Thursday, April 5, 2007

إرادة ربنا


في قصة انا بحبها أوي, انتو ممكن تكونو تعرفوها , لكني بردو هحكيهالكم.
الحكاية دي حصلت في عهد المأمون بن هارون الرشيد.
كان في رجل دايما بيتكلم عن المأمون وحش, وعشان كده المأمون سجنه, لكنه عرف ان الرجل ده وهو في السجن لسه بيغلط فيه.
فقرر انه يقتله, وفعلا بعت رساله للقائم علي السجن وقاله يصلب
فوجئ المأمون ان القائم علي السجن أفرج عن الرجل ده, وطبعا المأمون اضايق جدا وبعتله وسأله انه ازاي يعصي أوامره ويفرج عنه؟
القائم علي السجن قاله انت بعتلي رساله مكتوب فيها يطلق.
طبعا المأمون قال ان ده محصلش.
فالقائم علي السجن وراه الورقه عشان يفاجئ المأمون ان فعلا مكتوب فيها يطلق.
المأمون أمره انه يروح ويقبض عليه, وأرسله رساله تانيه وكتب فيها يصلب.
فوجئ المأمون ان القائم علي السجن أفرج عن الرجل للمره التانيه, طبعا غضبه زاد وبعت جابه وسأله, وكان رده نفس الرد الأول ووراه الورقه اللي مكتوب فيها يطلق.
أمره المأمون انه يمشي ويروح يقبض عليه, وكتبله رساله وقال فيها والله ليصلبن.
وفوجئ المأمون ان القائم علي السجن أفرج عنه للمره الثالثه.
طبعا انتوا متخيلين غضب المأمون ممكن يكون عامل ازاي, وبعتله تاني.
المأمون كان غضبان جدا وقاله انت ازاي تعصاني؟
القائم علي السجن قاله أنا نفذت أوامرك يأمير المؤمنين.
المأمون قال , لكني أمرتك انك تصلبه وأرسلتلك رساله مكتوب فيها والله ليصلبن.
القائم علي السجن قال الرساله مكتوب فيها والله ليطلقن ياأمير المؤمنين.
المأمون أخد منه الورقه وبصلها وضحك وقال:
من أراد الله أن يطلقه ماكان للمأمون أن يصلبه.
كلنا بنمر بمواقف كتير وبنعتقد انها حصلت بسبب ذكأنا أو تخطيطنا ليها, وبننسي انها رغم ده حصلت عشان ربنا هو اللي رايد كده.
وكتير بنخطط لحاجات , وبنخطط كويس جدا كمان, ومش بنعرف محصلتش ليه؟
وده عشان مش بناخد بالنا ان ربنا مش رايدها تحصل.
أنا بحب القصه دي جدا بجد, لأني بشوف انها تجسيد رائع لارادة ربنا.

61 comments:

yousef said...

الحمدلله أنا أول كومنت
صح كل شىء مقدر لينا لو عرفنا ده عمرنا ما هنتعب فى حياتنا
ربنا يوفقك فى حياتك يا اسراء

Eric Matt said...


صحيح

وأزيد أمرين

أولا
"
لا يرد القدر غير الدعاء
"

وثانيا
لا تقولي الله سبحانه و تعالى عايز لأنها كلمة من العوز و الحاجة والله تعالى لا يعوز و لا يحتاج و لكنه يقول للشيء كن فيكون و هو يريد و لا يعوز

شكرا لك على الذكرى الجميلة

جزاك الله خيرا

سلام من مناساس البلد

تــسنيـم said...

:))

لا تعليق

Unknown said...

انا اول مرة اسمع القصة دة ميرسى جدا فعلا كل شة بامر ربنا ومفيش حاجة تتم غصب عن ارادتة ابدا ربنا يوفققك

FemTo said...

اول مرة اسمع القصة ديه..غريبة بجد

Unknown said...

yousef:
طب مش كنت تقول انك نفسك تكون أول كومنت وانا كنت حجزتهولك ((:
احنا مش محناش هنتعب بس, لأ احنا كمان عمرنا ماهنزل علي أي حاجه راحت مننا .

