..عيد ميلاد وامتحانات

النهارده 31/8 عيد ميلاد أحمد فؤاد مع نفسى

كل سنة وانت طيب ياأحمد ويارب عقبال

سنة 1000000000

وبكره 1/9 أول يوم في امتحانات أحمد , لأنه في طب ونظامهم غير نظام البشر كلهم

ادعوله كتييييييييييييير, عشان ربنا يوفقه ويخلص السنه دي والجايه ويتخصص بقي

ربنا معاك ياأحمد , ويوفقك يارب, وتبقي أحسن دكتور في الدنيا

----------------------

البانر من تصميم أحمد مبرمج حر

...أنا العبد

أنـا الـعـبد الـذي كـسـب الذنوبا

و صـــدتـه الأمـاني أن يـتـوبـا

أنـا الـعـبد الذي أضـحـي حزينا

عـــلـي زلا تــه قــلـقـا كـئـيـبـا

أنــا الـعـبد الـذي سـترت عـليـه

صحائف لم يخاف فيها الرقيـبـا

أنـا العبـد المسيئ عـصـيت سرا

فــمالـي الأن لا أبـدي الـنـحـيـبـا

أنــا العـبـد المفـرط ضاع عمري

فـلـم أرعي الشـبـيبة والمـشـيبه

أنـا العـبـد الغريـق بـلـوج بحـــر

أصــيـح لـربــما ألـقـي مـجـيـبــا

أنــا العـبـد السـقـيـم مـن الخطـايا

وقــد أقـبـلـت ألـتـمـس الـطـبـيـبـا

أنـا العـبـد الشـريـد ظـلمـت نفسـي

وقــــد وافـــيــت بــابــكـم مــنـيـبـا

: انـــشــاد

مـــشــاري راشــــد

..عيد ميلاد مبرمج حر

النهارده عيد ميلاد أخويا العزيز أحمد مبرمج حر

كل سنة وانت طيب ياحمد

ويارب عقبال 100000 سنه

..أمشي بعيد

أحيانا بحس ان أنا عايزه أمشي
عايزه أسيب كل شئ وكل الناس اللي أعرفهم ورايا
معرفش ببقي عايزه أرجع تاني ولالأ
لكن المهم اني أمشي, أمشي بعيد اوووي
أحيانا تانيه بكون راضيه بوجودي هنا حتي لو مكنتش سعيده بيه, وبقول ماينفعش اني أمشي, عشان حرام عليا, وهيزعلوا عليا
لكن برجع أقول ان مفيش زعل بيدوم وان مسيرهم هينسوا ومش هيفتكروا حتي ان أنا كنت موجوده هنا في يوم من الأيام
عايزه أروح بعيد أووي, يمكن هناك أقدر ألاقي مكاني, ويمكن ألاقيهم هناك, بس هناك يكونوا أحسن بكتير من هنا
أحيانا تانيه بكون مش عايزه أمشي, بحس ان كده كفايه واني لازم أروّح , لكني بفضل هنا ومش بروّح, رغم اني بتخير بين بقائي ومرواحي خالص, الا اني بختار بقائي عشان بخاف لمرواحي يجرحهم حتي لو كان وجودي بيجرحني انا





أنا عارفه ان كلامي ده هيضايقك, وانك هتزعل لما تعرف اني عايزه أسيب كل الناس اللي أعرفهم ورايا وأمشي, لكن انت مش من الناس, انت من نفسي, وحتي لو مكنتش معايا فأكيد هتكون هناك معايا

..امتحان القضايا المعاصره

بما ان النتيجه ظهرت ونجحت الحمدالله

يبقي أحكيلكوا بقي علي امتحان القضايا المعاصره

الماده دي من 3 كتب, ودي حاجه نادره عندنا في الكليه, لأن أيام زمان كانت الماده بتكون طويلة جدا لو منهجها 30 صفحه مش 3 كتب

بس هي بتتكلم عن الوراثة وزراعة الأنسجه وعشان كده انا كنت بحبها

وانا من عادتي اني مش بروح الامتحان غير الساعه 11 و عشره, ومعرفش أدخل الامتحان قبل كده

يومها بابا اداني العربيه وانا رايحه الامتحان, وطبعا قالي انزلي بدري عشان تسوقي علي مهلك

وكان قاعدلي وعشان كده اضطريت أنزل 10 ونص فعلا

ووصلت عند الكليه 11 الا ثلث, وبعدين يعني هدخل بدري واسقط في الامتحان انا ولا ايه يعني؟

