Friday, December 28, 2007

...الكتاكيت


استدعى الاب ابنه لغرفته وما ان رأه امامه الا وبادر بتوجيه هذا السؤال
الاب : هتعرف يابنى تحافظ على الثروه اللى هتورثها من بعدى

الابن : طبعا يا ابا تربيتك

الاب : يعنى هتعرف تربى الكتاكيت زى ما انا ربيتهم

الابن : ( باندفاع وحماسه الشباب ) اكيد يا ابا

الاب : طيب هات الكرتونه اللى فيها الكتاكيت دى

سارع الابن باحضار الكرتونه ووقف امام ابيه

الاب : اقلب الكرتونه على الارض وورينى ازاى هتقدر تلم فيها الكتاكيت

وبسرعه قلب الابن الكرتونه وما ان رفعها حتى انطلقت الكتاكيت فى ارجاء الغرفه واندفع الابن خلفها يحاول جمعها مره اخرى لكن هيهات ، وبعد ان ادرك الفشل وقف امام ابيه وقد ارتسمت على وجهه البلاهه والغباء ولم يوقظه الا صفعه قويه من ابيه

الاب : شوف يا غبى اللى هاوريهولك ده خلاصه 25 سنه فى تربيه الكتاكيت

ثم اخذ الاب الكرتونه بعد ان جمع فيها الكتاكيت اخذ يهزها بقوه يمينا ويسارا وسط صراخ متواصل من الكتاكيت ما لبس ان تلاشى وانقطع نتيجه ما اصابها من اعياء

الاب : الان فقط نقلب الكرتونه

وما ان رفعها الا وشاهد الابن الكتاكيت لا تحرك ساكنا ممااصابها من اعياء ودوار ثم قام بتعبئتها فى الكرتونه بمنتهى السهوله واليسر

الاب : دلوقت يا ابنى اتعلمت اهم حاجه فى تربيه الكتاكيت وهى

( اتعبهم يريحوك لكن لو ريحتهم هيتعبوك )

لو عرفت مين هو الاب ومين هو الابن ومين هما الكتاكيت ؟ ادخل عشتك وخليها فى سرك

Tuesday, December 18, 2007

..عيد سعيد


Monday, December 10, 2007

...What Type of Weather Are you?

sunshine رغم حبي لفصل الشتاء الا اني طلعت
يمكن عشان بنكون محتاجينه في الشتاء أكتر

You Are Sunshine

Soothing and calm
You are often held up by others as the ideal
But too much of you, and they'll get burned

You are best known for: your warmth

Your dominant state: connecting

(: اللي يشوفه يحله

Monday, December 3, 2007

..بين كلمة المتهم والشهيد فرق كما بين الأرض والسماء

ضحكنا واتفائلنا كتير نيجي للجد بقي
أكيد في كتير سمعوا عن شخص اسمه السموره وان السموره ده تاجر حشيش وبانجو في بورسعيد في منطقتي الكويت والسلام
وان الحكومه بعد بلاغات من الموطنين لمدة سنتين ماتحركتش غير لما المواطنين بعتوا البلاغات دي لوزارة الداخليه في القاهره
و أخيرا البوليس اتحرك يوم الأحد اللي فات
اللي حصل ان اثناء محاصرة قوات الأمن وافراد من العمليات الخاصه للمكان عدي تاكسي من المنطقه
التاكسي كان راكبه شاب عنده 26 سنة واسمه محمد حسن الزناتي وخاطب , ومحمد مكنش معاه فكه واخد 2 جنيه من واحد صاحبه ثمن المشوار, وقف له عم حسن محمود وده راجل كبير وعنده ابن متزوج وبنتين واحده فيهم مكتوب كتابها وولد تاني
طبعا مكنش معروف ان المنطقه دي فيها كمين او ممنوع المرور منها
واللي حصل ان السائق عدي من نفس الشارع المحاصر عشان يوصل محمد لبيته
السائق فوجئ بقوات الأمن اللي محاصره المكان وبتطلب منه انه يقف
الراجل اتخض واتلخبط ومبقاش عارف يعمل ايه وحاول انه يمشي بسرعه
الاجراء اللي المفروض قوات الأمن تاخده انها تطلق الرصاص علي كوتشات العربيه عشان تمنعها من المشي
لكن اللي حصل انهم اطلقوا النار علي العربيه واللي جواها وقتل السائق ومحمد بطلقه في الرأس
طلقه في الرأس دي ياجماعه يعني اللي كان بيضرب كان بيضرب عشان يقتل مش عشان يوقف العربيه
وفعلا فارق محمد وعم حسن الحياة
وطبعا مش محتاجين اني اقول ان الحكومه ماقبضتش علي سموره غير بعد الحادثه دي بخمس ايام
يعني الناس اللي مالهمش ذنب اتقتلوا والمجرم الحقيقي قدر انه يهرب هو وأخوه وفضلت الحكومه تجري وراه وماقدرتش انها توصله غير لما بلغ عن مكانه احد الأشخاص اللي قدر انه يتعرف عليه
نرجع لموضوع محمد وعم حسن, الحكومه نزلت بيان بأسماء أفراد العصابه اللي اتقتلوا وطبعا مش محتاجين اني اقول ان اسم محمد وعم حسن من ضمنهم
الحكومه في بيانها قالت ان التاكسي لما اقتحم المكان وطلبوا منه انه يقف, اطلق الرصاص علي البوليس والبوليس بادلهم اطلاق النار
أصل القانون يمنع انك تطلق النار علي أعزل, وماينفعش ان ظابط او عسكري يضرب رصاص لو اللي قدامه مبدأش بده او علي الأقل أشهر السلاح في وضع لاطلاق النار
طبعا بردو محدش محتاج اني اقول ان كلام الشهود العيان بينفوا ده تماما وقالو ان التاكسي مااطلقش اي اعيره ناريه, وبن عمة محمد قال انه يتحدي اي حد لو قاله ان ابن خاله كان بيشيل في جيبه قصافه مش مسدس, وعم حسن لو كان تابع تجار المخدارات مكنش هيتحكم عليه ب6 شهور في قضية شيك بدون رصيد من أقساط التاكسي اللي كان مصدر رزقه , واللي طبعا دلوقتي ماينفعش خالص من الرصاص اللي اضرب عليه
مفيش حد مابيغلطش اه, واحنا مش ملايكه ومش معصومين من الخطأ محدش قال حاجه, لكن انك تضرب رصاص علي شخصين لا يحملون السلاح وضرب الرصاص يكون بغرض القتل فده مش خطأ, دي خطيئه
انك لما تغلط في كارثه زي دي, بدل ماتعتذر تزور الحقايق وتزيفها, يبقي ده مش خطأ دي خطيئه ثانية
لما الحكومه تمارس الضغط علي عائلات الضحايا عشان يتدفنوا بالليل, يبقي ده مش خطأ دي خطيئه ثالثة
أهالي الناس دي مش عايزين غير تبرئة أسمائهم , وان بدل اسم المتهم يتكتب قبل أسمائهم الشهيد أو المقتول خطأ
في أم قلبها مليان حسره علي ابنها اللي اتقتل فبلاش نحرق قلبها بزياده ونقول علي ابنها اللي اتقتل ظلم انه تاجر مخدرات
في بنت مكتوب كتابها مش عارفه مين اللي هيجوزها بعد مقتل أبوها, فبلاش نكون السبب في ان خطيبها يسيبها لأن أبوها كان ضمن العصابه
حرام نقتلهم ظلم ونظلمهم بعد مايموتوا , مش هيبقوا اتظلموا وهم بيموتوا وبعد مايموتوا كمان
الأجل مكتوب وكل واحد مكتوب له هيموت امتي وفين ودي حاجه بتاعة ربنا
لكن ده عمره مايمنع ان الغلطان لازم يتحاسب ويدفع ثمن غلطته, واننا لازم نعترف بالحقيقه ونبرأ اسم الناس دي
حسبنا الله ونعم الوكيل
-------------------
تحديث: بعد مانكدت عليكم أقول حاجه ترفع من روحكم المعنويه بقي
الأستاذ محمد الدريني خرج من المعتقل, ألف مبروك ياحمد وحمدالله علي سلامته ويارب يكون بخير

