Monday, March 26, 2007

مش عايزين تعديل دستور

أنا الحمد لله روحت عشان أصوت, وأقول لأ.
طبعا واحنا داخلين من باب المدرسه انا وتسنيم وأحمد اللي كان جاي يوصلنا, قالولنا ان حروفنا أنا وتسنيم مش هنا.
انا وتسنيم قولنالهم اننا بننتخب هنا علي طول, فدخلونا.
المهم كان في امين شرطه ربنا يكرمه, طلعلي اسمي من الكشف, ودخلت لجنتي, وقلتلهم ان اسمي موجود في الكشف بره, فدور علي اسمي ومضيت قدامه واداني قسيمة الاستفتاء ودخلت وراء الستاره وقلت لأ, وطبقت الورقه وحطيتها في الصندوق وعكيت ايدي حبر, وكان عمو مش ماضيلي في البطاقه قصاد التاريخ فخليته يمضي وخرجت.
كان أحمد واقف يستناني بره وقالي ان تسنيم دخلت لجنتها وبتصوت.
وخرجت تسنيم وهي بتقول أنا صوتي اتزور, , قلنالها ازاي؟ قالت اسمي ممضي جنبه
قلتلها احنا مش عندنا مدونات , يالا يالا.
روحنا واحنا في العربيه حكتلي انهم من الأول فضلو يقولولها ان اسمها مش هنا, وانها في مدرسه تانيه, وانهم فصلو اللجان, ومعندهومش حد هنا اسمه تسنيم , وكانو هيموتو ويمشوها, وانها فعلا كانت هتدور عليه في حته تانيه لولا ان أمين الشرطه ربنا يكرمه اللي جابلي اسمي جابلها اسمها, ودخلت قالتلهم ان اسمها موجود في الكشوف بره, فضطرو انهم يطلعولها.
وفعلا لقتهم مضين قدام اسمها, فقالتلهم عشان كده بقي اسمي مش موجود, قالولها لأ, يمكن اللي فوقك مضت مكانك غلط.
ردت أختي عليهم, واللي فوقي كتبت اسمي مكان اسمها كمان غلط؟
فقلها ماحنا هنديكي قسيمة استفتاء , فقالتله مانا طبعا هاخد, مستعجلين علي ايه, طب قفلوها لما تيجي الساعه 7 , مش من دلولقتي.
وطبعا مارضيوش ان أحمد أخويا يصوت ببطاقته الشخصيه وقالولوه انه لازم البطاقه الانتخابيه.
أحمد لما رجعنا كلم أصحابه عشان ينزل يجيب بطاقته من القسم, ماصوت أخته اتزور, مش هيسيب صوته هو كمان بقي, ده شاف بعينه.
أنا نزلت بعد كده كورس السواقه عقبالكم وقابلت أحمد في الشارع وسألته عمل ايه؟
قالي انه راح لقي اللجنه اتقفلت بس صاحبه صوت.
قلتله اتقفلت ايه الساعه لسه 6 وثلث.
قالي هي اتقفلت مش قفلت, قفلوا الصناديق والكشوفات خلاص.
عمو العادلي وعدنا بحياد أمني , طبعا كلكم شفتوه سواء في المظاهرات أو الاعتصامات أو حتي في التصويت اللي
كان نزيه طبعا زي مانتو شفته مع أختي وأخويا
حسبنا الله ونعم الوكيل بجد.
أمال لما يشيلو ااشراف القضلئي هيعملو ايه؟؟؟
وبعدين هو ليه مش فاهم اننا مش عايزين الدستور يتغير؟
احنا عايزينه هو اللي يمشي.

مش عايزين تعديل دستور, عايزينك ترحل وتغور

51 comments:

mansourawy said...