فطبعا فضلت قعده اراجع ولما جت الساعه 11 وعشره نزلت وسيبت الكتب ودخلت الكليه

وكان في بنت جايه دخلت معايا ومكنتش أعرف انها معايا في نفس اللجنه

احنا بنمتحن في أول دور في الطرقه

وطلعت ففي واحد قالي الدكتور مش هيدخلكم الامتحان

بصلته بصت انت عبيط ولا ايه, وهو للأسف ماشفهاش عشان انا كنت لابسه النضاره, ودخلت والبنت ورايا طبعا

لقيت واحد بيقول: انت يابنت انت وهي تعالوا هنا

أكيد بيكلمنا احنا لأن بقيت البنات قاعدين بيقروا ورقة الأسئله

ادورت روحتله وهي ورايا طبعا

هو:انتوا مش هتحضروا الامتحان, اتفضلوا روحوا يالا, الأمن , انا عايز الأمن , هاتولي الأمن

بصتله نظرت انت عبيط ولا ايه, بس للأسف ماشفهاش لأني كنت لابسه النضاره

البنت: الحقي مش هيدخلنا الامتحان وهيجبلنا الأمن

بصيتلها نظرت انت عبيطه انت كمان ولا ايه, وللأسف بردو ماشفتهاش

أنا: مفيش حد يقدر يمنعنا من دخول الامتحان, سيبيه يجيب الأمن

هي: انت متأكده

أنا : أها

هي: ماشي ووقفت جنبي

جت المراقبه اللي بتراقب في أول لجنه

المراقبه: معلش يادكتور

هو : أبدا

المراقبه: حقك عليهم يادكتور هم أسفين ومش هيتأخروا تاني مش انتو أسفين يابنات

وبصتلي منتظره الرد, والبنت كمان بصتلي عشان تعرف نقول ايه؟ يعني مصممين اني أتكلم

أنا: حضرتك احنا مش هنطلب وقت زياده بدل الوقت اللي اتأخرناه

هو: يعني ايه مش فاهم

أنا: يعني لو احنا مالحقناش نخلص حل عشان احنا جينا متأخر مش هنطلب من حضرتك وقت زياده

هو: اه يعني مجيكم متأخر واقف عليكم انتم بخساره مش عليا أنا

أنا: أكيد لو ملحقناش نخلص حل يبقي احنا اللي خسرانين

هو: تصدقي انك قليلة الذوق

أن أن أن تييييييييش

غلط فيا, ومعرفش ازاي ماردتش عليه, كل اللي عملته اني قلتله ميرسي شكرا, ونزلت النضاره وبصتله من فوق لتحت ودخلت اللجنه, والبنت طبعا ورايا

ودخلت قعدت مكاني وساعتها عرفت ان البنت معايا في اللجنه, ومضيت حضور, وجت المراقبه بتاعة أول لجنه

المراقبه: انت رديتي علي الدكتور ليه بس, ده مكنش هيدخلك اللجنه لولا ان انا اتوسطلكم عنده

الناس دي عبيطه ولا بتستعبط

أنا: انا مفيش حد يقدر انه مايدخلنيش اللجنه ولا انه يمنعني من حضور الامتحان

هي: يعني هو مكانش يقدر يمنعك منه

أنا : لأ أنا عارفه حقوقي كويس, وهو مكنش يقدر يمكنعني من دخول الامتحان

هي: طب اسكتي بدل مادبسلك الورقه

أنا: ليه حضرتك ظبطيني بغش

هي: هي الورقه ماتدبسش غير لما تكوني مظبوطه بتغشي

أنا: اها

هي: طب هاتي كرنيهك وانا هخلي الدكتور يجي يدبسها

فتحت الشنطه, خرجت الكارنيه واديتهولها, وهي أخدته ومشيت , وفي عنيها نظرة اسبهلال

مسكت ورقة الاجابه عشان أسطرها وهو جه وقف قدامي وبيسأل فين البنت؟

هي: اهي يادكتور قدام حضرتك

ومد ايده اخد الورقه

هو: اتفضلي انت مش هتمتحني النهارده

أنا: لو سمحت رجع ورقة الاجابه بتاعتي عشان همتحن

هو: مفيش امتحان, واتفضلي

أنا كنت قاعده عادي, فقعدت بالجنب , وحطيت رجل علي رجل( دي عاده فيا مش بعرف أبطلها) وقلتله عايزه ورقتي لو سمحت

