...يوم 6 أبريل

طبعا كلنا سمعنا عن إضراب 6 أبريل

وانه هيكون إضراب لأهم القوي والأحزاب السياسة في مصر

لكن اللي عجبني بجد إن أخبار الاضراب انتشرت جداااااا

وأتمني بجد ان الانتشار ده مايكونش علي النت وبس وإنه مؤيدينه مايكونوش إحنا وبس

دي بلدنا ومن حقنا اننا نعيش فيها زي ماحنا عايزين, من حقنا نتمتع بخيرها , من حقنا إن أولادنا يلاقو شغل, وإن اللي بيشتغل يلاقي مرتب يقدر يعيش منه

إحنا مش بنطلب حاجة كبيرة ولا حاجة مستحيلة ولا حاجة مش من حقنا

إحنا بنطلب أبسط حقوقنا وهي إنهم يكفلولنا حياة كريمة

هتفضل بلدنا وهنفضل ولادها

ولو احنا مادورناش علي حقنا فيها , مفيش حد هيجي لحد عندنا عشان يديهولنا

اضراب 6 أبريل أول خطوة علي الطريق الصح

شارك في اضراب 6 أبريل ومين عارف ايه اللي ممكن يحصل بعد كده؟

...رحمهما الله

منذ أربع سنوات فجرا قصفت طائرات العدو الصهيوني مقعد متحرك لرجل قعيد خرج لصلاة الفجر

الشيخ القعيد ذو الشعر والجلباب الأبيض استشهد بعد أن أصابة صروخ العدو ليحول جسده الهزيل الي أشلاء وكرسيه المتحرك إلي قطعة من الحديد

شيخ قعيد نال الشهادة وأيقظ الأمة فمتي يستيقظ صحيح البدن قعيد الهمة

كان هذا هو الشعار الأشهر الذي انتشر بعد استشهاد الشيخ ياسين حيث أنه كتب في كل مكان رسائل الموبيلات, لافتات الشوارع والايميلات

اليوم وبعد مرور أربعة اعوام علي استشهاد الشيخ ياسين وقبل أيام قليلة علي مرور أربعة أعوام لذكري استشهاد عبد العزيز الرنتيسي كان من الواجب علينا عند إحياء ذكري استشهادهما أن نسأل أنفسنا لأي سبب كانا يكافحان ولأي غرض قدما أرواحهما للشهادة لينالاها بعد طول انتظار

هل أحيا إستشهاد الشيخ ياسين الأمة وأيقظ الهمة داخل الوطن العربي؟؟

بدلا من ذلك تحولت فلسطين الأرض المباركة التي أسري برسول الله صلي الله عليه وسلم إليها ودولة للمجاهدون حتي يوم القيامة إلي أخوة يتقاتلون فيما بينهم

هل الاقتال الفلسطيني الفلسطيني هو من سيحرر الأقصي والقدس وفلسطين؟ هل تستطيع حماس بمفردها أو فتح وحدها إلقاء اليهود في اليم؟؟؟

فلسطين لن تعود بدون توحد العرب معا وقبل ذلك توحد الفلسطنيون, وعندما يعاد تسمية شعب فلسطين بالفلسطنين وليس الحماسيون او الفتحيون

رحم الله الشيخ ياسين والمجاهد عبد العزيز الرنتيسي وأضاء عيون قادة حماس وفتح للحق والاتحاد

...غزة

(1)

الـخـبـر مـالـى الـصـحـافـــة...والإذاعـــة كــل ثـــانــيــــة

الـخـبــر عـن شـهـدا غـــزه...سبـعـة تـسـعة عـشرة ميـة

والـشهـيـد لـو م الـعـروبــة...يـبــقــى مــالـــه أى ديــــة

الخـبـر كان عـن حـصارهـم...عـن جـريمـة صهـيـونـيـة

والصمـم صـاب اللى خانـوا...والعـمـى فـى الحـكم غـيــة

الـعـمى مــانـع جـنــابـهــم...فـى مـمـالـك جـمـهـــوريــة

مـا يـشـوفــوش الـدم أبــداً...أو شـهـيـد لابـس كـوفـيــة

(2)

