Monday, March 19, 2007

دول فلسطنين مش مصرين, يعني اطمنوا

أنا والحمدلله ماشوفتش شريط الأسري بتوعنا, لكني أكيد ممكن أخمن واتخيل كل الموجود في الشريط.
بس الصراحه رغم ده, أنا ماتخيلتش ان مصر ممكن تعمل حاجه, وعشان مانظلمش مصر اللي ماليهاش ذنب في أي حاجه, أنا متخيلتش ان حكومة مصر ممكن تعمل أي حاجه, والحمدلله هم كانو قد المسؤليه وعند حسن ظني بيهم.


وأكتر ناس صعبوا عليا بعد الأسري طبعا, الناس اللي استنوا موقف الحكومه المصريه, معتقدين ان الجيش المصري هيفتح النار علي الحدود انتقاما لاخوتهم اللي اتغدر بيهم, اخواتهم اللي اليهود حرموا أهلهم انهم يبقي لهم قبر يزروه, فاكرين كلمة رغدة في فيلم فتاة من اسرائيل لما عرفت ان ابنها حب بنت يهوديه وكانت بتفكره انه أخو الشهيد وقالتله, حتي قبره أخدوه اليهود مني, وخلو سيناء كلها قبره.


لكن بجد اللي يحرق الدم, هي تصريحات وزير خارجيتنا, يعني مش هتقولو كلام يهدي الناس, يبقي تسكتو أحسن, مش تقولو كلام يولع الدنيا أكتر, احنا مش هنقطع علاقتنا بدوله عشان شريط.
الصراحه حسسني انه شريط فيديو كليب, مش شريط مذبحه لجنود كانو بيحاربوا عشان أرضنا, واتغدر بيهم.
لكن بجد الكلمه اللي توجع وتجرح أوي , دول كانو فلسطنين مش مصرين, وكأن الزعل يبقي علي المصرين بس, والفلسطنين عادي انهم يتقتلوا, لأ ده مش عادي وبس, ده بقي مقتلهم حاجه بتهدينا. هي للدرجه دي دم اخوتنا هان علينا, ولا للدرجه دي بقي مقتلهم عندنا حاجه عاديه ومفيش حد يزعل عشانها, للدرجه دي أرواحهم رخصت أوي عندنا؟ يبقي شئ طبيعي اللي اليهود بيعملوه فيهم, اذا كانو هانو علي اخوتهم, مش هيهونو علي اليهود؟ ولا هيرحموهم ليه؟؟؟؟

44 comments:

No Fear said...

حسبنا الله و نعم الوكيل
اللهم أنصرنا علي أنفسنا و أنصر الإسلام بنا

esraa said...

No Fear:
اللهم امين.

The Groom said...


آمين يا رب

صحيح فلسطينيين - واحنا مالنا

آه يا عرب

ليك الحق تضلمي يا ماناساس البلد

ازعلي على حالنا اللي احنا نفسنا مش زعلانين عليه

اللهم ارحمنا و ارحمهم و انتقم لنا و لهم يا رب العالمين

سلااااااااام

esraa said...

The Groom:
هي كمان ماناساس ضلمة؟
اه والله شكلنا كده مش زعلانين علي حالنا, ربنا يرحمهم ويرحمنا.

مبرمج حر said...

حسبى الله ونعم الوكيل

FemTo said...

شهدائنا فى جنة النعيم
وخلى الساكتين ساكتين بكرة حيتسالوا معملوش حاجة ليه

و حسبنا الله و نعم الوكيل

الأرمـوطــي said...

الهم ان لم يكن المسلمين اهلا لنصرك فانصر دينك الاسلام

مصر هى أمى said...

اسراء
المصيبة ان الحكومة بتاعتنا مش فارقة معاها ان يموت ان شاء الله مليون مصرى الريس مطلعش يقول حاجة على الاسرى المصريين لكن علشان خاطر اسير اسرائيلى يعمل اجتماعات ويتكلم ويقول واهم حاجة حياة الاسير الاسرائيلى كان الاسرائيلى اهم مليون مرة من الاسرى المصريين عند القيادات المصرية للاسف احنا اصبحنا دولة بلا كرامة واسرائيل علشان عارفة ان مفيش عندنا حد هيتكلم علشان كده ذاعوا الشريط ولا هاممهم حاجة
ربنا يرحم الاسرى المصريين
وربنا هيحاسب الحكام العرب على اهدارهم دم المصريين هدر

yousef said...