طبعا معروف انها تمثيلية
زى المسلسلات اللى بتتعمل زمان

فاكرة مسلسل الانتخابات الرئاسية المشهور
والمسلسل اللى بيذاع كتير ده بتاع انتخابات مجلس الشعب

بصراحة انا قلت
انا سلبى
ومبعرفش امثل
فمش هشترك فى المسلسلات دى الا اما تظهر ابطال جداد
على امل يعنى

عموما الموقف بتاع اختك اعتقد مش اول حد يحصله كدا
وربنا يستر

koukawy said...

لا حياة لمن تنادي
و بعدين الفيلم اللي بتحكيه هو المكرر في كل شئ
متحرقيش دمك يا بنتي
انا ريحت نفسي و مارحتش عشان ميجيليش ازمه و اموت منهم هناك

أحمد سلامة said...

صباعي اتلحوس حبر
اه ياصباعي
منك لله يا اللي ف بالي

The Groom said...


تسلمي و يسلم كل صوت حر شريف قاطع أو قال لا

ربنا يكرمكم و يفك الغمة يا رب

سلااااااااام

Anonymous said...

الحمد لله أنا معنديش بطاقة أنتخابية اصلا زى أحمد أخوكى و ليه كده بتشتمى الريس و بتتريقى عليه مش مكفيكوا الحرية إللى انتوا عايشين فيها يا شعب جاحد ناكر للجميل يعنى الراجل هيعملكوا أيه تانى ؟ يا رب يخلى لينا الريس ( اللهم لا تستجب طبعا ) و يبقى ربنا كرمنا آخر كرم لو أخذه هو عائلته كلهم مرة واحدة علشان منقعدش ندعى على واحد واحد بقه ونتعب ونشوفك على خير فى الأنتخابات إللى جاية فى عهد الرئيس : جمال حسنى مبارك و كل أستفتاء و أنت و كل المدونين إللى قاعدين يحرقوا فى دمهم و أنا منهم بخير و بننبح فى حسنا و الناس معظمها لا حياة لمن تنادى و السلام عليكم و رحمة الله و بركاته

Tasneem said...

أه معلش خااااالص نسيت أكتب اسمى و دمتى بألف خيييييييييير والسلام عليكم

yousef said...

أنا دمى أتحرق أمبارح ووصل بياالموضوع لدرجة أنى كنت خلاص هبكى من احساسى بالقمع كان عندى أمل فى التغيير لكن يظهر أن سعد زغلول على حق
مفيش فايده
أنا هبطل اسمع شعارات وهبطل اسمع سعد زغلول وهسمع سعد الصغير وأمثاله
أصل خلاص الدنيا خربانه
regards

Mohamed A. Ghaffar said...

ان يغور ليس هو الحل

elkamhawi said...

ورحتى ليه اصلاً؟دى اشتغالات يا ماما

esraa said...

mansourawy:
اها طبعا فاكره, هي دي حاجه تتنسي, ده انا روحت انتخبت الراجل أيمن نور, وبعد كده سجنوه, شفت بقي.
احنا نزلنا نصوت عشان أصوتنا مش تتزور, معذرة الي ربنا يعني, هشان لما ربنا يسألنا يوم القيامه نقول احنا قلنا لأ.

esraa said...

koukawy:
اها هو فعلا فيلم متكرر , ومن كتر ماتكرر بقي بايخ أوي, ورغم ده مش بيبطلو يعيدوه.
انت ماريحتيش نفسك ياكوكو انت سيبتيلهم صوتك يزوروه.

esraa said...

أحمد سلامة:
انت بتدعي علي مين ياحمد, اوعي يكون عليا.

esraa said...

The Groom:
يارب أميييييين, نفسك انت ترجع مصر تلاقيها اتغيرت ها.

esraa said...

Tasneem:
معلش ياتوته, انت عارفه ان احنا شعب جاحد ومفيش حاجه بتعجبه, وبعدين حرام عليكي الأمل موجود, يعين ممكن يبقي علاء بدل جمال, بلاش التشائوم ده.

esraa said...

yousef:
لأ يايوسف ماتبكيش.
احنا لسه هنعيط بس لما يلمونا, مش عشانا خايفين لسمح الله, ده عشانا مبسوطين اننا شوفنا بعض (:
مالكش دعوه بسعد زغلول خليك مع مصطفي كامل.

esraa said...