غــزه يـا واهـبــة حـيـاتـنـا...بـالـشـهـادة والــشــهــيـــد

لـمــا دم الــشـهــدا يــــروي...فــى الأراضـى بــالـصـديــد

تـطــرح الأرض الـفـــدائــى...لـلـمـقــاومــة مـن جــديـــد

انـتـى أروع حـاجــه فـيــنــا...والإرادة مــن حـــــديـــــــد

فـيـكـى عــزتـنـا وكـــرامـــة...فـى زمـن سـاد الـعــبــيـــد

سـادوا خـصـيـان الـعـروبـة...انـمـا فـــيـكــى الأســـــود

يـبـهـر الـعـالـم صـمــودهــم...انـتى يـا رمــز الـصــمــود

(3)

لــمــا صـــوت الأب حـــنــا...جـانـى ثـايـر على الـفجـور

الـلى عـمـلـوه الـصـهايــنـة...لــجــل تـبـقــى غــزه بــور

لـجــل تـسـتـسـلـم وتـــركــع...زى مـا اسـتـسلـم كـتـيــر

جـانــى ثــايــر عـالـطـفـولـة...والـمــشـافــى والــصــدور

والـتــواطــؤ الـلـى مــالــى...دنـيـا فــاقــده لــلـضــمـيـر

قـلـت فـيـنكـم يـا شـيـوخـنـا...تـفــتـــوا فـى كــل الأمــور

!دى قــضـيـه مـهــمــه جـــداً...زى ارضـــاع الـكــبــيــر

نـفـسـى أبـوس الأب حــنــا...الـلـى صحى لـنـا الـشـعـور

(4)

اعـــذريــنــى غــــزه انــــى...مـش مـعـاكـم فـى الـدمــار

مـش مـعـاكـم لـيـلة ضلـمـة...والاّ فــى عــــز الــنــهــــار

مـش مـعـاكـم فى المقـاومــة...والـشــهـادة والــحـصـــار

نـفـسـى جسمى يبقى طـلـقـة...تـنـفـجــر تــفـتــح جـــدار

تـقـتـل الأعـداء تـصـيـبـهـم...تــحـــرق الـخـونـــة بــنـار

وابـقـى فى عـرس الشهادة...يـفــتـخـر بـيّـه الــصــغــــار

نـفـسى لكـن غــصب عـنـى...بـاعــوا أصـحــاب الـقـــرار

(5)

قــولـوا لـصحـاب الـفخامـة...غزه صارخة فين ضميركم؟

مــا بـقـاش فـيـكـم كــرامـة؟...ذل سـاكـن فـى عــيـونـكـم

مـا بـقـاش فـيـكم شـهـامــة؟...لـجـل مـا تـكبـر كـروشكـم

الـهـرب لـجـل الــســلامـــة...ده جـريمة مـش تـفــيـدكـم

غــزه ولــيــوم الـقــيـامـــة...صامـدة مسـتـنيـة صـوتـكـم

والـلـى سـاكـت عالجـريمـة...غـزه عـاره وبرضه عاركـم

والــتــواطـــؤ لــو يــطــوّل...غـزه راح تـقلع عـروشـكــم

الـشـعـوب الـثـايـرة تـطـلـع...لـجل تـاخـد تــارهـا مـنـكـم
----------------------

شعر: اسماعيل بدر

...فولا فولا وزكرياتنا

فاكرين نادينا؟
البنت الصغيرة الأمورة البريئة اللي كانت بتغني فولا فولا بالومبيلا؟
يمكن نادينا والأغنية دي بتمثل جزء مهم أوي من زكريات طفولة كتيييير مننا

