Sunday, September 25, 2011

شهادة المشير طنطاوي في محاكمة مبارك

س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟
ج1 : الاجتماع كان برئاسة رئيس الوزراء واعتقد أننه بلغ
س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟
ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد الرئيس ؟
س3: ما الذي أبداه رئيس الجمهورية في هذه اللقاءءات ؟
ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها يتبع
ج٣-2: كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة يتبع
ج٣-3: القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة – يتبع
ج٣-4 : أعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث
س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين؟ يتبع
س٤-2: استعمال قوات الشرطة القوة ضد المتزاهرين بما فيها استخدام الاسلحة الخرطوش والنارية من 25 يناير حتي 28 يناير ؟
ج4 : ليس لدي معلومات عن هذا واعتقد ان هذا لم يحدث
س5 : هل ترك رئيس الجمهورية السابق للمتهمين المذكورين من أساليب لمواجهة الموقف ؟
ج5 : ليس لدي معلومات
س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟
ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران
س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟
ج7 : ليس لدي معلومات
س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟
ج8: إنا معنديش معلومات بكده.. الاحتمالات كتير لكن مفيش معلومة عندي
س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟
ج9 : إنا معرفش ايه اللي حصل
س10 : هل تستطيع سيادتك تحديد هل كانت هناك عناصر أخري تدخلت ؟
ج10 : هيا معلومات غير مؤكدة بس اعتقد ان هناك عناصر تدخلت
س11 : وما هي تلك العناصر ؟
ج11 : ممكن تكون عناصر خارجة عن القانون
س12 : هل ورد لمعلومات سيادتك ان هناك عناصر اجنبية قد تدخلت ؟
ج12 : ليس لدي معلومات مؤكدة ولكن ده احتمال موجود
س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل ؟
ج13 : رئيس الجمهورية ممكن يكون أصدر أوامر - طبعا من حقه ولكن كل شئ له تقييده المسبق وكل واحد عارف مهامه
س14 : ولمن يصدر رئيس الجمهورية علي وجه العموم هذه الأوامر ؟
ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك
س15 : وهل يجب قطعا علي من تلقي أمر تنفيذه مهما كانت العواقب ؟
ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه
س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا
ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا
س17: وهل تعلم ان رئيس الجمهورية السابق كان علي علم من مصادره بقتل المتظاهرين ؟ 
ج17: يسأل في ذلك مساعديه الذين ابلغوه هل هو علي علم أم لا
س18: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين ؟
ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات
س19: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟
ج19 : هذه مسئولية جهات التحقيق
س20: هل يحق وفقا لخبرة سيادتكم ان يتخذ وزير الداخلية وعلي وجه العموم ما يراه هو منفردا من اجراءات ووسائل وخطط لمواجهة التظاهرات  دون العرض علي رئيس الجمهورية؟

ج20: اتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه  ولكن التظاهر وفضه هي خطة وتدريب موجود في وزارة الداخلية
س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظورة وذلك من منظور ما وصل لعلم سيادتك؟

ج 21 : معنديش علم بذلك
 س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل اطلاق مقذوفات نارية أو استخدام سيارات لدهس المتظاهرين..هل كان أمر استعمالها يصدر من حبيب العادلى يصدر من حبيب العادلى ومساعديه بمفردهم ؟
ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها
س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟

ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش
س24 : هل هناك اصابات أو وفيات لضباط الجيش ؟
ج 24 : نعم هناك شهداء
س25 : هل تعاون وزير الداخلية مع القوات المسلحة لتأمين المظاهرات ؟
ج 25 : لأ
س26 : هل أبلغت بفقد ذخائر خاصة بالقوات المسلحة؟
ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة
س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟
ج27 : هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات
س28: هل تم القبض على عناصر أجنبية في ميدان التحرير وتم إحالتهم للنيابة العسكرية ؟ 
ج28: لا ..لم يتم القاء القبض على أى أحد
س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟
 ج29 : لم يحدث
س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟
ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب
كانت هذه شهادة المشير فى محاكمة الرئيس المخلوع والفضل الأول والأخير في نشرها ليس لي

Wednesday, August 3, 2011

لمن الملك اليوم


اللهم لا شماتة





Monday, August 1, 2011

رمضان


رمضـــــــــــــــــان كــــــــــــــــريـــــــــــــــــــــــم

Wednesday, June 1, 2011

لا للمحاكمات العسكرية للمدنين


أنا ضد المحاكمات العسكرية للمدنين

المدني يتحاكم قدام قاضيه الطبيعي ولازم كل المدنين اللي اتحكم عليهم بأحكام عسكرية يتعاد محاكمتهم تاني أمام قضاء مدني

