...........

ليقضي الله أمرا كان مفعولا

...لو كان

لو كان قلبك عليا حس بيا

حبيبي ساكت ليه

زعلان لومني وعاتبني

ليه سايبني قول هاتكسب ايه

معقول من غلطه تنسي

حبنا ولياليه

دي سنين حلوه في حياتي وذكرياتي كلها وياك

لو كان بعدك نصيبي يا حبيبي مستحيل انساك

في عنيك احلام خادتني

علمتني معني اني اعيش

وازاي دلوقتي تنسي

طيب اقسي بس متبعنيش

وخلاص انا خدت بالي بس متسبنيش

دي سنين حلوه في حياتي وذكرياتي كلها وياك
لو كان بعدك نصيبي يا حبيبي مستحيل انساك

------------------

غناء: نوال الزغبي

...ذكريات كوب الشاي

أمسكت بكوب الشاي وجلست في مكانها المعتاد, لم تشعر بسخونة الكوب وظلت تتأمل الأبخرة الصاعدة منه
أسندت رأسها للخلف وأغمضت عيناها وسبحت في بحر الذكريات
تذكرت عندما كان يجلس معها دائما في هذا الوقت وكيف لم تنجح أكبر مشاغله أن تمنعه من التواجد معها
تذكرت كيف كان يصر كل يوم أن يشرب من كوبها وانها عندما كانت تخبره أن كوبه يحتوي علي نفس الشاي كان يأتي رده بأن شفتاها تعطيان للشاي مذاق أخر وتكسبانه نكهة أفضل من نكهة النعناع أو القرنفل بكثير
تذكرت كم كانا يحرصان علي إدخار الأخبار والأحداث وحتي المفاجأت لهذه الجلسة المسائيه
تذكرت أنها عندما علمت بحملها لأول مره استطاعت أن تمنع نفسها من إخباره في الهاتف وامتنعت باعجوبة أن تخبره وقت الغداء لتحتفظ بهذه الماجأه لجلستهم المسائيه
تذكرت كم كان سعيدا عندما علم وكيف لم يلومها لأنها لم تخبره طوال اليوم فهو أيضا يعلم أن الأخبار في الجلسة المسائيه لها طعم أخر ومذاق مختلف
تذكرت كيف إكتسب منهما طفلهما هذه العادة وأنه عندما قرر أن يخطو أولي خطواته لم يفعل ذلك الا أثناء جلستهم المسائيه
تذكرت أصواتهم وضحكاتهم التي كانت تملأ المكان وكم تفتقدها
أخرجها من ذكرياتها عندما أمسك يدها ففتحت عيناها ونظرت له في حنان ليسألها بكل براءه "ماما هو ممكن لما بابا يوحشنا يبقي يجي من عند ربنا يشوفنا شوية ويرجع تاني"؟
إحتضنتة وقبلت رأسه عندما لم تجد جوابا لسؤاله

...يامصري

غناء: علي الحجار
كلمات: سيد حجاب

ألحان وتوزيع: ياسر عبد الرحمن

...أخدوا باليمين قبل مايدوا بالشمال

وبعدين يعني, هم عايزين إيه دلوقتي؟

قالوا في علاوة 30% عشان يبوظوا الإضراب قلنا وماله ماحنا كان مطلب من نطالبنا إن الناس تعرف تعيش حياة كريمة هي صحيح ال30% دي مالهاش دعوة بكريمة ولا حتي نعمة بس قلنا أهو أحسن من مفيش يعني

قعدنا لوحدنا في البيت يوم 4 مايو وحتي الناس في العمارة اللي قدامنا اللي كانوا معلقين علم مصر يوم 6أبريل تخلوا عني وكنت الوحيدة في المنطقة اللي علم مصر في بلكونتنا وقلت مفيش مشكلة الناس بتهدي اللعب مع الحكومة ومش عايزين يزعلوهم عشان محدش يقول علينا شعب مفيش حاجه بتطمر فيه

