تدوينة حداد لخالد سعيد

رغم إن تقرير اللجنة الثلاثية للطب الشرعي حاول يضيع حقك ياخالد وحاول إنه يحمي كلاب النظام بس ماتقلقش إحنا مش هنسكت ولا هنهدى لحد ماللي قتلك يتحاكم
النهاردة تدوينة حداد على خالد سعيد وكل شهداء التعذيب في مصر والنهاردة كمان كل المصرين هينزلوا في كل المحافظات الساعة 6 ونص عشان يقفوا وقفة صامتة على الكورنيش حداد عليهم
إحنا مش هنصدق كلامهم ومش هنسكت عن حق اللي اتقتلوا غير لما يرجع

عم عبد السميع الله يرحمه ضحية جديدة للفافة

وطبعا عم عبد السميع الله يرحمه هيطلع كان صاحب مزاج وكان مهرب معاه لفافة بانجو أو حشيش الحجز ولما الظابط كان بيمر عم عبد السميع اتخض فبلع اللفافة واتخنق منها ووقع على راسه قام مات
الموضوع منقول عن انجي
اشترك في صفحة عم عبد السميع علي الفيس بووك هنا

ضحية جديدة من ضحايا التعذيب في أقسام الشرطه
الحكاية عرفتها من النت وكانت أخبار وكلام متضارب ومن غير مصدر بس وصلت لرقم بنت الضحية اسمها رضا كلمتها وفهمت منها اللي حصل لوالدها واتفقنا علي ميعاد أقابلها ونسجل وهي تحكي اللي حصل لأبوها والميعاد الساعه 6 م في مدينة نصر الحي العاشر أمام شبراوي فضلنا ندور عليه نص ساعه لحد ما وصلنا أنا ومصطفي الشامي ومحمود سامي
أنا كنت متحمسة جدا لمقابلتها خصوصا انها في التليفون كانت مش خايفة ووافقت تسجل وتتكلم وقولتلها تجهز صوره لوالدها ونسجل مع اهله ولو فيه شهود شافوا اللي حصل مع رئيس الحي وقالتلي مش هنسيب حق أبونا وحكتلي بالتفصيل حكايته في التليفون خاصة بعد ما الكلام بدأ يتنشر إنه صاحب عربية كبدة وكانت خناقة مع الحي
الحكاية الحقيقية من بنته رضا
عم عبدالسميع صابر 60 سنة عنده 6 بنات منهم رضا
عنده كشك قدام الحي واخده من 40 سنه وهو مصدر رزقه له ولعياله
مره رئيس الحي( الليثي) معدي مش عجبه منظر الكشك نزل هو والمهندسين وطلب ازالة الكشك ,عم صابر قاله ازاي ده مترخص والورق كله موجود وسليم ورئيس الحي طبعا أمر بالإزاله وجاب البلدوزر وشال الكشك
عم صابر كل جريمته انه قاله حرام عليك هجيب عشايا منين أنا وعيالي هأكلهم منين
وطبعا معالي رئيس الحي إضايق فخلى المهندسين ياخدوه القسم وعمله محضر تعدي علي رئيس الحي والمأمور قعده شوية في القسم وخرجه
روح وهو مش عارف هيجيب منين عشاه وعشا عياله بعد ما أزالو الكشك
قرر إنه يقعد في الشارع اللي كان فيه الكشك وحتي الشارع حرموه منه .
