Monday, March 26, 2007

مش عايزين تعديل دستور

أنا الحمد لله روحت عشان أصوت, وأقول لأ.
طبعا واحنا داخلين من باب المدرسه انا وتسنيم وأحمد اللي كان جاي يوصلنا, قالولنا ان حروفنا أنا وتسنيم مش هنا.
انا وتسنيم قولنالهم اننا بننتخب هنا علي طول, فدخلونا.
المهم كان في امين شرطه ربنا يكرمه, طلعلي اسمي من الكشف, ودخلت لجنتي, وقلتلهم ان اسمي موجود في الكشف بره, فدور علي اسمي ومضيت قدامه واداني قسيمة الاستفتاء ودخلت وراء الستاره وقلت لأ, وطبقت الورقه وحطيتها في الصندوق وعكيت ايدي حبر, وكان عمو مش ماضيلي في البطاقه قصاد التاريخ فخليته يمضي وخرجت.
كان أحمد واقف يستناني بره وقالي ان تسنيم دخلت لجنتها وبتصوت.
وخرجت تسنيم وهي بتقول أنا صوتي اتزور, , قلنالها ازاي؟ قالت اسمي ممضي جنبه
قلتلها احنا مش عندنا مدونات , يالا يالا.
روحنا واحنا في العربيه حكتلي انهم من الأول فضلو يقولولها ان اسمها مش هنا, وانها في مدرسه تانيه, وانهم فصلو اللجان, ومعندهومش حد هنا اسمه تسنيم , وكانو هيموتو ويمشوها, وانها فعلا كانت هتدور عليه في حته تانيه لولا ان أمين الشرطه ربنا يكرمه اللي جابلي اسمي جابلها اسمها, ودخلت قالتلهم ان اسمها موجود في الكشوف بره, فضطرو انهم يطلعولها.
وفعلا لقتهم مضين قدام اسمها, فقالتلهم عشان كده بقي اسمي مش موجود, قالولها لأ, يمكن اللي فوقك مضت مكانك غلط.
ردت أختي عليهم, واللي فوقي كتبت اسمي مكان اسمها كمان غلط؟
فقلها ماحنا هنديكي قسيمة استفتاء , فقالتله مانا طبعا هاخد, مستعجلين علي ايه, طب قفلوها لما تيجي الساعه 7 , مش من دلولقتي.
وطبعا مارضيوش ان أحمد أخويا يصوت ببطاقته الشخصيه وقالولوه انه لازم البطاقه الانتخابيه.
أحمد لما رجعنا كلم أصحابه عشان ينزل يجيب بطاقته من القسم, ماصوت أخته اتزور, مش هيسيب صوته هو كمان بقي, ده شاف بعينه.
أنا نزلت بعد كده كورس السواقه عقبالكم وقابلت أحمد في الشارع وسألته عمل ايه؟
قالي انه راح لقي اللجنه اتقفلت بس صاحبه صوت.
قلتله اتقفلت ايه الساعه لسه 6 وثلث.
قالي هي اتقفلت مش قفلت, قفلوا الصناديق والكشوفات خلاص.
عمو العادلي وعدنا بحياد أمني , طبعا كلكم شفتوه سواء في المظاهرات أو الاعتصامات أو حتي في التصويت اللي
كان نزيه طبعا زي مانتو شفته مع أختي وأخويا
حسبنا الله ونعم الوكيل بجد.
أمال لما يشيلو ااشراف القضلئي هيعملو ايه؟؟؟
وبعدين هو ليه مش فاهم اننا مش عايزين الدستور يتغير؟
احنا عايزينه هو اللي يمشي.

مش عايزين تعديل دستور, عايزينك ترحل وتغور

Saturday, March 24, 2007

قول لأ



تعديل الدستور هيكون يوم الاتنين ان شاء الله

ولازم كلنا نروح نقول رأينا, ومحدش يقول هو رأيي هيعمل ايه, لو كلنا قلنا لأ, مش هيقدرو يخلوها نعم.
هيلغوا الاشراف القضائي علي الانتخابات, يعني هي بتتزور دلوقتي, تخيلوا لو اتلغي ايه اللي هيحصل؟.

هيعملوا قانون جديد اسمه مكافحة الارهاب, ده قانون الطوارئ أرحم, هيقدرو يدخلوا أي بيت في أي وقت عشان ياخدوا أي حد, هتقوقوا ماده اللي بيحصل, ماهم بيعملو كده وده مش قانوني, مابالكم بقي لو دستروه.

عشانا وعشان الأجيال الجايه, عشان مصر اللي اتظلمت معانا ومعاهم ومش لاقيه حد يقف ياخد حقها, لازم كلنا نروح ونقول لأ.