Sunday, May 22, 2011

جيشنا من غير حبيبي


أنا زي كل المصرين طلعت لقيت نفسي بحب الجيش المصري، جيشنا الشريف النضيف واللي عندي استعداد كامل إني أفديه بروحي بدل ماهو يفديني ويفدي الوطن
لما الثورة قامت في تونس وزين الهاربين نزل الشرطة تقتل الشعب زي أي حاكم ديكتاتور ونزل الجيش بعدها ، كان واضح أوي إن الجيش مش واقف على الحياد وإنه أخد جانب الشعب، عمري ماهنسى لما شباب تونس كانوا بيجروا من رصاص الشرطة ودخلوا شارع كان فيه عربية جيش واستنجدوا بظابط الجيش اللي حماهم بالفعل ولما وصل ظابط الشرطة وعساكره وطالبه الثوار رفض وقاله إنه لو حاول ياخدهم هيؤمر عساكره إنهم يضربوا ظابط الشرطة وعساكره بالرصاص فما كان منه إلا إنه إنسحب، يومها انا لما شيرت الخبر ده علقت عليه بإن الجيش النضيف لازم ياخد صف الشعب
لما بدأنا نحضر لنزول الشارع في مصر ، زي ماكنا حاطين في دماغنا إن ممكن اليوم يعدي عادي جدا وماينزلش فيه اكتر من 200 شخص كمان فكرنا إن اليوم ممكن يكبر رغم إننا ماكناش حاطين أمل على ده، بس دايما فكرة نزول الجيش الشارع كانت على بالي، وكنت بتمنى أوي إنه وقت الجد ياخد صفنا زي جيش تونس
لما حصلت أحداث يوم 28 بدأ الشعب في مصر كلها يهتف واحد اتنين الجيش المصري فين بالرغم من عدم التنسيق المسبق أو حتى أي اتصالات وسط قطع خدمة الموبيلات والنت، طيب إيه اللي خلى المصرين وقت الجد يستنجدوا بجيشهم ، ماحدش يعرف غير إن وقت الخطر المصري فكر إن أكيد جيشه هو اللي هينزل يحميه
وفعلا نزل الجيش المصري وكان وقتها ماحدش يعرف الجيش نازل عشان ياخد صف مين، وبالرغم من ده المصرين أخدوا القرار بنفسهم، استقبلوا الجيش بهتافات الجيش والشعب ايد واحدة، حضنوا الظباط، ركبوا فوق الدبابات، وفي كل المواجهات اللي كانت بتحصل بين الشرطة والشعب في الأيام اللي بعد كده كان الشعب بيستنجد بالجيش ضد الشرطة ويتحامى فيه
يمكن دور الجيش يوم 2/2 كان سلبي في القاهرة لكن في بورسعيد الجيش عمل كاردون حوالين المعتصمين المطالبين برحيل مبارك وفرق مظاهرة التأيد اللي طبعا كانت من بلطجية مسلحين
لحد ماتنحي مبارك والمجلس العسكري مسك البلد وبدأت الحقايق تبان، زي إنهم كانوا أخدين أوامر بضرب المظاهرات والمشير وسامي عنان رفضوا ينفذوا وحاجات كتير من النوعية دي ، وأنا بقيت بقول عليه جيشنا حبيبي
جه يوم 9 مارس وإعتصام مجلس الوزراء اللي تم فضه بالقوة، كان ليا أصحاب في الاعتصام عند مجلس الوزراء أو في التحرير، لما كلموني يحكولي اللي بيحصل كنت في حالة صدمة ومش مصدقة إن الجيش هو اللي بيفرقهم بالعنف ده، وجملة إن شاب قعد على الأرض وفتحلهم قميصه وقالهم اقتلوني وجعتلي قلبي أكتر من إستشهاد شهدائنا في الثورة ، بس كنت واثقة إن دي غلطة وإن المجلس العسكري هيعتذرلنا عنها، ويومها قبل ماأنام قلت هيعتذرولنا إعتذار رسمي و مش هنقبل أي حاجة تانية، وأول حاجة عملتها تاني يوم أول ماصحيت هي إني سألت الجيش إعتذر، وفعلا الجيش كان نزل إعتذاره الشهير نعتذر ورصيدنا لديكم يسمح وللحق فالرصيد فعلا كان يسمح وإحنا صالحناه على طووول
إيه اللي حصل من يوم 19 مارس للنهاردة؟ ايه اللي حصل في خلال الشهرين دول يخليني أقول عليه جيشنا بس من غير حبيبي، أكون بطلت أحب الجيش؟ لأ طبعا أنا لسه بحبه وبحبه أوي كمان وده اللي مزعلني منه أوي كده، بس ماينفعش ابدا إن النشطاء والثوار يتقبض عليهم من ميدان التحرير ويتحاكموا محاكمات عسكرية ويتحكم عليهم على إنهم بلطجية، ماينفعش إن الشرطة العسكرية تنزل تفض عتصام كلية إعلام جامعة القاهرة بالعنف ده وتضرب وتكهرب الطلاب، أنا بعد الوقعتين دول كنت بقيت بخاف من الشرطة العسكرية ومش بحب أشوفهم، ولما قابلت واحد فيهم في الشارع واتكلم معايا وطلب مني أغير مكان ركنة العربية بكل ود والابتسامة مافرقتش وشه طول الحوار إستغربت وبقيت ماشية أقول ماهم بيعرفوا يبتسموا أهو ياربي أمال إيه لزوم العنف بقى
بس اللي مش هقدر أنساه ومش عارفة ممكن أسامح فيه ولا لأ وماعرفش المسامحة أصلا حقي ولا لأ هو فض اعتصام سفارة الكيان الصهيوني، مش هقدر أنسى صورة الشاب اللي وقف يقول بأعلى صوته ليه ده كله هو إحنا كنا عملنالكم إيه؟؟
الجيش جاب للثوار الأمن المركزي عشان يضربهم، كل ده عشان الثوار أحرار وطالبوا بتنكيس علم الكيان الصهيوني في ذكرى النكبة، ونكتشف الحقايق بعد كده إن مش الأمن المركزي بس هو اللي ضربهم لكن وبشهادة الشهود وفيديوهات اليوتيوب ظباط وعساكر الجيش اشتركوا في ده
أنا أكيد مصدومة المرة دي أكتر من أي مرة فاتت، جيشنا بيضرب ثورانا وبيشتمهم عشان علم سفارة الكيان الصهيوني؟
جيشنا اللي لما اتسربلنا كلام إن فلول الوطني ممكن يضربوا ظباط الجيش بالرصاص كان رد الشعب إحنا ننزل ونحميهم بعمرنا؟ جيشنا اللي إحنا وهو إيد واحدة؟ جيشنا اللي أقسم على حماية مكتسبات الثورة؟
طيب أنا بقى ماعملتش ثورة عشان الثوار يتحاكموا عسكري ومبارك يتحاكم مدني؟ ولا عشان ناخد من مبارك شوية فلوس حتى لو هيدينا مليارات العالم، أنا دم المصري عندي أغلى من العالم ومن اللي فيه
أنا ماعملتش ثورة عشان عيال الناس الأغنيا يخرجوا بأحكام مع وقف التنفيذ من النيابة العسكرية على خلفية اعتصام السفارة وعيال الناس الغلابة يستنوا لما يبقى يجي عليهم الدور بقى ويبقوا بيضربوا ويتعذبوا عقبال مايجي عليهم الدور
أنا عملت الثورة عشان كرامة المصري الغلبان قبل الغني، عملت الثورة عشان نبقى دولة قانون وعدل وحرية ومساواة
أنا زعلانة من جيشنا أوي وعلى قد حبي له صدمتي فيه، وبالرغم من كل حاجة حصلت مستنية الجيش يصحح مساره ويصالحنا ويراضينا وينفذلنا كل طلباتنا لأننا إحنا الشعب


