Saturday, October 25, 2008

...في بيتنا فأر


أه والله بيتنا الشريف العفيف الطاهر كان فيه فار
يوم الأحد اللي فات كانت ماما وأحمد مش موجودين ومنة مسافره وأفنان بتتفرج علي التليفزيون وتسنيم قاعدة علي الكومبيوتر وأنا قاعده قاعدتي المفضله علي الكنبه وبتكلم في التليفون
شويه واتخيلت ان في حاجه بتتحرك تحت الكنبة اللي قصادي اتعدلت عشان أعرف أراقب الموقف فملقتش حاجه
أنا لموره صاحبتي: انتي مادتنيش كومنتات لحد دلوقتي
مروه: أنا رأيي زي رأي صافي أختي بالظبط
أنا: تسنيم احنا في بيتنا فار
مروه وتسنيم في نفس الوقت: ايه ده انتي بتتكلمي جد
أنا للاتنين: أها كان تحت الكنبه دي دلوقتي وتقريبا استخبي ورا الدفاية
تسنيم قفلت باب الطرقه ودخلت معرفش راحت فين
مروه: مش يمكن بيتهيألك؟
انا: مانا كنت فاكره كده لحد ماشفته كويس واتأكدت, أنا مش عارفه تسنيم راحت فين
مروه: هي سابتك لوحدك؟
:( أنا : لأ, أنا مش لوحدي , معايا الفار
جت تسنيم ومعاها مبيدين حشريين( اها مبيدات حشريه مش حيوانيه)ومقشه
أنا : فين بابا
(تسنيم: بابا نايم مش هنصحيه (ياسلام علي بر البنت بباباها
انا: أمال هنعمل ايه هنموته برش الصراصير والنمل؟
تسنيم بكل شجاعه: لأ, احنا هنوجهه بس وبعدين نضربه علي راسه ومثلت المشهد بالمقشه (اللي يشوف شجاعة التخطيط
(مايشوفش التنفيذ
أنا لمروه اللي كانت لسه علي التليفون: روحي دلوقتي يابنتي ولما نشوف هنعمل ايه مع الفار هبقي ارنلك
لبست زي المقاومه ورشيت جنب الدفاية عشان يطلع وفعلا خرج من الجنب التاني واستخبي تحت تربيزة الركن
(تسنيم: تعالي رشيه هنا:(أمال الشجاعه راحت فين بس ياربي
أنا: علي فكره انتي معاكي رش زي بالظبط
تسنيم: اه صح
ورشته رشه وانا روحت كملت فطلع هو يجري نحيتي, طبعا انا وقفت اتنطط عشان مايدخلش في هدومي( ماهو مش ناقص غير كده بقي)وتسنيم بدل ماتراقبه وقفت جنبي تؤازرني وتتفرج عليا
تسنيم: هو راح فين؟
(أنا: جري تحت الكنبه دي(كنت بتنطط أه لكن متابعه الموقف
طبعا كان اختفي ومعدش له أي أثر
أنا: بصي احنا نسيب البلكونه مفتوحه شويه عشان يخرج ونتصل بماما نقولها تجيب لزق فران وهي جايه(طيبه انا قلت
(لزق عشان نبقي نخرجه مفكرتش في اننا نقتله
أنا: أيوه ياماما ازيك( لازم نمهد للست بردو) ايه انتي فين؟
سوسو: انا عند خالتك
أنا: طيب وانتي جايه ابقي هاتلنا معاكي لزق فران
سوسو بكل براءه: ليه, عايزه لزق فران ليه؟
أنا: عشان عندنا فار في البيت
سوسو بصدمه: فار جه منين ده
أنا: بما ان شباك المطبخ مقفول يبقي والله أعلم من البلكونه
وبدات دار الافتاء الجاديه
خالتي: الفار صغير ولا كبير
أنا: لأ صغير
خالتي: اه لو صغير اللزق ممكن لكن الكبير ماينفعش
بنت خالتي: لأ ولا الصغير حتي بينفع مفيش غير السم
ماشاء الله خلاص كلكم بقيتو خبراء في مكافحة الفيران
بابا جاب السم لما نزل يصلي الفجر والفار اختفي اختفاء تام ,الاعتقاد اللي ساد انه خرج من البلكونه تاني
يوم الثلاثاء باليل والبيت كله نايم ومفيش حد صاحي غيري قمت 3 ونص الفجؤ ادخل الحمام لما قفلت الباب سمعت صوت (عادي حد صحي) شويه وصوت حاجه بتقع عشان ألاقي سعادة الفار كان فوق الباب(مش عارفه بيعمل ايه الصراحه)واتخض ووقع وطلع يجري استخبي ورا الغساله
انا بكل دهشه: هو انت لسه في البيت؟؟؟؟
خرجت وسبت النور مفتوح(عشان يحسبني لسه موجوده) ونورت نور الطرقه والمطبخ(عشان يحسب البيت صاحي
(ومايتحركش من مكانه
أربعه الا تلت تسنيم صحت
(أنا :لو عايزه تدخلي الحمام فالفار جوه(طبعا جت قعدت جنبي
ماما صحت لقتنا احنا الاتنين قاعدين: أمال مين اللي في الحمام
أنا ببراءة الأطفال: الفار
ماما في صدمه(ياعيني عيلها والله) هو لسه موجود
أنا: اها وحكيتلها اللي
صحت بابا اللي لبس زي المقاومه ودخل وبعد ماقلب الدنيا خرج عشان يعلن انه مش موجود(نجح في الهرب للمره الثانيه علي التوالي وبكده يبقي مفيش مكان أمن في البيت غير أوضتنا
(وأوضة ماما
انا قبل مادخل انام:كده ضيعتو الفار اللي أنا لقيته
ماما: لقتيه!! مش كنتي موتيه بأي حاجه(ماشاء الله دي تسنيم
(أخده منها شجاعة التخطيط بقي.. نتفرج وقت الجد
يوم الأربعاء بعد المغرب
تسنيم وأحمد بره البيت, منة مازالت مسافره , بابا نايم, ماما في أوضتها, وأنا وأفنان في أوضتنا وطبعا الابواب مقفوله وأفنان ماخرجتش من الاوضه طول النهار أصلا
أنا خرجت أشوف حاجه بره ولقيت البوتجاز والع قلت أشوف ايه لتكون ماما ناسيه حاجه
أفتح النور عشان ألاقيه ميت قدام البوتاجازبعد مأكل أكل مسموم
(هو مفيش حد غيري في البيت ده ولا ايه؟)
أروح لماما: الفار مات
ماما: مات طب استني أصحي بابا يجي يشيله
وياسلام وهي بتبصلة نظرات الاشمئزاز بعد مابقي جثه هامده مانا كنت لسه الفجر ماموتوش ليه؟ ,أفنان جت تعاين الجثه عشان تتأكد انه مات واننا مش بنضحك عليها
أفنان: حرام عليكم ده صغير ليه تموتوه كده؟
أنا: حرام!! أمال مين اللي مكنش راضي يخرج من الأوضه ياربي

