Thursday, April 10, 2008

...إفرجوا عن إسراء ورفاقها

تحديث 16/4 : رغم صدور قرار باخلاء سبيل إسراء من 3 أيام لكن هي لسه في مباحث أمن دولة القليوبيه ومعاها جميلة اسماعيل لإنهاء إجراءات الخروج
----------------------------------
تحديث : قالوا في برنامج الطبعة الأولي ان إسراء هتخرج بكرة إن شاء الله
يارب تكون حقيقة
--------------------------------
أتحدى لياليك ياهروب وأتوضى بصهدك ياجنوب وأصلى الفرض الحطينى وأكتبلك عمرى المكتوب

إسراء عبد الفتاح هي الفتاة الأشهر حاليا علي الفيس بووك , إسراء للي مايعرفهاش هي البنت اللي أسست جروب اضراب 6 أبريل علي الفيس بووك


احضانك فوق الحنية ياجميلة ومريم وبهية يتفجر فى الموت بركانك وايمانك يتفجر فيا


إسراء زي ناس كتييييير مننا جالها خبر الاضراب علي رسالة موبيل وفي ايميل, يعني مش هي صاحبة فكرة الاضراب لأن الاضراب أصلا فكرة عمال المحلة وبعد كده تضامن معاهم القوي السياسيه المعارضة وبعدين انضم لهم الشعب


أنا عن نفسي لما جالي الايميل قررت اني أعمل جروب للاضراب علي الفيس بووك, لكن معرفش ايه اللي عطلني يومها عشان أعرف تاني يوم إن إسراء خلاص عملت الجروب وقلت انها في بيتها إحنا الاتنين اسراء بقي والمهم ان الجروب اتعمل واشتركت فيه


الدم على الارض خريطة مشتاقة ليوم الحرية اشلائك بتلم جراحى يرتعش الغدر وترتاحى ويعود الحلم المسلوب


إسراء حاليا مسجونه علي ذمة التحقيق عشان عملت الجروب ده


ماينفعش ان عشان انا او غيري اتأخرنا في تنفيذ فكرة وان عشان هي اللي نفذتها الأول تبقي تتسجن, ماينفعش إنهم يقولو انها حرضت علي الاضراب لأن كل اللي هي عملته انها نقلت فكرة وماضربتش حد علي ايده عشان يضرب , ماينفعش انهم يقولو انها حرضت علي الشغب لأن كل اللي هي قالته اقعدوا في البيت اليوم ده, ولأن المعروف ان السبب في أحداث المحله هي تعامل الأمن المستفز والوحشي معاهم


ماينفعش ان اسراء هي اللي تتعاقب علي كل الناس اللي قعدت في البيت يوم الأحد 6 أبريل لأن كل واحد حر يقعد في بيته زي ماهو عايز, ودي حريه شخصيه ودي تهمه من التهم الموجه الي إسراء انها أضرت بيها


ده غير انهم بيعاقبوها علي حاجه الحكومه مش معترفه بيها وقالت انها محصلتش وان الاضراب منجحش طب لسه قبضين عليها ليه؟


ياضى عيون الشهداء يازهرة صيدة وسيناء الثانية من عمرك تحينى ابنى واتبسم واشاء الكلمة من سيرتك تهدينى للاقصى يعود الاسراء

إنشاء إسراء للجروب علي الفيس بووك كان قبل بين الحكومة اللي بتهدد فيه بمعاقبة المحرضين علي الاضراب بكتييييير

سواء كنت مع الاضراب أو ضده , موافق عليه أو معارض له, ده مايمنعش إنك تقول لأ لسجن بنت لسبب مش مفهوم ومفيش حد شايف انه معقول

مهما كان رأيك في الاضراب فواجب إنساني عليك إنك تطالب بالافراج عن إسراء ورفاقها
----------------
الصوره من جروب افرجوا عن اسراء ورفاقها علي الفيس بووك
أغنية أتحدي لياليك لمحمد منير من حلقة رسالة حب لإسراء لعلاء القمحاوي علي تيت راديو

14 comments:

zordeak said...

اسراء بنت بس بمييت راجل

ربنا يحميها ان شاء الله

يمكن تكون كانت قاصدة ان الجروب يعمل الصدى ده كله او مكانتش تقصد

بس الاكيد انها عملت كل اللى كان نفسنا نعمله

حملة الافراج عن اسراء لازم تبقى حملتنا كلنا

لازم كلنا نشارك فيها وبجد المرة دى

اسراء معملتش حاجة غلط تستحق انها تتسجن علشانها

ولو هيسجنوها يبفى يسجنو السبعين الف اللى فى الجروب اللى انا واحد منهم

ولو هيسجنوها يبقى يسجنو كل واحد قعد فى بيته يومها

عروس البحر said...

يا رب افرج عنها و اصدقائها

عروس البحر said...

لسه كمان في اضراب 6مايو
عيد ميلاد الريس

عروس البحر said...

سوري الاضراب الجاي4 مايو

آلام وآمال said...

ربنا يفك كربها هي ووكل اللي زيها
وربنا يصبر أهلها

بيسوو said...

انتهاك اخر للحريات..وضربة قاتلة للديمقراطية المزعومة

اسراء مش السبب في الاضراب ولا الجروب الي هي عملته ولا حتى عمال المحلة..سبب الاضراب كلنا عارفينه كويس

ربنا مع اسراء..ومع اي حد عايز لنا هواء نظيف نتنفسه

son's egypt said...

السلام عليكم
فعلا اسراء بتتحاكم علي شئ هو اصلا حق مشروع في القانون والدستور
ولكن ماذا تفعل في بلد لا يعطي للقانون حقه

الحشرى said...

حسبنا الله ونعم الوكيل فيهم

البنت إسراء ذنبها أيه علشان بتحب مصر يعنى

اللى بيعمل على مصلحة بلده مش عاوزينه

حسبنا الله ونعم الوكيل فيك يا حسنى أنتا ورفاقك

esraa said...

zordeak:

أنا مش فاهمه هم بيفكروا ازاي؟

هي ماعملتش حاجه عشان يتقبض عليها

جالها رساله وعملتها جروب

هي مارحتش تقعد حد في بيته غصب عنه

حسبي الله ونعم الوكيل

esraa said...

عروس البحر:

يارب أمين

اها هيكون 4 مايو ان شاء الله

esraa said...

آلام وآمال :

يارب أمين

esraa said...

بيسوو:

ديمقراطية ايه بس؟

هي بقي فيها ديمقراطيلت

السبب في الاضراب اللي الحكومه عملته في الناس

يارب أمين

esraa said...

son's egypt:

من حق أي حد يقعد في بيته في اليوم اللي يختاره

بغض النظر عن إن الدستور بيكفل الاضراب السلمي

بس بنقول لمين؟؟؟

esraa said...

الحشرى:

ذنبها انها عايزه الناس تعيش بكرامه

حسبنا الله ونعم الوكيل

 

The Lost Princess © 2008. Design By: SkinCorner