Thursday, April 5, 2007

إرادة ربنا


في قصة انا بحبها أوي, انتو ممكن تكونو تعرفوها , لكني بردو هحكيهالكم.
الحكاية دي حصلت في عهد المأمون بن هارون الرشيد.
كان في رجل دايما بيتكلم عن المأمون وحش, وعشان كده المأمون سجنه, لكنه عرف ان الرجل ده وهو في السجن لسه بيغلط فيه.
فقرر انه يقتله, وفعلا بعت رساله للقائم علي السجن وقاله يصلب
فوجئ المأمون ان القائم علي السجن أفرج عن الرجل ده, وطبعا المأمون اضايق جدا وبعتله وسأله انه ازاي يعصي أوامره ويفرج عنه؟
القائم علي السجن قاله انت بعتلي رساله مكتوب فيها يطلق.
طبعا المأمون قال ان ده محصلش.
فالقائم علي السجن وراه الورقه عشان يفاجئ المأمون ان فعلا مكتوب فيها يطلق.
المأمون أمره انه يروح ويقبض عليه, وأرسله رساله تانيه وكتب فيها يصلب.
فوجئ المأمون ان القائم علي السجن أفرج عن الرجل للمره التانيه, طبعا غضبه زاد وبعت جابه وسأله, وكان رده نفس الرد الأول ووراه الورقه اللي مكتوب فيها يطلق.
أمره المأمون انه يمشي ويروح يقبض عليه, وكتبله رساله وقال فيها والله ليصلبن.
وفوجئ المأمون ان القائم علي السجن أفرج عنه للمره الثالثه.
طبعا انتوا متخيلين غضب المأمون ممكن يكون عامل ازاي, وبعتله تاني.
المأمون كان غضبان جدا وقاله انت ازاي تعصاني؟
القائم علي السجن قاله أنا نفذت أوامرك يأمير المؤمنين.
المأمون قال , لكني أمرتك انك تصلبه وأرسلتلك رساله مكتوب فيها والله ليصلبن.
القائم علي السجن قال الرساله مكتوب فيها والله ليطلقن ياأمير المؤمنين.
المأمون أخد منه الورقه وبصلها وضحك وقال:
من أراد الله أن يطلقه ماكان للمأمون أن يصلبه.
كلنا بنمر بمواقف كتير وبنعتقد انها حصلت بسبب ذكأنا أو تخطيطنا ليها, وبننسي انها رغم ده حصلت عشان ربنا هو اللي رايد كده.
وكتير بنخطط لحاجات , وبنخطط كويس جدا كمان, ومش بنعرف محصلتش ليه؟
وده عشان مش بناخد بالنا ان ربنا مش رايدها تحصل.
أنا بحب القصه دي جدا بجد, لأني بشوف انها تجسيد رائع لارادة ربنا.

62 comments:

yousef said...

الحمدلله أنا أول كومنت
صح كل شىء مقدر لينا لو عرفنا ده عمرنا ما هنتعب فى حياتنا
ربنا يوفقك فى حياتك يا اسراء

The Groom said...


صحيح

وأزيد أمرين

أولا
"
لا يرد القدر غير الدعاء
"

وثانيا
لا تقولي الله سبحانه و تعالى عايز لأنها كلمة من العوز و الحاجة والله تعالى لا يعوز و لا يحتاج و لكنه يقول للشيء كن فيكون و هو يريد و لا يعوز

شكرا لك على الذكرى الجميلة

جزاك الله خيرا

سلام من مناساس البلد

تسـنيم said...

:))

لا تعليق

ايوية said...

انا اول مرة اسمع القصة دة ميرسى جدا فعلا كل شة بامر ربنا ومفيش حاجة تتم غصب عن ارادتة ابدا ربنا يوفققك

FemTo said...

اول مرة اسمع القصة ديه..غريبة بجد

esraa said...

yousef:
طب مش كنت تقول انك نفسك تكون أول كومنت وانا كنت حجزتهولك ((:
احنا مش محناش هنتعب بس, لأ احنا كمان عمرنا ماهنزل علي أي حاجه راحت مننا .

esraa said...

The Groom:
فعلا ياما الدعاء غير أقدار.
انا طبعا مأققصدتش بعايز انه محتاج لكني أقصدت بيها الاراده, وشكرا انك لفت نظري وهصلحها ان شاء الله.

esraa said...