أصل بقا من الطبيعى دلوقتى ياساسو أنك تفتحى التى فى فتلاقى خبر قتل طفل او شيخ او طفله فلسطينيه
من الطبيعى أن دم العربى بقا ارخص حاجه لأننا رضينا بالهوان لنفسينا
عارفه أول ما سمعت موال الشريط ده وردود الأفعال جه فى دماغى الشريط اللى فى فيلم ثقافى مش عارف ليه كنت عارف أن أحد المسئولين هيقول أنا أتفرجت على الشريط ومفيهوش غير دقيقتين تعذيب والباقى كله حفلة للأخت هيفء وشاجى
وأفتكرت كلمة مأثورة
العيب مش فيكم العيب فى النظام يا كوركات
مستنى ردك على البوست الجديد بتاعى وأفتكر أنه قريب من الموضوع اللى كتباه وشالووووووووووووووووم

yousef said...

صحيح نسيت أقولك كنت عايز أعرف منك ازاى اضيف البلوج بتاعك ليا

دوللي said...

مصريين او فلسطنيين المهم مش امريكيين
تحياتي

أحمد عيسي said...

هي في نقطه واحدة دول مماتوش وهم بيحاربو وبيدافعو عن الارض دول كانو هربانين في الصحرا

من غير سلاح..من غير خطة انسحاب..من غير مأوي ..والاسرائيليين كانو بيصطادوهم زي الوحوش في رحلات السافاري

يعني هي جت علي دي اللي حرقت دمك..

moodysalihamidzic said...

محسسنى
ان قضية الاسرى الاخيرة فى امل انهم يتحركوا!!
اللى عاوز يتحرك كان اتحرك من زمااااااان

عين ضيقة said...

صحيح يرحموهم ليه؟

يألف خسارة وخزى وعار

ibn nasser- ابن ناصر said...

حاجه تقرف بقينا محاطين بالخونه والاغبياء دول يقولولك دول فلسطينين يعني عادي وتاني الخاين عبد الله كمال بتا روزاليوسف يقولك اه دول عساكر مصريين شرفاء بس مش رهائن!!؟

ibn nasser- ابن ناصر said...

...>دعوه الي كل مصري حقيقي<
سيكون الاستفتاء علي التعديلات الدستوري يوم الاثنين الموافق 26-3-2007 والباب مفتوح من الساعه الساعه السابعه صباحا الي السابعه او السادسه مساء وسيكون الاستفتاء بالبطاقه الشخصيه اذا كان في الشخص سيذهب لدائرته اما اذا كان المواطن يريد ان يذهب للاستفتاء في مكان أخر فهذا يتطلب البطاقه الانتخابيه ..يا جماعه يالا نروح يالا خليهم يسمعوا صوتنا ..المقاطعه معني السلبيه هنروح ونقول لأ كلنا ..هتروح؟

مبرمج حر said...

I tagged you

david santos said...

Hello, esraa!
have good day
InsyaAllah

الأباصيرى said...

يااااااة

هما قتلوا الاسرى المصريين؟؟؟؟؟
أمممممم
طيب أية بقى الجديد فى كدة!!! ما أحنا من زمان عارفين أنهم قتلوا الأسرى المصريين

وبعدين عايزة الجيش يتحرك ويضرب أسرائيل عشان الأسرى اللى أتقتلوا

لية!!! أنتى فاكرة نفسك فى دولة محترمة

يا إسراء أحنا اصبحنا أسفل دولة فى تاريخ الأمم

أفتكرت دلوقتى كلمة لاحمد فؤاد نجم
وكان بيقول فيها

أية يعنى لما يموت مليون أو كل الكون
العمر أصلاً مش مضمون والناس أعمار

أية يعنى فى العقبة جرينا ولا فى سيناء
هى الهزيمة تنسينا أننا احرار

بقولك اية... أقفلى المدونة
وافتحى التلفزيون هتلاقى الأوبريت بتاع
أخترنا وبايعنا وأحنا معاة ماشاء الله

أتفرجى علية وأنتى هتبقى زى الفل ومش بعيد تغنى النشيد الوطنى وتقولى عظيمة يامصر

إبراهيم said...

