنيا

فكر لو انك فعلا هتفقده للأبد

Thursday, August 7, 2008

...ورجعت من السفر


ورجعت من السفر (:

فترة السفر اجمالا كانت ظريفه رغم تواطؤ الأغاني ضدي الا اني تقريبا خلاص اتعودت علي كده

قضينا فترات حلوه بجد وضحكنا فيها من قلبنا

لكني اكتشفت ان في أحداث كتيره كانت مستنيه اني أسافر عشان تحصل وكأنها كانت بتستغل فرصة ان مايكونش في كومبيوتر تحت ايدي
-------------------------
مكنتش اتخيل طريقة احتفال التليفزيون الأرضي بالثورة, هم لسه مصدقين نفسهم بجد ولا ايه؟

هو مفيش حد هناك اخد باله اننا فعلا محتاجين ثورة تانيه الايام دي وان كل اهداف الثورة ضاعت؟
-------------------------------------
بعدها بكام يوم صاحيه من النوم ولسه ماقمتش من علي السرير فتحوا التليفزيون والاخبار كانت شغاله

الخبر الاول كان ايه؟

براءة ممدوح اسماعيل والوحيد اللي يتحكم عليه قبطان سفينة سانت كاترين عشانه وحش ومأنقذش الضحايا

حسيت ان دمي اتحرق اوي واننا اضحك علينا زي يوم العلاوه كده بالظبط, بجد كان ردي علي اللي سألني أكلت ولا لأ باني اكلت بعضي كان واقيعي, نايمو الناس سنتين واعتقدوا اننا خلاص نسينا وان محدش هيقول حاجه لما يطلعوا الراجل اللي قتل 1000 مصري براءة, استنيت ان الدنيا تقوم لكن معرفتش ان في حاجه حصلت غير ان النائب العام ربنا يكرمه طعن في الحكم
------------------------
يوسف شاهين كمان ربنا اختاره, ياتري عرف حكم البرأة؟
-----------------------------
فتح وحماس رجعوا يقتلوا في بعض تاني وكأن خلاص كل المشاكل اتحلت ومعدش في مشكله غير بعض, هو احنا ليه مش بندور علي المستفيد من اللي بيحصل ونفهم ان هو اللي بيولع الدنيا بدل الاتهامات اللي عمالين يتبادلوها ليل ونهار دي
-----------------------------
عيد ميلاد مودي كمان كان يوم 1/8 كل سنة وانت طيب وعقبال 1000000 سنة ان شاء الله
-----------------------
أنا قرأت كل البوستات اللي نزلت في فترة غيابي بس
(: لسه ماعلقتش عند حد

Friday, July 11, 2008

...جاءت أخيرا


ابتسم عندما رأها تقترب منه فلقد انتظر ذلك منذ زمن بعيد
جلست بجواره فأسند رأسه إلي الخلف, وضعت يدها علي قلبه فازدات ابتسامته, فتحت باب قلبه فسمع صوتا يدل أن هذا الباب لم يفتح منذ مدة طويلة
دلفت إلي الداخل فبدأت الراحه تسري في جسده
وجدت عند أحد الأركان ألام فحملتها للخارج, وجدت علي الجانب الأخر أحزان فأشارت لها بالخروج فخرجت الأحزان طائعه
وجدت الحب مختفي تحت بعض الغبار فحملته ووضعته في المقدمه
أزالت الغبار عن جدران القلب ولونته بما تحب من الألوان
وضعت ابتسامتها مكان الألام وقبلتها مكان الأحزان , نثرت بعض السعادة في المكان فشعر بها تتسرب إلي روحه
نظرت حولها لتجد أن قلبه أصبح أجمل قلب دخلته في حياتها
عندما انتهت عادت للجلوس بجانبه فاعتدل, احتضنته وطبعت قبلة علي خده وأخبرته أن ميعاد ذهابها قد حان, ضمها إلي صدره بقوة وأخبرها أنه لن يسمح لها بالرحيل, فلقد أمضي ماذهب من عمره في انتظارها

Wednesday, July 2, 2008

....


