Sunday, February 4, 2007

التاج علينا حق


أنا مش عارفه أنا غلطت لما كتبت البوست اللي فات ولا ايه؟
حسيت انه قلب المواجع علي ناس كتير جداااا, وانه فكرهم بحاجات عملوها أو حاجات اتعملت فيهم, بس حسيت انكم اتفاعلتو معاه جدا, يمكن فعلا عشانه حاجه حصلت و للأسف لسه بتحصل, يعني في ناس ماكتفتش بانها تعلق علي الموضوع بس, لأ في ناس عملت بوستات في بلوجاتهم يطلبو من الناس اللي ظلموها انهم يسامحوهم, وناس سألت نفسها هم سعداء ولا لأ؟
أنا أكيد سعيده بتفاعلكم, لكن لأي حد أنا قلبت عليه المواجع أو صحيت جواه الجروح, أنا أسفه حقك عليا, أنا بس خفت علي أي حد يتحط في الوقف ده انه يعيش نفس المصير.


نيجي لموضعنا بقي

التاج

وياريته تاج دول اتنين, ورغم كل محاولات هربي منه, الا انه جالي جالي ومفيش مفر

التاج الأول من منة (mony the angel) صاحبة مدونة metalking

والثاني من تسنيم صاحبة مدونة حكيات من القلب
------------------------------------
التاج الأول خمس حاجات محدش يعرفها

ماشي ياستي

1- أنا اسراء أخت تسنيم ومنة يعني أنا لؤم اللي تسنيم كتبت عنها في البلوج بتاعها و أسباب تسميتنا الأسماء دي, أنا لؤم ومنة خبث وتسنيم طبعا ليها لقب هي ماذكرتهوش هناك وهو سوسه, أحمد أخونا لأنك لما تبقي ولد واحد يبقي اما انك تنعزل عن اخواتك واحنا الحمد لله مش كده أو انك تبقي شغلتهم واحنا طبعا كده, فاحنا كل واحده فينا كانت بتقرره علي حاجه وبعد كده نقعد مع بعض نكمل المعلومات من بعض, وطبعا أحد مره دخل علينا وظبطنا متلبسين وادانا الألقاب دي.

2- وأنا صغيره كان نفسي لما أكبر أشترك في فريق سباق عربيات, وأنا طبعا اللي أسوق , كان نفسي أسوق بسرعه جدا وأعمل فووووووووو
أحمد أخويا بيضحك عليا كل ما أقول فووو دي (:

3- وأنا صغيره برضو كان عندنا في المدرسة أوضتين تحت السلم ليهم باب خشب, المدرسين كانو بيضحكو علينا ويقولولنا ان دول أوضة الفيران, وان اللي مش هيسمع الكلام هيودوه هنا, أنا بقي ذكيه طول عمري, فكنت بقولهم لو كان في فيران جوه كانو أكلو الأبواب الخشب, يبقي أكيد مفيش فيران ولا حاجه يعني؟

4- دكتورة الفيزياء بتاعتي في الكليه قالتلي ان حرام أدرس علوم في مصر لأنها دوله مش بتقدر العلماء واني لو كنت بدرسها في لندن كنت هفرق كتير لأنهم هناك هيعرفو قمتك, نسيت أقولها اني سيبت علوم خلاص.

5- أنا الناس بتصعب عليا جدا, اكثر مما أي يحد يتخيل, لكني مش بحب اني أصعب علي حد, أصلي لما بصعب علي حد نفسي بتصعب عليا أوي, أوي بجد.

الحمدلله خلصنا واحد, الثاني بقي
-----------------------------
اية اللي حيحصل لايميلك لما تموت؟

أنا علي طول بفكر في الموضوع ده, وقررت اني هكتب كل ايميلاتي في الأجنده بتاعتي ومعاها الباس ووردز بتاعتهم عشان لما أموت اخواتي يدخلو ويقولو لأصحابي, أكيد هم هيكونو عايزين يعرفو وممكن حد فيهم يدعيلي.

اديت الباس وورد لحد قبل كده؟
أها

لو اه كانت طبيعة علاقتك بيه اية؟
حد عزيز عليا زي مانا كنت عزيزه عليه, بس للأسف دلوقتي الباس وورد اتغير.

اسمك؟
إسراء فهيد
esraa fehead

اسم الدلع المشهور وسط اصحابك؟
دايما بتسأل السؤال ده, بس هو كل واحد بيدعلني بدلع مختلف
في بيقولو لؤلؤه ودي ليها قصه, وفي روئه, وفي سوسو, وفي إيسو, وفي إس, يعني الموضوع كبير أوي, وكل واحد بيألف اللي يعجبه.