كلنا لما بنفتكر الأغنية دي بنفتكر البنت الصغيرة اللي واقفة علي المسرح بتغني
ودايما بنفتكرها كبنت صغيرة ومش بنفكر إن زي مالسنين عدت علينا أكيد عدت عليها هي كمان
وإن أكيد هي كمان معدتش البنت الصغيره اللي واقفة تغني بكل براءة
نادينا قررت إنها تعيد توزيع الأغنية وإنها تغنيها تاني بعد مرور السنين دي كلها
وده من وجهة نظري قرار مكنش صح أبدا , بالعكس كان خطأ فادح
نادينا خلت الأغنية إيقاعها سريع عشان ينفع يترقص عليها, أو بمعني أصح عشان هي تعرف ترقص عليها في الكليب
أنا لما شفت الأغنيه بالنيو لوك بتاعها زعلت أوي وافتكرت أغنية زمان
ومبقتش عارفه هي ليه عملت كده؟
ليه تشوه زكري حلوه من زكرياتنا بالشكل ده؟
يمكن هي شايفه انها صاحبة الأغنيه وان اللي عملته من حقها
لكن الحقيقة إن الأغنية دي ملك لأجيال سمعتها وحبتها من نادينا البنت الصغيرة
أنا مش هحط الكليب الجديد ولا حتي صورة نادينا بعد ماكبرت عشان عايزاكم تفضلوا فاكرينها كالبنت البريئة اللي واقفة علي المسرح
ولو حد فيكم شاف إعلان للكليب أو جاله لينك له, نصيحة أخوية بجد انه مايتفرجش عليه
عشان نقدر نحتفظ بزكريات طفولتنا زي ماهيا ومانسمحش لحد مهما كان إنه يشوة منها أي حاجة
أسيبكم بقي مع أغنية زمان بتوزيع زمان بتغنيها نادينة زمان

clip codes latest movies

...البوتس وأنا

إكتشفت إني بقالي فترة طويلة جدا ماسقتش الزرع اللي في بيتنا , لدرجة إني معنتش فاكرة إمتي أخر مرة سقيته من غير ماحد يطلب مني , ولا حتي فاكرة امتي أخر مرة سقيته عشان ماما طلبت مني ده

اكتشفت ده امبارح لما لقيتني بنزله من مكانه عشان عايزه أسقيه من غير ماحد يطلب مني

لما اكتشفت ده إفتكرت أيام كان إن الزرع يشرب ده شئ من إختصاصي وكنت عملاله مواعيد لازم أسقيه فيها , وإننا لما بنكون مسافرين كان أول حاجه أسأل عليها مين هيسقيه وهنعمل إيه معاه

افتكرت اني دايما كنت بتكلم معاه وأحيانا كمان بغنيله , كنت عارفة انه بيعرف صوتي ولمستي له

افتكرت اني اتبسطت اوي لما قرأت مرة إن الزرع يقدر يعرف اللي بيسقيه وبيحس بيه وانه يقدر يعرف لو الحد ده اتغير

لدرجة اني لما سافرت عشان الكليه كان لونه بيصفر رغم ان ماما كانت بتسقيه, وأنا طبعا كنت بفسر ده بانه حاسس ان مش أنا اللي بشربه

معرفش إيه اللي حصل بعد كده؟ ومعرفش ليه معنتش بسقي الزرع ولا ليه معنتش بتكلم معاه؟

معرفش ليه بنضيع مننا حاجات صغيرة بس كانت بتسعدنا أوي لما نعملها

أنا معرفش هو لسه فاكرني ولا لأ؟ لما سقيته امبارح عرف ان أنا دي اللي كانت بتسقيه من كام سنه ولا لأ؟

لو كان لسه فاكرني أكيد هبقي مبسوطه أوي , ولو نساني أكيد انا أستحق ده

أصل صعب أوي اننا نبعد عن حاجه أو حد الفتره دي كلها ونيجي في الأخر نطلب منهم إنهم يكونوا فاكرينا وماينسوناش

...أسطورة حبهما

كانت جميع الكائنات تعلم أنه في زمن من الأزمان وعندما يحين الوقت المناسب سوف يولد عاشقان , كانو يعلمون أن هذا الفتي سوف يحب حبيبته كما لم يحب غيره قط , وأنه سوف يضيف اسميهما الي قائمة قصص الحب الأسطوريه

كانو يعلمون أنهم سوف يعيدون للحب معناه الحقيقي , سوف يعيدون له معني فقده منذ زمن طويل

كانت جميع الكائنات تعلم ذلك الا نوع واحد وهو البشر

كان من الطبيعي ان تتوارث هذه الكائنات نفس القصه جيل بعد جيل , كان من الطبيعي أن تشاهد العصفوره تعلم صغارها الطيران وهي تحكي لهم كم سيكون هذا الفتي مفتونا بحبيبته , كانت السمكه الأم تسبح في الماء وحولها أسماكها الصغيره وهي تخبرهم أن هذه الفتاة ستحبه حب لن يعلم مثيله البشر

