Monday, January 7, 2008

...اليها



اليها أكتب

احنا مابنتكسرش , احنا بنقع اه لكننا بنقوم تاني
احنا زي طائر العنقاء لما بيتحرق, بنقوم من تحت الرماد أقوي من الأول


كل شئ بيتولد صغير وبيكبر الا الحزن والألم والغضب , بيتولدوا كبار وكل يوم بيصغروا عن اليوم اللي قبله

وافقنا او ماوافقناش هو بيحبنا , رضينا أو مارضيناش هو بيختارلنا الأحسن وبيعمله , يمكن بنبص لناس كتير وبنلاقي انهم بياخدو اللي عايزينه لكنهم بيرجعوا يندموا علي ده بعد كده ويقولو ياريتنا ماكناش اخدناه, وياريت اللي اتمنناه مكنش اتحقق

يمكن ده بيحصل معاهم عشان هو مش بيحيهم زي مابيحبنا, ويمكن ده لحكمه محدش يعرفها غيره

احنا بيقصر معانا الطريق وبيدينا الضرر الأقل, واللي بعد كده بنكتشف انه مكش ضرر أصلا

أنا عارفه ان كلمة ليه دلوقتي شاغله الحيز الأكبر من تفكيرك, لكن صدقيني مسيرك هتعرفي ليه بعد مالخيوط تكمل, ساعتها هتعرفي ان ده لو مكنش حصل كنتي هتندمي اويييييي

أنا فاكره اني من سنة كنت فعلا عايزه حاجه لو كنت أخدتها كنت هعيش بقيت عمري ندمانه انها معايا

أنا دلوقتي فهمت ليه الأحداث اللي حصلت في أخر 4 سنين حصلت معايا

يمكن بنكون مستعجلين اننا نعرف لكننا مش بنقدر نعرف غير في الميعاد المناسب ولما الصوره كلها تكتمل

احنا مابنتكسرش , احنا بنقع اه لكننا بنقوم تاني
احنا زي طائر العنقاء لما بيتحرق, بنقوم من تحت الرماد أقوي من الأول


مهما عدينا بأوقات صعبه, دايما بتعدي وبتكون زكريات مش لازم اننا نفتكرها

احنا مابنندمش احنا بيتندم علينا, ده مش غرور, لكن رحم الله امرء عرف قدر نفسه

اللي بيحكموا علينا من غير مايتعاملوا معانا كوني متأكده ان ربنا مش كاتبلهم الخير اللي جوانا وده أكيد لأنهم في الأصل مايستهلهوش

احنا اخوات وده معناه ان جيناتنا واحده, حتي لو كانت سائده عند حد ومتنحيه عند التاني, فتنحيها مايمنعش وجودها


احنا مابنتكسرش , احنا بنقع اه لكننا بنقوم تاني
احنا زي طائر العنقاء لما بيتحرق, بنقوم من تحت الرماد أقوي من الأول

48 comments:

العراف said...

اسلوبك فى التعبير جميل والمدونه ايضا اتمنالك التوفيق واكون سعيد لو زرتى مدونتى

*.* HoNdA *.* said...

جزاكم الله خيرا يااسراء أسلوبك جميييل جدن ماشاء الله وأنا بأيدك فى كل حرف قلتيه لان من رحمة ربنا بينا مش كل الى بنعوزه بناخده لانه ممكن يبقا شر لينا
ولو اطلعتم ع الغيب لرضيتم بالواقع
وكمان فى حديث للرسول بيقول عجبا لأمر المؤمن كله خيير

walaa said...

الحياه اللى احنا بنعشها عباره عن احزان وافراح لا الفرح بيدوم ولا الحزن بيدوم برده
واحنا فعلا مبنكسرش لا بالعكس لان هذه التجارب بتقوينا

تحياتى لك ولاء

Mony The Angel said...

:)
so nice post ya esraa2
so nice words :))

أخف دم said...