Unknown said...

The Groom:
فعلا ياما الدعاء غير أقدار.
انا طبعا مأققصدتش بعايز انه محتاج لكني أقصدت بيها الاراده, وشكرا انك لفت نظري وهصلحها ان شاء الله.

Unknown said...

تسـنيم:
ليه بس لا تعليق؟

Unknown said...

ايوية:
العفو ياسيتي انت تؤمري ((:
نورتيني.

Unknown said...

FemTo:
مفيش حاجه غريبه علي ارادة ربنا ((:

Ahmed EIssa said...

انا اول مرة فعلا اسمع القصة دي
بس صحيح..من أراد الله أن يطلقه ماكان للمأمون أن يصلبه

أحمد said...

بوست حلو أوى يا اسراء
:)

Unknown said...

أحمد عيسي:
أتمني انها تكون عجبتك.

Unknown said...

مبرمج حر:
ربنا يخليك ياحمد.

Reemo said...

انا كمان اول مره اسمع القصه دى
بس عجبتنى اوى
وفعلا اراده الله فوق كل شئ
تحياتى ليكى يا قمر

Hamza matar said...

lovely page, blessed,c ya

مصر هى أمى said...

انا اريد وانت تريد والله يفعل ما يريد

وما رميت اذ رميت ولكن الله رمى

قصة جميلة جدا يا اسراء

FemTo said...

ونعم بالله

Anonymous said...

السلام عليكم انتى عافه لو كل واحد ياخد بأرادة ربنا ويؤمن بالله حق هيبقي مفيش مشاكل ولكن كله يجري ويلهس وراء الدنيا والجاه والسلطه والمال اللهم ارحمنا موضوع جميل بجد وحكايه اول مره اسمعها احييكي وادعوكي لزيارة موقعي المليان حكايات زى ده :)) العظماء

www.nourhetler2006.jeeran.com

ShAb 3AdY said...

قصة حلوة فعلا

و فكرة البوست جميلة

maioya said...

جميله اوي القصه انا مكنتش اعرفها
فعلا بجد كل شيء في الدنيا دي بقدر
والموضوع ده جه في وقته
لان انا من كم يوم كنت شبه معترضه علي الكلام ده لانه في لحظه حزن جامده اوي بس الحمد لله فعلا ربنا مش بيريد لعباده حاجه وحشه
ميرسي علي البوست

-_- said...

الله قادر على كل شئ

شكرا اسراء

Unknown said...

من زمان جدا وفى اختلاف على حاجه مهمة.
هل الانسان مخير ولا مسير ؟
بمعنى ان الانسان هوا اللى بيختار مصيره وحياته ولا اللى مكتوب عليه بيشوفه حتى لو ماكنش رايحله؟
ولو كده كده هيشوف اللى مكتوبله وبس يبقى كل فرد محكوم عليه من قبل ما يعمل الحاجه انه هيعملها. يبقى اللى رايح الجنة معروف واللى رايح النار معروف، حتى من قبل ما يجيو على الدنيا.
أول ناس فكرت بالشكل ده كانو الشيعه فى اوائل عهد ما بعد الخلفاء الراشدين.
لأنهم كانو بيفكروا بطريقة اللى يدخل دماغنا نعمل بيه واللى ما يدخلش مالوش فيه.
القصة دى فكرتينى بنظريتهم لسبب. لو الموضوع عكسى وان المأمون كتب انه يطلق وراحت على انه يصلب، نفس النتيجة الراجل هيشوف اللى مكتوبله رغم انف الجميع. يعنى كده كده مكتوب الراجل ده هيتعمل فيه آيه وآمتى وإزاى.ومهما كانت الملابسات فمش هيشوف اللا اللى مكتوبله وبس.
معلش طولت عليكم بس الواحد بيعلق براحته فى المدونة دى لإنى تدويناتها جامدة بصراحه.

ibn nasser - ابن ناصر said...

قصه رائعه فعلا ,,,سبحان الله
تحياتي يا اسراء

الكلام نوعان :كلام فارغ وكلام مليان كلام فارغ said...