تسـنيم:
ليه بس لا تعليق؟

esraa said...

ايوية:
العفو ياسيتي انت تؤمري ((:
نورتيني.

esraa said...

FemTo:
مفيش حاجه غريبه علي ارادة ربنا ((:

أحمد عيسي said...

انا اول مرة فعلا اسمع القصة دي
بس صحيح..من أراد الله أن يطلقه ماكان للمأمون أن يصلبه

مبرمج حر said...

بوست حلو أوى يا اسراء
:)

esraa said...

أحمد عيسي:
أتمني انها تكون عجبتك.

esraa said...

مبرمج حر:
ربنا يخليك ياحمد.

REEMOO said...

انا كمان اول مره اسمع القصه دى
بس عجبتنى اوى
وفعلا اراده الله فوق كل شئ
تحياتى ليكى يا قمر

WHISKEY PUZZLER said...

lovely page, blessed,c ya

مصر هى أمى said...

انا اريد وانت تريد والله يفعل ما يريد

وما رميت اذ رميت ولكن الله رمى

قصة جميلة جدا يا اسراء

FemTo said...

ونعم بالله

نور العظماء said...

السلام عليكم انتى عافه لو كل واحد ياخد بأرادة ربنا ويؤمن بالله حق هيبقي مفيش مشاكل ولكن كله يجري ويلهس وراء الدنيا والجاه والسلطه والمال اللهم ارحمنا موضوع جميل بجد وحكايه اول مره اسمعها احييكي وادعوكي لزيارة موقعي المليان حكايات زى ده :)) العظماء

www.nourhetler2006.jeeran.com

ShAb 3AdY said...

قصة حلوة فعلا

و فكرة البوست جميلة

naryoma said...

جميله اوي القصه انا مكنتش اعرفها
فعلا بجد كل شيء في الدنيا دي بقدر
والموضوع ده جه في وقته
لان انا من كم يوم كنت شبه معترضه علي الكلام ده لانه في لحظه حزن جامده اوي بس الحمد لله فعلا ربنا مش بيريد لعباده حاجه وحشه
ميرسي علي البوست

Sharm said...

الله قادر على كل شئ

شكرا اسراء

محمد بدرى said...

من زمان جدا وفى اختلاف على حاجه مهمة.
هل الانسان مخير ولا مسير ؟
بمعنى ان الانسان هوا اللى بيختار مصيره وحياته ولا اللى مكتوب عليه بيشوفه حتى لو ماكنش رايحله؟
ولو كده كده هيشوف اللى مكتوبله وبس يبقى كل فرد محكوم عليه من قبل ما يعمل الحاجه انه هيعملها. يبقى اللى رايح الجنة معروف واللى رايح النار معروف، حتى من قبل ما يجيو على الدنيا.
أول ناس فكرت بالشكل ده كانو الشيعه فى اوائل عهد ما بعد الخلفاء الراشدين.
لأنهم كانو بيفكروا بطريقة اللى يدخل دماغنا نعمل بيه واللى ما يدخلش مالوش فيه.
القصة دى فكرتينى بنظريتهم لسبب. لو الموضوع عكسى وان المأمون كتب انه يطلق وراحت على انه يصلب، نفس النتيجة الراجل هيشوف اللى مكتوبله رغم انف الجميع. يعنى كده كده مكتوب الراجل ده هيتعمل فيه آيه وآمتى وإزاى.ومهما كانت الملابسات فمش هيشوف اللا اللى مكتوبله وبس.
معلش طولت عليكم بس الواحد بيعلق براحته فى المدونة دى لإنى تدويناتها جامدة بصراحه.

ibn nasser- ابن ناصر said...

قصه رائعه فعلا ,,,سبحان الله
تحياتي يا اسراء

الكلام نوعان :كلام فارغ وكلام مليان كلام فارغ said...

فعلا الواحد مهما عمل ومهما قرر او خطط اراده ربنا هيه اللى بتمشي وبتبقى هيه اللى في مصلحتنا
لان طبعا ربنا مابيرضاش بظلم الانسان وبيحب اللى في الصالح للبنى ادم
بس مين يحس ويقدر كده ويقدر عظمه ربنا
للاسف دلوقتى القيم الدينيه غابت
قصه تحفه بجد يا قمر

Esmeralda said...