74 comments:

آلام وآمال said...

:D
ايه الملحمة دي يا إسراء
بس باين عليه فار طيب وساذج أوي ههههههه

المهم انكم انتصرتو عليه
بس ايه حكاية زي المقاومة ده بالظبط؟
لو بيتباع قوليلي فين
بردو الأمر ميسلمش والبلد بقت مليانة فران اليومين دول زي منتي عارفة
:D

romansy said...

هههههههههههههههههه
ايه الرومانسيه بتاعه افنان دى
وايه الشجاعه بتاعه تسنيم دى
وايه الخوف اللى انتى فيه دا
دى تنفع روايه
فى بيتنا فأر
ههههههههه
بس اسلوبك ساخر
بتحكى الموقف وكانى كنت معاكوا
سلميلى على بابا وماما
مع السلامه
فى حكايه جديده من حكايات
اسراء

TAFATEFO said...

ما شاء الله على الشجاعه والإقدام

أنا مره واحده في حياتي شفت فار .. وبدون إحراج علشان أنا بجح ومبتحرجش .. كنت مش في بيتنا وكنت بصلي .. وأنا بقعد للتشهد لقيته قدامي وبيبصلي

طبعاً طبعاً أنا مركزتش .. أنا أصلاً ببقى مغمض معظم الوقت وأنا بصلي .. بس مش عارف ليه صورته انطبعت في دماغي . بصيت لقيته

سبت الصلاه بصراحه (ومسلمتش ربنا يسامحني) وقمت مشيت (مجريتش) وقلتلهم في فار في الأوضه .. وبرضه نسيت أسلم عليهم قبل ما أمشي

:D

TAFATEFO said...