Thursday, November 29, 2007

..التاج السلطاني


ده التاج التاني اللي كان عليا من أحمد فؤاد مع نفسه

وعلي فكره ياجماعه نتيجة أحمد ظهرت والحمدلله نجح وبجد شكرا لكل الناس اللي دعوله او حطوا البانر في مدوناتهم


نيجي للتاج بقي

لو قالولك اختار عصر من عصور مصر علشان تعيش فيه ...تختار اى عصر و فى عهد اى حاكم ؟؟ اشمعنى العصر ده؟؟
هختار عصر لسه مجاش

عصر فيه المصرين بيحكمهم واحد مصري هم اللي اختاره
بيخاف عليهم وبيخاف ربنا فيهم
اعتقد ان ده اجمل عصر ممكن اي حد يعيش فيه
.
.
.
اول اولويه فى حياتك...عيلتك ...شغلك و لا اصحابك؟؟؟
انا من الناس اللي عيلتها مهمه اوي بالنسبه ليها

مش معني كده ان اصحابي مش مهمين
بالعكس انا بحب اصحابي جدا
والأولويه هتكون للي محتاجني في الوقت ده
.
.
.
ايه اكتر حاجه بتحبها فى رمضان؟؟؟؟
احساسه

رمضان كده بيدي احساس مش بيجي غير معاه هو وبس
يعني لو الحكومه قالت ان رمضان لسه مابداش وهو بدأ, بتحس ان في رمضان في الشارع, وانه موجود
.
.
.
اوصف ليا اجمل فطار ممكن تفطره
أكيد ان شاء الله هيكون اول فطار ليا في بيتي مع حبيبي واكون انا اللي عكه , اقصد طبخه , هو طبعا مساعدني فيه, والمساعده دي مش معناها انه يعمل السلطه بس

لكنه ممكن يعمل كل حاجه لو عايز وانا ممكن اعمل السلطه (:
.
.
.
لو انت حاكم على مجموعه من الافراد هتكون عادل؟؟؟ طب هتعمل ايه علشان تتاكد انك حاكم عادل؟؟؟
المنصب في حد ذاته بيغير قلوب ونفوس البشر

بس انا هحاول اكون عادله علي قد ماقدر
هجيب لوحه كبيره واكتب عليها اسم عمر بن الخطاب واحطها في مكتبي, وواحده تانيه مكتوب عليها ارحموا من في الأرض يرحمكم من في السماء, وهكتب في ورقه ان دعوة المظلوم لا ترد واحطها تحت ازاز المكتب
أتمني ان الحاجات دي تصحي ضميري
.
.
.
اللى بيبوظ الحكام ...نفسهم و لا الشعب و لا الحاشيه المقربه؟؟؟
اللي بيبوظ الحكام السلطه والفلوس

دي فتنه ربنا ينجينا منها لو اتكتبت علينا
وان يكون الحكام دول حكام علي ناس مايعرفوش يقولو لأ , ومفيش حواليهم حد يقولهم ربنا هيحاسبكم علي الناس دي يوم الحساب
.
.
.
مين اكتر اعلامى مصرى بتحترمه؟؟؟
ويلي وده الاسم اللي انا بقوله علي وائل الابراشى , وطبعا حمدي قنديل

بحب طريقتهم ومواضيعهم جدا, واتمني اني لو بقيت اعلاميه في يوم اني اكون زيهم
.
.
.
قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه؟؟لو اه ايه رايك فيه؟؟
الصراحة لأ

