Tuesday, January 23, 2007

ليه مش سعيد في حياته؟


كانت قاعده في المعديه وبتبص للبحر , وجه حد قعد جنبها وقالها ازيك؟
لما سمعت الصوت عرفته لكنها ماكنتش عارفه ده حقيقي ولا لأ , بس هي ماكنتش بتفكر فيه يبقي
ليه تتخيل صوته؟
بصت جنبها عشان تلاقيه فعلا قاعد وهي مش بيتهيألها, دورت وشها تاني وكأنها
مش عارفه تعمل ايه؟
قال: ازيك عامله ايه؟
قالت: الحمدلله كويسه, انت ازي بنوتك؟
قال : الحمدلله, شبهك.
قالت: شبهي ازاي بس؟
قال: ماعرفش هي شبهك وخلاص.
طول الحوار وهي بيبص علي اديها اللي كانت جوه جيوبها, ولما خرجتها ابتسم وقال: مافيش حد لسه؟
قالت : لأ فيه
قال : بجد؟
قالت : أيوه بجد , بس الخطوبه بعد الامتحانات , لكن الأهل مكلمين بعض وهو في أخر سنه السنه دي ان شاء الله.
قال: بتحبيه؟
قالت: جداا
سكت ووشه اتغير
قالت: أنا فعلا في وقت اعتقدت اني مش هعرف أحب تاني , وهو ساعتها دخل حياتي وحبيته وبقيت بحبه جدا.
قال: مسامحاني؟.
قالت: أنا قولتلك قبل كده اني مسامحاك من زمان.
قال: أمال أنا ليه مش متهني في حياتي؟
قالت: بجد ماعرفش , حقيقي أنا سامحتك من زمان أنا مكنش ممكن اني أفضل أدعي عليك , بجد أنا فعلا سامحتك.
قال: أمال أنا ليه مش مبسوط في حياتي؟
قالت: حقيقي مش عارفه

المعديه وصلت وكل واحد فيهم مشي في طريقه
معرفش ليه وصاحبتي بتحكيلي اللي حصل رجعت تاني 3 سنين لورا وافتكرت كل اللي حصل, كانت بتحبه أد ايه وهو كمان كان بيحبها جدا, وانه فجأه اختفي من حياتها , عملت كل حاجه عشان توصله ولما وصلت , كان كلامه معاها بارد, فهمت انه بيحاول يبعدها عن حياته بأي طريقه , بعدت واكتشفت بعد كده انه كان خطب تحت ضغط من والده, وانه عاملها بالطريقه دي عشان تقدر تنساه, وانه سمي بنته علي اسمها, افتكرت يوم ماقابلته من سنه تقريبا برضو بالقدر وقالها أنا سميت بنتي علي اسمك وهي قالت عارفه, وكان رده أنا بس عايزك تعرفي اني لسه فاكر
مافقتش غير وصاحبتي بتقولي هو ليه مش سعيد في حياته
قلت: هو احنا ليه فاهمين ربنا غلط؟ هو احنا لازم ندعي عشان ربنا ياخد لنا حقنا؟ مين اللي قال كده؟ هي لو كانت دعت كان هيعيش حياه أسواء من كده, لكنها سامحته, وكان لازم يبفهم ان الحق لازم يرد الحقوق, وانه ماينفعش يسيب حد مظلوم من غير ماياخد له حقه, هو لما اتحط في الاختيار , اختار انه يظلمها, وقال انه بكره هينساها, وهي كمان هتنسي, كان عارف ان مافيش حد بيقدر ينسي حبيب حبه بجد, لكنه قال أنا هقدر , وأكيد ربنا هيساعدني, طب ازاي كان عايز ربنا يساعده وهو بيظلم حد مالوش ذنب؟ هو كان متخيل ان ربنا ممكن يساعده علي الظلم؟
أنا متأكده انها فعلا نسيت , وانها دلوقتي بتحب بجد, وبرضو كنت متأكده انه مش سعيد في حياته , لأني مؤمنه جدا برب اسمه الحق مش ممكن يضيع الحقوق

