مصر مشت منين؟

هي االبلد دي ايه اللي حصلها؟
محدش يقولي هي طول عمرها كده، عشان هي عمرها ماكانت كده ، اه هي فيها فساد واستعباط لكن مش كده
انا فعلا مش فاهمه هي كان مالها امبارح، امبارح انا مكنتش قادره اني اتعرف عليها بجد ولا أعرف مصر اللي أنا اعرفها راحت فين؟
احنا قضائنا نضيف ومحترم، ومع ذلك وكيل النيابه بيحفظ التحقيق من غير مايحقق فيه أصلا
فنون اتفصلت من شغلها عشان قالت رأيها في مدونتها، البنت ماقالتش انها هتنتخب البرادعي ولا انها هتقف وراه في الانتخابات، كل اللي قالته ان دوايتنا مسدوده ومش بيمشي فيها الكهربا
أحمد مصطفي مخطوف من امبارح والانباء متضاربه بين ان أمن الدوله هم اللي خطفوه بتهمة الاساءة للدوله وان المخابرات الحربيه هي اللي خطفته بتهمة الاساءة للجيش بسبب البوست ده
أنا عن نفسي أتمني ان الرواية الاولي هي اللي تطلع صح لأن حتي مع اعتراضنا بس ده متوقع من امن الدوله، لكن الجيش بتاعنا طول عمره محترم وأكبر من الحاجات دي، ولو طلع فعلا مع امن الدوله لازم الجيش يحاسب اللي وصلوا لأهل أحمد ان الجيش هو اللي خطفه
أحمد متحول لمحكمه عسكرية رغم ان جواسيس اسرائيل مش بيتحاكموا عسكري، ممكن تعتبروا أحمد اسرائيلي وتحاكموه مدني؟
الاخبار دي كانت كتيره عليا اوي في يوم واحد وخلتني بجد مش فاهمه مصر حصلها ايه ولا راحت فين؟
اللي شاف مصر وهي ماشيه يقولي مشت منين ، يمكن أجري وراها ألحقها وأقنعها ترجع تاني بقي

مش هقبل اني أتهان والنيابه تتهاون كمان

وكيل النيابة حفظ التحقيق، هو وكيل النيابه استدعاني أصلا وسمع أوقوالي عشان يحفظ التحقيق؟ وهو حقق مع مين أصلا؟
بابا قدم طلب للمحامي العام لاعادة فتح التحقيق والناس كانو متعاونين ويسروله الطلب والامضا عليه، لكن الكلام العام اللي كان بشكل ودي ان في احتمال كبير يتحفظ تاني وان مفيش حاجه هتحصل عشان هم بيتتبعوا التلفونات في حالات القتل وسرقة الشقق
طيب هو قانون الاتصالات ده لزومه ايه؟ وهم فاتحين مباحث التليفونات وبيصرفوا عليها من مزانية الدوله ليه اصلا؟
هو مش في قانون بيقول ان أنا ليا حق والمفروض اخده؟
وهو مش في جهاز في الشرطه أصلا وظيفته انه يساعدني في اثبات الحق ده؟
الواحد كان ممكن يتوقع التهاون من جهاز الشرطه وده محصلش والناس عملو واجبهم وزياده، لكن ان النيابه هي اللي تخذلني ده شئ أنا ماتوقعتوش ولا خطر علي بالي
سيادة وكيل النيابه هو حضرتك حققت مع مين عشان تحفظ التحقيق، والأهم هي لو كانت أختك أو زوجتك أو والدتك كنت بردو هتحفظ التحقيق؟؟

اشترك في جروب مش هقبل اني اتهان والنيابه تتهاون كمان للتضامن معايا

مش عايزه غير حقي

كان بقالي فتره في رقم بيشتغلني،بس الرقم اللي كان بيتصل بيا عليه أنا أصلا مش بشغله كتير، لكنه دايما كان بيتصل لما أفتحه، ودي كانت أول مره في حياتي أشوف واحد يتقاله ماتتصلش بالرقم ده تاني بدل ماتتهزأ ويتصل بردو، غاوي تهزئ مثلا؟
لما اشتغل في قلة الادب أنا قلتله اني هبلغ عنه واوديه في داهيه والغريب انه اتصل تاني بمجرد ماقفلت في وشه
صاحبتي اللي كانت معايا ساعتها استغربت اوي اني هعمله محضر بجد، هو المفروض اننا نسكت علي قلة الادب ونقفل احنا خطوطنا ولا الاشكال دي هي اللي تتربي؟؟؟؟
الحقيقه ان الناس في مباحث التليفونات كانو محترمين جدا (احنا بردو نقول اللي لينا واللي علينا) هو صحيح في ظابط اعترض علي اني قلت عليه عيل وقالي 20 سنة يبقي راجل حتي لو أصغر منك بس انا قلتله انه لما يكون قليل الادب ومش متربي يبقي عيل وان الرجوله مش سن
وأمين الشرطه اللي كان بيكتب المحضر الصراحه قدر اني عمري ماقلت الالفاظ دي في حياتي وعملهولي محضر سب من غير مااقول ايه اللي اتقال بالظبط
وتاني يوم روحت اخدت رقم المحضر ورقم الصادر وكانو متعاو جدا فعلا
وروحت النهارده جبت رقم الجنحهمن القسم وسألت في النيابه مكنش لسه وصل
بس انا مش عارفه ليه أغلب الناس شايفين اني مش هوصل لحاجه واني تاعبه نفسي علي الفاضي واني اريح نفسي واقفل الخط خالص
هو ليه لازم أكون سلبيه، مش الغلطان المفروض انه يتعاقب؟؟
أنا مواطنة صالحه، مش برمي زباله في الشارع، بربط حزام الأمان وأنا سايق، معايا بطاقه انتخابيه من يوم ماكملت 18 سنة، يبقي من حقي اعيش في بلدي بأمان ومن حقي إن الحكومه تجيبلي حقي
مش المفروض ان كل ما موبيلي يرن اتخض ليكون الكائن ده
انا من حقي ان القانون يطبق ومن حقي انه يتقبض عليه ومن حق اي بنت بتتعرض للسفاله دي انها تاخد حقها
ومحدش يقولي كبري دماغك واقفلي الخط لأن أنا واحده بتصعب عليها نفسها وعمري ماشتمت بألفاظ خارجه ومش بعرف أقولها أصلا وطبيعي اني أحس بالاهانه وكرامتي توجعني اوي واعوز حقي لما ده يحصل معايا
أنا مش عايزه كتير، أنا بس بطالب بتطبيق القانون واني أخد حقي