.
.
.
لو ممكن تشتغل شغلانه تانيه غير اللى انت بتشتغلها او هتشتغلها كنت تتمنى تبقى ايه؟؟؟
هو انا لسه مش بشتغل, بس اتمني حاليا اني افتح محل الهدايا

الباقي بقي بعدين, اصل انا ناويه اشتغل حاجات كتيير
.
.
.
تانى بلد تتمنى تعيش فيه بعد مصر ايه؟؟؟
فلسطين .. بحبها اووووي ومعرفش ليه

نفسي اني اروح هناك بجد اوووي
.
.
.
اوصف ليا ترتيبات اجمل فرح ممكن تحضره
؟
فرحي طبعا ان شاء الله

بس اكيد ده أجمل فرح ممكن انا احضره, وأكيد مش هيكون جميل غير لما اكون بتجوز حد انا بحبه ومختراه, سواء بقي الفرح ده كان في مكان كبير, او حتي في بيتنا علي الضيق
.
.
.
بتراعى كلام الناس و القيل و القال؟؟؟ لو اه او لو لا قلى ليه؟؟؟
دي حاجه غصب عننا خصوصا مع البنات, بس مش دايما طبعا, في الحاجات اللي بيكونو عندهم حق فيها بس

اصل الناس كده كده هتتكلم عليك, سواء عملت الصح او الغلط
صعب اننا نرضي الناس كلها
.
.
صحيت ملقتش الموبايل و لا الكومبيوتر و لا الكاميرا الديجتال و لقيتنا رجعنا لعصر الحمام الزاجل و الحصنه هتكون سعيد؟؟؟
هااا , ياخبر, وموبيلي, طب قولي هتروحي العصر ده وموبيلك معاكي, لكن اروح لوحدي كده, صعب اووووي

.
.
.
السعاده هى.....؟
الرضا واننا نكون عارفين ان ربنا دايما بيختارلنا الأحسن, واننا ماننساش نشكره علي ده
.
.
.
عندك امل؟؟؟ اسبابك؟؟؟
أكيد
يمكن انا من الناس المتفائله بطبيعتي, دايما بكون شايفه ان كل مشكله وليها حل, وانها اختبار لثقتنا في ربنا عز وجل
ضاقت فلما استحكمت حلقاتها فرجت
.
.
.
لما بتحب تهرب من كل شىء بتروح فين؟؟؟؟
اي مكان اكون فيه لوحدي وبس

ابعد عن السبب اللي انا عايزه اهرب منه وادورله علي حل
.
.
.
امتى اول مره خدت فيها نفس طويل كده و قلت بينك و بين نفسك " ياااه اظاهر ان انا فعلا كبرت" ؟
لما بكتشف ان السنين عدت

وكل سنة في عيد ميلادي, لما اعرف سني واكتشف اني معنتش البنت اللي عندها 18 سنه زي ماناس كتير فاكرين
لما اشوف حد ماشفتوش من مده واكتشف ان اخوه او اخته الصغيرين كبروا
بقول هي السنين عدت بسرعه كده, هو احنا كبرنا اوووي كده؟
.
.
.
لما بتعمل عمل خيرى بيكون ايه هو دافعك الاول؟؟؟
اني اسعد الحد اللي هعمله ده, لأن سعادة الناس بتسعدني

وبكون متاكده ان ربنا هيكرمني بسبب العمل ده, لأنه عارف اني عملته عشانه هو مش عشان حد تاني
.
.
.
بتشرب سجائر؟؟؟ لو الاجابه اه ايه شعورك لو شفت ست بتشرب سجاير؟؟؟ ليه؟؟؟
لأ الحمدلله

الصراحه انا بقرف من السجاير عموما, واتمني اني اصحي في يوم الصبح يقولولي ان معدش في حد بيشرب سجاير , وانهم عملوا لعلب السجاير متحف
وشعوري مش بيختلف من ست لراجل
.
.
.
بتعرف ايدك اليمين من الشمال ازاى؟؟؟؟
لأ دي حاجه مش سهله خالص, ومن يوم ماقرأت السؤال ده أول مره وانا براقب ايديا عشان اعرفهم من بعض

واكتشفت اني بعمل كل حاجه بالايدتين تقريبا لغاية ماكتشفت حاجه مهمه
اني بسوق بايدي اليمين, وبفتح الازاز واقفله بايدي الشمال
:p
.
.
.
ايه اكتر آله موسيقيه بتحبها؟؟
البيانو
معرفش ليه بحبه او بحب صوته
.
.
.
فى رايك ليه الذوق و النخوه انعدموا؟؟؟؟
لأ هم لسه مانعدموش, هم قلوا بس

والسبب ان لما يكون واحد مضيع عمره في تعليم اكتشف انه مش هيفيده في الأخر, ومش لاقي شغل, والفقر مطلع عينه, واتظلم بدل المره الف, هيكون عنده 100 حاجه تشغل تفكيره غير الذوق والنخوه
أكيد ده مش تصرف صح, لكن الناس بردو معذوره وربنا يعينها
:D
.
.
.
ايه الحاجه اللى لو حصلتلك تبقى سعيد اوى؟؟؟
ان ربنا يجمعنى على خير بالانسان اللى قلبى اختاره
واننا نعيش حياتنا سوا واحنا سعداء وبنساعد بعض

أكيد هكون مبسوطه جداااااا
:)
.
.
تختار يبقى عندك...ارض زراعيه و لا اجنس عربيات و لا كام عماره و لا فلوس فى البنك؟؟؟؟
لو عندي كل دول ومعنديش الانسان اللي أحبه, يبقوا مالهمش اي لازمه

ولو عندي الانسان اللي بحبه هيبقي بيتي احسن من كام عمارة والموصلات احسن من الف عربيه
:)
.
.
البحر و لا النيل؟؟؟
البحر
.
.
.
مركب ولا طيارة ؟
طيارة لو سفر

لكن لو رحله رومانسيه يبقي علي يخت انا وحبيبي وبس
.
.
.
مجنون و لا عاقل؟؟
مجنونه طبعا

بس عاقله أحيانا
.
.
.
تقرى كتاب و لا تتفرج عليه فيلم؟؟؟
أقراه كتاب الأول وبعد كده أشوفه فيلم لو اتعمل فيلم
.
.