قرار العلاوة كان امتي؟ 1 مايو والإضرلاب الله يرحمة كان 4 مايو, يقوم إيه اللي يحصل 5 مايو بعد مايوم الإضراب يعدي بالسلامة ؟ يدوروا علي موارد لفلوس العلاوات, ليه هي مصر معندهاش موارد؟

قناة السويس قفلت ومحدش قالي, خلاص مافيش موارد غير جيوب الشعب وثمن البنزين والجاز؟

لما إحنا البنزين والجاز غالين عندنا أوي كده أمال بنصدر الغاز للي يسوا واللي مايسواش ليه؟؟؟

نكفي شعبنا الأول وننزل الأسعار وبعدين نبقي نصدر زي ماحنا عايزين وساعتها نبقي نقرر هنصدره لمين؟

محدش يحرق دمي زيادة ويقولي إن الحكومة قالت إنها مش هتاخد حاجة من محدود الدخل وإنها هتدفع الأغنياء, عشان مش كل اللي راكبين عربيات عندهم هامر, ولو عايزين يدفعوا الأغنياء بس يزودوا بنزين 95 بس لأن الحرامية مش بيحطوا غيره ومالهمش دعوة بقي ب92 و90 والجاز وبعدين هم محدودين الدخل دول الأكل اللي هيشتروه هيجيلهم طاير من الغيط ولا علي عربيات بتحط بنزين بردو؟

ومحدودي الدخل دول هيركبوا موصلات عامة بتشتغل بالبنزين ولا هيحطوا فيها مية؟

طب الحكومة عايزة ايه دلوقتي؟ عايزانا نعمل ايه واحنا نعمله؟ هم بيعاقبوا الناس عشان طلعوا مؤدبين وماشتركوش في الإضراب ولا إيه يعني؟

طب ده حتي اللي هيزهق ويقرر يسيبلهم الدنيا بحالها ويولع في نفسه مش هيعرف عشان الجاز غلي

بجد كده مش نافع ومش هينع وعلي رأي الراجل اللي جه في التليفزيون علي البي بي سي كان في الشارع وكانو بيسألوه عن رأيه في الأسعار

قال إن الحكومة بتموت الشعب بالبطئ مايموتونا كلنا مرة واحدة ويخلصونا بقي

...موعدنا 4 مايو

من أجل المعتقلين

من أجل المحروقين والغرقانين والجعانين

من أجل مصر

خليك في البيت ولو نزلت إلبس أسود ولو قابلت عسكري أمن مركزي إديه ورده

...عيد ميلادي

كالمعتاد لازم يكون عيد ميلادي حدث قومي في مصر كلها

السنة اللي فاتت كان كتب كتاب جيمي, والسنة دي كان عيد الربيع

----------------------------------

جميل أوي انك تعرف في عيد ميلادك أد إيه وجودك في الحياة فرق كتير مع حد مهم جدا في حياتك

-------------------------------

رغم سفر أحمد وماما وتسنيم إلا إن ده مامنعهمش إنهم يقولولي كل سنة وإنتي طيبة الساعة 12

---------------------------

شكرا لكل حد قالي كل سنة وإنتي طيبة سواء بمكالمة تليفون أو رسالة أو علي الفيس بووك

