Thursday, October 4, 2007

..الحرية لمحمد الدريني

تم اعتقال محمد الدريني رئيس المجلس الاعلي لرعاية آل البيت فجر أول أكتوبر
والسبب تأليفه لكتاب عاصمة جهنم
الكتاب اللي وصف فيه جرائم التعذيب في السجون المصريه
شاركوا في حملة المطالبة بحرية محمد الدريني عن طريق اللينك ده

طاطي راسك طاطي طــــاطي
انت ف وطن ديمقراطـــــــي
انت بتنـــعــــم بالحــــــــــرية
بس بشرط تكون مطاطــــــي

لما تكون شغــال بذمــــــــــة
خايف على مصــلحة الأمــة
شغلك يطلع من غير لازمــة
علشان مبيعلاش غير واطي
طاطي راسك طاطي طاطـــي
انت ف وطن ديمـــــقراطي

لما حاميها يكون حراميــها
وبلاده ورا ضهره رامـيـها
طالع نازل واكل فيـــــــــها
مسنود بالبدلة الظباطــــي
طاطي راسك طاطي طاطـــي
انت ف وطن ديمـــــقراطي

لما شــقاك يصــبح مش ليك
فقرك سد السكة علــــــــــيك
تتلفّت تلــــقى حـــوالـــــــيك
إما حرامي و إما عقــــاطي
طاطي راسك طاطي طاطــــي
انت ف وطن ديمقراطـــــــي

لماتلاقي بـــــلاد الـدنـيـــــــا
فيها البني آدم حــــاجة تانية
وانت في الطبقات الـــــــدنيا
قرد مسلسل أو وطواطــــي
طاطي راسك طاطي طاطـــي
انت ف وطن ديمقراطــــــي


لما الجهلة يبــــــقوا أمــامــك
أو فوقك ماسكــين ف زمامك
ويسوقك ع الهــلكة إمامك
تشرب م السم السقـــــراطي
طاطي راسك طاطــــي طاطي
انت ف وطن ديمقـــــــراطي

لمــــا الكلـــمة تكون بتدينـك
لما تخبي ف قلـــــــبك دينــك
لما الذل أشوفه ف عيـــــــنك
هات إحباطك على إحباطــــي
طاطي راسك طاطي طاطـــي
انت ف وطن ديمقراطــــــي
انت ف وطن ديمقراطـــــــي
كلمات أبو زيد بيومي

41 comments:

آلام وآمال said...

حسبنا الله ونعم الوكيل
ربنا يفك كربه ويخرج لأهله بالسلامة ان شاء الله
وربنا ينتقم من كل ظالم

Anonymous said...

انتى اصلا لو عرفتي لايحة الاتهام هتعيطي من كثر الضحك ..

ازدراء أديان.. ترويج اشاعات من شأنها الاضرار بصورة وزارة الداخلية .. المفروض الراجل كان في الكتاب يعمل دعاية للسجون والمعتقلات علي طريقة "نورة طرة"

ومحاولة نشر المذهب الشيعي.. والأخيرة دي بصراحة مش فاهمها يعني منين ازدراء اديان ومنين نشر المذهب الشيعي.. وبعدين ماله المذهب الشيعي .. مسلمين برده والله

dead man said...

صحيح في جروب علي الفيس بوك اسمه الحرية لمحمد الدريني لو حابة تشاركي فيه

dead man said...

اسف للرغي في تعليق بتاعي طلع
Anonymous
مش عارف ليه .. بس ده انا .. علشان لو اخوانا عايزين ياخدونى انا كمان بتهمة ازدراء الداخلية ولا حاجة

ahmEd_H said...

ربنا يفك سجنه انشالله

الشنكوتي الكبير said...

ربنا يفك اسره وينصر الحق ودين الحق
سلااااااااااااااااام

logarithms said...

صبرا...فمع كل عسرِِ يسر

logarithms said...

إن مع العسر يسرا

حقى اهرتل said...

لفته طيبه استمرى

•«ρяoιd»•™ said...

رمضان كريم

تحياتي

Lion king™ said...

فعلا حسبنا الله ونعم اوكيل

esraa said...

آلام وآمال:

يارب أمين

esraa said...

dead man:

من امتي وهم بيقولو حاجه تتعقل يااحمد؟
ده الطبيعي بتاعهم

وبعدين هو نشر المذهب الشيعي كفر ولا ايه؟

بالنسبه للجروب انا اشتركت فيه بالفعل

ولا يهمك ارغي براحتك (:

لأ هياخدوك بتهمة انك كتبت 3 تعليقات (:

esraa said...

ahmEd_H:

يارب أمين

esraa said...

الشنكوتي الكبير:

يارب أمين

esraa said...

logarithms:

بين كل لينين شده

وبين كل يسرين عسر

esraa said...

حقى اهرتل:

ربنا يخليك

esraa said...

•«ρяoιd»•™:

الله أكرم

esraa said...

Lion king™:

فعلا والله

حسبنا الله ونعم الوكيل

zordeak said...