Tuesday, November 20, 2007

...تاج بالشيكولاته


انا عليا دلوقتي تاجين, واحد فيهم من أحمد مبرمج حر اللي مش عارفه هو ساكتلي ليه عليه لأنه من مده بس شكله نسي

والتاني من أحمد فؤاد مع نفسه

انا دلوقتي هحل واحد والتاني المره الجايه ان شاء الله

لما تصحي وتلاقي ان ده يوم جديد يبقي ده اكسير للتفاؤل

وجودك في حياتي اكسير تفاؤل

لما اسمع صوت صافي صاحبتي وهي بتقول ألو بطريقتها المميزه اللي بتخليني اضحك من قلبي اكسير تفاؤل

الحكم علي المجرم اسلام نبيه بالسجن حتي ولو كان 3 سنين بس اكسير تفاؤل

لما افتكر حالي من سنة بالظبط واشوف حالي دلوقتي اكسير تفاؤل

قرأة القران اكسير تفاؤل

قرأة كتاب لا تحزن اكسير تفاؤل

رجوع هبه صاحبتي لهبه اللي كانت موجوده من 4 سنين اكسير تفاؤل

انك تلاقي حد بيعيط قبلك لما يحس ان صوتك مخنوق ويضحك من قلبه عشان انت مبسوط اكسير تفاؤل

اني مبقتش بخاف من حد ولا حاجه عشان عارفه ان ربنا مش هيزعلني تاني اكسير تفاؤل

لما ترفع عنيك للسماء وهي مليانه دموع وانت مخنوق وترجعلك والدموع راحت وفي ابتسامه علي شفايفك اكسير تفاؤل

وجود حد في حياتك بتقسم معاه الحزن والفرح سواء كان صديق او حبيب او اي حد من اي علاقه تانيه اكسير تفاؤل

لما منة ترجع من كايرو كل يوم تلات بالليل اكسير تفاؤل

لما تساعد حد محتاج مساعدتك دي بجد ده اكسير تفاؤل

لما أكون عارفه ليه ده أكسير تفاؤل

لما تكتشف ان في ناس ماقبلتش صاحب بجد في حياتها وانت عندك أكتر من واحد ده أكسير تفاؤل

لما تكون عارف ان مسير الضي لوحده هيلمع ومسير الضحك لوحده هيطلع مابيجرحش ولا يئذيش اكسير تفاؤل

لما تكون مزنوق ومش عارف تتكلم وانا استغل الفرصه عشان اخليك توافق علي طلباتي الأشريره ونضحك احنا الاتنين من قلبنا اكسير تفاؤل

لما اطلع ميلك شيك في لو كنت مشروب كنت هتكون ايه وانا بحبه جدا اكسير تفاؤل

انكم استحملتوني لحد دلوقتي اكسير تفاؤل


نمرر التاج لمين بقي

Tuesday, November 6, 2007

...عندما تعتقد



عندما تعتقد أنك أحببت من قبل
وانك لن تستطيع أن تحب مرة أخري


عندما تعتقد انك أصبحت تصلح لأي شئ في الحياة دون الحب

سوف تكتشف أنك لم تحب قبل ذلك
وأنك الأن في انتظار حبك الحقيقي والذي سوف يأتي كما حلمت به وتمنيته تماما

Saturday, November 3, 2007

...عيد ميلاد ملاكنا



النهارده عيد ميلاد ملاك المدونين
Me, talking عيد ميلاد منة أختي


كل سنة اونتي طيبه ياموني ويارب عقبال 1000000 سنة
دي اول مره يجي عيد ميلادك وانت مسافره ياقمرنا
(: ياريتك كنتي المره دي كمان معانا



يالا الكل يقول لمنة كل سنة وانت طيبه



وماتنسوش الهديه

Monday, October 22, 2007

...عن فاروق اتحدث


احنا اتخدعنا ياجماعه واضحك علينا
عشنا سنين عمرنا اللي فاتت وهم بيقولولنا ان الملك فاروق راجل وحش وظالم ومفتري
انا كنت قرأت موضوع لأنيس منصور وكان بعنوان رجلين ظلمتهم مصر
الملك فاروق و محمد نجيب

وفهمت منه ان الراجل مكنش وحش للدرجه دي
وعشان كده اتفرجت علي مسلسل الملك فاروق اللي المفروض انه اول عمل درامي يتناول قصية حياة الملك
وأكيد اللي شجعني أكتر ان اللي هيقوم بدور روكي هو تيم حسن اللي بحبه جدااااا

وفعلا بدأت اتعرف علي فاروق جديد خالص
ملك ظريف جدا وبيحب بلده اوووووووووي
مكنش عميل للانجليز وكان بيتمني دخول الألمان مصر عشانهم أمنوا بحرية مصر واستقلالها, وكان بيمدهم بالمعلومات كمان
روكي -زي مانا بحب اقول عليه- كان ملك بيحب بلده وشعبه وكان مخلص لهم
ولما الظباط الأحرار بدأو مطالبهم وافق عليها كلها
ورفض ان الجيش يوقفهم عند حدهم وقال كلمه جميله اووووووووي

مش هنزل الجيش عشان يقتل بعضه

لما الانجليز حاصروا السرايه بالدبابات كان متأكد انه لو رفض مطالبهم شعبه هيقف جنبه
بس هو وافق وقال انه مش عايز حمامات دم من شعبه