----------------------

علي فكرة امبارح كان عيد ميلاد محمود شاب فقري كمان

...أخيرااااااااا

الحمدلله إسراء خرجت إمبارح باليل

ألف مبرووووووووووك ياإسراء وحمدالله علي السلامه

محمد الشرقاوي كمان كان خرج قبلها بكام يوم

حمدالله علي سلامتك يامحمد

ويارب عقبال كريم البحيري هو وكل المعتقلين إن شاء الله

...خطوبة إنسانة

يوم الجمعة كانت خطوبة ياسمين

ألف مبروووووووووووووووووك يامينو

ويارب ربنا يكملك علي خير

كله يروح يباركلها بسررعة

...إعتقال إسراء ونادية

رغم إن قرار النيابه كان إخلاء سبيل إسراء عبد الفتاح

إلا انها واجهت مط وتطويل جدا في إنهاء إجراءات الخروج

وأصدرت وزارة الداخلية أمس أمر باعتقالها هي ونادية مبروك

وتم إعادتهما إلي سجن القناطر

أعتقد إن كده بقي كتير أوي

الصورة وقرار الاعتقال من جروب إفرجو عن إسراء ورفاقها

...إفرجوا عن إسراء ورفاقها

تحديث 16/4 : رغم صدور قرار باخلاء سبيل إسراء من 3 أيام لكن هي لسه في مباحث أمن دولة القليوبيه ومعاها جميلة اسماعيل لإنهاء إجراءات الخروج

المصدر جروب إفرجو عن إسراء ورفاقها

----------------------------------

تحديث : قالوا في برنامج الطبعة الأولي ان إسراء هتخرج بكرة إن شاء الله

يارب تكون حقيقة

--------------------------------

أتحدى لياليك ياهروب وأتوضى بصهدك ياجنوب وأصلى الفرض الحطينى وأكتبلك عمرى المكتوب

إسراء عبد الفتاح هي الفتاة الأشهر حاليا علي الفيس بووك , إسراء للي مايعرفهاش هي البنت اللي أسست جروب اضراب 6 أبريل علي الفيس بووك

احضانك فوق الحنية ياجميلة ومريم وبهية يتفجر فى الموت بركانك وايمانك يتفجر فيا

إسراء زي ناس كتييييير مننا جالها خبر الاضراب علي رسالة موبيل وفي ايميل, يعني مش هي صاحبة فكرة الاضراب لأن الاضراب أصلا فكرة عمال المحلة وبعد كده تضامن معاهم القوي السياسيه المعارضة وبعدين انضم لهم الشعب

أنا عن نفسي لما جالي الايميل قررت اني أعمل جروب للاضراب علي الفيس بووك, لكن معرفش ايه اللي عطلني يومها عشان أعرف تاني يوم إن إسراء خلاص عملت الجروب وقلت انها في بيتها إحنا الاتنين اسراء بقي والمهم ان الجروب اتعمل واشتركت فيه

الدم على الارض خريطة مشتاقة ليوم الحرية اشلائك بتلم جراحى يرتعش الغدر وترتاحى ويعود الحلم المسلوب

إسراء حاليا مسجونه علي ذمة التحقيق عشان عملت الجروب ده

ماينفعش ان عشان انا او غيري اتأخرنا في تنفيذ فكرة وان عشان هي اللي نفذتها الأول تبقي تتسجن, ماينفعش إنهم يقولو انها حرضت علي الاضراب لأن كل اللي هي عملته انها نقلت فكرة وماضربتش حد علي ايده عشان يضرب , ماينفعش انهم يقولو انها حرضت علي الشغب لأن كل اللي هي قالته اقعدوا في البيت اليوم ده, ولأن المعروف ان السبب في أحداث المحله هي تعامل الأمن المستفز والوحشي معاهم

ماينفعش ان اسراء هي اللي تتعاقب علي كل الناس اللي قعدت في البيت يوم الأحد 6 أبريل لأن كل واحد حر يقعد في بيته زي ماهو عايز, ودي حريه شخصيه ودي تهمه من التهم الموجه الي إسراء انها أضرت بيها

ده غير انهم بيعاقبوها علي حاجه الحكومه مش معترفه بيها وقالت انها محصلتش وان الاضراب منجحش طب لسه قبضين عليها ليه؟

ياضى عيون الشهداء يازهرة صيدة وسيناء الثانية من عمرك تحينى ابنى واتبسم واشاء الكلمة من سيرتك تهدينى للاقصى يعود الاسراء

إنشاء إسراء للجروب علي الفيس بووك كان قبل بين الحكومة اللي بتهدد فيه بمعاقبة المحرضين علي الاضراب بكتييييير