عايز أقول لحضرتك حاجه صحيح

لو الأسماء دي حقيقيه يبقى ناقص عنوان البيت وةكروكي بسيط كده علشان الحرامي ميتعبش وهو جاي يسرق

يا ريت حضرتك متستخدميش أسامي العائله والأصدقاء بالصوره المبالغ فيها دي .. لأن معلومات كتير في بوست واحد .. مع الوقت هتبقى معلومات تفصيليه كتير ممكن جداً يساء استخدامها

بلهجه تانيه أقل احتراماً :d
منتش بتكلمي أنتيمتك في التليفون يا آنسه
:D

Take care

تسـنيم said...

تاتاتاتاتاتا
لنكتشف اليوم يا إخوان إن جوز الفارة اللي ماتت معسكر في البلكونة عندنا تقريبا عايز مراته .. وبكرة هنلبس بابا زي المقاومة وهندخله يدور عليه ويقتله

ضد التيار said...

هههههههههههههههههههههههه

ايه يابنتى هو انتى كاشفه الفيران ..كل مره يقع معكى انتى

اممممممم بس الفار دا عامل زى القطط بسبع ارواح ليه؟؟؟

إنـســـانـة said...

هههههههههههههههه


مافيش بيت مصرى معندوش ذكريات مع الفار اللى بيدخل ويقرف فينا ده

انا بس سؤالى ازاى قدرتى تقفى تشرى وازاى كان فى الحمام وانتى جوا وروحتى طلعتى بكل برائة كدة

ده انا كان زماااااانى مصوووووووووتة ولاااااااامة عليا النااااااااس واهلللللللل البيييييييت والجيرااااااااان والبوابيييييييين والميكروباصاااااااات اللى فى الشااااااارع بجد


:D:D:D:D:D

يلا كل فار وانتوا طيبين يابنتى

No Fear said...

السلام عليكم
مبروك الإنتصار العظيم ده
مين أفنان؟؟
:)
الشئ الأصعب لما يكون عندك فار و في نفس الوقت عندك أطفال متعرفيش غير المقاومة اليدوية علشان الخوف علي الأطفال من السم و المقاومة تتطلب شجاعة و الشجاعة مفقودة يبقي يقعد الفار في البيت أسبوع لحد ما يزهق و يمشي لوحده أو يموت موته طبيعية لوحده ده بقة حالنا
:)

wafaa said...

هوا الفار ده مستقصدك كده ليه ؟؟

هوندا said...

ههههههههههههههههههههه يابنتى ده انا مولوده والفيران معانا فى البيت
تعرفى ان بقالى سنة تقريبا الاوضة بتاعتى فوق السطوح فيها فار يمشى ويرجعلى تانى اتعودت عليه خلاص

ahmed said...

:))))
جامدة يا اسراء

momken said...

احسن علشان يحرم يجى عندكوا تانى

اتجنن الفار ده ولا ايه

ياله خد الشر وراح


ياقتله


تحياتى

انا حره said...

لو عايزه تدخلي الحمام فالفار جوه

هههههههههههه كويس انك نبهتيها عشان تخبط قبل ماتدخل يكون الفار فى وضه مخلل ولا حاجه هههههههههه

وبعدين انتو كلكو بتصحو فوقت واحد تدخلو الحمام ورا بعض ولا ايه

والنبى الفار صعب عليا فالاخر كلكو كنتو عليه وهوا ياعين امه لوحدو المسكين

اقصوصه said...

ع فكره قصتكم مع الفار مشوقه جدا

انا اندمجت بالاحداذ

وموت البطل بالنهايه قصدي الفار احززني

بس يلا هاي حال الدنيا

وحدوووووووووووه:)

الازهرى said...

العزيزة اسراء

ملحمة اسطورية تضاف الى ملاحم الف ليلة وليلة والشاهنامة وغيرهما

بجد ضحكت كتير
ذكرتينى بقريبة لى رأت الفأر هى واختها فاتصلت بزوجها فى العمل طالبة منه نجدتها فما كان منه الا وبكل سادية وتوحش على حسب روايتها الا ان تركها جالسة على سريرها هى واختها والاطفال حتى عد ليلا

تحياتى
وان حدث مرة اخرى فلبى قوات الطوارىء فورا

Mony The Angel said...

el 7amdolellah
el 7amdolellah
el 7amdolellah

eny makontsh felbeet asnaa2 woqoo3 hazehe el 7adesa lol

mohamed ghalia said...

