Monday, April 2, 2007

تاج تاني .......... أه ياني



أولا: أنا عايزه أوضح حاجه وهي اني لما قلت عايزينك ترحل وتغور أنا مقصدتش بيها اني أشتم الريس, لأني ضد اسلوب الشتيمه حتي لو لناس احنا معارضنهم, يعني كون الناس وحشين مش مبرر عشان احنا كمان نكون وحشين.

لكن كلمة تغور أنا قصدتها بمعناها وهي الذهاب في الأرض والاختفاء, وهي ذكرت في القران الكريم بلفظ (غورا) في قصة صاحب الجنة الذي أتاه الله المال والأولاد وكان بيحاور صاحبه.

-------------------------------

أحمد مبرمج حر مررلي تاج بقاله فتره, ويجي القدر ان أحمد فؤاد مع نفسى يستجيب أخيرا ويرجع عالم التدوين عشان يدبسني في نفس التاج وتاج تاني كمان, علي العموم هعديهالك المره دي ياحمد عشان انت لسه راجع.



التاج الأول اللي مراروهولي هم الاتنين



هل كنت طالب شاطر فى المدرسة ؟

الحمدلله أه



ايه كانت احب مادة و اكره مادة ليك فى المدرسة والكليه ؟

كنت بحب الرياضه جدا وأنا في المدرسه, وكنت مؤمنه ان مفيش حاجه اسمها ان مسأله درست طريقة حلها ممكن ماتتحلش, أي مسألة تتحط قدامي لازم أحلها, وخصوصا المسائل الصعبه, بحبها جدا عشانها بتحتاج تشغيل مخ, وبيبان فيها الذكاء, ولنفس السبب حبيت الفيزياء جدا وأنا في ثالثه ثانوي.

ومكنتش بحب النحو والصرف أبدا ومحدش يقولي انت عربيه ازاي؟ ومش بحب الجغرفيا وعشان كده دخلت علمي وأنا ضميري مستريح.

في الكليه كنت بحب الفسيولوجي , والفيزياء, والرياضه طبعا, ومكنتش بحب الأورجانك رغم اني كنت بحبها في ثانوي, انما معرفش ليه كل اللي دخلو كليات علوم عندهم عقده من الكيمياء العضويه.

وكليتي حاليا, طبعا مش بحب النحو والصرف, وفي ماده اسمها قضايا معاصره أعتقد اني هحبها لأنها بتتكلم عن الاستنساخ والهندسه الجينية والحاجات دي أنا بحبها.



كنت عايز تطلع ايه وأنت صغير ؟

مش عايزين ضحك ماشي

كان نفسي جدا أطلع آلانه

أنا مش عارفه انت فاكرينها ولا لأ, بس هي كانت بتيجي في مسلسل أجنبي كده وأنا صغيره, هي غالبا كانت جايه من المستقبل, وكانت بتحارب راجل كده شرير, فانا كان نفسي اني أحارب الراجل ده جدا, وان يكون معايا المعدات اللي معاها عشان أحارب بيها كل الأشرار.

طبعا عمروكو مهتلاقو حد كان نفسه يطلع كده.



كده خلص التاج الأول الحمدلله نيجي بقي للتاج التاني بتاع أحمد فؤاد.



هل تسعد عندما يمرر لك أحدهم تاجا؟

الصراحه أنا بسعد لما التاج يمرر للناس مش ليا, وأحب أوي اني أدخل عندهم عشان أعرف كتوا ايه.

لكني مش بحبه يتمررلي وبحاول أهرب منه, بس دلوقتي بقيت بخاف لموت وأنا عليا تاج, أو بعد فتوة شيخ الأزهر الأخيره ممكن أكون كتمت الشهاده لو محلتهوش وكده يبقي أثم قلبي.



هل مقدار سعادتك أو شعورك أيا كان - عند تمرير التاج لك يختلف حسب المدون الذي يمرر لك التاج؟

الصراحه بتبسط برضو لما يتممرلي عشان بحس ان في ناس عايزه تعرف عني حاجات, وانهم عايزين يعرفوني أكتر, وبتبسط جدا لما يتمررلي من حد مش متوقعاه, لكن برجع أفتكر اني لازم أحله وأقعد أعيط.



