Wednesday, January 3, 2007

حكاية بن عمي وعيلتنا


ابن عمي ساكن في العماره اللي جنبنا, كانت علاقته بينا كويسه, بس في ناس ضحكو عليه وخلوه يغلط في حق أخوه, أخوه مأخدش بالو اننا اهل في بعض وراح اشتكاه للحكومه, تخيلو أخ يشتكي أخوه للحكومه, الحكومه جت حاصرت بيت بن عمي بس هو مرضاش يسلم, أصله طول عمره بيقول للحكومه لأ, وهي انتهزت الفرصه عشان تأدبه وتعرفه ان مفيش حد ينفع يقولها لأ, أنا عارفه ان بن عمي غلط في حق أخوه , بس بصراحه كان بيخليني أمشي وانا رافعه راسي انه قال للحكومه لأ, كنت عارفه أخطاؤه بس هو مين فينا مابيغلطش, مين فينا مابيضعفش, لكنه عمره ماوطي راسه كان دايما رافعها وكان دايما بيعرف يقول لأ.


الحصار زاد حوالين البيت , منعوعن أهل بن عمي الأكل والدوا , بيضغطو عليه عشان يسلم, لكنه مسلمش وفضل يقولوهم لأ, لما شوفت اللي حصله واصراره علي رفع راسه وراسنا نسيت انه غلط في حق أخوه , ونسيت انه غلط في حق أي حد, ماهو بن عمي ولو مكنتش أنا أسامحه مين اللي يسامحه؟ لو مكنتش أنا أقف جنبه مين اللي يقف جنبه؟ بس أخوه ماسمحش وموقفش جنبه.

ولما الحكومه تعبت من الحصار وقرارو انهم لازم يدخلو البيت معرفوش يدخلوه ازاي ؟ عرضو علي أخوه انه يدخلهم أصله ساكن في الشقه اللي جنبه, ووافق بن عمي علي خيانة أخوه ووافق يدخل الأغراب بيت أخوه , مفكرش في حرمة البيت وان مهما أخويا عمل مدخلش أغراب بيته.

دخلو البيت ومسكوا بن عمي وبهدلو أهل البيت , وانا واقفه أتفرج , كل عيلتنا كانت واقفه تتفرج, كان فيه اللي مبسوطين أصلهم نسيو انه ابنهم وانه مهما حصل واحد
منهم, وفي زيي كانو مضايقين , بس زي معرفوش يعملو حاجه, وفضلو ساكتين.
أخدو بن عمي قال ايه عشان يحاكموه , كنت عارفه انها هتكون مسرحيه, وانهم عايزين يقتلوه عشان يكون عبره لأي حد يقولهم لأ, في محاكمته بن عمي مسكتش, حاول يفضح أغراضهم علي قد مايقدر, فضل يقول لهم لأ حتي وهو في سجونهم, عرضو عليه تسويه انهم ميقتلوهوش قصاد انه يغير موقفه منهم, بس بن عمي فضل يقول لأ وفضل رافع راسه وراسنا معاه, تفتكرو وهو رافع راسنا كده كان لازم نسامحه ولا لأ؟

جه ميعاد الحكم علي بن عمي وكان الاعدام, عيلتنا كلها فضلت ساكته, شويه مبسوطين, وشويه مش مصدقين انه ممكن يتعدم .

وصحينا في يوم, المفروض انه كان يوم عيد, قالولي بن عمك مات, قتلوه الفجر, الأول قولت لأ انتو فهمتو غلط, وبعد كده اتأكدت , أصلهم صوروه علي شريط فيديو عشان العبره تكمل والكل يشوف اللي قال لأ وهو بيموت, في مجموعه من اخواته حضرو موته وكانو فرحانين فيه, أصلهم نسيو ان هو أخوهم.

