Tuesday, January 23, 2007

ليه مش سعيد في حياته؟


كانت قاعده في المعديه وبتبص للبحر , وجه حد قعد جنبها وقالها ازيك؟
لما سمعت الصوت عرفته لكنها ماكنتش عارفه ده حقيقي ولا لأ , بس هي ماكنتش بتفكر فيه يبقي
ليه تتخيل صوته؟
بصت جنبها عشان تلاقيه فعلا قاعد وهي مش بيتهيألها, دورت وشها تاني وكأنها
مش عارفه تعمل ايه؟
قال: ازيك عامله ايه؟
قالت: الحمدلله كويسه, انت ازي بنوتك؟
قال : الحمدلله, شبهك.
قالت: شبهي ازاي بس؟
قال: ماعرفش هي شبهك وخلاص.
طول الحوار وهي بيبص علي اديها اللي كانت جوه جيوبها, ولما خرجتها ابتسم وقال: مافيش حد لسه؟
قالت : لأ فيه
قال : بجد؟
قالت : أيوه بجد , بس الخطوبه بعد الامتحانات , لكن الأهل مكلمين بعض وهو في أخر سنه السنه دي ان شاء الله.
قال: بتحبيه؟
قالت: جداا
سكت ووشه اتغير
قالت: أنا فعلا في وقت اعتقدت اني مش هعرف أحب تاني , وهو ساعتها دخل حياتي وحبيته وبقيت بحبه جدا.
قال: مسامحاني؟.
قالت: أنا قولتلك قبل كده اني مسامحاك من زمان.
قال: أمال أنا ليه مش متهني في حياتي؟
قالت: بجد ماعرفش , حقيقي أنا سامحتك من زمان أنا مكنش ممكن اني أفضل أدعي عليك , بجد أنا فعلا سامحتك.
قال: أمال أنا ليه مش مبسوط في حياتي؟
قالت: حقيقي مش عارفه

المعديه وصلت وكل واحد فيهم مشي في طريقه
معرفش ليه وصاحبتي بتحكيلي اللي حصل رجعت تاني 3 سنين لورا وافتكرت كل اللي حصل, كانت بتحبه أد ايه وهو كمان كان بيحبها جدا, وانه فجأه اختفي من حياتها , عملت كل حاجه عشان توصله ولما وصلت , كان كلامه معاها بارد, فهمت انه بيحاول يبعدها عن حياته بأي طريقه , بعدت واكتشفت بعد كده انه كان خطب تحت ضغط من والده, وانه عاملها بالطريقه دي عشان تقدر تنساه, وانه سمي بنته علي اسمها, افتكرت يوم ماقابلته من سنه تقريبا برضو بالقدر وقالها أنا سميت بنتي علي اسمك وهي قالت عارفه, وكان رده أنا بس عايزك تعرفي اني لسه فاكر
مافقتش غير وصاحبتي بتقولي هو ليه مش سعيد في حياته
قلت: هو احنا ليه فاهمين ربنا غلط؟ هو احنا لازم ندعي عشان ربنا ياخد لنا حقنا؟ مين اللي قال كده؟ هي لو كانت دعت كان هيعيش حياه أسواء من كده, لكنها سامحته, وكان لازم يبفهم ان الحق لازم يرد الحقوق, وانه ماينفعش يسيب حد مظلوم من غير ماياخد له حقه, هو لما اتحط في الاختيار , اختار انه يظلمها, وقال انه بكره هينساها, وهي كمان هتنسي, كان عارف ان مافيش حد بيقدر ينسي حبيب حبه بجد, لكنه قال أنا هقدر , وأكيد ربنا هيساعدني, طب ازاي كان عايز ربنا يساعده وهو بيظلم حد مالوش ذنب؟ هو كان متخيل ان ربنا ممكن يساعده علي الظلم؟
أنا متأكده انها فعلا نسيت , وانها دلوقتي بتحب بجد, وبرضو كنت متأكده انه مش سعيد في حياته , لأني مؤمنه جدا برب اسمه الحق مش ممكن يضيع الحقوق

ماعرفش ليه افتكرتك, وبجد خفت عليك, كان نفسي اني أكلمك وأقولك , لكن
ماقدرتش, أنا عارفه انك ماتعرفش هنا, ومش هتقرأ الكلام ده , لكن ماعرفش ليه كان لازم أقول اني افتكرتك واني بجد خايفه عليك.
رساله:
لو اتحطيت في موقف وكان بايدك انك تظلم حد, اوعي تظلمه وتقول أنا بعمل كده عشان مصلحته,لأنه عارف مصلحته كويس ويقدر انه يختار, ربنا كان بيختبر قوة ارادتك وانت كده هتبقي سلمت من أول الطريق, اوعي تقول ماكنش قدامي حل تاني, لأن الحلول احنا اللي بنخلقها.
حقيقي أنا مش عارفه ليه بن أدم بيعمل في نفسه كده.

132 comments:

هيثم ابوعقرب said...

ضعيفه جدا في كتابتها
كان ممكن تطليعها
ااحسن من كده
لانها مفهاش صنف الاحساس
برغم ان الموقف
ده المفروض ملتهب
ومشاعر كتير فيه


ندم - حب - كره - انتقام


حاولي تاني
وهتعملي حاجه احلي

أمـــــــاني said...

أنا قريته لأول مرة يا إسراء و عجبني موووت...حسيت إنك بتحكي موقف أثر فيكي كموقف مش كعمل أدبي
و لما قريت كلام هيثم إتلغبطت...هو موقف حقيقي من غير رتوش...ولا عمل أدبي؟؟؟
وفي الحالتين هو حقيقي أوي و صادق
و أنا بجد بحب كلامك
برافو عليكي

أحمد الشمسي said...

يااااااااه...
الجملة/السؤال ده مؤلم جدا ومش سهل على واحد يقوله: "امال انا ليه مش متهني في حياتي؟"...
بس تفتكري فعلا انه غلطان لدرجة ان ربنا يعاقبه؟ أقصد هو أي حد مكانه مش كان برضه هيرضخ لرغبات أهله؟ تفتكري كان فيه في إيده حاجة يعملها؟ تفتكري لو هي مكانه وأهلها ما رضيوش بيه كانت حياتها مش هتبقى سعيدة؟
جاوبي بقى!

بين الأمل و اليأس said...