هل تستمتع عند إجابتك عن أسئلة التاج؟

حسب السؤال, الأسئله اللي بتخليني أفكر أو أرجع لورا دي بحبها أوي.



هل ترى للتاج أهمية حقيقية ؟

أكيد طبعا, لأنه بيعرفنا علي بعض من جوه أكتر, وبيقربنا من بعض.



هل فكرت في عمل تاج خاص لك من قبل؟

الصراحه لأ, بس دلوقتي ممكن أفكر , عشان أدبس فيه الناس اللي بتدبسني.



هل تفضل قراءة أجوبة التاج عند المدونين الآخرين ؟ أم لا تهتم سوى بالتدوينات الأخرى فقط؟

ازاي بس, ده أنا بحب أقرأها جداااااااااااااااااااااا, لأني فعلا بكون عايزه أعرفهم أكتر.



عندما ترد على التاج ما الذي تراعيه أكثر؟

حسب الحاجه اللي التاج بيتكلم عنها, بس أنا بكون صريحه وحقيقي أنا مهربتش من سؤال أسوأ مدون في التاج اللي فات, لأني فعلا مش بدخل علي مدونات وحشه الحمدلله.



إلى من تحرص على تمرير التاج؟

لأصحابي الحلوين.

وللناس اللي أنا عايزه أعرفهم أكتر.



هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟

انا مش لسه من شويه قايله اني طبعا بحب أقرأها, وطبعا اجابتهم للتاج هي اللي بتعرفني هم مين, ده طبعا بجانب كتاباتهم.



هل تلتزم حرفيا بأسئلة التاج ؟

أها



ما هي نوعية التاجات التي تفضلها ؟

حتي التاجات كمان هيبقي فيها أفضليه, يعني أي حاجه تبن اللي جوه الناس أكتر.



الحمدلله التاج التاني خلص, وكده يبقي أنا لسه في ذمتي تاج بتاع يوري وأوعدك اني هجاوب عليه ان شاء الله.



الحكمه الشهيره بتقول ايه؟

برافو عليكم

اللي اتدبس يدبس, وعشان كده جه بقي الدور علي الناس اللي هندبسهم.





محمود شاب فقري

محمد عادل مصر هى أمى






العريس عايز أتجوز



يوري yuri

60 comments:

أحمد عيسي said...

التاجين حلوين قوي..واجابانك جميلة
هي اجابات بريئة قوي بصراحة..
لسة مخاصماني برضه مش عارف ليه..
يلا سلام بقي

hend said...

حلو التاج وبطلى تدبسى ناس فيه علشان بيلف على الكل بعد كده
وكويس انك خلصتى تاج من اللى عليك انا كمان عليا تاج ليسى

Moody said...

يا خبررررررررررر
كنتى عايزه تبقى زى ألانا؟يا بختك
على فكره المسلسل اسمه:
the girl from tomrrow
انا كنت بحب المسلسل ده قوى على فكره
ميرسى عالتدبيسه و انشالله قريب أرد عالتاج

Mony The Angel said...

msA 3aleeky kda wenty bteoddy 3altagaat kollaha w raf3a raas al3eela :)))

w about mawdoo3 alaana lol
3ala yaddy lol

fares said...

ماشي ياسراء علي العموم انا اتدبست في التاج انا كده عليه واحد بس لازم ارد

yousef said...

ساسو انتى قلتيلى هتعلمينى ازاى اضيف اسماء مواقع ومدونات ومشوفتكيش اساسا
ويوم ما اشوفك تدبسينى فى تاجين
ماشى يا ساسو ماشى
regards

مبرمج حر said...

أحييكى الأول على صورة البوست , معناها أنك كنتى مستمعة تماما وأنتى بتعلمى التاجين , شاى ونسيم ومزاج
ونظرة تأمل وأنتى بتفكرى فى الأجوبة

شفتى يا إسراء , لو محدش حل التاج بيقى ده كتمان شهادة وشيخ الأزهر نفسه قال كده فى فتواه الأخيرة
أصل فيه ناس حسابها تقل وبقى ليا عندهم بدل التاج إتنين وعاملين نفسهم ولا كأنهم هنا , قال يعنى أنا نسيت
أنا بحذّرررهم جميعاً

فبركة said...