فاروق كان حريص علي حياة رعيته لأبعد الحدود
فاروق مكنش وحش كده زي ماقالوا لنا في الكتب ودرسوا لنا
فاروق كان ظريف ودمه خفيف
ولما خرج من مصر خرج وقلبه مكسور
فاروق كان احسن بكتير من ناس ضحكوا علينا وقالوا لنا عنهم انهم ابطال
فاروق فعلا التاريخ ظلمه, يمكن ده لأن مصر زادت أكتر من 50 مليون عن يوم رحيله
أنصح اي حد ماشفش مسلسل الملك فارق انه يتابعه, أعتقد انه هيعجبه, وهيعرف ان فاروق كان ملك بجد

Saturday, October 13, 2007

..عيــــد سعـــــيد


العيد السنه دي أحلي كل الأعياد
والأفراح بتنادي جيالنا في الميعاد

Thursday, October 4, 2007

..الحرية لمحمد الدريني

تم اعتقال محمد الدريني رئيس المجلس الاعلي لرعاية آل البيت فجر أول أكتوبر
والسبب تأليفه لكتاب عاصمة جهنم
الكتاب اللي وصف فيه جرائم التعذيب في السجون المصريه
شاركوا في حملة المطالبة بحرية محمد الدريني عن طريق اللينك ده

طاطي راسك طاطي طــــاطي
انت ف وطن ديمقراطـــــــي
انت بتنـــعــــم بالحــــــــــرية
بس بشرط تكون مطاطــــــي

لما تكون شغــال بذمــــــــــة
خايف على مصــلحة الأمــة
شغلك يطلع من غير لازمــة
علشان مبيعلاش غير واطي
طاطي راسك طاطي طاطـــي
انت ف وطن ديمـــــقراطي

لما حاميها يكون حراميــها
وبلاده ورا ضهره رامـيـها
طالع نازل واكل فيـــــــــها
مسنود بالبدلة الظباطــــي
طاطي راسك طاطي طاطـــي
انت ف وطن ديمـــــقراطي

لما شــقاك يصــبح مش ليك
فقرك سد السكة علــــــــــيك
تتلفّت تلــــقى حـــوالـــــــيك
إما حرامي و إما عقــــاطي
طاطي راسك طاطي طاطــــي
انت ف وطن ديمقراطـــــــي

لماتلاقي بـــــلاد الـدنـيـــــــا
فيها البني آدم حــــاجة تانية
وانت في الطبقات الـــــــدنيا
قرد مسلسل أو وطواطــــي
طاطي راسك طاطي طاطـــي
انت ف وطن ديمقراطــــــي


لما الجهلة يبــــــقوا أمــامــك
أو فوقك ماسكــين ف زمامك
ويسوقك ع الهــلكة إمامك
تشرب م السم السقـــــراطي
طاطي راسك طاطــــي طاطي
انت ف وطن ديمقـــــــراطي

لمــــا الكلـــمة تكون بتدينـك
لما تخبي ف قلـــــــبك دينــك
لما الذل أشوفه ف عيـــــــنك
هات إحباطك على إحباطــــي
طاطي راسك طاطي طاطـــي
انت ف وطن ديمقراطــــــي
انت ف وطن ديمقراطـــــــي
كلمات أبو زيد بيومي

Saturday, September 29, 2007

...الأيام العصيبه




لا يري المرء الأيام العصيبه في مجموعة الصور
ولكن هذه الأيام هي التي تنقلك من صورة سعيدة الي أخري

just married movie

Sunday, September 23, 2007

..لو يرجع بيا الزمن

هو: لو يرجع بيا الزمن مش ممكن أضيعك تاني
مش ممكن أتخلي عنك او أسيبك
هقف قدام العالم كله وهحاربه عشان أكون معاكي
هي: لو يرجع بيا الزمن مش هضيع وقتي في اني أعرفك أصلا

Monday, September 17, 2007

.بحبك اوووووووي


أنا عارفه انك بتحبني
بجد كتيييييير اوووي بفكر ايه اللي أنا عملته عشان تحبني
واكيد مش بلاقي اجابه؟
رغم اني دايما بغلط, وأحيانا ببعد
لكنك دايما بتسامحني, ولما برجع بتقبلني ده لو مكنتش انت اللي مرجعني
انت عارف انا بحبك اد ايه, وعارف ان اللي جوايا مش هقدر أعبر عنه
بس أنا بجد بحبك اويييييييييييييي وعمري مازعلت منك
انت عارف, مانت اكيد عارف, يوم ماقلتلك اني هنت عليهم وده عادي لكني هنت عليك انت ازاي؟
انا كنت عارفه اني مهنتش عليك ولا حاجه
بس انت عارف احساسي كان ايه ساعتها
ويمكن قلت كده عشان تثبتلي اني مهنتش عليك, وفعلا أثبتلي
أنا دلوقتي بقيت عارفه كل اجابات الأسئله اللي سألتها زمان اللي كانت دايما بتكون ليه؟
أنا عارفه انها كان ليها سبب عندك , بس انا كنت عايزه أعرفه
أنا دلوقتي موافقه علي السبب ده
مفيهاش حاجه لو خسرنا سنين عشان حاجه بجد هتيجي بعد كده وتستاهل
ساعتها بس بنقول ان السنين دي مش بتساوي حاجه قصاد يوم مع الحاجه اللي تستاهل
عادي اننا نقابل الناس الغلط, وعادي اننا نتجرح منهم
أمال هنعرف قيمة الناس الصح ازاي؟
انا بجد دلوقتي راضيه اويييييي
ومبسوطه من اختيارك ليا
ومتأكده اني لو كنت فكرت 100 سنة مكنتش هوصل للاختيار الصح اللي انت اختارتهولي
أنا دلوقتي لما بقول حاجه ببقي متأكده انها هتحصل
ولما أصحابي يسألوني انت متأكده اوي كده ليه؟
بقولهم ان ده لأني واثقه فيك اووي
في منهم بيرد وفي منهم مش بيلاقي حاجه يقولها فبيسكت
بس مع الوقت انت بتثبتلهم ان ثقتي فيك صح
انا دلوقتي مش بختبر الثقه دي, كنت الأول بقول وأشوف هيحصل ولا لأ
وأقول لنفسي لأ عيب انت واثقه فيه
يمكن عشان كنت لسه في الأول
دلوقتي بجد بقيت متأكده ان اللي انا واثقه فيه هيحصل حتي لو اتأخر
وبقيت عارفه اني واثقه في الوحيد اللي يقدر يعمل كل حاجه
عارف المره اللي قبل الأخيره لما كنت مخنوقه, لما عيطت في البلكونه وأحمد أخويا شافني وسألني و زعل عشان قلتله من غير سبب, هو زعل لأنه افتكر اني خبيت عليه
بس انت عارف انه فعلا كان من غير سبب
بس انا قلتلك ساعتها اني فعلا زعلانه
انا مبسوطه اووي بجد انك دلوقتي أسعدتني
واديتني أكتر مما كنت أتخيل
ساعات بفكر انا عملت ايه بجد عشان تديني ده
بس برجع أقول ان ده عشان انت بتحبني
وأكيد الحب ده مالوش أسباب
لأني أكيد معملتش حاجه أو موقف ممكن يخليك تحبني كده
انا مبسوطه اووي انك جنبي
وانك دايما معايا
انا دلوقتي معنتش بخاف
بقيت عارفه انك هتعملي الأحسن ليا
وبقيت بنام وانا مطمنه ومش شايله هم
وبقيت عارفه انك هتعملي اللي انا عايزاه وهتوفقني فيه
انا بحبك اووي بجد وانت عارف ده
بجد أسفه علي كل غلطه غلطها في حقك
وبجد شكرا انك سامحتني ودايما بتسامحني ودايما بتوافق اني أرجع
بس ده العادي مش انت الغفور الرحيم الكريم

