Wednesday, January 10, 2007

كلمه ماقولتهاش


أنا أسف دي كلمه

كلمه ماقولتهاش

أه لو كنت قولتها

كان اليوم ده ما جاش

مش كل الناس بتعرف تقول أسف, في ناس كتير مش بتعرف , أو بيكابرو وبيشوفو انهم ماينفعوش يعتذرو.


أنا ماكنتش بعرف أقول أنا أسفه, ولأني أصلا من برج الثور يعني عنديه حبتين فمش ممكن أبدا اني اعترف اني غلطانه , لكني لما كبرت عرفت ان مش عيب اني أعتذر, لأ ده انا اتعلمت اني لما أغلط لازم أقول أنا أسفه لأن ده أقل حق للانسان اللي أنا غلطت فيه.


لما سمعت الأغنيه دي, فكرت.. في أد ايه ناس بيخسرو ناس مهمين في حياتهم عشان مقالوش أسفين وفي أد ايه من الناس دي ناس مش ممكن نرجعها تاني, كمان في ناس كتير بتكون مستنيه اعتذار انسان عزيز عليها غلط في حقها عشان تسامحه, لكنه مش بيعتذر ومش بيقول أسف.


كام مره اتحطيت في موقف انك كان لازم تقول أسف وماقولتش؟ ولو الزمن رجع هتقول ولا لأ؟ وكام مره استنيت كلمة أسف من شخص معين ومجاش وماقلهاش, وده أثر في العلاقه بينكم ومارجعتش زي الأول؟

86 comments:

Mony The Angel said...

i'm the first comment :)
i'm totally with u ya esraa..
ra3'm eny melnaas ally mabte3rafsh t3abbar 3an masha3erha, bas bat2aked eny lama aza3al 7ad aw a3'lat fe 7a2o asal7o b2ay shakl..
w mo2a7'aran b2eet bat2assef kaman..
bas ana shaifa en ally ye3'lat y2ool ana 36'let w bgad batshal awe melnaas ally belnesbalhom al e3tzaar da azma..
"ana mat2asefsh l7ad"
tab leeh ya3ny, ka2en al asaf haina2ashom, maie3rafoosh eno bgad bizawedhom fe nazar ally bi3tazroolo..
w kfaya kda b2a :)

Human said...

الاسف مش بس حق اللى بغلط فيه .. لا ده اقل حاجة اقدر اقولها
افتكر واحدة صحبتى مغلطيتش فيا بس عملت موقف مش حلو معاياوتجاهلتنى تماماً ومش فى بالها إنى زعلت .. ومع إنى اتصلت بيها وكلمتها ساعتها عشان اباركلها على الخطوبة ،ومن ساعتها مش قادرة اكلمها تانى لانها مش بس معتذرتش ، لا دى فاكرة الموضوع أنه عادى وإنه مزعلنيش وده اللى زعلنى أكتر وأكتر ، ولحد دلوقتى مش عارفة ارجع معاها زى الاول وحسيت إنى مش فارقة معاها اصلا
الحمد لله على كل حال
البوست جميل اوى والمدونة كلها هايلة
سلام :)

esraa said...

موني:
أحلي كلمه قولتيها ان الاعتذار مش بينقصهم بالعكش ده بيزودهم, ودي فعلا حقيقه.
--------------
Human
أحيانا كتير ان الانسان اللي بنعزه لما ماياخدش باله انه غلط فينا ده بيجرحنا أكتر من عدم اعتذاره, أتمني ان صاحبتك تاخد بالها من ده, وتصحي في يوم تلاقيها بتكلمك عشان تقلك أنا أسفه او حقك عليا
ونورتينا ياجميل

أخف دم said...

ازيك يا إسراء..أنا ما بتكسفش إنى أقول أنا غلطان بس أنا بحاول إنى ماوصلشى اساسا لمرحلة إنى أضطر أقولها..عايش الحياة بقلب مفتوح _مش مرض بعيد الشر_ إنما بحاول أقدر ظروف الناس عشان الناس غصبن عنها تقدر ظروفى ,, بس لو اضطريت أقولها أكيد هاقولها..

elkamhawi said...

