Monday, June 18, 2007

ولادك يابلدي



أنا مكنتش ناويه انزل البوست الجديد دلوقتي
بس الموضوع اللي عايزه أتكلم فيه مش بس يحرق

. الدم, ده يوجع القلب كمان
انا هتكلم عن المصرين اللي اتخطفوا في سوريا
أنا تقريبا مكنتش أعرف حاجه عن الموضوع ده غير انهم دخلوا دخول غير رسمي

.وعشان كده اتقبض عليهم
لكن ده كلام, وكلام الضحايا اللي رجعوا من هناك كلام

. تاني خالص
هم كانو موجودين في برنامج 90 دقيقه و العاشره مساء, للأسف انا مشوفتش الاتنين من الأول , لكن حقيقي اللي انا شفته كان كفايه
الموضوع مش زي ماقرأتوه في الأخبار, وزي ماعلاء أحد الضحايا قال : كل الكلام المكتوب في الأخبار كدب ومش هو ده اللي حصل
الحقيقه انهم كانو مسافرين بباسبورات سليمه والتأشيره كانو أخدينها من السودان وعلاء عرضها علي الشاشه
واللي أنا فهمته انهم اتخطفوا في سوريا من عصابه أخدت منهم كل الفلوس اللي معاهم , بعد مافتشتهم تفتيش ذاتي
وأخدوا فلوسهم كلها , ده طبعا غير الضرب والتعذيب والبهدله والاهانه
هم اتخطفوا في حمص بسوريا , كانو نايمين في غرفه ماتاخدش أكتر من 16 واحد وهم كان عددهم 86 طول المده اللي كانو فيها هناك كانو نايمين علي البلاط , المده دي امتدت لأكتر من شهرين بالنسبه لبعض الناس وماكنوش بياكلوا غير رغيف واحد في اليوم , والضرب

.والاهانه كان كل يوم
ابراهيم كان بيضرب عشانه دافع عن المصرين وقال لواحد فيهم ماتشتمش المصرين, ورغم ده ابراهيم قال انه كان بيعط مش عشان هو بيضرب ولكن من ضرب زميل ليهم كان بيحاول انه يهرب واتظبط
كانو بيطلبوا منهم انهم يقلدوا الكلاب والحمير عشان

.العصابه تضحك
ولما جمعوا الأكل وقالو لواحد فيهم يطبخه, واحد من العصابه قاله سيب أكل الشباب وأطبخ أكل الكلب (أكل

.(الكلب كان لحمه
طبعا غير ده أخدوا كل فلوسهم وكانوا عايزين فلوس كمان وعلاء مكنش راضي يدفع وقالوله هنقتلك وعلاء قال اقتلوني أنا كده كده ميت, لكنهم اتصلو بنسيب علاء

.في لبنان اللي وافق انه يدفع الفلوس
رضا اضرب عليه نار ولولا ستر ربنا وان واحد منهم زق الراجل اللي ضربه كان زمان رضا مات دلوقتي
المهزله دي انتهت لما الشباب هربوا واحد منهم بيعرف يجري بسرعه أول مالباب اتفتح وده كان 7 الصبح وهو راح بلغ البوليس السوري اللي وصل بعد الساعه 12 (بالليل ( من 7 الصبح : 12 نص الليل
العصابه مشيت قبل مداهمة القوات السوريه للموقع ب 10 دقايق ورئيس العصابه خرج قدامهم قبل مايدخلوا المكان والشاب المصري اللي معاهم قالهم هو ده وكان رد الظابط مش معانا أمر بالقبض عليه
بعد كده دخلو فتحوا الباب للمصرين وقالولهم فيكوا حد سوري, قالو لأ كلنا مصرين, الظباط قالو واحنا جاين عشانكم
وأخدوهم أمن الدوله عشان يتحقق معاهم
السفاره والقنصليه اتحركت لما الشباب المصري عملو اضراب عن الطعام لمدة 3 أيام في أمن الدوله وساعتها راح القنصل المصري وأفرجوا عنهم وبدأت رحلة

.عودتهم لمصر
مسؤلين مصر اللي قالوا انهم سافروا سفر غير قانوني وبمعني أصح كان ناقص يقولوا