Thursday, September 13, 2007

...اللهم تقبل منا رمضان

Sunday, September 9, 2007

...حوار بين ذكر وانثى

قال لها ألا تلاحظين أن الكـون ذكـراً ؟
!فقالت له بلى لاحظت أن الكينونة أنثى
قال لها ألم تدركي بأن النـور ذكـرا ً ؟
!فقالت له بل أدركت أن الشمس أنثـى
قـال لهـا أوليـس الكـرم ذكــرا ً ؟
!فقالت له نعم ولكـن الكرامـة أنثـى
قال لها ألا يعجبـك أن الشِعـر ذكـرا ً؟
!فقالت له وأعجبني أكثر أن المشاعر أنثى
قال لها هل تعلميـن أن العلـم ذكـرا ً؟
!فقالت له إنني أعرف أن المعرفة أنثـى
فأخذ نفسـا ً عميقـا ًوهو مغمض عينيه ثم عاد ونظر إليها بصمت لـلــحــظــات وبـعـد ذلك
قال لها سمعت أحدهم يقول أن الخيانة أنثى
فقالت له ورأيت أحدهم يكتب أن الغدر ذكرا
قال لها ولكنهم يقولون أن الخديعـة أنثـى
فقالت له بل هن يقلـن أن الكـذب ذكـرا
ًقال لها هناك من أكّد لـي أن الحماقـة أنثـى
فقالت له وهنا من أثبت لي أن الغباء ذكـرا
قـال لهـا أنـا أظـن أن الجريمـة أنـثـى
فقالـت لـه وأنـا أجـزم أن الإثـم ذكـرا
ًقـال لهـا أنـا تعلمـت أن البشاعـة أنثـى
فقالـت لـه وأنـا أدركـت أن القبـح ذكرا

تنحنح ثم أخذ كأس الماء فشربه كله دفعة واحـدة أما هـي فخافـت عنـدإمساكه بالكأس مما جعلها ابتسمت ما أن رأته يشرب وعندما رآها تبتسم له

قال لها يبدو أنك محقة فالطبيعة أنثـى
فقالت له وأنت قد أصبت فالجمال ذكـراً
قـال لهـا لا بـل السـعـادة أنـثـى
فقالت له ربمـا ولـكن الحـب ذكـرا
قال لها وأنا أعترف بأن التضحية أنثـى
فقالت له وأنا أقر بأن الصفـح ذكـرا
قال لها ولكنني على ثقة بأن الدنيا أنثى
فقالت له وأنا على يقين بأن القلب ذكرا

