Saturday, March 3, 2007

أحمد وأحمد يبقوا أحمدين, والتاج دبسوني فيه هما الاتنين.


أحمد فؤاد مع نفسى , وأحمد مبرمج حر دبسوني في تاج, ولأن أحمد فؤاد ماقلش ايه حكم اللي يموت وعليه تاج, ينفع يدخل الجنة ولا لأ, يبقي كان لازم أجاوب عليه لأني مأخراه بقالي فتره, والواحد مش ضامن عمره, بس خليكم فاكرين اني عمري ماعملت فيكم حاجه وحشه.

اسم مدونتك؟
The Lost Princess

لماذا اخترته.. ماذا تقصد به؟
أنا أصلا كنت ناويه أكتب بوست أقول فيه ليه اخترت يكون اسم المدونه كده, والحمدلله انكم وفرتم عليا,طبعا يعني مفيش شك ان أنا أميره, أعتقد ان دي حاجه واضحه (:
لكن ليه لوست, الموضوع بدأ لما كنت في كايرو كنت قاعده مع صحباتي بنتناقش في موضوع وأنا قلت رأيى, فواحده صاحبتي قالت معلش أصل إسراء من كوكب تاني, والموجودين وافقوا علي كلامها وأيدوه, وبعد كده واحده صاحبتي تانيه, ماكنتش تعرف أصحابي دول, قالتلي نفسي أعرف اسم الكوكب اللي انت جايه منه ده ايه؟, وهو كمان قالي قبل كده اني من كوكب تاني, لكن اللي خلاني أصدق الموضوع, اني كنت بكلم واحد علي النت وكنت بقول رأيى, وأنا أصلا علاقتي به سطحيه, فلقيته بيقولي اسراء انت جايه من كوكب تاني, فمن يومها قلت بايني جايه من كوكب تاني بجد, بس فقدت الذاكره, وبطلت أعد الناس اللي بيقولولي كده, فأكيد بما إن ده مش كوكبي يبقي أنا هنا لوست.

هل فكرت في إغلاق المدونة.. والسبب؟
لأ , الحمد لله مافكرتش الأفكار الوحشه دي.

صورتك فى المدونة ..رمزيتها ؟
صورة أميره مش من هنا, هي مش باين عليها ولا ايه؟

طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟
أعتقد ان أنا عندي استعداد أكتب في كل حاجه, وبفكر اني أكتب سياسه قريب, يعني هنروح في داهيه.

لماذا تدون أصلا ؟
عشان أنا عايزه أدون.

أحلى جملة قيلت لك فى وصف مدونتك ؟
مممممممم, أي حد قال فيها كلام كويس.

التعليقات بالنسبة لك ..أهميتها ؟
أكيد طبعا مهمه, ومهمه جدا كمان, لأنها بتعمل تواصل مهم جدا.

أحلى بوست كتبته ..ضع اللينك ..ثم اذكر لماذا ؟
أنا بحبهم كلهم, دول أولادي, بس أكتر واحد بحبه كلما قلت عقيم, قالت يارحيم, رحمة ربنا بجد وسعت كل شئ.

أفضل مدونة قرأتها ..يمكن اختيار عدة مدونات ؟
انزل لتحت خالص, هتلاقي لينكات لمدونات, الناس دي بجد رائعه.

أفضل بوست قرأته ..يمكن اختيار اكتر من لينك ؟
الناس دي كلها بجد بتكتب من قلبها, وكلهم حقيقي كتابتهم اكتر من رائعه.

هل خسرت صديق بسبب كتابة هنا؟
الحمدلله ماحصلش.

حد قل ادبه فى التعليق ..ايه رد فعلك ؟
الحمدلله فعلا ده محصلش معايا, أنا بتقبل النقد وبشوف انه شئ كويس جدا, لكن لو حد كتب حاجه بألفاظ خارجه, همسحها ومش هرد عليه, لأن أنا شايفه ان الحديث له مستوي ماينفعش انه يقل عنه, ولو قل يبقي ماينفعش اني أشترك في الحوار أصلا.