انا بجد خفت اوي
مش عارف هاتصدقي ولا لا
بس انا حاسس بكدا
حاسس بكلامك
قراي حرفك
مش عارف ليه حسيت اننا جزء من القصة دي
بس تصدقي اسلوبك خدني بصيت وغير مكلف بالفاظ ليس لها اهميه والاسلوب حسسني فعلا اننا جوه فلم
وبجد انك تحسي بالناس كدا فدا فظييع
ورسالتك في الاخر انا معاكي فيها ميه الميه وممكن تعتبريها من انسان مر بتجربه وعارف كويس تفاصيلها
وعارف معنى كل حرف كتبتيه
على فكره احسن الناس تفهم غلط مش انا البطل
بس القصة تنطبق عليه انا
واننا في الجانب الظالم
بس لسه النتيجه مش للدرجة بتاعتك دي
مش عارف انا مكنتش بقرا مجرد كلمات
لا ياستي انا ماشي كفاية انا تعبان اساسا زكلامك خوفني وتعبني
ربنا معاكي يارب
وربنا يسترها

Mony The Angel said...

a7'eraaaaaaaaaaaaaaan
topic gedeed :)
almawqef bgad mo2asser awee..
w btw, hwa ally hwa feeh da msh 3shaano zalamha, no 3shaano zalam nafso..
ana mashy motafeqa m3aaky fen ally biezlem had akeed rabna haia7'od b7a2 ally zalamo menno..
bas enty leeh basalha kda..
hwa kaman etzalam..
ana m3andeesh qessa shabeeha 3shan mahadesh yefham 3'lat :D
bas ana daiman ba7eb a2af m3a algamb ally msh baien..
bossy ya esraa2..
hwa msh sa3eed 3shano ma2dersh yensaaha, that's all..
howa lama 3mel ally 3melo da, kan 3shanha hia.. w daas 3la albo w nafso aktar mema daas 3aleeha..
hwa belnesbaalo zalamha w zalam nafso ablaha..
laken hia ally etzalamet..
wel ensaan lama bib2a fe mawqef almazloom bi2dar yetdaie2 w yez3al wei3iat w ya7'od 7a2o melgamb da w y2ool ana etzalamt..
3shan kda hia ederet te7eb ba3do taany..
laken ally bit7at fe mawqef alzalem da (7ata lw kan alzolm le nafso abl ay shee2)
bib2a msh ader yez3al aw y3iat aw yedaie2, 3shan hwa ally 3mel kda f nafso mel2awel..
de kol al7ekaya..
aw bema3na asa7 de weghet nazary :)
tawelt ana 3arfa :)

الأباصيرى said...

أوقات بنكون مرغمين على حاجات مش عايزين نعملها بس غصب عننا بنعملها وبنجرح ناس بنحبهم

وعلى رأى صلاح جاهين

لاتجبر الأنسان ولا تخيرة
يكفية مافية من عقل بيحيرة
اللى النهاردة بيطلبة ويشتهية
هو اللى بكرة حيشتهى يغيرة
وعجبى

yuri said...

essra ma3rfsh be jad 2a2olik 2ih....al 7adsa dih ana akid inha dakhalit wa lamasit 7aja be kol wa7id 3ashan law mish be al m3adiya akid akid akid 7asal al mwakif dah ma3 kol wa7id bass 3ala tari2to :) u pushed all the reader for bad memories am sure and am one of them but it is good to refresh our memory every now and then ...wish u get over it really and wish u have good life as well as him 3ashn rabina bardo ghafor ra7im :) salam le al 27asis al jamila 2lli jowaki.

الكلام نوعان :كلام فارغ وكلام مليان كلام فارغ said...

بجد جامده جامده جامده
فعلا انتى عندك حق وفعلا الانسان لازم يفكر ميت مره مش في نفسه وبس لازم يفكر في اللى قدامه عشان عقاب ربنا شديييييييييييد اوى
بس على الاقل صاحبتك وحبيبها ..هوه افترق عنها وهو بيحبها انا كان خطيبي وبعد ما علقنى به جدا وهو عارف انه اول حب في حياتى جه وقالى بكل برود انا مكنتش بحبك انا كنت بعود نفسي عليكي
فعلا انتى استاااااااااااااااذه
انا كل اذان بدعي عليه لانى فعلا تعبت جدا ولسه تعبانه وبدعي ربنا انه ياخد لى حقي ويعرف قيمتى

esraa said...

هيثم ابوعقرب:
أنا حبيت أنقل الموقف زي ماهو بالظبط, حتي بنفس العبارات اللي اتحكالي بيه, اذا كان علي الندم فهو ندم من زمان , وهي عمرها ماكرهته أو حاولت تنتقم منه بالعكس كانت دايما بتقول ربنا يوفقه في حياته, وبعد اللي حصل هي ماكنتش مبسوطه بالعكس زعلت عشانه.
أنا بس حبيت أكد هلي معني انه مش سعيد في حياته وده اللي كنت أتمني أسمع رأيك فيه, انه بعد السنين دي مش سعيد في حياته.
بشكرك علي تعليقك وأتمني ان البوست الجاي يعجبك أكتر .

esraa said...

أمـــــــاني:
سعيده انه عجبك , وهو أها موقف حقيقي, بس كنت أتمني اني أعرف رأيك هو ليه مش سعيد في حياته؟

esraa said...

أحمد الشمسي:
هو فعلا سؤال صعب, وانت متتخيلش هو صعب عليا أد ايه لما قالتلي انه قال كده.
بس مش كل الناس بتخضع لرغبات اهلها , اللي عايز حاجه بجد بياخدها ياحمد, واللي بيستسلم بيستسلم عشان هو عايز ده, وهو لو كان صمم علي موقفه شويه كان أهله في الخر وافقو, وهي لو كانت في موقفه ماكنتش هترضي تاخد غيره وده انا متأكده منه لأنها اتحطت في موقف شبه ده قريب ومارضتش تاخد غير اللي هي بتحبه دلوقتي
تحياتي.

esraa said...

بين الأمل و اليأس:
أكيد أنا ماكنتش عايزه اخوفك بالعكس أنا أتمني ان حياتك كلها تكون امل,
واللي قصده منها اننا كلنا نكون عرفين النتيجه واننا مانظلمش مهما حصل خصوصا لو الانسان اللي هنظلمه عمره ماعمل حاجه وحشه فينا بالعكس كان دايما مصدر لسعادتنا.
ان شاء الله ربنا هيسترها وربنا معاك.
بس انت عارف انا كمان خفت , خفت علي حد أعرفه, خفت ان ده يحصله ويعيش حياته كده.

esraa said...

Mony The Angel:
بصي ياموني أنا عارفه ان هو كمان اتظلم , بس الفرق ان الخيار كان في ايده هو وهو اللي اختار انه يظلم نفسه ويظلمها, وعشان انا عارفه ان هو كمان مظلوم قلت في الخر أنا مش عارفه ليه بن أدم بيعمل كده في نفسه؟
هو اعتقدت ان حياته الجديده هتنسيه, رغم اني عمري ماسمعت عن حد قدر ينسي, بس احنا دايما بنقول اانا اللي هنقدر ومش بنكتش اننا زي غيرنا غير لما الوقت يفوت
انت عارفه أنا فعلا ماكنتش أتخيل انها ممكن تحب تاني, لدرجة ان واحده صاحبتنا قالتلي قبل كده انا خايفه أكون زيها, خايفه سنين عمري تضيع وأنا مش قادره أنسي حب قديم وده كان من سنه, بجد أنا مبسوطه جدا عشانها وانها الحمدلله حبت تاني, بس زعلانه جدا عشانه لأنه مش قادر يكون سعيد في حياته بعد مرور أكتر من 3 سنين
وهو أنا مش هقول غير كلمة عبد الوهاب مطاوع الله يرحمه اللي يختار عليه انه يتحمل نتيجة اختياره للنهايه لأنه هو اللي اختار من الأول, بجد ربنا معاه ويساعده.
ولا يهمك طولي براحتك(:

esraa said...