هو مات, بس تخيلو مات وهو واقف, موطاش لحد ومخافش لحظة موته, يمكن هما حاولو يعملو منه عبره لكنه أصبح بطل عند ناس كتير , بس مش عندنا مش عند أهله ولا أخواته

أنا مكنتش ضد انه يتعاقب علي أخطاؤه بس احنا أهله اللي نعاقبه, مش الأغراب اللي يقتلوه ومش عشان غلطه فينا, دول قتلوه عشانو قالهم لأ.


أكيد عرفتو هو مين؟


ابن عمي هو صدام حسين, واحنا كلنا اهله واخواته اللي فضلنا ساكتين وبنتفرج.
اللهم ارحم موتي المسلمين


16 comments:

makhlouf said...

اسراء
حكايتك دى
بتحصلنا واحنا مش واخدين بالنا
الدور على ابن عم تانى كمان
لحد مايوصلنا احنا


سؤال برة الموضوع... انتى مصرية؟

تسـنيم said...

برغم إن ابن عمك كان بيحكم ولاده بالحديد والنار وكان بيفرق في المعاملة ما بينهم وكان في حاجز كبير بينه وبينهم إلا إنه ليس الوحيد من أبناء عمومتك اللي بيعمل كده وتقريبا كل ولاد عمامك كده بس الفرق إن يمكن ده يكون قال لأ لشيخ المنصر اللي جاي علشان يطهر العالم..
مش عارفة نفرح إنها نهاية طاغية بغض النظر عن الطريقة ورفضنا إنها كانت على إيد مين والا نتعاطف ونبقى نستحق اللي بيحصلنا واللي هيحصلنا من ابونا وأبنه اللي بكرة يورثنا..

طريقة سردك للقصة رائع بس كانت هتكمل لو مكنتيش كشفتي بتتكلمي عن مين.

esraa said...

مخلوف:
كلامك الصح, الدور علي بن عم تاني, والمشكله اننا برضو هنسكت.
إجابه بره الموضوع ... أها أنا مصريه

____________________

تسنيم:
أنا عارفه احساسك وفهماه بس أنا عند رأي, ان الغريب مينفعش يقتل بن عمي.

Mony The Angel said...

msh ha2ool aktar melly olto abl kda fe blogs tania..
rabena yer7amo :)

الحصان الأسود said...

برافة عليكي

القصة جميلة

وبصراحه انا بعد اول اربع او خمس سطور فهمت مغزى قصتك
وانها كناية عن الغرب و العراق وامريكا

يمكن بسبب ان دمنا بورسعيدي واحد

واضح ان الحال اتغير والمثل اتقلب وبقى

انا والغريب على ابن عمي وانا وابن عمي على اخويا

نفسي اقول كلمة لكل الحكام العرب اللي بيهاجموا صدام لانة عايش في قصر وبيمتلك بندقية دهب و بيقتل اعداؤة

من كان منكم بلا خطيئة فليرمة بحجر

بصراحة انا مقتنع ان صدام كان احسن من كتير من الحكام العرب اللي حوالينا وانة قدم لبلدة كتير واصلح فيها كتير و رفع من شأن المواطن العراقي ومعيشتة بس كل دة راح لما سمع كلام جيرانة ووقف لايران وحاربها وكل اللي شجعوة على حربة مع ايران حماية لهم من الغزو الايراني و حماية من الثورة الاسلامية هما اللي خلوا بية واولهم الكوايتة اللي رفضوا مساندتة اقتصاديا و كمان استفزوة باستنزاف البترول من الارض المحايدة اللي بينهم وبينة و تعاملوا معاة بعجرفة و غطرسة كأنة بيشحت منهم برغم انهم اكتر المستفيدين لانة حماهم من ايران وللعلم ايران لغاية النهاردة محتلة 3 جزر اماراتية ولا حد قادر يفتح بقة ولا يقول لهم بم ولا اصلا بيجيب سيرة عن الموضوع دة

زي بالظبط ماالسعودية وحتلة اراضي قطرية كتير وكلهم ساكتين ولا حد بيعترض اصلا وبسبب الحليفة امريكا

فية موقع كاتب حقائق كتير عن صدام وعن الحقيقة في قصة صدام والعراق و التنمية اللي حصلت في العراق
وبعد اذنكم حاحط لنيك هنا للي عاوز يقرأها

esraa said...