فعلا الواحد مهما عمل ومهما قرر او خطط اراده ربنا هيه اللى بتمشي وبتبقى هيه اللى في مصلحتنا
لان طبعا ربنا مابيرضاش بظلم الانسان وبيحب اللى في الصالح للبنى ادم
بس مين يحس ويقدر كده ويقدر عظمه ربنا
للاسف دلوقتى القيم الدينيه غابت
قصه تحفه بجد يا قمر

Esmeralda said...

عـن أبي العـباس عـبدالله بن عـباس رضي الله عـنهما، قــال: كـنت خـلـف النبي صلي الله عـليه وسلم يـوماً، فـقـال : { يـا غـلام ! إني أعـلمك كــلمات: احـفـظ الله يـحـفـظـك، احـفـظ الله تجده تجاهـك، إذا سـألت فـاسأل الله، وإذا اسـتعـنت فـاسـتـعـن بالله، واعـلم أن الأمـة لـو اجـتمـعـت عـلى أن يـنـفـعـوك بشيء لم يـنـفـعـوك إلا بشيء قـد كـتـبـه الله لك، وإن اجتمعـوا عـلى أن يـضـروك بشيء لـم يـضـروك إلا بشيء قـد كـتـبـه الله عـلـيـك؛ رفـعـت الأقــلام، وجـفـت الـصـحـف }.

[رواه الترمذي:2516 وقال: حديث حسن صحيح].

أحمد العربي said...

لا


أستطيع

الا

أن

أقول

سبحانك


ربي

Unknown said...

REEMOO:
أكيد طبعا ارادة ربنا فوق كل شئ.
يسعدني انها عجبتك.

Unknown said...

WHISKEY PUZZLER:
ربنا يخليك, نورتيني.

Unknown said...

مصر هى أمى:
ربنا يخليك يامحمد
بس حقيقي لا يرد القضاء الا الدعاء, وأكيد اللي ربنا رايده دايما بيكون الخير لينا, وبيختبر به ثقتنا فيه.

Unknown said...

FemTo:
(:

Unknown said...

نور العظماء:
المشكله فعلا ان في حاجات صغيره اخدت اهميه كبيره جدا في حياتنا.
يسعدني انها عجبتك, وان شاء الله اكيد هزوره.

Unknown said...

ShAb 3AdY:
ربنا يخليك, مبسوطه انها عجبتك.
نورتيني.

Unknown said...

naryoma:
ربنا يخليكي, الحمدلله انها عجبتك.
أكيد كل شئ في الدنيا بقدر.
الانسان في لحظات الحزن والغضب ممكن يغلط, المهم انه يعرف يرجع للصح تاني (:
وصدقيني ربنا عارف أكتر مننا , وعشان كده هو الوحيد اللي عارف الخير لينا ومصلحتنا فين.
زيارتك نورتني.

Unknown said...

Sharm:
العفو.

Unknown said...

محمد بدرى:
لو الانسان كان مسير يبقي أكيد مكنش هيتحاسب, الانسان حر في أفعاله واختياراته, لكن ربنا هو اللي بيحدد الاحداث.
طبعا مش معني ده ان في انسان ممكن يعمل حاجه غصب عن ربنا, لكن ربنا بيعمل الظروف اللي توصل للي هو رايده, ودايما بنكتشف بعد كده ان اختيار ربنا هو اللي كان أفضل لنا, لننا غالبا بعد كده بشوف حاجات مكناش شايفنها قبل كده.
وطول ياسيدي براحتك , المدونة مدونتك.

Unknown said...

ibn nasser- ابن ناصر:
ارادة ربنا بتعمل المعجزات.
يشرفني انها عجبتك.

Unknown said...

الكلام نوعان :كلام فارغ وكلام مليان كلام فارغ:
احنا فعلا لو نفكر أد ايه بنغلط في حق ربنا, هنستغرب جدا من صبره علينا, والمدهش بجد اننا لما بنرجع بنلاقيه فاتح الباب ومستنينا, هو الوحيد اللي مهما غلطنا في حقه, مش ممكن نخبط علي بابه ومايفتحلناش.
بجد ربنا جميل وكريم جدا, بس مين اللي يقدر , لأن للأسف كلنا عارفين ده, بس مش كلنا بنقدره.

