Saturday, March 1, 2008

...فولا فولا وزكرياتنا

فاكرين نادينا؟
البنت الصغيرة الأمورة البريئة اللي كانت بتغني فولا فولا بالومبيلا؟
يمكن نادينا والأغنية دي بتمثل جزء مهم أوي من زكريات طفولة كتيييير مننا

كلنا لما بنفتكر الأغنية دي بنفتكر البنت الصغيرة اللي واقفة علي المسرح بتغني
ودايما بنفتكرها كبنت صغيرة ومش بنفكر إن زي مالسنين عدت علينا أكيد عدت عليها هي كمان
وإن أكيد هي كمان معدتش البنت الصغيره اللي واقفة تغني بكل براءة
نادينا قررت إنها تعيد توزيع الأغنية وإنها تغنيها تاني بعد مرور السنين دي كلها
وده من وجهة نظري قرار مكنش صح أبدا , بالعكس كان خطأ فادح
نادينا خلت الأغنية إيقاعها سريع عشان ينفع يترقص عليها, أو بمعني أصح عشان هي تعرف ترقص عليها في الكليب
أنا لما شفت الأغنيه بالنيو لوك بتاعها زعلت أوي وافتكرت أغنية زمان
ومبقتش عارفه هي ليه عملت كده؟
ليه تشوه زكري حلوه من زكرياتنا بالشكل ده؟
يمكن هي شايفه انها صاحبة الأغنيه وان اللي عملته من حقها
لكن الحقيقة إن الأغنية دي ملك لأجيال سمعتها وحبتها من نادينا البنت الصغيرة
أنا مش هحط الكليب الجديد ولا حتي صورة نادينا بعد ماكبرت عشان عايزاكم تفضلوا فاكرينها كالبنت البريئة اللي واقفة علي المسرح
ولو حد فيكم شاف إعلان للكليب أو جاله لينك له, نصيحة أخوية بجد انه مايتفرجش عليه
عشان نقدر نحتفظ بزكريات طفولتنا زي ماهيا ومانسمحش لحد مهما كان إنه يشوة منها أي حاجة
أسيبكم بقي مع أغنية زمان بتوزيع زمان بتغنيها نادينة زمان







clip codes latest movies

22 comments:

No Fear said...

السلام عليكم
عندك حق ساعات كتير بيكون لينا ذكريات حلوة بنزعل قوي لما بنقدها بس حتي لو شفنا الأغنية علي ما أعتقد بردوا مش هنفتكر غير القديمة
علي فكرة هي فولا فولا و لا بولا بولا أنا كنت بسمعها بولا بولا هأسمعها تاني و أشوف
أنت هتبوظي لي الذكريات و لا أية؟
:)

zordeak said...

أنا بقى للأسف شفت الاغنية قبل ما حد يحذرنى واتضايقت جدا جدا من شكلها ورقصها واللى عملته
ببساطة لو كانت الدنيا كلها حاولت انها تبوظ صورة نادينا عندى مكانوش عرفو
بس نادينا نجحت فى ده بجدارة بالفيديو كليب بتاعها

انسى يا اسراء زى مقلتلك وخليكى فاكرة البنت الصغيرة اللى انتى حطاها وخليكى فاكراها وهيا بتقول فولا فولا ببراءة

moodysalihamidzic said...

عارفها وعارف موقعها
وشوفت صورها وقرفت

أمـــاني said...

ميرسي أوىىىىىى ع الأغنية...أنا نفسي كنت نسيت إنها من ذكريات طفولتي...أما الأغنية الجديدة فأنا مشوفتهاش بس أوعدك هدور عليها
:)
ما أنا لازم أشوف شكلها بقى عامل إزاي دلوقتي
:)

اسكندراني اوي said...

الله الله على الذكريات
شيئ جميييييل اوي اننا نفتكر زمان وايام زمان
خالص تحياتي
ملحوظه: الاتنين اهم عشان الفرق يكون واضح
http://eskndria.blogspot.com/2007/08/blog-post_20.html

العراف said...

يااااااااااااه على الذكريات الجميله انت رجعتينا لايام الطفوله والذكريات بس بجد الاغنيه لما اتجددت وغنتها وهيا كبيره ضيعت حلوتها بس اكيد الواحد بيحب التجديد بس مش ننسى الماضى شكرا على شغلك الجميل ده

شادي فايد said...

