...البوتس وأنا

إكتشفت إني بقالي فترة طويلة جدا ماسقتش الزرع اللي في بيتنا , لدرجة إني معنتش فاكرة إمتي أخر مرة سقيته من غير ماحد يطلب مني , ولا حتي فاكرة امتي أخر مرة سقيته عشان ماما طلبت مني ده

اكتشفت ده امبارح لما لقيتني بنزله من مكانه عشان عايزه أسقيه من غير ماحد يطلب مني

لما اكتشفت ده إفتكرت أيام كان إن الزرع يشرب ده شئ من إختصاصي وكنت عملاله مواعيد لازم أسقيه فيها , وإننا لما بنكون مسافرين كان أول حاجه أسأل عليها مين هيسقيه وهنعمل إيه معاه

افتكرت اني دايما كنت بتكلم معاه وأحيانا كمان بغنيله , كنت عارفة انه بيعرف صوتي ولمستي له

افتكرت اني اتبسطت اوي لما قرأت مرة إن الزرع يقدر يعرف اللي بيسقيه وبيحس بيه وانه يقدر يعرف لو الحد ده اتغير

لدرجة اني لما سافرت عشان الكليه كان لونه بيصفر رغم ان ماما كانت بتسقيه, وأنا طبعا كنت بفسر ده بانه حاسس ان مش أنا اللي بشربه

معرفش إيه اللي حصل بعد كده؟ ومعرفش ليه معنتش بسقي الزرع ولا ليه معنتش بتكلم معاه؟

معرفش ليه بنضيع مننا حاجات صغيرة بس كانت بتسعدنا أوي لما نعملها

أنا معرفش هو لسه فاكرني ولا لأ؟ لما سقيته امبارح عرف ان أنا دي اللي كانت بتسقيه من كام سنه ولا لأ؟

لو كان لسه فاكرني أكيد هبقي مبسوطه أوي , ولو نساني أكيد انا أستحق ده

أصل صعب أوي اننا نبعد عن حاجه أو حد الفتره دي كلها ونيجي في الأخر نطلب منهم إنهم يكونوا فاكرينا وماينسوناش