Monday, February 18, 2008

...البوتس وأنا


إكتشفت إني بقالي فترة طويلة جدا ماسقتش الزرع اللي في بيتنا , لدرجة إني معنتش فاكرة إمتي أخر مرة سقيته من غير ماحد يطلب مني , ولا حتي فاكرة امتي أخر مرة سقيته عشان ماما طلبت مني ده

اكتشفت ده امبارح لما لقيتني بنزله من مكانه عشان عايزه أسقيه من غير ماحد يطلب مني

لما اكتشفت ده إفتكرت أيام كان إن الزرع يشرب ده شئ من إختصاصي وكنت عملاله مواعيد لازم أسقيه فيها , وإننا لما بنكون مسافرين كان أول حاجه أسأل عليها مين هيسقيه وهنعمل إيه معاه

افتكرت اني دايما كنت بتكلم معاه وأحيانا كمان بغنيله , كنت عارفة انه بيعرف صوتي ولمستي له

افتكرت اني اتبسطت اوي لما قرأت مرة إن الزرع يقدر يعرف اللي بيسقيه وبيحس بيه وانه يقدر يعرف لو الحد ده اتغير

لدرجة اني لما سافرت عشان الكليه كان لونه بيصفر رغم ان ماما كانت بتسقيه, وأنا طبعا كنت بفسر ده بانه حاسس ان مش أنا اللي بشربه

معرفش إيه اللي حصل بعد كده؟ ومعرفش ليه معنتش بسقي الزرع ولا ليه معنتش بتكلم معاه؟

معرفش ليه بنضيع مننا حاجات صغيرة بس كانت بتسعدنا أوي لما نعملها

أنا معرفش هو لسه فاكرني ولا لأ؟ لما سقيته امبارح عرف ان أنا دي اللي كانت بتسقيه من كام سنه ولا لأ؟

لو كان لسه فاكرني أكيد هبقي مبسوطه أوي , ولو نساني أكيد انا أستحق ده

أصل صعب أوي اننا نبعد عن حاجه أو حد الفتره دي كلها ونيجي في الأخر نطلب منهم إنهم يكونوا فاكرينا وماينسوناش

53 comments:

oceaneyes said...

تصدقى بالله يا اسراء

انا اول مرة اعرف ان الزرع بيحس بالشخص اللى بيقيه وبيهتم بيه

لو على كدة فانا بجد فرحانة اوى ...الحمد لله انا مواظبة على سقى الزرع بتاعى كويس ...وربنا ما يحرمنى من كدة

وكويس انك رجعتى للزرع بتاعك تانى ...ولو المقولة دى بجد صحيحة ..يبقى اكيد هايفتكرك ..جايز بس هايحتاج وقت لحد ما يتعود عليكى تانى ..ويضمن انك مش هاتسيبه تانى ...


تحياتى

:)

Ahmad Hegab said...

:(
فكرتينى بالزرعة اللى فى بيتنا
احاسيس راقية جدا

تحياتى

raspoutine said...

اكيد هيحس بيكى
مادمتى بالرقة دى

No Fear said...

السلام عليكم
روعة روعة روعة بجد

مـحـمـد مـفـيـد said...

أحساس فضيع فعلا

zordeak said...

الله


بوست رقيق جدا جداااااااااااا

حاجات صغيرة اوى بتبقى مهمة جدا فى حياتنا بس مبناخدش بالنا منها

اللى ياخد باله منها اكيد بيبقى احساسه مختلف

وروحه انقى واصفى


كويس انك فضلتى فاكرة يا اسراء ومنسيتيش


وعلى فكرة

البوتس اكيد فاكرك

وهتشوفى لما تلاقيه بقى لونه وشكله احلى

بس يا بخت البوتس

بقى بتغنيله

;)

يا بخته

:p

dina said...

انا اول مرة اعرف ان الزرع بيحس..كان عندى الاحساس دا زمان بس معرفش انها حقيقة

المشكلة يا اسراء ان احساسنا دايما بالحاجات الحلوة خصوصا لو صغير ة مش بيطول معرفش ليه بس بجد بوست حلو اوى..جاب طراوة كدا
ههه اعتقد لو رجعتى تسقى زرعك تانى حيفتكرك لانه شايلك حاجات كتير حلوة

صوت من مصر said...