عـن أبي العـباس عـبدالله بن عـباس رضي الله عـنهما، قــال: كـنت خـلـف النبي صلي الله عـليه وسلم يـوماً، فـقـال : { يـا غـلام ! إني أعـلمك كــلمات: احـفـظ الله يـحـفـظـك، احـفـظ الله تجده تجاهـك، إذا سـألت فـاسأل الله، وإذا اسـتعـنت فـاسـتـعـن بالله، واعـلم أن الأمـة لـو اجـتمـعـت عـلى أن يـنـفـعـوك بشيء لم يـنـفـعـوك إلا بشيء قـد كـتـبـه الله لك، وإن اجتمعـوا عـلى أن يـضـروك بشيء لـم يـضـروك إلا بشيء قـد كـتـبـه الله عـلـيـك؛ رفـعـت الأقــلام، وجـفـت الـصـحـف }.

[رواه الترمذي:2516 وقال: حديث حسن صحيح].

أحمد العربي said...

لا


أستطيع

الا

أن

أقول

سبحانك


ربي

esraa said...

REEMOO:
أكيد طبعا ارادة ربنا فوق كل شئ.
يسعدني انها عجبتك.

esraa said...

WHISKEY PUZZLER:
ربنا يخليك, نورتيني.

esraa said...

مصر هى أمى:
ربنا يخليك يامحمد
بس حقيقي لا يرد القضاء الا الدعاء, وأكيد اللي ربنا رايده دايما بيكون الخير لينا, وبيختبر به ثقتنا فيه.

esraa said...

FemTo:
(:

esraa said...

نور العظماء:
المشكله فعلا ان في حاجات صغيره اخدت اهميه كبيره جدا في حياتنا.
يسعدني انها عجبتك, وان شاء الله اكيد هزوره.

esraa said...

ShAb 3AdY:
ربنا يخليك, مبسوطه انها عجبتك.
نورتيني.

esraa said...

naryoma:
ربنا يخليكي, الحمدلله انها عجبتك.
أكيد كل شئ في الدنيا بقدر.
الانسان في لحظات الحزن والغضب ممكن يغلط, المهم انه يعرف يرجع للصح تاني (:
وصدقيني ربنا عارف أكتر مننا , وعشان كده هو الوحيد اللي عارف الخير لينا ومصلحتنا فين.
زيارتك نورتني.

esraa said...

Sharm:
العفو.

esraa said...

محمد بدرى:
لو الانسان كان مسير يبقي أكيد مكنش هيتحاسب, الانسان حر في أفعاله واختياراته, لكن ربنا هو اللي بيحدد الاحداث.
طبعا مش معني ده ان في انسان ممكن يعمل حاجه غصب عن ربنا, لكن ربنا بيعمل الظروف اللي توصل للي هو رايده, ودايما بنكتشف بعد كده ان اختيار ربنا هو اللي كان أفضل لنا, لننا غالبا بعد كده بشوف حاجات مكناش شايفنها قبل كده.
وطول ياسيدي براحتك , المدونة مدونتك.

esraa said...

ibn nasser- ابن ناصر:
ارادة ربنا بتعمل المعجزات.
يشرفني انها عجبتك.

esraa said...

الكلام نوعان :كلام فارغ وكلام مليان كلام فارغ:
احنا فعلا لو نفكر أد ايه بنغلط في حق ربنا, هنستغرب جدا من صبره علينا, والمدهش بجد اننا لما بنرجع بنلاقيه فاتح الباب ومستنينا, هو الوحيد اللي مهما غلطنا في حقه, مش ممكن نخبط علي بابه ومايفتحلناش.
بجد ربنا جميل وكريم جدا, بس مين اللي يقدر , لأن للأسف كلنا عارفين ده, بس مش كلنا بنقدره.

esraa said...

Esmeralda:
بس تقولي لمين بقي.
بجد انا بقيت بستغرب من اللي يخافو من البشر ومش بيخافو من ربنا.
ومش عارفه ليه مش عايزين يقتنعو ان محدش يقدر يضرهم غير لما ربنا يكون رايد ده, يبقي ليه يسترضو غيره, وهو الوحيد اللي بايده كل حاجه.

esraa said...