رئيس الحي معدي لاقاه قاعد في الشارع قاله انت تاني قوم من هنا
وخلى المهندسين يمشوه بالعافيه
الجريمة الشنعاء اللي ارتكبها عم صابر ودفع تمنها حياته إنه قال لرئيس الحي إيه الإفترا ده إنت راجل مفتري وكانت أخر جملة قالها عم صابر وهو حر بيدافع عن لقمة عيشه مش بيطلب تعديل دستور ولا بيطلب إنهاء حالة الطوارئ ولا بيطلب إسقاط نظام فاسد ومنظومة فاسدة
كل اللي طلبه الكشك اللي بياكل منه وبيأكل منه عياله
رئيس الحي معالي الليثي باشا خده القسم ووصي عليه دخل قسم أول مدينة نصر وخرج منه في اليوم الخامس جثة مشوهة
خلال 4 الايام كان بناته وولاده بيسالوا عليه وليه حاجزينه يقولولهم تشابه أسماء وبيكشفوا علي إسمه وهيخرج
طيب عايزين نشوفه والدنا ونطمن عليه ده راجل كبير دخلوله أكل بيردو عليهم بإهانه وممنوع وبره وإلا تتدخلوا معاه
ويخرجوا من القسم ومعاهم أمل إن والدهم هيخرج معاهم تاني يوم لحد اليوم الخامس كلموا أهله وقالولهم تعالوا
استلموا والدكم والبقاء لله توفي
وقع علي الارض اتخبط وماات
استغربوا معاملة الظباط ليهم بعد الإهانه في الأيام الأولي دلوقتي بيعاملهم كويس وبيقولوهم سرعوا في اجراءات الدفن والبقاء لله وإكرام الميت والكلمتين اللي عارفينهم
دخلوا يستلموا جثة والدهم برغم الحزن والوداع من غير سلام لكنهم مؤمنين بالله وقالوا قدره ودخلوا شافوا والدهم لكن الصدمة كانت أكبر من خبر وفاته
الصدمة والدهم 60 سنه دماغه مفتوحة وعلامات ضرب علي ضهره وجسمه وطفي سجاير في رجله وضهره
ابنه انهار وبناته انهاروا لما شافوا والدهم وأثار التعذيب علي جسمه والدكتوره قالتلهم إنه مات من التعذيب والخبطة علي دماغه بألة حادة أو بطبنجة مش واقعة علي الأرض زي ما بيدعوا
الحكاية وقفت لحد هنا وقالتلي انا عايزه أجيب حق ابويا قولتلها حق أبوكي وحقنا كلنا هناخده ومش هنسكت وحددنا ميعاد الساعه 6م
ورحت الميعاد أنا والشامي وسامي
العزا كله لو 30 بيعزو ف28 واحد مخبرين وظباط من ال30
المنطقه كلها متلغمة مخبرين وظباط في العزا وفي الشارع
انا دخلت عزيتهم ورضا قالتلي انت انجي حمدي تعالي وخدتني علي جمب قالتلي محدش يعرف هنا اللي حصل احنا بس بناته اللي نعرف قلتلها طيب تعالي نطلع فوق نتكلم و نسجل طبعا عينها مش في راسها عينها على المكان وعلى المخبرين ومرعوبة
قولتلها يالا يا رضا قالتلي طيب مش تتطلعي صورتي صوت بس قلتلها طيب وجت واحدة متعصبة في البداية وانت مين وعايزة ايه ومش عايزين صحفين هنا قولتلها أنا مش صحفية أنا إنجي حمدي من شباب 6 ابريل وهنزل موضوع والدكم واللي حصله في موقع علي النت وفضلت ساعة احلفلها إني مش صحفية ولا بعمل ده بأجر خصوصا انها كل ما أمسك الموبايل تترعب وتقولي لو صورتي هرفع عليكي قضية واتكلمت معاها بهدوء وفهمتها إنه لازم تتكلم ولازم نبطل خوف وده في مصلحتها ومصلحة أبوها قالتلي كل اللي حواليكي وبيبوصلنا مخبرين وظباط امشي من هنا إحنا مش ناقصين مشاكل وعرفت من رضا إنهم متتهددين ورعبينهم وخايفين يتكلموا او ينطقاو وكل شوية تيجي بنت من بناته تقول لاخواتها الواقفين معايا إحنا قولنا إيه قولنا ده قضاء ربنا والحمدلله راضين