.يستاهلوا اللي يحصل لهم

الشباب دول مش طالبين كتير , هم طالبين فلوسهم اللي اتسرقت منهم هناك, في ناس وصل المبلغ المسروق منهم 25 ألف جنيه , وكل الفلوس دي سلف هيرودوها ازاي؟
معتز الدمرداش مقدم برنامج 90 دقيقه مكنش عارف يلوم مين؟ وسأل ابراهيم وعلاء ليه البهدله والسفر وليه مقعدتوش في بلدكم
علاء رد وهو بيعيط انه بيشتغل من وهو عنده 9 سنين عشان يصرف علي أخوه وفعلا طلعه دكتور صيدلي بيقبض 400 جنيه مش بيكفوه لبس, ماهو دكتور ولازم يلبس زي زمايله ورغم ده قدر انه يشتري شقه ويتجوز لكن اللي جاي علي قد اللي رايح وهو مش عايز عياله يتبهدلوا زيه ويشتغلوا في طفولتهم وهو عارف انه لو مات مفيش حد هيسأل عنهم لأن احنا في زمن مفيش حد بيسأل فيه عن حد, وقاله احنا سافرنا السودان لأن مصر مش بتوفر الفيزا اللي أخدناها من

.هناك وفرولنا شغل واحنا نقعد في مصر
ابراهيم قال انه عنده 30 سنه ونفسه يتجوز, لو فضل في مصر هيتجوز امتي ولما يبقي عنده كام سنه؟
كان في ولد معاهم عنده 16 سنه ولما سألوه سافرت ليه, قالهم عنده 3 اخوات بنات, هيجوزهم ازاي؟

كان معاهم راجل عجوز عنده 54 سنه, وهم مخطوفين كان دايما بيقول , هجوز بناتي ازاي؟
كلهم حمدوا ربنا انهم رجعوا بالسلامه بس عايزين حقهم
لكن رضا قال انه كان بيتمني الموت ولا انه يرجع بالطريقه دي, قال أنا أهلي مبسوطين بيا دلوقتي, انما لما الباب يخبط عشان الناس اللي ليها فلوس جايه تطلبها أهلي هيجبوها منين؟
أكبر حلم ليهم انهم يجيبوا شقق ويتجوزوا, واللي متجوز حلم حياته انه يعرف يربي أولاده
قالوا ان مفيش حد حاسس باللي هم حاسين بيه, واننا مش ممكن نعرف ايه هو شعورهم
مني الشاذلي مقدمة العاشره مساءا حاولت تفهمهم اننا زعلانين عليهم أكتر من أهلهم وان اللي حصلهم مش في حقهم هم بس ده في حقنا كلنا
بس هم مكنوش مقتنعين




أنا مش عارفه أقول ايه؟ أنا عارفه اني نكدت عليكم, بس حق الشباب دول اننا نكتب عنهم, وعلي الأقل نقول ايه هي حقيقة اللي حصل
أعتقد ان البلويس السوري لازم يقبض علي الناس دي, والمفروض انهم كانو محاصرين المكان قبل مايدخلوه بساعتين علي الأقل, يعني المفروض انهم شافوا العصابه كلها وهي خارجه
الدكتور اللي كان في أمن الدوله اللي طلب فلوس عشان يكشف علي علاء مش عارفه أقوله ايه, لأن هو نسي انه دكتور, وافتكر انه مقاول.
المسؤلين بتوعنا عايزه أقولهم لحد امتي ولادنا هيتبهدلوا بره واحنا نفقعد نتفرج عليهم, اللي حصل مش اهانه ليهم هم بس, دي اهانه لينا كلنا, ليكم انتوا قبلنا, لو كانت الناس دي عارفه اننا عندنا حكومه هتقلب الدنيا لما مواطن يتهان مكنوش قدورا يعملو

.معاهم حاجه
ولو كان انسان تاني من جنسيه تانيه حصل ده فيه في مصر كان ايه اللي هيحصل؟
اخوتنا في سوريا, عايزه أقولهم ان انا عن نفسي بحبهم, أصلي بحب بلاد الشام, فلسطين ولبنان وسوريا والأردن
بس أكيد مش بحبهم أكتر من ولاد بلدي, وان كان لفلسطين قيمة خاصه عندي
بس انتو ليه عملتو فيهم كده, دول ولاد عمكم, عايزين تخطفوا وتسرقوا الموضوع مش صعب, اطلعوا الجولان واخطفوا اليهود من هناك واسرقو فلوسهم, يمكن ساعتها يحسوا ان في سوريا رجاله بتدافع عن أرضها, ويمكن ترجعولنا الهضبه اللي أذن عليها بلال
السفير المصري والقنصل اللي الشباب شكروهم هناك, أنا شايفه انهم ماعملوش غير الواجب والواجب ميستاهلش الشكر, دول كمان عملوه متأخر, ومحسوش غير لما الشباب كانو هيموتوا من الاضراب عن الطعام
للشباب اللي اتبهدلو أي كلام هقوله مش هيديهم حقهم وليهم حق يقولو ان مفيش حد حاسس بيهم, بس والله احنا قلوبنا اتوجعت عشانكم ودموعكم غاليه أوي علينا, وياريتنا كنا نقدر نعمل حاجه غير كده



