Thursday, February 9, 2012

جمهورية بورسعيد المستقلة



أنا بقالي يومين بفكر أكتب البوست ده وقررت اكتبه النهاردة لما الشباب على تويتر طلبوا انهم يعرفوا الموقف عامل ازاي دلوقتي في بورسعيد
انا كإسراء وجهة نظري إن اللي مش شايف اللي حصل في بورسعيد ده مؤامرة وتواطؤ من الحكومة بعد ما شاف الأمن واقف يتفرج والاسعاف اللي مابينقلش المصابين والتحريض المقرف من عساكر الأمن ضد أولترا الاهلي يبقى مابيشوفش واللي مابيشوفش ده ادعيله ربنا يشفيه عشان مافيش في ايدي حاجة اعملهاله
لكن ان بقالنا اسبوع نقول ثور ف3/4 شعب مصر يقول احلبوه يبقى كده كتيييير اوي 
الشحن ضد بورسعيد بيتم بطريقة عنصرية بتأكد إننا كمصرين عنصرين بطبعنا ومابنصدق نلاقي حد نطلع عليه عقدنا وكلاكيعنا، حطونا في موقف المتهم رغم إن أهل بورسعيد هم اللي نقلوا المصابين المستشفيات لما الاسعاف تواطئ ومجاش، ولما أي حد ماقدرش يسافر بيوت البورسعيدة اتفتحتلوا واستضفته، وقلنا ماشي ماعلش الناس متضايقة واعصابها تعبانة وإحنا لازم نستحملهم، إحنا شعب بردو ومالناش غير بعض
لكن إن الوضع يتطور إن العربيات الأجرة والبيجوهات لبورسعيد تتكسر في مواقف المحافظات التانية فدي قمة قلة الادب، وإن يتقتل أربع شباب على طريق السفر للقاهرة لأنهم راكبين عربية أرقامها بورسعيد فدي الصراحة مش لاقيالها وصف عشان تبقى قمته
وإن يتعلن علينا الحصار ويمنعوا الخضار وأنابيب الغاز فنعم بقى يعني، عايزين تعزلونا، طيب على فكرة بقى إحنا طول عمرنا بنحلم بالاستقلال، إحنا المحافظة الوحيدة اللي أيام مبارك كانت بتقول على نفسها جمهورية بورسعيد المستقلة، وبعد حادثة أبو العربي ولما المصري كان بيلعب مع الافريقي التونسي هنا في بورسعيد الأمن منع عزف النشيد القومي في المباراة دي عشان تبقى أول مباراة دولية مايتعزفش فيها النشيد القومي لأن شعب بورسعيد كان مقرر يهتف أثناء النشيد عاشت جمهوية بورسعيد المستقلة، وأها إحنا بنقول على نفسنا شعب بورسعيد، لأننا شايفين إننا أكتر محافظة مظلومة في البلد دي رغم إننا أكتر المحافظات إمكانيات، وكمان شايفين إننا مضطهدين من باقي المحافظات
مصانع الغاز والبترول في بورسعيد تكاد تكون محرمة على أهالي بورسعيد إلا من رحم ربي ، ومن رحم ربي ده لازم يبقى معاه واسطة وكمان يدفع فلوس عشان يتعين فيهم
فلما تقولي هنعزلكم وانتم بتقتلوا عيالنا على طريق السفر وبتكسروا عربياتنا في أي محافظة ندخلها، هنقولك اعزلني وانت الخسران
والله انا عندي قنالي وعندي شركات بترولي وغازي اللي هعين فيهم عيال بورسعيد من بكرة الصبح ، وهصرف كل فلوسي على محافظتي وهبقى أحسن من هونج كونج ، وهبعت أجيب الخضار من أحسن مكان في العالم وخليلكم خضاركم المسرطن اللي منعتوه عننا
بورسعيد فيها نسبة عمالة كبيرة جدا من محافظات تانية، يوم مالوضع هيكون غير محتمل هيكونو اول ضحايا، سواء انهم هيتشردوا من شغلهم أو المعاملة تبقى بالمثل بقى 
فنعقل كده ونبطل طائفية وشحن ضد البلد وأهلها ، عشان إحنا بني أدمين وقدرتنا على الاحتمال ليها حد ولما الموقف هينفجر مصر كلها اللي هتبقى خسرانة، إحنا حتى هنبقى خلصنا من مجلسكم العسكري وداخليتكم اللي ماعندهاش خرطوش وثورتكم اللي ماكملتش
ده إيه الغلب اللي إحنا فيه ده بس ياربي

4 comments:

AHMED SAMIR said...

التعميم في اي شيء لا يجوز اطلاقا
و من المستحيل وصم محافظة معينة بوصمة ما...
بورسعيد جزء اصيل من التركيبة المصرية فيها و فيها و فيها
ارجو ان ينجح البورسعيدية في تقديم الجناة الى العدالة لتطهير انفسهم امام بني وطنهم و امام انفسهم و قبل كل شيء امام الله عز و جل

رجل من غمار الموالى said...

أنت طبعا أدرى بالوضع عندك - لكن أنا بعض أهلى فى بورسعيد وبيقولوا - الوضع عادى - واللى بيحصل ده حوادث فردية - وتهويل من الإعلام الفلولى اللى عاوز البلد ما تستقرش - تحياتى

amr said...

الله يسترها

الحصان الأسود said...

اصلا 90% من اللي عايشين في بورسعيد دلوقتي مش من اهلها الاصليين و من النازحين اليها في غمرة الانفتاح و الهنجرة اللي تمت فيها من السبعينات, فين بورسعيد دلوقتي من بورسعيد ما قبل 75, فين الجيانوللا و شاطيء الجميل و المعدية و البلاج و بورفؤاد زمان من زرزارة و بنك الاسكان و القرف اللي البلد فية دلوقتي, اللي مش عاجبة بورسعيد يمشي منها, و كل من جاءها في غمرة الهنجرة يرجع بلدة و يهدوا القرف اللي اتبني على ردم البحيرات في زرزارة و غيرها و ترجع زي زمان , الجمال و الهدوء و النظام و النظافة, انا لما بابعد عن شارع الجمهورية و المعدية في بورسعيد باحس اني دخلت بلد تانية ماعرفهاش

 

The Lost Princess © 2008. Design By: SkinCorner