Friday, February 23, 2007

من كوكب تاني


من اسبوعين تقريبا , يوم السبت الساعه 3 الفجر موبيلها رن, وكانت ريهام صاحبتها وردت عليها
ريهام: ازيك ياجميله؟
هي: الحمد لله, انت ايه أخبارك؟
ريهام: في حاجه عايزه أقولك عليها.
هي: أكيد في حاجه وعشان كده اتصلتي دلوقتي ومستنتيش للصبح.
ريهام : أصلها بخصوص (.....) هكلمك عنها.
هي: لأ, احنا اتفقنا علي ايه؟
ريهام: طب اسمعيني بس.
هي: أنا يوم ماديتك ايميلها عشان انت عايزه ايميلات بنات كان ليا شرطين كانو ايه؟
ريهام: اني ماقولهاش اني جايبه ايميلها منك, واني مقوليكيش أي حاجه من أخباراها.
هي : بالظبط برافو عليكي.
ريهام: أصلها في مشكله.
هي : مشكلة ايه؟
وحكت لها ريهام علي المشكله.
هي: ...............
ريهام : انت ساكته ليه؟
هي : ..................
ريهام: انت بتعيطي؟ طب بتعيطي ليه دلوقتي؟ يعني هي تعيطلي علي النت وانت تعيطيلي علي التليفون؟
هي: أصلها صعبت عليا أوي, حرام ان قلبها يتуسر.
ريهام: أنا كنت عارفه انك هتقولي كده, هتحاولي تسعاديها صح؟
هي : أكيد, هشوف هعمل ايه وهكلمك بكره ان شاء الله.
ريهام: أوكي ياحبيبتي, تصبحي علي خير.
هي: وانت من أهله, سلام.

نفسها: انت مش هتدخلي تنامي؟
هي:مش جايلي نوم.
نفسها : انت مانمتيش من امبارح, يعني كده هيبقي بقالك يومين مانمتيش.
هي: طب ايه المشكله؟ لو تفتكري احنا صحينا أكتر من كده قبل كده.
نفسها : أها بس أنا عايزاكي تدخلي تنامي.
هي: اشمعني؟
نفسها: عشان ماتفكريش, اوعي تكوني ناويه تساعديها بجد.
هي : أها , أكيد هساعدها مانت سمعتيني.
نفسها: ماتستاهلش انك تساعديها.
هي: احنا مش بنساعد الناس عشان يستاهلو نساعدهم ولا لأ, احنا بنساعدهم عشان احنا نقدر نساعدهم ولا لأ.
نفسها: طب وهتساعديها ازاي, انت هتكلميه؟
هي: مش عارفه هدور علي حل تاني, رغم اني اعتقد ان مفيش حل غير ده.
نفسها: مش هيحصل, مش هتكلميه.
هي: ايه رايك تدخلي تنامي عشان انت بقالك فتره طويله صاحيه, يالا تصبحي علي خير.