هو إنتي ليه بتيجي عليا؟ عشان بسكت وما بتكلمش ومابشتكيش؟

مش كل حد ساكت يبقي مبسوط ولا كل حد مش بيشتكي يبقي مابيتألمش

في ناس مابتعرفش تشتكي, في ناس بتفضل إنها تكتم جواها وتبتسم في وش الكل

دايما في المواقف الصعبه بيكون مطلوب مني اني أواسي حد

دايما لازم أقول إني كويسه وكله تمام ومفيش حاجه لأن دايما حد بيسبقني وياخد دور الضحيه حتي لو مكنش من حقه

دايما لما بحتاج حد ياخدني في حضنه بيكون في حد لازم انا اللي أخده في حضني

كتير بضايق من نفسي وأقول إني لازم أقول لأ بقي لازم أقول اللي جوايا, لكن وقت الجد ألاقي ضحكة معرفش طلعت منين وأقول إني مش زعلانه ومفيش حاجة ولو حد قال إنه لمح دموع في عيوني بقول إنه بيتهيأله وإنها بتلمع من الفرحه

يوم مالدكتور قال إني تعبانه رغم إنه سألني وقلت إني كويسه, يومها قال هي ليه مابتشتكيش؟

أنا ابتسمت وقلت لنفسي إن الشكوه لغير الله مذله

دايما بسكت ودايما بطلع أنا اللي غلطانه وأنا السبب, هو لازم أتكلم عشان مبقاش غلطانه؟

بيقولو ان القلب اللي مابيشتكيش هو القلب الأقصر عمرا

يمكن عشان كده عمري ماشفت نفسي ست عجوزه

Thursday, June 19, 2008

......


سيبك, انتي عامله ايه كويسه؟
اها كويسه الحمدلله, أمال مين اللي بيتكلم معاك من الصبح
ماهو عشان بتتكلمي معايا من الصبح , ممكن تكوني مش كويسه وبتتكلمي عشان تحسي انك هتبقي كويسه
المهم اني أبقي كويسه والأهم اني كويسه
-----------------------

ادلعي براحتك , بكره التعويره يطلعلها قشرة
مال الدلع ومال التعوير, تعويرة ايه أصلا؟
عارفه الطفل الصغير لما يقع ويتعور والتعويره توجعه, شويه والجرح يبدأ يخف , فهو بيدلع علي اللي حواليه عشان متعور
بس انا مش مجروحه ولا موجوعه
اه , انتي رز بلبن
-----------------------

أنا مش عايزاكي تزعلي مني , بجد أنا ماليش ذنب في اللي حصل ولا وافقت عليه
أنا معرفش ايه اللي حصل ومعرفش مين اللي غلطان وعشان كده مقدرش أزعل من حد فيكم, أنا بس مقهوره عليكم
------------------------
انتي كويسه؟
اها كويسه, أسفه بجد اني نكدت عليكم
ايه العبط اللي بتقوليه ده, انتي مانكدتيش علينا, احنا متنكد علينا من غير حاجه
------------------------
ادعيلي اوعي تكوني بتنسي تدعيلي
لأ طبعا بدعيلك علي طوول, بس ادعيلي انتي, ادعيلي بجد
ربنا معاكي ياحبيبتي , ماتقلقيش ان شاء الله خير

Sunday, June 8, 2008

...الزهرة والمريخ


الأسطورة بتقول إن في الأصل البنات كانوا عايشين علي كوكب الزهرة لوحدهم, بيزرعوا الورد ,يروحوا المولات ويزورا بعض

والرجاله كانوا علي كوكب المريخ لوحدهم, بيبنوا المصانع ويخترعوا الإختراعات الجديده

في يوم من الأيام إخترعوا التليسكوب وكان في واحد بيجربه فشاف البنات اللي عايشين علي كوكب الزهرة وقال للرجاله كلهم وقرروا إنهم يسافروا الزهرة

فعلا سافروا وقرروا انهم يتجوزا لكن كانت المشكله هيعيشوا فين؟

الزهرة رقيق أوي علي الرجاله والمريخ جامد أوي علي البنات

اتفقوا إنهم ينزلوا الأرض ويعيشوا عليه كلهم

عدت السنين والكل نسي إنه جاي من كوكب تاني


بغض النظر عن الهدف الأساسي من الأسطوره دي
محدش يعرف أول مركبة فضاء راجعة الزهرة منين والساعه كام؟

Saturday, May 31, 2008

...........