سواء كنت مع الاضراب أو ضده , موافق عليه أو معارض له, ده مايمنعش إنك تقول لأ لسجن بنت لسبب مش مفهوم ومفيش حد شايف انه معقول

مهما كان رأيك في الاضراب فواجب إنساني عليك إنك تطالب بالافراج عن إسراء ورفاقها

----------------

الصوره من جروب افرجوا عن اسراء ورفاقها علي الفيس بووك

أغنية أتحدي لياليك لمحمد منير من حلقة رسالة حب لإسراء لعلاء القمحاوي علي تيت راديو

...من أجل شهداء المحلة 2

تجدد الاشتباكات بين الشرطة ومواطني المحلة

عدد القتلي بيتراوح بين 2 : 7 أشخاص و في معلومات انهم أكتر من كده

ده فيديو لخطف مواطنين من الشارع لقسم المحله والاعتداء عليهم من عند منفي

في لفظ شتيمه في أخر الفيديو أنا بعتذر عنها لكن هو مهم انه يتشاف



والصور دي من المحلة مش من فلسطين

الصور من موقع أبناء مصر

...من أجل شهداء المحلة

إضراب إمبارح اللي كان ناجح من وجهة نظر الجميع الا الحكومة طبعا اللي أعلنت فشل الإضراب رغم خلو الشوارع من المواطنين

وسط البلد فى الصباح الشوارع فاضية

الصورة من عند محمود الدوح

والمظاهرات مالحقتش تتعمل لأن البوليس كان بيمسك أي حد هناك لكن أغلب اللي إتمسكوا خرجوا تاني

نيجي بقي للمحلة الكبري

عمال المحله اللي اجبروا انهم يرحوا المصانع امبارح الصبح وهم خارجين من الشغل بدأوا المظاهره فمكنش من الأمن المركزي اللي كان محتل البلد من السبت بالليل غير انه بدأ اطلاق النار

أه والله ضربهم بالرصاص

الصور من مدونة خالو أحمد الصباغ

طبعا الاهالي ردوا علي الرصاص بالحجاره

زي فلسطين كده بالظبط

BBCولأن كان في تعتيم اعلامي غير مفهوم علي اللي بيحصل في المحله الا من شبكة فكان لازم اننا ننقل ونقول ايه اللي حصل للناس اللي هناك دول

والللي حصل نقلا عن مدونة منفي لأنهم اتحولو علي المنصوره وهو كان هناك في المستشفي

الساعه 11 بليل تقريبا اتحول علي مستشفي الطوارئ في المنصوره عدد من المصابين اصابات سيئه بس كلهم طلعوا مع المخبرين والضباط ما عدا شخص واحد بيتم عمل له جراحه عاجله في القلب وده مكنش معتصم كان راجع من شغله عادي المهم في عدد كبير حوالي 11 في الطريق واتحولوا العام مش هيدخلوا الطوارئ في عدد تاني المؤكد لحد الوقتي ان 4 فقدوا عين من اعينهم اثر رصاص وشضايا الانفجار علي حسب قول الشهود الفئه العمريه للمصابين تتراوح من 14 سنه حتي 30 سنه

اعتذر عن ردائه التصوير ولكن التصوير بالموبايل وكان في ظابط مخابرات جنبنا علي طول وبتوع امن الدوله وامن مركزي كانت مردغانه بس اللي قدرت اوصل ليهم حالتين اصابات رصاص مطاطي محمد فؤاد محمد اصابه في العين و3 رصاصات في الدراع الشمال وخرجوه فورا بدون نزع الرصاصه الثالثه علشان جنب الوريد السيد محمد الحبشي رصاصه في قاع العين مش هتتشال هتفضل مكانها وعينيه طارت وخرجوه مع واحد

الاهم ان الرصاص بمجرد خروجه من اجسامهم كان بيتصادر ومش بيطلع بيه محضر او بيطلع اي حاجه تثبت ان الشخص مصاب برصاص