Unknown said...

Esmeralda:
بس تقولي لمين بقي.
بجد انا بقيت بستغرب من اللي يخافو من البشر ومش بيخافو من ربنا.
ومش عارفه ليه مش عايزين يقتنعو ان محدش يقدر يضرهم غير لما ربنا يكون رايد ده, يبقي ليه يسترضو غيره, وهو الوحيد اللي بايده كل حاجه.

Unknown said...

أحمد العربي:
سبحان الله.

Unknown said...

سبحان الله

:))

zordeak said...

انا مكنتش اعرف القصة دى

بس المعنى واضح اوى

شكرا عليه

:)

Music Gates said...

جامده اوي القصه دي

فعلا يا اسراء في حاجات في الدنيا ممكن الواحد بيبقي مصر عليها و في الاخر متحصلش بس بعد كدا يعرف انها كانت مصيبه بالنسباله و يحمد ربنا

بوست حلو اوي

Unknown said...

إنـســانة:
(:

Unknown said...

zordeak:
يسعدني اني أضفتلك معلومه جديده ياحمد.
العفو ياسيدي انت تؤمر.

Unknown said...

copa:
اها, فعلا بيكون مصر كده, ويحاول يعمل اي حاجه عشان تحصل, ولما ماتحصلش يكون مضايق جدا, لكنه في الأخر بيحمد ربنا كتير انها ماحصلتش.

Amr Ahmed said...

حلوة القصة دي

بس هي صحيحة تماما

ولا ايه

هي فعلا ارادة ربنا فوق كل شئ

تحياتي

Unknown said...

Amr Ahmed:
الحمد لله انها عجبتك.
أكيد طبعا هي صحيحه تماما((:

Unknown said...

sosa:
ان شاء الله
أكيد هروح هناك
نورتيني.

Anonymous said...

اولا احب احييكي علي البوست الجميل ده ثانيا ربنا لما يريد يعمل حاجه هيعمل معلش علي تاخيري اصل كنت تعبان ولسه كاتب بوست النهارده

Unknown said...

fares:
سلامتك حقيقي.
ربنا يخليك يافارس, وأكيد طبعا اللي رايده ربنا بيكون.

Amany Y. El-Saeed said...

الله يا إس...حلوة أوى
حاسة إني سمعتها زمااان بس مكنتش فاكراها خالص

Unknown said...

Mony:
خليكي فاكره الأفضال دي بس, اني فكرتك يعني ((:

Anonymous said...

هى إرادة ربنا واضحة فى كل حاجة بس فى ناس مش بيشوفوها تكبر و عند لكن جمييييل إن الواحد ياخد لنفسه مثل خاص بيه هو و مختلف ليدل على تلك الأرادة ، القصة رااااااااااائعة بجد و أنا ماكنتش أعرفها قبل كده فجزاكى الله خير كثيرا
تحياتى لأنتقائك القصة دى
مع تحياتى

Unknown said...

tasneem:
واياكم
يسعدني اني أضفتلك معلومه جديده ((:

محمد عبد الغفار said...

هناك شعره بين جرائرنا والقدر ، راعيها ففى اختلاطهم مهلكه

Unknown said...

Mohamed A. Ghaffar:
أكيد طبعا والا بقي الانسان مصير مش مخير.

sally said...

قصه غريبه جدا و حلوة جدا
و علي فكرة شكلك انت بس اللي تعرفيها

Unknown said...

sally:
لا والله , في ناس قالو اني فكرتهم بيها.
نورتيني

No Fear said...

السلام عليكم
ربنا يكرمك
جميلة قوي

Unknown said...

No Fear:
وعليكم السلام ورحمة الله وبركاته
ربنا يكرمك انت كمان ويوفقك بجد

 

The Lost Princess © 2008. Design By: SkinCorner