كلام جميل اوى
ربنا ما يزنق تانى
ههههههههههههههههه
يا ريت تنورينى فى مدونتى

The Groom said...


شكرا على التدبيسة يا اسراء

بس والله مبسوط

شكرا

تحياتي من ماناساس البلد

Mony said...

إيه يا واد الكلام الحلو ده...ضحكتيني أوي يا إس لما إتنرفزتي لأنك لسه مجاوبة السؤال...بس زعلتيني إنك كنتى شاطرة في المدرسه...إيه الناس دي؟؟؟
هدية مقبولة -بالعافية طبعا- بس أنا هخليهم زي الكريمة في وسط التورته...بوست و تاج...كده يعني

Mohamed A. Ghaffar said...

عنوانى

مصر هى أمى said...

بصى يا ستى

انا ملاحظ انك المدونة الوحيدة اللى كل التاجات بتتبعتلها ده معناه انك محبوبة من المدونيين كلهم
ما عداااااااااااااااا
اللى انتى بتدبسيهم فى التاجات ديه

ثم انا مفهمتش حاجة انتى كان نفسك تطلعى ايه

بس الحاجة الوحيدة اللى بتعجنى فى تاجاتك ان اجاباتك بريئة وجميلة جدا بتدل على شخصية رائعة

والحاجة الوحيدة اللى مبتعجبنيش انك بتمرريلى التاج ده

علشان خاطرك هرد عليه ماشى يا باشا

esraa said...

أحمد عيسي:
ربنا يخليك ياحمد.
انا طبعا مش مخصماك وعلي فكره انا كنت عندك قريب بس ماعلقتش (:

esraa said...

hend:
أبطل أدبس الناس ازاي بس ياهنون, انت ماتعرفيش الحكمه الشهيره ولا ايه؟
انا صحيح خلصت واحد بس لسه عليا بتاع يوري ):

esraa said...

Moody:
اها يامودي بجد كان نفسي أبقي زيها أوي, أنا أفتكرت اسم المسلسل بعد مانزلت التاج, والحمد لله اني مش الوحيده اللي بتحبه.
في انتظار حلك عشان أعرف كان نفسك تطلع ايه.

esraa said...

Mony The Angel:
لا والله كده مش كلها, لسه عليا واحد, بس قلت سمعة العيلة بقت في خطر ولازم اتقذها (:.

esraa said...

fares:
اها طبعا انت كده اتدبست, وفي انتظار ردك.

esraa said...

yousef:
طبعا يايوسف التدبيس دليل علي الصداقه (:
بالنسبه للينكات احنا خلاص حلينا المشكله دي.

esraa said...

مبرمج حر:
أنا فضلت أقول مفيش حد هيقول حاجه علي الصورة الحلوه دي, شطور انك قلت.
اه شفت موضوع كتمان الشهاده ده, الواحد لازم يخاف بقي.
وبعدين ياحمد مانت اللي ساكتلهم عشان كده مبقوش بيخافو منك, بهدي النفوس انا.

esraa said...

فبركة:
قلهم انهم مايزنقونيش تاني(:
نورتني وان شاء الله رايحه عندك.

esraa said...

The Groom:
العفو ده انت تؤمر ياجروم, ربنا يبسطك علي طول.

esraa said...

Mony:
ماهو نفس السؤال بيسألوه تاني, طب أعمل ايه بس.
اعمل ايه بس مانا كنت شاطره بقي.
وبتقبلي هديتي بالعافيه, اخص عليكي ياموني.

esraa said...

Mohamed A. Ghaffar:
أنا مش فاهمه حاجه يامحمد ):

esraa said...

مصر هى أمى:
بيجيلي تاجات كتير صعبت عليك مش كده.
واخص عليك يامحمد انت قصدك انك بتكرهني.
كان نفسي أطلع ألانه هي كان اسمها كده في مسلسل the girl from tomrrow , بس كانت كويسه جدا.
في انتظار ردك.