مبحبش اقولها بس بعمل حاجات معناها كدة
يعنى مثلاً غلط فيكى وانتى طبعاً زعلانة
فبدل ما انا اقولكاسف مثلا اجيبلك بوكية ورد كدة يعنى فى مختلف الحالات

esraa said...

أخف دم:
الحمدلله, انت عامل ايه؟
طبعا بعد الشر عنك من الأمراض, وبجد انا مبسوطه ان في ناس زيك عايش الحياه بقلب مفتوح ودي بقت حاجه نادره شويه الأيام دي,وجميل انك تكون بتقدر ظروف الناس وأكيد هما كمان هيقدرو ظروفك لأن اللي بنعمله النهارده هو اللي بيتعمل فينا بكره
ونورت المدونه.

esraa said...

elkamhawi
بوكيه الورد طبعا يوفي بالغرض, المهم اننا نعتذر عن أخطأنا مش مهم الطريقه
ونورتنا.

تسـنيم said...

بصي يا روئة كلمة أسف بتفرق كتير مع كل إنسان إحنا غلطنا في حقه وساعات كتير بيبقى مستنيها من اللي ظلمه وساعات بتلم الجرح وبتمسح ألالام، بس كلمة أسف مبتعملش حاجة ولا تفرق لما تقوليها لنفسك بعد ما تتسببي ليها في جرح أو تغلطي فيها عن طريق حسابات حسبتيها غلط، لو حد يستحق مني كلمة أسف فهيا نفسي لكن للأسف مش هتقبل الإعتذار وأسفي مش هيصلح حاجة :(

esraa said...

تسنيم:
نفسك أكيد هتسامحك لأنك أكيد ماكانش قصدك تجرحيها, هي بس ممكن تكون زعلانه منك شويه عشان مكنتش تتخيل انك تزعليها, انت عارفه اننا بنزعل لما حد بنحبه يزعلنا حتي لو كان مايقصدش, لكن لما بيصالحنا بنتصالح علي طول. (:

crazyrama said...

يمكن زمان كنت زيك بعتبر كلمة اسفة دية ضعف ,, انما قد اية حسيت انها قوة عظيمة .. لما يكون فى ايديكى انك تعتذرى وتمحى خطأ انتى ارتكبتية ومن نفسك .. فيالها من قوة عظيمة

esraa said...

crazyrama :
أحيكي علي اكتشافك الجديد , وهو فعلا قوه عظيمه وياريت نعرف نستخدمها,
ونورتينا ياجميله.

أحـمد عـيسي said...

بصراحة عندك حق..كتير بيغلطو فيك وبتستني منهم كلمة اعتذار لكن مش بتلاقيها..بنزعل قوي ان الناس بقت وحشة وتغلط ومش بتعتذر..واول منغلط في حد..مستحيل مستحيل نعتذر لو الدنيا اتقلبت..المشكلة اللي احنا بنرضاه لغيرنا مش بنرضاه لينا والعكس ساعات..وهي دي ازدواجية التفكير والفصام اللي المجتمع بقي عايش فيه
دورت علي بوكيه ورد احطه مع دعوتي ليكي لزيارة مدونتي بس ملقتش..ياتري ممكن تزوريني من غير ورد؟

Memo said...

صراحه في ناس كتير لو كانت اعتذرت عن حجات كانت الدنيا اتغيرت و العند بيولد الكفر زي ما بيقولو مش بس كده الي بيحصل ام في مواقف الاسف لوحده عمره ما بيكون كفايه و مهما اعتذرت متعرفش تدي الي قدامك حقه

hamy said...

الاعتذر بيكبر الانسان .. الانسان اللى بيعتذر بيكون انسان محترم

بين الأمل و اليأس said...