الاغنية دي عاسشة في وجدننا كلنا
وحتعيش
وحنورثها لأولادنا

لكن الاغنية الجديدة دي ممكن نرقص عليها شوية

وحتموت لوحدها

زي أغاني كتير

ولا إية
؟؟؟

محمد بدرى said...

سينما الاطفال كل جمعة
جولة الكاميرا كل احد
ماجيفار و فتى الكراتية اخترنالك كل اربعاء
أوبريت اللعبة نيللى
ماما نجوى وبقلظ كل اثنين
اليوم المفتوح كل خميس
كارتون صباح الخير يا مصر 7:20
ذكريات كتير جدا جت فى دماغى مع قرأتى للبوست مرتبطة بالأغنية مش بالمغنية تحديدا.
صحيح المغنية كبرت وعملت توزيع تانى للأغنية بس مستحيل الذكريات دى يتعملها توزيع تانى فى دماغى حتى لو كل الذكريات دى اتعمل منها نسخ احدث بشكل مختلف.
بس الجزء الكويس فى التوزيع الجديد انه خلانى افكر فى النسخة القديمة وافتكرها وافتكر حاجات حلوة كتير، وخلانى افكر ان الوقت جرى كتير من ساعة ما كنت قاعد منتظر الاغنية دى تيجى فى برنامج أعزائى الصغار على القناة الثانية وبين انى اتفرج على ميلودى تون اشوف الاغنية بعد ما تطورت.
ميرسى كتير على البوست الرائع كالعادة

walaa said...

فعلا زى ما انت قلتى كانت طفله بريئه لكن دلوقتى كبرت وةكبرت معاه حاجات تانيه
تحياتى ولاء

Najwan said...

اه انا بحب الاغنيه القديمه بس مشفتش الى انتى بتتكلمى عليها عندى فضول اشوفها لما كبرت :).
بس واضح كدا انها مش لزيزة
ZORDEAK
جبلى اكتئاب منها

momken said...

عندك حق كنت بموت فى الاغنيه دى
كنت باسميها يا عصفوره
ولما شوفت تقرير عن البنت دى كرهت الاغنيه والذكريات
واستغربت من تبدل البنات

عارفه الاولاد مش بيتغيروا بالحده دى
يعنى الواد المؤدب والنكسر هو صغير بيكون شبه كده وهو كبير
والعيل قليل الادب بيكون رد سجود وبلطجى او منحرف او حتى روش وهو كبير
لكن التغير فى البنات بيطون منهتى منتهى الحده

تحياتى

esraa said...

No Fear:

وعليكم السلام ورحمة الله وبركاته

فعلا احنا مش بيفضلنا غير الزكريات

لأ هي فولا فولا انا بردو وانا صغيره كنت بسمعها بولا بولا

(:

esraa said...

zordeak:

أنا فعلا مش فاهمه هي ليه غنتها تاني؟

ماكانت تغني أي حاجه وخلاص

حاضر

أنا نسيت خلاص أهو

(:

esraa said...

moodysalihamidzic:

عندك حق تقرف

esraa said...

أمـــاني :

العفو يااماني

أنا لو منك مادورش عليها يابنتي

صدقيني بلاااااااااااااااااااش

esraa said...

اسكندراني اوي :

مانا لو حطيت الجديده هبقي بساعد علي تشويه زكري حلوه

وكلكم كنتم هتقولولي ربنا يسامحك وليه كده

esraa said...

العراف:

كانت أيام جميلة اوي فعلا

هو التجديد حلو فعلا

لكن يكون تجديد مش تشويه

esraa said...

شادي فايد :

بالظبط كده

انت قلت المفيد

القديمة هتفضل عايشة, لكن الجديده هي اللي هتموت

esraa said...

محمد بدرى :

الله

ايه الحاجات الحلوه دي كلها

(:

esraa said...

walaa:

طب هو مش ممكن تكبر وتفضل بريئه؟

سؤال برئ يعني

(:

نورتيني

esraa said...

Najwan:

بلاش الفضول ده صدقيني

بلاش منه خاااااااااالص

هي وحشه اوي بجد

وأحمد عنده حق فعلا

esraa said...

momken:

انت شفت تقرير بس

يعني كمان ماشفتش الأغنيه

اعمل زي وانسي كل ده

افتكر البنت الصغيره الأموره اللي واقفه تغني علي المسرح بكا براءه

 

The Lost Princess © 2008. Design By: SkinCorner