Wednesday, May 7, 2008

...أخدوا باليمين قبل مايدوا بالشمال


وبعدين يعني, هم عايزين إيه دلوقتي؟

قالوا في علاوة 30% عشان يبوظوا الإضراب قلنا وماله ماحنا كان مطلب من نطالبنا إن الناس تعرف تعيش حياة كريمة هي صحيح ال30% دي مالهاش دعوة بكريمة ولا حتي نعمة بس قلنا أهو أحسن من مفيش يعني

قعدنا لوحدنا في البيت يوم 4 مايو وحتي الناس في العمارة اللي قدامنا اللي كانوا معلقين علم مصر يوم 6أبريل تخلوا عني وكنت الوحيدة في المنطقة اللي علم مصر في بلكونتنا وقلت مفيش مشكلة الناس بتهدي اللعب مع الحكومة ومش عايزين يزعلوهم عشان محدش يقول علينا شعب مفيش حاجه بتطمر فيه

قرار العلاوة كان امتي؟ 1 مايو والإضرلاب الله يرحمة كان 4 مايو, يقوم إيه اللي يحصل 5 مايو بعد مايوم الإضراب يعدي بالسلامة ؟ يدوروا علي موارد لفلوس العلاوات, ليه هي مصر معندهاش موارد؟
قناة السويس قفلت ومحدش قالي, خلاص مافيش موارد غير جيوب الشعب وثمن البنزين والجاز؟

لما إحنا البنزين والجاز غالين عندنا أوي كده أمال بنصدر الغاز للي يسوا واللي مايسواش ليه؟؟؟

نكفي شعبنا الأول وننزل الأسعار وبعدين نبقي نصدر زي ماحنا عايزين وساعتها نبقي نقرر هنصدره لمين؟

محدش يحرق دمي زيادة ويقولي إن الحكومة قالت إنها مش هتاخد حاجة من محدود الدخل وإنها هتدفع الأغنياء, عشان مش كل اللي راكبين عربيات عندهم هامر, ولو عايزين يدفعوا الأغنياء بس يزودوا بنزين 95 بس لأن الحرامية مش بيحطوا غيره ومالهمش دعوة بقي ب92 و90 والجاز وبعدين هم محدودين الدخل دول الأكل اللي هيشتروه هيجيلهم طاير من الغيط ولا علي عربيات بتحط بنزين بردو؟

ومحدودي الدخل دول هيركبوا موصلات عامة بتشتغل بالبنزين ولا هيحطوا فيها مية؟

طب الحكومة عايزة ايه دلوقتي؟ عايزانا نعمل ايه واحنا نعمله؟ هم بيعاقبوا الناس عشان طلعوا مؤدبين وماشتركوش في الإضراب ولا إيه يعني؟

طب ده حتي اللي هيزهق ويقرر يسيبلهم الدنيا بحالها ويولع في نفسه مش هيعرف عشان الجاز غلي

بجد كده مش نافع ومش هينع وعلي رأي الراجل اللي جه في التليفزيون علي البي بي سي كان في الشارع وكانو بيسألوه عن رأيه في الأسعار

قال إن الحكومة بتموت الشعب بالبطئ مايموتونا كلنا مرة واحدة ويخلصونا بقي

14 comments:

A.SAMIR said...

نفسي اعرف مين اللي فهمهم ان بنزين 90 دة رفاهية؟
مين ابن اللذين اللي ضحك عليهم؟

zordeak said...

هما ليه بيعذبونا قبل ميموتونا صحيح ؟

سؤال يستحق الاجابة

:'(

مصر هى أمى said...

اظرف حاجة ان الحكومة بتدعم الغاز اللى بتبيعة لاسرائيل والبنزين بتاعنا بتشيل الدعم من عليه

الظاهر ان الحكومة فاكرة نفسها حكومة اسرائيل او ان المواطن الاسرائيلى اهم من المصرى او ان احنا اغنياء والاسرائيليين فقرا فلازم نساعدهم

ربنا ياخد الحكومة احنا مش عايزينهم

may said...

احنا اللي عملنا في نفسنا كده
ده شعب بجد جبان اوي

بلوجاتي said...

دي آخرة الأرتجالية والعشوائية
من من يسمون نفسهم المثقفين
ومن الحكومة
ومن الشعب

التفكير قبل الفعل
خاصية المفترض ان يتميز بها الانسان عن بقية الكائنات

esraa said...

A.SAMIR:

أول ماتعرف أمانه عليك تقولي

esraa said...

zordeak:

بجد مش عارفه

عايزين يخلصوا مننا يعملولنا إباده جماعيه

عشان احنا مش هنمشي ونسيبها ومش هنروح في اي حتة

esraa said...

مصر هى أمى:

يامحمد النبي وصي علي سابع جار

ودول اللي جنبا علي طول

مش عايز الحكومه تكرمهم بقي ولا ايه

خليك كريم ياراجل عيب كده

esraa said...

may:

لأ يامي احنا شعب طيب وصبور بس

لكن يوم مابنتحرك محدش بيعرف يوقفنا

الناس بس لسه عندها أمل ان الحكومه تخلي عندها دم لوحدها

esraa said...

بلوجاتي :

ايه ياعم محمد؟

احنا مقلناش علي نفسنا مثقفين ولا حاجه

والله احنا فكرنا والمفروض اننا كمان اتفقنا

جت الحكومة وعملت العلاوة وكسبت هي مافيهاش حاجه اننا نقول ان الاضراب مانجحش

لو حضرتك عندك حل تاني وبتتميز بالصفه دي وهي التفكير فياريت تقولهولنا واحنا نعمله

tamer.sala7 said...

طيب معرفتيش الخازوق التالت
هو كبير شوية بس استحمليه قال ايه الحكومة بتاعدنا زي ما زودت 30% لينا علي اعتبار اننا اخدناهم يعني زودت بتوع سيد قراره زينا وصوتي يا اللي منتيش غرمانة

esraa said...

tamer.sala7:

ماهم نواب الحكومة مش نواب الشعب

فطبيعي ان الحكومه تكافئهم واحنا اللي ندفع

النهارده شفت في الخبار ان نواب الأردن بيهاجموا رئيس الوزراء بسبب الخصخصه وبيقولو عليه انه كوهين الأردن

طب يجيوا يتفرجو علي مصر

هو احنا كده كله ضايع من كل حته حتي النواب

يا مراكبي said...

أنا لحد دلوقت مش مصدق الذكاء الخارق للحكومة بتاعتنا

تاني يوم كده على طول؟

طيب يستنوا شوية .. يداروا حبة .. لكن كده عيني عينك؟

esraa said...

يا مراكبي :

ولا أنا مصدقة والله

اها كأنهم بيقولو احنا استنينا بس عشان الاضراب ماينجحش

ربنا يتوب علينا

 

The Lost Princess © 2008. Design By: SkinCorner