Friday, February 23, 2007

من كوكب تاني


من اسبوعين تقريبا , يوم السبت الساعه 3 الفجر موبيلها رن, وكانت ريهام صاحبتها وردت عليها
ريهام: ازيك ياجميله؟
هي: الحمد لله, انت ايه أخبارك؟
ريهام: في حاجه عايزه أقولك عليها.
هي: أكيد في حاجه وعشان كده اتصلتي دلوقتي ومستنتيش للصبح.
ريهام : أصلها بخصوص (.....) هكلمك عنها.
هي: لأ, احنا اتفقنا علي ايه؟
ريهام: طب اسمعيني بس.
هي: أنا يوم ماديتك ايميلها عشان انت عايزه ايميلات بنات كان ليا شرطين كانو ايه؟
ريهام: اني ماقولهاش اني جايبه ايميلها منك, واني مقوليكيش أي حاجه من أخباراها.
هي : بالظبط برافو عليكي.
ريهام: أصلها في مشكله.
هي : مشكلة ايه؟
وحكت لها ريهام علي المشكله.
هي: ...............
ريهام : انت ساكته ليه؟
هي : ..................
ريهام: انت بتعيطي؟ طب بتعيطي ليه دلوقتي؟ يعني هي تعيطلي علي النت وانت تعيطيلي علي التليفون؟
هي: أصلها صعبت عليا أوي, حرام ان قلبها يتуسر.
ريهام: أنا كنت عارفه انك هتقولي كده, هتحاولي تسعاديها صح؟
هي : أكيد, هشوف هعمل ايه وهكلمك بكره ان شاء الله.
ريهام: أوكي ياحبيبتي, تصبحي علي خير.
هي: وانت من أهله, سلام.

نفسها: انت مش هتدخلي تنامي؟
هي:مش جايلي نوم.
نفسها : انت مانمتيش من امبارح, يعني كده هيبقي بقالك يومين مانمتيش.
هي: طب ايه المشكله؟ لو تفتكري احنا صحينا أكتر من كده قبل كده.
نفسها : أها بس أنا عايزاكي تدخلي تنامي.
هي: اشمعني؟
نفسها: عشان ماتفكريش, اوعي تكوني ناويه تساعديها بجد.
هي : أها , أكيد هساعدها مانت سمعتيني.
نفسها: ماتستاهلش انك تساعديها.
هي: احنا مش بنساعد الناس عشان يستاهلو نساعدهم ولا لأ, احنا بنساعدهم عشان احنا نقدر نساعدهم ولا لأ.
نفسها: طب وهتساعديها ازاي, انت هتكلميه؟
هي: مش عارفه هدور علي حل تاني, رغم اني اعتقد ان مفيش حل غير ده.
نفسها: مش هيحصل, مش هتكلميه.
هي: ايه رايك تدخلي تنامي عشان انت بقالك فتره طويله صاحيه, يالا تصبحي علي خير.