ياه اسف دي عملة زي المطهر للجروح
ياه انا بجد حسيت بالكلام المكتوب اوي لان اكيد كلنا مرينا بيه
انا يمكن بكون عارف امته اقول اسف وامته مقلهاش وفي مره اتاخرت على مقلتها بس كان خلاص كل شيء اتكسر وطبيعي مفيش حاجه بترجع زي زمان اكيد بيفضل اثر للشرخ موجود
وعلى فكرة برج الثور فعلا عنيد انا عندي اختي الصغيره كدا وبتعب اوي معاها لما بتعمل حاجه غلط بس بتطر في الاخر اننا اصالحها ومستناش اسف منها رغم اننا من جوايا بكون تعبان
بس بجد فعلا
عرفت ان مش عيب اني أعتذر, لأ ده انا اتعلمت اني لما أغلط لازم أقول أنا أسفه لأن ده أقل حق للانسان اللي أنا غلطت فيه
ام الموقف اللي تعرضتله كان مع اعز صديق ليه وغلط في حقي اوي وطبعا انا كنت خدت القرار في حين عرفت بعدين انه منتظر اننا اللي اعتذر ولما عرفت علطول رحتله ومتتخيليش كان عامل ازاي ومن يومها استحاله انسى رسمة وجه والضحكة والفرحه في عنيه وعشان كدا
اناهاقول اسف
وربنا مايجيب زعل
والله ماقصد اطول عليكي بس موضوع حاساس ومكتوب باسلوب يصحي اللي جوانا
احييكي على هذا الاسلوب والموضوع اللي فوق الوصف
وربنا يسترها

esraa said...

أحـمد عـيسي:
صح فعلا في ناس كتير مش بترضي لنفسها اللي بترضاه لغيرها وعشان كده أنا دايما بنادي ان كل واحد يحط نفسه في مكان غيره الأول.
البوكيه وصل(: وحتي لو منغير طبعا هزورها.

esraa said...

Memo:
فعلا لو كل واحد عمل حاجه غلط اعتذر عنها كانت الدنيا كلها اتغيرت مش حاجات كتير بس, وصحيح مش كل حاجه تنفع تداوي بالاعتذار لكن الاعتذار بيكون بداية التداوي.
ونورتينا ياجميل.

esraa said...

hamy:
فعلا الانسان اللي بيعتذر بيكون انسان محترم وبيكبر كتير في عين اللي قدامه

esraa said...

بين الأمل و اليأس:
طول براحتك ياباشا, وان شاء الله تبقي أمل علي طول ومافيش يأس خالص, وخلي بالك من أختك بتاعة برج الثور لازم ندافع عن بعض بقي (: وفعلا الأسف لما بيتأخر عن ميعاده واللي قدامنا يكون زهق من الانتظار مفعوله بيروح لكن لازم نقدر انه برضه اعتذر.

tamer said...

الاعتراف بالحق فضيلة

ومش عيب الانسان يغلط ويقول اسف العيب العكس


تحياتى

esraa said...

tamer:
فعلا العيب اننا نغلط ومنعترفش بده
ووجودك نورنا

mansourawy said...

كلمة اسف
هى كلمة ليها مرادفات فى حياتنا كتير
منها انا غلطان و معلشى و حقك عليا و سامحنى و....كلام تانى كتير ممكن يتقال

الكلمة او مردفاتها فى حد ذاته كلام بيتقال باللسان
بس فعلا كلام تاثير كالدواء ع الجرح المكلوم

الكلمات لا تعيب قائلها ولكن تحافظ على حب سامعها خصوصا وان كان قائلها اخطا ف حق سامعها

esraa said...

mansourawy :
الكلمه فعلا ليها تأثير السحر وخصوصا علي الناس اللي بتكون مستنياها مننا وبجد مرورك عندنا نورنا.

elgharep said...

أيتها الأميرة المفقودة
أنا أسف كلمتان بسيطتان جميلتان لا تدل الا على قوة صاحبها لأنه لم يكابر ولم ينصاع الى نفسه وجعلها من خلال أرادة واعية تعتذر عن ما بدر منها
الغريب

esraa said...

أيها الغريب
كلامك صح جدا, وعلي فكره مدونتك كمان حلوه خالص.

chico said...

سلام عليكم مرسى اوى انك نورتى بلوجر بتاعى وانا اصلا مش متجوزه بس بروش ههههههههه اما بقى ياستى علشان كلمه اسف مش بتقلل من قيمتك طالما فعلا بنكون غلطانين وبعدين انا برج تور ومش عنيده زيك ههههههههه بس بجد موضوع جميل اوى وكلمه اسف مش بتقلل من حد طالما انها مش حتخسرك حد وكمان لو ناس بتحبيهم اوى وسلام ياعسل

esraa said...