ملحوظة:
البوست ده مكتوب في يوم للكتابة عن الجيش
ملحوظة كمان:
ماحدش يدخل يشتم في المجلس العسكري ويقولي جيشنا حلو لكن المجلس كخ، وكأن أعضاء المجلس هم اللي نزلوا الشارع يفضوا الإعتصامات ويضربوا الثوار، في حاجة غلط بتحصل والحاجة دي لازم تتصلح أو يجيبولنا مجلس رئاسي بقى، على الأقل نعرف نمسك في خناقة لما يغلط في حق الشعب

Monday, March 28, 2011

أول مرة أكتب عنك



وحشتني بجد، أنا قلتلك كده لما وقفت قدامك النهاردة، وعارفة إني كمان كنت وحشاك وإني كل مرة وأنا ماشية أقولك هاجي قريب وأخلف كلامي معاك
دي أول مرة اكتب فيها عنك، بس أنا عارفة إنك مش زعلان لأنك عارف السبب، عارف إني زمان أوي لما حاولت ماعرفتش ويومها بطلت كتابة خالص لأني شفت إنها كده مابقاش ليها لازمة، وحتى لما رجعت أكتب إنت مازعلتش إني ماكتبتش عنك، لأنك عارف إني كنت أجبن من إني أعترف بالحقيقة، وعارف إن القوة دي قناع أنا لبسته بإختياري وماقلعتوش رغما عني
الحقيقة اللي عشانها ماكنتش باجي أشوفك واللي اعترفت بيها مرغمة لما وقفت قدامك وأجبرت عيني إنها ماتنزلش عن الشاهد اللي مكتوب عليه إسمك
يومها كان اعترافي الأول بإنك مابقتش عايش، وكلمة الله يرحمه اللي بقولها بعد إسمك دايما عمرها ماكانت اعتراف مني بده، أصل الرحمة بتجوز على الميت والحي
النهاردة حسيت إنك واقف جنبي وبتطبطب عليا، سمعت نصيحتك ليا وإنت عارف إني هعمل بيها
ماتتخيلش كنت متضايقة إزاي قبل ما أجيلك، وأكيد كان باين عليا، لكن لما وقفت قدامك ارتحت وحسيت بسكينة ماحستش بيها من زمان، من أخر مرة كنت فيها عندك
إنت عارف إن أنا كان نفسي مامشيش بس زي كل حاجة بتتفرض علينا كان لازم أمشي
مشيت وأنا بوعدك إني هرجع تاني قريب وعارفة إنك مش هتزعل لما أتأخر