حسبي الله ونعم الوكيل





---------------------





ياريت ياجماعه ماتنسوش تدعوا لمنة


بس ادعوا بضمير وذمه شويه

وياريت يكون الدعاء وانتم متوضين

•«ρяoιd»•™ البانر ده من تصميم رامي

47 comments:

انتظار مؤقت said...

حيكون الي حصلهم اكتر من الي ماتو في سيناء غدر ..الرد كالعاده حيكون يعني نبوض علاقتنا بدوله شكيكه عشان شوية عيال ربنا يعوض عليهم و علينا
تحياتي
الا صحيح هيه منه امتحانتها مبتخلصش عموما ربنا يجحك يا منه

Anonymous said...

://///////////////////////////

Eric Matt said...


ربنا يوفقك يا منة ويكرمك يا رب

أما عن سوريا

شوفي

سوريا أخواننا في الاسلام واللي حصلنا حصلهم هنا وفي كل بلاد بيحصل

أنا مش بهون طبعا لأن المشكلة من الأساس أن المصريين خلاص ملهومشي تمن

لكن

والله لازم نتوحد بقا

عموما ربنا يصلح الحال ويصبر الناس دي وأهاليها ويكرمهم ويهدي بالهم وكمان ينتقم ليهم قادر عزيز

تحياتي لك من ماناساس البلد

Amr Ahmed said...

وكالعادة يهان المصريون

دون رد

تــسنيـم said...

حسبنا الله ونعم الوكيل

الناس دي دمه وحقها في رقبة مين؟؟

البلد دي خلاص قفلت على اللي فيها وخلاص


يارب صبرك على الظالمين قد أضر بالمظلومين

FemTo said...

هما دول العرب بيضربوا فى بعض بس..سواء فى فلسطين او فى سوريا او حتى فى السنبلاوين ..والمصرى مش عارف بيتعامل كده ليه , يعنى الدكتور الصيدلى عايش كده امال الناس الغلابة يعملوا ايه..حسبى الله ونعم الوكيل وان شاء الله ربنا حيفرجها عليهم ويعوضهم وعلى كل الشباب ..ربنا يوفقك يا منة )

الريس said...

انا زهقت خلاص من للى بيحصل ده..مش لازم نسكت

سندباد said...

حسبي الله ونعم الوكيل ان بطش ربك لشديد

ibn nasser - ابن ناصر said...

امبارح المتحدث باسم وزارة الخارجيه قال انهم كانو مختطفين بس احنا مقولناش بناء علي طلب الداخليه السوريه للقبض علي العصابه!!


تحياتي

elkamhawi said...

هو ده المصرى؟؟
no comment

انا بهرج على فكرة واكيد مش بقولهاا من غير نفس

تامر حسين said...

ربنا يلطف بينا وبيهم ويعينهم علي ما بلاهم وربنا ان شاؤ الله عمره مهيسيب حق حد ولو محاسبهوش في الدنيا اكيد حسابه في الاخره هيكون عسير جدا جدا جدا جدا
حسبي الله ونعمي الوكيل في ظالم وكافر
تحياتي

Anonymous said...

سلام عليكي يا
بصراحة انا قلبي وجعني
انا متفرجتش علي الحلقتين و بصراحة مسمعتش عن الموضوع ده لان من الاخر بطلت اشوف البرامج دي لان اصابتني منها حالة اكتئاب بسبب حال البلد و الحمد لله اكتئاب في تزايد مستمر
....
اللي حصل في سوريا بجد انا مش عارفة اوصفه ازاي ...
مش هعلق علي اللي حصل اكتر ما هسال السؤال اللي بيتعب اعصابي بجد
....ليه الناس بتسأل الشباب اللي بيسيبوا البلد ..."انتوا ليه سبتوا البلد؟؟؟؟؟؟؟؟؟؟؟؟؟؟.............!!!!!!!!!!!!
بجد دمي بيتحرق
يعني الناس بتتبهدل و احلامها بتضيع و مفيش شغل و مفيش فلوس و مفيش امن و مفيش و مفيش و مفيش ....لالالا شباب البلد ملهومش حق


حسبي الله و نعم الوكيل
لا حول و لا قوة الا باله
هقول ايه بس
سلام
مها

Anonymous said...

