Friday, August 17, 2007

..امتحان القضايا المعاصره


بما ان النتيجه ظهرت ونجحت الحمدالله
يبقي أحكيلكوا بقي علي امتحان القضايا المعاصره
الماده دي من 3 كتب, ودي حاجه نادره عندنا في الكليه, لأن أيام زمان كانت الماده بتكون طويلة جدا لو منهجها 30 صفحه مش 3 كتب
بس هي بتتكلم عن الوراثة وزراعة الأنسجه وعشان كده انا كنت بحبها
وانا من عادتي اني مش بروح الامتحان غير الساعه 11 و عشره, ومعرفش أدخل الامتحان قبل كده
يومها بابا اداني العربيه وانا رايحه الامتحان, وطبعا قالي انزلي بدري عشان تسوقي علي مهلك
وكان قاعدلي وعشان كده اضطريت أنزل 10 ونص فعلا
ووصلت عند الكليه 11 الا ثلث, وبعدين يعني هدخل بدري واسقط في الامتحان انا ولا ايه يعني؟
فطبعا فضلت قعده اراجع ولما جت الساعه 11 وعشره نزلت وسيبت الكتب ودخلت الكليه
وكان في بنت جايه دخلت معايا ومكنتش أعرف انها معايا في نفس اللجنه
احنا بنمتحن في أول دور في الطرقه
وطلعت ففي واحد قالي الدكتور مش هيدخلكم الامتحان
بصلته بصت انت عبيط ولا ايه, وهو للأسف ماشفهاش عشان انا كنت لابسه النضاره, ودخلت والبنت ورايا طبعا
لقيت واحد بيقول: انت يابنت انت وهي تعالوا هنا
أكيد بيكلمنا احنا لأن بقيت البنات قاعدين بيقروا ورقة الأسئله
ادورت روحتله وهي ورايا طبعا
هو:انتوا مش هتحضروا الامتحان, اتفضلوا روحوا يالا, الأمن , انا عايز الأمن , هاتولي الأمن
بصتله نظرت انت عبيط ولا ايه, بس للأسف ماشفهاش لأني كنت لابسه النضاره
البنت: الحقي مش هيدخلنا الامتحان وهيجبلنا الأمن
بصيتلها نظرت انت عبيطه انت كمان ولا ايه, وللأسف بردو ماشفتهاش
أنا: مفيش حد يقدر يمنعنا من دخول الامتحان, سيبيه يجيب الأمن
هي: انت متأكده
أنا : أها
هي: ماشي ووقفت جنبي
جت المراقبه اللي بتراقب في أول لجنه
المراقبه: معلش يادكتور
هو : أبدا
المراقبه: حقك عليهم يادكتور هم أسفين ومش هيتأخروا تاني مش انتو أسفين يابنات
وبصتلي منتظره الرد, والبنت كمان بصتلي عشان تعرف نقول ايه؟ يعني مصممين اني أتكلم
أنا: حضرتك احنا مش هنطلب وقت زياده بدل الوقت اللي اتأخرناه
هو: يعني ايه مش فاهم
أنا: يعني لو احنا مالحقناش نخلص حل عشان احنا جينا متأخر مش هنطلب من حضرتك وقت زياده
هو: اه يعني مجيكم متأخر واقف عليكم انتم بخساره مش عليا أنا
أنا: أكيد لو ملحقناش نخلص حل يبقي احنا اللي خسرانين
هو: تصدقي انك قليلة الذوق
أن أن أن تييييييييش
غلط فيا, ومعرفش ازاي ماردتش عليه, كل اللي عملته اني قلتله ميرسي شكرا, ونزلت النضاره وبصتله من فوق لتحت ودخلت اللجنه, والبنت طبعا ورايا
ودخلت قعدت مكاني وساعتها عرفت ان البنت معايا في اللجنه, ومضيت حضور, وجت المراقبه بتاعة أول لجنه
المراقبه: انت رديتي علي الدكتور ليه بس, ده مكنش هيدخلك اللجنه لولا ان انا اتوسطلكم عنده
الناس دي عبيطه ولا بتستعبط
أنا: انا مفيش حد يقدر انه مايدخلنيش اللجنه ولا انه يمنعني من حضور الامتحان
هي: يعني هو مكانش يقدر يمنعك منه
أنا : لأ أنا عارفه حقوقي كويس, وهو مكنش يقدر يمكنعني من دخول الامتحان
هي: طب اسكتي بدل مادبسلك الورقه
أنا: ليه حضرتك ظبطيني بغش
هي: هي الورقه ماتدبسش غير لما تكوني مظبوطه بتغشي
أنا: اها
هي: طب هاتي كرنيهك وانا هخلي الدكتور يجي يدبسها
فتحت الشنطه, خرجت الكارنيه واديتهولها, وهي أخدته ومشيت , وفي عنيها نظرة اسبهلال
مسكت ورقة الاجابه عشان أسطرها وهو جه وقف قدامي وبيسأل فين البنت؟