أحمد العربي:
سبحان الله.

إنـســانة said...

سبحان الله

:))

zordeak said...

انا مكنتش اعرف القصة دى

بس المعنى واضح اوى

شكرا عليه

:)

copa said...

جامده اوي القصه دي

فعلا يا اسراء في حاجات في الدنيا ممكن الواحد بيبقي مصر عليها و في الاخر متحصلش بس بعد كدا يعرف انها كانت مصيبه بالنسباله و يحمد ربنا

بوست حلو اوي

esraa said...

إنـســانة:
(:

esraa said...

zordeak:
يسعدني اني أضفتلك معلومه جديده ياحمد.
العفو ياسيدي انت تؤمر.

esraa said...

copa:
اها, فعلا بيكون مصر كده, ويحاول يعمل اي حاجه عشان تحصل, ولما ماتحصلش يكون مضايق جدا, لكنه في الأخر بيحمد ربنا كتير انها ماحصلتش.

Amr Ahmed said...

حلوة القصة دي

بس هي صحيحة تماما

ولا ايه

هي فعلا ارادة ربنا فوق كل شئ

تحياتي

sosa said...

السلام عليكم ورحمة الله وبركاته
انا باحثة واقوم ببحث عن المدونات وحرية الراى
واتمنى تفاعلكم معى من اجل الوصول الى بعض القواعد والقوانين التى تساعد المدونين على نشر ارائهم بكل حرية
وبقيود دينية اخلاقية تمهد وتنير وصول الكتابات الحرة الجيده مباشرة الى المسئولين والى قلوب الناس
اتمنى مساعدتى فى ملأ استبيان به بعض الاسئلة الخفيفة
وانتظر ردكم بالموافقة على معاونتى على المدونة الخاصة بى
http://crazy-sosa.blogspot.com/
او على الايميل
sosa_444@yahoo.com
ارجو تفاعلكم والاهتمام بالامر لجديته واهميته الشديدة
سارة الاسكافى

esraa said...

Amr Ahmed:
الحمد لله انها عجبتك.
أكيد طبعا هي صحيحه تماما((:

esraa said...

sosa:
ان شاء الله
أكيد هروح هناك
نورتيني.

fares said...

اولا احب احييكي علي البوست الجميل ده ثانيا ربنا لما يريد يعمل حاجه هيعمل معلش علي تاخيري اصل كنت تعبان ولسه كاتب بوست النهارده

esraa said...

fares:
سلامتك حقيقي.
ربنا يخليك يافارس, وأكيد طبعا اللي رايده ربنا بيكون.

Mony said...

الله يا إس...حلوة أوى
حاسة إني سمعتها زمااان بس مكنتش فاكراها خالص

esraa said...

Mony:
خليكي فاكره الأفضال دي بس, اني فكرتك يعني ((:

tasneem said...

هى إرادة ربنا واضحة فى كل حاجة بس فى ناس مش بيشوفوها تكبر و عند لكن جمييييل إن الواحد ياخد لنفسه مثل خاص بيه هو و مختلف ليدل على تلك الأرادة ، القصة رااااااااااائعة بجد و أنا ماكنتش أعرفها قبل كده فجزاكى الله خير كثيرا
تحياتى لأنتقائك القصة دى
مع تحياتى

esraa said...

tasneem:
واياكم
يسعدني اني أضفتلك معلومه جديده ((:

Mohamed A. Ghaffar said...

هناك شعره بين جرائرنا والقدر ، راعيها ففى اختلاطهم مهلكه

esraa said...

Mohamed A. Ghaffar:
أكيد طبعا والا بقي الانسان مصير مش مخير.

sally said...

قصه غريبه جدا و حلوة جدا
و علي فكرة شكلك انت بس اللي تعرفيها

esraa said...

sally:
لا والله , في ناس قالو اني فكرتهم بيها.
نورتيني

No Fear said...

السلام عليكم
ربنا يكرمك
جميلة قوي

esraa said...

No Fear:
وعليكم السلام ورحمة الله وبركاته
ربنا يكرمك انت كمان ويوفقك بجد

 

The Lost Princess © 2008. Design By: SkinCorner