من يلام هو من لم يوفر لهؤلاء العمل داخل بلدهم
من لم يهيؤا لهم الامان والحياة الجيدة داخل بلدهم
من يلام من يسرق من قوتهم وحياتهم
من يلام هو من دفع الناس الفقراء الى الانتحار مش شدة الفقر
من يلام هو من لم يوفر لهم الامان خارج بلادهم
لا املك سوى ان اقول حسبى الله ونعم الوكيل

3ashe2elro7 said...

الله يرحمك يا عبد الناصر
على الاقل كنت حافظ هيبتنا بره وسط البشر
انما دلوقتى اسألوا المصريين اللى شغالين بره و اسألوا من بعد ما كنا بنطلع دكاتره و مهندسين و اساتذه بقينا نورد خادمات

elharam said...

والله يا إسراء إسراء إنتى كئبتينى جداً بس الحق مش عليكى,الحق عل العصابتين,السورية والعصابة بتاعتنا,وبعدين الناس بتقول إن عبد الناصر لو كان موجود ما كانشى الموقف دا حصل,صح أنا متفق معاكو مليون فى المية,بس ما ننساش إنه برضه كان طاحن ناس كتيييير فى السجون,وما تنسوش إن كان فيه شيطان إسمه حمزة البسيونى وإبليس إسمه صلاح نصر,ورغم كل دا أنا مقتنع بيه.

Unknown said...

انتظار مؤقت:
أكيد مش أكتر ولا حاجه

طبعا علاقتنا بالدوله الشقيقه بالدنيا

بالنسبه لمنة شايف الامتعاض اللي في الكومنت اللي بعدك علي طوووووول ده بسبب سؤالك

موون هتمتحن لحد يوم 24

Unknown said...

Anonymous:

ماتزعليش ياموني

Unknown said...

The Groom:

أمين

فعلا والله ياعبدالله معدتش ليهم تمن

ياريت نتوحد بجد, ونفهم اننا مشن غير بعض مش هنكون

يارب أمين

Unknown said...

Amr Ahmed:

للأسف فعلا كالعاده

Unknown said...

تسـنيم:

بتحسبني علي الحكومه

هتكون في رقبة مين يعني؟

لأ لسه ماقفلتش

Unknown said...

Té la mà Maria:

حاضر
من عيوني

Unknown said...

FemTo:

شوف انت بقي الناس الغلابه بيعملو ايه
بيسافرو بره بلادهم عشان يلاقي ياكلو, وبعد كده نقولهم سافرتو ليه؟


يارب أمين

Unknown said...

الريس:

طب يالا همتك معانا

Unknown said...

sendbad:

يارب

Unknown said...

ibn nasser - ابن ناصر:

ده علي أساس ان العصابه ماتعرفش ان البوليس السوري هو اللي أخدهم

طب علي الأقل يقولو للناس, مش يسبوهم كده

بس انا متأكده ان الناس دي لو مكنتش راحت البرامج دي, مكنش حد هيسأل فيهم ولا هيحس بيهم

Unknown said...

elkamhawi:

فعلا لا تعليق ياعلاء

Unknown said...

تامر حسين:

أكيد ان شاء الله

نورتني ياتامر

Unknown said...

maha :
سلامتك من الاكتئاب

أهو شفتي الشباب هم اللي طلع مالهمش حق في الأخر

Unknown said...

hend:

والله ياهند انت جبتي من الأخر

Unknown said...

شريف:

بس هم ابتدوا غلط ازاي ياشريف؟

اكيد طبعا مفيش مانع (:

Unknown said...

3ashe2elro7:

فعلا دي كانت ميزة عبد الناصر

ان كان في شخصيه لمصر وسط بقيت الدول

Unknown said...

elharamك

معلش ياسيدي حقك عليا
بس انا من الأول قلت ان الموضوع يوجع القلب

أكيد مفيش حد بيقول ان عبد الناصر كان ملاك, واللي كان بيحصل في المعتقلات محدش يقدر ينكره

بس زي ماقلت
كانت ميزته اننا كان لسه عندنا كرامه

نورتني

•«ρяoιd»•™ said...

حسبي الله و نعم الوكيل

مش عارف دمنا هيفضل محروق كده كتير ولا ايه

مش آن الآوان بقي نفوق ولا هنفضل نايمين كده كتير

ربنا يرحمنا يا رب

و ربنا يوفقك يا منة

هانت اهي

هتخلص إن شاء الله يوم 26

ربنا يوفقها يا رب

تحياتي

بيجاسوس المصرى said...