ليقضي الله أمرا كان مفعولا

Monday, May 26, 2008

...لو كان



لو كان قلبك عليا حس بيا

حبيبي ساكت ليه

زعلان لومني وعاتبني

ليه سايبني قول هاتكسب ايه

معقول من غلطه تنسي

حبنا ولياليه

دي سنين حلوه في حياتي وذكرياتي كلها وياك
لو كان بعدك نصيبي يا حبيبي مستحيل انساك

في عنيك احلام خادتني

علمتني معني اني اعيش

وازاي دلوقتي تنسي

طيب اقسي بس متبعنيش

وخلاص انا خدت بالي بس متسبنيش

دي سنين حلوه في حياتي وذكرياتي كلها وياك
لو كان بعدك نصيبي يا حبيبي مستحيل انساك
------------------
غناء: نوال الزغبي

Thursday, May 15, 2008

...ذكريات كوب الشاي


أمسكت بكوب الشاي وجلست في مكانها المعتاد, لم تشعر بسخونة الكوب وظلت تتأمل الأبخرة الصاعدة منه
أسندت رأسها للخلف وأغمضت عيناها وسبحت في بحر الذكريات
تذكرت عندما كان يجلس معها دائما في هذا الوقت وكيف لم تنجح أكبر مشاغله أن تمنعه من التواجد معها
تذكرت كيف كان يصر كل يوم أن يشرب من كوبها وانها عندما كانت تخبره أن كوبه يحتوي علي نفس الشاي كان يأتي رده بأن شفتاها تعطيان للشاي مذاق أخر وتكسبانه نكهة أفضل من نكهة النعناع أو القرنفل بكثير
تذكرت كم كانا يحرصان علي إدخار الأخبار والأحداث وحتي المفاجأت لهذه الجلسة المسائيه
تذكرت أنها عندما علمت بحملها لأول مره استطاعت أن تمنع نفسها من إخباره في الهاتف وامتنعت باعجوبة أن تخبره وقت الغداء لتحتفظ بهذه الماجأه لجلستهم المسائيه
تذكرت كم كان سعيدا عندما علم وكيف لم يلومها لأنها لم تخبره طوال اليوم فهو أيضا يعلم أن الأخبار في الجلسة المسائيه لها طعم أخر ومذاق مختلف
تذكرت كيف إكتسب منهما طفلهما هذه العادة وأنه عندما قرر أن يخطو أولي خطواته لم يفعل ذلك الا أثناء جلستهم المسائيه
تذكرت أصواتهم وضحكاتهم التي كانت تملأ المكان وكم تفتقدها
أخرجها من ذكرياتها عندما أمسك يدها ففتحت عيناها ونظرت له في حنان ليسألها بكل براءه "ماما هو ممكن لما بابا يوحشنا يبقي يجي من عند ربنا يشوفنا شوية ويرجع تاني
إحتضنتة وقبلت رأسه عندما لم تجد جوابا لسؤاله

Thursday, May 8, 2008

...يامصري

غناء: علي الحجار
كلمات: سيد حجاب

ألحان وتوزيع: ياسر عبد الرحمن

Wednesday, May 7, 2008

...أخدوا باليمين قبل مايدوا بالشمال


وبعدين يعني, هم عايزين إيه دلوقتي؟

قالوا في علاوة 30% عشان يبوظوا الإضراب قلنا وماله ماحنا كان مطلب من نطالبنا إن الناس تعرف تعيش حياة كريمة هي صحيح ال30% دي مالهاش دعوة بكريمة ولا حتي نعمة بس قلنا أهو أحسن من مفيش يعني

قعدنا لوحدنا في البيت يوم 4 مايو وحتي الناس في العمارة اللي قدامنا اللي كانوا معلقين علم مصر يوم 6أبريل تخلوا عني وكنت الوحيدة في المنطقة اللي علم مصر في بلكونتنا وقلت مفيش مشكلة الناس بتهدي اللعب مع الحكومة ومش عايزين يزعلوهم عشان محدش يقول علينا شعب مفيش حاجه بتطمر فيه