ماعرفش ليه افتكرتك, وبجد خفت عليك, كان نفسي اني أكلمك وأقولك , لكن
ماقدرتش, أنا عارفه انك ماتعرفش هنا, ومش هتقرأ الكلام ده , لكن ماعرفش ليه كان لازم أقول اني افتكرتك واني بجد خايفه عليك.
رساله:
لو اتحطيت في موقف وكان بايدك انك تظلم حد, اوعي تظلمه وتقول أنا بعمل كده عشان مصلحته,لأنه عارف مصلحته كويس ويقدر انه يختار, ربنا كان بيختبر قوة ارادتك وانت كده هتبقي سلمت من أول الطريق, اوعي تقول ماكنش قدامي حل تاني, لأن الحلول احنا اللي بنخلقها.
حقيقي أنا مش عارفه ليه بن أدم بيعمل في نفسه كده.

Wednesday, January 10, 2007

كلمه ماقولتهاش


أنا أسف دي كلمه

كلمه ماقولتهاش

أه لو كنت قولتها

كان اليوم ده ما جاش

مش كل الناس بتعرف تقول أسف, في ناس كتير مش بتعرف , أو بيكابرو وبيشوفو انهم ماينفعوش يعتذرو.


أنا ماكنتش بعرف أقول أنا أسفه, ولأني أصلا من برج الثور يعني عنديه حبتين فمش ممكن أبدا اني اعترف اني غلطانه , لكني لما كبرت عرفت ان مش عيب اني أعتذر, لأ ده انا اتعلمت اني لما أغلط لازم أقول أنا أسفه لأن ده أقل حق للانسان اللي أنا غلطت فيه.


لما سمعت الأغنيه دي, فكرت.. في أد ايه ناس بيخسرو ناس مهمين في حياتهم عشان مقالوش أسفين وفي أد ايه من الناس دي ناس مش ممكن نرجعها تاني, كمان في ناس كتير بتكون مستنيه اعتذار انسان عزيز عليها غلط في حقها عشان تسامحه, لكنه مش بيعتذر ومش بيقول أسف.


كام مره اتحطيت في موقف انك كان لازم تقول أسف وماقولتش؟ ولو الزمن رجع هتقول ولا لأ؟ وكام مره استنيت كلمة أسف من شخص معين ومجاش وماقلهاش, وده أثر في العلاقه بينكم ومارجعتش زي الأول؟

Saturday, January 6, 2007

انت بجد أسعدتني


كنا خارجين خامس يوم العيد أنا وأخويا وأختي وأولاد خالتي
وكان يوم بجد جميل.
واحنا مروحين , أخويا ركن العربيه استغربت ومفهمتش هو ركن ليه , حتي بن خالتي كان سبقنا فرجع عشان يشوف وقفنا ليه؟
قولتله وقفت ليه؟ قالي انزلي
وفتح بابه وقالي تعالي عشان تسوقي
نزلت وركبت مكانه وسوقتها وبن خالتنا فضل ماشي جنبنا
وخلصت وروحنا
كنت سعيده جدا, مبسوطه كتيير لأني مطلبتش منه يخليني أسوق هو عرض عليا لوحده, وكمان دي أول مره أسوق في الشارع.
واكتشفت حاجه مهمه, ان حاجات بسيطه بنعملها بتلقائيه وبدون تخطيط ممكن تسعد شخص تاني جدا.
أخويا العزيز بجد شكرا ليك انت سعدتني

Wednesday, January 3, 2007

حكاية بن عمي وعيلتنا


ابن عمي ساكن في العماره اللي جنبنا, كانت علاقته بينا كويسه, بس في ناس ضحكو عليه وخلوه يغلط في حق أخوه, أخوه مأخدش بالو اننا اهل في بعض وراح اشتكاه للحكومه, تخيلو أخ يشتكي أخوه للحكومه, الحكومه جت حاصرت بيت بن عمي بس هو مرضاش يسلم, أصله طول عمره بيقول للحكومه لأ, وهي انتهزت الفرصه عشان تأدبه وتعرفه ان مفيش حد ينفع يقولها لأ, أنا عارفه ان بن عمي غلط في حق أخوه , بس بصراحه كان بيخليني أمشي وانا رافعه راسي انه قال للحكومه لأ, كنت عارفه أخطاؤه بس هو مين فينا مابيغلطش, مين فينا مابيضعفش, لكنه عمره ماوطي راسه كان دايما رافعها وكان دايما بيعرف يقول لأ.