عمرك؟
21 سنه و 9 شهور و8 أيام

برجك؟
الثور

مجال دراستك؟
كلية دراسات اسلاميه

شخصيتك نوعها ايه؟
مش عارفه المفروض الناس هي اللي تتسأل السؤال ده, بس أنا بقيت هاديه كتير عن الأول , كنت الأول بتنرفز بسرعه, بحب أساعد الناس جدا سواء أصحابي أو حد ماعرفوش وبكون سعيده لما أعمل كده, ومش أي حد يعرف يفهمني , يعني لازم تتعامل معايا الأول مده عشان تقدر تعرفني كويس, وأعتقد اني غامضه (:

السفر بالنسبة لك؟
جميل, وأنا بحب السفر, بس يبقي معايا حد بحبه, أصحابي, عيلتي, كده يعني.

المود بتاعك؟
أعتقد انه كويس, بس منة أختي كانت قالتلي من يومين اني بضحك علي طول وأنا قولتلها مش أحسن مما أعيط, وفضلنا نضحك
بس أعتقد اني بفكر كويس ومش هايفه يعني , هي بس كريزة الضحك اللي ماشيه في البلد اليومين دول.

وقت فراغك بتعمل فيه ايه؟
قرأه, تليفونات, خروج, نت, وكده يعني

الاكلة المفضلة؟
مكرونه أسباجتي , وبحب المكرونه بالطريقه الايطاليه جدا.

الصفات اللي خدتها من بابا؟
مفكرتش في الموضوع ده فعلا قبل كده
بس أعتقد اني أخدت منه...... , الصراحه مش عارفه هبقي أسأل اخواتي وأقولكم (:

الصفات اللي خدتها من ماما؟
الملامح لأن أنا شبه ماما, والعند طبعا, ومش بحب حد يلعب في شنطتي, وانك لازم تعرفني الأول عشان تحبني.

اكتر 6 حاجات بتكرهها؟
اليهود, بكرههم جداااااااااا
الغباء, اني اتعامل مع حد ويكون غبي ويصمم انه صح
البرود, بيحرق دمي جدا وهو الحاجه فعلا اللي تقدر تنرفزنى بسهوله, خصوصا لو أنا مضايقه واللي قدامي بارد
الظلم, أنا ضد الظلم شكلا وموضوعا وبيكون عندي استعداد اني أساعد أي حد اتظلم بأي شكل.
السمك المقلي, مش بحبه خالص.
الخيانه, أعتقد انها أصعب حاجه ممكن أي حد يتعرضلها, وأوحش حاجه فيها انها مش بتيجي غير من أقرب الناس ليك.


اكتر 6 حاجات بتحبها؟
ربنا والرسول طبعا
ماما وبابا واخواتي وعيلتي
أصحابي
الحاجات الرومانسيه
مساعدة الناس
اني أخلي حد يضحك


الشغل بالنسة لك؟
حاجه حلوه جدا, بس و بشتغل حاجه انا بحبها

ايه الكمبيوتر والانترنت بالنسبة لك؟
حاجه مهمه في حياتي
-----------------------
نمرره لمين بقي
شاب فقري

50 comments:

هيثم ابوعقرب said...

التاجات دي كنت بكرهها الاول لكنها لايم دي عرفتني بحاجات كتير يا
اس
ع العموم احساسك كويس ورديتي كويس ع الاسئله

esraa said...

هيثم ابوعقرب:
(:
ربنا يخليك, بس ايه رأيك ترد علي التاجات دي.

محمد بدرى said...

طيب الدعوة اللى بعتها بهظ هربت منها وقولت له مش وقته، طيب ههرب من دعوتك إزاى؟
على العموم اشكرك على دعوتك وعلى شخصيتك الجميلة اللى بانت من الرد على التاج.
وربنا يسامحكم

esraa said...

محمد بدرى:
مفيش هروب
هترد يعني هترد(:

أماني said...

إسرااااااااااااااااء
ليه عملتي فيا كده؟؟؟؟؟؟؟؟؟
ربنا يسامحك بئه

بس تعرفي أنا كنت عارفه من بوستاتك إن شخصيتك رقيقه و لذيذة زي ما إنتِ عبرتي عنها يمكن أحلى كمان

esraa said...

أماني:
ربنا يخليكي.
بس معلش يامون, بس أنا كمان اتدبست, ومهما حاولنا نهرب منه هيجبنا هيجبنا, يالا حليه عشان أدخل أتفرج

إنـســانة said...

مبروك التدبيسة يا إسوو

بس اول مرة اعرف إنك إنتى لؤم اخت تسنيم

يا سبحان الله

الدنيا دى صغيرة اوى يا جدعااان

بس ايه حكاية لؤلؤة دى؟؟؟

تسـنيم said...