Monday, March 21, 2011

الست دي أمي


أنا بجد بحبها اوي وعارفة إني مغلباها معايا، الست دي مارتاحتش ولا أيام النظام البائد ولا أيام الثورة ولا بعد الثورة
زمان أوي من كام سنة كده لما ماكنش في أحداث في بورسعيد وكنت بغطي أخبار المظاهرات اللي بتحصل في كايرو غالبا وألكيس أحيانا وكنت اتضايق أوي عشان الناس بتتسحل في الشوارع وأنا قاعدة في بيتنا كانت دايما بتقولي إن كل واحد فينا له دوره وإن أدوارنا دي بتكمل بعضها وكل واحد بيعمل اللي يقدر عليه
ومن سنة لما حملة البرادعي والجمعية الوطنية للتغير اتأسسوا وبدأت حملات جمع التوقيعات وتوعية الناس ونزلت عشان أشتغل في الشارع كانت معترضة في الأول زي أي ام في الدنيا بتدعي للشباب اللي عايزين يغيروا البلد بس تخاف أوي لو الشباب دول حد من أولادها ورغم ده مامنعتنيش
من المواقف اللي مش ممكن أنساها لما بدأنا حملة طرق الأبواب، يومها ماكنتش راضية إني أنزل لأن جورج إسحاق كان هنا في بورسعيد وأكيد الأمن هيبقى موجود، وأنا قلتلها إني هحضر الاجتماع بس ، حضرت الاجتماع وقرروا انهم نازلين الشارع ولما سألوني جاية رديت من غير تفكير أها، ورغم إننا لما خلصنا قعدت أكتر من ربع ساعة أنفض في هدومي والشوز من رمل البحر ورجعت البيت زي البرئية إلا إن بعدها بيومين جت تسألني، إنت أول إمبارح حضرتي الاجتماع بس مش كده، رديت بكل براءة من غير ماأبصلها عشان ماتكتشفش إني بنصب أها، فما كان منها إلا انها قالتلي أمال صورة مين دي ،ورغم ده سابتني أنزل معاهم تاني
أيام التحضيرات للثورة كان دوري إني أكون غرفة عمليات، وبناء عليه يوم 25/1 أنا مانزلتش الشارع، اليوم ده اتقبض فيه على 3/4 الناس اللي بشتغل معاهم، والربع الباقي على بالليل ماقدرتش اعرف أي حد فيهم فين لأن الموبيلات متراقبة، وعلى الساعة 12 بالليل كنت وصلت لمرحلة من الضغط العصبي إني فضلت أعيط، ساعتها ماما جتلي وقالتلي بتعيطي ليه؟ قلتلها العيال اتقبض عليهم واللي بره مش عارفة أوصلهم عشان الموبيلات متراقبة، قالتلي بتعيطي عشان إتقبض عليهم وعايزين تغيروا مصر؟ لازم تجمدوا شوية عشان تقدروا تغيروها، والجملة دي كانت السبب إني أقدر اتماسك تاني عشان أقدر أعمل دوري
يوم الخميس 27/1 نزلت مظاهرة نقابة المحامين من وراها، قلتلها إننا عندنا ميتنج هناك ، رغم إني كنت عارفة إن إحتمال كبير أتاخد يومها ومارجعش، ولما كلمتني وعرفت إنها مظاهرة كان صوتها مليان قلق لكن ماضغطتش عليا إني أروح ولما رجعت ماتخانقتش معايا
من يوم بداية الثورة وأنا كل ماأنزل من البيت تيجي معايا عشان بتبقى خايفة إني هيتقبض عليا أول ماأنزل، ماأنكرش إني لحد دلوقتي مش فاهمة منطقها في ده ولا إزاي وجودها معايا هيحميني من أمن الدولة لو حبوا ياخدوني ، بس هي كأم كانت شايفة إنها كده بتحميني وأنا كبنت كنت أتمنى لو ماعرضتهاش لكل ده
رغم إن مداخلاتي على الجزيرة لو كانت الثورة لا قدر الله فشلت كانت أقرب مكان هتودهوني له هو وراء الشمس إلا إنها عمرها ماقالتلي بلاش الكلام ده ولا هتودي نفسك وتودينا في داهية
حتى بعد مالثورة نجحت وإنتشرت حالات البلطجة في بورسعيد ولما عرفت إن اللي مأجر البلطجية دول أحد أعضاء الجزب الوطني كانت بترفض تماما إني أنزل لوحدي وكان ممكن إن أختي توديني وتجيبني لكن أنا مانزلش لوحدي ، وأنا كنت بقدر قلقها ده رغم إني متأكدة إن الراجل ده أصلا مايعرفش شكلي عشان يبقى بلطجيته في الشارع مستنين يخطفوني
ممكن نكون إحنا كشباب اللي فكرنا نغير البلد أو نجحنا إننا نعمل ثورة لكن الأكيد إننا ماكناش هنطلع كده لو ماكنوش دول أهالينا
كل سنة وإنت طيبة يا أمي وربنا يخليكي لينا ويباركلنا فيكي وسامحيني لأني تعباكي معايا على طوووووووول