هههههههههههههههههههه
الحمد لله إنه مات
حسستونى إنكم كنتوا فى حرب
تحياتى
دمتى بود

mahasen saber said...

لما فيه فار فى بيتكوا مش فيه قط ليه..
هههههههه بصراحه انا حصلى الرعب وانا بقرا البوست اصلى بترعب من الفيران والزواحف الاخرى
..اعوذ بالله ..اللهم احفظنا ...
مع انالفيران مش من الزواحف بس برضه
.......
المهم كويس انكوا مش عملتوا اخلاء للمنطقه

مـحـمـد مـفـيـد said...

ياااااااااه
دي الحرب العالميه التالته دي والا ايه
:)))))))

maioya said...

فار في البيت
يعني ازمه مش هاتتحل
الا بالقتل او نسيبه يشوف حاله في مكان تاني
الصوره عجباني اوي :)
يارب جوزها يمشي بعد الحداد :lool:

Diyaa' said...

مسخرة علي فكرة
فعلاً ملحمة علي رأي أول تعليق
أنا بقي عايش في الشقة لوحدي فعلاً
فلما بييجي باخد عدة المقاومة ومش بسيبه يهرب أصلاً
أخر واحد خد خبطة داخ قمت كانسه في الجاروف ورميته من الدور الخامس..ابقي قولي لأفنان إنه مكانش صغير علي الإطلاق
واضح إنه أكل أكل ال4 شقق اللي تحتي قبل ما يطلع
بس بجد سكرة
ههههههههههههههههههههههه

أية الشقية الشعنونة said...

دى ولا مقاومة اهالى السويس يبنتى
اكتبى مذكرات مقاومة فأر
او فى بيتنا فأر
هههههههههههههههههههههه
عسل يا اسراء
حلوة اوى طريقة سردك لذيذة جدا ومسلية ومش اى حد بيعرف يعمل ده على فكرة
دمتى مبدعة و متألقة يارب
تحياتى

جمعاوي said...

السلام عليكم إسراء
ده ايه اللى بيحصل ده كل ده علشان فار وصغير كمان ههههههههه

انا طبعا مش مستغرب ده لانه عندنا فى البيت مرة كده كنت قاعد تحت وامى واختى بس فوق وسمعت دربكة وهرجلة ومطحنة وكل ما تتخيليه طبعا طلعت لقيت اختى وشها اصفر لمونة وامى مش عارف بتعمل ايه جوه ولقيت اختى بتصرخ وتقول :فار يا علاء فااااااااااااار

قلت ايه اللى فار اللبن واللا ايه هههه

بجد ما كنتش مستوعب الموقف وبعدين دخلت مستنى بقى الاقى ديناصور طالع من جوه وبعد اصطياده لقيت يعنى ممكن نحن عليه ونطلق عليه لقب فار مع انه اقرب للزواحف

فانا طبعا مش مستغرب الملحمة دى ههههه

بس برافو عليكوا انكوا خلصتوا عليه ههههههههه

دمتى لنا بكل خير وببيت بلا فئران ويلا سلام

محمود خليفة said...

عشان كده إخترعوا القطط
:)
كل فار و إنتي طيبة يا أوسة

FREE EGYPT said...

هل تريد من تعرف من وراء اسقاط الطائرة المصرية فوق المحيط؟
هل تريد ان تعرف الجهة وراء محاولة اغتيال حسنى مبارك؟ هل تريد ان تعرف من وراء مقتل سعاد حسنى و أشرف مروان؟ هل تريد معرفة القصة الحقيقية وراء مقتل ضابطة المخابرات الأمريكية فى أحد فنادق القاهرة؟ اذا أردت معرفة كل الأسرار والملابسات الخاصة بكل القضايا السابقة وغيرها من الملفات السرية فتابعنا اسبوعيا لتكتشف كنز من المعلومات الصادمة والغير متاحة الا فى ملفات اجهزة المخابرات

سري للغاية
http://toptop-secret.blogspot.com

Ma 3lina said...

ايه يا بنتى كل الناس دى على فار

كنت كلمتينى اجيبلك من الصيدلة لزقة فران بدل فيلم الاكشن اللى عملتوه ده
بس كلكم نحف الحقيقة :))

الجواز و سنينه said...