The Groom said...


اسراء

صحيح المسلسل بتاع ذا جيرل فروم تومورو

انا كنت متابع وهمي ليه و فاكر تقريبا حلقات كتير

والله انت فيكي حاجة لله

شكرا على الذكرى الجميلة

تحياتي من ماناساس البلد

No Fear said...

السلام عليكم
اللي شد إنتباهي قوي أنت في كلية علوم يا أهلا يا أهلا
الأورجانيك خنقتها إن فيها حفظ كتير و لا أسامي المركبات يسلام مع دكتور فهلوي يدرسلك المادة دي لازم تتكرهه طبعا

esraa said...

The Groom:
هو فعلا مسلسل حلو جدااااااا, طب كويس انك بتحبه نعمل رابطه للناس اللي بتحبه بقي ((:
والعفو ياسيدي, انت تؤمر.

esraa said...

No Fear:
يأهلا بيك, بس انا كنت فيها ((:
من وصفك للأورجنيك بيقول انك ياعيني متعقد منها, معلش يابني كلنا لها.

moodysalihamidzic said...

تاجين مرة واحدة
نايس توبيك

FemTo said...

ههههههههه

الملحاظة فى الاول بتاعت تغور ديه..عجبتنى جدا عشان انا برضه مؤمن بكده...اجابات جميلة وشكرا على التدبيسة اللذيذة

shabfa2re said...

اجابات لظيظة
باين عليكى كنتى دحيحة
ثانك يووو على تمريرك التاج ليا
انا جاىىىىى

esraa said...

moodysalihamidzic :
اها شفت الافترا ):

esraa said...

FemTo:
انت الوحيد اللي علقت عليها, وكويس اننا متفقين.

esraa said...

shabfa2re:
ههههههههههههه
لا والله مش دحيحه ولا حاجه انا بس كنت بحب الحاجات اللي بتتفهم.
في انتطارو اجابتك.

REEMOO said...

اجاباتك على التاج جميله يا قمر
مدونتك كلها جميله
تحياتى

zordeak said...

شكرا يا اسراء على اجابة التاج

اجاباتك كلها زى العسل


انتى عارفة


انتى فكرتينى بحاجة تحفة

انا كنت بعشق المسلسل ده وانا صغير


وكنت بحب الانا اوى اوى

بجد بحد

شكرا ليكى انك فكرتينى بوقت حلو من حياتى

:)

مبرمج حر said...

I taaaaaaagged yooooooooooooooooooooooou

ibn nasser- ابن ناصر said...

والله اجابات جميله وظريفه قوي ,,, بقولمعلهش سوري في سؤال بس شخصي ,,, وحاربتي الشرير ولا لأ ههههه ,يا ستي ماهو حلمك اتحقق اهو ماحنا بنحارب حبايبنا الاشرار بسلاح فضائي وهو الكمبيوتر والتدوين ,ايه رأيك!!!؟
تحياتي وشكر علي انك افتكرتيني

esraa said...

REEMOO:
ربنا يخليكي.
ونورتيني.

esraa said...

zordeak:
أنا حليته عشان قلت عيب الراجل يكون لسه راجع كده ونكسفه (:
المسلسل فعلا كان حلو أوي ياحمد, والعفو ياسيدي انت تؤمر (:

esraa said...

مبرمج حر:
تاني ياحمد
طب أعيط دلوقتي ولا أعمل ايه؟

esraa said...

ibn nasser- ابن ناصر:
ربنا يخليك
الصراحه لسه ماحربتوش , احنا فعلا لسه بنحارب فيه, بس ربنا معانا وننتصر (:

بيسوو said...

اجاباتك حلوة مووت يا اسراء
بخصوص بقى موضوع شتيمة الريس...وهو مين يا اختشي بيشتم فيه..هو الراجل مخلي نفسنا في حاجة
ربنا يصلح الحال ان شاء الله

fares said...