ازيك يا إسراء
كل سنة وانتى طيبة و أخواتك بخير
الحل فى اننا نرضى بأى شيء يحصل إننا نتاكد ان ده الخير لينا
ان حد يموت عزيز ده الخير ليا
انى اتفصل مثلا ده الخير ليا
انى أحب ده الخير ليا
انى أكره أو انفصل ده الخير ليا
ساعتها هنحس ان أكيد ربنا سبحانه وتعالى عمل ده لحكمة ولخير قدام احنا مش عارفينه
مشكلتنا انا كلنا مستعجلين على الخير رغم ان مسألة الخير اصلا نسبية ومحدش عارف.. ممكن خيرى يبقى شر لغيرى والعكس
ربنا يهون والخير جاى بس احنا نؤمن بيه
وكل سنة وانتوا جميعا بخير وطيبين

تسـنيم said...

مممممممم زي طائر العنقاء

انتي متعرفيش انه أول المستحيلات التلاتة؟

:)

متخافيش الضربة اللي مش هتقتلني هتقويني وياما عدى عليا وفات لا دي أول ولا أخر مرة بس ساعات بستغرب وأبقى مستنية التعويضات اللي قال عليها زمان عبد الوهاب مطاوع الله يرحمه


وأنا متأكدة إني كويسة جدااااااا وأي حد أبعد عنه وأخرج من دايرته خسران..

وبعدين " ولسوف يُعطيك ربك فترضى"

فأنا مستنية ده.

ربنا يخليكي ليا

أحمد عيسي said...

دايما اقول ان مالا يقتلني يزيدني قوة
ودايما اقول ان حياتنا عمرها محتقف عند حد
اي حد
ربنا مش بيكتب لنا حاجة وحشة بالعكس
ربنا يعاملنا بما هو اهله لا بما نحن اهله
حتي وان ابتلينا ..حتي وان كبرت مصيبتنا
فالمصيبة هي الشء الوحيد الذي يولد كبيرا ثم يصغر


بوست قوي جدا ارفعله القبعة يا اسراء

zordeak said...

:)


ربنا يخليكو لبعض

كنت عايز اقول كلاام كتيييير

بس ببساطة انتى قلتى كل اللى كان ممكن أقوله

خلو بالكم من بعض

الشنكوتي الكبير said...

اولا ازيك يا ساحره
ثانيا مين اسراء دي
ثالثا بوست هايل قوي
بس طبعا انتي عارفه انك مهما كتبتي بوستات جامده انا باجي هنا علشان ادور على القصص الفظيعه اللي بتكتبيها
ايوه بوستاتك حلوه لكن برده القصص احلى انا زهقت من الواقع يا ساحره
ما علينا
انا هابقى ادخل على لينك اللي انتي حاطها تحت كلمة اليها دي
يمكن اعرف مين اسراء دي

سلاااااااااااااااااااااااام

esraa said...

العراف :

ربنا يخليك

سعيده انها عجبتك

انت كمان مدونتك جميله

(:

esraa said...

*.* HoNdA *.* :

واياكم

فعلا من رحمة ربنا بينا انه مش بيدينا كل اللي احنا عايزينه

والا كنا ضعنا بجد

esraa said...

walaa:

اللي مايكسرناش لازم يقوينا

esraa said...

Mony The Angel :

شكرا ياستو هانم

(:

esraa said...

أخف دم :

أشرف

ازيك انت عامل ايه؟

والله ليك وحشه

وانت طيب ياباشا

اكيد دايما ربنا بيختار لنا اللي فيه الخير

esraa said...

تسـنيم :

طب ماحنا بردو من المستحيلات

(:

التعويضات لسه جايه
بس يمكن اننا مش لازم نستناها
وهي تيجي لوحدها

ويخليكي لينا

(:

esraa said...

أحمد عيسي :

مقوله صحيحه يااحمد

ربنا مش بيكتب لنا حاجة وحشة بالعكس
ربنا يعاملنا بما هو اهله لا بما نحن اهله
حتي وان ابتلينا

بالظبط كده

ربنا يخليك يااحمد

(:

esraa said...

zordeak:

(:

ويخليك يااحمد

اي خدمه يافندم

(:

esraa said...