وعليكم السلام
ينفع كده تشتغليني؟ (:
علي العموم انتي نورتينا وعقبال الفرح بس اوعي تنسي تعزميني.

yousef said...

حبيت اقولك ان موضوعك جميل وجه عالجرح
المهم فى الموضوع مش كلمة الاعتذار نفسها المهم طريقة الاعتذار يعنى مش شرط تقوليها بلسانك لأممكن تقوليها بفعلك
انا بقول الفعل قبل الكلام لسبب بسيط اوى ان النفس البشريه دايما مغرورة وبترفض الاعتراف بالخطأبلسانها
عموما فى جايزة ليكى عالبلوج بتاعى يالا روحى استلميها

esraa said...

كلامك صح من نحية غرور النفس البشريه, والمهم هو الاعتذار سواء كان كلام أو فعل وأحيانا كتير الفعل بيكون أهم من الكلام.
انت ماقولتليش هستلم الهديه ازاي؟ (:

whyme said...

الكلمه دى فعلاً ياما انقظتنى و انقذت علاقاتى باصحابى و على فكره الكلمه دى ليها مفعول السحر

بمجرد ماانت بتقولها بينسى صديقكك او صديقتك كل الى انت عملته و بيكتفى بان انت قلت الكلمه الى بتعبر عن حبك ليه وانك مش مستعد تخسره حتى لو على حساب كرامتك
كلمه انا اسف الى بتعتبر فى هذه الحاله رساله حب

تحياتى

tamer afify said...

مهمة جدا الكلمة دي في زمن كترت فيه أخطاءنا في حق الغير
بقصد أو من غير قصد
بس الحقيقة أنا بقولهاش بس بقول حاجات ساعات بكون أقوى منها وأشيك
يعني على حسب الشخص اللي قدامي والموقف اللي صدر مني في حقه
تحياتي

esraa said...

whyme:
مرورك نورنا, وفعلا أنا معاك ان كلمة أنا أسف كتير بتكون رسالة حب, لكني ماعتقدش انها عمرها كانت علي حساب كرمتك لأن زي ماقلت قبل كده الكلمه دي بتكبرك كتير في عيون اللي بتعتذرلهم.

esraa said...

tamer afify:
المهم هو الاعتذار مش مهم يكون ازاي أو ايه شكله, المهم اني اعتذر للانسان اللي أنا غلطت في حقه مش ضروري يكون بكلمة أنا أسف رغم انها بيكون ليها تأثير كبير لكن كل واحد وشخصيته, ونورتنا

moodysalihamidzic said...

انا كمان برج الثور
ولكن بعتذر وبقول انا آسف
للى يستاهل
هتى لو هو الغلطان
لان اجمل نعمة انى احب الناس ويحبونى
دى متعتى فى الحياة

نضـــال said...

فكرتينى بصديقة قديمة لى قضينا مع بعض سنين المدرسة من اولى ابتدائى لحد تانية ثانوى ،وخسرنا بعض بسبب الكلمة دى،اللى انا كنت مستنياها منها عشان اسامحها لكن هى كانت طول عمرها متعرفش تقول اسفة،كان ممكن اسامحها على اى حاجة وماستناش الكلمة دى منها ،لكن كون انها تفكر تؤذى صديقة ليهاحتى لو كانت مش انا اللى هتؤذينى عشان سبب تافه وكمان تصر على الخطأ وترفض الاعتذار،يخلينى ماقبلش الصداقة المزيفة دى
انا اتعلمت اقول اسفة،لكن للاسف بقولها كتير ،ومتهيألى لما الناس تتعود منك على الاعتذار الكتييييير مش هيقدروا ولا هيحسوا ،ده غير ان فى كتير مايستاهلوهاش لانهم زى ماقلت مش بيقدروها
اسراء شكرا ليكى بجد مدونتك رائعة لان مواضيعك ذات هدف نبيل

esraa said...

moodysalihamidzic:
مبروك عليك انك فهمت الحياة وعرفت ازاي تقدر تستمتع بيها ودي في حد ذاتها متعه.

esraa said...

