Sunday, April 18, 2010

هؤلاء النواب من هذا الحزب



لو عايز تسقط أو تضعف أي نظام حاكم في العالم عليك انك تقوي المعارضة وتقوم الشعب عليه، بس ده في أي مكان الا مصر
في مصر انت مش محتاج غير انك تسيب رجالة النظام يدافعوا عنه
يعني لو عايز تعرف الشعب علي الدكتور البرادعي وتعملة دعايو مجانية مش عليك غير انك تخلي الشعب يقرأ جرايد الحكومة وهم لوحدهم هيفهموا ان الراجل ده عايز يعمل حاجة للبلد بجد
في مظاهرات 6 أبريل الشباب كانوا عايزين العدد يكون كبير لكنه كان 200 متظاهر بس، والأمن حققلهم الأمنية دي لما تعامل معاهم بكل عنف وبلطجة مما أدي لنزول أكتر من 1000 مواطن يوم 13 للاعتراض علي أحداث العنف في يوك 6 وردوا علي عنف الأمن معاهم بالتشابك بالأيدي
طيب الشباب نفسهم ان الأعداد في اعتصام 2 مايو أمام مجلس الوزراء للمطالبة بارتفاع الحد الأدني للأجور في مصر يكون عدده كبير وبيحاولو يعملوا دعايو واسعه للاعتصام ده
يقوم عضو مجلس الشعب عن الحزب الوطني كتر خيره يقصر عليهم الطريق ويطالب بفتح النار علي المتظاهرين بدل فتح خراطيم المياه
لأ بجد كده كتير هو في ايه؟
هو أنتم أصلا معارضة ومتخفين عشان تجيبوا توقعوا النظام؟؟
الناس بطلت تخاف خلاص، وتصريحاتكم وتصرفاتكم بتستفزهم وبس، ده مش بعيد الشعب المصري كله ينزل الاعتصام الجاي طمعا في الشهادة وبدل مانقول عندنا 20 معتقل و 50 مصاب في المظاهرة الأخيره نقول عندنا عدد كذا شهيد
ياحضرة النائب الناس أصلا قرفانة ومش طايقة نفسها ولولا الكفر والخوف من النار كانو انتحروا من زمان، تقوم انت فاكر لما هتقولهم هنخلصكم من حياتكم اللي انتم كرهتوها وكمان هندخلكم الجنة لأنكم ان شاء الله هتكونوا شهداء هيخافوا ويقعدوا في البيت؟
ده انت بتضمن للداعين للمظاهرة او الاعتصام نجاح غير مسبوق النظير
هو الحزب ده مافيهوش رجل رشيد ؟ مفيش حد كده يشخط في باقي أصحابة ويقولهم كفاية بقي قليتوا قيمتنا وفرجتوا علينا الناس وضحكتوا علينا الشعب؟

7 comments:

ahmed samir said...

عارفه الثنائي اللي بيكون عبارة عن واحد ضخم الجثة كبير العضلات و تاني رفيع و قصير و هو العقل المفكر؟

اهو الحزن الوطني كدة بس بعد ما تاه منه صاحبه الرفيع

دي اجابة سؤالك عن الرجل الرشيد

سمع هوص (Abo 3li) said...

اغبياء الحزب الوثني فاكرين كده انهم بيجاملو النظام والقيادة السياسية لما بيدفعو بأستماتة الحمقي عن النظام في كل الاحوال....
وبقينا فعلا زي مبتقولي... اي شخص النظام يقول عليه "كخة" و"وحش" بيبقي عند الناس فرخة بكشك... لمجرد العند والكره ضدهم...
تعرفي انا انتخابات مجلس الشعب الفاتت انتخبت الاتنين المرشحين الاخوان... مش حبا فيهم ولا اتفاقا مع افكارهم... ولكن كيدا في الحكومة ال.... وتعرفي كمان... الاتنين الاخوان نجحو ...
بس مفتكرش ان الحصل ده هيحصل تاني... النظام مش هيفوت انتخابات تانية شبه نزيهة..

يا مراكبي said...

نفس الكلام اللي أنا قلته يوم ما اعتقلوا أحمد مهنى

قلت ساعتها: هل من الذكاء ان النظام يتصرف كده ويثبت على نفسه تهمة القهر وتكميم الأفواه؟ طيب يتداروا شوية وهما بيعملوا الموضوع ده .. مش عيني عينك كده

وده لأن الدعاية العكسية بتكون رهيبة وبتعمل عكس اللي هما عايزينه بالظبط

أذكياء آخر حاجة بجد
:-)

Diyaa' said...

إنتي مؤدبة زيادة عن اللزوم
على فكرة يعني
إيه حضرة النائب دي !!


ده مش نائب
ده نايبة
مفرد نوائب :))

عز الصهيوني مش هيعرف يسيطر على كل شيء ولا جيمي ولا غيره
+ إنهم مش عباقرة

بس عزائهم الوحيد إن النسبة القادرة على إحداث تغيير
مش عايزين أو خايفين :)

فيا رب الناس دي تعوز ..ومتخافش :)ويحصل التوفيق الإلهي وكلهم يهبوا في نفس اللحظة
ونخلص بقى

mohamed said...

لا وبيقول انهم مش عايزن انتفاضة حرامية

طيب حد قاله ينتفض هو وبقيت الحزب الواطي بتاعه

Mahmoud said...

اخر حاجة اتوقعها ان ده يحصل ف مصر
هو احنا ف بورما ولا ابصر ايه؟
يعني مفيش حقوق انسان كمان؟؟
يالا ع البركة والبلد خربت وعليه العوض
عليه العوض
عليه العوض

قلــ"بـــلال"ــــــب فارس said...

السلام عليكم
طبعا الصورة اللى حضرتك حطاها صورة للنائب البلتاجى نائب الاخوان وكان بيدافع عن شباب 6 ابريل
والحزب الوطنى هذه الايام بقى خلاص
ان شاء الله هينهى

 

The Lost Princess © 2008. Design By: SkinCorner