الشنكوتي الكبير :

أنا الحمدلله تمام

انت عامل ايه؟

أنا اسراء يابني

(:

دي تسنيم أختي

أحمد الشمسي said...

كل سنة وانتي طيبة أولا... كلامك مليء بالتفاؤل... رغم أني متشائم كبير، لكن معتقد تماما ان التفاؤل هو الحاجة الوحيدة اللي بتهون علينا الضلمة اللي احنا فيها

فوكيره said...

اسـراء ... عندك حق اوى

دايما اقول : لو حاجه حصلتلك في الدنيا دي وكانت غصب عنك حتى لو مش على هواك فهى خير ليك ..اكييد وحتلاقي مظاهر الخير ده بتظهر اوى مع الوقت "

تحياتى بجد ..

نقطة مية said...

عزيزي صاحب المدونة
عزيزتي صاحبة المدونة
========================
نتشرف بدعوتك لافتتاح
دار الكتب
هي حلم صاحب البوابة الذي تحقق
طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
الافتتاح يوم الخميس 10-1-2008
في مكتبة البلد 31 شارع محمد محمود امام الجامعة الامريكية
الساعة السادسة مساءا
يلا نشارك مصطفى فرحته بتحقيق الحلم

امل عبد الحكيم said...

السلام عليكم
ازيك يااسراء كل سنه وانتى طيبه
واسلوبك فى الكتابه رائع
والقوة انك لما تهزم فى معركه متتنحاش عن رايك
لازم تحاول مرة واتنين وتلاته وفعلا زى ماقلتى
كل حاه بتتولد صغيرة وتكبر الا الحزن بيتولد كبير ويصغر

elkamhawi said...

nice gedn
bravoooooooooooooooo

only spot said...

اولا تحياتى لاسلوبك ويمكن اكثر جمله مستنى بشكل خاص ان كل شئ بيتولد صغير وبيكبر الا الغضب والحزن بيتولد كبير وبيصغر الى ان يتلاشى بمعرفة الحكمه بعد طول الانتظار او قصره ليست تلك القضيه ولكن من حكمة ربنا انه جعل هذا الشئ يتولد كبير ويضمحل بالوقت واؤيدك بكل ما قولتيه واضيف ان كل منا يحيا دنيته كما يراها فان راها حلوه فهى جنه والعكس صحيح وهذا يؤيد الحديث القدسى انا عند ظن عبدى بى ان ظن بى خيرا فهو خير وان ظن بى سوء فهو سوء
متعنا الله واياكم بحسن الظن بالله
تحساتى

bedo said...

احنا مابنتكسرش , احنا بنقع اه لكننا بنقوم تاني
احنا زي طائر العنقاء لما بيتحرق, بنقوم من تحت الرماد أقوي من الأول

موضوع جميل بجد وربنا يكرمكم جميعا ويوفقكم
بس بلاش نبص لغيرنا بالطريقة دي مش علشان هما ما يستهلوش ولا حاجة
دول يمكن ماعرفوش
أو يمكن أو يمكن ....إحتمالات كثيرة
والله أعلم بالصح
ولما تشوفي حد كده إدعيله
يمكن دعوة صادقة من قلب صادق تتفح لها أبواب السماء
فالقلوب بين إصبعين من أصابع الرحمن يقلبها كيف يشاء

أسف للإطالة

وجزاكم الله خيرا

FadFadA said...

إذا رأيت سربال النعمه يتقلص عنك .. فأحسن طنك بالمنعم ,, ذلك لأن لا تتعثر

و ربما أعطاك ليمنعك , و منعك ليعطيك

لا تحسبوه شرا لكم بل هو خير لكم

أوقات قد نظن أننا وقعنا
و واقع الأمر أننا قد اقتربنا من الحقيقة أكثر
فلا يعلم معنى الحياة إلا من تألم , فالألم جزء من الحياة
و لا يعلم معنى السعادة إلا من ذاق الحزن

محمد

يا مراكبي said...