فضلت طول يوم الأحد بتحاول تقنع نفسها انها تساعدها لكن نفسها فضلت مصصمه.
وجه يوم الاتنين.
نفسها: انت بتعملي ايه؟ ماسكه التليفون ليه؟
هي: عشان هكلمه.
نفسها: مش هيحصل.
هي: أوكي خليكي وشوفيني وانا بكلمه.
وطلبت الرقم.
هو: ألو.
هي: أنا عايزه أطلب منك طلب.
هو: اتفضلي.
هي: هو بخصوص (....) بس علي فكره أنا مش بكلمها.
هو: أمال.
هي: مش مشكله أمال المهم هي دلوقتي
وحكيتله الموضوع كله
هي: انت لازم تساعدها.
هو: انت بتعرفي الحاجات دي كلها منين؟
هي: مش مهم منين, المهم انك لازم تساعدها دلوقتي.
هو: لأ أنا المهم عندي أعرف بتعرفي الحاجات دي منين؟
هي: لأ المهم انك تساعدها, كل مالوقت بيعدي الموضوع بيكون أصعب, انت لازم تعمل حاجه.
هو : أنا لازم أعرف انت بتعرفي منين؟
هي: مانا لو قلتلك انت هتقولها.
هو: والله العظيم مش هقولها ومش هتعرف انك كلمتيني.
هي: أنا مابقتش عارفه أصدقك ولا لأ؟
هو: هو أنا كدبت عليكي قبل كده؟
هي: أها كدبت.
هو : لأ, ماحصلش.
هي: لأ حصل.
هو: خلاص ده مش موضعنا.
هي: أها موضعنا دلوقتي انك لازم تساعدها.
هو: هي دي شروطي, أعرف انت عرفتي منين, وأقرر ساعتها.
هي: كده يبقي لازم أنا أفكر, هشوف وأرد عليك.
هو : أوكي.
هي: أوكي, سلام.
وقامت كلمت ريهام.
هي: مصمم انه يعرف انا عرفت منين؟
ريهام: هو ممكن يقولها؟
هي: ماعتقدش ياريهام لأنه حلف.
ريهام: يعني انت متأكده؟
هي: أها, أكيد.
ريهام: بس انت عارفه انه لو قلها, انها ممكن تزعل مني, وانا بجد حبيتها وأتمني اني أساعدها.
هي: أها مانا عارفه, بس هو لازم يعرف عشان يساعدها.
ريهام: خلاص نألفله طريقه.
وحفظيتها ريهام هتقوله ايه.
واتصلت بيه تاني.
هو: ألو.
هي: أنا موافقه.
هو: موافقه علي ايه؟
هي: علي اني أقولك, بس خليك فاكر انك ضغطت عليا, وانك ابتزتني عشان تعرف.
هو: ها , قولي.
وحكيتله اللي ريهام قالتلها عليه, ومش عارفه الموضوع ماكنش مقنع ولا هي اللي مش بتعرف تكدب.
هو: الموضوع ده مش غريب شويه.
هي: هو ده اللي حصل, المهم دلوقتي انت هتعمل ايه؟
هو: مش هعمل حاجه.
هي: يعني ايه؟
هو: يعني هي مطالبتش مساعدتي, ومحكتليش علي حاجه.
هي: مش مشكله, بس انت تعرف دلوقتي, انا قلتلك, المفروض انك تساعدها, اعمل أي حاجه.
هو: أنا مش هعمل حاجه.
هي: حرام عليك, هي بجد تعبانه, انت لازم تساعدها, اسأل أي حد, اعمل أي حاجه.
هو : أنا مش هعمل حاجه, هما مأشركونيش في الموضوع, وكده خلاص وأنا هقفل.
هي: استني عشان خاطري.
هو: نعم.
هي: انت لازم تساعدها بجد, دي قريبتك انت, يعني المفروض انت اللي تكون عايز تساعدها مش أنا.
هو: أنا قلتلك اني مش هعمل حاجه, وده أخر كلام عندي.
هي: طب هتقولها انك عرفت مني.
هو: أنا مش هقولها اني عرفت أصلا.
هي: صحيح انت حلفت, أوكي, باي.
قفلت معاه وفضلت تعيط.
نفسها: مارضاش يساعدها.
هي: أنا مش عارفه هو جاب القسوه دي منين؟
نفسها: وبعدين, هتعملي ايه؟ انت هتسيبيها كده؟ انت لازم تعملي حاجه.
هي : أنا كنت عارفه انها صعبانه عليكي, وانك عايزاني أساعدها, بس انا مش عارفه أعمل ايه, أنا معرفش حد غيره مكن يساعدها.
نفسها: معرفش اتصرفي, لازم تتصرفي.
هي: خلاص أنا هكلمه بكره ان شاء الله, وهقوله الحقيقه , هقوله أنا عرفت منين, وهقوله أي حاجه تانيه هو عايز يعرفها, هقوله اني مستعده أعمل أي حاجه عشان يساعدها, أي حاجه هيقول عليها, أو عايز يعرفها, هقوله عليها, هعمل أي حاجه, المهم انه يساعدها.
الساعه 2 موبيلها بيرن وكانت ريهام
هي: أيوه ياريهام, هو لسه مش موافق, بس أنا هتصرف.
ريهام: أنا أسفه أنا أسفه بجد.
هي: أسفه علي ايه؟
ريهام: انا خلاص مش عايزه أعرف (....) دي, بجد مش عايزه أعرفها.
هي: في ايه يابنتي, أنا مش فاهمه حاجه.
ريهام: هاتي ورقه وقلم.
واديتها أرقام وحروف
ريهام: ده الباس وورد بتاعي, افتحي ايميلي وشوفي اخر ميل جايلي لأنه منها.
هي: أوكي.
ريهام: دلوقتي, أنا مش هقفل هفضل معاكي.
فتحت الميل وقريته.
هي: ................
ريهام: انت ساكته ليه؟
هي: ده حلف ياريهام, حلف.
ريهام: في ناس كتير بتحلف بربنا كدب.
هي: أنا مش مصدقه, وبعدين دي فاكراكي أنا ياريهام, دي فاكراكي كدبتي عليها.
ريهام: هي دي المشكله بس, دي غلطت فيكي, ردي عليها.
هي : لأ مش هرد, الرد مالوش لازمه, وبعدين مستوي كلامها مش عاجبني, وأنا مستوي الحوار اللي مش بيعجبني مش برد عليه.
ريهام: لأ هتردي, لأنك لو مش رديتي أنا هرد وهحطها في دماغي.
هي: لأ علي ايه, هرد أنا أحسن.
وبعتت قالتلها انها مش هي اللي كدابه, وقالتلها انها فاهمه هو بيعمل ليه كده, لكن الغريب انت ليه بتعملي كده, وحاولت تفكرها ان في حاجه اسمها ربنا وانه موجود.
طبعا الايميل ماكنش عاجب ريهام, لكنها قالت ان مفيش حاجه تتبعت غير ده.
ريهام: أنا بجد أسفه.
هي: وانت ذنبك ايه بس, أنا اللي قررت اني أساعدها, أنا عملت ده برغبتي.
ريهام: بس أنا اللي قلتلك , لو كنت التزمت باتفقنا مكنتيش عرفتي, ولا كان ده حصل.
هي: انت كنت عايزه تساعديها وهو ده المهم.
وقفلت مع ريهام, ورفعت عنيها للسماء, وقالت لربنا جمله اتعودت انها تقولهاله في الفترد الأخيره.
تاني يوم ريهام اتصلت بيها.
ريهام: اسكتي مش ردت عليا بايميل تاني.
هي: مش هفتح ايميلك ومش هرد عليه ولا انت هتردي عليه, والكلام في الموضوع ده خلص خلاص, وانتهي.
ريهام : طب في سؤال عايزه أسألك عليه.
هي: اسالي علي اللي انت عايزاه ياسيتي.
ريهام: لو عرفتي انها في مشكله تانيه, بعد اللي قالتهولك ده, هتساعديها؟
هي: مش انت عارفه الاجابه؟
ريهام: خمنتها, بس عايزه أسمعها منك.
هي ضحكت وقالت: أها هساعدها.
ريهام ضحكت وقالت: انت عارفه انك بجد من كوكب تاني.
هي: كنت الأول بعد الناس اللي بتقولي كده بس دلوقتي خلاص من كترهم معنتش بعدهم.
قالتي ها وانت ايه رأيك؟
وكان ردي اني رفعت راسي للسماء, وبصيت لربنا نفس البصه وقلتله نفس الجمله.