Wednesday, March 16, 2011

إنك تكون أنا



إنك تكون أنا دي مش حاجة سهلة أبدا وحاجة أنا شخصيا ماتمنهاش لأي حد
إنك تكون أنا معناه إنك ماتقدرش على زعل غيرك في الوقت إنك كلك ممكن تكون مابتفرقش مع غيرك ده مش زعلك بس يعني
إنك تكون أنا معناه إنك لما تكون زعلان بس اللي مزعلك متضايق شوية فإنت هتنسى إنه زعلك عشان تحاول تخليه مبسوط وعلى فكرة هو كمان هينسى إنه زعلك ومش هيصالحك وإنت كمان هتعمل نفسك نسيت
إنك تكون أنا معناه إنك تلاقي ناس كتير عليك وبيغلطوك وإنت عارف إنك مظلوم وعندك اللي تقدر تدافع بيه عن نفسك لكن مش هتقدر تقوله لأنك لو قلته مش هتبقى أنا
إنك تكون أنا معناه إنك لما تتجرح تيجي على نفسك عشان اللي جرحك
إنك تكون أنا معناه إنك تحاول ترضي كل الناس في نفس الوقت وتطلع نفسك غلطان عشان ماتزعلهمش وهم هيعتبروا ده واجب عليك وماحدش هيحاول يعرف انت بقى زعلان ولا لأ
إنك تكون أنا يعني حتى لما تكون مخنوق مش هتقدر تعيط لأن دموعك دي هتجرح ناس قريبين منك وهم مالهمش ذنب فيها وهيبقى حرام عليك تجرحهم
إنك تكون أنا معناه إنك هتسامح اللي غلط في حقك رغم إنه ماحاولش يعتذر بس عشان إنت هتحس بالذنب طول مانت مش مسامح
إنك تكون أنا معناه إن رغم مميزاتك الكتير اللي كل الناس بتتكلم عنها طول الوقت ورغم أهميتك في حياتهم اللي دايما بيكلموك عنه عنها، لكن وقت مايتعرضوا لأي مشكلة سواء إنت كنت طرف فيها ولا لأ وباختلاف الأشخاص والمواقف لكن أول حل هيجي في بالهم إنهم يخرجوك من حياتهم دي رغم إنهم عارفين إن دي أكتر حاجة بتوجعك
إنك تكون أنا معناه إن أقرب حد ليك والوحيد اللي بتكون محتاج إنه يطبطب عليك وياخدك في حضنه ويحميك حتى من نفسك مش هتلاقيه والمفروض إنك تقدر ده أيا كان سببه رغم إنك محتاج اللي يحس بيك ويقدره
إنك تكون أنا معناه إنك هتزعل أوي من كل اللي سيبتهم يقنعوك بإن دورك في الثورة من البيت كان أهم بكتير من دورك في الشارع لأنهم حرموك إنك تكون أحد شهداء الثورة خصوصا إنك مابقتش بتتمنى حاجة غير كده
إنك تكون أنا معناه إنك في أشد لحظات ضعفك مش مسموحلك تنهار عشان دايما هيكون في ناس محتاجينك تمثل دور القوي وتقف جنبهم وتكون موجود عشانهم
إنك تكون أنا معناه إن كل الناس يبقى ليها خاطر عندك لكن إنت مالكش خاطر عند أي حد
إنك تكون أنا معناه إنك تسمع كل الناس لكنك مش هتلاقي حد يسمعك
إنك تكون أنا معناه إنك بعدها بإسبوع هتخبط رأسك في الحيطة عشان ترتاح رغم إن أنا مش هعمل كده

Monday, February 7, 2011

يامصر هانت وبانت




يامصر هانت وبانت كلها كام يوم...

نهارنا نادي ونهار الندل مش باين


الدولة مفضلش منها إلا حبة شوم..

لو مش مصدق تعالي ع الميدان عاين

ياناس مفيش حاكم إلا من خيال محكوم..


واللي هيقعد في بيته بعدها خاين

اللي هيقعد كأنه سلم التانيين للأمن بإيديه وقاله هما ساكنين فين..


وصلت لضرب الرصاص ع الخلق في الميادين

حتى الجثث حجزوها اكمنهم خايفين..


يامصر أصبحنا أحياء وميتين مساجين

فاللي هيقعد في بيته يبقى مش مفهوم..


واللي هينزل الهي حارسه صاين

يامصر هانت وبانت كلها كام يوم..


نهارنا نادي ونهار الندل مش باين.

نهارنا نادي وبايدينا علي فكرة..

الصبح عنده فضول راح نعمل إيه بكرة.


إيده علي الباب وخايف يلمس الأكرة..

ادخل ياأستاذ براحتك والبلد حرة.


إحنا زهقنا نشوف الصبح من برة..

ادخل وخرج بقايا العتمة بالمرة.


الناس ديه حرة وجنود الأمن مضطرة..