هو مشي وجت المراقبه بتاعتي

المراقبه: الدكتور ده طيب قومي اعتذريله وهو هديكي الورقه

بصتلها نظرة انت عبيطه ولا ايه, والحمدلله شافتها لأني كنت قلعت النضاره

أنا: حضرتك المسؤله عن اللي بيحصل في اللجنه هنا, فياريت تجيبي ورقتي منه

هي سكتت ومشت

ولقيت رجل شعره ابيض واقف قدامي عرفت فيما بعد انه مدير الكلية ومعاه واحد صغير في السن ولابس نضاره شمس وعرفت بعد كده انه دكتور عندنا

الدكتور: في ايه؟

أنا: سحب مني ورقة الاجابه وانا عايزه ورقتي

مدير الكليه: طب انت اتأخرتي ليه؟

أنا: أنا بالفعل جيت متأخر , ودلوقتي عايزه ورقتي

هو: يانا ياهي في الكليه دي, مش هتمتحن يعني مش هتمتحن, لو هي امتحنت أنا هسيب الكليه وهمشي, الأدب فضلوه علي العلم
أنا: لو سمحتوا ياريت ماتخليهوش يغلط, لأنه لو غلط أنا هرد عليه, كفايه انه غلط فيا بره وانا سكت

راحله مدير الكليه وفضل معايا الدكتور

الدكتور: بصي سيبك منه, خليكي معايا أنا , ماترديش عليه وانا هجيبلك الورقه

أنا: والوقت اللي بيضيع ده محسوب علي مين

الدكتور: انا هضيفلك الوقت اللي انت عايزاه لما الوقت يخلص , بس ماترديش عليه عشان خاطري

أنا: اوك يادكتور, عشان خاطر حضرتك

وراح فعلا جابلي الورقه وجه اديهالي وقلتله ميرسي, وادور علي الدكتور التاني الاقيه موجود عادي, ايه الناس اللي ملهاش كلمه دي, مش هو قال اني لو امتحنت هيمشي ويسيب الكليه؟؟؟

المهم انا امتحنت وخلصت امتحان وسلمت الورقه قبل الوقت مايخلص والله

وجت المراقبه بتاعتي

هي: خلصتي خلاص

أنا : اها

ناولتني ورقة الأسئله وقالت: اعتذري للدكتور بقي

بصيتلها نظرة انت عبيطه ولا ايه, اللي شافتها لأني مكنتش لسه لبست النضاره, وأخدت منها الورقه

ناولتي المسطره والله ده الدكتور ده طيب

مردتش عليها وأخدت منها المسطره

ناولتني المفتاح مفيهاش حاجه يعني لما تعتذريله

أنا : أنا مش هعتذر لحد لأني ماغلطتش في حد

اديتني النضاره: بس هو طيب والله

لبست النضاره وقلتلها اوك بعد اذنك

هو: لو سمحتي استنيني فوق قدام اوضة الكنترول

أنا: وهي فين اوضة الكنترول

هو: فوق علي ايدك الشمال

طلعت فوق ولقيت الدكتور اللي جابلي الورقه, وقلتله ميرسي يادكتور, وقالي أي خدمه

هو جه وكان معاه مدير الكليه , وقالي تعالي عايزك ودخلنا الكنترول

هو: أنا عايزك أقولك كلمتين ماعرفتش أقولهملك تحت, بصي يابنتي, انت زي بنتي بالظبط, انا حتي عندي بنت قدك, طب انت عارفه انا بنتي شبهك والله , حتي اسألي دكتور ابراهيم

دكتور ابراهيم كان دكتور رابع قاعد في الكنترول وأومأ براسه, رغم اني اعتقد انه مش عارف احنا بنتكلم عن ايه

هو: وعشان كده انا مش عايزك تزعلي مني, انا كده كده كنت هسيبك تمتحني طبعا, لكن انت المفروض كنت تقوليلي معلش يادكتور وانا أسفه يادكتور ومعنتش هتأخر تاني وحقك عليا وكده

