Thursday, November 29, 2007

..التاج السلطاني


ده التاج التاني اللي كان عليا من أحمد فؤاد مع نفسه

وعلي فكره ياجماعه نتيجة أحمد ظهرت والحمدلله نجح وبجد شكرا لكل الناس اللي دعوله او حطوا البانر في مدوناتهم


نيجي للتاج بقي

لو قالولك اختار عصر من عصور مصر علشان تعيش فيه ...تختار اى عصر و فى عهد اى حاكم ؟؟ اشمعنى العصر ده؟؟
هختار عصر لسه مجاش

عصر فيه المصرين بيحكمهم واحد مصري هم اللي اختاره
بيخاف عليهم وبيخاف ربنا فيهم
اعتقد ان ده اجمل عصر ممكن اي حد يعيش فيه
.
.
.
اول اولويه فى حياتك...عيلتك ...شغلك و لا اصحابك؟؟؟
انا من الناس اللي عيلتها مهمه اوي بالنسبه ليها

مش معني كده ان اصحابي مش مهمين
بالعكس انا بحب اصحابي جدا
والأولويه هتكون للي محتاجني في الوقت ده
.
.
.
ايه اكتر حاجه بتحبها فى رمضان؟؟؟؟
احساسه

رمضان كده بيدي احساس مش بيجي غير معاه هو وبس
يعني لو الحكومه قالت ان رمضان لسه مابداش وهو بدأ, بتحس ان في رمضان في الشارع, وانه موجود
.
.
.
اوصف ليا اجمل فطار ممكن تفطره
أكيد ان شاء الله هيكون اول فطار ليا في بيتي مع حبيبي واكون انا اللي عكه , اقصد طبخه , هو طبعا مساعدني فيه, والمساعده دي مش معناها انه يعمل السلطه بس

لكنه ممكن يعمل كل حاجه لو عايز وانا ممكن اعمل السلطه (:
.
.
.
لو انت حاكم على مجموعه من الافراد هتكون عادل؟؟؟ طب هتعمل ايه علشان تتاكد انك حاكم عادل؟؟؟
المنصب في حد ذاته بيغير قلوب ونفوس البشر

بس انا هحاول اكون عادله علي قد ماقدر
هجيب لوحه كبيره واكتب عليها اسم عمر بن الخطاب واحطها في مكتبي, وواحده تانيه مكتوب عليها ارحموا من في الأرض يرحمكم من في السماء, وهكتب في ورقه ان دعوة المظلوم لا ترد واحطها تحت ازاز المكتب
أتمني ان الحاجات دي تصحي ضميري
.
.
.
اللى بيبوظ الحكام ...نفسهم و لا الشعب و لا الحاشيه المقربه؟؟؟
اللي بيبوظ الحكام السلطه والفلوس

دي فتنه ربنا ينجينا منها لو اتكتبت علينا
وان يكون الحكام دول حكام علي ناس مايعرفوش يقولو لأ , ومفيش حواليهم حد يقولهم ربنا هيحاسبكم علي الناس دي يوم الحساب
.
.
.
مين اكتر اعلامى مصرى بتحترمه؟؟؟
ويلي وده الاسم اللي انا بقوله علي وائل الابراشى , وطبعا حمدي قنديل

بحب طريقتهم ومواضيعهم جدا, واتمني اني لو بقيت اعلاميه في يوم اني اكون زيهم
.
.
.
قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه؟؟لو اه ايه رايك فيه؟؟
الصراحة لأ

.
.
.
لو ممكن تشتغل شغلانه تانيه غير اللى انت بتشتغلها او هتشتغلها كنت تتمنى تبقى ايه؟؟؟
هو انا لسه مش بشتغل, بس اتمني حاليا اني افتح محل الهدايا

الباقي بقي بعدين, اصل انا ناويه اشتغل حاجات كتيير
.
.
.
تانى بلد تتمنى تعيش فيه بعد مصر ايه؟؟؟
فلسطين .. بحبها اووووي ومعرفش ليه