قرار العلاوة كان امتي؟ 1 مايو والإضرلاب الله يرحمة كان 4 مايو, يقوم إيه اللي يحصل 5 مايو بعد مايوم الإضراب يعدي بالسلامة ؟ يدوروا علي موارد لفلوس العلاوات, ليه هي مصر معندهاش موارد؟
قناة السويس قفلت ومحدش قالي, خلاص مافيش موارد غير جيوب الشعب وثمن البنزين والجاز؟

لما إحنا البنزين والجاز غالين عندنا أوي كده أمال بنصدر الغاز للي يسوا واللي مايسواش ليه؟؟؟

نكفي شعبنا الأول وننزل الأسعار وبعدين نبقي نصدر زي ماحنا عايزين وساعتها نبقي نقرر هنصدره لمين؟

محدش يحرق دمي زيادة ويقولي إن الحكومة قالت إنها مش هتاخد حاجة من محدود الدخل وإنها هتدفع الأغنياء, عشان مش كل اللي راكبين عربيات عندهم هامر, ولو عايزين يدفعوا الأغنياء بس يزودوا بنزين 95 بس لأن الحرامية مش بيحطوا غيره ومالهمش دعوة بقي ب92 و90 والجاز وبعدين هم محدودين الدخل دول الأكل اللي هيشتروه هيجيلهم طاير من الغيط ولا علي عربيات بتحط بنزين بردو؟

ومحدودي الدخل دول هيركبوا موصلات عامة بتشتغل بالبنزين ولا هيحطوا فيها مية؟

طب الحكومة عايزة ايه دلوقتي؟ عايزانا نعمل ايه واحنا نعمله؟ هم بيعاقبوا الناس عشان طلعوا مؤدبين وماشتركوش في الإضراب ولا إيه يعني؟

طب ده حتي اللي هيزهق ويقرر يسيبلهم الدنيا بحالها ويولع في نفسه مش هيعرف عشان الجاز غلي

بجد كده مش نافع ومش هينع وعلي رأي الراجل اللي جه في التليفزيون علي البي بي سي كان في الشارع وكانو بيسألوه عن رأيه في الأسعار

قال إن الحكومة بتموت الشعب بالبطئ مايموتونا كلنا مرة واحدة ويخلصونا بقي

Friday, May 2, 2008

...موعدنا 4 مايو

من أجل المعتقلين
من أجل المحروقين والغرقانين والجعانين
من أجل مصر
خليك في البيت ولو نزلت إلبس أسود ولو قابلت عسكري أمن مركزي إديه ورده

Tuesday, April 29, 2008

...عيد ميلادي


كالمعتاد لازم يكون عيد ميلادي حدث قومي في مصر كلها

السنة اللي فاتت كان كتب كتاب جيمي, والسنة دي كان عيد الربيع

----------------------------------

جميل أوي انك تعرف في عيد ميلادك أد إيه وجودك في الحياة فرق كتير مع حد مهم جدا في حياتك

-------------------------------

رغم سفر أحمد وماما وتسنيم إلا إن ده مامنعهمش إنهم يقولولي كل سنة وإنتي طيبة الساعة 12

---------------------------

شكرا لكل حد قالي كل سنة وإنتي طيبة سواء بمكالمة تليفون أو رسالة أو علي الفيس بووك

----------------------

علي فكرة امبارح كان عيد ميلاد محمود شاب فقري كمان

Thursday, April 24, 2008

...أخيرااااااااا


الحمدلله إسراء خرجت إمبارح باليل

ألف مبرووووووووووك ياإسراء وحمدالله علي السلامه

محمد الشرقاوي كمان كان خرج قبلها بكام يوم

حمدالله علي سلامتك يامحمد

ويارب عقبال كريم البحيري هو وكل المعتقلين إن شاء الله

Monday, April 21, 2008

...خطوبة إنسانة


يوم الجمعة كانت خطوبة ياسمين

ألف مبروووووووووووووووووك يامينو

ويارب ربنا يكملك علي خير

كله يروح يباركلها بسررعة

Thursday, April 17, 2008

...إعتقال إسراء ونادية


رغم إن قرار النيابه كان إخلاء سبيل إسراء عبد الفتاح

إلا انها واجهت مط وتطويل جدا في إنهاء إجراءات الخروج

وأصدرت وزارة الداخلية أمس أمر باعتقالها هي ونادية مبروك
وتم إعادتهما إلي سجن القناطر