الحصار زاد حوالين البيت , منعوعن أهل بن عمي الأكل والدوا , بيضغطو عليه عشان يسلم, لكنه مسلمش وفضل يقولوهم لأ, لما شوفت اللي حصله واصراره علي رفع راسه وراسنا نسيت انه غلط في حق أخوه , ونسيت انه غلط في حق أي حد, ماهو بن عمي ولو مكنتش أنا أسامحه مين اللي يسامحه؟ لو مكنتش أنا أقف جنبه مين اللي يقف جنبه؟ بس أخوه ماسمحش وموقفش جنبه.

ولما الحكومه تعبت من الحصار وقرارو انهم لازم يدخلو البيت معرفوش يدخلوه ازاي ؟ عرضو علي أخوه انه يدخلهم أصله ساكن في الشقه اللي جنبه, ووافق بن عمي علي خيانة أخوه ووافق يدخل الأغراب بيت أخوه , مفكرش في حرمة البيت وان مهما أخويا عمل مدخلش أغراب بيته.

دخلو البيت ومسكوا بن عمي وبهدلو أهل البيت , وانا واقفه أتفرج , كل عيلتنا كانت واقفه تتفرج, كان فيه اللي مبسوطين أصلهم نسيو انه ابنهم وانه مهما حصل واحد
منهم, وفي زيي كانو مضايقين , بس زي معرفوش يعملو حاجه, وفضلو ساكتين.
أخدو بن عمي قال ايه عشان يحاكموه , كنت عارفه انها هتكون مسرحيه, وانهم عايزين يقتلوه عشان يكون عبره لأي حد يقولهم لأ, في محاكمته بن عمي مسكتش, حاول يفضح أغراضهم علي قد مايقدر, فضل يقول لهم لأ حتي وهو في سجونهم, عرضو عليه تسويه انهم ميقتلوهوش قصاد انه يغير موقفه منهم, بس بن عمي فضل يقول لأ وفضل رافع راسه وراسنا معاه, تفتكرو وهو رافع راسنا كده كان لازم نسامحه ولا لأ؟

جه ميعاد الحكم علي بن عمي وكان الاعدام, عيلتنا كلها فضلت ساكته, شويه مبسوطين, وشويه مش مصدقين انه ممكن يتعدم .

وصحينا في يوم, المفروض انه كان يوم عيد, قالولي بن عمك مات, قتلوه الفجر, الأول قولت لأ انتو فهمتو غلط, وبعد كده اتأكدت , أصلهم صوروه علي شريط فيديو عشان العبره تكمل والكل يشوف اللي قال لأ وهو بيموت, في مجموعه من اخواته حضرو موته وكانو فرحانين فيه, أصلهم نسيو ان هو أخوهم.

هو مات, بس تخيلو مات وهو واقف, موطاش لحد ومخافش لحظة موته, يمكن هما حاولو يعملو منه عبره لكنه أصبح بطل عند ناس كتير , بس مش عندنا مش عند أهله ولا أخواته

أنا مكنتش ضد انه يتعاقب علي أخطاؤه بس احنا أهله اللي نعاقبه, مش الأغراب اللي يقتلوه ومش عشان غلطه فينا, دول قتلوه عشانو قالهم لأ.


أكيد عرفتو هو مين؟


ابن عمي هو صدام حسين, واحنا كلنا اهله واخواته اللي فضلنا ساكتين وبنتفرج.
اللهم ارحم موتي المسلمين


Tuesday, January 2, 2007

قول لأ


اعرض هذه اللافتة لفضح المسؤولين المعذبين و منتهكي الأعراض لردع كل صاحب سلطة تسول له نفسه إساءة معاملة مواطن عن موقع التعذيب فى مصر
 

The Lost Princess © 2008. Design By: SkinCorner