ياصبح طلعت روحنا لجل تيجي ياخي.


طالعين نجبيها أهو فى كل حارة وحي..

حتى لو ضربونا بالرصاص الحي.


شوف المداين كدة مفروشة خلق وضي..

دايما مفاجأة ودايما وقتها معلوم.


الحكم لينا وليك الحق يامداين..

يامصر هانت وبانت كلها كام يوم .


نهارنا نادي ونهار الندل مش باين..

ياصف عسكر بدال الدرع شيلوة اثنين.


25 يناير ياشباب فاكرين..

كان فيه انجليز ووزير الداخلية تخين...


كان عنده برضه عساكر زيكم جامدين.

سابهم يموتوا علولا لم سأل فيهم..

كانوا شبهكم اساميكم اساميهم.


ياعسكري البهوات اللي بتحميهم..

ممكن يردوا عليك لما تناديهم.


ياعسكري أنا أصلي بس بستغرب..

لو لاقي تأكل وتشرب قوم ياعم اضرب.


اضرب عشان الوزير من ضربتك يطرب..

لكن هتشتغل ايه لما الوزير يهرب.


أما الشديد القوي القادر أبو القادر..

برميل تلامة نشع علي مصر من الآخر.


لو شافته معددة تكتب ادب ساخر..

ثابت يقول للهرم ياكابتن اتاخر.


ولم يزل معتقد ان الهرم هيقوم..

ادي الحجر والبشر قايمين ياسيد القوم.


والدين هيترد ياللي عشت متداين..

يامصر هانت وبانت كلها كام يوم.


نهارنا نادي ونهار الندل مش باين..

ده حكم أسرة ولا خوفو ولا خفرع.


ولا وجع بطن يتعالج بزيت خروع..

عمل مسوجر بعيد عنك ولايطلع.


جربنا فيه كل شىء ملقينا شىء ينفع..

ماطلعش بالأدوية جربنا ألف طبيب..


ولا بعطارة شيوخ ليهم بلح وزبيب.

ولا بجحفل مغولى وضرب بالقباقيب.

. عمل مسوجر وسفلي شغل تل أبيب.


وشغل أمريكا متغلف وختمة عليه..

ضيف زارنا ياعم من غير دعوة لابس بيه.


قعد 30 سنة مابيقولش قاعد لية..

والنية يديها لابنه النابغة بعديه.


ويقول قضا وقدر بين البشر محتوم..

قولناله طيب ومين قال للقدر معلوم.


واش عرفك يافخمتك بالذي كاين..

يامصر هانت وبانت كلها كام يوم..

نهارنا نادي ونهار الندل مش باين

Sunday, January 23, 2011

ليه 25 يناير


ليه هننزل يوم 25 لأن دي بلدنا لكن خيرها مش لينا،إحنا اللي بنشقى ونتعب ونتمرمط وفي الأخر مابتكافئناش على تعبنا، خيرها رايح لغيرنا، البطالة في ازدياد، عيالنا بيتبهدلوا في الأقسام وبقوا بيتقتلوا في الشوارع، الفساد في البلد بقى له رأس وايدين ورجلين، البلد باظت مننا ولو مالحقنهاش دلوقتي هنصحي الصبح في يوم نلاقيها لمت نيلها وأهرامتها وأثارها وقناة سويسها وطفشت وسابتنا مع الحكومة لوحدنا
هيجي يوم أولادك هيلموك إنك سكت زي مااحنا بنلوم أهاليا، ماتقولش عايز أربي العيال لأنهم كده مش هيتربوا، الذل والخوف عمره ماكان تربية
ماعدش ينفع تفضل ماشي جنب الحيطة لأن اللي ماشي جنبها قدامك وقعت عليه وقتلتله
إحنا هننزل يوم 25 عشان نقول إننا مش موافقين على اللي بيحصل في البلد دي، عشان نقول إننا والله بنحبها ومش عايزنها تتبهدل أكتر من كده، عايزين نعيش بكرامة وعلى فكرة ده مش طلب صعب ولا كبير ولا مستحيل، ده أصلا أقل حق من حقوقنا
إنزل في محافظتك في أقرب مكان فيه تجمع، حاول ماتبقاش لوحدك، لازم يكون معاك حد، ماقدرتش توصل لحد من الناس اللي هينظموا وقفات إنزل انت وأصحابك أو قرايبك، غني لمصر الغناء مش ممنوع في القانون، إمسك علم بلدك نمسكه مرة من غير ماتش كورة، لو شفت حد ماشي في الشارع اتكلم معاه، قوله تعبنا من الظلم والقهر والذل، قوله نفسنا نمشي رافعين راسنا، اشكيله همك لأنه أكيد عنده نفس الهم
ماتشتبكش مع الأمن ، لو ظابط كلمك رد عليه باحترام، الظابط هو كمان عينه طالعة ونفسه بلده تبقى نضيفة، وفيهم ناس كتير نفسهم البلد تتغير بس مش قادرين يقولو ده بصوت عالي
لو عدد الناس النازلين كان كبير إحنا مش هنروح، هنفضل في الشارع ونتمسك بمطالبنا، لو حد اتقبض عليه مش هنروح، اللي اتقبض عليهم لازم يخرجوا الأول
أعتقد إن الأمن هيكون أذكى من إنه يتعامل مع الناس بعنف، ولو حصل العنف هيكون ضرب ومافيهاش حاجة لما نضرب عشانها، ماهي ياما اتضربت عشانا
هنقف وهنثبت عشان نثبت للناس إننا كمان نقدر، لو اليوم خلص وروحنا ماتضايقش نفسك لأنك عملت اللي عليك وحطيت رجلك على أول خطوة في الطريق، واللي ماحصلش المرة دي هيحصل المرة الجاية إن شاء الله