والله الكلام اللي قالوا وزير الخارجية كلام ينرفز جداً ويزود الغضب عندنا.. بس خلاص بقى الحكومة نسيت انه لولا الشهداء دول كانت رؤوسنا كلها تبقى في الطين زي النعام دلوقتي.. بس خلاص الحكومة استربعت واستريحت واترستقت ونسيت مين السبب في ده
نكران جميل وجحود

هون عليك.. واخفضي رأسك فأنت عربية

حصان بري said...

والله ولو مصريين مافيش حد في الحكومه هيتتهز له شعره. كله خايف علي كرسيه وهيموت عليه من اول الراس الكبيره .
رخصنا عند حكومتنا وعلشان كده بقينا ارخص شعب بره
بس ارجع واقول ايما تكونوا يولي عليكم
واحنا بقينا سلبيين والموضوع ده مثال بانه خلاص قرب يتنسي.

كويس بداتي تكتبي في السياسه يا اسراء
نتقابل في ابو زعبل

fares said...

ازيك ياسراء بوست اكتر من رائع تحياتي ليكي انا وانتي عارفه كنت مستني يعملوا حاجه بس اظاهر مفيش امل حسبنا الله ونعم الوكيل تحياتي ليكي

copa said...

هقوليك علي حاجه يا برنسيس هرد عليكي رد بسيط هو الناس الي تعذب شعب و تعتقل فيهم و تديهم علي دمااغهم لمصالحهم الشخصيه متنظريش منهم اننهم ممكن يتحركوا علشان اسري لانهم بيقمعونا في الاساس وفي مقوله بتقول فاقد الشئ لا يعطيه يييعني لما يدونا حريتنا يبقوا هيجوبلنا حقوقنا

bastokka طهقانة said...

حيروحوا فين من ربنا؟

esraa said...

مبرمج حر:
انت بتحسبن علي الحكومه ياحمد؟
ماشي ضمنا اني مش هروح في داهيه لوحدي (:

esraa said...

FemTo:
اها والله انا نفسي اليوم ده يجي بقي, عشان أشوف هم هيقولو ايه لربنا عز وجل؟

esraa said...

الأرمـوطــي:
لا يغير الله مابقوم حتي يغيرو مابأنفسهم.

esraa said...

مصر هى أمى:
اها اخدت بالك فعلا ان الريس التزم الصمت, بينه ريس دوله تانيه.
هو ربنا أكيد هيرحمهم ان شاء الله, بس يارب يرحمنا احنا بقي.

esraa said...

yousef :
اها, مقتل شخص أوا تنين يبقي جريمه, لكنت مقتل 250 يبقي احصاءيه مش أكتر, انت عارف اني فعلا افتكرت الفيلم ده, وكنت ناويه أكتب في البوست بدل شريط كليب, شريط فيلم ثقافي.
بالنسبه لاضافة اللينك , فانا ضفت ميلك عندي, بعد اذنك طبعا, وهقولك علي الميل.

esraa said...

دوللي:
اها والله يادولي, أهم حاجه انهم مش أمريكين ولا يهود.

esraa said...

أحمد عيسي:
ايوه ياحمد, غدرو بأسري الحرب, وخلوهم يحفرو قبورهم بنفسهم, وفي الأخر يقولولك عشان شريط.

esraa said...

moodysalihamidzic:
انت عارف يامحمود, طول عمري حكاية الأسري دي في دماغي أوي, ولما كنت بسمع عن التعويضات بتاعة الهلوكست, كان دمي بيتحرق أوي, وماكنتش عارفه ليه احنا مش بنرفع قضايا تعويض عليهم, ولا هو احنا مش نستحق التعويض؟ ده علي الأقل موضوع الأسري بتوعنا مافيهوش شك, مش زي الهلوكست اللي التاريخ شكك في حدوثه أصلا.

esraa said...