انا ضاحكه: لأ سوري يادكتور انا مش بعرف اقول الكلام ده

هو: مش مشكله المهم انك ماتكونيش زعلانه يابنتي, وانت زي بنتي والله

انا : اوك يادكتور ميرسي, بعد اذنكم

ونزلت وروحت والحمدلله النتيجة طلعت أخيرا امبارح ونجحت

...قصة حقيقية

حدث في لندن

كان هناك شاب يحب فتاة كثيرا ،ولم يتجرأ أن يخبرها بحبه يوما
الفتاة كانت تعمل بائعة في محل لبيع الأشرطة الغنائية
كان الشاب يذهب يوميا الى المحل ليشتري منها شريط وفي كل مرة يحاول أن يخبرها ويصارحها بحبه لها ولا يستطيع ذلك
وفي يوم من الايام مات الشاب وعرفت بذلك الفتاة وذهبت الى بيته ودخلت غرفته وشاهدت الاشرطة التي اشتراها منها كلها موجودة ولم يفتح اي واحد منها ابدا ،وهنا حزنت الفتاة كثيرا وبدأت بالبكاء
أتدرون لماذا؟؟
لأنها كانت تضع رسالة حب في كل شريط كان يشتريه منها

وعشان كده اللي يحب واحده لازم يقولها وميتأخرش

واللي مش عارف يقول لحبيبته, يقولي وانا أقولها بجد
يالا ماتضيعوش الفرصه

..الديمنتورات

الديمنتورات كائنات خياليه ظهرت في سلسلة قصص و أفلام هاري بوتر

والديمنتور كائن عملاق مغطي الرأس بمعطف مهترئ, حركته مخيفه لأنه يسري بنعومه فوق سطح الأرض علي ارتفاع عدة بوصات, بدون قدمين ولا يري وجه من تحت معطفه, يصدر عنه رائحه عفنه وأصوات مزعجه, يتجمد الهواء حوله ويسحب الليل مع أنفاسه وهو يقترب ويسحب السعادة من العالم

البشر العادين مايقدروش يشوفوهم وان كانوا طبعا بيشعروا بوجودهم

فالسماء بتتحول من اللون الأزرق الي اللون الأسود الحالك, وتختفي النجوم والقمر وأي اضاءه أخري, الظلام والبروده بيسيطروا علي كل شئ كأن يدا عملاقه أسقطت حاجز سميك وثلجي علي المكان حتي لو كان الوقت شهر أغسطس

لديهم القدرة علي سحب السعاده والأمل وكل الذكريات الجميله من الانسان وبتدي شعور غريب بالبروده واليأس والحزن وتجمع كل الزكريات السيئه

بتدي شعور انك مش ممكن تشعر بالسعاده ثانية وانك خلاص مش هتبتسم تاني في حياتك

أسواء مافيها قبلتها , لو قبلت انسان بتسحب روحه من فمه, مش بيموت, لكنه بيعيش أجوف من غير روح

أنا أعتقد ان الديمنتورات مش كائنات خياليه وان في منهم كتيير عايشين معانا في عالمنا متخفين في هيئة بشر, لما بنشوفهم أو نقابلهم أو حتي نفكر فيهم بيدونا شعور غريب بالتعاسه ومش بنفتكر ليهم غير كل شئ سيئ, وان روحنا بتنسحب مننا, ومين يعرف, يمكن لو قبلونا روحنا تنسحب مننا بجد

في حد غيري قابل ديمنتور بشري قبل كده؟؟؟

ولا أنا بس اللي قصص هاري بوتر أثرت عليا؟؟؟؟

.عيد ميلاد مودي

النهارده عيد ميلاد أخويا العزيز مودي !عالم موودى

كل سنة وانت طيب يامودي ويارب عقبال 1000000 سنة

وتعيشهم في سعادة دايما يارب

(: وعقبال مافرح فيك, قصدي بيك طبعا

:ملحوظة

الصورة من تصميم أحمد أخويا

...بيحبها

اكتشفوا انهم فعلا تايهين, وان مفيش أي بشر حواليهم أو قريب منهم

هي: ممكن تمشي بالراحه عشان أنا خايفه

هو: حبيبتي انت خايفه وأنا معاكي؟ انت ماتعرفيش اني أحميكي بحياتي, واني لو أقدر أخبي جوايا هخبيكي

هي: حبيبتك؟

هو: انت مش عارفه انك حبيبتي؟

هي: عارفه بس كان نفسي أسمعها منك

هو: وسمعتيها ياحبيبتي؟

هي: اها , بس ليه حبيبتك؟ عشان انت بتحبني؟؟؟

هو: هو انت بتشكي اني بحبك

هي: لأ بس كان نفسي أسمعها منك

هو: بحــــــــــــــــــــــك

هي ضاحكه: ياريتنا كنا تهنا من زمـــــــــــان

----------------------

أنا مسافره النهارده ان شاء الله

(: هنروح نصيف بقي

هتوحشوني كلكم

..تاجين اتنين

85%How Addicted to Blogging Are You?