الأباصيرى:
ممكن كنت أقول زيك قبل كده, لكني بعد مأخدت كورس التغير عرفت اننا بنعمل الي عايزين نعمله, ومافيش حد بيجبرنا , احيانا بنختار الحل الأسهل واللي يريح دماغنا من غير ماناخد بالنا انه ممكن يوجع قلبنا.
تحياتي ونورتنا.

esraa said...

yuri:
أسفه اني فكرتك بزكريات ماكنتش حلوه, والموضوع فعلا بيلمس كل حد فينا لأنه اما حصل معاه أو حصل مع حد قريب منه,أكيد طبعا ربنا غفور رحيم واحنا كلنا بجد بنتمني انه يعيش سعيد في حياته.
زيارتك ليا نورت المدونه (:

esraa said...

الكلام نوعان :كلام فارغ وكلام مليان كلام فارغ:
احنا فعلا لازم ناخد بالنا من كل قرار بناخده عشان مانظلمش فيه حد.
وبالنسبه لخطيبك كده أحسن, الحمدلله انه قال الحقيقه وانتو لسه مخطوبين مش بعد مالموضوع اتطور عن كده, أكيد انت مجروحه لنه كان أول حب في حياتك, بس الحمدلله انه مشي دلوقتي, بدل ماكان يجي بعد الجواز ويقولك كنت فاكر اني هحبك بعد الجواز.
حاولي انك تسامحي, وان كان علي قيمتك هو أكيد هيعرفها وهيعرف انه غط في حقك, بس بجد حاولي تسامحيه لأن غضبك عليه بيأثر عليكي انت بالسلب وبيغير حاجات كتير حلوه جواكي, ان شاء الله ربنا هيسعدك مع انسان احسن منه وانت نفسك هتقولي الحمدلله اني مأخدتوش لأني كان هيضيع مني واحد أحسن منه.
مع حبي.

قالت لي السمراء said...

شخص يضحى بحب ؟
طيب ليه ؟ وعشان مين ؟
خسر كتير جدا اللى ضيع من ايده انسان حبه باخلاص خسر نفسه

Reformer1976 said...

أنا شايف إنه مش محتاجين نحمل الموضوع بتاع انتقام السماء وعدالة ربنا حاجات ما لهاش علاقة بالانتقام الإلهي وعدالة السماء... الموضوع أبسط من كدة... إتنين حبوا بعض ولأي سبب م الأسباب ما حصلش نصيب يكملوا... وكل واحد راح لحاله... هو مش سعيد ليه؟ جايز اختياره للست اللي اتجوزها ما كانش اختيار موفق لكن دا مالوش علاقة بالبنت اللي كان بيحبها... وجايز هو سعيد ولما شافها حب بس يبتز مشاعرها... لكن انتقام إلهي وعدالة السماء وهو ظلمها... أعتقد أن دا تحميل معاني ضخمة لموضوع أبسط من أنه يحتمل كل ده

esraa said...

قالت لي السمراء:
قولي انت ليه ولا عشان مين؟
وأكيد اللي بيضيع حد حبه بجد خسر كتير .

esraa said...

Reformer1976:
أنا مش بحمل الموضوع حاجه مالوش علاقه بيها, أنا بتكلم عن حد ظلم حبيبه وكسر قلبه, وطالما في انسان اتظلم شئ بديهي ان الحق لازم يتدخل, بس هو مش بيكدب عليها , هو فعلا مش سعيد ودي مش حاجه هي عرفتها منه , هي عرفتها من اللي قالتلها انه سمي بنته علي اسمها, مصادر سريه يعني, احنا بس ماكناش نتخيل انه لسه مش سعيد لحد دلوقتي
مرورك أسعدنا.

ody911 said...

إسراء

دى أول زيارة لمدونتك


حقيقى بعد ما قريت الموضوع دة

حسيت إحساس غريب

حسيت إنك بتتحدى الظروف

وحسيت فى كلامك بقوة

وبرضوا بضعف

يمكن إنى صاحبت القصة

مع إنها بتظهر قوتها إلا أنها فى النهاية لسة ضعيفة

ودة لأنى الحب مش بيموت

لو حتى حبيت علية حب تانى

كلامك جميل

وقصة واقعية

بتتكرر كتير فى زمانه دة

تحياتى

أودى

أخف دم said...

يا إسراء أحلى ما فى البوست إنه فعلا بالنص الحرفى للكلام اللى حصل وده مدينا مصداقية وبساطة كأن الموضوع حاصص معانا .. وأكيد هوه حصل مع كتير مننا _ما عدا أنا طبعا _ .. المهم ..أحيانا فعلا الواحد بيجبر إنه يضحى عشان غيره وأحيانا غيره مبيعرفش مقدار تضحية الآخر إلا بعد فترة .. وفى البداية والنهاية ربنا بيغفر ولازم كلنا نغفر .. لأن أى تجربة مش آخر الدنيا يعنى..

عبدالله احمد said...

hello esraa
بلوج بريء و صادق
جميل
مرسي تعليقك

tamer said...

حكاية من الالف الحكايات بتحصل ممكن كل يوم مع اختلاف النفاصيل والاسباب

بس فلاا احيانا بيكون الحل اقوى من الانسان ممكن يكون مش عايزة بس فية ظروق قوية غصب عنة لازم يمشى معها والا هتكسرة

واخيرا لااحد يعلم النية وما بداخل الانسان ولحظة تفكيرة وقتها كانت ازى


اشكرك على البوست الرائع

تحياتى

raspoutine said...

انا كان ليا تعليق صغير
لكل اللى علقو هنا
وده بعد اذن the lost prinncess
احنا مش فى جريده الاهرام ويكلى او واشطنطن بوست او حتى الاهرام الرياضى


بصى يا بنتى اكتبى بالاسلوب اللى انتى تقدرى تكتبى بيه ومتستنيش رأى او رأى اى حد شايف نفسه بيكتب فى المدونات وعامل فيها دور الرقيب او مصحح الاملاء انا بقوله روح اشتغل بتاع عربى او درس نحو وبلاغه احسن ما تيجى مدونه كل الغرض منها اننا نطلع اللى جوانا واللى يفهم يفهم واللى عايز يفهم اكيد هيفهم


مش تقولى ضعيفه مين فين مش ضعيف
انيس منصور قعد فى ندوة سنه 1998 و11 ناقد سلاخوه
وقلهم معلش هحاول المره الجايه اتعلم الكتابه



وبالنسبه ليكى اكتبى واللى عايز يقرا يقرا اهم حاجه كتبتى اللى انتى عايزاه


ولا انتى عايزة جايزة نوبل ولا ايه ؟؟؟؟؟؟

esraa said...

ody911:
زيارتك ليا نورت المدونه.
الحب فعلا مش بيموت بس بيتحول لحجات تانيه غير الحب, وهي مش قويه أبدا والدليل انها استنت 3 سنين عشان تعرف تحب تاني.
أنا مش بتحدي الظروف, أنا بس شايفه ان احنا اللي بنعمل الظروف دي, وانك لو عايز حاجه اوي وأصريت عليها ودعيت ربنا فيها كتير, ربنا هديهالك في الأخر (:

esraa said...

أخف دم:
بص ياأشرف التضحيه عشان الغير حاجه حلوه جدا ومش أي حد يقدر يعملها, لكن لما تبقي بتاخد قرار بتحدد في حياتك وحياة انسان تاني المفروض انه عزيز عليك, يبقي المفروض انك تاخد رأيه معاك, لأنه أكتر واحد يقدر يتكلم عن نفسه وهو الوحيد اللي يقدر يقرر.

esraa said...