ههههههههههههههه
و الله يابنتى انا كنت عند بابا كام يوم
و كل ما ادخل المطبخ اسمع صوت فار اطلع اجرى
و اقول لبابا
ييجى و يقعد يخبط فى البوتوجاز و مش لاقيهم
النكته جايه بقى
لما جه اخويا بقوله انا سامعه صوت الفار تحت الحوض
فدور لاقى المصيده صايده اثنين
ههههههههههههههههههه
و احنا هانتجنن و عايزين نعرف صادت اتنين ازاى
ههههههههههههه
المهم انى اكلتهم عيش اصلهم كانوا جعانين جداااا يا حرام
و قعد اخويا و اختى يصحكوا عليه
بس نزل هو بقى رماهم تحت
طولت صح بس الحكايه تستاهل

esraa said...

آلام وآمال:

شفت يامحمود
(:

طيب وساذج
حرام عليك

زي المقاومه ده اي حاجه تغطيك كلك عشان الفار مايقدرش انه يلمسك لو عمل اي حركه متهوره

(:

esraa said...

romansy:

ههههههههههه

شفت بقي

كل ده وخوف في الاخر؟؟

ربنا يخليك

الله يسلمك

(:

esraa said...

TAFATEFO:

ايه رأيك بقي؟
أظن مفيش أشجع من كده

هههههههههههههههههه

كمان ماسلمتش؟
طب عدت الصلاه ولا لأ؟

طب الحمدلله انك افتكرت تقولهم انه موجود أصلا

esraa said...

TAFATEFO:

انت قصدك من موضوع الاسماء عاشن المراقبه يعني؟

لو كده مالايبهات عندهم يعني مش هتفرق

ولو علي الناس فاغلب الناس اللي هنا عارفين اسمائنا كلنا

وفي اللي عارفها بالكامل كمان
(:

علي العموم شكرا علي التنبيه ياطفاطيفو باشا واخدته بعين الاعتبار

esraa said...

تسـنيم:

يالا الله يرحمه هو كمان بقي

esraa said...

ضد التيار:

اها سايب البيت كله ومش بيطلع لحد غيري

تفتكري ممكن يكون قطه متنكره؟
/:

esraa said...

إنـســـانـة:

ده جبار ياياسمين

بصي ياستي انا كنت بخاف من الفران زمان

بس أخدت كورس طاقه مع محاضر الله يكرمه بجد

وبقيت ببص للكائنات كلها علي انها جزء من الطاقه الكونيه

وطبعا كنت بقول لنفسي كده كل ماشوفه عشان افكرها

شفتي بقي انا طلعت اشجع منك ازاي؟

esraa said...

No Fear:

وعليكم السلام ورحمة الله وبركاته

الله يبارك فيك

أختي الصغيره

لأ هي مش طفله اوي
13 سنة
(:

عيب ايه الشجاعه مفقوده دي

أظن مفيش في شجاعتي يعني
:D

esraa said...

wafaa:

أنا أعرف

قوليلي انتي
):

esraa said...

هوندا:

هههههههههههههههههه

اهو انتي اللي شجاعه في اللمه دي كلها والله

ماشاء الله يعني


اعمليله هدوم بقي زي سندرلا
:D

esraa said...

ahmed:

ربنا يخليك يااحمد
:D

esraa said...

momken:

أها شكله مجنون فعلا

هههههههههههه

esraa said...

انا حره:

مش لازم ألفت نظر البنت يعني ولا ايه؟

لأ
انا كنت صاحيه اصلا
مش بنام بدري
(:

هو لوحده اه
بس هو بألف
(:

esraa said...

اقصوصه:

ل لو أحزنك نجيب واحد تاني تربيه عندك
مفيش مشكله خالص يعني
(:

esraa said...

الازهرى:

بجد انا مبسوطه انها ضحتك

علي فكره بقي جوزها ده بجد فعلا حرام عليه

وهي عندها حق طبها
:d

esraa said...

Mony The Angel:

والله انا بردو فضلت أقول الحمدلله ان موني مش هنا

(:

esraa said...

mohamed ghalia:

ماهي كانت حرب فعلا

شكلك كده مش مقدره اللي كنا فيه

esraa said...

mahasen saber:

ماما مش بترضي علي مضوع القط ده خااااااااالص

حاولت معاها كتير جدا والله
):

لأ احنا مانسبش بيتنا للمحتل أبدا
(:

esraa said...