نضـــال:
أسواء من عدم الاعتذار الاصرار علي الخطأ, الانسان اللي هو انسان بجد هيفضل بيقدر الاعتذار مهما زاد اعتذرنا, واحنا أصلا مش مطالبين اننا نعتذر غير للبني أدمين اللي بجد.
نورتي المدونه ياستي , بس مين نبيل ده ؟ (:

محمد بدرى said...

جملتين مهمين جداشبة مستحيل انهم يتقالو فى وقتهم او انهم يتقالو من الاساس. كلمة شكر وكلمة إعتذار.
محدش بيقدر مجهود اتعمل لصالحة فيشكر الشخص عليه، ومحدش بيعترف بخطأه فيعتذر وما يكررش الخطأ تانى.
دى طبيعة البشر وكلنا فينا ده بشكل او بآخر والمهم نتعلم من اللى فات علشان نبدأ بالإعتذار لأنفسنا على إهملنا ليها طول الوقت ده من غير كلمة شكر فى حقها.

hend said...

المهم انك تعملى بالكلمة مش تقوليها وتستوعبلى معناها وده شئ صعب

SaRa said...

very nice

kalam kameal

taslame

عاشقة الوطن said...

عزيزتى اسراء

لكى منى تحيه طيبة
وأجمل سلام

انتى اتكلمتى فى نقطة مهمة وموضوع جميل اوى

فعلا انا اتعلمت انى لازم اعتذر عن الغلط اللى انا عملته مع انى كنت كتير بكابر بس براجع نفسي واقول ان انا غلطانه ولازم اعتذر وقد ايه انا هكون كبيرة فى نظر نفسي لما اعتذر لفلان او فلانة اللى زعلتهم

بس فيه دايما يقولوا لأ الاعتذار بيدل على ضعف الشخصية وانا ضد الكلام ده خااااااااالص
لان الاعتذار بيدل على سمو وعفوية النفس
وبتدل على قد ايه الانسان رقيق او بيحب اللى قدامه ازاى وحتى لو ماكنش بيحبه بس مجرد انه قدم اعتذاره ده يكفى ان الواحد يكبر ف نظر اللى اعتذرله

اما بالنسبة للى بيغلطوا فى الواحد ومابيعتذروش فده كتير
واللى بيعتذروا يعنى مش كتير

لكى تحيه خاصة جدا على مدونتك وموضوعاتك الجميلة

هيثم ابوعقرب said...


بصراحه لو هقول كلمه اسف
هقولها ليكي اسف
لاني مزورتكش من زمان
بجد بلوج جميل
مواضيع بسيطه لكن بتمس كل واحد فينا لللامام بس حرام عليكي الجو الاطفالي ف الصور ده

King A.S.R said...

فعلا هي كلمه صعبة بس يمكن صعوبتها فيها ميزه انها تخلينا نحاول منغلطش في حد عشان منقولهاش

esraa said...

محمد بدرى:
احنا لازم نتعلم نقول شكرا للناس اللي تستاهل الشكر ونعتذر للناس اللي تستاهل الاعتذار, وصدقني في ناس كتير بيقدرو المجهود اللي اتعمل عشانهم وناس أكتر بيعتذرو لما بيغلطو.
تحياتي.

esraa said...

hend:
اللي بيعرف يقول أسف بيعرف معناها وبيعرف انه يعمل بيها (:
وجودك نورنا.

esraa said...

SaRa:
انت أجمل.

esraa said...

عاشقة الوطن:
كلمه جميله جدا قولتيها وهي ان الاعتذار بيدل علي سمو وعفوية النفس, وده صح الناس اللي مش بتعتذر وبيقولو ان ده ضعف شخصيه مايعرفوش ان غيرهم بيقول عليهم ماعندهومش الشجاعه للاعتذار.
وصحيح ان اللي بيعتذرو مش كتير بس احنا دورنا اننا نزود عدد الناس اللي صح.
أنا سعيده ان الموضوعات عجبتك ووجودك خلاهل أحلي.

esraa said...

هيثم ابوعقرب:
أسفك مقبول, وبجد وجودك نورنا.

esraa said...

King A.S.R:
جميل ان الانسان يحاول انه مايغلطش , لكن الأجمل انه لما يغلط يعترف بده (:

Malk Almasria said...