أسوأ مدونة ..الاجابة اجبارية ..يمكن اختيار عدة مدونات ..هما كتير اصلا
أنا مش بدخل عند الناس الوحشه, أنا بدخل عند الناس الحلوين بس, لكن أكيد أي حد يكتب أي حاجه غلط أو بطريقه خارجه يبقي أكيد دول من أسوأ المدونات.

أسوأ بوست ؟
مانا قلت اني مش بدخل عن الناس الوحشين أصلا, يبقي ازاي هشوف بوست وحش؟

أسوأ مدون ..مهو هتجاوب هتجاوب ؟
لأ اله الا الله, يعني هو أنا بكلم نفسي ولا ايه, مانا قلت أنا مش بروح عند الناس دي, وبعدين أكيد أسوأ مدونه صاحبها هيبقي أسوأ مدون.

جه وقت التدبيس بقي, مالواحد زي ماتدبس يبقي لازم يدبس, دي حتي الحكمه المشهوره بتقول كده, ومش عايزه حد يفضل يقول ليه كده, شفتوني قلت حاجه علي الأحمدين؟
محمود شاب فقري

52 comments:

Amany Y. El-Saeed said...

:)
إلا قوليلي يا إس...مين إللي بيألف التاجات دي؟؟؟
بس تعرفي...التاج ده كويس...أسئلته بتعبر عن حاجات يمكن تكون بسيطه في شكلها...لكن معناها مهم
ردودك ع الأسئله لذيذه يا إس...و لو إنك زوغتى في كام اخر سؤال
أما بقى عن التدبيسه الأموره دي...فأنا معدش حد بيبعتلى تاجات...تقريبا فاكرين إنك ماضيه معايا عقد إحتكار
:)

صحيييييييح...نسيت أقولك إنى مبحبش أعلق أول واحده...بس يلا عشان خاطرك

مصر هى أمى said...

يعنى يا ست اسراء التاج الاولانى ودبستينى فيه والتاج التانى كمان حرام عليكى

عموما التاج ده جالى كتير بس مردتش عليه لكن هرد علشان خاطرك بس

بس اجاباتك حلوة اوى
ماشى يا كوكب تانى

ibn nasser - ابن ناصر said...

ههههههههههه
حلوه كوكب تاني دي علي العموم باين ان كلنا في كوكب تاني
تحياتي

أحمد said...

روعة بجد أجابة السؤال الثانى , هو ده سر كلمة لوست .. لأ وأيه البوست اللى فات واللى قبله بيدعموا الأسم كمان
(;
أجمل حاجة أن اللى بيجاوب على التاج ده , بيتعصب بالتدريج فى أخر خمس أسئلة و يوصل لأقصى درجة فى أخر سؤال .. كابوس مش تاج هههههههه .. وكويس أوى أنك عايزة تكتبى فى السياسة .. وطبعا أهم حاجة وأنتى بتتكلمى عن السياسة أنك ماتتكلميش عن السياسة عشان الساسة بيحبسوا اللى بيتكلم عن السياسة فى عصر أضمحلال الساسة .. هههههه .. أيه اللى أنا بقوله ده .. المهم .. أجاباتك حلوة أوى وكمان السؤال بتاع "حد قل ادبه فى التعليق ..ايه رد فعلك ؟" .. زاد أوى الموضوع ده دلوقتى .. الواحد من دول يبقى قاعد فى قمة الأحباط و اليأس و مرة واحدة ييجى على دماغه السؤال الذرى "ماذا لو خنقت على أحدهم أو أحداهن بكتابة تعليق جارح أو ألفاظ خارجة؟" .. طبعا بيجيله أحباط منغولى لما مايلاقيش أى رد فعل على تعليقه وده بيزيده أحباط على احباط .. أما بقى لو كان من النوع اللى الموضوع ده عنده لذة و استمتاع بلا حدود فده موضوع تانى لأنه يوم عن يوم بيفقد أداميته

الكلام نوعان :كلام فارغ وكلام مليان كلام فارغ said...