عبدالله احمد:
سعيده ان المدونه عجبتك.
وزيارتك نورتنا (:

esraa said...

tamer:
هي فعلا حكايه بتحصل كل يوم,
بس ياتامر مافيش حل أقوي من الانسان, هو في حل سهل وياخد وقت قصير ويريح دماغك حتي لو هيتعب قلبك, وحل تاني صعب بياخد وقت طويل شويه وبيحتاج جهد وتصميم وادارة الموضوع بعقل وفي الأخر برضو هيريح دماغك بس معاها عقلك .
تحياتي

esraa said...

raspoutine:
أولا : بجد مرورك هنا أسعدني
ثانيا: جميل جدا انك تدافع عن حد كده, وانت ماتعرفهوش , بجد شكرا ليه
لكن ياجماعه هيثم ماكنش يقصد انه يسئ ليا أو يقول ان اسلوبي مش عاجبه, بالعكس هيثم بيعجبه كتاباتي هو بس يحب انها تكون أحسن وكان يتمني ان اسلوبها الأدبي يكون أحلي, أنا صحيح ماعرفوش شخصيا , بس هو انسان جميل ومدونته جميله جدا وعارفه انه كان يقصد انه كان عايزها بطريقه أحلي.
وأكيد يعني لو هيدوني جايزة نوبل مش هقول لأ (:

ody911 said...

أنا إللى شاكر ليكى يا إسراء

بجد موضوعك بيفتح فى قلبى أمل

أمل بكرة

وعادى برضوا
اودى

esraa said...

ody911:
جميل أوي ان الموضوع خلي عندك أمل في بكره , بجد ده شئ أسعدني, بس بلاش عادي دي بقي (:

elkamhawi said...

بيحصل كتير
بس ده بيبقى طبع فى البنى ادم
والطبع غلاب

esraa said...

elkamhawi:
هو فعلا بيحصل كتير, بس ايه هو الطبع اللي بيكون غلاب, انه بيضعف أمام الضغوط بسرعه؟

أحمد عيسي said...

امال انا ليه مش متهني في حياتي؟
ياااااه..
امال انا مش مبسوط ليه في حياتي؟

..انا عارف هو ليه مش متهني في حياته..عشان ضميره معذبه..عشان في كل لحظة يشوف بنته بيفتكرها..الموقف ده اثر فيا جدا جدا لاني..ماعلينا..بس فعلا انا حسيت بانقباض غريب لما قريت السؤال ده لاني حسيت قد ايه هو بيتعذب ..

ثانيا:نفسي مرة اعلق الاول..علي الاقل نرد الواجب اللي عملتيه

اهنيكي جدا علي العرض والتناول وقولي لصاحبتك تسامحه بجد لانه فعلا بيتعذب

فؤاده said...

كلامك فكرني بتجربة شخصية وللاسف انا اللي كنت ظالم ، صحيح مكانش قصدي بس جرحت حد

عشان كده انا حاسس جدا باكلام ،بصراحه الندم شعور صعب جدا

dead man said...

و احنا ليه فاهمين ربنا غلط؟ هو احنا لازم ندعي عشان ربنا ياخد لنا حقنا؟

esraa said...

أحمد عيسي:
كأنك كنت الأول بالظبط, علي فكره هي سامحته وبجد من زمان, وربنا يوفقه ويسعده في حياته.

esraa said...

فؤاده:
أكيد الندم فعلا شعور وحش جدا, بس المهم انك تتعلم منه انك ماتغلطش نفس الغلطه تاني, أحيانا بيبقي لازم نغلط عشان تعلم.
الحد اللي انت ظلمته , كلمه واطلب منه انه يسامحك , حتي لو كان الموضوع عدي عليه وقت كتير, صدقني هتستريح جدا لما تكلمه ولما يقولك انه سامحك من زماااااااااان (:

esraa said...

dead man:
نورتنا ياباشا.
لأ طبعا مش لازم ندعي عشان ربنا ياخد لنا حقنا (:

copa said...

يااااااااه موقف مؤلم جدا
بس انا عندي سؤال مش هو برضه كان واقع تحت ضغط اهله الله اعلم برضه ايه الظروف الي اتعرض لها بس لو في ضغوط برضه يبقي التضحيه واجبه و يمكن الطريقة الي استخدمها خطاء و المفروض الصراحه هي المفروض تكون سيدة الموقف
بس الصراحه انا اكره اشوف نفسي في الموقف ده

دي اول زيارة لمدونتيك ما شاء الله حلوه و ان شاء الله هكون عنديك كتير

koukawy said...

كما تدين تدان00
القاتل يقتل و لو بعد حين00
و اللي يعمل كده يستاهل

elkamhawi said...

كلة بيحاول اللجوء للهروب اسهل واريح
بدل ما يواجى اى حاجة حتى لو كانت تافهة

pegasuselmasry said...

كلام جميل و سرد اروع

فمن اصعب الاشياء ان نسرد و نحكى عن ما بداخلنا فأنه لمن اصعب الاشياء

فالصدق هو اهم شئ

مصر هى أمى said...

بصى يا اسراء انا مريت بتجربة برضه كدة واضريت انى اسيبها تحت ضغط من الاهل يعنى مكنتش انا السبب فى الظلم بس ساعات الواحد بيعمل الحاجة وهوا مضطر يعملها بس صاحب القصة كويس انه عرف يتجوز اما انا فالغاية دلوقتى مش عارف احب واحدة تانية صدقينى ده شعور صعب جدا ان الواحد ممكن يغدر بواحدة وانا حاسس انى غدرت بيها بجد ربنا يكون فى عون الولد مش البنت صاحبتك

esraa said...

copa:
هو اها كان واقع تحت ضغط أهله , لكن احنا بنعيش تحت ضغوط كتير , ولو استسلمنا لكل الضغوط اللي بتقع علينا تبقي كارثه, لازم نواجه ونقول لأ ونوضح راينا ونعرف نتمسك بيه وندافع عنه, عشان في الأخر مافيش حد هيدفع الثمن غيرنا, يعني هو أهوه ضحي, وبعدين , بقي عايش ازاي دلوقتي؟
أول زياره ليك شرفتني , وهستني زياراتك ان شاء الله.

esraa said...

koukawy:
كما تديت تدان, جمله أكثر من رائعه وأتمني اننا كلنا قبل مانعمل أي حاجه نكون حاطينها أمامنا
زيارتك نورتنا

esraa said...

pegasuselmasry :
الصدق فعلا أهم شئ, وسعيده انها عجبتك , وزيارتك نورتنا (:

esraa said...

مصر هى أمى:
أكيد انك تغدر بحد ده شعور سئ, بس أكيد هي ان شاء الله هتكون سامحتك, وانت كمان حاول انك تسامح نفسك, حاول تفتح قلبك تاني للحياة وأكيد هتلاقي فيها حاجه حلوه تعيش عشانها, لو ممكن تكلمها كلمها واطلب منها انها تسامحك.
ربنا معاك ويسعدك في حياتك(:

esraa said...

elkamhawi:
مشكله فعلا حكاية الهروب دي, هو احنا ايه اللي حصلنا, ليه بقينا مش بنعرف نواجه؟

عين ضيقة said...