عين ضيقة:
مانت لما ماتصعبش علي أخوك, اوعي تنتظر انك تصعب علي الغريب أو انه ممكن يرحمك.

esraa said...

ibn nasser- ابن ناصر:
مش رهاين امال كانو ايه, بجد والله دي حاجه تقرف حقيقي يعني.
ان شاء الله نكون هناك يو الاتنين.

esraa said...

مبرمج حر:
تاني ياحمد, ماشي ربنا يسامحك .

esraa said...

david santos:
thx david.

esraa said...

الأباصيرى:
احنا اه عارفين طول عمرنا انهم قتلوهم, لكن الجديد انهم يذيعوا شريط مقتلهم, المفروض ان ده شئ ضد القوانين الدوليه, يقومو يذيعوا كده عادي, هو صحيح يعني اليهود مش بيهمهم القوانين الدوليه, بس يعني منظر.
هو انا صحيح كنت عارفه انهم مش هيعملو حاجه, لكني بجد كنت أتمني انهم يعملو أي حاجه, عشان نبقي في دوله نص محترمه حتي.
بالنسبه للتليفزيون, شفت بالروح بالدم نفديك يامبارك؟

esraa said...

إبراهيم:
هو فعلا ينرفز ويحرق الدم جداااااااااا.
انت عارف انت فكرتني بماتش للفريق العراقي قبل سقوط حكم صدام, وكان الجمهور العراقي رافع لافتات مكتوب عليها, ارفع رأسك انت عراقي, دلوقتي بقينا بنخفض رؤسنا لأننا عرب.

Aladdin said...

المؤسف بجد إن الخطاب السياسي أو الدبلوماسي أصبح موجهاً "للخارج" فقط!! يعني لا يهم كثيراً أو قليلاً لو اتحرق دم 10 أو 20 مليون مصري بالداخل، لأنهم ببساطة لا وزن لهم!! بس الخارج اللي بيترجم هذا الخطاب ويحلله فإنه يعمل له ألف حساب! نفس اللي كان حاصل أيام السلطنة العثمانية وأظن أن الوالي كان يتوجه أيضاً بخطابه إلى آذان السلطنة والحاشية السلطانية المتحكمة في زمام الأمور، كما يتوجه اليوم خطابنا السياسي والدبلوماسي إلى "السلطان" الأمريكي، وعلى البهائم السلام!!!

esraa said...

حصان بري:
أنا فعلا مش عارفه ليه الحكام العرب بيشترو بقائهم علي الكرسي برضي أمريكا واليهود؟
يعني لو هم حكام كده ربنا هديهم ومريحين شعوبهم, شعوبهم هتغيرهم ليه؟ ماهي برضو هتسيبهم في الحكم, يبقي ليه أطلب البقاء من الغريب, وعلي حساب ولادي واخواتي.
بالنسبه لأبو زعبل بعد تعديل الدستور أكيد كلنا هنروح هناك (:

esraa said...

fares:
يافارس الأمل في حكومتنا مات من زمان, وللأسف ماكنش عنده أولاد.
فعلا حسبنا الله ونعم الوكيل.

esraa said...

copa:
لأ طبعا أنا عارفه ان اللي يعمل كده مش ممكن يدافع عنهم في مكان تاني, بس الأمل كان من باب ان في ناس تقولك أنا أبهدلهم أه, لكن الغريب لأ, زي الأب اللي يقول أنا أضرب ابني, لكن ماحدش يمد ايه عليه

esraa said...

bastokka طهقانة:
الكارثه انهم بينهم نسيوا انهم رايحين تاني لربنا.

esraa said...

Aladdin:
والله العصر العثماني بقي أحسن بكتير, بس فعلا احنا كل خطابتنا بقت موجهه للخارج, ويارتهم بيقولو للخارج كلام يحافظ علي كرامتنا.

 

The Lost Princess © 2008. Design By: SkinCorner