مـحـمـد مـفـيـد:

اها هي
(:

esraa said...

maioya:

كان مصيره القتل

لأ جوزها خلاص اتكل
(:

elsha3er said...

هههههههههههه اسمحيلى يعنى ابدأ بضحكة انا حاسس ان المقاومة الشعبية انتم بتمثلوها والاحتلال هو الفار بجد انتم كنتولازم تستعينوا بقوات حفظ السلام الدولية هههههههه الحمد لله ان المحتل مات

سلام

احمد الشاعر

صابر وراضى said...

وعليكم السلاااااااااام
فى اختراع اسمه قطط
بس بصراحع الفار يستاهل

WhItE HeArT said...

ههههههههه

اول مرة ادخل عندك بصراحه بس لو كنت اعرف ان انا هضحك كده كنت دخلت من زمان

هو من كلامك يبان انه حرب بس بيتهيألي انتم استهونتم بالفار ده انا لو في بيتنا فار وحصل قبل كده بسيب البيت وبهرب انا علشان اسيبله مكان ينام فيه

بإن بصراحه مبشمئز من حيوان في حياتي اد الفار ده

حيوان رخم ولما بيدخل حته مبيطلعش منها

يله الحمد لله ان الموضوع عدى على خير بس بعد كده متقوليش مات من غير ماتشوفيه طريح الارض

عايش علي الهامش said...

فار ..... ايه كل الرعب ده الفار كائن لطيف يجيد العض الخربشه والركل
انا كان المفروض اتصلت بالاساطير وطلبتلكم هرقليز دليفري علشان يقتل الفار ده ....لا وايه زي مقاومه

بس بصراحه انا حسيت اني بقرا مذكرات روميل ....يوم الاربعاء مساءا ويوم الثلاثاء عصرا وخطة الهجوم انا برجح انكم تهجموا بالميمنه وتثبتوا الميسره وقلب الجيش يامن الابواب ومؤخرة الجيش تمنع الهروب
ونتحرك بخطة نابليون و.....كفايه كده
نعي
توفي الي رحمة الله تعالي الفار فرفور المفرفر عن عمر يناهز خمس اشهر والعزاء بالخرابه الصفيحه الكبيره روابي

اه اوعي تسيبي البلكونه مفتوحه الفار مش بيطلع بينادي صحابه


شكرا ليكي

esraa said...

Diyaa':

ههههههه

طبعا ملحمه يابني

طب ده انت شجاع بقي علي فكره

يعين أكل الاربع شقق بحالهم

الحمدلله انه ماقدرش علي الخامسه

منورني ياضياء

esraa said...

أية الشقية الشعنونة:

ههههههههه

بس كده
حاضر

انتي اعسل
(:

ربنا يخليكي بجد

esraa said...

جمعاوي:

وعليكم السلام ورحمة الله وبركاته

اه عشان فار وصغير كمان
انت شكلك كده مستهون بالموضوع

يعني الفار بتاع البيت عندكم انت اللي اصطادتو ولا وقت الجد دخلت الاوضه وقفلت عليك
(:

ربنا يخليك

esraa said...

محمود خليفة:

مانت عارف ان سوسو مش موافقه علي القطط خالص

ابقي حاول انت تقنعها لما تيجي بقي يمكن تقتنع ولا حاجه

وانت طيب يامودي


بالنسبه للتعليق اللي مش للنشر

(:

بجد انا مش عارفه اقولك ايه
كفايه بجد انك هنا من تاني
(:

esraa said...

FREE EGYPT:

رغم انك ماعرفتش ليه الفار دخل بيتنا
(:

بس انا اكيد هاجي

SemSem said...

اول زيارة لى فى المدونة
بجد السرد للى حصل جميل اوى
الواحد حس انها حرب نووية بالمبيدات
اسلوبك جميل اوى فى الكتابة
باذن الله زيارتى مش هتكون الاخيرة
تحياتى
اتمنى زيارتكم لمدونة حواديت

esraa said...

Ma 3lina:

(:
أها كل الناس دي علي فار

ماهي دي غلطتك انتي ياموري انك ماسبتليش الرقم

esraa said...