هي: اهي يادكتور قدام حضرتك
ومد ايده اخد الورقه
هو: اتفضلي انت مش هتمتحني النهارده
أنا: لو سمحت رجع ورقة الاجابه بتاعتي عشان همتحن
هو: مفيش امتحان, واتفضلي
أنا كنت قاعده عادي, فقعدت بالجنب , وحطيت رجل علي رجل( دي عاده فيا مش بعرف أبطلها) وقلتله عايزه ورقتي لو سمحت
هو مشي وجت المراقبه بتاعتي
المراقبه: الدكتور ده طيب قومي اعتذريله وهو هديكي الورقه
بصتلها نظرة انت عبيطه ولا ايه, والحمدلله شافتها لأني كنت قلعت النضاره
أنا: حضرتك المسؤله عن اللي بيحصل في اللجنه هنا, فياريت تجيبي ورقتي منه
هي سكتت ومشت
ولقيت رجل شعره ابيض واقف قدامي عرفت فيما بعد انه مدير الكلية ومعاه واحد صغير في السن ولابس نضاره شمس وعرفت بعد كده انه دكتور عندنا
الدكتور: في ايه؟
أنا: سحب مني ورقة الاجابه وانا عايزه ورقتي
مدير الكليه: طب انت اتأخرتي ليه؟
أنا: أنا بالفعل جيت متأخر , ودلوقتي عايزه ورقتي
هو: يانا ياهي في الكليه دي, مش هتمتحن يعني مش هتمتحن, لو هي امتحنت أنا هسيب الكليه وهمشي, الأدب فضلوه علي العلم
أنا: لو سمحتوا ياريت ماتخليهوش يغلط, لأنه لو غلط أنا هرد عليه, كفايه انه غلط فيا بره وانا سكت
راحله مدير الكليه وفضل معايا الدكتور
الدكتور: بصي سيبك منه, خليكي معايا أنا , ماترديش عليه وانا هجيبلك الورقه
أنا: والوقت اللي بيضيع ده محسوب علي مين
الدكتور: انا هضيفلك الوقت اللي انت عايزاه لما الوقت يخلص , بس ماترديش عليه عشان خاطري
أنا: اوك يادكتور, عشان خاطر حضرتك
وراح فعلا جابلي الورقه وجه اديهالي وقلتله ميرسي, وادور علي الدكتور التاني الاقيه موجود عادي, ايه الناس اللي ملهاش كلمه دي, مش هو قال اني لو امتحنت هيمشي ويسيب الكليه؟؟؟
المهم انا امتحنت وخلصت امتحان وسلمت الورقه قبل الوقت مايخلص والله
وجت المراقبه بتاعتي
هي: خلصتي خلاص
أنا : اها
ناولتني ورقة الأسئله وقالت: اعتذري للدكتور بقي
بصيتلها نظرة انت عبيطه ولا ايه, اللي شافتها لأني مكنتش لسه لبست النضاره, وأخدت منها الورقه
ناولتي المسطره والله ده الدكتور ده طيب
مردتش عليها وأخدت منها المسطره
ناولتني المفتاح مفيهاش حاجه يعني لما تعتذريله
أنا : أنا مش هعتذر لحد لأني ماغلطتش في حد
اديتني النضاره: بس هو طيب والله
لبست النضاره وقلتلها اوك بعد اذنك
هو: لو سمحتي استنيني فوق قدام اوضة الكنترول
أنا: وهي فين اوضة الكنترول
هو: فوق علي ايدك الشمال
طلعت فوق ولقيت الدكتور اللي جابلي الورقه, وقلتله ميرسي يادكتور, وقالي أي خدمه
هو جه وكان معاه مدير الكليه , وقالي تعالي عايزك ودخلنا الكنترول
هو: أنا عايزك أقولك كلمتين ماعرفتش أقولهملك تحت, بصي يابنتي, انت زي بنتي بالظبط, انا حتي عندي بنت قدك, طب انت عارفه انا بنتي شبهك والله , حتي اسألي دكتور ابراهيم
دكتور ابراهيم كان دكتور رابع قاعد في الكنترول وأومأ براسه, رغم اني اعتقد انه مش عارف احنا بنتكلم عن ايه
هو: وعشان كده انا مش عايزك تزعلي مني, انا كده كده كنت هسيبك تمتحني طبعا, لكن انت المفروض كنت تقوليلي معلش يادكتور وانا أسفه يادكتور ومعنتش هتأخر تاني وحقك عليا وكده
انا ضاحكه: لأ سوري يادكتور انا مش بعرف اقول الكلام ده
هو: مش مشكله المهم انك ماتكونيش زعلانه يابنتي, وانت زي بنتي والله
انا : اوك يادكتور ميرسي, بعد اذنكم
ونزلت وروحت والحمدلله النتيجة طلعت أخيرا امبارح ونجحت