حسبنا الله ونعم الوكيل
ربنا يفك أسره هو وكل اللى زيه فى سجون بلدنا العظيم

ويفك حبسنا احنا كمان قادر يا كريم

ويبطل خلق الله من الفرجة علينا لاننا بقينا مفضوحين

لما تحس انك مهزوم
وان جدار البيت مخروم
والجلاد بيبص عليك
والصعاليك بيمرمطو فيك

يبقى انت اكيييييد ..أكييييييييييد
فى مصــــــــر

لما تلاقى انك مسجون
واحد من ستين مليون
نفسك مرة تكون انسان
نفسك يوم متنامش جعان

يبقى انت اكيييييييد ..اكييييييييد
فى مصـــــــــــــر

حسبنا الله وكفى

The Groom said...


ربنا يفك أسره يا رب

Soooo said...

استغفر الله العظيم من كل ذنب عظيم
هونها يارب علينا ايام
وانصر عبيدك يارب
واسحق كل ظالم واجعله عبره يارب


وربنا يرجع كل مظلوم لأهله سالم يارب

esraa said...

zordeak:

ويرجع لبيته وللأهله بالسلامه
يارب أمين

بس ايه الكلام الجامد ده؟

لو كنت قولتهولي بدري شويه كنت كتبته بدل شعر أحمد فؤاد نجم في البوست (:

-------------

اتبسطت جدااااا لما شفت اسمك(:

حمدالله علي السلامه

ويارب تحل كويس في أخر امتحان

esraa said...

The Groom:

أمين يارب

esraa said...

Soooo:

اللهم حلمك علي الظالمين أضر بالمظلومين

فبركة said...

ألف رحمة ونور عليكى يا شيماء
اللهم أرحمها وأرحم كل موتى المسلمين
اللهم أرحمنا فوق الأرض وتحت الأرض ويوم العرض عليك
رجاء من الكل زيارة مدونتى وقراءة البوست الأخير
جزاكم الله خيرا

أحمد الشمسي said...

على فكرة دي مش كلمات أحمد فؤاد نجم... دي كلمات أبو زيد بيومي. الغلطة دي انتشرت لدرجة رهيبة وأبو زيد نفسه كتب الكلام ده في أخبار الأدب كتير قوي، هو لازم أي شعر معارض يبقى لنجم؟ بلدنا فيها نجوم كتير

esraa said...

فبركة:

ربنا يرحمها, ويرحم جميع موتي المسلمين

esraa said...

أحمد الشمسي:

والله يااحمد هي كانت جيالي علي انها كلمات أحمد فؤاد نجم

بس أكيد هصلح الغلط

وشكرا انك قلتلي (:

abo salah said...

بعد السلام عليكم

مش عارف اقول أيه؟

يظهر أن الحكاية دي بقت سمة أساسية لينا

ربنا يفك كربه أن شاء الله
ويعود إلي أهله سالما بإذن الله

وأن طال الليل .. فما بعده الا النهار

بس الليل طول أوي

كل سنة وأنتي طيبة
والسنة الجاية وربنا يعدل احوالنا .. ويرزقنا اوضاع انضف و احلي من السنة اللي قبلها

تحياتي

عمرو المصري said...

كل عام وانتم بخير

تقبل الله منا ومنكم

اعاد الله عليكم العيد في العام القادم
ونحن علي ابواب المسجد الاقصي ان شاء الله


هدية المحارب للمحاربين في يوم العيد

تجدونها فقط
في
ارض الحرب

تمر حنة said...

ايه دا كلة دة
دول كلها كام يومين مشفتش فيها مدونتك
بس و اللهى ربنا يعينك على المجهود الكبير دة

وكل سنة و انتى طيبة
عيد سعيد
تحياتى

Sharm said...

كل سنة وانتى طيبة

يا مراكبي said...

لو قدرتي تحصلي على نسخة من الأعمال الكاملة لنجم هتكتشفي إن قصائدة من الستينيات والسبعينيات كأنها مكتوبة النهاردة .. سبحان الله .. كأن الأوضاع من ساعتها وهي زي ما هي

Arabian lady said...

Nice blog :)
maba3rafsh meen m7ammad dah bss i like ur blog ..
lol i am from kuwait and i like ur blog :) !
come and visit mine ;) !

اللهم افتح على احمد طريق النجاح و سهل عليه الدراسه
امين
:)

esraa said...

abo salah:

وعليكم السلام ورحمة الله وبركاته

هي واضح فعلا انها بقت من علامتنا المميزه

اللهم أمين

وانت طيب

esraa said...

عمرو المصري:

وانت بخير ياعمرو

اللهم أمين

esraa said...

تمر حنة:

(:

ماليومين دول كان فيهم أحداث كتير

عامله ايه وايه أخبارك(:

وانت طيبه ياجميله

ويارب يكون عيد سعيد علينا كلنا(:

esraa said...

Sharm:

وانت طيب (:

esraa said...

يا مراكبي:

فعلا في حاجات كتير لنجم كأنه كاتبها النهارده الصبح

بس انا عرفت ان القصيده دي مش بتاعته
وهصلح الغلط ان شاء الله(:

esraa said...

Arabian lady:

ربنا يخليكي

محمد ده راجل مصري عندنا :(
أتمني انك تدعيله ان ربنا يرجعه لأهله بالسلامه

ربنا يخليكي يسعدني انه عجبك

وان شاء الله هاجي عندك كتير (:

------------------

بجد مبسوطه اووي انك دعيتي لأحمد
هو خلص امتحانات يوم الخميس
يارب عقبال النتيجه بقي (:

 

The Lost Princess © 2008. Design By: SkinCorner