أعتقد إن كده بقي كتير أوي

الصورة وقرار الاعتقال من جروب إفرجو عن إسراء ورفاقها

Thursday, April 10, 2008

...إفرجوا عن إسراء ورفاقها

تحديث 16/4 : رغم صدور قرار باخلاء سبيل إسراء من 3 أيام لكن هي لسه في مباحث أمن دولة القليوبيه ومعاها جميلة اسماعيل لإنهاء إجراءات الخروج
----------------------------------
تحديث : قالوا في برنامج الطبعة الأولي ان إسراء هتخرج بكرة إن شاء الله
يارب تكون حقيقة
--------------------------------
أتحدى لياليك ياهروب وأتوضى بصهدك ياجنوب وأصلى الفرض الحطينى وأكتبلك عمرى المكتوب

إسراء عبد الفتاح هي الفتاة الأشهر حاليا علي الفيس بووك , إسراء للي مايعرفهاش هي البنت اللي أسست جروب اضراب 6 أبريل علي الفيس بووك


احضانك فوق الحنية ياجميلة ومريم وبهية يتفجر فى الموت بركانك وايمانك يتفجر فيا


إسراء زي ناس كتييييير مننا جالها خبر الاضراب علي رسالة موبيل وفي ايميل, يعني مش هي صاحبة فكرة الاضراب لأن الاضراب أصلا فكرة عمال المحلة وبعد كده تضامن معاهم القوي السياسيه المعارضة وبعدين انضم لهم الشعب


أنا عن نفسي لما جالي الايميل قررت اني أعمل جروب للاضراب علي الفيس بووك, لكن معرفش ايه اللي عطلني يومها عشان أعرف تاني يوم إن إسراء خلاص عملت الجروب وقلت انها في بيتها إحنا الاتنين اسراء بقي والمهم ان الجروب اتعمل واشتركت فيه


الدم على الارض خريطة مشتاقة ليوم الحرية اشلائك بتلم جراحى يرتعش الغدر وترتاحى ويعود الحلم المسلوب


إسراء حاليا مسجونه علي ذمة التحقيق عشان عملت الجروب ده


ماينفعش ان عشان انا او غيري اتأخرنا في تنفيذ فكرة وان عشان هي اللي نفذتها الأول تبقي تتسجن, ماينفعش إنهم يقولو انها حرضت علي الاضراب لأن كل اللي هي عملته انها نقلت فكرة وماضربتش حد علي ايده عشان يضرب , ماينفعش انهم يقولو انها حرضت علي الشغب لأن كل اللي هي قالته اقعدوا في البيت اليوم ده, ولأن المعروف ان السبب في أحداث المحله هي تعامل الأمن المستفز والوحشي معاهم


ماينفعش ان اسراء هي اللي تتعاقب علي كل الناس اللي قعدت في البيت يوم الأحد 6 أبريل لأن كل واحد حر يقعد في بيته زي ماهو عايز, ودي حريه شخصيه ودي تهمه من التهم الموجه الي إسراء انها أضرت بيها


ده غير انهم بيعاقبوها علي حاجه الحكومه مش معترفه بيها وقالت انها محصلتش وان الاضراب منجحش طب لسه قبضين عليها ليه؟


ياضى عيون الشهداء يازهرة صيدة وسيناء الثانية من عمرك تحينى ابنى واتبسم واشاء الكلمة من سيرتك تهدينى للاقصى يعود الاسراء

إنشاء إسراء للجروب علي الفيس بووك كان قبل بين الحكومة اللي بتهدد فيه بمعاقبة المحرضين علي الاضراب بكتييييير

سواء كنت مع الاضراب أو ضده , موافق عليه أو معارض له, ده مايمنعش إنك تقول لأ لسجن بنت لسبب مش مفهوم ومفيش حد شايف انه معقول

مهما كان رأيك في الاضراب فواجب إنساني عليك إنك تطالب بالافراج عن إسراء ورفاقها
----------------
الصوره من جروب افرجوا عن اسراء ورفاقها علي الفيس بووك
أغنية أتحدي لياليك لمحمد منير من حلقة رسالة حب لإسراء لعلاء القمحاوي علي تيت راديو
 

The Lost Princess © 2008. Design By: SkinCorner