14 comments:

Mony The Angel said...

mn awel satr felpost wana msh motafeqa m3aaky nhaa2y

maybe 3shan ana aslan ded fekret en had yeegy met2a5ar 3an ay m3aaad 7ata law emt7aan

ana baqades e7traam almawa3eed w yemken da sabab kol 5lfaaty belly a3rafhom :)

w ana shaifa en enty al3'lat mel2awel btw :)
seebek mn en al emt7aan da 7a2ek aldstoory welkalam alfare3' da
hwa fe haga meldostour btetaba2 3shan yetaba2o goz2 al emt7anaat

w fe3lan loola en al dr da tayeb makonteesh emt7anty

aw 3al2a2al makonteesh nege7ty felmadda de :)

e7medy rabena eno tayeb fe3lan web2y et3alemy troo7y f m3adek 3shan teb2y sa7 mel2awel

msh te3mely al3'lat w ta3tamedy 3ala al a5r haikoon re-actiono eh

إنـســانـة said...

قوية ومفترية من يومككككككككك

ايه يابنتى اللى بيوديكى متأخر ده انا اعصابى تبوظ لو عملتها

وكمان بتردى ع الدكتور ومش راضية تعتذرى

ده انا لو دكتور بصلى بصة اكش فى نفسى هههههههههههههههههههههه

فكرتينى بأخويا والله مش بيهمه من التخيين

يلا الف مبروك ع النجاح يا ستى وكاميكاز بيقولك عقبال الإعدادية .. بصيتله بصة ده عبيط ده ولا ايه بس للأسف مشفهاش عشان كنت لابسة النظارة ده غير ان المدونة عندى ضلمة زى مانتى عارفة طبعا

:D :D

Bella said...

مش عارفة صراحة

انت رايحة الامتحان متأخرة يعني عملتي حاجة غلط ومس عمعترفة انك غلطانة

احترام المواعيد جزء من شخصية الانسان

واي حد لايحترم المواعيد بيحترمها في الامتحانات بالتحديد

مش عارفة انت كنت عايزة تثبتي ايه يعني بالتعامل مع الغير بالطريقة دي

مع احترامي يعني ومن غير زعل

حتى لو هو مش دكتور اصلا هو اكبر منك ومفروض تكلميه بطريقة تانية

وهو من حقه يمنعك تدخلي الامتحان لانك متأخرة ولو تكرم وسمح لك فده زيادة من عنده مش حقك وبتاخديه بشكل اتوماتيك

معلش من غير زعل يعني موقفك مش صح بالمرة

انا عارفة ان كلامي مش ح يعجبك بس دش نصيحة من اخت اكبر منك لازم طريقتك تتغير وتتعاملي مع الاكبر منك بطريقة مختلفة

ووالدك لو كان عرف انت عملتي ايه لااعتقد انه كان ح يؤيدك في موقفك

تحياتي

Romy said...