فضلت طول يوم الأحد بتحاول تقنع نفسها انها تساعدها لكن نفسها فضلت مصصمه.
وجه يوم الاتنين.
نفسها: انت بتعملي ايه؟ ماسكه التليفون ليه؟
هي: عشان هكلمه.
نفسها: مش هيحصل.
هي: أوكي خليكي وشوفيني وانا بكلمه.
وطلبت الرقم.
هو: ألو.
هي: أنا عايزه أطلب منك طلب.
هو: اتفضلي.
هي: هو بخصوص (....) بس علي فكره أنا مش بكلمها.
هو: أمال.
هي: مش مشكله أمال المهم هي دلوقتي
وحكيتله الموضوع كله
هي: انت لازم تساعدها.
هو: انت بتعرفي الحاجات دي كلها منين؟
هي: مش مهم منين, المهم انك لازم تساعدها دلوقتي.
هو: لأ أنا المهم عندي أعرف بتعرفي الحاجات دي منين؟
هي: لأ المهم انك تساعدها, كل مالوقت بيعدي الموضوع بيكون أصعب, انت لازم تعمل حاجه.
هو : أنا لازم أعرف انت بتعرفي منين؟
هي: مانا لو قلتلك انت هتقولها.
هو: والله العظيم مش هقولها ومش هتعرف انك كلمتيني.
هي: أنا مابقتش عارفه أصدقك ولا لأ؟
هو: هو أنا كدبت عليكي قبل كده؟
هي: أها كدبت.
هو : لأ, ماحصلش.
هي: لأ حصل.
هو: خلاص ده مش موضعنا.
هي: أها موضعنا دلوقتي انك لازم تساعدها.
هو: هي دي شروطي, أعرف انت عرفتي منين, وأقرر ساعتها.
هي: كده يبقي لازم أنا أفكر, هشوف وأرد عليك.
هو : أوكي.
هي: أوكي, سلام.
وقامت كلمت ريهام.
هي: مصمم انه يعرف انا عرفت منين؟
ريهام: هو ممكن يقولها؟
هي: ماعتقدش ياريهام لأنه حلف.
ريهام: يعني انت متأكده؟
هي: أها, أكيد.
ريهام: بس انت عارفه انه لو قلها, انها ممكن تزعل مني, وانا بجد حبيتها وأتمني اني أساعدها.
هي: أها مانا عارفه, بس هو لازم يعرف عشان يساعدها.
ريهام: خلاص نألفله طريقه.
وحفظيتها ريهام هتقوله ايه.
واتصلت بيه تاني.
هو: ألو.
هي: أنا موافقه.
هو: موافقه علي ايه؟
هي: علي اني أقولك, بس خليك فاكر انك ضغطت عليا, وانك ابتزتني عشان تعرف.
هو: ها , قولي.
وحكيتله اللي ريهام قالتلها عليه, ومش عارفه الموضوع ماكنش مقنع ولا هي اللي مش بتعرف تكدب.
هو: الموضوع ده مش غريب شويه.
هي: هو ده اللي حصل, المهم دلوقتي انت هتعمل ايه؟
هو: مش هعمل حاجه.
هي: يعني ايه؟
هو: يعني هي مطالبتش مساعدتي, ومحكتليش علي حاجه.
هي: مش مشكله, بس انت تعرف دلوقتي, انا قلتلك, المفروض انك تساعدها, اعمل أي حاجه.
هو: أنا مش هعمل حاجه.
هي: حرام عليك, هي بجد تعبانه, انت لازم تساعدها, اسأل أي حد, اعمل أي حاجه.
هو : أنا مش هعمل حاجه, هما مأشركونيش في الموضوع, وكده خلاص وأنا هقفل.
هي: استني عشان خاطري.
هو: نعم.
هي: انت لازم تساعدها بجد, دي قريبتك انت, يعني المفروض انت اللي تكون عايز تساعدها مش أنا.
هو: أنا قلتلك اني مش هعمل حاجه, وده أخر كلام عندي.
هي: طب هتقولها انك عرفت مني.
هو: أنا مش هقولها اني عرفت أصلا.
هي: صحيح انت حلفت, أوكي, باي.
قفلت معاه وفضلت تعيط.
نفسها: مارضاش يساعدها.
هي: أنا مش عارفه هو جاب القسوه دي منين؟
نفسها: وبعدين, هتعملي ايه؟ انت هتسيبيها كده؟ انت لازم تعملي حاجه.
هي : أنا كنت عارفه انها صعبانه عليكي, وانك عايزاني أساعدها, بس انا مش عارفه أعمل ايه, أنا معرفش حد غيره مكن يساعدها.
نفسها: معرفش اتصرفي, لازم تتصرفي.
هي: خلاص أنا هكلمه بكره ان شاء الله, وهقوله الحقيقه , هقوله أنا عرفت منين, وهقوله أي حاجه تانيه هو عايز يعرفها, هقوله اني مستعده أعمل أي حاجه عشان يساعدها, أي حاجه هيقول عليها, أو عايز يعرفها, هقوله عليها, هعمل أي حاجه, المهم انه يساعدها.
الساعه 2 موبيلها بيرن وكانت ريهام
هي: أيوه ياريهام, هو لسه مش موافق, بس أنا هتصرف.
ريهام: أنا أسفه أنا أسفه بجد.
هي: أسفه علي ايه؟
ريهام: انا خلاص مش عايزه أعرف (....) دي, بجد مش عايزه أعرفها.
هي: في ايه يابنتي, أنا مش فاهمه حاجه.
ريهام: هاتي ورقه وقلم.
واديتها أرقام وحروف
ريهام: ده الباس وورد بتاعي, افتحي ايميلي وشوفي اخر ميل جايلي لأنه منها.
هي: أوكي.
ريهام: دلوقتي, أنا مش هقفل هفضل معاكي.
فتحت الميل وقريته.
هي: ................
ريهام: انت ساكته ليه؟
هي: ده حلف ياريهام, حلف.
ريهام: في ناس كتير بتحلف بربنا كدب.
هي: أنا مش مصدقه, وبعدين دي فاكراكي أنا ياريهام, دي فاكراكي كدبتي عليها.
ريهام: هي دي المشكله بس, دي غلطت فيكي, ردي عليها.
هي : لأ مش هرد, الرد مالوش لازمه, وبعدين مستوي كلامها مش عاجبني, وأنا مستوي الحوار اللي مش بيعجبني مش برد عليه.
ريهام: لأ هتردي, لأنك لو مش رديتي أنا هرد وهحطها في دماغي.
هي: لأ علي ايه, هرد أنا أحسن.
وبعتت قالتلها انها مش هي اللي كدابه, وقالتلها انها فاهمه هو بيعمل ليه كده, لكن الغريب انت ليه بتعملي كده, وحاولت تفكرها ان في حاجه اسمها ربنا وانه موجود.
طبعا الايميل ماكنش عاجب ريهام, لكنها قالت ان مفيش حاجه تتبعت غير ده.
ريهام: أنا بجد أسفه.
هي: وانت ذنبك ايه بس, أنا اللي قررت اني أساعدها, أنا عملت ده برغبتي.
ريهام: بس أنا اللي قلتلك , لو كنت التزمت باتفقنا مكنتيش عرفتي, ولا كان ده حصل.
هي: انت كنت عايزه تساعديها وهو ده المهم.
وقفلت مع ريهام, ورفعت عنيها للسماء, وقالت لربنا جمله اتعودت انها تقولهاله في الفترد الأخيره.
تاني يوم ريهام اتصلت بيها.
ريهام: اسكتي مش ردت عليا بايميل تاني.
هي: مش هفتح ايميلك ومش هرد عليه ولا انت هتردي عليه, والكلام في الموضوع ده خلص خلاص, وانتهي.
ريهام : طب في سؤال عايزه أسألك عليه.
هي: اسالي علي اللي انت عايزاه ياسيتي.
ريهام: لو عرفتي انها في مشكله تانيه, بعد اللي قالتهولك ده, هتساعديها؟
هي: مش انت عارفه الاجابه؟
ريهام: خمنتها, بس عايزه أسمعها منك.
هي ضحكت وقالت: أها هساعدها.
ريهام ضحكت وقالت: انت عارفه انك بجد من كوكب تاني.
هي: كنت الأول بعد الناس اللي بتقولي كده بس دلوقتي خلاص من كترهم معنتش بعدهم.
قالتي ها وانت ايه رأيك؟
وكان ردي اني رفعت راسي للسماء, وبصيت لربنا نفس البصه وقلتله نفس الجمله.