اتفضلي امشي من هنا مش ناقصين مشاكل لو مش خايفة علي نفسك إحنا خايفين وخسرنا أبونا ومش عايزين نخسر ولادنا أو رجالتنا والوحيدة المتفهمة هي رضا قولتلها إحنا متفقين نصور وتتكلمي ونفضحهم لازم تفضحوهم انتم أصحاب حق انتم الأقوي خايفين من إيه
و رضا متحاصرة منهم زيي بالظبط وممنوعة تتكلم معايا حتي بكمية الحجج اللي عملتها عشان أخد رضا لوحدها وهما حواليها ويقولولي امشي من هنا اتكلم معاهم تقولي حقنا هناخده ولو مش بالقانون إحنا صعايده وهناخده بطريقتنا
بدأ المخبرين ينتشروا والظباط المدني قررت إني مش أستسلم لخوفهم ودخلت لعزا الرجالة لقيت الشامي ومعاه بن الضحية بيحكيله اللي حصل لما شاف جثة ابوه
قعدت معاهم قلتله تسجل وتحكي اللي حصل ولا خايف زيهم قالي وطي صوتك عشان اللي في وشنا دول مخبرين وظباط وهسجل معاكم وأنا مش خايف وفعلا أخدته وقمنا من العزا وأخدنا كرسين وهو بيكلمني بصوت واطي بيحكيلي التهديدات والرعب اللي شايفنه من ظباط القسم ولو اتكلمو هيلبسوا قضايا بس برضه الولد مش خايف وأول ما الكامير طلعت المخبرين والظباط قاموا وأخته جت زعقت جامد جداا وقالتلي برضه تاني امشي من هنا ولو صورتي صورة واحدة أنا هرفع عليكي قضية وانا برضه بقنعها انها لازم تتكلم قالتلي بأعلي صوت بره امشو بره وربنا لانده الظباط والمخبرين وأسيبهم عليكي إمشي من هنا الولد زعقلها قالها محدش يقدر يجي جمبهم وأهلها اتلموا واعتذرولي واني لازم أقدر حالتها أنا مقدرة بس مخنوقة إنها خايفة تتكلم قالتلي برة امشوا من هنااا والمخبرين والظباط بيتفرجوا والاول مش كانوا موافقين أتكلم مع ابنه أو يمشي معانا بس لما هي عملت كده وكشفتنا الولد خاف علينا وقالهم هطلعهم علي أول الشارع
وطلعنا ببركة دعاء الوالدين وابنه قالنا علي التهديدات ويلبسوا قضية مخدرات أو سلاح وكمية الرعب اللي هم شافينه بس مش هسكت ولازم أخد حق ابويا وهخسر إيه انت عارفة يعني إيه أشوف ابويا في سنه ده أبويا اشوفه كده علامات الضرب والسجاير في جسمه ودماغه محفورة نص إيدي تدخل جوة الحفرة اللي في دماغه
ده ابويا عمل إيه عشان يعملوا فيه كده كانوا بيتسلوا عليه ال 4 أيام بس وربنا ماهسيب حقه مهما عملوا يلبسوني قضية يموتوني برضة مش هسيب حقه وكان بيتكلم بإنهيار وطبعا المخبرين واقفين وهدناه أنا والشامي واتكلمنا معاه والشامي خد رقمه وقالنا هنتقابل تاني بس مش هنا ووعد مش هسيب حق أبويا ولازم تقفوا معايا وخلوا بالكم علي نفسكم أوي وأهله بدأو يجولنا والمخبرين طبعا راشقين فيكل مكان