انا بصراحه بعتبرها تضحيه بمستقبلك فى الوقت دة لان بدليل انك كتبتى الكلام دة لم النتيجه ظهرت دة فى كان بيدل على خوفك بردو مهما كان
لانى وبصراحه مستحيل اعمل حاجه ذى دى ابدا فى حياتى لان فى رائى لازم الواحد يتنازل شويه علشان يوصل اللى هو عوذة
بس فى النهايه حصل خير واتمنى ليكى سعه الصدر والتعامل مع الحياة ببساطه اكتر
بس انا بحبك جدا يا بنت ......

smraa alnil said...

هههههههههههههههههههه

يا قلبك يعني مش كنتي خايفة
قلبك جامد

يا بت مش كنتي خايفة لايسقطك

دة علي كدةالعيال اللي عندي في الكلية عاملين زي الكتاكيت
بس والله جدعه

الف مبروك علي النجاح يا قمر
وعقبال الشهاردة الكبيرة

اسكتي مش طلعت كبيرة بجد
:))

الفراشة الصغيرة said...

بالرغم من انى مش اعرفك الا انى حابه فيك ثباتك وقوتك واقتناعك بانك على حق

بس يا ريت مثشوهيش الصورة الجميله دى بالتحكم والتسلط لان لو كان دكتور مش طيب صدقنى مكنش سابك فى حالك

وعلى العموم برافو عليكى انك كسيبتى الجوله

esraa said...

Mony The Angel :

انا ماعتبرش كنت رايحه متأخر لأن انا روحت في الوقت اللي بيسلموا فيه الورق عندنا

معرفش بس انا كنت متأكده اني همتحن

ليه ماعرفش؟

بالنسبه للميعاد احنا في ناس عندنا بيجوا 11 ونص وبيدخلوا عادي جدا

هو بس اللي كان مضايق يومها

بس طبعا انا بحترم رأيك وباخد بيه

esraa said...

إنـســانـة:

هههههههههههه

الله يبارك فيكي وعقبال كاميكاز يارب

لأ سلميلي علي كاميكاز كتييييييير

ده حبيبي(:

esraa said...

Bella:

عنيده مش كده؟

انا والله بحترم باقي مواعيدي
بس ده انا عارفه اننا مش بناخد الورق قبل 11 وعشره

انا معلتش صوتي حقيقي ومكنتش ناويه ان ده سحصل

لكن لما هو غلط فيا كل حاجه اتغيرت

يمكن عاشن انا مش بحب حد يغلط فيا أيا كان الحد ده

بالعكس انا مش زعلانه منك

ماينفعش ان لو انت شايفاني غلط تسكتي او تقولي اني صح

مرورك أسعدني(:

esraa said...

Romy:

تضحيه بمستقبلي مره واحده؟

حاضر

وانت عارفه ان انا كمان بحبك يابنت خالتي((:

esraa said...

smraa alnil:

الصراحه لأ

ومعرفش ليه؟؟

الله يبارك فيكي
وعقبال مانفرح بيكي يارب في الفرح طبعا((:

esraa said...

الفراشة الصغيرة:

ربنا يخليكي(:

والله مكنش تحكم ولا تسلط
هو بس الموقف قلب معايا عند لما غلط فيا

الله يبارك فيكي
بس انا فعلا مكنتش بصالها علي انها حرب

نورتيني(:

Anonymous said...

يااااااااااه
انتى جامدة قوى
ممكن ابقى زيك لما اكبر

esraa said...

Anonymous:

لأ جامدة ايه؟

وتبقي زيي ايه؟

انت خليكي شاطره واسمعي الكلام وروحي في ميعادك

لأنك أكيد مش هتستحملي ضغط انك ممكن ماتحضريش الامتحان(:

يبقي الالتزام أحسن

وانا مانشرتهاش عشانها حاجه صح انا عملتها

انا نشرتها كموقف عشان كلنا وانا كمان نتعلم منه(:

 

The Lost Princess © 2008. Design By: SkinCorner