نفسي اني اروح هناك بجد اوووي
.
.
.
اوصف ليا ترتيبات اجمل فرح ممكن تحضره
؟
فرحي طبعا ان شاء الله

بس اكيد ده أجمل فرح ممكن انا احضره, وأكيد مش هيكون جميل غير لما اكون بتجوز حد انا بحبه ومختراه, سواء بقي الفرح ده كان في مكان كبير, او حتي في بيتنا علي الضيق
.
.
.
بتراعى كلام الناس و القيل و القال؟؟؟ لو اه او لو لا قلى ليه؟؟؟
دي حاجه غصب عننا خصوصا مع البنات, بس مش دايما طبعا, في الحاجات اللي بيكونو عندهم حق فيها بس

اصل الناس كده كده هتتكلم عليك, سواء عملت الصح او الغلط
صعب اننا نرضي الناس كلها
.
.
صحيت ملقتش الموبايل و لا الكومبيوتر و لا الكاميرا الديجتال و لقيتنا رجعنا لعصر الحمام الزاجل و الحصنه هتكون سعيد؟؟؟
هااا , ياخبر, وموبيلي, طب قولي هتروحي العصر ده وموبيلك معاكي, لكن اروح لوحدي كده, صعب اووووي

.
.
.
السعاده هى.....؟
الرضا واننا نكون عارفين ان ربنا دايما بيختارلنا الأحسن, واننا ماننساش نشكره علي ده
.
.
.
عندك امل؟؟؟ اسبابك؟؟؟
أكيد
يمكن انا من الناس المتفائله بطبيعتي, دايما بكون شايفه ان كل مشكله وليها حل, وانها اختبار لثقتنا في ربنا عز وجل
ضاقت فلما استحكمت حلقاتها فرجت
.
.
.
لما بتحب تهرب من كل شىء بتروح فين؟؟؟؟
اي مكان اكون فيه لوحدي وبس

ابعد عن السبب اللي انا عايزه اهرب منه وادورله علي حل
.
.
.
امتى اول مره خدت فيها نفس طويل كده و قلت بينك و بين نفسك " ياااه اظاهر ان انا فعلا كبرت" ؟
لما بكتشف ان السنين عدت

وكل سنة في عيد ميلادي, لما اعرف سني واكتشف اني معنتش البنت اللي عندها 18 سنه زي ماناس كتير فاكرين
لما اشوف حد ماشفتوش من مده واكتشف ان اخوه او اخته الصغيرين كبروا
بقول هي السنين عدت بسرعه كده, هو احنا كبرنا اوووي كده؟
.
.
.
لما بتعمل عمل خيرى بيكون ايه هو دافعك الاول؟؟؟
اني اسعد الحد اللي هعمله ده, لأن سعادة الناس بتسعدني

وبكون متاكده ان ربنا هيكرمني بسبب العمل ده, لأنه عارف اني عملته عشانه هو مش عشان حد تاني
.
.
.
بتشرب سجائر؟؟؟ لو الاجابه اه ايه شعورك لو شفت ست بتشرب سجاير؟؟؟ ليه؟؟؟
لأ الحمدلله

الصراحه انا بقرف من السجاير عموما, واتمني اني اصحي في يوم الصبح يقولولي ان معدش في حد بيشرب سجاير , وانهم عملوا لعلب السجاير متحف
وشعوري مش بيختلف من ست لراجل
.
.
.
بتعرف ايدك اليمين من الشمال ازاى؟؟؟؟
لأ دي حاجه مش سهله خالص, ومن يوم ماقرأت السؤال ده أول مره وانا براقب ايديا عشان اعرفهم من بعض

واكتشفت اني بعمل كل حاجه بالايدتين تقريبا لغاية ماكتشفت حاجه مهمه
اني بسوق بايدي اليمين, وبفتح الازاز واقفله بايدي الشمال
:p
.
.
.
ايه اكتر آله موسيقيه بتحبها؟؟
البيانو
معرفش ليه بحبه او بحب صوته
.
.
.
فى رايك ليه الذوق و النخوه انعدموا؟؟؟؟
لأ هم لسه مانعدموش, هم قلوا بس