و هذا مصير كل مصرى
فأصبح كل شئ مفضوح و اصبح كل شئ
اهانة اهانة اهانة

اخبار منة ايه فى الامتحانات يا رب كون معها و كل اللى زيها تجيب 200 فى المية
منتظرك لان التدوين رجع تانى

Unknown said...

•«ρяoιd»•™:

يارامي دمنا هيفضل محروق طول مالحكومه هي الحكومه, والشعب هو الشعب

لأ يارامي, منة خلصت النهارده الحمدلله ,
هي كانت هتخلص يوم 24 ((:

وميرسي كتيييييير علي البانر

Unknown said...

بيجاسوس المصرى:

ايه ده؟
مش مصدقه نفسي والله
معتز باشا بنفسه هنا
لا مش ممكن


ربنا يخليك يامعتز هي خلصت النهارده الحمدلله

بس انا بجد سعيده برجوعك جدااااااا

حمدالله علي السلامه

Unknown said...

انا تابعت الموضوع ده يا إسراء وبجد يضايق اوى خصوصا لما تلاقى رجال زى الفل بيبكوا قدامك من الإهانة
مش عارفين نزعل من الفقر ولا الظروف ولا البلد ولا العيشة واللى عايشنها ولا هواننا على الناس

حسبى الله ونعم الوكيل بجد

انتظار مؤقت said...

انا جيت بس عشان النهارده 24 و اكيد منه خلصت فجي مخصوص ادعي هنا و امش ...يا رب يا منه بالنجااااااااااااااح عشان منه متزعلش
تحياتي

Anonymous said...

بصي يابنتي طول ما المصري مشغالي في بلده متتوقعيش حد هيغليه ابدا يا حبيبتي

Unknown said...

إنـســانـة:

فعلا والله ياياسمين

بكاهم ده كان شئ صعب اوي

حسبي الله ونعم الوكييل

Unknown said...

انتظار مؤقت:

هههههههه
ربنا يخليك يارب
مالحمله مستمره لحد النتيجه(:

Unknown said...

قلوب حائرة:

:(
للأسف عندك حق

Anonymous said...

مش عارف ليه المصرى مالوش قيمه مع ان الرسول صلى الله عليه وسلم قال اننا غى رباط الى يوم الدين وان يستوصوا بنا خيرا
جايز علشان المصرى هان على المصرى اخوه قبل مايهون على حد تانى حسبنا الله ونعم الوكيل

Unknown said...

westtewest:

اللي أكيد اننا لما بنهون علي بعض, بتهون علينا نفسنا, وبنهون علي العالم كله

мїяάЖάгїм ™ said...

WE ARE THE CHEAPEST RACE EVER

Allahom entakem memman zalamana we 7att men sha2nena b3adleka ya Karim

البدراوى said...

الى حصل للشباب ده بيحصل اكتر منه للمصريين بره علشان بصراحة احنا بسبب النظام المبجل مبقاش لينا تمن انا عايش بره وعارف ده كويس
اما بالنسبة لعبدالناصر فهو بشر بيخطئ ويصيب لكن كان عنده كرامه
فى نهاية الخمسينيات الحككومة السعودية قبضت على 300 مصرى من اللى بيشتغلوا هناك بتهمة انهم بيخططوا علشان مش عارف ايه اى حاجة كده .. واللى حصل ان عبدالناصر أرسل رسالة فى نفس اليوم للملك سعود ملك السعودية اتنشرت من كذا سنه بيقوله فيها باللفظ إذا لم تفرج المملكة عن المصريين المقبوض عليهم سوف نقوم تاتخاذ اجراءات ضدكم سوف تندم المملكة عليها طوال حياتها .. وفعلا فى نفس اليوم افرج عنهم ورجعوا بلدهم
ده الفرق يا سادة بين اللى عنده كرامة وبيحافظ على كرامة بلده وشعبه مهما كانت اخطائه وبين اللى لاعنده كرامه ولا دم ولا حتى دين
أسف للتطويل وبجد مدونتك هايلة

لو بطلنا نحلم نموت said...

انتي فعلا نكدتي علينا خلاص
انتي لسه هاتنكدي
بس انا فعلا مش عارف احن هانفوق امتي ونقول مره واحده لا
وتبقي ال لا
الاخيره
ماعنديش كلام تاني اقوله فعلا
بس
ما خفي كاااااااان اعظم

 

The Lost Princess © 2008. Design By: SkinCorner