وظلوا يتوارثوا هذه القصه جيل بعد جيل حتي أن الجميع مابات يعلم هل هي حقيقه أم أنها أسطوره أخري من أساطير الخيال , ولكن الجميع كانوا يعلمون أنه عندما يحين الميعاد فإنهم سيعرفون ذلك دون شك

وفي ذات يوم استيقظت جميع الكائنات وهم يعلمون أن هذا اليوم هو ميلاد ثانيهما , فلقد كانو يعلمون انهم لن يستطيعوا الشعور بوجود احدهما دون الأخر , وأن شمس اجتماعهما معا في الحياة لأول مره لا يمكن ان يخطئها أي منهم , لأنها شمس تستطيع جميع الكائنات ان تتعرف عليها , جميع الكائنات الا نوع واحد وهو البشر

مرت الأيام والشهور والسنين وهذه الكائنات تتبادل أخبار العاشقين , كان من الطبيعي أن تشاهد طائر النورس يطير بالقرب من الماء وهناك سمكه تسبح بالقرب من السطح وهو يخبرها أنه شاهد فتاتهم اليوم وأنه رأي هذا الشاب الأحمق مره أخري وهو يتقرب منها وأنه لم يعرف ماذا يفعل , لتخبره هي أن طائر السنونو مر بها واخبرها عن رؤيته فتاهم يتحدث مع الفتاة التي ينزعج كلما شاهدهم معا وأنه لايعلم كيف يضيع وقته مع هذه الفتاه بدلا من أن يبحث عن فتاته التي يستحقها؟, ليخبرها النورس أنه لم يحن الوقت بعد

يمر الوقت لتخبر اليمامه القطه أن هذا الشاب الأحمق ابتعد عنها أخيرا ولو أنه علم قيمتها ماستطاع ان يستغني عنها ولكن ذلك أفضل لتجيب القطه أنها علمت من الحصان بالأمس أن فتاهم هو الأخر يعلم أنه لم يقابل فتاته بعد وانه يبحث عنها دائما لتقول اليامه أنها تتمني ان تشاهد اليوم الذي يجتمعان فيه معا وتضيف القطه أتمني أن يكون قريبا

عندما شاهدها علم ان هذه هي من يبحث عنها , عرف ذلك دون تردد , وعندما التقت عيناها بعينه علمت أخيرا معني الحب الذي كثيرا ماسمعت عنه وتأكدت أنها الأن والأن فقط أصبحت أسيره لهذا الشعور الخيالي , كان الممكن لأي كائن ان يتأكد انهما خلقا ليكونا معا, أي كائن الا البشر

كان الجميع يعلم ان هذا هو اليوم الموعود فلقد شاهدوهم وهو يمشي بجوارها امام البحر , تمني هو ان يتوقف بهم الزمن , تمني ان يظل بجوارها ليس فقط لأخر العمر ولكن للأبد

وبدأت الاحتفالات بهما, فامطرت السماء مطرا خفيفا, نزلت القطرات لتحضن وجهيهما ولتهمس في أذن كل منهم عن مدي حب الأخر له ولتطلب من كل منهما النظر الي الأخر ليعلم مقدار هذا الحب وان يري ماالذي تقوله عيني كل منهم للأخر ومدي السعاده التي تغمرهما

حبات الرمال التي وطئتها اقدامهما كانت تدعي من اجلهم ليجمعهم الله ولا يفرق بينهما أبدا

بدأ الموج ينادي باسميهما وجاءت طيور النورس خصيصا لمشاهدتهما معا , قالو انهم أصبحوا سويا وأنهم اخيرا شاهدوا حبا حقيقيا, قالو لهم لقد انتظرناكم منذ زمن طوييييييل , وتمنينا رؤية كيف يحب أحدكما الأخر, ثم ابتعدت الطيور في السماء لترسم قلب يحمل اسميهما

نظر هو في عينيها وقال "بحبك اويييي" لتبتسم هي وتبتعد بيعنيها خجلا منه ثم تنظر له في حنان وتقول

"انا كمان بحبك أوي"