92 comments:

Mony The Angel said...

msh masmo7lena ne3raf al gomla de walla eh ;)

بنى أدم مع وقف التنفيذ said...

فيه جملة بتقول متكنيش طيب وأمين عشان الناس
تكون طيب و أمين عشان انت تستاهل تكون كدة

مصر هى أمى said...

اسراء

بوست حلو وفيه معانى كتير حلوة بس هوا طويل اوى

عموما اللى بيساعد مبيستناش شكر من حد هوا بياخد مكافئته من ربنا علشان هوا لو وقع فى مشكلة ربنا هوا اللى هيساعده

على فكرة مش لازم تثقى فى اى حد بسهولة يعنى من كلامك الولد ده سبب مشكلة كبيرة لصاحبتك يعنى الواحد ميثقش فيه اوى

اسراء انتى فعلا انسانة عندها مشاعر حلوة اوى
ربنا يباركلك

الكلام نوعان :كلام فارغ وكلام مليان كلام فارغ said...

هيه القاعده بتقول ان من تدخل فيما لا يعنيه سمع مالا يرضيه
وفيه قاعده تانيه بتقول اننا لازم نساعد اللى محتاج مساعده فعلا بس ده لو هوه عايزك تساعديه لان كده ماينفعش خاااااالص
شوفي هيه صاحبتك كويس انها عايزه تساعد اللى محتاج مساعده بس البنت التانيه دي اصلا ماتستاهلش المساعده لانها اول حاجه ماقدرتش ان فيه حد عايز يساعدها وبعدين هيه غلطانه انها بعتت الميل ده من اصله لانها لو مكانتش عايزه انك تساعديها او التانيه مكانتش اصلا عيطت لكم في التليفون

بس ارجه واقوووووول من تدخل فيما لا يعنيه سمع ما لا يرضيه

بوستاتك حلوه اوى والجميل فيها انها من الواقع

مبرمج حر said...

تصفيق حااااااااااد

سمعتى الجملة دى قبل كده اللى كان بيقولها لمعى

"أنا باصيت الكورة ليا"

وهو ده اللى هى عملته وعشان كده هى
من كوكب تانى المواصلات بينه وبين كوكبنا
مقطوعة .. العيب مش فى كوكبها على أد
ما العيب فى كوكبنا اللى الرحمة فيه ممنوعة
وعشان كده هى تستحق جايزة

أقولك على حاجة يا أسراء أنا ليا عادة
أثيرة فى أنى أطلق أسم أوصف بيه
المدون اللى متابعه .. وأحط الأسم فى
اللينكات اللى عندى فى المدونة .. عملت
كده مع ناس كتير ولسه فيه ناس أكتر عندى
ماعملتش معاهم كده .. والدور عليك أنتى المرة دى

فى صورة مكونها عنك كل مرة بتكبتى تدوينة جديدة
بحاول أنى أتحقق منها لأنى لسه متابعك من قُريب
وأنتى ونصيبك بقى لأنك كل ما تكتبى بتلقائية أكتر
كل ما هتأكد بسرعة

وطبعا مش هقولك أيه الأسم اللى هختاره إلا لما أتأكد منه
ولا هقولك الدور على مين بعدك

تسـنيم said...

