Thursday, August 7, 2008

...ورجعت من السفر


ورجعت من السفر (:

فترة السفر اجمالا كانت ظريفه رغم تواطؤ الأغاني ضدي الا اني تقريبا خلاص اتعودت علي كده

قضينا فترات حلوه بجد وضحكنا فيها من قلبنا

لكني اكتشفت ان في أحداث كتيره كانت مستنيه اني أسافر عشان تحصل وكأنها كانت بتستغل فرصة ان مايكونش في كومبيوتر تحت ايدي
-------------------------
مكنتش اتخيل طريقة احتفال التليفزيون الأرضي بالثورة, هم لسه مصدقين نفسهم بجد ولا ايه؟

هو مفيش حد هناك اخد باله اننا فعلا محتاجين ثورة تانيه الايام دي وان كل اهداف الثورة ضاعت؟
-------------------------------------
بعدها بكام يوم صاحيه من النوم ولسه ماقمتش من علي السرير فتحوا التليفزيون والاخبار كانت شغاله

الخبر الاول كان ايه؟

براءة ممدوح اسماعيل والوحيد اللي يتحكم عليه قبطان سفينة سانت كاترين عشانه وحش ومأنقذش الضحايا

حسيت ان دمي اتحرق اوي واننا اضحك علينا زي يوم العلاوه كده بالظبط, بجد كان ردي علي اللي سألني أكلت ولا لأ باني اكلت بعضي كان واقيعي, نايمو الناس سنتين واعتقدوا اننا خلاص نسينا وان محدش هيقول حاجه لما يطلعوا الراجل اللي قتل 1000 مصري براءة, استنيت ان الدنيا تقوم لكن معرفتش ان في حاجه حصلت غير ان النائب العام ربنا يكرمه طعن في الحكم
------------------------
يوسف شاهين كمان ربنا اختاره, ياتري عرف حكم البرأة؟
-----------------------------
فتح وحماس رجعوا يقتلوا في بعض تاني وكأن خلاص كل المشاكل اتحلت ومعدش في مشكله غير بعض, هو احنا ليه مش بندور علي المستفيد من اللي بيحصل ونفهم ان هو اللي بيولع الدنيا بدل الاتهامات اللي عمالين يتبادلوها ليل ونهار دي
-----------------------------
عيد ميلاد مودي كمان كان يوم 1/8 كل سنة وانت طيب وعقبال 1000000 سنة ان شاء الله
-----------------------
أنا قرأت كل البوستات اللي نزلت في فترة غيابي بس
(: لسه ماعلقتش عند حد

18 comments:

كاتب مصري said...

حمد لله ع السلامة ومتحرقيش ف دمك لا ممدوح اسماعيل ولا غيروه هيفلتوا من ربنا المهم إحنا نفوق لنفسنا ومنضربش ف بعض
مرة تانية ألف حمدلله ع السلامة
كل ودي ويارب تكوني بخير

A.SAMIR said...

اولا حمدا لله على السلامة
ثانيا
ثورة ايه انتي لسة فاكرة؟
احنا لو مستنيين ثورة زي انقلاب 1952 دي يبقى قوللي على البلد ةدي يا رحمن يا رحيم
خبطتين في الراس توجع يا اسراء
منتظر تعليقاتك القيمة
تحياتي

blue-wave said...

حمد الله على السلامه
والف سلامه من حرقه الدم

Cold air said...

حمد الله عالسلامة
و الأخبار بالفعل مزعجة لكن عودتك ل the lost Princess
أجمل الأخبار و نورت مدونتك مرة تانية و رجعتيلها الروح

^_^

تحياتي

العراف said...

حمد لله على السلامه يا جميل وياريت ماتحرقيش دمك لان دمك غالى عندنا وعلى فكره على راى زميلى كاتب مصرى ممدوح واسماعيل ولا غيره هيفلتوا من ربنا وحمد لله على السلامه وخلينا نشوفك

Manamino said...

الف سلامة عليكي من حرقة الدم بس هو فيه ايه في بلدنا مايحرقش الدم اصلا
انا اول مرة امر في المدونة بتاعتك بس حاجة جميلة قوي
تحياتي

wafaa said...

حمدلله على السلامة يا جميل
ويارب دايما منورانا
على فكرة عيد ميلادى انا كمان كان
1 -8

تحياتى
وفاء

المهاجر الى الله said...

ادعوكى لزيارة مدونتى المتواضعة
www.eyuon.blogspot.com
وشكرا

Ma 3lina said...

Welcome bk :)

معلش رجعتى لاقيتى كوارث بس ده العادى

esraa said...

كاتب مصري :

الله يسلمك

هم أكيد مش هيفلتو من ربنا بس واحنا بقي؟

esraa said...

A.SAMIR:

الله يسلمك يااحمد

ليك وحشه والله

لأ طبعا انا مش عايزه انقلاب جه بالبركه زي بتاع الملكيه ده

انت قلت 52 كان انقلاب عسكري وانا شايفه انه جه كده لكن اللي احنا محتاجينه مختلف تماما

ربنا يخليك يااحمد
(:

esraa said...

blue-wave:

الله يسلمك
(:

esraa said...

Cold air:

الله يسلمك
(:

ربنا يخليك يارب

esraa said...

العراف:

الله يسلمك
(:

هو بيتحرق لوحده انا مش بحرقه

هم مش هيفلتو من ربنا بس المفروض انهم مايفلتوش مننا احنا كمان

esraa said...

Manamino:

الله يسلمك ياجميله

مممممممممممم
في انها بلدنا اللي فيها أهلنا وفيها أصحابنا واللي مالناش بلد غيرها ولا هي ليها حد غيرنا

ربنا يخليكي

نورتيني بجد
(:

esraa said...

wafaa:

الله يسلمك يافوئه

بجد؟
كل سنة وانتي طيبه ياجميله ويارب عقبال 10000000 سنة
(:

esraa said...

المهاجر الى الله :

أكيد ان شاء الله

esraa said...

Ma 3lina:

ميرسي ياجميله
(:

اها كانو مستنين اني أسافر أصلا

 

The Lost Princess © 2008. Design By: SkinCorner