...ما عجز عنه العرب

محمد أبو تريكه بعد احرازه لهدفه الأول بمرمي السودان في بطولة كأس الأمم الافريقيه

...غزة ومعبر رفح

فاكرين غزة؟

غزة ارض فلسطينية علي الحدود المصريه, لسه باقي فيها بقايا من الكرامه العربيه

أهلنا في غزة بيموتوا كل يوم في مجازر للصهاينة, لو هتلر كان موجود كان وقف يتعلم منها

مجازر ابليس بياخد منها دروس عشان يعلم القرون الجايه

أهلنا في غزة بيموتوا من المرض , بيموتو من الجوع , وبيموتو في الضلمة

خرجوا من غزة بمرضاهم علي الحدود المصريه, كان املهم ان اختهم الكبيره تفتح المعبر عشان تداوي جراحهم , وعشان تساهم في البقاء علي بقايا الكرامه اللي ماتت

لكن قلب حكومة مصر اللي بقي حجر علي ولادها من زمان , كان لازم يكون حجر أشد علي اخواتها

كان طبيعي ان المعبر مايتفتحش, كان طبيعي ان عربيات الاسعاف تقف وماتعديش, كان طبيعي ان مصر تشارك في المذبحه قصاد موافقة أمريكا علي التوريث

أصل مصر لو قالت للي بيحصل في غزة لأ, أمريكا هتقول علي جمال لأ

بعنا دم اخواتنا ووقفنا نتفرج

نسينا اننا هنقف قدام ربنا, نسينا سؤاله لينا عملتوا ايه ياعرب لبعض؟

قبل ماحد يقولي انتي عايزه ترمي مصر في نار الحرب واحنا ماصدقنا نسيناها

أحب اقولكم اني درست الجهاد قبل مايلغوا الباب ده من مناهج الأزهر

أيامها قالولنا ان العدو لو دخل دولة يبقي الجهاد فرض عين علي أهلها

وان الدوله اللي العدو علي حدودها الجهاد عليها فرض عين

طبعا بقي مفهوم ليه باب الجهاد اتلغي من مناهج الأزهر

هم العرب معدش فيهم رجاله غير حزب الله؟؟؟؟

هو كل مره محدش ينقذ غزة غير حزب الله؟؟؟

طب واحنا حتي الأدوية مش عايزين نعديها؟ الطاقه مش عايزين نعديها

أنا مش بقول نعدي سلاح, انا بقول نمرر حياة

احنا خير جنود الأرض والرسول عليه الصلاة والسلام أكيد مقالش عننا كده مجامله ولا كانت حاجه في وقتها وراحت , أحاديث الرسول و القران لكل زمان ومكان

بجد اللي بيحصل في غزة حاجة توجع القلب, واللي بيحصل علي الحدود المصريه حاجة تقرف الكلب

لو الحكومات ضمايرها ماتت , الشعوب هتفضل حية رغم عن الكل

قولوا اخترقوا المعبر بالقوة , قولوا شعوبنا ضغطوا علينا, طالما معندكوش الشجاعة انكم تفتحوه بنفسكم

اعملوا أي حاجه بس ماتسيبوش اخواتنا يموتوا علي الحدود

ماتحطوش ذنبهم في رقبتنا ودمهم في ايدينا , عشان عمر ايدينا ماهتنضف حتي لو غسلناها بكل مياة النيل

ربنا هيسألنا كلنا احنا عملنا ايه؟؟؟

واللي عنده جواب وعارف هيرد يقول ايه؟ مايهموش حاجه من كلامي, ومايقولش لأ , ومايطالبش مصر بانها ولو مره واحده بس تحاول ترفع راسنا ولو 2سم لفوق وتفتح المعبر

بس انا معنديش رد , وهقف يوم القيامة أبص في الأرض لما ربنا يسألني , هقوله أنا قلت لأ وأنا عارفه ان دي أقل حاجه ممكن اعملها

حكومتنا العربيه , مش هقولكم اتقوا الله فينا وفي شعب فلسطين لأنكم نسيتم ان في يوم هتتسألوا فيه عن كل قطة ماتت من الجوع في شوارعكم