هههههههههه كده معدش في أسرار يا ست لؤم.. حلوة إجاباتك أوي

هيثم ابوعقرب said...

زوري وهتعرفي مش هرد ليه
؟؟؟
جهزي بوستات

مبرمج حر said...

أول مره أجى مدونتك يا اسراء
مفيش حاجه ساقعه و لا حاجه

بقى بتقولى لتسنيم

هههه
أجوبتك حلوه ياتسنيم , بس صح مين خبث وؤم دول؟ نفسي بجد أعرف بلوجاتهم

الزرافة الحسودة said...

أنا أحسدك
أنا أحسدك
أنا
أ
ح
س
د
ك

esraa said...

إنـســانة:
وتدبيسه ايه مقولكيش
من جهة ان الدنيا صغيره فهي صغيره جدا.
حكاية لؤلؤه ان تسنيم وهي صغيره ماكنتش بتعرف تنطق اسمي , كانت بتقوله اسلاء, فهما دلعوني علي نطقها الغلط لاسمي ياستي.

esraa said...

تسنيم:
لأ كده خلاص الناس كلها عرفت كل حاجه

esraa said...

هيثم ابوعقرب:
سامتك بجد ياهيثم
شكرا علي الدعوه, بس هنجيب منين بوستات ؟ أكيد ساعتها ربنا هيرزقنا (:

esraa said...

مبرمج حر:
لأ ازاي؟ ده في حاجه ساقعه وجاتوه كمان.
بس ايه رأيك في الاشتغاله دي, حلوه ؟

esraa said...

الزرافة الحسودة:
تحسديني علي ايه بس؟ ده أنا أصعب عليكي والله.

مصر هى أمى said...

اسراء
حلوة اوى بوست ده
عموما شكل التاج ده بيفضح الناس حاسس ان اهالينا هما اللى اخترعوه
علشان يعرفوا كل حاجة
بس لا مؤاخذة ليا سؤال باباكى اسمه فهيد يعنى ايه

esraa said...

مصر هى أمى:
تفتكر فعلا ان أهالينا هما اللي اخترعوه؟
فهيد ياسيدي اسم عيلتي هو اسم غريب شويه لأن أصلنا مش مصري, لكن اسم بابا محمد

مصر هى أمى said...

طبعا اتمنى ميكونش اهلنا هما اللى اخترعوه لان اللى انا كاتبه فى التاج بتاعى يخلينى مروحش لمدة سنة
بس انا مطمن ان علاقة بابا بالكمبيوتر زى علاقتى باللغة الهنديه

طب ادى اول خطوة عرفت اسم الحاج ناقص العنوان بأه علشان اعرف اجى

طب والله لاعمل تاج بعد كده كل واحد وواحدة يكتبوا بياناتهم بالتفصيل بالعناويين والتليفونات

هوا انتى واخواتك بتقسموا الوقت بينكم ازاى على الكمبيوتر

esraa said...

مصر هى أمى:
لأ هو الصراحه بعد اللي انت كاتبه هناك, يبقي ان شاء الله الحج مالوش دعوه باتاج, والا فعلا هتروح في داهيه, مش لو كنت ذاكرت كان زمانك دلوقتي دكتور او مهندس؟ (:
خد التاج التاني بقي ياباشا وحله يالا, مستنيه الاجابات .

أحمد الشمسي said...

لازم أسجل اعتراضي...
التاج بتاع خمس حاجات ما حدش يعرفها كان أصله: "خمس حاجات من الجانب المظلم اللي ما حدش يعرفه"...
لكن اللي حصل انه تحول بعد كده لحاجة مالهاش معنى... أنا الوحيد اللي طلع صعيدي وجاوب على التاج بحق ربنا! ماشي! تتردلكم في تاجات تانية!

esraa said...

أحمد الشمسي:
انت اجاباتك كانت صريحه وجميله, وبعدين انا برضو قلت حاجات محدش يعرفها , أو ناس قليلين أوي (:

shabfa2re said...

ميرسى يا اسراء يا عسولة
ع التاج
وده اول تاج يوصلنى
وعقبال عندكوا جميعاً

esraa said...

shabfa2re:
الشكر لله, لو كنت اعرف كنت بعتلك من زمان(:
المهم انك تحلهم, الاتنين.

متغيرة شوية said...

موضوع اوضة الفران + موضوع مدرس الفيزيا بيدلوا انك عبقرية ما شاء الله..
فكويس انك سبتي علوم علشان متبقيش زي سميرة موسى

الأباصيرى said...

ياصباح الخييير

أيوة كدة كل واحد يفضح نفسة بنفسة

لؤم ، خبث ، سوسة

أية الأسماء دى؟؟ دة دى لوحدها فضيحة


بالا بقى اروح أزور تسنيم لانى معرفهاش باى
فوووووووووو

مصر هى أمى said...