Saturday, February 17, 2007

ألة الزمن


أه اسم البوست ألة الزمن
بس أنا لسه ماخترعتهاش, وكل اللي بيتقال عني اني حفيدة انيشتاين دي مجرد اشاعات ومفيش منها حاجه حقيقيه
نيجي للجد بقي
كل الأفلام اللي بتتكلم عن ألة الزمن أو السفر عبر الزمن أو حتي الناس اللي جايه من المستقبل, بيشتركوا في حاجه واحده وهي ان الأرض خلاص ادمرت.
يعني بتختلف الأسباب والنتيجه واحده, مره يكون السبب حرب الفضائين , أصل الأرض ناقصه حروب عشان الفضائين هما اللي يدمروها, ولا هما يعني مش عاجبهم كوكبهم وطمعوا في الأرض بتاعتنا, أو إن جالنا نيزك من الفضاء بيحمل أمراض وتنتشر بسرعه علي الأرض عشان تنهي الحياه عليها, أو بسبب حروب البشر نفسهم مع بعض, ربنا يخليلنا ماما أمريكا, أو بسبب انفجار القمر اللي أدي الي دمار الأرض.
أنا بقي مش عاجبني ده, هما ليه شايفين المستقبل علي انه دمار وحروب وخراب, يعني ليه مش بنتعلم من اخطأنا ونحاول نخلي بكره أحلي وأحسن, ليه مش بنحلم بالمستقبل ان الناس عايشه فيه بسلام وحب وأمان والحرب بقت موضه قديمه والدول بقت بتراعي بعض, وبطلنا نظام الغابه اللي احنا عايشين فيه ده.
طب هو مين اللي صح, هما اللي شايفين ان الدمار هو مصيرنا, ولا أنا اللي شايفه ان بكره هيكون أحسن عشان احنا عايزينه يبقي أحسن ولأننا لازم نوصل للي بنتمناه
أتمني اني أكون أنا اللي صح.
أما بقي لما أخترع ألة الزمن فأنا مش هروح بيها المستقبل, لأ هرجع الماضي, أصل الماضي أهم وهو اللي بيحدد المستقبل, ورغم اني مش عارفه وقت الجد هغير الماضي ولا برضو هعيشه زي ماكان, لكني عارفه اني هرجع أصل في ناس كان نفسي أعيش معاها مده أطول وأسيب معاهم زكريات أحلي.
انتو لما هتستليفوها مني , هتروحو بيها فين؟

