Saturday, February 16, 2013

أدلة براءة وائل سيكا المحكوم عليه بالاعدام في أحداث مباراة المصري والاهلي

المتهمين في قضية ماتش المصري والأهلي 73 متهم ، 60 متهم منهم مالهمش علاقة بالداخلية ولا الاستاد، يعني لا هم اللي قطعوا النور عن الاستاد ولا هم اللي لحموا ابواب الاستاد ولا هم اللي منعوا الحاكم العسكري انه يحضر الماتش
انا مش هتكلم عن المتهمين الأهلاوية واللي فيهم واحد اتحال أوراقه للمفتي واللي لما ظهر ما يؤكد انه أهلاوي وسألوا بتوع اولتراس الأهلي اللي زي ماكلنا عارفين انهم اتعرفوا عليه زي مااتعرفوا على الستين متهم كلهم وشافوه بعينهم وهو بيقتل زي ماشافو الستين متهم بعنيهم  وهم بيقتلوا رغم ان اللي ماتوا ماتوا والنور مقطوع، فبتوع الاولتراس قالوا انهم غلطوا ومااخدوش بالهم
فانا النهاردة هتكلم عن المتهم رقم 59 وائل يوسف عبد القادر الشهير بوائل سيكا
تهمة وائل الضرب بشوم، وده وائل اللي المفروض انه بلطجي


وائل في الأساس شغال هو والمتهم رقم 57 محسن محمد حسين الشريف الشهير بمحسن القص في برومو ميديا، ودي شركة اعلانات تابعة لفودافون وبيحضروا كل المباريات على الأساس ده، بيوزعوا خلال الماتش شعارات فودافون وتي شيرتات وبونات لدوري فودا فون زي اللي في الصورة ده


انا مش هتكلم عن محسن وهستنى ان يوصلني روايته هو عن اللي حصل وهنشرها على لسانه 
وائل شهد معاه اسلام موزع فودافون وشهد معاه كريم ذكري انه بيكون في كل المباريات عشان شغله ودي صورة وائل بجاكت فودا فون


وائل لما اتعرضت صورته على أولتراس الأهلي طبعا اتعرفوا عليه واللي اتعرف عليه قال انه قتل اللي جنبه بالشومة رغم انه واضح جدا من الصورة دي واللي فاتت ان وائل ايديه فاضيه تماما وانه واقف في أرض الملعب من البداية وانه مع اللاعبين



ولما انتهى الماتش وبدأ نزول الناس لأرض الملعب وائل كان واضح جدا انه بيحاول يمنع اللس بينزل لأرض الملعب لأنه كان معتمد ان الجماهير عارفاه وبيثقوا فيه والطبيعي انه هيسمعوا كلامه زي مالصور دي بتوضح بالترتيب



بالرغم من ان وجود وائل في كل المباريات طبيعي ومبرر، وبالرغم من الصور اللي بتاكد انه مامسكش شوم، وبالرغم من تقرير الطب الشرعي اللي بيأكد ان ماحدش مات بسبب كسر في الجمجمة عشان يكون في تهمة الضرب بشوم من الأساس، وبالرغم من الصور اللي بتأكد ان وائل كان بيمنع اللي نازلين الملعب الا ان وائل اتحالت اوراقه للمفتي مع 20 متهم اخرين منهم أهلاوي
 وأخيرا دي صور وائل في ميدان التحرير خلال اعتصام ال18 يوم الاولى، وائل كان معتصم مع شباب بورسعيد اللي اعتصموا في الميدان لاسقاط مبارك وهو في الصور اللي لابس بند على راسه مكتوب عليها يسقط مبارك






وائل مالقاش اي تضامن من رفقاء الميدان ، بالعكس تماما وائل لقى رفقاء الميدان بيساندوا اللي شهدوا ضده زور وقالوا انهم شافوه وهو بيقتل بعنيهم واقتنعوا انه اكيد مجرم لأن اسم شهرته سيكا
واللي لما هتواجوهم بأدلة براءته وان مافيش فيديو واحد لوائل وهو بيضرب او بيشتبك أو بيقتل هيقولو انهم اكيد اتعرفوا عليه غلط زي ماتعرفوا على المتهم الأهلاوي غلط، ومش عارفه ازاي الجملة دي مش بتخليكم تتسألوا هم الأولتراس اتعرفوا على كام واحد غلط؟ وبمعنى أصح هم شهدوا ضد كام واحد زور وهم ماشفهوش وهو بيقتل؟
هنر قريب جدا أدلة براءة متهمين تانين
وبشكر كل اللي لسه عندهم ضمير ووافقوا ينشروا معايا البوست ده
 

The Lost Princess © 2008. Design By: SkinCorner