كنا خارجين خامس يوم العيد أنا وأخويا وأختي وأولاد خالتي
وكان يوم بجد جميل.
واحنا مروحين , أخويا ركن العربيه استغربت ومفهمتش هو ركن ليه , حتي بن خالتي كان سبقنا فرجع عشان يشوف وقفنا ليه؟
قولتله وقفت ليه؟ قالي انزلي
وفتح بابه وقالي تعالي عشان تسوقي
نزلت وركبت مكانه وسوقتها وبن خالتنا فضل ماشي جنبنا
وخلصت وروحنا
كنت سعيده جدا, مبسوطه كتيير لأني مطلبتش منه يخليني أسوق هو عرض عليا لوحده, وكمان دي أول مره أسوق في الشارع.
واكتشفت حاجه مهمه, ان حاجات بسيطه بنعملها بتلقائيه وبدون تخطيط ممكن تسعد شخص تاني جدا.
أخويا العزيز بجد شكرا ليك انت سعدتني
.jfif)
21 comments:
فعلاً حاجات صغيرة بتسعدنا جداً بخاصة لما تصدر بدون ان نطلبها
مبــــــروك اول تجربة سواقة
وعقبال يارب لما نشوفك سايقة سيارتك الخاصة
كنت منتظرة إنك تقولي في اخر البوست،
ملحوظة : كانت تخيلات أو حلم من أحلام اليقظة.
بقى أحمد يعمل كده مصدقش أحمد طب إزاي فاتتني انا الليلة دي.
محبتي بس اللي يقراكي دلوقتي ميشوفكيش وانتي بتحاولي تطلعي بالعربية تاني يوم العيد والا بلاش فضايح ;))
إلا صحيح والعربية بتتصلح فين دلوقتي
العربيه مش بتتصلح لأنها محصلهاش حاجه , لأني الحمدلله سوقت كويس جدا
lol
ana kaman etbasat awee alsara7a :D
w about alhagat also3'iara..
enty bent 7alaal..
ana tool 3omry banaady bel7agaat also3'iara de, ana maihemneesh haaga feldonia 3'eer alhagat also3'iara de :)
btefre2 m3aia gamed gedan 3ala fekra :)
موني:
ربنا يبسطك علي طول
ويارب دايما الناس تاخد بالها من الحاجات الصغيره دي معاكي
على فكره انا مبسوط جدا لأن لسه فى ناس زيك كده بتفرق معاها الحاجات الحلوه دى وبتأثر فيها , لأن فى اليومين اللى احنا عايشنهم دول ولا بقى فى حب ولا بقى فى اخوه ولا بقى فى اى حاجه اصلا
ربنا يسعدك يا ربويخليلك اخواتك
روكى
على فكرة كلامك صحيح مية في المية
الفتات الصغيرة دي من الناس المقربين ليكي سواء كانو اصحابك او قرايبك او اخواتك
بيبقى ليها تأثير السحر على الفرد
وبتسعد بجد
وبتحصلي ساعات لما والدي يعمل لفتة زي دي
وانا بعملها ساعات لاخواتي الصغيرين
وبيفرحو جدا جدا لما بيلاقوني بعالملهم كويس كده
ومبروك على السواقة يا اسراء
وعقبال ما تطلعي الرخصة يارب
rokaaa
نورت المدونه
انا فعلا اكتشفت اننا بقينا عايشين في زمن غريب ومش عارفه هو طول عمره كده واحنا ماكناش واخدين بالنا ولا هو بقي كده جديد؟ لكن اللي انا عارفاه ان فيه ناس كتير كويسين وبيعدو علينا في حياتنا والمهم اننا مانضيعش الناس دي ولا نخليهم يبعدو
-------------------
واحد من الناس
نورتنا
ربنا يخليك لأخواتك يارب ويخليهم ليك
والله يبارك فيك وعقبالك لو مكنتش بتسوق , وأنتم السابقون ونحن الاحقون لو كنت بتسوق(:
أنا اسف يا اسراء اني هقولك الكلام ده
بس بصراحه البوست ده مش حاسس انه حاجه كانت مستاهله تتحكي
اه معناه جميل و مفهوم ولذيذ
بس حاسس انه نوع من الاقرار زي ما أقولك الشمس بتطلع الصبح والقمر بالليل
كلام جميل بس ...
عادي و الي حد ما معروف
سوري مره تانيه
أحمد سلامة:
وأسف ليه؟ انت من حقك انك تقول رأيك بكل صراحه, ومن حقك برضو اني أحترم الرأي ده وأقدره(:
مش هقوللك غير ان كان فى مثل جدتى ديما تقولو .....الى يطلب بالبوق هيتاكل بأيه
يارب تكون وصلت
camera_girl:
شكرا علي الكومينت, بس هي الصراحه ماوصلتش, أصل أنا ماعرفش المثل ده (:
من رأي ان كلمت انا اسف دي مريحه جدا و بتحل مشاكل كتير00حتي لو كانت بتتقال عشان تسكتي اللي قدامك في النهايه انها بتمنع تصاعد للخناقه او القفشه او المشكله اللي موجوده
koukawy:
هي فعلا بتمنع مشاكل كتير
بس ماينفعش اننا نقولها عشان نسكت اللي قدامنا وخلاص, لازم نقولها بس لما نغلط.
انا الموضوع ده بحسه اووى مع ناس كتير ممكن حاجة صغيرة تخليه يطير سما كانت ملموسة زى السواقة كده :P
او محسوسة زى نظرة حانية او ابتسامة جميلة
ربنا يبسطك علطول يارب
FemTo:
(:
ربنا يخليكي, ويسعدك انت كمان.
احمد سلامه انا بناقضك في رايك بجد
هيا عبرت عن حاجه صغيره كانت ليها اثر كبير فيها
انت مش هاتحسها لانك مش في نفس الموقف
بس علي فكره لذيذه اوي
والحاجات الصغيره لو حتي ابتسامه مش في وقتها من حد قريب بجد بتسعد جدا
حلو البوست يااسراء
naryoma:
ميرسي ياسيتي, وربنا يخليكي.
بس اكد أحمد كان بيعبر عن رأيه وده طبعا حقه, انت نسيتي اننا في بلد ديمقراطيه ولا ايه؟(((:
علي العموم الاختلاف في الرأي لا يفسد للود قضيه.
المدونه رائعه واتمني كتابة الكثير من الموضوعات وعلي فكرة انا لي اهل كثيرون عايشين في بورسعيد بجوار تمثال الصياد اخوكي عمرو
عمرو:
ربنا يخليك ياعمرو, وأهلك في بورسعيد زادو واحده, نورتني بجد (:
Post a Comment