على فكره اجاباتك حلوه

No Fear said...

السلام عليكم
أنت من أي كوكب بالتحديد خلي بالك في كواكب أتلغيت اليومين اللي فاتوا دول
أوعي تكوني منهم
تاج جميل
سلام

Unknown said...
This comment has been removed by the author.
mahmoud said...

بئا كده تعملها فيا
تفئعنى الزومبه ديا
بس تاج حلو, الرد هيكون جاهز قريب جدا جدا

تحياتى و احترامى

Unknown said...

أماني:
والله يابنتي فعلا نفسي أعرف مين اللي بيألفها, ده حتي أنا نفسي أتعرف عليه.
الحمدلله ان التاج عجبك (: وكويس ان اجاباتي أنا كمان عجبتك, لأ هو أنا مش زوغت أن مش بعرف ناس وحشين (:
طبعا يابنتي أنا نزلتها في الجزيره اني محتكره تمرير التاجات لكي (:

Unknown said...

مصر هى أمى:
ربنا يخليك يارب, وترد علي كل التاجات.
وبعدين حكاية كوكب تاني دي, ولا كأنكم عرفتوها ماشي (:

Unknown said...

ibn nasser- ابن ناصر:
ربنا يطمنك, يعني أنا مش لوحدي.

Unknown said...

مبرمج حر:
اها شفت بقي أديكو عرفتو السر, بس انت ايه رأيك الموصلات بين هناك وهنا هتفضل مقطوعه؟
أصل الكام سؤال الأخراني تقريبا متشابهين(: ولما انت عارف انه كابوس بتدبسني فيه ليه ):
مانا لما هتكلم في السياسه مش هتحبس لوحدي, مش انتم أصدقائي, علي الحلوه والمره سوا.
يسعدني ان الاجابات عجبتك.

Unknown said...

الكلام نوعان :كلام فارغ وكلام مليان كلام فارغ:
ربنا يخليكي.

Unknown said...

No Fear:
وعليكم السلام ورحمة الله وبركاته
أصل أنا لما جيت كوكب الأرض, التلوث اللي في الجو خلاني أفقد الذاكره, فمعنتش عارفه كان كوكب ايه, مانا لو كنت أعرف كنت رجعت, وربنا يستر ومايكونش من اللي اتلغو.

Unknown said...

محمد بدرى:
هنا وهناك واحد طبعا يامحمد, ورد في المكان اللي يعجبك, المهم انك ترد (:

Unknown said...

Moody:
ماهو يامودي الحكمه الشهيره بتقول, اللي اتدبس يدبس, يعني أنا عملت بيها بس, واياك تقول ماسمعتهاش قبل كده.

أجدع واحد في الشارع said...

ما اجمل هذا التاج

صريحة

بس بجد جميل

فى انتظار التاج الاخر

أحمد said...

طب وهى الأميرة عايزة تروح كوكبها تانى ليه ؟؟
سمعتى الحكمة دى قبل كده يا إسراء
"فى كوكب العميان الأعور ملك"
ده الأعور بقى فما بالك بأى أميرة عندها بصر و بصيرة و عقل
نرجع بقى للأميرة .. أميرة عندها بصر و بصيرة وعقل فى كوكب عميان يبقى تسيبه ليه وتروح كوكبها , أى أميرة عندها بصر و بصيرة وعقل فى كوكب عميان ما تقعد تلم فى حسنات من ربنا على كل واحد هتخليه يرجع يشوف وتنسى موضوع المواصلات ده خالص لانها موجودة هى والأميرات اللى زيها فى كوكب العميان عشان غاية

الملاح التائه said...

سمو الأميرة
اجاباتك دبلوماسيه شديدة الذكاء
طبعا لازم تكون كده
كلام اميرة بقى
انما بجد اسئلة التاج ده حلوة
تحياتى

Unknown said...