لو عرفت إن حد اتقبض عليه كلم جبهة الدفاع عن متظاهري مصر

0120624003 - 0129295510 - 0106701470

سيب اسمه ومحافظته ، ولو تعرف حد في محافظتك كلمه وبلغه

لو كنت من بورسعيد تقدر تتواصل على الارقام دي عشان تعرف هتنزل فين أو لو حصل أي حاجة يومها
0180969971/0180937763

Friday, January 21, 2011

عقبالنا يااااارب

بجد مش لاقية كلام أقوله غير إني مبسوطة جداااا وفخورة جداااااااا
ربنا يكملكم ثورتكم ويحرركم من بقايا النظام السابق ويارب نشوف مصر قريب زي تونس

Tuesday, January 18, 2011

عن عبده عبد المنعم وكل اللي اتحطوا في موقفه



إحنا ولاد ناس وماتحطناش في مواقف من دي قبل كده
أقصى بهدلة بالنسبة لينا إن حد يكلمنا بإسلوب مايعجبناش رغم إنه ممكن يكون بالنسبة لناس تانية أسلوب كويس جدا وبيتمنوا إن حد يعاملهم بيه
ماجربناش مرة نبات من غير عشاء
ولا جربنا ندور في الزبالة عشان ناكل
ولا حد حاربنا في رزقنا
وعارفين إنه لو حصل الحمدلله لينا أهل يصرفوا علينا
ماجربناش اليأس
ولا إننا نشوف الدنيا سوداء ومافيهاش نقطة نور
وماجربناش الظلم غير في الحب
إحنا الصدمات اللي في حياتنا صدمات عاطفية ودي الناس بيشوفها حاجات هايفة
يبقى ماينفعش نقعد في بيوتنا الدافية ، ورا شاشات الكوبيوتر الغالية ،على النت اللي هو أصلا باشتراك نحكم على ناس لو اتحطينا في موقفهم 5 دقايق بس الله أعلم هنعمل إيه في نفسنا مش بس هنولع فيها
أه الانتحار حرام
بس ماحدش فينا يعرف لو ده حصله هيعمل ايه
وساعتها أصلا هيفكر في ربنا ولا هيشوف إن ربنا نفسه ظلمه بإنه سايبه في الغلب ده
يبقى إحنا نحمد ربنا إننا مش كده وندعيه إن ده مايحصلش معانا وندعيه إنه يغفرلهم ويرحمهم
غير كده هو بس اللي يحكم على الناس وإحنا مش الهة عشان نقعد نكفر في الناس وننظر على واحد شاف اليأس والحياة سودا، عشان دي مش غلطته لوحده دي غلطة كل اللي حواليه اللي ماحدش فيهم حاول يغير الواقع ده ولا حاول يقف جنبه ولا حاول يمد إيده ينورله شمعة في السواد اللي هو عايش فيه
واللي ضامن نهايته هتكون إيه وضامن إنه هيموت مؤمن وإن ربنا هيرحمه ويغفرله ويدخله جنته يكفر خلق الله براحته، لكن أنا بقى مش ضامنه وكل اللي أقدر عليه ادعيلهم وأدعي ربنا إنه يحسن خاتمتي

Tuesday, January 11, 2011

القديسين وسيد بلال وأسامة


إحنا في مصر اتنازلنا عن حاجات كتير أوي قصاد الأمان، احنا تقريبا اتنازلنا عن حريتنا ونسينا ان الحرية هي مصدر الأمان، ورغم ده فتفجيرات الاسكندرية الأخيرة أثبتت لنا كلنا إننا والحمدلله ماعندناش حرية ولا أمان
التفجيرات دلوقتها بقالها 11 يوم ولحد دلوقتي الأمن فشل في إنه يحدد سبب التفجير كان إيه، عربية مفخخة ماسابتش حفرة في الأرض، ولا أنتحاري ماتبقاش منه ولا فتفوته بما إن الصورة اللي طلعوها علينا في كل وسائل الاعلام طلعت لضحية مسيحي زي مامواقع الأخبار قالت، ولا حتى عبوة ناسفة اتحطت قدام الكنيسة واتفجرت عن بعد، كل اللي قالوه انها جهات أجنبية وإن في 15 أجنبي دخلو مصر في الأيام السابقة للتفجيرات، طيب هم 15 أجنبي بس؟ دي مصر بيدخلها ألاف الأجانب كل يوم
المهم إن الأمن أثبت فشله في تأمين أي حاجة غير الكرسي، ، وقفات المعارضة مابتكملش 100 شاب بتتحاوط بألف عسكري، لكن كنايس كانت مهددة بالتفجير ماكنش واقف عليها غير ظابط و3 عساكر وماكنوش في مكانهم كمان لانهم لو كانو في مكانهم كان زمانهم هم كمان أشلاء وخبراء التجميل بيحاولوا يرسمولنا شكلهم
ومازالت الكنايس في مصر مش مؤمنة ، انا روحت كنيسة النهاردة أنا وأختي نجيب حاجة من هناك ودخلنا وخرجنا ولا حد سألنا رايحين فين، مافيش غير انهم عاملين بلوكات قدام رصيف الكنيسة عشان ماحدش يركن، على أساس ان اللي عايز يفجر لازم يركن الأول