الجواز و سنينه:

هههههههههههههه

بقي الفران في المصيدهوانتي قالبه الدنيا

ماهم بيمشو سوا

اكيد دخلو ياكلو سوا كمان بقي
(:

المهم انهم مايكونوش اخدو العنوان وكل يومين يجو عشان تأكليهم عيش
(:

ولا يهمك ياجميله طولي براحتك

esraa said...

elsha3er:

لا ياعم اضحك زي مانت عايز
(:

لأ احنا مابنستعنش بقوات اجانب

المقاومه الشعبيه عملت الواجب وزياده
(:

سلااااااام يااحمد

esraa said...

صابر وراضى:

مامتي مش بترضي خاالص اني اجيب قط في البيت
(:

مش كده بردو

esraa said...

WhItE HeArT:

ياسيدي المهم انك نورتني
والأهم انك ضحكت

هههههههههههههه
انت اللي تسيب البيت
بسم الله ماشاء الله
(:

أمال مين اللي هيتصرف معاه يعني؟

اها الحمدلله
مانا قلت انه فار مؤدب وحس انه غير مرحب بيه في البيت فسابه ومشي

كنت بفتكره عنده كرامه

esraa said...

عايش علي الهامش:

الحمدلله اني ماجربتش الحاجات اللي هو بيجدها دي
(:

لأ احنا الحمدلله قمنا بالواجب
(:

مذكرات رومل تيجي ايه بقي جنب يومياتي يعني؟

والله البكونه دي كانت مفتوحه علي طول
والأمن مستتب فيها
مش عارفه الفار ده عرف طريقها منين بس

esraa said...

SemSem:

ربنا يخليك
(:

ماهي كانت حرب فعلا

نورتني بجد
أكيد ان شاء الله
(:

ahmEd_H said...

فكرتينى بأختى , لسه متجوزه من كام شهر , اتصلت بينا من يومين هى بتصرخ علشان فار بيجرى فى الطرقه و هى واقفه فوق الكنبه و خايفه رجليها تلمس الارض و فضلت واقفه فوق الكنبه لحد ما جوزها رجع و بما انه هو كمان بيخاف من الفيران قعد معاها فوق الكنبه مستنيين ان الفار يبطل جرى حوليهم


تحياتى

esraa said...

ahmEd_H:

هههههههههه

اهو ده عيبه فعلا لما يكون الراجل كمان بيخاف من الفار

ساعتها هيعملو ايه ياعيني؟

يمامة شاردة said...

تصدقي بالله

أنا لسه عارفة إن انتي وتسنيم اخوات!!

رغم إني بزورك.. وبزورها باستمرار

الظاهر إن نسبة تركيزي في تزايد مستمر:|


خلينا في الفار

كله كوم والفيران كوم تاني

مقززة بجد

احنا لمحنا فار في البلكونة من أربع شهور ولحد النهارده ماما عاملة حظر تجول للبلكونة و حتى أما بتقفل السلك بتحط كرسي وراه


بس ألف مبروك .. فرحت لكم من قلبي

:D

esraa said...

يمامة شاردة:

لا اله الا الله

طب دي كل واحده فينا حاطه فوق لينك التانيه اننا اخوات

بس ولا يهمك بتحصل كتييييييير
(((:

هي مقززه وبس
/:

سيبتوله البلكونه يعني

طب كويس
(((:

TeVa said...

هههههههههههه

ﻷ جامد البوست دا

ربنا يحميكم من الفيران وتوابعها :))

بس أسلوب كتابتك جميل
ما شاء الله عليكي :)

حسام خليل said...

بصراحة الواحد لما قراها دمه فار

esraa said...

TeVa:

ربنا يخليك

يارب يبعدهم عننا

يسعدني انه عجبك

نورتني
(:

esraa said...

حسام خليل:

ليه بس؟؟؟

samamasr said...

بصي..قبل ما أكمل قراية الموضوع

غحنا عندنا كمية فيران رهيبة

ومش عارفة فيه ايه السنة دي..أول مرة بجد تحصل كدة..مش معقولة :(

عندكم في بورسعيد..عندنا في المنصورة..عند صاحبتي في القاهرة

فيه ايه :(


انا مقريتش لسة الموضوع..انا قريت العنوان وبس


لسة هقراه..بس بجد..افتكرت اللي واقف برة دلوقتي :(

esraa said...

samamasr:

يعني هم ماشين في البلد يعني

طيب كويس
الله يطمنك

 

The Lost Princess © 2008. Design By: SkinCorner