أجدع واحد في الشارع:
ربنا يخليك, بس في انتظار ايه, هو في تاج تاني (:

Unknown said...

مبرمج حر:
أنا أكيد مؤمنه ان كل انسان ربنا خلقه عشان سبب ورساله لازم يأديها, بس أحيانا الانسان بيتعب, هي أكيد بتكون فتره وبعد كده بيرجع زي الأول تاني, لكن هي عايزه ترجع كزكبها, عشان الناس هنا مش زي الناس هناك.

Unknown said...

الملاح التائه:
ربنا يخليك, طبعا يعني هي دي طريقة كلام الأميرات (:

أحمد said...

خليها بس ترتاح شوية , أى أميرة فى الدنيا لازم ترتاح شوية وبعد ما ترتاح .. هتلاقى الأفكار و القوة والغاية أتجددوا من جديد و هتفرح أوى بكده
وهكذا بقى كل ما تتعب ترتاح شوية .. أما بقى الناس .. هاقولك أيه على الناس .. الناس هنا مش زى أى ناس على أى كوكب أساسا .. يأما ناس لا تكترث أو ناس تحارب بدون مبرر أو ناس مش فاهمة ومش عايزة تفهم .. هناك بقى على كوكبها حاجة تانية .. كل اللى هناك بيفهموها لكن المشكلة أن المواصلات بين كوكبها وكوكبنا مقطوعة العيب مش فى كوكبها على أد ما العيب فى كوكبنا اللى الرحمة فيه ممنوعة وعقبال بقى ما المواصلات ترجع تانى لازم تحاول تخلى كوكبنا زى كوكبها أو تتخيل أن ليها كوكب جوه كوكبنا وتحاول أن الكوكب الصغير ده يبقى زى كوكبها

raspoutine said...

انا عارف انك مش من القاهره وساكنه بعيد بس قلت لازم ابعتلك العوة برضو يمكن يبقى فى طريقه وينفع تيجى




دعوة عامه لكل المدونين المصريين لحضور اللقاء الثالث الذى تحدد موعده من قبل المشرفين عليه والمؤسيسن له


وذلك يوم


الجمعه الموافق 9/3/2007


بدار الاوبرا المصريه


كوفى شوب الابداع


بجوار دار الابداع بداخل الاوبرا


والدخول للمكان من البوابه الخلفيه للاوبرا امام النادى الاهلى


والحضور بالملابس الشتوية


واوجه الدعوة خاصة الى الاخوات المدونات بشكرك

zordeak said...

:)


شكرا على اجابةا لتاج

اجوبتك جميلة كما توقعت

انا كنت عايز اعرف فعلا ليه سميتى المدونة كده

واللى توقعته لقيته

انتى فعلا من عالم تانى

انا بيتهيالى قلتلك الحكاية دى قبل كده

ربنا ما يقطع الود

ويجعله عامر

:)

محمد صلاح العزب said...

دماغك حلوه
مساء الجمال

أحمد الشمسي said...

على فكرة انتي ما جاوبتيش عن الأسئلة، أو عن معظم الأسئلة، انتي لفيتي ودرتي حواليها...

Haitham Abu Akrab said...

الحاجه اسراء
بقالي زمان باجي عندك- سوري- مبجيش
المهمم اول م دخلت لاقيت التاج الواضح انه موضه المدونات اليومين


عجبتني قوي


لماذا تدون أصلا ؟
عشان أنا عايزه أدون


كلنا بندون علشان عايزين ندون
؟؟

Unknown said...

مبرمج حر:
عارف ياحمد شكلك كده عارف الكوكب التاني كويس, والصراحه هو بجد الناس هنا مش زي أي ناس علي أي كوكب, بتوع هنا دول مفيش زيهم(:
بجد ياحمد شكرا علي كلامك, ربنا يكرمك ويعزك (:

Unknown said...

raspoutine:
ربنا يخليك بجد, انك تفكر تبعتلي الدعوه ده شئ أسعدني جدااااااااااااااا.