والسبب ان لما يكون واحد مضيع عمره في تعليم اكتشف انه مش هيفيده في الأخر, ومش لاقي شغل, والفقر مطلع عينه, واتظلم بدل المره الف, هيكون عنده 100 حاجه تشغل تفكيره غير الذوق والنخوه
أكيد ده مش تصرف صح, لكن الناس بردو معذوره وربنا يعينها
:D
.
.
.
ايه الحاجه اللى لو حصلتلك تبقى سعيد اوى؟؟؟
ان ربنا يجمعنى على خير بالانسان اللى قلبى اختاره
واننا نعيش حياتنا سوا واحنا سعداء وبنساعد بعض

أكيد هكون مبسوطه جداااااا
:)
.
.
تختار يبقى عندك...ارض زراعيه و لا اجنس عربيات و لا كام عماره و لا فلوس فى البنك؟؟؟؟
لو عندي كل دول ومعنديش الانسان اللي أحبه, يبقوا مالهمش اي لازمه

ولو عندي الانسان اللي بحبه هيبقي بيتي احسن من كام عمارة والموصلات احسن من الف عربيه
:)
.
.
البحر و لا النيل؟؟؟
البحر
.
.
.
مركب ولا طيارة ؟
طيارة لو سفر

لكن لو رحله رومانسيه يبقي علي يخت انا وحبيبي وبس
.
.
.
مجنون و لا عاقل؟؟
مجنونه طبعا

بس عاقله أحيانا
.
.
.
تقرى كتاب و لا تتفرج عليه فيلم؟؟؟
أقراه كتاب الأول وبعد كده أشوفه فيلم لو اتعمل فيلم
.
.


21 comments:

Mony The Angel said...

Mmmm
"والمساعده دي مش معناها انه يعمل السلطه بس
لكنه ممكن يعمل كل حاجه لو عايز وانا ممكن اعمل السلطه "
ya msA ya msA :))
looooooooooollz bgad

zordeak said...

ايه الاجابات الحلوة دى

على رأى منة

حلوة اوى اوى الجملة دى

ايه شغل النصب ده ؟

D:

بس كويس انك هتتعبى نفسك فى السلطة

انا اتأثرت فعلا

دى اصعب حاجة اصلا

d:

التاج حلو والاجابات احلى

ويا رب تكونى دايما رايقة كده

;)

اسكندراني اوي said...

هو التاج وصلك
طب حمد الله على السلامه

كل تاج وانتي بخير

A.SAMIR said...

لا بقى معلش
مش معنى انك برينسيس انك تعملي كدة في اصحاب المدونات المتواضعة
على الرغم يا ست اسراء انك مشبتعبريني خالص واسقطتي مدونتى من حساباتك
الا ان برضة هفضل صديق لمدونتك الجميلة واقول لك اجابات هايلة وشبه اجاباتي ع التاج دة قبل كدة على فكرة
تحياتي واحتراماتي

آلام وآمال said...

طب كويس ان في حد لسة بيعذر الناس اللي قلت من عندهم الشهامة والنخوة والله
هههههههههه
لا بردو سبب منطقي نعذرهم بيه
يا سلام عليكي يا اسراء
:D

اجاباتك حلوة ويارب يوفقك وانتي والشخص اللي ف بالك وتفرحو ببعض قريب
قولي يارب بس اهم حاجة وهو المستعان

-------

انا بقى مش عارف اشكرك ازاي على كرمك معايا وافتكارك ليا بالتاجات اول بأول كده
:D

بس معلش بقى التاج ده انا جاوبت عليه قبل كده لسة قريب اوي
وعلى كل حال طبعا يتردلك ف الأفراح يا فندم
وكل تاج وانتي طيبة
:)

oceaneyes said...

اجاباتك بجد حلوة اوى زيك كدة يا قمر ..