وخرجنا من المنطقه وركبنا العربية إاحنا العين كلها علينا
لكن طول الطريق أنا والشامي بيدور في دماغنا نفس السؤال
الخووف ممكن يعمل كده في الناس؟؟
الخوف والرعب اللي هم عايشينه من مين؟؟
من اللي المفروض بيحمونا
اللي المفروض هم الي يحسسونا بالأمان
لكن راح الأمان مع نظام مبارك الفاسد
طول الطريق وإحنا بنفكر الناس دي ممكن فعلا تاخد حقها؟؟
الناس دي أهلي وأهلك لا هم من كبار وأعيان البلد ولا هم من حرامية البلد
أهلي وأهلك اللي ماشيين جنب الحيط وبيدورا على أكل عيشهم
عم صابر برضة بيدور علي أكل عيشه ومات مشوه
مات غدر
مات متعذب
مات وذنبه في رقبتنا
هنعرف نجيب حقه وحق خالد وحق الألاف اللي في الأقسام والسجون وكلاب الشرطة بيتسلوا عليهم وبيمارسوا أبشع أنواع الشذوذ وهم عارفين إنهم أقوي وإنهم في حماية العادلي وممكن كمان ياخدوا مكفأة لو حكاية عم صابر فضلت مدفونة معاه

خالد اتقتل مع سبق الاصرار والترصد

تحديث:

ده الفيديو اللي خالد اتقتل بسببه
المفروض ان الفيديو بيوضح ظباط القسم ومخبريه وهم واقفين قدام ضبطية حشيش وواحد فيهم بياخد جزء منها لزوم المزاج ورئيس المباحث بيعرض علي واحد تاني لفة
حسب المعلومات إن الضبطية دي بتتفرق عليهم هي والفلوس المضبوطه واللي كانو بيعدوا عددهم عشان تتقسم عليهم وبيسيبو جزء بيعملو بيه المحضر واللي صور الفيديو ده واضح جدا إنه واحد منهم وإن الفيديو اتسرب بعد كده ووصل لخالد اللي بدوره وزعه علي أصحابه وكان ناوي يرفعه علي النت بس كلاب الداخلية عرفوا ودخلو عليه السايبر وهو رايح لصاحبة وكانوا عايزين يفتشوه عشان ياخدو الميموري وهو رفض وطبعا انتم عارفين الباقي
الفيديو ظاهر فيه المخبر اللي متهم في قتل خالد هو اللي لابس الطاقية
طبعا انشروه في الدنيا كلها وافضحوهم عشان يتحاكموا ويارب يتعدموا

ده خالد كان عنده 28 سنة ومقيم بالأسكندرية
اللي حصل إن خالد دخل سيبر نت ودخل اتنين مخبرين وكانوا عايزين يفتشوه، ولأن خالد عارف حقوقه كويس وكمان عارف هو بيعمل ايه وحط تحت بيعمل ايه دي 100 خط رفض انه يتفتش لأن طبعا المخبرين مش معاهم إذن بتفتيشه
كان رد المخبرين إنهم مسكوا خالد وشلوا حركته وبدأوا يضربوه ضرب مبرح وركلات في البطن والصدر والوجه، ثم إقتادوه لبوابة العماره المجاورة وأكملوا ضربه ، خالد كان أغمى عليه وبدأ ينزف من فمه وأنفه واعتقد المخبرين إن خالد بيمثل فخبطوا راسه في السلم عشان يفوقوه، وطبعا خالد مافقش فشالوه وحطوه في البوكس وطلعوا بيه علي القسم وبعد مرور ربع ساعة رجعوا ورموا جثته من مكان ماخدوه
وبعد كده جت قوات أمن لتفتيش المنطقة والبحث عن موبيل وكارت ميموري ظن الناس الموجودين إن أحد الشهود صور الجريمة
طيب نرجع للأول تاني