منقول

Friday, August 31, 2007

..عيد ميلاد وامتحانات


النهارده 31/8 عيد ميلاد أحمد فؤاد مع نفسى


كل سنة وانت طيب ياأحمد ويارب عقبال

سنة 1000000000





وبكره 1/9 أول يوم في امتحانات أحمد , لأنه في طب ونظامهم غير نظام البشر كلهم

ادعوله كتييييييييييييير, عشان ربنا يوفقه ويخلص السنه دي والجايه ويتخصص بقي


ربنا معاك ياأحمد , ويوفقك يارب, وتبقي أحسن دكتور في الدنيا


----------------------

البانر من تصميم أحمد مبرمج حر

Tuesday, August 28, 2007

...أنا العبد


أنـا الـعـبد الـذي كـسـب الذنوبا
و صـــدتـه الأمـاني أن يـتـوبـا

أنـا الـعـبد الذي أضـحـي حزينا
عـــلـي زلا تــه قــلـقـا كـئـيـبـا


أنــا الـعـبد الـذي سـترت عـليـه
صحائف لم يخاف فيها الرقيـبـا

أنـا العبـد المسيئ عـصـيت سرا
فــمالـي الأن لا أبـدي الـنـحـيـبـا


أنــا العـبـد المفـرط ضاع عمري
فـلـم أرعي الشـبـيبة والمـشـيبه

أنـا العـبـد الغريـق بـلـوج بحـــر
أصــيـح لـربــما ألـقـي مـجـيـبــا


أنــا العـبـد السـقـيـم مـن الخطـايا
وقــد أقـبـلـت ألـتـمـس الـطـبـيـبـا

أنـا العـبـد الشـريـد ظـلمـت نفسـي
وقــــد وافـــيــت بــابــكـم مــنـيـبـا


: انـــشــاد

مـــشــاري راشــــد

Saturday, August 25, 2007

..عيد ميلاد مبرمج حر



النهارده عيد ميلاد أخويا العزيز أحمد مبرمج حر


كل سنة وانت طيب ياحمد

ويارب عقبال 100000 سنه

Saturday, August 18, 2007

..أمشي بعيد


أحيانا بحس ان أنا عايزه أمشي
عايزه أسيب كل شئ وكل الناس اللي أعرفهم ورايا
معرفش ببقي عايزه أرجع تاني ولالأ
لكن المهم اني أمشي, أمشي بعيد اوووي
أحيانا تانيه بكون راضيه بوجودي هنا حتي لو مكنتش سعيده بيه, وبقول ماينفعش اني أمشي, عشان حرام عليا, وهيزعلوا عليا
لكن برجع أقول ان مفيش زعل بيدوم وان مسيرهم هينسوا ومش هيفتكروا حتي ان أنا كنت موجوده هنا في يوم من الأيام
عايزه أروح بعيد أووي, يمكن هناك أقدر ألاقي مكاني, ويمكن ألاقيهم هناك, بس هناك يكونوا أحسن بكتير من هنا
أحيانا تانيه بكون مش عايزه أمشي, بحس ان كده كفايه واني لازم أروّح , لكني بفضل هنا ومش بروّح, رغم اني بتخير بين بقائي ومرواحي خالص, الا اني بختار بقائي عشان بخاف لمرواحي يجرحهم حتي لو كان وجودي بيجرحني انا





أنا عارفه ان كلامي ده هيضايقك, وانك هتزعل لما تعرف اني عايزه أسيب كل الناس اللي أعرفهم ورايا وأمشي, لكن انت مش من الناس, انت من نفسي, وحتي لو مكنتش معايا فأكيد هتكون هناك معايا