انا بس هقول اعملوا اي حاجه انقذوا بها أسمائكم من مزبلة التاريخ

اعملوا حاجه او إرحلوا عنا في سلام

...مش كتير عليك

مـش كـتـيـر عـلـيـك لـو أعـيـش سـيـنـيـني حبـيـبي لـيك

ده انا حلم عمري لقيته فيك وهلاقي فين زيك حبيب

لــو هــعــيــش ســنـيـن ويـاك حـبـيــبــي دول يــومــيـــن

ده انا قلبي قبلك كان حزين وهعيش لمين لو يوم تغيب؟

صــعـب اقـــول عــلـي اي حــاجــه بـحـســهــا

مـش مـعـقـول اوصـف مـشـاعـري دي كـلـهـا

صـعـب اقــول عــلـي انــا فـيـه

قــلـبـي حــس بــيــك اول مــاجــت عــيـنـي فــي عـنـيـك

سـلـمـت قـلبي وروحي ليك ونسـيت حبيبي انا كنت مين

عــمــري عــشـتــه لــيــك قــبـل مــااشـوفـك كـنـت ايـه ؟

حـبـك نـدانـي جـريــت عـلـيـه ولـقـيـت معاك حلم السنين

صــعــب اقــول عــلـي اي حــاجــه بــحــسـهـا

مـش مـعـقـول اوصـف مـشـاعـري دي كـلـهـا

صـعـب اقـول عـلـي انـا فـيـه

--------------------------

أغنية : مش كتير عليك

غناء : اليسا

...اليها

اليها أكتب

احنا مابنتكسرش , احنا بنقع اه لكننا بنقوم تاني
احنا زي طائر العنقاء لما بيتحرق, بنقوم من تحت الرماد أقوي من الأول


كل شئ بيتولد صغير وبيكبر الا الحزن والألم والغضب , بيتولدوا كبار وكل يوم بيصغروا عن اليوم اللي قبله

وافقنا او ماوافقناش هو بيحبنا , رضينا أو مارضيناش هو بيختارلنا الأحسن وبيعمله , يمكن بنبص لناس كتير وبنلاقي انهم بياخدو اللي عايزينه لكنهم بيرجعوا يندموا علي ده بعد كده ويقولو ياريتنا ماكناش اخدناه, وياريت اللي اتمنناه مكنش اتحقق

يمكن ده بيحصل معاهم عشان هو مش بيحيهم زي مابيحبنا, ويمكن ده لحكمه محدش يعرفها غيره

احنا بيقصر معانا الطريق وبيدينا الضرر الأقل, واللي بعد كده بنكتشف انه مكش ضرر أصلا

أنا عارفه ان كلمة ليه دلوقتي شاغله الحيز الأكبر من تفكيرك, لكن صدقيني مسيرك هتعرفي ليه بعد مالخيوط تكمل, ساعتها هتعرفي ان ده لو مكنش حصل كنتي هتندمي اويييييي

أنا فاكره اني من سنة كنت فعلا عايزه حاجه لو كنت أخدتها كنت هعيش بقيت عمري ندمانه انها معايا

أنا دلوقتي فهمت ليه الأحداث اللي حصلت في أخر 4 سنين حصلت معايا

يمكن بنكون مستعجلين اننا نعرف لكننا مش بنقدر نعرف غير في الميعاد المناسب ولما الصوره كلها تكتمل

احنا مابنتكسرش , احنا بنقع اه لكننا بنقوم تاني
احنا زي طائر العنقاء لما بيتحرق, بنقوم من تحت الرماد أقوي من الأول

مهما عدينا بأوقات صعبه, دايما بتعدي وبتكون زكريات مش لازم اننا نفتكرها

احنا مابنندمش احنا بيتندم علينا, ده مش غرور, لكن رحم الله امرء عرف قدر نفسه

اللي بيحكموا علينا من غير مايتعاملوا معانا كوني متأكده ان ربنا مش كاتبلهم الخير اللي جوانا وده أكيد لأنهم في الأصل مايستهلهوش

احنا اخوات وده معناه ان جيناتنا واحده, حتي لو كانت سائده عند حد ومتنحيه عند التاني, فتنحيها مايمنعش وجودها