لأ للتوريث
لأ لتزوير الانتخابات.
ولأ لقانون ارهاب المواطنين.

Monday, March 19, 2007

دول فلسطنين مش مصرين, يعني اطمنوا

أنا والحمدلله ماشوفتش شريط الأسري بتوعنا, لكني أكيد ممكن أخمن واتخيل كل الموجود في الشريط.
بس الصراحه رغم ده, أنا ماتخيلتش ان مصر ممكن تعمل حاجه, وعشان مانظلمش مصر اللي ماليهاش ذنب في أي حاجه, أنا متخيلتش ان حكومة مصر ممكن تعمل أي حاجه, والحمدلله هم كانو قد المسؤليه وعند حسن ظني بيهم.


وأكتر ناس صعبوا عليا بعد الأسري طبعا, الناس اللي استنوا موقف الحكومه المصريه, معتقدين ان الجيش المصري هيفتح النار علي الحدود انتقاما لاخوتهم اللي اتغدر بيهم, اخواتهم اللي اليهود حرموا أهلهم انهم يبقي لهم قبر يزروه, فاكرين كلمة رغدة في فيلم فتاة من اسرائيل لما عرفت ان ابنها حب بنت يهوديه وكانت بتفكره انه أخو الشهيد وقالتله, حتي قبره أخدوه اليهود مني, وخلو سيناء كلها قبره.


لكن بجد اللي يحرق الدم, هي تصريحات وزير خارجيتنا, يعني مش هتقولو كلام يهدي الناس, يبقي تسكتو أحسن, مش تقولو كلام يولع الدنيا أكتر, احنا مش هنقطع علاقتنا بدوله عشان شريط.
الصراحه حسسني انه شريط فيديو كليب, مش شريط مذبحه لجنود كانو بيحاربوا عشان أرضنا, واتغدر بيهم.
لكن بجد الكلمه اللي توجع وتجرح أوي , دول كانو فلسطنين مش مصرين, وكأن الزعل يبقي علي المصرين بس, والفلسطنين عادي انهم يتقتلوا, لأ ده مش عادي وبس, ده بقي مقتلهم حاجه بتهدينا. هي للدرجه دي دم اخوتنا هان علينا, ولا للدرجه دي بقي مقتلهم عندنا حاجه عاديه ومفيش حد يزعل عشانها, للدرجه دي أرواحهم رخصت أوي عندنا؟ يبقي شئ طبيعي اللي اليهود بيعملوه فيهم, اذا كانو هانو علي اخوتهم, مش هيهونو علي اليهود؟ ولا هيرحموهم ليه؟؟؟؟

Saturday, March 10, 2007

أطفال إنما ملايكه

امبارح تقريبا شفت أطفال العيله كلهم

واكتشفت ان مش كلهم شياطين زي ماأحمد فؤاد قال, وان في منهم ملايكه, ملايكه بجد.
بس الموقف اللي بسطني جدا, هو ان بيبو, وده دلع ابراهيم, بن بنت خالتي, قالي إسراء أنا بحبك أوي.
هو طبعا بيقولي أنا بحبك قد البحر, والسماء, والأرض, والشيكولاته, والحاجات اللي الأطفال بيضحكو علينا بيها دي, لكن المره دي كانت مختلفه, لأنه كان ماشي معايا في البيت, بيت خالتي يعني, وماسك ايدي, وفجأه قالي, إسراء أنا بحبك أوي .


أنا طبعا اتبسطت جدا, يعني بطريقه مش ممكن تتخيلوها, وبيبو ده يبقي أخو أسامه اللي منة اتكلمت عنه في البوست اللي فات, وقالت انه أجدد شخص في عيلتنا.

أهو العسل ده بيبو.


وده الملاك أسامه.


وبما اننا اتكلمنا عن الأطفال الملايكه يبقي طبعا لازم أقول علي عمار بن بنت خالتي التانيه, وده ملاك بجد بقي.



وطبعا في ملايكه غيرهم بس مفيش صور ليهم علي الكمبيوتر.

شفت ياحمد في أطفال ملايكه ازاي؟

Saturday, March 3, 2007

أحمد وأحمد يبقوا أحمدين, والتاج دبسوني فيه هما الاتنين.


أحمد فؤاد مع نفسى , وأحمد مبرمج حر دبسوني في تاج, ولأن أحمد فؤاد ماقلش ايه حكم اللي يموت وعليه تاج, ينفع يدخل الجنة ولا لأ, يبقي كان لازم أجاوب عليه لأني مأخراه بقالي فتره, والواحد مش ضامن عمره, بس خليكم فاكرين اني عمري ماعملت فيكم حاجه وحشه.