عايز اقولك ان الزرع بيحبك اكتر من اى شىء وسيعبر فى يوم من الايام عن حبه ليكى لانك بتحبيه

t3ban said...

يا راجل
انت نسيت اخر مرة زءيت الزرع امتي

انا بقي نسيت اخر مرة فرحت من قلبي قوي قوي امتي
نسيت اخر مرة نمت مستريح امتي
نسييييت حجات كتيير قوي
بس ده مش معناه انك صح تسيب الزرع ينام عطشان

FadFadA said...

معرفش ليه بنضيع مننا حاجات صغيرة بس كانت بتسعدنا أوي لما نعملها ؟
يمكن علشان هي ملكنا و ممكن نعملها في أي وقت
بس هنحس يقيمتها قوي لو حرمنا منها

فكرة جميلة قوي

محمد

Noony said...

أكيد فاكراكي
في القلب شايلة ذكراكي
لما رجعتي
فرحت للقاكي

هو حد ينساك برضه :)
المهم متهمليهوش وراعيه من تاني

:)
نوني

samo said...

اسراء

رغم ان كلماتك كانت عن الزع واننا ننساه وياترى هو فاكرنا ولا لآ

لكن لو حاول كل واحد فينا يدور جواه

هيلاقى معنى تانى خالص لكلماتك
هيحس قد ايه هو مقصر فى حق ناسما يستحقوش منه كده

وقد ايه فى ناس نسينوه لدرجه انه قرب فعلا يصفر ويدبل

مش عارف ليه كلماتك خلتنى اتصل بناس رغم قسوتهم عليا بس من طول فتره بعدنا عن بعض قولت لازم اكلمهم

بجد زيارتى الاولى لمدونتك جابت نتيجه وحسيت انى قريت اللى فكرنى بالناس

بجد مدونه جميله ومواضيع اجمل

moodysalihamidzic said...

انا بقى وحشنى انى ازرع واسقى الرزع تانى زى زمان
الحاجات دى متعة
وعشان ليها ذكرى بتبقى امتع واجمل

Ehab said...

هو من جهة نسيكي هو اكيد نسيكي
اصل مش عارف سعة الذاكره بتاعة الزرع قد ايه
لكن غالبا صغيره يعني

لكن ببساطه اللي هو نسيه زمان
تقدري تبنيه من جديد
مش كل حاجه تضيع نبكي عليها
ممكن نبنيها تاني
اكيد المره دي هنبنيها احسن


--------------------
واخيرا وبعد طول انتظار

كتاب يوميات اتنين مخطوبين نزل يا رجاله في المكتبات والمحلات

متوافر بمكتبة عمر بوك ستور
مكتبة مدبولى
الديوان بالزمالك
مكتبة ساقية الصاوى

وكمان حفل توقيع في: عمر بوك ستور
15 شارع طلعت حرب فوق مطعم فلفله ( عند محطة مترو السادات
من الساعه 6 مساء الى الساعه 9 مساء
وذلك يوم الجمعه الموافق 22 فبراير 2008


وقناة OTV هتيجي تصور حفل توقيع الكتاب
والدعوه عامه وهنبقى لمه
تعالوا شرفونا واحضروا معانا اللحظه دي
كلكم مدعوين

Mony The Angel said...

eh da b2a fe 7ad bis2y alzar3 f betna a5eran :D:D:D
tab wallahy tamenteeny
bas akeed al pic ally enty 7ateteeha de msh lezar3na lool

bgad ana mabsoota en 7ad b2a bis2y alzar3 f betna abl maimoot kollo

SomeOne said...

اممممممم

أكيد الزرع مبيزعلش من حد
هو فكرة أعلى بكتير من انة يهتم او يزعل من حد ميهتمش بيه
:p

Unknown said...

oceaneyes:

لا اله الا الله

اها هو بيحس فعلا

دي حقيقه علميه فعلا انه بيحس وبيعرف

لأ خلاص انا هبقي شاطره

(:

Unknown said...

ahmEd_H :

طب وزعلان ليه بس؟

اسقيها وهي تبقي كويسه خالص

ربنا يخليك

Unknown said...

raspoutine:

ربنا يخليك ياأيمن

(:

Unknown said...