احنا مابنتكسرش , احنا بنقع اه لكننا بنقوم تاني
احنا زي طائر العنقاء لما بيتحرق, بنقوم من تحت الرماد أقوي من الأول

..صامتون .. دعوا الحريه تتحدث

اضغط هنا

...الكتاكيت

استدعى الاب ابنه لغرفته وما ان رأه امامه الا وبادر بتوجيه هذا السؤال

الاب : هتعرف يابنى تحافظ على الثروه اللى هتورثها من بعدى

الابن : طبعا يا ابا تربيتك

الاب : يعنى هتعرف تربى الكتاكيت زى ما انا ربيتهم

الابن : ( باندفاع وحماسه الشباب ) اكيد يا ابا

الاب : طيب هات الكرتونه اللى فيها الكتاكيت دى

سارع الابن باحضار الكرتونه ووقف امام ابيه

الاب : اقلب الكرتونه على الارض وورينى ازاى هتقدر تلم فيها الكتاكيت

وبسرعه قلب الابن الكرتونه وما ان رفعها حتى انطلقت الكتاكيت فى ارجاء الغرفه واندفع الابن خلفها يحاول جمعها مره اخرى لكن هيهات ، وبعد ان ادرك الفشل وقف امام ابيه وقد ارتسمت على وجهه البلاهه والغباء ولم يوقظه الا صفعه قويه من ابيه

الاب : شوف يا غبى اللى هاوريهولك ده خلاصه 25 سنه فى تربيه الكتاكيت

ثم اخذ الاب الكرتونه بعد ان جمع فيها الكتاكيت اخذ يهزها بقوه يمينا ويسارا وسط صراخ متواصل من الكتاكيت ما لبس ان تلاشى وانقطع نتيجه ما اصابها من اعياء

الاب : الان فقط نقلب الكرتونه

وما ان رفعها الا وشاهد الابن الكتاكيت لا تحرك ساكنا ممااصابها من اعياء ودوار ثم قام بتعبئتها فى الكرتونه بمنتهى السهوله واليسر

الاب : دلوقت يا ابنى اتعلمت اهم حاجه فى تربيه الكتاكيت وهى

( اتعبهم يريحوك لكن لو ريحتهم هيتعبوك )

لو عرفت مين هو الاب ومين هو الابن ومين هما الكتاكيت ؟ ادخل عشتك وخليها فى سرك

..عيد سعيد

...What Type of Weather Are you?

sunshine رغم حبي لفصل الشتاء الا اني طلعت
يمكن عشان بنكون محتاجينه في الشتاء أكتر

You Are Sunshine

Soothing and calm You are often held up by others as the ideal But too much of you, and they'll get burned You are best known for: your warmth Your dominant state: connecting

What Type of Weather Are You?

(: اللي يشوفه يحله

..بين كلمة المتهم والشهيد فرق كما بين الأرض والسماء

ضحكنا واتفائلنا كتير نيجي للجد بقي

أكيد في كتير سمعوا عن شخص اسمه السموره وان السموره ده تاجر حشيش وبانجو في بورسعيد في منطقتي الكويت والسلام

وان الحكومه بعد بلاغات من الموطنين لمدة سنتين ماتحركتش غير لما المواطنين بعتوا البلاغات دي لوزارة الداخليه في القاهره

و أخيرا البوليس اتحرك يوم الأحد اللي فات

اللي حصل ان اثناء محاصرة قوات الأمن وافراد من العمليات الخاصه للمكان عدي تاكسي من المنطقه

التاكسي كان راكبه شاب عنده 26 سنة واسمه محمد حسن الزناتي وخاطب , ومحمد مكنش معاه فكه واخد 2 جنيه من واحد صاحبه ثمن المشوار, وقف له عم حسن محمود وده راجل كبير وعنده ابن متزوج وبنتين واحده فيهم مكتوب كتابها وولد تاني

طبعا مكنش معروف ان المنطقه دي فيها كمين او ممنوع المرور منها

واللي حصل ان السائق عدي من نفس الشارع المحاصر عشان يوصل محمد لبيته

السائق فوجئ بقوات الأمن اللي محاصره المكان وبتطلب منه انه يقف

الراجل اتخض واتلخبط ومبقاش عارف يعمل ايه وحاول انه يمشي بسرعه

الاجراء اللي المفروض قوات الأمن تاخده انها تطلق الرصاص علي كوتشات العربيه عشان تمنعها من المشي

