الصمت المميت

جلست أمام الطبيب الذي ظل ينظر للتحاليل والأشعة دون ان يتكلم، ثم طلب منها إعادة الأشعة والتحاليل مرة أخرى، فأخبرته أن هذه هي المرة الثالثة التي يطالبها فيها بإعادة التحاليل، أخبرته أنها لم تعد تلك الطفلة وأنها ناضجة الأن وبإمكانها تحمل النتائج أيا كانت، وأن عليه أن يصارحها بالحقيقة فهي لجأت له لأنه صديق وليس ليخفي عنها الحقيقة وإن أصر على إخفائها فستضطر أسفة أن تذهب لطبيب اخر

عاود النظر إليها وإبتسامة حانية على شفتيه

- انت بتدخني من ورايا

- دي تالت مرة تسالني السؤال ده، وإنت عارف إجابتي من غير ما أقولها، انا مش بدخن ومش بحب السجاير أصلا

امتلأت عيناه بالدموع

-أنا مش عارف أقولك ايه، بنت زيك في السن ده، مافيش أي تاريخ وراثي للمرض في عيلتها، مابتدخنش، ماعنديش أي تفسير لأشعة والتحاليل إلا إنها أكيد غلط

-انت عارف إنها مش غلط، دي تالت مرة اعملهم فيها ، انت اخترت المعامل بنفسك ومتأكد إنهم أفضل معامل في البلد، ده الوقت اللي لازم فيه إنك تقولي الحقيقة

الأعراض اللي قولتيهالي في الأول ونتائج التحاليل مالهمش غير سبب واحد رغم إني مش لاقيله مبرر، سرطان الحلق

سألته عن طرق العلاج والمضاعفات المتوقع حدوثها بدون أن تتفاجئ أو تصاب بالصدمة

تعجب هو من ردة فعلها وسالها عن سر ذلك الهدوء، وإن كان لديها مبرر للمرض ولذلك لم تنصدم لاصابتها به

  اخبرته أن في كل مرة كانت تشعر فيها بالقهر وتقرر السكوت بدلا من الحديث الذي لا فائدة له كانت تشعر بألم في الحلق، كان يختفي بعد فترة تتناسب طرديا مع مقدار الحزن بداخلها، إلى ان أصبح متواصلا مؤخرا

جمهورية بورسعيد المستقلة

أنا بقالي يومين بفكر أكتب البوست ده وقررت اكتبه النهاردة لما الشباب على تويتر طلبوا انهم يعرفوا الموقف عامل ازاي دلوقتي في بورسعيد

انا كإسراء وجهة نظري إن اللي مش شايف اللي حصل في بورسعيد ده مؤامرة وتواطؤ من الحكومة بعد ما شاف الأمن واقف يتفرج والاسعاف اللي مابينقلش المصابين والتحريض المقرف من عساكر الأمن ضد أولترا الاهلي يبقى مابيشوفش واللي مابيشوفش ده ادعيله ربنا يشفيه عشان مافيش في ايدي حاجة اعملهاله

لكن ان بقالنا اسبوع نقول ثور ف3/4 شعب مصر يقول احلبوه يبقى كده كتيييير اوي 

الشحن ضد بورسعيد بيتم بطريقة عنصرية بتأكد إننا كمصرين عنصرين بطبعنا ومابنصدق نلاقي حد نطلع عليه عقدنا وكلاكيعنا، حطونا في موقف المتهم رغم إن أهل بورسعيد هم اللي نقلوا المصابين المستشفيات لما الاسعاف تواطئ ومجاش، ولما أي حد ماقدرش يسافر بيوت البورسعيدة اتفتحتلوا واستضفته، وقلنا ماشي ماعلش الناس متضايقة واعصابها تعبانة وإحنا لازم نستحملهم، إحنا شعب بردو ومالناش غير بعض

لكن إن الوضع يتطور إن العربيات الأجرة والبيجوهات لبورسعيد تتكسر في مواقف المحافظات التانية فدي قمة قلة الادب، وإن يتقتل أربع شباب على طريق السفر للقاهرة لأنهم راكبين عربية أرقامها بورسعيد فدي الصراحة مش لاقيالها وصف عشان تبقى قمته

وإن يتعلن علينا الحصار ويمنعوا الخضار وأنابيب الغاز فنعم بقى يعني، عايزين تعزلونا، طيب على فكرة بقى إحنا طول عمرنا بنحلم بالاستقلال، إحنا المحافظة الوحيدة اللي أيام مبارك كانت بتقول على نفسها جمهورية بورسعيد المستقلة، وبعد حادثة أبو العربي ولما المصري كان بيلعب مع الافريقي التونسي هنا في بورسعيد الأمن منع عزف النشيد القومي في المباراة دي عشان تبقى أول مباراة دولية مايتعزفش فيها النشيد القومي لأن شعب بورسعيد كان مقرر يهتف أثناء النشيد عاشت جمهوية بورسعيد المستقلة، وأها إحنا بنقول على نفسنا شعب بورسعيد، لأننا شايفين إننا أكتر محافظة مظلومة في البلد دي رغم إننا أكتر المحافظات إمكانيات، وكمان شايفين إننا مضطهدين من باقي المحافظات

مصانع الغاز والبترول في بورسعيد تكاد تكون محرمة على أهالي بورسعيد إلا من رحم ربي ، ومن رحم ربي ده لازم يبقى معاه واسطة وكمان يدفع فلوس عشان يتعين فيهم

فلما تقولي هنعزلكم وانتم بتقتلوا عيالنا على طريق السفر وبتكسروا عربياتنا في أي محافظة ندخلها، هنقولك اعزلني وانت الخسران

والله انا عندي قنالي وعندي شركات بترولي وغازي اللي هعين فيهم عيال بورسعيد من بكرة الصبح ، وهصرف كل فلوسي على محافظتي وهبقى أحسن من هونج كونج ، وهبعت أجيب الخضار من أحسن مكان في العالم وخليلكم خضاركم المسرطن اللي منعتوه عننا

بورسعيد فيها نسبة عمالة كبيرة جدا من محافظات تانية، يوم مالوضع هيكون غير محتمل هيكونو اول ضحايا، سواء انهم هيتشردوا من شغلهم أو المعاملة تبقى بالمثل بقى 

فنعقل كده ونبطل طائفية وشحن ضد البلد وأهلها ، عشان إحنا بني أدمين وقدرتنا على الاحتمال ليها حد ولما الموقف هينفجر مصر كلها اللي هتبقى خسرانة، إحنا حتى هنبقى خلصنا من مجلسكم العسكري وداخليتكم اللي ماعندهاش خرطوش وثورتكم اللي ماكملتش

ده إيه الغلب اللي إحنا فيه ده بس ياربي