Tuesday, December 29, 2009

خدعوك فقالوا بورسعيد بتحبك ياريس


بورسعيد مدينة اشتهرت بانها منطقة حرة، مثلها مثل دبي وان كان الفرق أن الله حبي بورسعيد بموقع جغرافي لا ينافسها فيه أي مكان أخر في العالم، ومع ذلك فالفرق واضح تماما بين بورسعيد وأي منطقة حرة أخري
وإن أردت معرفة السبب فما عليك الا الرجوع بالذاكرة إلي أخر زيارة للرئيس مبارك تم الاعلان عنها رسميا
كما أعلنت أجهزة الأمن ووسائل الاعلام فان الرئيس تعرض لمحاولة اغتيال في بورسعيد
وكما أعلن المتعاطفين مع أبو العربي فهو ذهب لتقديم شكوي للرئيس وكان الرد عليه هو قتلة بمجرد وصولة لشباك سيارة الرئيس
أكد أصحاب الفريق الأول أنها كانت محاولة اغتيال وأن أبو العربي نجح في إصابة الرئيس بذراعه وهذا السبب لتغيرة جاكيت البدلة
وجاء الرد من أصحاب الفريق الثاني بأن دم أبو العربي هو من لطخ ملابس الرئيس فاضطر لتبديلها
وجاء الرأي الوسط بأن أبو العربي مريض نفسيا (كان موضوع مريض نفسي دي أول مره تتقال) وأنه اتراهن مع ناس يعرفهم انه هيعور الريس وان المحاولة مكنتش اغتيال وانه كان قاصد يعوره بس
أيا كانت الحقيقه بين الثلاث أراء فالحقيقه الوحيده إن بورسعيد وشعبها دفعوا ثمن هذه الزياره ومازالو يحاولون التعافي من أثارها حتي الآن
طبعا أصبح معروف لدي الجميع أن المدينة الباسلة تحولت إلي المدينة المغضوب عليها أمنيا وبدأت خطة مسلسلة لإلغاء المنطقة الحرة كعقاب لأهل البلد علي تطاولهم علي العيلة الحاكمة في المظاهرات التي خرجت للشوارع تندد بالعقاب الجماعي الذي تم تطبيقه علي المحافظه بأكملها
زيارات مبارك التالية لبورسعيد كانت بعد فترة طويلة وكانت زيارات سرية ومحدش بيعرف عنها حاجه غير بعد ماتخلص وكمان كانت زيارات جوية، يعني الريس مش بيمشي في الشوارع لكن بينزل بالطيارة علي المكان اللي رايحه لدرجة انهم أشاعوا ان تم استحداث مطار بمبني المحافظة لهبوط طيارة الرئيس
كان ده طابع زيارات مبارك إلي أن تم الاعلان عن زيارتة للبلد لافتتاح المستشفي العسكري وبعض مصانع المنطقة الصناعية وأن الموكب هيمشي بالشوارع
طبيعي إن أهل البلد يقلقوا جدا من الزيارة ويدعوا ربنا بخروجه منها سالما لأنهم لم يتعافوا من أثار أخر زيارة بعد
وبالفعل تم احتلال بورسعيد أمنيا في اليوم السابق للزيارة وتحولت لثكنة عسكرية، أعتقد ان ماتبقاش عربية أمن مركزي واحده ماجتش البلد، شكل العساكر الكثيف كان بيدي إيحاء ان عددهم أكثر من سكان بورسعيد
الشوارع امتلأت بلافتات الترحيب وأخري مؤكده إن بورسعيد بتحبك ياريس
طبعا الأمن شدد علي سكان العمارات المطلة علي شوارع مرور الموكب بأنه ممنوع تماما فتح الشبابيك والبلكونات وإن القناصة الموجودين لديهم أوامر بإصابة أي شخص تسول له نفسه الوقوف في بلكونة بيته أثناء مرور الموكب
الغريب انهم بيقولوا ان الريس كان سعيد بالزيارة واستقبال أهل بورسعيد له
أهل البلد كانو محبوسين في بيوتهم ياريس واللي حاول يروح كليتة أو شغله فضل ساعتين عشان يقدر يوصل في بلد تلفها كلها في نص ساعه
لافتات الترحيب مش كلها نفاق لأن في منها كتير كان بالأمر الأمني ، يعني الأمن يروح للناس المشهورين ورجال الأعمال ويطالبهم باللافتات دي
خدعوك فقالوا ان بورسعيد بتحبك ياريس
انت جيت عشان تثبت انك مش أخد منها موقف خصوصا وأن الانتخابات قربت، وهم رحبوا بيك خوفا من عقاب عدم الترحيب
لكن انت ازاي تصدق ان بعد سياسة العقاب الجماعي اللي فرضتها علي البلد وبعد قرار إلغاء المنطقة الحرة إن بورسعيد ممكن تكون بتحبك ياريس
------------------
الزيارة كانت بالأمس الاثنين 28-12

6 comments:

ماما أمولة said...

ههههههههههههه

حسبنا الله ونعم الوكيل

mai said...

لا ويقولوا ..,
انه الاخ ميعرفش اللي بيحصل اللي تحته
هما اللي بيعملوا كده
ويحبسوا النااس

وهو سعادته اما يجى بلد ميلاقيش فيها مواطنين
اماال يبقا فيين الشعب
ودييتوا الشعب فيين

انا قرفانه قرف ما بعده قرف من الزياره
واكتر من اللافتااات

esraa said...

ماما أمولة:

:D

حمدالله علي السلامه
منورة البلوج

esraa said...

ميويه:

قرفانه ايه بس دي بورسعيد بتحب الريس
ماتعرفيش بورسعيد مين دي؟

ماهو لما مايعرفش تبقي مصيبه
ريسنا نايم علي ودانه ولا ايه؟
طيب بيحكم ازاي؟

الازهرى said...

فكرتينى بمرة كنت فى رايح مشوار جنب مركز المؤتمرات وكان الرئيس رايح هناك
واول مرة اعرف حكاية حظر التجوال دى
وطلعت عند صاحبى بدرى يومها وقعدنا خلصنا حاجتنا وجيت ماشى لقيت صاحبى بيلطم وهيموت من الخوف ومانعنى انزل
فسألته ليه ؟
قال الرئيس جاى هنا فاستغرربت وقلت وماله اهو ننتفرج على موكبه ويمكن نشوفه
ولقيته بيبص لى على انى مجنون ونادى على والده قعد الراجل يفهمنى حوالى نص ساعة
يعنى تكون بلدى وعندى مصالح فيها ومنوع امشى لان فى انسان مهما كانت مكانته من بلدى برضه ماشى فى نفس المكان

رحم الله من نام مطمئنا لعدله بين الناس انه لن يصيبه اذى

رجل من غمار الموالى said...

وهل تعتقدون أنه لا يعرف إحاسيس الناس تجاهه ؟
ده نوع من القهر

 

The Lost Princess © 2008. Design By: SkinCorner