سيد بلال مواطن مصري عادي، يعرف ربنا شويتين، مقتدي برسوله في تربية الدقن متزوج وعنده طفل سنة ونصف، جاله تليفون من امن الدولة بعد الحادث بكام يوم والراجل راحلهم، لأنه ماعملش حاجة تخليه مايروحش رغم انه كان من حقه مايروحش لأن مافيش إذن نيابة بالقبض عليه، أهل سيد جالهم تليفون بعدها بيوم من مستشفى جنب مقر أمن الدولة بتقولهم يروحوا يستلموا جثة ابنهم، أخوه وجوز أخته رفضوا إنهم يستلموا الجثة لما شافوا أثار التعذيب الوحشي عليها وأصروا على تقديم بلاغ للنيابة وربنا رزقهم بوكيل نيابة عنده ضمير كتب في البلاغ كل أثار التعذيب اللي شافها بعينه واتهامهم لظباط أمن الدولة بقتل سيد، اللي تقرير الطب الشرعي قال إنه توفي نتيجة إنخفاض في الدورة الدموية ومافيش أي شبهة جنائية في وفاته وكأننا هنصدق أو كأننا ماشفناش الصور اللي بتقول إن مش في شبهة جنائية وبس دي بتؤكد إن الراجل اتقتل من التعذيب، حضرة الطبيب الشرعي نشوفك إن شاء الله مكان سيد بلال وخالد سعيد وربنا بردو يرزقك بطبيب زميل يقول إن مافيش شبهة جنائية في وفاتك وإحنا هنصدقه ومش هنعترض
الأمن بيمارس جميع حيلة عشان اهل سيد يتنازلوا عن القضية، بالترهيب شوية والترغيب شوية، عرضوا عليهم 100 ألف جنية كانهم قتلوا قطة في الشارع، وشقة باسم ابنه ووظيفة لأخوه، أو أمرين اعتقال لأخوه وجوز أخته ماحنا بلد الغابة بقى كل اللي عايز يعتقل حد يعتقله ويعذبه ويقتله ويرجع يهدد أهله، الناس دي محتاجة اننا نقف جنبهم عشان مايحسوش إنهم لوحدهم ومايضعفوش قدام ضغط الأمن، الضغط ده اللي جاب لأخو سيد شلل نصفي نفسي
على فكرة مصر ماضية على اتفاقية دولية بموجبها عقوبات التعذيب السجن 15 سنة والتعذيب المؤدي للقتل الاعدام

أسامة مشرف بقى هو مصري شغال في السعودية ومنسق الجمعية الوطنية وحملة البرادعي بالسعودية وهو صديق على موقع تويتر
أسامة كان سهران معانا يوم 2/1 على تويتر وكان عادي جدا، يوم 3/1 إتصل بجمال عيد وقاله انه في السفارة المصرية وإن أمن السفارة ضربوه وجبوله البوليس السعودي، اها والله السفارة اللي المفروض أنها ملاذ أي مواطن بره وطنه وهي وطنه أساسا في الغربة جايبه البوليس الغريب لمواطنها، بس ده مش غريب في مصر إذا كانت حكومتك جوه بلدك بتقتلك في الشارع أقل حاجة تعملها ممثلة الحكومة دي برة بلدك إنها تجيبلك بوليس دولة الغريب
من يومها وموبيل أسامة مقفول وماحدش يعرف عنه أي حاجة أهله هنا في مصر ولا أصحابة في السعودية وإحنا مش عارفين قتلوه ولا سجنوه ولسه عايش
أي مصري بيشتغل في السعودية أو يعرف أي حد هناك أو أي سعودي بيدخل البلوج ويقدر يسألنا عنه ياريت يعمل كده وأكيد مش هنقول مين اللي جابلنا أخباره
احنا بس عايزين نعرف هو فين وعامل ايه ، عشان نعرف نتصرف

قبل مانشر البوست عرفت ان أسامة الحمدلله خرج مانعرفش خرج منين ولسه ماعنديش أي معلومات تانية
 

The Lost Princess © 2008. Design By: SkinCorner