وحشنى البلوج بتاعك بجد ...بقالى فترة ما زورتوش بس والله ظروف امتحانات مش اكتر

....


تحياتى ليكى

:)

Epitaph said...

lol..you're masha Allah so sweet ya, EssO :D

بيتنا القديم said...

أختي الكريمة
اشكرك كثيراً علي مرورك في مدونتي وتعزيتي
وإن شاء الله في وقت لاحق اعاود المرور علي مدونتك وقراءة مواضيعها...
وإنا لله وإنا اليه راجعون
أسامة

Noony said...

إسراااااااااااااااء
ازيكي؟؟
أسفة على الغيبة...ظروف خارجة عن ارادتي

إجاباتك بسيطة ومقنعة
وتدل على شخصية حبوبة وعسولة
إن شاء الله تلاقي الإنسان اللي تحبيه وتقضي معاه أجمل حياة

:)
نوني

esraa said...

Mony The Angel:

اها يامون

مش اقتراح حلو بردو

(:

esraa said...

zordeak:

(:

انا نصابه ؟ (A)

مش كده بردو؟
دي السلطه دي صعبه جدااااا

esraa said...

اسكندراني اوي:

اها وصل

الله يسلمك

وانت بخير

(:

esraa said...

A.SAMIR:

ازيك يااحمد؟

لأ ماتزعلش حقك عليا

(:

صداقتك لمدونتي تشرفني

esraa said...

آلام وآمال:

لازم نلتمس للناس الأعذار بردو

(:

يارب أمين

ماشي ياسيدي جاوب التاج التاني(:

esraa said...

oceaneyes:

انت أحلي ياجميله

وانتي كمان وحشتيه

ربنا يوفقك في الامتحانات يارب

(:

esraa said...

Epitaph:

انتي أحلي ياجوجو
(:

esraa said...

بيتنا القديم:

تنورني في أي وقت
(:

esraa said...

Noony:

ازيك يانونه؟
(:

ربنا يخليكي

ويارب تكون الأسباب خير
(:

samamasr said...

أنا آسفة اني تطفلت على مدونتك..

عارفة..وأنا بشوفها..وقفت عند البوست ده :)


البوست قديم..بس بجد عجبني..

لأنك بتتكلمي من قلبك :)

ويمكن فعلا مش تشوفي ردي..لكني وقفت عنده وعجبني بجد..عجبني كلامك فعلا :)

ربنا يوفقك يا جميلة بإذن الله :)

esraa said...

samamasr:

تطفل ايه بس يابنتي, ده انتي نورتيني


الحمدلله انه عجبك
(:

شفتي انا شفت الرد ازاي؟

ربنا يخليكي ياحبيبتي

نورتيني بجد

samamasr said...

يا عسل :D

إنتي جميلة بجد :)


والله العظيم انتي جميلة قوي :)

فعلا..وأنا فعلا حبيتك في الله..


يمكن انا شفت مدونتين من على النت..من غير اصدقائي اللي اعرفهم شخصيا...


انتي..ومدونة زي الهوا..


لا تلاتة..مدونة دكتورة سلمى..بس هي برضه صديقة لصديقة....يعني فيه معرفة برضه :)



المهم..

شفت مدونتك ومدونة زي الهوا


انتم الاتنين فعلا رغم اني مش اعرفكم..لكن حبيتكم في الله :)


بأمانة :)


وطبعا..تسمحي لي انتي كمان..بعد اذنك..اضيف في مدونة سمامصر..للأصدقاء اسمك :)


انا بس حذفت اللي كنت كتبته..بس انا مش عاملة لينكات المدونات والاصدقاء في المدونات التانية بس :)



المهم..


ربنا يوفقك يارب..وتبقي بألف خير



ربنا يكتبلك كل خير يا جميلة :)



............


البقاء لله في صديقتك



ربنا يارب يرحمها يارب..بحق الأيام دي

 

The Lost Princess © 2008. Design By: SkinCorner