اولا:
اشكرك لزيارتك مدونتى وفعلا لفته جميلة منك ويارب بعودة

على فكرة مش المهم ان احنا نقول اسفين اد من المهم ان احنا منكررش الغلط مرة تانية

تحياتى

ملك المصرية

esraa said...

Malk Almasria:
أولا: انت فعلا مدونتك جميله.
هو فعلا مهم ان الغلط مايتتكررش لكن كمان مهم جدا اننا نعتذر عن الخطأ ده لما نعمله, لأن ايه فايدة اننا مانكررهوش واحنا بالفعل خسرنا انسان مهم بسببه؟

Amr Ahmed said...

مين يقدر يقول ان الاسف عيب

الانسان القوي فقط هو اللي بيعتذر عن اخطاؤه

لانه واثق في نفسه
والافضل طبعا اننا نحاول تبعد عن الغلط بقدر الامكان حتي لا نضطر للاعتذار كثيرا
يعني عمال علي بطال

تحياتي

18goosebumps said...

كنت زمان لااااايمكن اقولها

ولو حصل ايه !!

دلوقتى عرفت انى كنت غلطانه

وقولت انا اسفه لنفسي قبل اى حد على الغلط الي غلطه في حقها
علشان مكنتش بقول انا اسفه

الا انها كلمه مش سهله حتى مع اعتقادي ده

اسراء
انا سعيده باول زياره ليا هنا

تحياتى

esraa said...

Amr Ahmed :
طبعا مافيش حد يقدر يقول ان الأسف عيب.
ربنا معاك في الامتحانات, شد حيلك يابطل.

esraa said...

18goosebumps:
أنا أسعد بزيارتك, وسعادتي زادت عشانك بقيتي بتعرفي تعتذري ودي بجد حاجه كبيره مش أي حد يعرف يعملها.

زغلول said...

حصل معايا موقف مش هانساه ابدا كان من شخص جميل وإنسان محترم وعقله مستنير لكنه أخطأفى حقى ولم يعتذر عن خطأه
ومش هاقول فقدته
لأن اللى يعمل اللى عمله يبقى لازم له إصلاحات داخليه ليصبح إنسان سوي جدير بصداقتى ليه
لكن هذا الموقف أحزننى جداعلى كل حال
موضوعك جميل يا اسراء وجديد وحلو
تحياتى

esraa said...

زغلول:
بجد نفسي ان كل حد بيغلط يعتذر عن غلطه, هما ليه مش فاهمين ان عدم اعتذارهم بيجرح أكتر من غلطهم؟
سعيده جدا بمرورك وان الموضوع عجبك.

VEЯŎ said...

2keed lo 3'altanen lazem nt2seef t7yaty leky :)


Ahmed

zordeak said...

وانتى ايه رأيك فى اللى يقول اسف ومتتقبلش


واللى عمل حاجة هو مش شايفها غلط والناس لما زعلت حاول يتأسف ومقبلوش الاسف ده منه

logarithms said...

طيب اولا احب اهنيكي علي الرقم القياسي لعدد الردود :D
بسم الله ما شاء الله يعني
وطبعا دا ان دل يدل علي ان الموضوع فعلا مهم
مشكلة الكبر اللي عند بعض الناس اللي بتمنعهم من الاسف حتي لو كانوا متأكدين انهم غلطانين بجد مشكلة كبيرة جدا
وانا شخصيا احيانا بعاني منها
لانها فعلا كلمة ممكن تصلح حاجات كتير جدا استحالة ترجع بأي طريقة ويمكن الاسف وحده يرجعها
zordeak ...
في قاعدة في التنمية البشرية بتقول
لازم تعامل الناس وكأنهم ثابتين وسلوكهم مش هيتغير حتي لو كانوا غلط وتعامل نفسك انك الشئ المرن اللي لازم يقدر يتعايش معاهم لانك محتاج الناس دي لانك بتحبهم ويحبوك
وبعدين حالات نادرة جدا اللي الواحد بيتأسف فيها (علي حاجة ينفع فيها الاسف ) ولا يقبل هذا الاسف

esraa said...