أمووووووت وأعرف أبطالك الحقيقين وحصل إييه بالظبط ( وش بيفكر ومركز أووووي).

Ma-3lina said...

long conversation . i got lost in the part u will talking to urself

i figured the whole situation nd i think u should help her but u shouldnot be in the pic y3ni help min be3eed

esraa said...

Mony The Angel:
انت عارفه بقي ياموني دي أسرار بنها وبين ربنا (:

esraa said...

بنى أدم مع وقف التنفيذ:
جمله أكتر من رائعه.
وأعتقد انك معايا انها كان لازم تساعدها, مش عشان هي تستاهل المساعده, ولكن عشان هي تقدر تشاعدها.

esraa said...

مصر هى أمى:
هو فعلا طويل, بس أنا كده اختصرته علي قد ماقدرت (:
هي فعلا بتعمل كده عشان ربنا بس.
بالنسبه ليه, تقدر تقول انها نفسها ترجع تثق فيه تاني, وعشان كده صدقت لما قال انه مش هيقول, كان نفسها انه يوفي المره دي بجد, عشان يرجع عندها زي ماكان, بس هو مش وحش يعني, هي عارفه هو ليه بيعمل كده.
وربنا يبارك فيك ويخليك ويعزك (:

esraa said...

الكلام نوعان :كلام فارغ وكلام مليان كلام فارغ:
بصي ياجميله, مش لازم الناس تقولنا ساعدوني عشان نساعدهم, لو احنا نقدر نساعدهم يبقي لازم نعمل كده حتي لو هما مطلبوش ده, كان في رجل مؤمن مات, ولما مات قبره اتملي عليه نار, ولما فاق وسأل الملايكه عن السبب, قالوله لأنك مريت بمظلوم ومانصرتوش, ماقلوش المظلوم ده طلب النصر ولا لأ, فاهماني. وبعدين هي طلبت من ريهام انها تفكرلها في حل, وريهام طبعا لجأت لصحبتي.

الوردة السودة said...

بصى يااسراء
انا حسة ان العمل مش مكتمل
وانتى مطولة فى حالات ومقصرة فى حالات
ولاغية حالات
يعنى انتى منتى عايزة توصلى ان فى ناس بتكذب
ونا بتساعد بدون مقابل
بس مدتيش النقطتين دول حقهم
دورتى حوالين مشكلة
انتى مش مواضحاها اساسا
لو حاولتى تكتبيه تانى
افتكر هيكون احسن
بالنسبة للفكرة
حلوة
وتشد القارىء

عايزاكى المرة الجاية تبذلى مجهود اكتر من كدة

انا طبعا مش حاجة كبيرة عشان احكم على عمل
بس انا حسيت كدة
تحياتى ياقمر

esraa said...

مبرمج حر:
الصراحه لأ ماعرفش الجمله دي (:
بس هي يعني الموصلات هتفضل مقطوعه بين هناك وهنا كتير, هي اتبسطت جدا من كلامك وبتشكرك عليه كتيييييييير.
يارب تبقي الصوره اللي بتكونها عني حلوه (:, وأنا مش هسألك عن الاسم هستني لما انت تقولي عليه لوحدك, وبما انك بدأت التعليق بتصفيق حاد, اسمحلي اني انهيه برفع القبعه (:

esraa said...

تسـنيم:
بعد الشر عنك ياتوته.
انت ماتعرفيش ريهام لأنها من كايرو مش من هنا, أما بقي هو وهي والبنت صاحبة المشكله لو كان ينفع أقول أسمائهم كنت كتبتها (:
أفدتك مش كده؟

esraa said...

Ma-3lina:
معلش هي طويله شويه (:
هي حاولت انها تساعد من بعيد, والمفروض ان ده اللي كان يحصل لو مكنش هو قال انها كلمته.

esraa said...

الوردة السودة:
هو أنا كان قصدي اني أحكي الموقف, والحاجات اللي مش قلتها الحاجات اللي مش تنفع انها تتقال بس, لكن ان شاء الله أخد ملاحظاتك في الاعتبار.

عين ضيقة said...

الملاك ليه مواصفات تانية أكيد لسة ماعرفتيهاش

عموما الموضوع كويس

koukawy said...