Mohamed A. Ghaffar:
لأ طبعا ده مش الحل, بس ده بداية الحل.

esraa said...

elkamhawi:
روحت عشان لما ربنا يسألني عملتو ايه في المهزله دي؟
أقوله انا روحت قلت لأ ياربنا.

fares said...

احنا فشلنا يا اسراء بجد منفعش حاجه معاهم خالص اي حاجه قالوا التزوير بقه هو اللي ينفع انا كاتب حاجه جديده كمان عني وعن الايوم الاسود ده تحياتي ليكي

Mony said...

تعرفي إن البوست ده أحزني جدا يا إسراء...أنا كنت دايما بسمع عن الحركات دي...بس أنا صدقتك و مكنتش عايزه أصدق حد

esraa said...

fares:
لأ يافارس احنا مفشلناش, هم اللي فشلو وعشان كده زوروا, والمره الجايه هيفشلوا برضو بس مش هيعرفو يزوروا لأن مش هيكون في أصوات تتزور.

esraa said...

Mony:
بصي يامنونه, أنا طول عمري أسمع عن ده وكنت عارفه انه بيحصل, لكن اني ألاقي ان ده حصل مع أختي وأخويا, فعلا كان احساس غريب, بس في نفس الوقت بيدل علي فشل النظام وعجزه اللي مش عارف يعمل حاجه غير التزوير.

ody911 said...

لا تعليق

esraa said...

ody911:
ليه بس ياأودي ماتعلق.

الحصان الأسود said...

ههههههه
انتوا تاعبين نفسكم عالفاضي كالعادة

يابنتي لو البلد كلها قالت لأ برضة نتيجة الاستفتاء محطوطة مقدماً

روحي شوفي الفيلمين اللي مفروسة حاطاهم في مدونتها وانتي تعرفي

طبعا انا كالعادة لا نزلت ولا صوتت ولا حافكر اعملها الا لما ييجي يوم يبقى فية فعلا انتخابات حقيقية تعبر عن رأي الشعب
ولغاية اليوم دة ما ييجي انا باصوت باعلى صوتي على مصر اللي ضاعت وخربت

البقاء لله

أحمد العربي said...

ها الان عرفت سبب مقاطعة المعارضة للاستفتاء
وان كنت انا قاطعتة نزولا علي التزامي الحزب حيث ان حزبي قاطع الاستفتاء ..المعارضة تعلم تمام العلم ان الاستفتاء سيزور سواء زهبنا وقلنا لا او ابطلنا اصواتنا او حتي لم نذهب سيصوت امامنا اننا قلنا نعمممممممممممممممممم وبلفم الملليان لذلك قررت كبري احزاب المعارضة انها لن تشارك في تلك المسرحية المملة والمكررة والغير مضحكة بالمرة بل هي مبكية لدرجة القرف

esraa said...

الحصان الأسود:
لو البلد كلها كانت قالت لأ, مكنوش هيلاقو أصوات يزوروها.

esraa said...

أحمد العربي:
بص ياحمد المقاطعه كان ممكن تعمل فايده مع حكومه بتخاف علي شكلها أمام المجتمع الدولي, مش دوله مش بيهمها حد, الي مرحش الاستفتاء مافدوش غير ان صوته اتعلم عليه وقال نعم وبس, لكن بقي النسبه أو عشان نكشفهم قدام العالم, مالعالم كله عارف حركاتهم دي.

zordeak said...

مش عايزين تعديل دستور ..عايزينك ترحل وتغور
مش عايزين تعديل دستور ..عايزينك ترحل وتغور
مش عايزين تعديل دستور ..عايزينك ترحل وتغور
مش عايزين تعديل دستور ..عايزينك ترحل وتغور

أحمد العربي said...