Friday, August 17, 2007

..امتحان القضايا المعاصره


بما ان النتيجه ظهرت ونجحت الحمدالله
يبقي أحكيلكوا بقي علي امتحان القضايا المعاصره
الماده دي من 3 كتب, ودي حاجه نادره عندنا في الكليه, لأن أيام زمان كانت الماده بتكون طويلة جدا لو منهجها 30 صفحه مش 3 كتب
بس هي بتتكلم عن الوراثة وزراعة الأنسجه وعشان كده انا كنت بحبها
وانا من عادتي اني مش بروح الامتحان غير الساعه 11 و عشره, ومعرفش أدخل الامتحان قبل كده
يومها بابا اداني العربيه وانا رايحه الامتحان, وطبعا قالي انزلي بدري عشان تسوقي علي مهلك
وكان قاعدلي وعشان كده اضطريت أنزل 10 ونص فعلا
ووصلت عند الكليه 11 الا ثلث, وبعدين يعني هدخل بدري واسقط في الامتحان انا ولا ايه يعني؟
فطبعا فضلت قعده اراجع ولما جت الساعه 11 وعشره نزلت وسيبت الكتب ودخلت الكليه
وكان في بنت جايه دخلت معايا ومكنتش أعرف انها معايا في نفس اللجنه
احنا بنمتحن في أول دور في الطرقه
وطلعت ففي واحد قالي الدكتور مش هيدخلكم الامتحان
بصلته بصت انت عبيط ولا ايه, وهو للأسف ماشفهاش عشان انا كنت لابسه النضاره, ودخلت والبنت ورايا طبعا
لقيت واحد بيقول: انت يابنت انت وهي تعالوا هنا
أكيد بيكلمنا احنا لأن بقيت البنات قاعدين بيقروا ورقة الأسئله
ادورت روحتله وهي ورايا طبعا
هو:انتوا مش هتحضروا الامتحان, اتفضلوا روحوا يالا, الأمن , انا عايز الأمن , هاتولي الأمن
بصتله نظرت انت عبيط ولا ايه, بس للأسف ماشفهاش لأني كنت لابسه النضاره
البنت: الحقي مش هيدخلنا الامتحان وهيجبلنا الأمن
بصيتلها نظرت انت عبيطه انت كمان ولا ايه, وللأسف بردو ماشفتهاش
أنا: مفيش حد يقدر يمنعنا من دخول الامتحان, سيبيه يجيب الأمن
هي: انت متأكده
أنا : أها
هي: ماشي ووقفت جنبي
جت المراقبه اللي بتراقب في أول لجنه
المراقبه: معلش يادكتور
هو : أبدا
المراقبه: حقك عليهم يادكتور هم أسفين ومش هيتأخروا تاني مش انتو أسفين يابنات
وبصتلي منتظره الرد, والبنت كمان بصتلي عشان تعرف نقول ايه؟ يعني مصممين اني أتكلم
أنا: حضرتك احنا مش هنطلب وقت زياده بدل الوقت اللي اتأخرناه
هو: يعني ايه مش فاهم
أنا: يعني لو احنا مالحقناش نخلص حل عشان احنا جينا متأخر مش هنطلب من حضرتك وقت زياده
هو: اه يعني مجيكم متأخر واقف عليكم انتم بخساره مش عليا أنا
أنا: أكيد لو ملحقناش نخلص حل يبقي احنا اللي خسرانين
هو: تصدقي انك قليلة الذوق
أن أن أن تييييييييش
غلط فيا, ومعرفش ازاي ماردتش عليه, كل اللي عملته اني قلتله ميرسي شكرا, ونزلت النضاره وبصتله من فوق لتحت ودخلت اللجنه, والبنت طبعا ورايا
ودخلت قعدت مكاني وساعتها عرفت ان البنت معايا في اللجنه, ومضيت حضور, وجت المراقبه بتاعة أول لجنه
المراقبه: انت رديتي علي الدكتور ليه بس, ده مكنش هيدخلك اللجنه لولا ان انا اتوسطلكم عنده
الناس دي عبيطه ولا بتستعبط
أنا: انا مفيش حد يقدر انه مايدخلنيش اللجنه ولا انه يمنعني من حضور الامتحان
هي: يعني هو مكانش يقدر يمنعك منه
أنا : لأ أنا عارفه حقوقي كويس, وهو مكنش يقدر يمكنعني من دخول الامتحان
هي: طب اسكتي بدل مادبسلك الورقه
أنا: ليه حضرتك ظبطيني بغش
هي: هي الورقه ماتدبسش غير لما تكوني مظبوطه بتغشي
أنا: اها
هي: طب هاتي كرنيهك وانا هخلي الدكتور يجي يدبسها
فتحت الشنطه, خرجت الكارنيه واديتهولها, وهي أخدته ومشيت , وفي عنيها نظرة اسبهلال
مسكت ورقة الاجابه عشان أسطرها وهو جه وقف قدامي وبيسأل فين البنت؟
هي: اهي يادكتور قدام حضرتك
ومد ايده اخد الورقه
هو: اتفضلي انت مش هتمتحني النهارده
أنا: لو سمحت رجع ورقة الاجابه بتاعتي عشان همتحن
هو: مفيش امتحان, واتفضلي
أنا كنت قاعده عادي, فقعدت بالجنب , وحطيت رجل علي رجل( دي عاده فيا مش بعرف أبطلها) وقلتله عايزه ورقتي لو سمحت
هو مشي وجت المراقبه بتاعتي
المراقبه: الدكتور ده طيب قومي اعتذريله وهو هديكي الورقه
بصتلها نظرة انت عبيطه ولا ايه, والحمدلله شافتها لأني كنت قلعت النضاره
أنا: حضرتك المسؤله عن اللي بيحصل في اللجنه هنا, فياريت تجيبي ورقتي منه
هي سكتت ومشت
ولقيت رجل شعره ابيض واقف قدامي عرفت فيما بعد انه مدير الكلية ومعاه واحد صغير في السن ولابس نضاره شمس وعرفت بعد كده انه دكتور عندنا
الدكتور: في ايه؟
أنا: سحب مني ورقة الاجابه وانا عايزه ورقتي
مدير الكليه: طب انت اتأخرتي ليه؟
أنا: أنا بالفعل جيت متأخر , ودلوقتي عايزه ورقتي
هو: يانا ياهي في الكليه دي, مش هتمتحن يعني مش هتمتحن, لو هي امتحنت أنا هسيب الكليه وهمشي, الأدب فضلوه علي العلم
أنا: لو سمحتوا ياريت ماتخليهوش يغلط, لأنه لو غلط أنا هرد عليه, كفايه انه غلط فيا بره وانا سكت
راحله مدير الكليه وفضل معايا الدكتور
الدكتور: بصي سيبك منه, خليكي معايا أنا , ماترديش عليه وانا هجيبلك الورقه
أنا: والوقت اللي بيضيع ده محسوب علي مين
الدكتور: انا هضيفلك الوقت اللي انت عايزاه لما الوقت يخلص , بس ماترديش عليه عشان خاطري
أنا: اوك يادكتور, عشان خاطر حضرتك
وراح فعلا جابلي الورقه وجه اديهالي وقلتله ميرسي, وادور علي الدكتور التاني الاقيه موجود عادي, ايه الناس اللي ملهاش كلمه دي, مش هو قال اني لو امتحنت هيمشي ويسيب الكليه؟؟؟
المهم انا امتحنت وخلصت امتحان وسلمت الورقه قبل الوقت مايخلص والله
وجت المراقبه بتاعتي
هي: خلصتي خلاص
أنا : اها
ناولتني ورقة الأسئله وقالت: اعتذري للدكتور بقي
بصيتلها نظرة انت عبيطه ولا ايه, اللي شافتها لأني مكنتش لسه لبست النضاره, وأخدت منها الورقه
ناولتي المسطره والله ده الدكتور ده طيب
مردتش عليها وأخدت منها المسطره
ناولتني المفتاح مفيهاش حاجه يعني لما تعتذريله
أنا : أنا مش هعتذر لحد لأني ماغلطتش في حد
اديتني النضاره: بس هو طيب والله
لبست النضاره وقلتلها اوك بعد اذنك
هو: لو سمحتي استنيني فوق قدام اوضة الكنترول
أنا: وهي فين اوضة الكنترول
هو: فوق علي ايدك الشمال
طلعت فوق ولقيت الدكتور اللي جابلي الورقه, وقلتله ميرسي يادكتور, وقالي أي خدمه
هو جه وكان معاه مدير الكليه , وقالي تعالي عايزك ودخلنا الكنترول
هو: أنا عايزك أقولك كلمتين ماعرفتش أقولهملك تحت, بصي يابنتي, انت زي بنتي بالظبط, انا حتي عندي بنت قدك, طب انت عارفه انا بنتي شبهك والله , حتي اسألي دكتور ابراهيم
دكتور ابراهيم كان دكتور رابع قاعد في الكنترول وأومأ براسه, رغم اني اعتقد انه مش عارف احنا بنتكلم عن ايه
هو: وعشان كده انا مش عايزك تزعلي مني, انا كده كده كنت هسيبك تمتحني طبعا, لكن انت المفروض كنت تقوليلي معلش يادكتور وانا أسفه يادكتور ومعنتش هتأخر تاني وحقك عليا وكده
انا ضاحكه: لأ سوري يادكتور انا مش بعرف اقول الكلام ده
هو: مش مشكله المهم انك ماتكونيش زعلانه يابنتي, وانت زي بنتي والله
انا : اوك يادكتور ميرسي, بعد اذنكم
ونزلت وروحت والحمدلله النتيجة طلعت أخيرا امبارح ونجحت
 

The Lost Princess © 2008. Design By: SkinCorner