أنامتفقة معاكى جدا فى الرسالة وكل حرف فيها وكأنى أنا اللى بتكلم,بس الجزء الاول مش عارفه ليه حاسه انك قاسيه شويه (جايز لسه بيحبها فعلا) وجايز أنانيه ..جايز
حلو الموقف

esraa said...

عين ضيقة:
أنا بجد ماقصدتش اني أكون قاسيه, هو فعلا تقريبا لسه بيحبها, لكني بجد باتمني انه يقدر يعيش تاني حياته.
زيارتك ليا نورتني(: وجميل انك متفقه معايا.

Memo said...

ينصر دينك يا شيخه ياوه كده ادينا امل
الله يجبر بطرك و يكرمك امينننننن

يا قلبي يا غريب said...

كنت اتمني اخر جزء في البوست يكون الكلام ده ليا انا..ايوه و الله بجد انا عايش علي امل اني اسمع او اقرء كلام من وحده ..و لمره وحده بس مره تخليني اعرف اعيش..و لاكن عندي امل ان القسوه تروح و تتحول الي عطف و تكتب كلمتين..شكرااااا جدا للزياره تحياتي

كائن العزلة الكئيب said...

ايوه أحنا لآسف فاهمين ربنا غلط أو بالأحرى أحنا مش فاهمينو أصلا

الدمعه said...

على فكرة كلامك حلو بتنقلي الموقف كأنه امام العين .. لكن اكيد صاحبتك انتابها شعور جديد اين هو ... لم تذكريه ...ولكن الموضوع جديد ونداء جميل بس يا رب الرجل يتعظ بعدم الظلم .... واشكرك على الزيارة اللذيذة وجزاكي الله خيرا

mansourawy said...

الزمن سينسى
وكل له نصيبه
وفعلا صاحبتك دى سامحت الراجل ده
بس للاسف هو مسامحش نفسه

esraa said...

Memo:
الحمدلله اني اديتك أمل , أصلي قلبت المواجع علي ناس كتير.
وأمين يارب خصوصا حكاية جبر الخاطر دي (:

VEЯŎ said...

esraaaaaaa gamelaaaa

esraa said...

يا قلبي يا غريب:
خليك متمسك بالأمل يابطل, وبكره ان شاء الله هتلاقي الواحده دي كاتبالك الكلمتين اللي انت عايز تشوفهم (: , ومسير القسوه تروح وافتكر ان نقطة الماء بتحفر علي الصخر مش بالعنف ولكن بالتكرار .

esraa said...

كائن العزلة الكئيب:
جكيل مننا اننا نعترف اننا فاهمينه غلط, لكن الجمل اننا نحاول نفهمه صح (:

esraa said...

الدمعه:
أولا: أتمني ان اسمك يتغير ويبقي بسمه (:
ثانيا : شعور صحبتي كان عادي لأن دي مش أول مره تشوفه, هو بس صعب عليها أوي لما عرف انها دلوقتي بتحب وخصوصا لما سألها هو ليه مش متهني في حياته؟
يارب فعلا مفيش حد يظلم حد تاني , وكفايه ظلم الدنيا لينا , احنا كمان هنظلم حبايبنا؟

محمد بدرى said...

مش اى بيعرف يحس احساس شخص تانى لما يتحكيلوه موقف، ومش اى حد يعرف يعبر عن الاحساس ده.
افتكر ان الشخص اللى فى الموقف ظلم اثنين معاه، حبيبته اللى سابها واللى اتجوزها وهوا متعلق بحد تانى.
ده هيدخل الجيش حدف

esraa said...

mansourawy:
ياريت فعلا الزمن ينسيه, وياريت بجد يسامح نفسه لأنها هي نفسها سامحته .

esraa said...

VEЯŎ:
ربنا يخليك (:

esraa said...

محمد بدرى:
انت عارف ان فعلا مراته هي اللي صعبانه عليا في الحكايه دي, طول عمرها صعبانه عليا من يوم ماعرفت انه خطبها, وبجد طول عمري بدعي ربنا اني ماتحطش في موقفها.
طب هي ذنبها ايه تتجوز واحد قلبه مش ملكه وماعندوش الاستعداد انه يديهولها؟
ربنا يسعدهم.

مصر هى أمى said...

اسراء شكرا على ردك انا عارف انها سامحتنى علشان هيا كانت شايفة انى ماليش ذنب
سهل الواحد يسامح غيرة لكن صعب جدا انه يسامح نفسة خصوصا لو انه مش عارف يحب حد غيرها

الراجل مش ممكن ينسى اول حب فى حياته
يعنى اول واحدة تقص شريط قلبه

esraa said...

مصر هى أمى:
سهل الواحد يسامح غيرة لكن صعب جدا انه يسامح نفسة خصوصا لو انه مش عارف يحب حد غيرها
الراجل مش ممكن ينسى اول حب فى حياته
يعنى اول واحدة تقص شريط قلبه
أتمني بجد انك تقدر تسامح نفسك عشان تعرف تعيش حياتك
تعبير أول واحده تقص شريط قلبي ده جميل جدا وان شاء الله هتلاقي اللي تخليك ترجع تحب تاني(:

تسـنيم said...

إسراء أنا كنت هنا بعد ما كتبتي البوست مباشرة وقبل ما أي حد يعلق.. مش عارفة أقول حاجة بس هو مش متهني علشان ضيع من إيده فرصة حقيقية للسعادة ولأنه ترك قلب حبه بجد وضيع حب حياته والحب الحقيقي مش بيجي غير مرة واحدة وما عداه محاولات للتعايش.
أتمنى لو كان لينا الحق إننا نرجع بأيامنا لماضي علشان نقدر ندافع عن حاجات اتاخدت مننا ونغير في أحداث سابتنا بنتألم.

الوردة السودة said...

جميلة اوى
الموقف جميل
ومس ناس كتير
عشان كلنا او معظمنا اتحطينا فى الموقف ده
نقلك للأحداث كويس جدا
ورائع كمان
الموقف وصل كامل
بكل تخيلاته
ربنا يوفقك

whyme said...

لأ ساعات كتير بنبقى مش عارفين مصلحتنا و عايزين حد يعرفهالنا

و كمان حكايتك دى بتفكرنى بحبى الاول
انا برضه سيبتها بس مش فجأه و هيه كمان كانت مقتنعه انه مش هينفع نرتبط

لانها ارتبطت من سبع سنين و انا لغاية دلوقتى مش قادر ارتبط
يبقى كان لازم نسيب بعض ولا لأ وكان لازم اسيبها تدور على حياتها ولا لأ

تحياتى
واحد ترك حبه الاول وواثق ان ربنا هيعوضه بحب اكبر

مستنيك عندى انا نزلت الجديد و شكراً لاهتمامك

إنـســانة said...

إسراء انا بحب بوستاتك اوى

ربنا هو الحق وبيعوض اللى اتظلم

والدنيا عمرها ما بتقف عند فشل تجربة معينة

وفى الاول وفى الاخر ده نصيب

esraa said...

تسـنيم:
والحب الحقيقي مش بيجي غير مرة واحدة وما عداه محاولات للتعايش
حلوه أوي الجمله دي, هو فعلا الحب الحقيقي مش بيجي غير مره واحده وبيكون غالبا لتوأم الروح أو نصك التاني وده اللي لو راح مش ممكن تلاقي نص تاني غيره , عشان كده اللي يلاقي نصه ياجماعه اوعو يسيبه تحت اي ظرف من الظروف.
انت عارفه لو رجعنا الماضي هنعمل اللي عملناه بالظبط ونستني ان النتيجه تتغير, ولاد أدم بقي تقولي ايه, لكن الماضي مش عشان يرجع, الماضي عشان نتعلم من اللي عملناه فيه .
مع حبي.

esraa said...