يا اسراء المعارضة كانت وجهة نظرها ان دي مسرحية بايخة والمشاركة فيها سيعطيها نوع من الشرعية الفارغة يعني مثلا انا لو رحت واديت حتي صوتي (لا) معني ذلك ان التعديلات هتترفض ابدا النظام عايز التعديلات تتقبل بنسبة معينة سواء في حالات الرفض او القبول يعني رحنا مرحناش برضة اللي عايزينة هايمشي

yuri said...

sooory for not being on the blog but am back wish to see u agian and often wish u r fine take care....... wa mish 7a 7ot comment at this 3ashan ana 3yiz anam be al home today :d

esraa said...

zordeak:
ايه ده ياحمد انت عامل مظاهره((:
حمدالله علي السلامه يادكتور.

esraa said...

أحمد العربي:
أنا فاهمهة طبعا انهم قاطعوا عشان مايكونش في شرعيه للانتخبات, بس زي ماقولتلك ده في دوله بتحترم الشرعيه.
علي العموم الاختلاف في الرأي لا يفسد للود قضيه.

esraa said...

yuri:
حمدالله علي السلامه.
وايه أخبارك؟
ومش عيب عليك كده عايز تنام في البيت, ياعم المعتقل هيبقي أحلي واحنا لمه((:

محمد العنانى said...

انت اصلا مكنتش رحت
انت عارف كان فى اعلان فى اسكندريه واحد رايح ينتخب ودخل ورى الستاره وعلام على لا وبيحطها فى الصندوق نصف الورقه فى ايدو والنصف الثانى باين من الزجاج النصف الى فى ايدو معلام على لا والنصف الى باين من الزجاج نعم
شوفت انت ادتهم فرصه يزورو
بس الحمد الله ولا يهمك
وحسبياالله ونعم الوكيل فيهم

No Fear said...

السلام عليكم
أولا شكرا علي زيارتك لي و التجول في البلوجات كلها مش الأساسي بس و بعدين دايما بتقوليلي أعمل اللي بأكون متردد فيه متزقيش علشان مرجعش أدعي عليكي

ثانيا بمناسبةالبوست بتاعك يا قلبك الميت بجد
ياريت كان عندي الشجاعة زيك كده بس قولي يارب أنفذ اللي نويته في البوست

و كل سنة و أنت طيبة
و سلام

مـحـمـد مـفـيـد said...

والله يا اسراء انا موافقك علي رأيك ده علشان كلنا اتخنقنا

Amr Ahmed said...

كلاب

اه والله

هي خربت اصلا

تعرفي ان كان فيه لجنة كان رئيسها مدرس

الراجل بيقول ان اللي راحو صوتوا كانو عشرة
كلهم قالو لا
وفي الاخر جابو ورق مكتوب عليه نعم
وحطوه في الصناديق

الف الف مبروك

تامر نبيل said...

خربانة خربانة

اعدلها من عندك يارب

esraa said...

محمد العنانى:
احنا روحنا نصوت يامحمد عشان ربنا, لأنه هيسألنا عملتو ايه عشان اخوتكم اللي في السجون, واللي لسه هيتسجنو أكتر.
أنا عن نفسي هقوله اني قلت لأ ياربنا.
وقولتها بصوت عالي كمان.

esraa said...

No Fear:
لأ احنا مافيناش من الدعاء ماشي.
بس مش لازم تترد عشان ماترجعش تندم عل ضياع الوقت, خد قرارك يأه يالأ.

ان شاء الله تنفذ اللي انت عايزه.
وانت طيب.

esraa said...

مـحـمـد مـفـيـد:
جميل انك توافقني, لكن المهم انه يسمعنا, وينفذ.

esraa said...