VEЯŎ:
أكيد طبعا ,ومرورك أسعدنا.

esraa said...

zordeak:
أكيد الناس لازم تقدر كل انسان قال أسف, ولازم نتعلم اننا نقبل الاعتذار زي ماتعلمنا نعتذر, انت عملت اللي عليك لما اعتذرت , وهما بكره هيعرفو انهم لما ماقبلوش الاعتذار ده غلطو.

esraa said...

logarithms:
أكيد في حاجات كتير بنعملها غلط والأسف بس هو اللي يقدر انه يصلحها,والأهم اننا نعرف قيمة الانسان اللي بيعتذر, وان اعتذاره دليل علي انه انسان كويس وباقي علينا بجد.
علي فكره انت كمان مدونتك حلوه جدا.

logarithms said...

حضرتك نورتي المدونة بردك :)
بس انا لسة جديد في عالم المدونات وكمان مشغول جدا في امتحاناتي ولسة موجهتش المدونة في اتجاه معين ولغاية دلوقتي هي بس شوية خواطر
اهلا وسهلا بك مرة تانية في مدونتي
شكرا علي الاطراء

Moody said...

كلامك أثر فيا جدا عشان هو ده اللى محسسنى بالقرف من نفسى و من ناس كتير بس فى نقطه محيرانى :لما نغلط فى حق نفسنا ازاى نعتزرلها؟؟؟سؤال مش عارفلو اجابه,أحيانا الغلط بيكون أكبر من كلمة أسف عشان كده فى حاجات ماينفعش فيها أعتذار و بينتهى الموضوع على كده,ايه رأيك؟

logarithms said...

في بعض الاحيان يبقي الاسف غير ذا قيمة ولكنه يبقي مهم ايضا !!
لان في حاجات للاسف مبتتصلحش بالاسف
وهي الحاجات اللي بتموت
فموت المشاعر او الاحساس مثلا اتجاه شخص صعب جدا يرجع بأسف !!

esraa said...

Moody:
لما نغلط في حق نفسنا المفروض نقولها ان احنا أسفين, بس لازم نوعدها اننا مش هنكرر الغلط ده تاني ولازم نفي بالوعد عشان هي تقدر تسامحنا,
وفعلا في حاجات ماينفعش فيها الأسف أحيانا بيكون السبب اننا اتأخرنا في الأسف ده, لكن الحاجات اللي مش بينفع فيها الأسف بينفع فيها حاجات تانيه, ولو احنا مش عايزين نخسر انسان معين هنعرف ازاي نرجعه (:

esraa said...

logarithms :
فعلا موت المشاعر صعب جدا انه يرجع بالأسف, لكن المشاعر دي مش بتموت غير لما الأسف يتأخر, لأننا لما حد بنحبه يغلط في حقنا بنستناه يجي يعتذر عشان نسامحه بقي وخلاص , ولما هو بيتأخر واحنا نفضل نستني وهو مايجيش جوانا حاجه بتموت فلما بيجي بيكون ده خلاص ماعدش ليه لازمه , وهي صحيح صعب ترجع بالأسف لكن ممكن ترجع لما نثبتله انه مهم في حياتنا واننا مش هنقبل انه يخرج منها.
تحياتي

انسان said...

جميل لو الواحد ما قلش انا اسف
بس محتاجة اننا مانغلطش فى حق حد

esraa said...

انسان:
مفيش حد مش بيغلط, لأننا لسه بشر ومش قادرين نكون ملايكه, وعشان كده الأجمل اننا لما نغلط نعتذر (:

انسان said...

الاجمل اننا ما نغلطش
كلمة اسف صعبة جدا
لانها بتحسس الانسان اد ايه لسه ضعيف
لسه بيغلط
لكنه انسان
ضعيف وبيغلط
لسه ما جاش الوقت اللى يبقى فيه ملاك
ما يغلطش
او اله يغير قوانين الصح والغلط
علشان تناسبه

Anonymous said...
This comment has been removed by a blog administrator.
esraa said...

انسان:
كلمة أسف مش ضعف, بالعكس الانسان الضعيف مايقدرش يقولها ومايقولهاش غير انسان شجاع وبيكون كبير جدا في عيون اللي بيعتذر له.
وعلي فكره الكلمه مش صعبه اوي كده. وانت نفسك قولت اننا مش ملايكه يبقي ازاي مش هنغلط؟

esraa said...