الوردة السودة:
ربنا يخليكي.
هو فعلا الموقف اتكرر كتير , بس ياريت نكون اتعلمنا منه واللي ممرش بيه يتعلم من تجارب غيره ومانستناش اننا نكرر غلطة غيرنا ونستني ان النتيجه تتغير

esraa said...

whyme:
بس ياريت الحد اللي يعرفهنلنا ده يعرفهلنا بسرعه مش بعد ماعمرنا يعدي, بس احنا غالبا بنكون عارفين مصلحتنا أكتر من أي حد في الدنيا.
حبيبتك الأولي أنا مش عايزه أظلمها بس هي لو كانت حبتك بجد ماكنش ممكن توافق انها تسيبك أبدا وماكنتش قدرت انها ترتبط تاني بالسرعه دي.
ثقتك في ربنا حلوه أوي وأكيد طبعا هيعوضك بحب أحلي وأكبر بكتيييييييييير. (:

esraa said...

إنـســانة :
ربنا يخليكي.
أكيد طبعا ربنا بيعوض كل انسان اتظلم, وبياخدله حقه كمان, وأحيانا كتير بيكون الظلم ده دعوه من ربنا لينا عشان نقرب منه ونرجعله ولما بنعمل كده بيرفع الظلم ده عننا وبيعوضنا أكتر من اللي اتاخد مننا بكتييير.
وفعلا الدنيا عمرها ماوقفت عشان حد فشل أو حد اتألم أو اتوجع وأكيد احنا كمان ماينفعش نقف (:

makhlouf said...

اسراء
كتابتك جميلة
ومش شرط يكون سبب عم السعاده انه ظلم
ممكن يكون اكتئاب متزامن مع
البعد اللى حصل بينهم
بس

copa said...

بصي يا اسراء انا في حاجه هقولهاليك
وانا مش بقولها يعني من باب الفنتزيه و لا اني شيخ و لا كلام من ده بس انا هقوليك الكلام ده مش بينفع في كل الاوقات مادام في الاهل و الاب و الام يبقي ستوب شوية لو تفتكري سيدنا ابراهيم قال ايه لسيدنا اسماعيل قالوا طلب منه يطلق زوجته و يتزوج من واحده تانيه و ما كان عليه الا الاطاعه بس صدقيني في الحاجات دي الي بيتبع اهله الي حدا ما بيكسب ولو حتي مكسبش في الحياة بيكسب بعدين مع اني برضه انا شايف انه موقفه ضعيف لائنيك مقلتيش انه حاول يدافع عن رائيه ادام اهله و لا حتي حاول شرح الامور انا معرفش برضه بس لو هو شرح لاهله و عمل الي عليه و اهله مقتنعوش اعتقد انه يتبع اهله بس ده من رائي من منظور الصح لاكن من منظوري و من دماغي انا هتجوز الي بحبها غصب عن اي حد واديني محرمتكيش من الزياره التانيه

esraa said...

makhlouf:
أهلا ياباشا, عود أحمد
طب وليه الانسان يجيب لنفسه إكتئاب ويعيش مش سعيد من أصله , مش كان عاش سعيد أحسن.

esraa said...

copa:
أنا طبعا مش ضد طاعة اللأهل بالعكس أنا معاها جدا , بس من غير مايكون في ظلم لحد, سيدنا ابراهيم كان نبي وأكيد كان عارف ان كده مش بيظلم حد, لكن هنا هو ظلم نفسه وظلمها والأهم انه ظلم مراته اللي بنتها علي اسم حبيبة جوزها الأولانيه.

Aladdin said...

"قال: بتحبيه؟
قالت: جداا"

........

الجزء دا محوري في القصة (التي أظن أنها من قصص "حدث بالفعل") لأنها كأنثى مكسورة القلب بسببه كان لازم ترد الرد ده!

هي لا تحب خطيبها المستقبلي كحبها له، ولن تفعل! وهو كذلك يحبها (وإن تزوج بأخرى) بدليل أنه أسمى ابنته على اسمها!!

تعاطفت معه لدرجة أنني أحببته وتمنيت لقاءه!! إنه لا يعيش حياة هانئة لأنها "دعت عليه" - ببساطة - لأن الله ليس بهذه السذاجة! هو ليس سعيداً لأنه لم يتزوج بمن يحب! أظن أن هذه هي الحقيقة.

إسراء إذا اضطرتنا الحياة أن نكون جميعاً "محاربين" فلا يعني ذلك - بالضرورة - أن نكون جميعاً "منتصرين" (وهذا ينطبق بطبيعة الحال على حبيبها الأول!

esraa said...

Aladdin:
هي فعلا بتحب خطيبها المستقبلي ان شاء الله جدا, ودي مش مبالغه, يمكن هي عرفت تحب بعد مرور 3 سنوات ودي مش مده قصيره, لكن ده مايقولش أبدا انه اتمحي من ذاكرتها.
وصدقني هي عمرها مادعت عليه بجد, بالعكس كانت بتقول ربنا يسعده, وأنا مختلفه معاك في النقطه دي , هو احنا لما نظلم حد, تفتكر ان ربنا العدل والحق مستني دعوه عشان يقر معاني أساميه, أكيد لأ, المشكله اننا مؤمنين جدا بربنا الخالق, انما باقي الأسماء معانيها بتقع مننا.
أكيد مش كل المحاربين منتصرين, اللي بينتصرو هما اللي بيصرو علي الانتصار ومش ممكن يتنزلو عنه
زيارتك ليا شرفتني (:

maha said...

سلام عليكي
حلوة اوي , حلوة لدرجة خليتني اخاف من كتير ظلموا بعض لحسن يكونوا تعساء في حياتهم
الانسان هو اللي بيصنع الاعذار لانه كسلان مش قادر يواجه العالم بنفسه
خسارة انه ضيعها من ايده يمكن يكون عايش بعقده ذنب لكني متاكده ان الشخص اللي هترتبط بيه ربنا هيرزقهم فرحة و حب كببير يعوضها عن اي الم لكن فعلا ربنا مش بيسيب ظالم
ربك يمهل و لا يهمل
لا اله الا الله
سلام
مها

3rby said...

والله مش فاهم
يعني انا لو عاوز اسيب واحدة وبعد ماعرفتها كويس اكتشفت انها مش الانسانة المناسبة يبقي انا ظلمتها والمفروض هي اللي تختار مصلحتها
ده كان تعقيبا علي تعقيبك مش عالموضوع لان كلامك كان عام

بالنسبة لقصة صاحبتك
هو كان المفروض يتناقش مع اهله ويقنعهم
بس عاوز اقولك حاجة مش متاكد منها
لو ام او ابو الراجل قالولوا طلق مراتك وماطعهمش حرام
طبعا حاجة تدايق بس هو ده كان كلام مدرس تعقيبا علي قصة سيدنا ابراهيم لما خلي ابنه سيدنا اسماعيل يطلق مراته

camera_girl said...