أحب جدا الصداقة اللي من النوع ده

هي دي فايدة الأصدقاء الحقيقين .. لما بيكونوا حقيقيين

esraa said...

أحمد الشمسي :

وانت طيب يااحمد

بالظبط ماهي مش هتبقي ضلمة وتشائم كمان

اضحك الصوره تطلع حلوه

(:

esraa said...

فوكيره :

المشكله اننا مش بنستني الوقت

esraa said...

نقطة مية :

بجد كان نفسي أكون موجوده امبارح

بس ان شاء الله اول ماهروح كايرو لازم اروح المكتبه

(:

esraa said...

امل عبد الحكيم :

وعليكم السلام ورحمة الله وبركاته

وانتي طيبه ياجميله

القوه اننا لما نتهزم مانحاربش في الجوله التانيه بنفس اسلوب الجوله الأولي

والا هنتهزم بردو

esraa said...

elkamhawi:

(:

ماشي ياباشا

esraa said...

only spot:

هم بيتولدوا كبار وبيصغروا من رحمة ربنا بينا

تخيلي لو كان العكس كان ايه اللي حصل

بالظبط المهم نظرتنا احنا للحياه

نورتيني

esraa said...

bedo:

انا مش فاهمه انت تقصد بغيرنا مين بالظبط؟

انا اكيد بدعيلها

وربنا يسهلها عليها

ولا طولت ولا حاجه

براحتك ياسيدي

(:

نورتني

esraa said...

FadFadA:


و ربما أعطاك ليمنعك , و منعك ليعطيك

لا تحسبوه شرا لكم بل هو خير لكم

بالظبط كده والله

والله عندك حق يامحمد

احنا مش ممكن نعرف قيمة الحلو غير لما نقابل الوحش

نورتني

esraa said...

يا مراكبي :

مابالك بقي لما يكونو اخوات كمان

مش اصحاب وبس

مبرمج حر said...

جميل أوى يا اسراء القوة , والتفاؤل اللى بيفوحوا من كلماتك
جميلة الصداقة قبل ما تكون اخوة
انتوا الاتنين أجمل من بعض .. ربنا يخليكوا كلكوا لبعض

Ma 3lina said...

this Post is amazing , it's a lesson 4 all of us in dealing wiz crisis.

thx alot 4 sharing :))

LAMIA MAHMOUD said...

احنا ما بننكسرش احنا بنقع .. ومن حقنا جدا ناخد وقتنا واقعين بس مش من حقنا ابدا نفضل واقعين مادام مش عايشين لوحدنا
ممكن انضم للتضامن واقولها خدي بالك من نفسك؟

تسـنيم said...

لمى: المشكلة إن كل الناس بتقولي خدي بالك من نفسك.. واللي مش واخدين بالهم منه إني تعبت بقـــى وعايزة حد ياخد باله منــــــي


:(

امرأة تقول الذي لا يقال said...

اللي عنده أخت زيها يا تسنيم المفروض يبأى أجمد من كده
ربنا ما يحرمكم من بعض
وبجد هي قالت لك كل اللي انا كان ممكن أقوله

امرأة تقول الذي لا يقال said...

تسنيم
ما تستعجليش التعويضات
لكن والله جاية جاية بإذن الله

esraa said...

مبرمج حر :

انت اجمل يااحمد

ويخليك يارب

(:

esraa said...

Ma 3lina:

(:

بس مين يتعلم الدرس ياجميله؟؟؟

esraa said...

LAMIA MAHMOUD:

ومن حقنا جدا ناخد وقتنا واقعين بس مش من حقنا ابدا نفضل واقعين مادام مش عايشين لوحدنا

عجبني اوي الجزء ده

طبعا ممكن ياجميله

esraa said...

تسـنيم :

واحنا روحنا فين؟؟؟؟

(:

esraa said...

امرأة تقول الذي لا يقال:

(:

مش كده بردو

ربنا يخليكي

hend...hanady said...

ياريت وقعتنا متطولش ونقوم بسرعة
بوست جميل اوى

 

The Lost Princess © 2008. Design By: SkinCorner