خالد كان حصل علي فيديو بيفضح ظابط واتنين مخبرين أثناء اتجارهم في المخدرات وقام بتوزيعه علي أصدقاءه في المنطقة وكان ناوي يفتح مدونة عشان ينشر عليها الفيديو عشان يفضح اللي حصل, المخبرين عرفوا ودخلوله عايزين يفتشوه عشان ياخدوا منه الموبيل وهو طبعا رفض لأنه عارف حقوقه وعارف انه بيصورهم، ومن الواضح إن عملية التفتيش اللي حصلت بعد قتله كانت علي الكارت ميموري بتاعته عشان الصور اللي عليها
أخو خالد لما عرف اللي حصل راح القسم عشان يقابل حضرة الظابط اللي قاله أخوك كان مدمن مخدرات ومات بجرعة أقراص مخدرة زيادة في الحجز
طيب ياحضرة الظابط عشان الموضوع يبقي مظبوط قول انه كان مدمن أقراص مفجرة، وانه بعضها انفجر في معدته مما أدي للكسور اللي في جسمه والنزيف الداخلي وبعضها انفجر في فمه قبل بلعها مما أدي لكسر جمجمته وقطع شفته وخلع أسنانه وتمزيق شعره، أقراص مخدرة ايه اللي تحول الوجه البرئ ده للصورة البشعة اللي شفناها كلنا؟
أخوه طبعا حس إن الموضوع بيطبخ وان حق خالد هيضيع فما كان منه الا انه طلع علي السفارة الأمريكية بما انه بيحمل الجنسية الأمريكة وطالبهم بالتدخل لحفظ حق أخوه من الضياع
خالد زينا، بيحاول إنه يدافع عن البلد دي وعن شباب البلد دي، حاول يفضح اللي بيروجوا المخدرات رغم إنهم المفروض يحموا شباب مصر منها
احنا ازاي بقينا كده ووصلنا للحال ده، إزاي الناس وقفت تتفرج عليه وهو بيتقل ومحدش اتدخل غير انهم توسلو للمخبرين انهم يسيبوه، وازاي بقى اللي عايز ياخد حقه أو حق اخوه لازم يكون معاه جنسية تانيه تحميه؟
يعني ايه يهددوا كل الشهود إن لو حد اتكلم مع الاعلام هيعتقلوه، إيه الغابة اللي إحنا عايشين فيها دي؟
اللي قتلوا خالد قتلوه عشان مايتكلمش، يعني ماعدش موضوع تعذيب أفضى إلي الموت، لأ بقى قتل مع سبق الاصرار والترصيد ، والاتنين مخبرين اللي مسكوه وحضرة الظابط اللي كان في القسم لازم يتحاكموا أسماء المعتدين على خالد سعيد من واقع اطلاع محامى النديم على تحقيقات النيابة العامة رقم 7438 لسنة 2010 ادارى سيدى جابر أمين شرطة سرى محمود صلاح محمود 26 سنة ورقيب سرى عوض اسماعيل سليمان ومحرر محضر التحريات بالقسم الرائد محمد ثابت وقائد سيارة البوكس الرائد أحمد عثمان "
احنا عايزين حق خالد ومش هنسكت غير لما ناخده وغير لما يتعدم جلاده
اضغط هنا للاشترك والتضامن ومتابعة أخبار خالد
وهنا لو عايز تشوف صورة قبل حادثة تعذيبة
وعشان تشوف صور خالد بعد التعذيب واللي لازم تشوفها رغم بشاعتها عشان تدرك اللي حصل اضغط هنا

أسطور الحرية، غزة، مصر

أنا مش هتكلم عن أسطول الحرية ولا عن الغاية النبيلة السامية اللي كان بيمثلها
أنا كمان مش هتكلم عن الهجوم الارهابي الصهيوني علي الاسطول ولا هتكلم عن الجنود اللي كانو بيطلقوا الرصاص أثناء عملية الإنزال ولا عن إحتلال الأسطول واقتياده تحت القوة الجبرية والعسكرية من المياة الدولة لاسرائيل