انتي فعلا لخصتي الكلام في جملة 00
اننا بنساعد الناس عشان ربنا مش عشان هما يستحقوا نساعدهم و لا لأ

moodysalihamidzic said...

انا مخنوق منه عشان ما برش بقسمه
وبرده لازم تقفوا جنبها وتساعدوها

كائن العزلة الكئيب said...

معرفتش أكمل البوست قريت نصه تقريبا بس حاسيت أنى بقرأ نص تفريغ لشريط تم تحريزه كدليل من قبل هيئة لأمنية و ده تعبنى أنا آسف

مبرمج حر said...

I tagged you :)))))))))))))))))))

esraa said...

عين ضيقة:
ربنا يخليكي.
بس أنا عارفه مواصفات الملاك كويس جدا , لأن منة أختي كانت ملاك في الأول ولما ماقدرتش تعيش من غيرنا اتنزلت وبقت من البشر (:

esraa said...

koukawy:
احنا أكيد بنعمل كل حاجه عشان ربنا , مش عشان حد تاني.

esraa said...

moodysalihamidzic:
أكيد هو عنده مبرراته حتي لو كنا مانعرفهاش, أما بالنسبه لمسعدتها المشكله اننا مانعرفش حد غيره ممكن يساعدها ):

esraa said...

كائن العزلة الكئيب:
هههه
أسف علي ايه بس, ولا يهمك, معلش أنا اللي تعبتك, بس ماقولتليش أنفع رئيس نيابه؟ (:

esraa said...

مبرمج حر:
ماشي ياحمد ربنا يسامحك, هو أصلا كان أحمد فؤاد مررهولي, وعشان خاطركم هرد عليه البوست الجاي ان شاء الله.

Sokomonoce said...

..........................
ربنا يجعلك ديما نصرة لكل محتاج وسند لكل تعبان ويطعمك ما يحوجك

اسف لكن هى جت كدة
شعور حلو جدا لما الانسان بيقدر يساعد اللى يعرف انهم فى ازمة لكن لازم برضة زى بيساعد الناس فى مشاكلهم هو كمان لازم يحل مشكلة الارق اللى عندة لانى حسيت معاك انك ما نمتيش بقالك ٣ ايام

انت جميلة قوى انك بتعرف تسامحى وتساعدى المحتاجلك

bastokka said...

يا سلام على القلب الطيب

hend said...

بوست حلو اوى وطويل
وحلوة فكرة المساعدة

esraa said...

Sokomonoce:
ربنا يخليك, دعوات حلوه (:
مساعدة الناس حاجه حلوه أوي, حلوه بجد.
ربنا يخليك ويكرمك ويعزك (:

esraa said...

bastokka:
ربنا يخليكي(:

esraa said...

hend:
ربنا يخليكي.
هو فعلا طويل (:

Sharm said...

اسراء

انا قريت البوست كله

و رغم كده مقدرتش اوصل لفكرة المشكلة

انا حاسس انى تعبان اوي النهاردة فعلا و مش قادر استوعب اي حاجة

ibn nasser- ابن ناصر said...

والله يا لوست برينسيس قصه جميله قوي بس نفسي أسألك سؤال هل في ناس كده أقولك انا قله قليله جدا جدا,,ولا ايه رأيك؟؟

esraa said...

Sharm:
سلامتك بجد (:
وليه قرأته وانت تعبان, ده طويل جدا, كده هتخليني أحس بالذنب من نحيتك.

esraa said...

ibn nasser- ابن ناصر:
ربنا يخليك, وزيارتك نورتني.
بس أها في ناس كده, واعتقدت انهم مش قليلين أوي كده يعني (:

متغيرة شوية said...

الموضوع شدني قوي مع انه مفيهوش أي تفاصيل محددة
بس انا عايزة أقولك حاجة ، زي ما عرفتي تتسامحي مع البنت دي وتساعديها رغم كلامها الوحش ، لازم تعرفي برضه ان الانسان لما بيكون مجروح من حاجة بيبقى زي الأسد الجريح ، ممكن يهجم على أي حد يلاقيه قدامه من غير ما يفكر
ومش معنى كده اها انسانة سيئة ، لكن هي بس قليلة الحيلة ، وتستاهل الاشفاق مش الغضب

No Fear said...

السلام عليكم
بصي أنا مش فاهم قوي بس مستمتع قوي قوي قوي يارب تكون دي قصة مش واقع
و لو واقع بردوا جميلة قوي قوي قوي
و الله فعلا يارب تكون من الواقع
سلام

esraa said...

متغيرة شوية:
هي فعلا تستاهل الاشفاق, عمر الانسان أقصر بكتير من انه يضيعه في الغضب أو السخط علي الناس, والتمس لأخيك سبعين عذرا (:

esraa said...