Unknown said...

zordeak:
انت تؤمر ياحمد, يعني تاج ممرتهولي انت وأحمد يبقي لازم أجاوب عليه (:
وأديك ياسيدي عرفت أنا ليه سميتها كده, اي حاجه تانيه تحب تعرفها قولي عليها علي طول ((:

Unknown said...

محمد صلاح العزب:
ربنا يخليك, انت أحلي (:
نورتنا.

Unknown said...

أحمد الشمسي:
لا والله ياحمد انا ماهربتش, أنا الحمدلله فعلا مادخلتش أي مدونه وحشه, والحمدلله علي ده (:

Unknown said...

هيثم ابوعقرب:
ياااااااااه هيثم أبو عقرب, عودا أحمد. وماتبقاش تتأخر تاني.
ماهم اللي بيسألو أسئله غريبه ياهيثم, لماذا تدون, ماكيد بعمل كده عشان أنا عايزه أعمل كده((:

Music Gates said...

مستغربه انتي بيقوليليك ليه انتي من كوكب تاني انا فهمت اقري السؤال التاني كدا و انتي هتعرفي


لكن ليه لوست, الموضوع بدأ لما كنت في كايرو كنت قاعده مع صحباتي بنتناقش في موضوع وأنا قلت رأيى, فواحده صاحبتي قالت معلش أصل إسراء من كوكب تاني, والموجودين وافقوا علي كلامها وأيدوه, وبعد كده واحده صاحبتي تانيه, ماكنتش تعرف أصحابي دول, قالتلي نفسي أعرف اسم الكوكب اللي انت جايه منه ده ايه؟, وهو كمان قالي قبل كده اني من كوكب تاني, لكن اللي خلاني أصدق الموضوع, اني كنت بكلم واحد علي النت وكنت بقول رأيى, وأنا أصلا علاقتي به سطحيه, فلقيته بيقولي اسراء انت جايه من كوكب تاني, فمن يومها قلت بايني جايه من كوكب تاني بجد, بس فقدت الذاكره, وبطلت أعد الناس اللي بيقولولي كده, فأكيد بما إن ده مش كوكبي يبقي أنا هنا لوست


ايه ده احنا الي تهنا في الكلام ده محتاج gps علشان نوصل هههههه انا بهزر لاتخديها بزعل اشطه عليكي انا فرحان في الي مدبسين في التجات دي علشان اانا ادبست فيهم قبل كدا اشطه مش هتتحرمي مني بعد كدا

Anonymous said...

الاجابات كلها جميله ومنسقه احيكي علي اجابتك

Unknown said...

copa:
مش عيب عليك تفرح فيا وانا زي أختك؟ :(
وبعدين انت لو حتي بتتكلم جد أنا مش هزعل منك (:
ويارب ياسيدي ماتحرمش منك بعد كده (:

Unknown said...

fares:
ربنا يخليك, ده من ذوقك (:

yousef said...

ابقى قوليلى انتى من كوكب ايه جايز نطلع قرايب لانى من كوكب فكاهه يا ساسو

Unknown said...

yousef:
يوسف, عودا أحمد, فينك من زمان؟
والله يايوسف مش عارفه اسمه, أصل التلوث اللي في جو الأرض خلاني أفقد الذاكره, ده انا مكنتش عارفه اني مش من هنا أصلا غير لما قالولي.

vision said...

اجاباتك لذيذه يا ايسو والله وحشتنى الزياره والفعده عندك بس تسدقة هنا تراوه عن عندى يلاا فسحى العالم دى فالبلكونه وانا هدخل اعمل كباتين شاى وهيثم مش هنشربو عالشان ؟؟عالشان ...معرفش اهو هو غلااسه وخلااص

الأباصيرى said...

بلاش الإجابات الدبلوماسية دى عشان مابتاكلش معانا

صباح الخيير

الأباصيرى said...

حلو موضوع لوست دة

أنا برضة لوست بس على باب جامع

هههههههههههه

مساء النور

Anonymous said...