كمان مش هتكلم عن تماسك المتضامنين بداخل الأسطول ولا عن المرأة التركية اللي كانت مكبلة زي كل رهائن الأسطول وجلست بجوار جثة زوجها تنتحب في صمت ولما حاول باقي الرهائن التخفيف عنها طالبتهم بعدم مواستها لأنها قدمتة هدية لغزة
مش هتكلم عن الرجل الألماني اللي عدي (80 سنة) واللي بيختلف معانا في الجنسية والديانة واللغة واللي رفض شكر النائب حازم فاروق له وقال إن ده واجبه اللي بيتحتم عليه انه يعمله بصفته إنسان حر
أنا كمان مش هتكلم عن القتلى ولا الجرحى اللي محدش يعرف عددهم ولا جنسيتهم للآن
ومش هتكلم عن تركيا اللي خرج منها الأسطول لفك الحصار عن غزة ولا هتكلم عن قطع أردوغان لزيارته لأمريكا الجنوبية ولا عن جلسة مجلس الأمن الطارئة اللي تركيا طالبت بها
وأكيد مش هتكلم عن أمريكا وحمايتها المستمرة لإسرائيل من تحمل جميع مسئوليات أعمالها الاجرامية
ومش هتكلم عن المظاهرات اللي عمت جميع أنحاء العالم ولا الناس الجديده اللي انضمت للقضيه ولا حتي عن السفينة رتشيل كوري اللي معرضة إنها تلاقي نفس مصير السفينة مرمرة ولا عن المراسلين الدولين اللي إنضمولها بعد أحداث أمس
وأكيد بردو مش هتكلم عن بيان مصر اللي بيدين إستخدام العنف المفرط وكأن العنف اللي مش مفرط ماشي ومفيش مشاكل فيه
ولا هعلق علي قناة النيل للأخبار اللي دونا عن العالم كله حملت حماس مسؤلية اللي حصل لأنها رافضة الافراج عن شاليط الأسير الصهيوني لديهم وإحنا عظم أسرانا مش لاقي اللي يدفنه
أنا كمان مش هتكلم عن خطاب أوردغان قدام البرلمان التركي ولا إنه وجه لاسرائيل خطاب لم يوجهه لها أحد منذ انشائها ولا هعلق على تأكيده بضرورة معاقبة الجاني ولا اجتماعه بوزير دفاعه مرتين للآن ولا علي تأكيده بأن تركيا عدو لدود كما هي صديق جيد
أنا مش هتكلم عن كل ده لكن هتكلم عن فتح مصر لمعبر رفح ومش هقول إن ده ماحصلش غير بعد خطاب أردوغان واللي خلى شكل العرب كلهم وحش اوي ولا هقول ان كان أقل رد علي مذبحة أمس هو فتح المعبر
أنا بس هقول إن مصر فتحت معبر رفح لأجل غير مسمى وماعرفش ليه قالو لأجل غير مسمي وكأنه ممكن يتسمى في أي وقت وليه مكنش فتح نهائي
أنا هتكلم عن مصر اللي أخيرا فاقت من نومها بعد ماكانت بتطالب اسرائيل امبارح برفع الحصار عن غزة وكأنها ماتعرفش إنها تقدر ترفعه من جانبها وبمفردها
أنا بس نفسي أعرف لما مصر تقدر تفتح المعبر لأجل غير مسمى وفي أي وقت هي عايزاه ليه المعبر ده ظل مقفول طوال الفترة اللي فاتت وليه أهل غزة بيموتوا من الجوع وليه شرفاء استشهدوا في محاولة لكسر الحصار ده وانقاذ الناس دي من الموت جوعا
لما مصر تقدر تعمل كده ليه قالت قبل كده إنها ماتقدرش؟؟؟
أتمني إن حكومة مصر تكون فاقت واستعادت ولو شئ قليل من عقلها وانسانيتها وإن المعبر يفضل مفتوح والحصار يتم رفعه نهائيا من جهة مصر على الأقل