No Fear:

ربنا يخليك

(:

Unknown said...

مـحـمـد مـفـيـد :

فظييييييييع شنيييييييع مرييييييع

((((((:

Unknown said...

zordeak:

(:

ربنا يخليك

في حد ينسي الزرع بردو؟

بلاش الحقد ده, كده مش كويس عشان صحتك

:d

Unknown said...

dina:

اهي طلعت حقيقه ياستي

(:

احنا بس بنتعامل معاها علي انها حاجه موجوده علي طول فبنرجع نهملها

اكيد ان شاء الله

نورتيني

(:

Unknown said...

صوت من مصر :

ربنا يخليك يارب

طب هيعبرلي ازاي؟

نورتني

(:

Unknown said...

anwer:

أتمني انها تكون مرحله وتعرف تعديها

وترجع تتبسط من قلبك وتنام باليل وانت مرتاح البال

Unknown said...

FadFadA:

بالظبط احنا مش بنحس بقيمة الحاجات دي الا لما بتضيع مننا

ربنا يخليك

يسعدني انها عجبتك يامحمد

Unknown said...

Noony:

ايه الكلام الحلو ده كله؟

حاضر ان شاء الله

(:

Unknown said...

samo:

أكيد الزرع رمز

واللي انا عملته معاه, كلنا بنعمله مع ناس مهمين اوي في حياتنا كتيييييييييير

يسعدتي بجد ان الموضوع كان السبب في ده

وبجد نورتني

(:

Unknown said...

moodysalihamidzic:

خلاص يالا ارجع انت كمان اعمل كده

(:

Unknown said...

الشنكوتي الكبير :

ياباااااااااااي

اكيد ان شاء الله


-----------------

ألف مبرووووووووووك علي الكتاب

بارك لأختك بالنيابه عني

Unknown said...

Mony The Angel:

(:

اها شفتي

ليه الغلط بس؟

احنا زرعنا أحلي من كده كمان

((((((((((((((:

Unknown said...

شادي فايد :

هههههههههههههههه

اها مش كده بردو

تــسنيـم said...

أه طب ده البوتس مممممم طب والعصافير ملهاش نفس تأكليها ونتضفي القفص

يعني البوتس فاكرك والعصافير جالها فقدان ذاكرة
P:

طب عايزين زيارة للبلكونة تشوفي العصافير وكدتشة

علوة said...

الزرع هيفرح اوي بالمية من إيديك تاني
وهيفرح لما يحس إنكك فعلا بتحبيه
الزرع فعلا بيحس
وهو فاكرك
لإن حياته مش مليانة تفاصيل زينا
الموضوع حصل معايا
وبرضه مش عارف ايه اللي خلاني أسيبه فترة
رغم إنه بيسحب الانسان في حالة جميلة جدا
...
تسلم إيدك بوست رائع

رجل من غمار الموالى said...

ممكن يكون انت بطلتى تسقى الزرع لما
نضجتى شوية وكبرتى
ولقيت حاجات تانية فى الحياة تشغللك عن الزرع
............
بخصوص ..المعنى البعيد
دايما ما بنحسش بالنعم اللى فى ايدينا الا لما نفقدها

Unknown said...

تسـنيم:

أنا فعلا أحيانا بحطلهم اكل وماية, لكن هم اصلا مكنوش احدي تخصصاتي

وكل مابدخل البلكونه ببص عندهم اكل ولا لأ

يعني ماتقلقيش

Unknown said...

علوة :

هو فعلا بيعيشك في مود حلو أوي

المهم انك انت كمان ترجع تسقيه وتاخد بالك منه

الله يسلمك ويخليك

(:

Unknown said...

رجل من غمار الموالى :

ممكن, رغم ان دي حاجه مش حلوه

اها وعشان كده لاوم ناخد بالنا

اجار الدين كشمش said...

روعهههههههههههههههه

اصلي الي بيسقي الزرع

رووووووحه معطاء ويبا

احلى حبيب

ربنا يرزقنا مين يسقينا

باي

Amany Y. El-Saeed said...