هاي اسراء انا عارف اني ليه تاج ليكي انا مجهز الاجابات لكن قبل ده انا عملت موقع ياريت تبقي تزوريه ::::::::: www.fareszoom.s5.com

esraa said...

بيسوو:
ربنا يخليكي.
من جهة ان الراجل مش مخلني نفسنا في حاجه فدي طبعا حقيقه, و كتر خيره علي ده.

esraa said...

fares :
أها شفت بقي, بننصب من أولها أهوه, هو مش تاج يافارس, دول اتنين. ((:
الموقع فعلا حلو جدا, ربنا معاك, ويارب فعلا اللي القضاة بيعملوه ينجح ويلغو التعديل ده يارب.

أحمد العربي said...

لا كدة العرش وجب ولا اية

mohammed said...

:) جاوبت على أسئلة التاج ده قبل كده ..

متشكر إنك شرفتيني في المدونة ، وفعلاً عملت بنصيحتك ، وآدي مدونتي الجديدة أهي
http://oscar2008.jeeran.com/

تحياتي
محمد عادل \ أوسكار

إبراهيم محسن said...

إسرااااااااااااااء

بتحبي الفيزيا...... عااااااااااااا
دي مادة تتحب
طيب الرياضة ماشي حلوة
لكن الفيزيا
طيب انتي كليه ايه؟

انا معاكي ان التاج حاجة مهمة انا بحب اقرا تاجات الناس قوي.. لما بخش مدونة جديدة بدور على تاج علشان اعرف صاحب المدونة
بس خلاص

بتجوبي بشقاوة... بحب البنات الشقية... انت مرتبطة؟

اوك اشوفك في بوست لاحق

فيه موضوع في المدونة بتاعتي طويل شوية.. معلش دوسي على نفسك وتعالي قولي رأيك.. رأي البنات خاصة يهمني في الموضوع ده

اصله كلام في سرك عن الحب والجمال
والرجالة مش بيحبوا الصراحة.. البنات اه.. انا كمان مش بحب الصراحة.. بستعبط يعني.. سلام
سلام

الدبور said...

رغم اني مش من هواه الرد علي التاجات الا انني من هواة قراءتها ومش تستغربي انا بحب استكشاف الناس
كنا عاوزين نعرفك اكتر يا برنسيس
عموما انت مشكورة علي صراحتكط في الردود

تحياتي
الدبور

david santos said...

Very good, Esraa! Thank you. have a good day

esraa said...

أحمد العربي:
مش كده, قولهم.

esraa said...

mohammed:
ألف مبروووووووووووووووووك.

esraa said...

إبراهيم محسن:
اها بحب الفيزياء, أصل مسألها بجد بتكون صعبه, وبتحتاج تشغيل مخ.
أنا كنت في علوم, ودلوقتي في دراسات اسلامية, وانت لو مش أزهري مش هتعرفها.
هههههههههههههههههه
لأ مش مرتبطه, عندك عريس (((:
حاضر هدخل أشوفه ان شاء الله.

esraa said...

الدبور:
وعرفتني ولا لسه, لو عرفتني قول لأحمد كفايه تاجات بقي (:

إبراهيم محسن said...

إسرااااااااااء

عندي عريس عندي عريس
اوك هقولك عليه في ودنك اصل العرايس كتير
سلام وهستناكي

esraa said...

david santos:
thx david, wc.

esraa said...

إبراهيم محسن:
ههههههههههههههههههه
أنا عايزه أعرف مين طلع اشاعة ان العرايس كتير دي.

Eman Eltaher said...

ربنا يصبرك على التاجات دى .. أنا أول مرة كنت أسمع عنها امبارح بس و الله لذيذة خصوصا انها بتوقع الواحد ف شر أعماله !! بس أنا بحييكى على اجاباتك و بهنيكى على مدونتك

.. صديقة جديدة لو تقبلينى

esraa said...

Eman Eltaher:
أها والله يابنتي, ادعيلي بجد يصبرني, ده انا لسه عندي اتنين مش حليتهم.
ربنا يخليكي يايمان, وصداقتك تشرفني (:
نورتيني.

 

The Lost Princess © 2008. Design By: SkinCorner