Friday, February 9, 2007

دبلة الخطوبه


يادبلة الخطوبه عقبالنا كلنا

ونبني طوبه طوبه في عش حبنا


ياكل معجبيني داخل مصر المحروسه وبجميع أنحاء دول العالم
اطمنوا أنا لسه ماتخطبتش


دي خطوبة نورا صحبتي, عقبالكم كلكم, خطوبة نونتي كانت امبارح , وكان بجد يوم أكتر من رائع.
يارب تعيش في سعاده علي طول, وربنا يوفقهم ويكملهم علي خير
ادعولهم كلكم كتييييييييييييييير
أنا بجد مش عارفه أقول ايه, لكني فعلا سعيده جدااااااااااااااااااااااااا.

Sunday, February 4, 2007

التاج علينا حق


أنا مش عارفه أنا غلطت لما كتبت البوست اللي فات ولا ايه؟
حسيت انه قلب المواجع علي ناس كتير جداااا, وانه فكرهم بحاجات عملوها أو حاجات اتعملت فيهم, بس حسيت انكم اتفاعلتو معاه جدا, يمكن فعلا عشانه حاجه حصلت و للأسف لسه بتحصل, يعني في ناس ماكتفتش بانها تعلق علي الموضوع بس, لأ في ناس عملت بوستات في بلوجاتهم يطلبو من الناس اللي ظلموها انهم يسامحوهم, وناس سألت نفسها هم سعداء ولا لأ؟
أنا أكيد سعيده بتفاعلكم, لكن لأي حد أنا قلبت عليه المواجع أو صحيت جواه الجروح, أنا أسفه حقك عليا, أنا بس خفت علي أي حد يتحط في الوقف ده انه يعيش نفس المصير.


نيجي لموضعنا بقي

التاج

وياريته تاج دول اتنين, ورغم كل محاولات هربي منه, الا انه جالي جالي ومفيش مفر

التاج الأول من منة (mony the angel) صاحبة مدونة metalking

والثاني من تسنيم صاحبة مدونة حكيات من القلب
------------------------------------
التاج الأول خمس حاجات محدش يعرفها

ماشي ياستي

1- أنا اسراء أخت تسنيم ومنة يعني أنا لؤم اللي تسنيم كتبت عنها في البلوج بتاعها و أسباب تسميتنا الأسماء دي, أنا لؤم ومنة خبث وتسنيم طبعا ليها لقب هي ماذكرتهوش هناك وهو سوسه, أحمد أخونا لأنك لما تبقي ولد واحد يبقي اما انك تنعزل عن اخواتك واحنا الحمد لله مش كده أو انك تبقي شغلتهم واحنا طبعا كده, فاحنا كل واحده فينا كانت بتقرره علي حاجه وبعد كده نقعد مع بعض نكمل المعلومات من بعض, وطبعا أحد مره دخل علينا وظبطنا متلبسين وادانا الألقاب دي.

2- وأنا صغيره كان نفسي لما أكبر أشترك في فريق سباق عربيات, وأنا طبعا اللي أسوق , كان نفسي أسوق بسرعه جدا وأعمل فووووووووو
أحمد أخويا بيضحك عليا كل ما أقول فووو دي (:

3- وأنا صغيره برضو كان عندنا في المدرسة أوضتين تحت السلم ليهم باب خشب, المدرسين كانو بيضحكو علينا ويقولولنا ان دول أوضة الفيران, وان اللي مش هيسمع الكلام هيودوه هنا, أنا بقي ذكيه طول عمري, فكنت بقولهم لو كان في فيران جوه كانو أكلو الأبواب الخشب, يبقي أكيد مفيش فيران ولا حاجه يعني؟

4- دكتورة الفيزياء بتاعتي في الكليه قالتلي ان حرام أدرس علوم في مصر لأنها دوله مش بتقدر العلماء واني لو كنت بدرسها في لندن كنت هفرق كتير لأنهم هناك هيعرفو قمتك, نسيت أقولها اني سيبت علوم خلاص.