دي صوره الراجل بتاع المخابرات وامن الدوله مع اتنين ظباط عاديين ومدير المستشفي في استقبال الطوارئ منعا لدخول اي حد او خروجه بمعلومات

اهم حاجه ان محدش كان بيقعد كلوا بيخرج من الاستقبال ما عدا حاله واحده بس وللصدف الحاله دي تبقي قريبه صديق لي قابلته في المستشفي هو مصور حاجات وهيشنرها معانا اول ما الموضوع بتاع عمليه قريبه يخلص فانتظرونا

لمعلومات أخري

موقع بى بى سى

مدونة 6 أبريل

تغطية نوارة نجم

...يوم 6 أبريل

طبعا كلنا سمعنا عن إضراب 6 أبريل

وانه هيكون إضراب لأهم القوي والأحزاب السياسة في مصر

لكن اللي عجبني بجد إن أخبار الاضراب انتشرت جداااااا

وأتمني بجد ان الانتشار ده مايكونش علي النت وبس وإنه مؤيدينه مايكونوش إحنا وبس

دي بلدنا ومن حقنا اننا نعيش فيها زي ماحنا عايزين, من حقنا نتمتع بخيرها , من حقنا إن أولادنا يلاقو شغل, وإن اللي بيشتغل يلاقي مرتب يقدر يعيش منه

إحنا مش بنطلب حاجة كبيرة ولا حاجة مستحيلة ولا حاجة مش من حقنا

إحنا بنطلب أبسط حقوقنا وهي إنهم يكفلولنا حياة كريمة

هتفضل بلدنا وهنفضل ولادها

ولو احنا مادورناش علي حقنا فيها , مفيش حد هيجي لحد عندنا عشان يديهولنا

اضراب 6 أبريل أول خطوة علي الطريق الصح

شارك في اضراب 6 أبريل ومين عارف ايه اللي ممكن يحصل بعد كده؟

...رحمهما الله

منذ أربع سنوات فجرا قصفت طائرات العدو الصهيوني مقعد متحرك لرجل قعيد خرج لصلاة الفجر

الشيخ القعيد ذو الشعر والجلباب الأبيض استشهد بعد أن أصابة صروخ العدو ليحول جسده الهزيل الي أشلاء وكرسيه المتحرك إلي قطعة من الحديد

شيخ قعيد نال الشهادة وأيقظ الأمة فمتي يستيقظ صحيح البدن قعيد الهمة

كان هذا هو الشعار الأشهر الذي انتشر بعد استشهاد الشيخ ياسين حيث أنه كتب في كل مكان رسائل الموبيلات, لافتات الشوارع والايميلات

اليوم وبعد مرور أربعة اعوام علي استشهاد الشيخ ياسين وقبل أيام قليلة علي مرور أربعة أعوام لذكري استشهاد عبد العزيز الرنتيسي كان من الواجب علينا عند إحياء ذكري استشهادهما أن نسأل أنفسنا لأي سبب كانا يكافحان ولأي غرض قدما أرواحهما للشهادة لينالاها بعد طول انتظار

هل أحيا إستشهاد الشيخ ياسين الأمة وأيقظ الهمة داخل الوطن العربي؟؟

بدلا من ذلك تحولت فلسطين الأرض المباركة التي أسري برسول الله صلي الله عليه وسلم إليها ودولة للمجاهدون حتي يوم القيامة إلي أخوة يتقاتلون فيما بينهم

هل الاقتال الفلسطيني الفلسطيني هو من سيحرر الأقصي والقدس وفلسطين؟ هل تستطيع حماس بمفردها أو فتح وحدها إلقاء اليهود في اليم؟؟؟

فلسطين لن تعود بدون توحد العرب معا وقبل ذلك توحد الفلسطنيون, وعندما يعاد تسمية شعب فلسطين بالفلسطنين وليس الحماسيون او الفتحيون

رحم الله الشيخ ياسين والمجاهد عبد العزيز الرنتيسي وأضاء عيون قادة حماس وفتح للحق والاتحاد