اسم مدونتك؟
The Lost Princess

لماذا اخترته.. ماذا تقصد به؟
أنا أصلا كنت ناويه أكتب بوست أقول فيه ليه اخترت يكون اسم المدونه كده, والحمدلله انكم وفرتم عليا,طبعا يعني مفيش شك ان أنا أميره, أعتقد ان دي حاجه واضحه (:
لكن ليه لوست, الموضوع بدأ لما كنت في كايرو كنت قاعده مع صحباتي بنتناقش في موضوع وأنا قلت رأيى, فواحده صاحبتي قالت معلش أصل إسراء من كوكب تاني, والموجودين وافقوا علي كلامها وأيدوه, وبعد كده واحده صاحبتي تانيه, ماكنتش تعرف أصحابي دول, قالتلي نفسي أعرف اسم الكوكب اللي انت جايه منه ده ايه؟, وهو كمان قالي قبل كده اني من كوكب تاني, لكن اللي خلاني أصدق الموضوع, اني كنت بكلم واحد علي النت وكنت بقول رأيى, وأنا أصلا علاقتي به سطحيه, فلقيته بيقولي اسراء انت جايه من كوكب تاني, فمن يومها قلت بايني جايه من كوكب تاني بجد, بس فقدت الذاكره, وبطلت أعد الناس اللي بيقولولي كده, فأكيد بما إن ده مش كوكبي يبقي أنا هنا لوست.

هل فكرت في إغلاق المدونة.. والسبب؟
لأ , الحمد لله مافكرتش الأفكار الوحشه دي.

صورتك فى المدونة ..رمزيتها ؟
صورة أميره مش من هنا, هي مش باين عليها ولا ايه؟

طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟
أعتقد ان أنا عندي استعداد أكتب في كل حاجه, وبفكر اني أكتب سياسه قريب, يعني هنروح في داهيه.

لماذا تدون أصلا ؟
عشان أنا عايزه أدون.

أحلى جملة قيلت لك فى وصف مدونتك ؟
مممممممم, أي حد قال فيها كلام كويس.

التعليقات بالنسبة لك ..أهميتها ؟
أكيد طبعا مهمه, ومهمه جدا كمان, لأنها بتعمل تواصل مهم جدا.

أحلى بوست كتبته ..ضع اللينك ..ثم اذكر لماذا ؟
أنا بحبهم كلهم, دول أولادي, بس أكتر واحد بحبه كلما قلت عقيم, قالت يارحيم, رحمة ربنا بجد وسعت كل شئ.

أفضل مدونة قرأتها ..يمكن اختيار عدة مدونات ؟
انزل لتحت خالص, هتلاقي لينكات لمدونات, الناس دي بجد رائعه.

أفضل بوست قرأته ..يمكن اختيار اكتر من لينك ؟
الناس دي كلها بجد بتكتب من قلبها, وكلهم حقيقي كتابتهم اكتر من رائعه.

هل خسرت صديق بسبب كتابة هنا؟
الحمدلله ماحصلش.

حد قل ادبه فى التعليق ..ايه رد فعلك ؟
الحمدلله فعلا ده محصلش معايا, أنا بتقبل النقد وبشوف انه شئ كويس جدا, لكن لو حد كتب حاجه بألفاظ خارجه, همسحها ومش هرد عليه, لأن أنا شايفه ان الحديث له مستوي ماينفعش انه يقل عنه, ولو قل يبقي ماينفعش اني أشترك في الحوار أصلا.

أسوأ مدونة ..الاجابة اجبارية ..يمكن اختيار عدة مدونات ..هما كتير اصلا
أنا مش بدخل عند الناس الوحشه, أنا بدخل عند الناس الحلوين بس, لكن أكيد أي حد يكتب أي حاجه غلط أو بطريقه خارجه يبقي أكيد دول من أسوأ المدونات.

أسوأ بوست ؟
مانا قلت اني مش بدخل عن الناس الوحشين أصلا, يبقي ازاي هشوف بوست وحش؟

أسوأ مدون ..مهو هتجاوب هتجاوب ؟
لأ اله الا الله, يعني هو أنا بكلم نفسي ولا ايه, مانا قلت أنا مش بروح عند الناس دي, وبعدين أكيد أسوأ مدونه صاحبها هيبقي أسوأ مدون.

جه وقت التدبيس بقي, مالواحد زي ماتدبس يبقي لازم يدبس, دي حتي الحكمه المشهوره بتقول كده, ومش عايزه حد يفضل يقول ليه كده, شفتوني قلت حاجه علي الأحمدين؟
محمود شاب فقري

 

The Lost Princess © 2008. Design By: SkinCorner