5- أنا الناس بتصعب عليا جدا, اكثر مما أي يحد يتخيل, لكني مش بحب اني أصعب علي حد, أصلي لما بصعب علي حد نفسي بتصعب عليا أوي, أوي بجد.

الحمدلله خلصنا واحد, الثاني بقي
-----------------------------
اية اللي حيحصل لايميلك لما تموت؟

أنا علي طول بفكر في الموضوع ده, وقررت اني هكتب كل ايميلاتي في الأجنده بتاعتي ومعاها الباس ووردز بتاعتهم عشان لما أموت اخواتي يدخلو ويقولو لأصحابي, أكيد هم هيكونو عايزين يعرفو وممكن حد فيهم يدعيلي.

اديت الباس وورد لحد قبل كده؟
أها

لو اه كانت طبيعة علاقتك بيه اية؟
حد عزيز عليا زي مانا كنت عزيزه عليه, بس للأسف دلوقتي الباس وورد اتغير.

اسمك؟
إسراء فهيد
esraa fehead

اسم الدلع المشهور وسط اصحابك؟
دايما بتسأل السؤال ده, بس هو كل واحد بيدعلني بدلع مختلف
في بيقولو لؤلؤه ودي ليها قصه, وفي روئه, وفي سوسو, وفي إيسو, وفي إس, يعني الموضوع كبير أوي, وكل واحد بيألف اللي يعجبه.

عمرك؟
21 سنه و 9 شهور و8 أيام

برجك؟
الثور

مجال دراستك؟
كلية دراسات اسلاميه

شخصيتك نوعها ايه؟
مش عارفه المفروض الناس هي اللي تتسأل السؤال ده, بس أنا بقيت هاديه كتير عن الأول , كنت الأول بتنرفز بسرعه, بحب أساعد الناس جدا سواء أصحابي أو حد ماعرفوش وبكون سعيده لما أعمل كده, ومش أي حد يعرف يفهمني , يعني لازم تتعامل معايا الأول مده عشان تقدر تعرفني كويس, وأعتقد اني غامضه (:

السفر بالنسبة لك؟
جميل, وأنا بحب السفر, بس يبقي معايا حد بحبه, أصحابي, عيلتي, كده يعني.

المود بتاعك؟
أعتقد انه كويس, بس منة أختي كانت قالتلي من يومين اني بضحك علي طول وأنا قولتلها مش أحسن مما أعيط, وفضلنا نضحك
بس أعتقد اني بفكر كويس ومش هايفه يعني , هي بس كريزة الضحك اللي ماشيه في البلد اليومين دول.

وقت فراغك بتعمل فيه ايه؟
قرأه, تليفونات, خروج, نت, وكده يعني

الاكلة المفضلة؟
مكرونه أسباجتي , وبحب المكرونه بالطريقه الايطاليه جدا.

الصفات اللي خدتها من بابا؟
مفكرتش في الموضوع ده فعلا قبل كده
بس أعتقد اني أخدت منه...... , الصراحه مش عارفه هبقي أسأل اخواتي وأقولكم (:

الصفات اللي خدتها من ماما؟
الملامح لأن أنا شبه ماما, والعند طبعا, ومش بحب حد يلعب في شنطتي, وانك لازم تعرفني الأول عشان تحبني.

اكتر 6 حاجات بتكرهها؟
اليهود, بكرههم جداااااااااا
الغباء, اني اتعامل مع حد ويكون غبي ويصمم انه صح
البرود, بيحرق دمي جدا وهو الحاجه فعلا اللي تقدر تنرفزنى بسهوله, خصوصا لو أنا مضايقه واللي قدامي بارد
الظلم, أنا ضد الظلم شكلا وموضوعا وبيكون عندي استعداد اني أساعد أي حد اتظلم بأي شكل.
السمك المقلي, مش بحبه خالص.
الخيانه, أعتقد انها أصعب حاجه ممكن أي حد يتعرضلها, وأوحش حاجه فيها انها مش بتيجي غير من أقرب الناس ليك.


اكتر 6 حاجات بتحبها؟
ربنا والرسول طبعا
ماما وبابا واخواتي وعيلتي
أصحابي
الحاجات الرومانسيه
مساعدة الناس
اني أخلي حد يضحك


الشغل بالنسة لك؟
حاجه حلوه جدا, بس و بشتغل حاجه انا بحبها

ايه الكمبيوتر والانترنت بالنسبة لك؟
حاجه مهمه في حياتي
-----------------------
نمرره لمين بقي
شاب فقري
 

The Lost Princess © 2008. Design By: SkinCorner