اولاا معرفش جيت متاخر المدونه بتاعتك ولا ايه بس عاجباااااانى وداخله دماغى اوى وهى لنفس السبب الى كتير قالوللك عليه انك واقعيه انا بحب القصص اوى احب حتى لما اقعد مااصحابى نحكى القصص فأنتى كتبتيلى حدودته وبشكل واقعى اوى من غير ما تقولى اشعار ولا تبالغى فالوصف ولا تهولى لأنك مش انتى الى مألهفه القصه

تانى حاجه عجبنى اوى تعليقك لما بتقولى:ا انك مقتنعه ان الى عايز حاجه بيعملها وبيحارب عشانها ومحدش يقدر يمنعه فمرحله معينه بس ساعات الواحد بيريح دماغو وبيختار الأسهل واهو هيتقال عليه فالأخر بردو يا عينى مهو غالباااااان يعنى كان هيخسر اهلو!!

اما بأه انو مش سعيد فده لأن حصل مقارنه مش اكتر بين مراتو وبين القديمه تعرفى لو كانت مراتو جامده كده وحلوه زياده عن اللزوم كان هيقلب البنت دى وعمرو ما هيفكر فيها وهيقول دى مرحله من حياتى وعدت لكن لأنو مش مبسوط فبيقول لو كنت مع دى كان زمانى متهنى

ثم ممكن جدا يكون سعيد فى حياتو وعايش الدور وبيقولها اى كلاام لأحساسو بالذنب ناحيتهاحاكم الأمراض النفسيه
ذادت يا اوختى

اما باه اذا كان مش سعيد فعلاا فده لأن اكيد ربنا ادالو نعمه محافظش عليها ومحاربش عشانها وجايز يكون ان جزاءو من جنس تفكيرو جايز كان شايف الجواز بشكل غلط ميت جايز وجايز وميت احتمال صدعتك انا عارفه بس معرفش اول مره اتحمس واكتب فى كومنت بالشكل ده مش قولتلك بحب القصص الواقعيه!!!!!!!

esraa said...

maha:
أنا كمان بتمني لهم السعاده مع بعض , وهو فعلا ممكن يكون عنده عقدة ذنب, ادعيله انه يعيش سعيد.
زيارتك نورتني (:

esraa said...

3rby:
لما تقرر انك تسيبها , قولها الأول واشرح لها أسبابك, واتفقو مع بعض علي الفراق, مش تبعد وتختفي وهي تبقي مش عارفه ايه اللي بيحصل.
سيدنا ابراهيم نبي, يعني كان عارف انه مش بيظلم حد, لكن كتير من قرارات الأهل بتكون من غير سبب أو سببها الرئيسي الغيره, هو المفروض يسألهم عن السبب, لو هي مش كويسه أو بتسئ لهم طبعا يبقو عندهم حق, لكن لو هي كويسه وبتعاملهم بكل حب, يبقي هو كده هيظلمها, وربنا مقالش اننا نطيعهم في الغلط.
زيارتك نورتنا (:

esraa said...

camera_girl:
الحمدلله ياستي انها عجبتك, ده شئ يسعدني
حلوه اوي انه في الأخر هيتقال عليه غلباان دي , وهي فعلا صح مش احنا دايما بنقول كده , وفعلا الانسان هو اللي بيختار الحياه اللي عايز يعشها.
أنا ماعتقدش انه يكون بيكذب بالعكس, وخلي بالك هو ماقالش ده غير لما هي قالتله انها بتحب واحد تاني, وحلوه أوي الجايزات الكتير اللي انت قولتيهم دول, بس علي فكره مراته فعلا أموره (:
علي العموم زيارتك شرفتني, وانت تطولي زي مانت عايزه.
سلام

Reformer1976 said...

يا ستي كلمة فلان ظلم فلانة اللي بتحبه عشان ما حصلش نصيب واتجوز واحدة تانية فعدالة السماء بتنزل على استاد باليرمو عشان تقتص من الراجل هذا هو ما أعترض عليه
لا يوجد ظلم أساسا بل يوجد نصيب وعدم توافق بشكل أو بآخر أما عدالة السماء فالله مش فاضي لمعاقبة محب ما اتجوزش حبيبته... خلينا نبقى متزنين شوية

maksofa said...

تعرفي الفكره جميله جدا
عن الأرتباط العاطفي
وهجر الحبيب لحبيبه بدون سبب مقنع
وأنتقام الله سبحانه وتعالي من الذي غدر بمشاعر الطرف الثاني

شدتني الحكايه للأخر
ولكن أعتقد أنك لو كنت كتبتها باللغه العربيه الفصحي لآستطعت أيصال المعني بشكل اجمل

تحياتي

buffy said...

tsam7eh ymkn lkn tnsy kol dah so hard

esraa said...

Reformer1976:
ياسيدي هو مش ظلمها عشان محصلش نصيب, هو ظلمها عشان مادفعش عن الحب ده , وسابها كده من غير حتي مبررات.
أما بالنسبه لربنا فأكيد انت عارف انه مش بيشغله نظر عن نظر ولا سمع عن سمع, يعني كلمة ربنا مش فاضي ماتنفعش ولا ايه؟ (:
علي العموم ده رأيك وأنا أكيد بحترمه .

esraa said...

maksofa:
ربنا يخليكي.
لكني مش بكتب بالغه العربيه الفصحي لأني بخاف أغلط في القواعد النحويه (:
فبقول بدل مالناس تفضل تصححلي أكتب كده أحسن

esraa said...

buffy:
أكيد صعب ان أي حد يقدر ينسي (:
زيارتك نورتنا.

moodysalihamidzic said...

ازاى بس راجل
وابوه يرغمه انه يتجوز
امال البنات تعمل ايه

esraa said...

moodysalihamidzic:
لأ علي فكره دي بقت ظاهره, بقت بتحصل كتير اليومين دول, وبجد أنا شوفت صبيان بيقولوا انتو بنات تقدرو تعملو اللي انتو عايزينه لكن أحنا صبيان مانقدرش, والله بجد

ياسمين said...

والله يا اسراء عجبنى البوست جدا

لكن للأسف هو مش سعيد فى حياته عشان كدة

ولو كان اتجوزها كان هيبقى برضه مش سعيد

عارفة ليه

عشان الرجالة دايما بيحبوا الحاجة اللى مش فى ايديهم ويفكروا ان هى دى اللى هتسعدهم

esraa said...

ياسمين:
مش دايما ماينفعش اننا نعمم القاعده, في رجاله كتيييير متجوزين وسعداء جدا في حياتهم.
زيارتك نورتنا (:

Sharm said...

مش عارف اقولك ايه ..
التدوينة اجمل بكثير من اني اعلق عليها
www.romancy.tk

moodysalihamidzic said...

كلنا صعبان علينا الحبيب والحبيبة
وماشى هصدق كلامك
ان فى ولاد بيتفرض عليهم انهم يتجوزوا انسانة معينة
الانسان اللى سمى بنته على اسم حبيبته
اكيد ظلم نفسه بالعيشة دى
بس ظلم الانسانة اللى اتجوزها ظلم اكبر وابشع
:(
هى قالتله اتجوزنى بالعافية؟؟
هو الجواز لعبة
ده عمر بحاله
المسكينة عايشاه مع واحد وهى اكيد حست انه مش بيحبها !!

koukawy said...