لكن اللي حصل انهم اطلقوا النار علي العربيه واللي جواها وقتل السائق ومحمد بطلقه في الرأس

طلقه في الرأس دي ياجماعه يعني اللي كان بيضرب كان بيضرب عشان يقتل مش عشان يوقف العربيه

وفعلا فارق محمد وعم حسن الحياة

وطبعا مش محتاجين اني اقول ان الحكومه ماقبضتش علي سموره غير بعد الحادثه دي بخمس ايام

يعني الناس اللي مالهمش ذنب اتقتلوا والمجرم الحقيقي قدر انه يهرب هو وأخوه وفضلت الحكومه تجري وراه وماقدرتش انها توصله غير لما بلغ عن مكانه احد الأشخاص اللي قدر انه يتعرف عليه

نرجع لموضوع محمد وعم حسن, الحكومه نزلت بيان بأسماء أفراد العصابه اللي اتقتلوا وطبعا مش محتاجين اني اقول ان اسم محمد وعم حسن من ضمنهم

الحكومه في بيانها قالت ان التاكسي لما اقتحم المكان وطلبوا منه انه يقف, اطلق الرصاص علي البوليس والبوليس بادلهم اطلاق النار

أصل القانون يمنع انك تطلق النار علي أعزل, وماينفعش ان ظابط او عسكري يضرب رصاص لو اللي قدامه مبدأش بده او علي الأقل أشهر السلاح في وضع لاطلاق النار

طبعا بردو محدش محتاج اني اقول ان كلام الشهود العيان بينفوا ده تماما وقالو ان التاكسي مااطلقش اي اعيره ناريه, وبن عمة محمد قال انه يتحدي اي حد لو قاله ان ابن خاله كان بيشيل في جيبه قصافه مش مسدس, وعم حسن لو كان تابع تجار المخدارات مكنش هيتحكم عليه ب6 شهور في قضية شيك بدون رصيد من أقساط التاكسي اللي كان مصدر رزقه , واللي طبعا دلوقتي ماينفعش خالص من الرصاص اللي اضرب عليه

مفيش حد مابيغلطش اه, واحنا مش ملايكه ومش معصومين من الخطأ محدش قال حاجه, لكن انك تضرب رصاص علي شخصين لا يحملون السلاح وضرب الرصاص يكون بغرض القتل فده مش خطأ, دي خطيئه

انك لما تغلط في كارثه زي دي, بدل ماتعتذر تزور الحقايق وتزيفها, يبقي ده مش خطأ دي خطيئه ثانية

لما الحكومه تمارس الضغط علي عائلات الضحايا عشان يتدفنوا بالليل, يبقي ده مش خطأ دي خطيئه ثالثة

أهالي الناس دي مش عايزين غير تبرئة أسمائهم , وان بدل اسم المتهم يتكتب قبل أسمائهم الشهيد أو المقتول خطأ

في أم قلبها مليان حسره علي ابنها اللي اتقتل فبلاش نحرق قلبها بزياده ونقول علي ابنها اللي اتقتل ظلم انه تاجر مخدرات

في بنت مكتوب كتابها مش عارفه مين اللي هيجوزها بعد مقتل أبوها, فبلاش نكون السبب في ان خطيبها يسيبها لأن أبوها كان ضمن العصابه

حرام نقتلهم ظلم ونظلمهم بعد مايموتوا , مش هيبقوا اتظلموا وهم بيموتوا وبعد مايموتوا كمان

الأجل مكتوب وكل واحد مكتوب له هيموت امتي وفين ودي حاجه بتاعة ربنا

لكن ده عمره مايمنع ان الغلطان لازم يتحاسب ويدفع ثمن غلطته, واننا لازم نعترف بالحقيقه ونبرأ اسم الناس دي

حسبنا الله ونعم الوكيل

-------------------

تحديث: بعد مانكدت عليكم أقول حاجه ترفع من روحكم المعنويه بقي

الأستاذ محمد الدريني خرج من المعتقل, ألف مبروك ياحمد وحمدالله علي سلامته ويارب يكون بخير