Amr Ahmed:
ده مدرس دي أحسن حاجه, ولسه بكره ياما هنشوف ياعمرو.
التزوير فعلا كان شغال ميه ميه.
ربنا يصبرنا.

esraa said...

تامر نبيل:
ان الله لا يغير مابقوم ياتامر حتي يغيرو ما بأنفسهم.

واحـــد مـــــن الـنـــاس said...

على فكرة يا اسراء
انا سبت كومنت هنا من اول عشرة كومنتات
وكان في موديريشن للكومتنات
بس مظهرش لحد دلوقتي ؟؟

أحمد العربي said...

بالتأكيد الاختلاف في الرائ لا يفسد للود قضية وتحياتي

فبركة said...

تسلم ايدك
انا كمان كاتب مقال بعنوان
يا مصر ..ممكن اقل ادبى؟؟
ارجو انك تقريه وتعلقى عليه

esraa said...

واحـــد مـــــن الـنـــاس:
ماهو لازم مايظهرش ياعلي لأني مكنتش عامله موديرشن أصلا, يمكن كان غلطه أو حاجه, معلش بقي ياسيدي أكتبه تاني.

esraa said...

أحمد العربي:
((:

esraa said...

فبركة:
ان شاء الله أكيد هقرأه.

مهندس زراعي said...

مررنا جميعا كشعب بحالة الولادة المتعثرة لما سمي بالتعديلات الدستورية . والحمد لله وبعد ما مررنا به رزقنا بما كنا لا نريده ولا نأمله رزقنا بكل شئ سيصعب علينا القادم أو سيصعب علينا الموجود والدائر . الحمد لله واهب كل شئ رازق الفقراء وملاذ التائهين كانت نتيجة
الاِستفتاء مبهرة الى أقصى الحدود وكانت كما توقعها الجميع . وانتصر رجال المستقبل ورجال الأعمال .الشئ الذي يسألة رجل الشارع الان هو ( وماذا بعد التعديلات الدستورية ) هل سيتم الأسراع من أنهاء عملية الحكم والأقاويل حوله وتخرس كل الألسنه بواسطة الدستور الجديد أم سيتم حل مجلس الشعب لأقصاء المعارضه الاسلاميه وغيرها من المجلس بغرض أتاحة الفرصة لوجود رجال لا يعرفون أصلا معنى كلمة مجلس شعب او دستور او حتى معارضه أو حكم أو سيتم أتخاذ الأجراءات ضد الشرفاء بواسطة ما يسمى (بقانون الأرهاب ) وذلك عند اللزوم ألأمر أصبح الان صعبا على رجل الشارع البسيط والفلاح الذي لايملك سوى فأسة والعامل الذي يطالب بزيادة أجرة أو يطالب بألاصلاح بداخل مصنعه . الأمور اصبحت تتعقد أكثر من سابق لأن الجميع الان لا يعرفون ماذا سيحدث والشئ الذي يلفت النظر الان هو حالة الهدوء الشديد من جانب الحكومه ورجالها ومن جانب المعارضه ورجالها سواء معارضه اسلاميه او غيرها . فهل سوف نرى سيئا في الايام القادمه ؟ أم سنرى المستقبل بأشراقه ؟ هذا هو حال الشعب في الشارع هذا هو حال من أستمع الى أجهزة الراديو والتلفزيون المصري وحال من وزع عليه أهداف التعديلات الدستوريه من جانب نواب الشعب المتمثلون في الاخوان او المستقلون ؟

esraa said...

مهندس زراعي:
كلامك جميل وأسألتك كلها صح, بس الهدوء سببه ان الحكومه مكنتش عايزه تاخد خطوه بسرعه كده عشان محدش يتكلم عن القانون اللي كانو رافضين تعديل القانون ده.
بس هي بشارته بدأت بطلب تحويل رجال أعمال الاخوان اللي بتحاكمو الي محكمه عسكريه.
ولسه.
مرورك نورني.

 

The Lost Princess © 2008. Design By: SkinCorner