No Fear:
وعليكم السلام ورحمة الله وبركانه
هي قعلا واقعيه ومش قصه خياليه (:
وسعيده باستمتاعك .

أماني said...

الله يا إسراء
حلوه أوىىىىىىىى...و مشوقه أوى أوى...أنا حاسه إن إنت و أصحابك حياتكم كلها مغامرات...ربنا يوفقك
صاحبتك دي أنا حبتها أوىىىى...لأنها طيبه أوىىىى...و نقيه أوىىىى
كنت دايما بقول لنفسي لما "لا يلدغ المؤمن من جحر مرتين" إشمعنى أنا بتلدغ من نفس الجحر 100 مرة و برضه ممكن أرجعله تاني

esraa said...

أماني:
ربنا يخليكي يارفعه معنوياتي (:
أها ايه رايك في المغامرات دي, كلها كأبه, مفيش مغامره تنتهي نهايه سعيده مره؟ مره واحده بس من نفسي.
صاحبتي بتسلم عليكي, وبتقولك ان هي كمان حبتك جداااااااااااااا.
ويالا ياسيتي ابسطي, مش انت بس اللي بتقعي في نفس الغلطه مرتين (:

18goosebumps said...

هى دي اصول الجدعنه

ده الي فهمته من البوست

تحياتى

:)

esraa said...

18goosebumps:
ربنا يخليكي ياجميله (:

sabrina said...

hi esraa
هتساعديها تاني أزاي!!!!!!!!!
هي مش هتقبل المساعده ديه
لأن بقي في سوء نيه
فمهما حاولتي هينقلب عليكي
قولي لحد هي بتثق فيه يساعدها وخليكي أنت بعيدة

الدبور said...

انا رايي تبعدي عن الموضوع وتشوفي طرف تاني يساعد افضل
بس ملاحظه سريعه البوست طويل اوي و بصراحه انا توهت فيه كذا منرة علشان اوصل للفكرة الرئيسيه و الهدف منه
تحياتي
الدبور

إبراهيم said...

ربما يحتاج البعض مساعداتنا..ولكن من منهم يستحقها

أنا صديق جديد..يارب مكونش تقيل

الموضوع ده عجيب..كويس إن حد يفكر يساعد الناس..بس فيه غلط..دخلت حد تالت في الموضوع شايفة إنه ممكن يساعد..كده هي ضرت صاحب المشكلة..حتى لو بسلامة نية..الدب قتل صاحبه بسلامة نيه..عارفة قصة الدب؟

اللينك ده عنوان بوست يهمني إنك تزوريه وتديني رأيك..يهمني رأي البنات على الأخص..لأنه موضوع يهم البنات

http://hearttrainer.blogspot.com/2007/02/blog-post_26.html

اتمنى زيارة مشرفة قريباً واتمنى ان نصير أصدقاء

buffy said...

gamel awy elpost dah

safa7_karmooz said...

مش فاهم اى حاجه ّّّّّ!!!!!!!!!!!!

دوللي said...

انا لسه ماقرأتش كل المواضيع بس بجد مدونه جميله جدا و المواضيع بتدخل علي القلب
تحياتي

كراكيب عادل said...

اسراء

هو فية اية يعني ده مسلسل ولا فيلم ولا اية وايه قالت وقلت مش فاهم بجد انتوا بتتكلموا في اية اصلا يمكن علشان اخر اليوم عندي بيكون خلاص درجه الاستيعاب صفر

عموما تعالي اضحكي شوية عندي

esraa said...

sabrina:
هي ريهام لما سألتها, كانت بتسأل بشكل عام, يعني كانت عايزه تعرف هي عندها الاستعداد لمساعدتها تاني ولا لأ, والمفروض انها ماكنتش تظهر المره اللي فاتت, لنها لجأت لحد هي بتثق فيه لأنه قريبها, بس الموضوع كله باظ في الأخر ):

esraa said...

الدبور:
احنا والله كان المفروض اننا مش نبان في الموضوع أصلا, المفروض ان هو قريبها وهو اللي كان يتصرف من غير مايقول هو عرف منين.
معلش انه كان طويل بس أنا كده اختصرته علي قد ماقدرت (:

esraa said...

إبراهيم:
زي ماقلت احنا مش بنساعد الناس عشان هم يستحقو المساعده ولا لأ, لأ احنا بنساعدهم عشان ربنا (:
بص ياسيدي هي مادخلتش حد غريب , هي قالت لواحد قريب البنت دي, لأنه الوحيد اللي يقدر يساعدها, لأن اللي يساعدها لازم يكون من جوه عيلتها, واحنا مانعرفش حد غيره .
ان شاء الله هدخل علي موضوع اللينك (:

logarithms said...