موني:
ربنا يرحمه ويرحم جميع موتي المسلمين.


-------------------------

الحصان الأسود:
شكرا جدا علي تعليقك, وأنا كمان شايفه ان صدام احسن من غيره كتيييييييييييييييييييييير.

الحصان الأسود said...

http://www.islammemo.cc/article1.aspx?id=2306

الحصان الأسود said...

عاوزين تعرفوا مين هو صدام

صدام الانسان

صدام الثوري

صدام الرئيس

صدام اللي اخد جايزة من اليونسكو لتحقيق معدلات تنمية في العراق

أقرأوا المقالة دي في مدونة القهوة العالية لصاحبتها بلو ستون

http://resstlesswaves.blogspot.com/2006/12/blog-post_31.html

واللهم لا تؤاخذنا بما فعل السفهاء منا

Anonymous said...

اكبر غلطة انك تتكلم فى السياسة وانت مش قارى التاريخ كويس . ابن عمك عمرة مقال لا الا لما اتزنق وعلى راى المثل ان جالك الغصب خلية جودةثم تخيلى ان ابن عمك تعاون مع الغريب عشان يقبض على شاب زى الورد زى كريم الشاعر ويعزبة ويغتصبة ويضيع مستقبلة من غير سبب وبعدين جة الغريب بعد شوية ومعجبوش ابن عمك فقتلة تفتكرى انى ممكن ازعل بالعكس انا هرقص من الفرح زى يوم الحكم على صدام غريب مش غريب المهم ان الحيوانات اللى زى ابن عمك تنتهى من العالم
وتاكدى ان الشعوب العربية بتقاوم الغريب والعراق هيفضل يقاوم وان شاء اللة هينتصر رغم ان لو ابن عمك كان لسة ماسك مكنتيش هتسمعى عن اى مقاومة ضدة ع الاقل نقاوم ونحس اننا عايشين احسن

eZz said...

تدوينة هي الأروع من فترة كبيرة.. بجد هايلة وطريقة السرد والإلقاء لأني تخيلتك وانت بتلقيها .. كانت روعة.

وبجد ماشاء الله هاتابعك لأن اكيد هتكتبي حاجات تانية حلوة ان شاء الله .. انت تملكي الموهبة.

هايل ما شاء الله عاجبني الكلام شكلاً وموضوعاً

esraa said...

Anonymous :
ده رأيك وانا لازم أحترمه, وسعيده بمشركتك.

esraa said...

eZz:
نورت المدونة
وعلي فكره انت كمان مدونتك حلوه جدا, وياريت أشوف تعليقاتك هنا علي طول.

رجل من غمار الموالى said...

رحم الله موتانا وموتانا المسلمين ..
المشكلة أن الناس مش حاسة بحاجة
عايشة وعادى ..
ربنا أحينا إذا كانت الحياة خير نا
وتوفنا إذا كانت الوفاة خير لنا

esraa said...

رجل من غمار الموالى:
انت فعلا عندك حق, المشكله فعلا ان الناس مش حاسه بحاجه وعايشه عادي, عادي جدا, مش عارفه هم هيتحركو امتي؟
زيارتك نورتني (:

FemTo said...

ياريت باقى العيلة تاخد بالها انها فى امان عشان الجزار بياخدهم خروف خروف عشان ميتلخمش بس تكمى ميين كلهم بيبصور لوراه مش تحت رجله كماان..تدوينة رائعة

esraa said...

FemTo:
حلو جدا تعبير ان كلهم بيبصو لورا مش تحت رجليهم.
تصدقي عندك حق, يارب بجد يفوقوا, بس قبل فوات الأوان.

 

The Lost Princess © 2008. Design By: SkinCorner