اسراء شكرا على تمرير التاج ليا
دكتور ولا مهندس حتى انتى يا اسراء كفاية بابا
وعموما لو روحت فى داهية هدعى على كل المدونيين
ومعلش هاستاذنك انى مش هرد دلوقتى علشان ياسمن كاتبة بوست جامد اوى ولازم اعلق عليه الاول
روحى شوفى البوست بتاع ياسمين

esraa said...

متغيرة شوية:
ربنا يخليكي, بس مش لدرجة عبقريه يعني.

esraa said...

الأباصيرى:
أها شفت الفضايح, يالا بقي ربنا يسامحهم (:

esraa said...

مصر هى أمى:
بس ربنا يخليك ماتدعيش عليا.
مش مشكله حله بعد ماترجع من عند ياسمين, وأنا هروح دلوقتي أشوفها كتبت ايه.

عين ضيقة said...

هو التاج ده عند كل الناس وللا ايه؟
عموما لذيذة اجاباتك
على فكرة احنا كان عندنا قوضة تحت السلم برضه بس كانت للموسيقى
وانا اراهنك ان القوضتين بتوعك كان فيهم عهدة وكان المفروض تستخدموها بس خافوا عليها من البرد
ههههههههه
سلام ياقمر

ody911 said...

إسراء على فكرة إنتى فيكى منى شوية بأعتبار إنى أكبر منك وهيه الصراحة
ومساعدة الناس

كلامك جميل وشخصيتك بانت

جميلة برضوا

تحياتى لأهل بور سعيد

وللسمك المشوى

ههههههههههههههه

وعادى بقة
أودى

esraa said...

عين ضيقة:
التاج فعلا بقي عدوي , وموجود عند الناس كلها
بالنسبه للأوضتين ممكن مين يعلم (:

esraa said...

ody911:
ربنا يخليك.
سلامك وصل, بس انا مش مغرمه بالسمك المشوي, ومتسألنيش بورسعيديه ازاي؟

MAKSOFA said...

بداخلك طفله رقيقه المشاعر وجميله

esraa said...

MAKSOFA:
ربنا يخليكي

tamer said...

ربنا يوفقك اسراء ويحقق ليكى كل ما تتمنى


تحياتى

koukawy said...

ياه بتحكي عن نفسك بسهوله يا اسراء
برافو عليكي

أحمد عيسي said...

اجاباتك لذيذة وصريحة ودمها خفيف جدا علي فكرة

esraa said...

tamer:
ربنا يخليك
ويارب انت كمان تحقق كل اللي بتتمناه

esraa said...

koukawy:
الصراحه أنا حاولت أهرب من التاج ده علي قد ماقدرت, بس مافيش فايده (:
بس هي مش سهله ولا حاجه
مش سهله خالص.

esraa said...

أحمد عيسي:
ربنا يخليك ياحمد

Moody said...

هاهااااااااااااااااااا
و الله انا كنت حاسس انك اخت تسنيم التايهه!

esraa said...

Moody:
أدي احساسك طلع صح ياسيدي

camera_girl said...

ياربى انا قريت التاج ده قبل كده ازاى معلقتش؟؟؟

معلش يا بنتى والله سكر اوى واجاباتك حلوه

esraa said...

camera_girl:
ربنا يخليكي ياحبيبتي, وبعدي كفايه انك تشرفينا (:

MoHaMeD HoSSaM said...

اى الصراحة والطيبة دى كلها يحسدوكى كدة يا بنتى

esraa said...

MoHaMeD HoSSaM:
يحسدوني علي ايه بس؟ مش للدرجه دي يعني (:

copa said...

هههههههههههههههههههههه كمان تاااااااج هههههههههههههه ياعيني هههههههه 3 تاجات كدا امنحيك الوسام الراسمي المتدبس للتاجات زينا ههههه علي فكره حلو حوار فوووووووو ده هههههههههههههه بيفكرني بفيلم عبود علي الحدود ساعت لما كان علي الجبها و هما بليل فاعبود سمع صوت بيقول فو فو فو هههههه المهم دلع اسراء توتا او ساسو علشان انا اعرف بنت برضه اسمها اسراء و بنقولها كدا فاممكن تقولي لنفسيك كدا

esraa said...

copa:
اها شفت ياعيني عليا, 3 تاجات يعني كفايه كده جداااااااا.
ونفسي بجد أعمل بيها فوووووووووو جدا (:, ميرسي علي الأسماء ياسيدي بس أنا مش بدلع نفسي, أصلي مش بندهلها.

 

The Lost Princess © 2008. Design By: SkinCorner