بوست جميل جدا
وفعلا فيه معاني كتير

esraa said...

buffy:
انت أجمل

esraa said...

safa7_karmooz:
(:
معلش اقراها تاني , ممكن توصل (:

esraa said...

دوللي:
ربنا يخليكي, ويسعدني ان المدونه عجبتك (:
نورتينا.

Moody said...

للمره التانيه بقا البوست و مش عارف هو قصه و لا فضفضه او ايه بالظبط
انا متأنسر
مش عارف اقول حاجه
بس الناس طبايعهم بتكون غريبه و صادمه, صادمه فوق الاحتمال
مال
مال
مال
مال
مال

esraa said...

كراكيب عادل:
لأ هي قصه حقيقيه, وحدثت بالفعل (:
وبعيدن ينفع كده تجيلي اخر اليوم بعد ماتبقي فصلت؟
أنا رايحه عندك اهوه (:

esraa said...

logarithms:
ربنا يخليك, ويسعدني انه عجبك .

esraa said...

Moody:
بص يامودي, هو فعلا كان فضفضه, لأنه حصل حقيقي, من 3 أسابيع كده, بس ماعرفتش أحكيه ساعتها, لأني كنت زي مانت قلت مصدومه, مصدومه أوي كمان.
يعني مش عارفه احنا ليه بنعمل مع بعض كده, رغم ان حياتنا أقصر بكتير من اننا نضيعها في حاجات زي دي, كفايه عليك كده بقي عشان انت هتخليني أعيط , سلام

واحـــد مـــــن الـنـــاس said...

هوا الانسان كده
زي البني ادم بالظبط
يعيش مهما يعيش
ولما يموت
يتوفى
:)

pegasuselmasry said...

ربنا يحفظك و تساعدى الناس كمان و كمان

لان المعادن الغاليةو الكريمة اصبحت نادرة هذه الايام

المعدن النادر و الغالى يظهر بريقه من الاول و يظل يحافظ على بريقه كلما قدم الخير و المساعدة دون ان ينتظر المقابل فحافظى على معدنك البراق و امسحى عليه بأمانك و حبك للناس جميعا

esraa said...

واحـــد مـــــن الـنـــاس:
(:
ايه ده, ماشاء الله , جبت المختصر المفيد (:
بس دي أول مره أعرف ان الانسان لما بيموت بيتوفي (:

esraa said...

pegasuselmasry:
ربنا يخليك يكرمك, كلامك بجد جميل.

fares said...

جميل جدا اوي وفيه معاني كتير حلوه ياريت تبقي تشرفيني علي مدونتي

safa7_karmooz said...

عفون....فى الاول لم استطع الوصول الى معنى معين متقارب...ولكن عندما دققت النظر...ممممم...ربما وصل الى

انها تتكلم عن معنى الصداقه....والغش ايضا...انيعدك احدا بشىء...ولا ينفذه...احتيال مثلا ...خداع

ولكن فى النهاية الفكرة الرئيسية التى تبلورت امامى هى معنى الصداقه الحقيقية والتضحية

صح اللى قولته ولا تؤ؟؟

zordeak said...

على فكرة انا جيت هنا قبل كده ومعرفتش اعلق اقول ايه


ودلوقتى برضه مش عارف اعلق اقول اييه

هيا من كوكب تانى فعلا


بجد صعبت عليا اوى

واحترمتها اوى اوى
اوى

Anonymous said...

أنا بس كنت عايزه أقول اني أسفه, لأني بجد غلطت في حق ناس أنا بحبهم, حتي لو كان من غير ماقصد, لازم أقول أسفه.
ريهام.

esraa said...

fares:
ربنا يكرمك
أنا رايحه المدونه أهوه (: والشرف ليا انا.

esraa said...

safa7_karmooz:
لألألأ, كده مش ممكن(:
يعني انت ومودي قرأتوا البوست مرتين, يبقي أنا لازم أجيب لكم هدايا, ده في ناس مقدرتش تكمل المره الأولي (:
طبعا اللي انت وصلتله صح, ده حتي لو مكنش صح, يبقي صح عشانك قرأته مرتين (:

esraa said...

zordeak:
قول أي حاجه ياسيدي (:
ربنا يخليك ياحمد, هي كمان بتقولك انها بتحترمك جدا جدا.

esraa said...

ريهام:
أسفه علي ايه يابنتي.
مش هي قالتلك, انها عملت كده عشان هي عايزه تساعدها, لكن انت مالكيش ذنب, بطلي عبط بقي (:

fares said...

البوست جميل علي فكره ياريت تبقي تشرفيني وتقري البوست الجديد بتاعي ربنا يحفظك

Sharm said...