فعلا يا إسراء...صعب جداً نبعد عن حاجه أو عن حد فترة كبيرة و بعدين نطمع إنهم يكونوا فاكرينا...بس المهم إننا نقتنع إننا نستحق ده...لأن الإعتراف بالخطأ بيساعد جداً في تصحيحه

موجة said...

اكيد يا اسراء مش الزرع ده كائن حي
هههههههههههه
هي حقيقي معلومة جميلة و جديدة
بتشير الى انسانة على قدر من الحساسية و الشفافية في الشعور بالجمال

خالص تحياتي
احمد

شقاوة شعب said...

على حسب درجة ارتباطك بيه
ده عرايسنا اللى هى جماد بنحس انها حاسة بينا وبنكلمها كانها فاهمانا
فما بالك الزرع الحى
اكيد هيفترك
دى لحظات حلوة انتى بتعييها وانتى بتتكلمى معاه فماتفكريش هو حاسس بيكى ولا لأ
المهم تكونى مبسوطة


تحياتى
شيماء

Soooo said...

اقولك على حاجه
والدتي الله يرحمها كانت بتسقي الزرع اللي عندنا في البلكونه وتقعد جنبه تقرى قرآن

لما ماتت الله يرحمها .. اهملت الزرع فتره .. جيت بعد كده بصيت لقيت لونه اصفر هزيل .. سقيته وفضلت اسقيه كزا مره وبرضه لونه اصفر هزيل
وفي يوم قلت انا هسقي الزرع وبعدها اقرى قرآن زي ما امي الله يرحمها كانت بتعمل
اقسملك بالله العظيم .. في اقل من يومين لون الزرع رجع اخضر .. سبحان الله
الا بذكر الله تطمئن القلوب



اول مره اجي مدونتك .. بس ان شاء الله مش هتكون الاخيره




سلاموووووووووووووز

ابو العربى said...

فعلا اى شىء حى بيشعر بالراحه للمعتنيين به

تحياتى

Unknown said...

اجار الدين كشمش:

ههههههههههههه


ربنا يخليك

(:

ان شاء الله قريب

Unknown said...

أمـــاني :

بالظبط

أهم حاجه اننا نعترف ياموني

Unknown said...

موجة:

هو فعلا الزرع كائن حي جداااااااا


ربنا يخليك يااحمد

Unknown said...

شقاوة شعب :

طب انتي عارفه الاسطورة بتاعة ان العرايس واللعب بتتحرك لما نكون مش موجودين

هي أكيد مش حقيقه

بس كانت عجبتني أوي

(:

اها مهم بردو

Unknown said...

Soooo :

ربنا يرحمها بجد

أنا طبعا مصدقه حضرتك من غير ماتحلف

بس خلي بالك من الزرع بقي

نورتني بجد

(:

Unknown said...

ضد الظلم:

فعلا دي حاجه حقيقيه جدا

BaTresYa said...

مش عارفه اقولك ايه ... أنا أول مره اعرف ان الزرع بيحس باللي بسقيه ... وعلى فكره شعور جميل منك اوي انك تفرحي علشان كائن حي لا بيتكلم ولا بيعبر عن مشاعره إلا بلون ورقه ...إنه حس بيكي وخايفه يكون نسيكي ... عموما اكيد زي ما اتعود عليكي اولاني ان شاء الله هيتعود عليكي تاني :)

Unknown said...

BaTresYa:

ماهو كل كائن حي مش بينطق لازم يعبر عن اللي جواه بأي حاجه

حتي لو كانت بتغير لونه

ان شاء الله ياجميلة

نورتيني

(:

http://kasperb4.blogspot.com/ said...

رائع يا اسراء
احساس فوق الوصف
والمعنى وصلني اووووووي
-------

انا كمان بعشق البوتس وكمان زرعة الشفليرا حساسة جداا
وعايزة اهتمام بالغ ولو وصلها نسبة ضوء اكبر من احتياجها او اقل بتدبل وتصفر

عجبني البوست اوي
:)

 

The Lost Princess © 2008. Design By: SkinCorner