انتي فين يا اسراء مش بتكتبي جديدي و حرمانا من بلوجاتك الكريمه ليه؟؟؟؟؟؟

tamer said...

السلام عليكم

ازيك اسراء اخبارك اية ان شاء الله تكونى بخير

فينك مش باينة

crazyrama said...

عجبنى البوست
علشان ممكن اكون عايشة نفس الحالة
بس صدقينى ساعات كتير البعد اريح
ساعات كتير بنضطر نبعد علشان منجرحش
اللى بنحبهم
مش فى كل الاحوال حكمنا بيكون صح
بس فى الغالب انتى ادرى الناس بنفسك واللى بيحب لا بيجرح ولا بيظلم دة بيموت الف مرة قبل ما بيبعد

البوست رائع

darsh said...

انا شوية وكان هايطلع لي جناحات
وكنت هافرفر من العياط ( حلوة أفرفر دي ) وخصوصا ان انا كنت بسمع فيروز مع فنجان القهوة اللي انا بشربة سادة وكان عامل لي جو اكتئاب هو كمان
ربنا يسامحك يا إسراء فكرتيني

بس في الآخر
إنها الحياة لا تستحق إلا أن تعاش

shabfa2re said...

هى اسراء راحت فين

esraa said...

Sharm:
ربنا يكرمك

esraa said...

moodysalihamidzic:
أنا قلت قبل كده ان أكتر حد صعبان عليا هي مراته, لأنها أكتر واحده اتظلمت, هو اتظلم بس هو اختار, صحبتي اتظلمت بس حياتها لسه في ايديها, لكن هي اتظلمت وحياتها في ايديه,
أتمني انه يقدر يعيش حياته طبيعي, حتي عشان مراته بس

esraa said...

koukawy:
معلش معلش, الجديد جاي قريب, هو بس اتأخر في الطريق, بس جاي أهوه (:

esraa said...

tamer:
الحمدلله انا بخير, اتمني انت تكون كويس
أنا بنت أهوه, أنا ماختفتش غير يوم واحد بس (:

esraa said...

crazyrama:
الحمدلله انه عجبك, احنا مايهمناش غير رضي معاليكي(:


واللى بيحب لا بيجرح ولا بيظلم دة بيموت الف مرة قبل ما بيبعد


طب ليه نعمل كده في نفسنا, حد يموت نفسه, أو علي الأقل قلبه

esraa said...

darsh:
معلش حقك عليا
أنا مش عارفه هو البوست ده كان المفروض أسميه استيقاظ الجروح النائمه ولا ايه؟

esraa said...

shabfa2re:
إسراء أهي ياباشا (:

shabfa2re said...


113 comment!
يا مفترية
ده انا لو 3 ردوا يبقى كويس
D:

mansourawy said...

هى وقفت ع البوست ده بس
ولا ايه؟

أمـــــــاني said...

فين جديدك يا إسراء؟؟؟وحشتينا

SaRa said...

حلو البوست اسراء

والخدث والموقف نفسة وطرحك لية جميل جدااا

عاشقة الوطن said...

ياااااااااه صعب اوى
ان الواحد يحب وفى الاخر يتظلم

مين اللى يقدر الحب قى زمن ضاع فيه الحب

esraa said...

shabfa2re:
ده أر يعني ولا ايه؟ مش عيب عليك كده, وبعدين انت مدونتك حلوه ودمها خفيف يعني ممكن يكون في ناس كتير بيدخلو بس مش بيعلقو (:

esraa said...

mansourawy :
لأ, البوست الجديد نزل خلاص

esraa said...

أمـــــــاني:
الجديد نزل, بوست الفضايح
(:

esraa said...

SaRa:
ربنا يخليكي ياجميله (:

esraa said...

عاشقة الوطن:
هو صعب جداااااااااا فعلا
بس في ناس كتير لسه بتقدر الحب

FemTo said...

انا حسيت الموضوع اووى..بجد الواحد بيمر بظروف ويكون قدامه الاختيار وساعتها مش بيعرف يقدر او مش بيشوف المفروض يعمله وبيعرف بعديها..عجبنى احساسك اووى

esraa said...

FemTo:
المشكله انه لما بعرف بعديها , غالبا بيكون الوقت عدي ومش بيعرف يصلح الغلطه اللي عملها.

eZz said...

هي من امتي التدوينات المفروض تعجب الناس يا إسراء !!!!!؟

السؤال ده طبعاً تعليقاً علي تعليق "هيثم أبوعقرب" اللي فصلني بتعليقه الغريب جدا جدا جدا جدا عن ان التدوينة ضعيفة جدا في كتابتها وانك كان ممكن تطلعيها احسن من كده !!!!!!! ايه يا عم نجيب !! إيه الخنقة دي !!

يا إسراء التدوين دم تجربة شخصية.. يعني انت مش بتألفي قصص عشان تكتبيها انت بتحكي موقف زي ما حصل وشوفتيه بإحساسك واحنا يا نقول رأينا يا مانقولش.. يا نعجب يا منعجبش !!

وحتي لو مش بتحكي وبتألفي.. برضه مش من حقنا اننا نقولك إسلوبك وحس واكتبي وحاولي مرة تانية !!! مش هتمشي علي مزاج الناس يعني ... عشان مش هتخلصي

رجاء خاص !! بعد كده اكتبي اللي انتي عايزاه ومتبراريش لحد انت كتبتي ليه وازاي وفين !!! دي مشكلتك لوحدك واحساسك وطريقتك وتعبيرك ومتكرريش كلمة "ان شاء الله تعجكبم" دي تاني.. لأن ببساطة شديدة المفروض التدوينة تعجبك انت الأول ولو فيه حد معجبتوش انت مش مطالبة بتقديم اعتذارات او وعود بتدوينة افضل المرة القادمة.

استمري والتدوينة اكتر من رائعة واللي مش عاجبه هو حر، مش مغسل وضامن جنة !!

esraa said...

eZz:
ربنا يخليك (:
بس بجد هيثم ماكنش يقصد انه يقلل من كتابتي هو بس كان يحب انها تكون ادبيا أحسن من كده, هو بصلها من المنظور الأدبي مش أكتر.
ربنا يخليك تاني وشكرا علي النصيحه (:

zordeak said...

أى


أى


أى


حرااااااااام عليكى

ehahe said...

انا مستغربه من الراجل اللى كان بيحبها
ومن صراحته وازاى هوقالها بكل بساطه
انه مش سعيد في حياته

دوللي said...

هي ايه يا جماعه حكايه اهل الرجل اللي بيفرضوا عليه الجواز دي, ده الموضوع اصبح ظاهره ,ده تقريبا بين كل مجموعه اصحاب في واحده مرت بالمشكله دي و ايه حكايه الرجاله اللي بيتفرض عليها الجواز دي ,ده البنات مش بيحصلها كده دلوقتي ولا خلاص زمن الرجاله راح

esraa said...

zordeak:
هي جت فيك
معلش ياحمد مكنش قصدي حقك عليا.

esraa said...

ehahe :
لأ ماتستغربيش, دي بتحصل كتييييير.

esraa said...

دوللي:
والله بجد أنا مش عارفه, بس كل واحد له ظروفه اللي احنا مانعرفهاش, بس هي فعلا بقت ظارهره.

 

The Lost Princess © 2008. Design By: SkinCorner