اسراء

فكرة البوست حلوة

مش دايما بنلاقي اللي يقف جنبنا وقت الشدة و الجدعنة مش حاجة وليدة اللحظة و لا هي صفة مكتوبة في البطاقة دي مواقف و تصرفات

احييكي على البوست ده عشان المرة اللى فاتت كنت تعبان و مفهمتش حاجة

سلاموز

esraa said...

fares :
بجد بوستاتك كلها حلوه يافارس, ربنا يحفظك, طبعا انت عارف من مين (:

esraa said...

Sharm:
طبعا انت هتاخد جايزه زي مودي وسفاح كارموز, لأنك قرأته مرتين انت كمان.
تحيتك وصلت, وسلامتك من المره اللي فاتت(:

elkamhawi said...

ربنا يكون فى عونك
دى حوارات توجع الدماغ
كبرى دماغك احسن

وبعد اذنك رقم موبايل ريهام؟؟
ههههههههههه
بهرج طبعاً

Memo said...

men dol
hah hah men dol hah
we asmihom aih
we 3nwnhom we 3mlo m3aha aih
regards

نضـــال said...

جميل ان الواحد يكون عنده القدرة على التسامح والرغبة في مساعدة الاخرين دايما
:)
بس كان في حاجات كتير قوي نفسى اعرفها في البوست
رغم انه طويل الا انه فيه تفاصيل كتيرة كنا محتاجين نعرفها :D

esraa said...

elkamhawi:
طب ولما احنا كلنا نكبر دماغنا, مين اللي يساعدهم؟
رقم ريهام 3 أصفار صفرين صفر (:

esraa said...

Memo:
بصي ياسيتي, دول يبقو ريهام, وهو وهي والبنت اللي كانت هي وريهام عايزين يساعدوها (:

esraa said...

نضـــال:
أكيد التسامح ومساعدة الأخرين شئ كويس.
شوفي ايه اللي كنت عايزه تعرفيه وأنا أقولهولك علي طووووووووووول (:

الملاح التائه said...

حدوته طويله عريضه بتقول بس كلمتين صحيح كلمتين صح وكويسين لا وكمان كلمتين راقيين بس كان ممكن برضه ببساطه يتقالوا في كلمتين
كلمتين وبس
زي برنامج فؤاد المهندس كده
ربنا معاكى يا سمو الأميرة

esraa said...

نضـــال:
هما فعلا كان ممكن يتقالو في كلمتين, بس أنا كنت عايزه أحكي الموقف كمان(:

MoHaMeD HoSSaM said...

والله انا من اول البوست لاخره وانا مستنى ان يحصل حاجة او افهم الهدف بس لحد ما وصلت للنهاية اكتشتفت انك كتبتى كل دا عشان تقولى
اولاً:انها من كوكب اخر
ثانياً:اننا لازم نساعد الى نقدر عليه
ثالثاً:انه ندل
رابعاً:اننا لما منعرفش نقول اى حاجة نرغى وخلا
سلام بس الى عجبنى بجد طريقة كتابتك للاحداث
http://waghtnazr.blogspot.com

esraa said...

MoHaMeD HoSSaM:
(((((((((((:
أولا: انت ايه رأيك, يعني هي من كوكب تاني ولا لأ؟
ثانيا: احنا فعلا لازم نساعد أي حد نقدر نساعده.
ثالثا: أنا مقولتش انه ندل دي خالص, هو مش هنا عشان يدافع عن نفسه, وأكيد هو عنده وجهة نظر وسبب عشان يعمل كده.
رابعا: يعني أنا كتبت البوست ده رغي وخلاص (:
يسعدني ان طريقة كتابتي للأحداث عجبتك.

camera_girl said...

جميله ..بس طويله كان ممكن تختصر عالشان الناس متوهش وتتعب منك ..تحياتى يا جميله

esraa said...

camera_girl:
ربنا يخليكي, بس والله ياحبيبتي أنا كده مختصراها جداااااا(:

شهيدة said...

اسراء

على فكرة انا بحبك عشان أختي اسمها اسراء

المهم أنا بصراحة ما قريتش البوست كلو عشان هو طويل

بس اللي فهمتو انك مبتلاة بحب مساعدة الناس

يعني الناس اللي زيك عادة بتتعب بس بترتاح أوي بعدين

وكويس أوي ان الناس بتلجألك عشان تساعديها ده شيء جميل جدا

آجرك الله يا ايسو

ملحزظة: ده اسم دلع أختي كمان، زيك بالضبط، اصلي قريت البوست اللي رديتي فيه على التاج ههههه

تحياتي

esraa said...

شهيدة:
أها انا عارفه انه طويل, ده انا حتي ناويه أجيب هدايا للناس اللي قرأوه مرتين(:
كل واحد بيعامل ربنا.
شئ يسعدني ويشرفني ان اسمي علي اسم اختك(:
ونورتيني بجد (:

 

The Lost Princess © 2008. Design By: SkinCorner