مبروك على التاج يا اراء وردودك حلوة

Unknown said...

camera_girl:
ربنا يخليكي, انا كمان وحشني مجيك هنا, بس انت كمان الجو عندك جميل, ومعلش سامحي هيثم المره دي واعمليله شاي, يعني هيبقي الوحيد اللي مش بيشرب , ويفضل يبصلهم.

Unknown said...

الأباصيرى:
هي مش دبلوماسيه , هي دي الحقيقيه أنا مش بدخل عند الناس الوحشين, والمهم ياسيدي اني مش لوست لوحدي, وان في حد زيي (:

Unknown said...

hend:
ربنا يخليكي, ومنورانا.

أحمد العربي said...

الف الف مبروك ع التاج ..... عبقال العرش ههههههه
انا بقي زميل جديد لانج وبقول يا هادي

Unknown said...

أحمد العربي:
الله يبارك فيك وعقبالك, أنا حليت 3 تاجات لحد دلوقتي يعني المفروض يدوني عرش فعلا (:
وأهلا بيك هنا وفي عالم التدوين (:

david santos said...

Hello, esraa!
This post is very good, thank you
have nice wkend

Unknown said...

david santos:
thank u, and wellcome.

Unknown said...

ياللا تاج ومكتوب على كل الناس
اسم مدونتك؟
عايش منصور
...........................
لماذا اخترته.. ماذا تقصد به؟
لإنى بقصد المعنى اللى فيه، ونفسى اوصله
...........................
هل فكرت في إغلاق المدونة.. والسبب؟
لأ ما فكرتش ..
...........................
صورتك فى المدونة ..رمزيتها ؟
صورتى
...........................
طبيعة كتابتك فى المدونة بشكل عام ..سياسة ..قصة ..عبث ..كلام فاضى ؟
بكتب اللى ممكن اوقوله مع نفسى فى اى وقت
...........................
لماذا تدون أصلا ؟
علشان اطلع الكلام ده ومابيقاش مجرد كلام
.............................
أحلى جملة قيلت لك فى وصف مدونتك ؟
انها بتتحس مش مدونة
............................
التعليقات بالنسبة لك ..أهميتها ؟
لما حد يقرأ مقال فى جريدة او قصه فى كتاب بيقول رآيه، بس الكاتب مش بيسمعه. والكاتب بيرجع يكتب لإنه عايز يكتب مش للتعليقات اللى وصلت ليه
.............................
أحلى بوست كتبته ..ضع اللينك ..ثم اذكر لماذا ؟
عاش منصور ومات منصور و بوست حوار بينى وبين اخى المسيحى و بوست الحجاب بين الرجل الجنسى وتحضر المرأة.. موضوعات كنت حابب اتكلم عنها وحاسس بيها
..............................
أفضل مدونة قرأتها ..يمكن اختيار عدة مدونات ؟
اللى موجودين عندى فى القائمة بحب كتابتهم جدا
..............................
أفضل بوست قرأته ..يمكن اختيار اكتر من لينك ؟
بوست عن قصه فى فنتازيا عجبتنى جدا
..............................
هل خسرت صديق بسبب كتابة هنا؟
لأ الحمد لله ما حصلش
..............................
حد قل ادبه فى التعليق ..ايه رد فعلك ؟
هعتبره ظاهرة سراب
..............................
أسوأ مدونة ..الاجابة اجبارية ..يمكن اختيار عدة مدونات ..هما كتير اصلا
اى مدونة بحس انها يتخدش حيائى واتكسف اقول لحد يخش يقرأها
..............................
أسوأ بوست ؟
اى بوست ينطبق عليه المعيار السابق
.............................
أسوأ مدون ..مهو هتجاوب هتجاوب ؟
برضه اللى ينطبق عليه نفس المبدأ
..........................
اشكرك على اتاحه الفرصه ليا ارد على التاج

 

The Lost Princess © 2008. Design By: SkinCorner