فاني:
طبعا نورتي مدونتي ياجميل, وشرف ليا اني أول مدونه تدخليها , ومبسوطه جدا انها عجبت سعادتك.
وايه الكلام الجامد ده؟
صح فعلا السكوت كلمه مش بتتقال, وعندك حق احنا لما نسكت علي الظلم والسرقه كده نبقي بنقفل ضميرنا ويمكن نقتله , وأكيد اللي عايشين كده فعلا مايستحقوش يعيشه, بس أتمني انهم يتغيرو ويعرفو يتكلمو وضميرهم تاني يصحي.
علي فكره فاني دي أختي الصغيره (:

أمـــــــاني said...

الله يا إسراء...كلامك جميل أوي...و رقيق أوي أوي...و نفسي كل الدنيا تقراه
أنا عمري ما كان عندي مشكلة في إني أعتذر...بالعكس أنا بحب إني أعتذر...و ببقى سعيده بنفسي و أنا بعتذر برضا
عندك حق...في ناس كتير يمكن لو كنت سمعت منهم زمان كلمة الأسف أو حتى حسيتها كنت سامحتهم...تقدري تقولي إني كنت مستنياهم يقولوها عشان أسامحهم...لكن دلوقتي معتقدش إن كلمة أسف منهم تغفر
برافو عليكي يا إسراء...إنتِ جميلة أوي

esraa said...

أمـــــــاني:
انت أجمل
جميل جدا انك طول عمرك بتعرفي تعتذري, والمشكله في كلمة أسف انها ليها وقت محدد بيكون ليها مفعول السحر لو اتقالت فيه, بتقدر انها تمسح أي أثر سلبي للموقف اللي اتعمل , لكن للأسف لو الوقت ده عدي وخلص كتير مش بتأثر ولا بتساعد اننا نغفر.
لكن أتمني اننا دايما نقدر اللي بيعتذر حتي لو اعتذاره جه متأخر, كفايه انه لما راجع نفسه وعرف انه غلطان قرر انه يعتذر.

koukawy said...

علي فكره كلمة اسف دي تخليكي ساعات تغيري كا اللي كان في دماغك من زعيق و تهزيق فمتعرفيش غير انك تسكتي لأن اللي قدامك قفل الموضوع علي كده00
اللي صعب بقي ان الشخص يكون اسف بجد من جواه مش بيملا بأي كلام

esraa said...

koukawy:
فعلا الأسف بينهي الموقف, بس أعتقد ان اللي بيقول أسف بتكون من قلبه كمان من من بره بس (:

الأباصيرى said...

عندك حق ممكن كلمة أعتذار بسيطة تخلى الزعل كلة يخلص وتحل مشاكل ممكن تحصل
والواحد بيحس إذا كان اللى قدامة دة بيعتذر بجد ولا فض مجالس

esraa said...

الأباصيرى:
حلوه اوي انها تحل مشاكل ممكن تحصل, أكيد كل موقف اعتذرنا فيه كان ممكن المشكله بتاعته تكبر وتتفرع وتعمل مشاكل كمان.

camera_girl said...

صححححح جدا اما انى كان المفروض اقول اسف ومقولتهاش عمرى ما اعتذرت الاا نادرا لما بلااقى العمليه هتخرب منى

اتمنى اكون ابسط و حتتالعند دى تروح

ادعيلى !!!

esraa said...

camera_girl:
ربنا معاكي (:
متاخديش الموضوع انه عند, بصيله ان حق حد عليكي وانت لازم توفيه, مش عشانه, لأ عشانك انت, ولما هتعملي مده هتحسي انك راضيه عن نفسك جداااا.

buffy said...

i think sorry is so satisified word ana b7sha gamela kman:)))))))lma 7d y3'lt fe 7ad tabe3y y2ol asef eh elmoshkla ya3ny better to lose that one .its so easy to say sorry to hard to find agood one say that to him

esraa said...

buffy:
its so easy to say sorry to hard to find agood one say that to him

جميله جدا الجمله دي (:

Mostafa KinG said...

ياما وياما

قلنا اسف

وبرده اليوم جه

esraa said...

Mostafa KinG:
أنهي يوم اللي جه؟

 

The Lost Princess © 2008. Design By: SkinCorner