أحمد مع نفسى و أحمد مبرمج حر ومرام مــااا علينـــــا

عايزين يعرفوا نسبة ادماني للتدوين أد ايه, والحمدلله طلعت مدمنة

سؤال لأحمد مبرمج

أحمد فؤاد قالي هو ليه بيحب يمررلي التاجات دي كلها

بس ياتري انت ليه؟ انا عملت فيك حاجه وحشه؟؟؟؟؟

ومش هقولك حاجه يامرام عشان انت طيبه وده اول واحد منك

-----------------------------

التاج التاني من أحمد مع نفسى

مين اكتر ست اشخاص بتحبهم ؟؟؟

ماما

بابا

أخواتي

عيلتي

اصحابي

دول أكتر من 6 بكتيييير

هل أنت سعيد ؟

اها الحمد لله

لو اجتمعت مع حسنى مبارك فى مكان واحد هتعمل ايه ؟
هقوله حكمت فعدلت فأمنت فنمت ياعمر, هو حضرتك بتنام بالليل؟؟؟

لو معايا مليون ونص أعمل ايه ؟
هخلي ماما تحج عشان هي نفسها تحج تاني وطبعا هروح معاها

وهفتح محل الهدايا

وهتبرع بجزء منهم

بتحب مصر ؟
أكييييييييييد

أنت مسلم ؟
اها الحمد لله

ليه ؟
هو الصراحه انا اتولدت مسلمه أصلا

بس كان نفسي طول عمري أقرأ الانجيل

وفي حاجات قرأتها منه بس من ورا سوسو محدش يقولها(:

واتأكدت ان القران هو الصح وأنا مؤمنه به

مين أكتر شخصية متقدرش تستغنى عنها ؟

سوسو

ايه أكتر موقف محرج ؟

ممممممم, الصراحه الصراحه, لما واحد يطلب يرتبط بيا, وببقي عارفه ان ردي عليه هيكون لأ

قبل ماأقولها بيبقي نفسي أختفي من الوجود

الأمنية اللى اتمنى تحقيقها ؟
كل حاجه بحلم بيها حاليا (:

طبعا انتو عارفين ان اللي اتدبس لازم يدبس(:

شريف فبركة

محمود شاب فقري

محمد عادل مصر هى أمى

أحمد فيمتو فى زمن المعجزات اصبح للمجانين مدونات

يوسف يوسيفيهات

أماني لمحات أماني
رضوي طآآن بس جنان
أشرف أخف دم

معتز بيجاسوس المصرى

مودي عالم سي مودي

عادل كراكيب عادل

مها الكلام نوعان :كلام فارغ وكلام مليان كلام فارغ

..no matter

you are special to me so no matter if i call you or not, you are always remembered, it`s true.

ادعوا لأحمد

أخونا العزيز الغالي أحمد فؤاد مع نفسه عنده امتحانات مهمه يوم 28/6 و 2/7

وزي مانتم عارفين أحمد في سنة 5 طب ولسه ياعيني ماتخصصش

وعشان كده احنا لازم ندعيله كتيييير ان ربنا يوفقه ويحل كويس ويتخصص بقي بدل ماهو كاسفنا كده

ربنا يوفقك ياحمد

وتبقي أحسن دكتور في الدنيا يارب

ادعوا بضمير وانتوا متوضين

------------------

البانر الحلو ده, والبانر التاني الحلو بردو, من تصميم أخويا العزيز أحمد مبرمج حر

----------------------

تحديث:

أحمد حل كويس الحمدلله في الامتحان الأول

دعاوتكم بقي عشان الامتحان التاني ان شاء الله

ولادك يابلدي

أنا مكنتش ناويه انزل البوست الجديد دلوقتي

بس الموضوع اللي عايزه أتكلم فيه مش بس يحرق

. الدم, ده يوجع القلب كمان
انا هتكلم عن المصرين اللي اتخطفوا في سوريا
أنا تقريبا مكنتش أعرف حاجه عن الموضوع ده غير انهم دخلوا دخول غير رسمي

.وعشان كده اتقبض عليهم
لكن ده كلام, وكلام الضحايا اللي رجعوا من هناك كلام

. تاني خالص
هم كانو موجودين في برنامج 90 دقيقه و العاشره مساء, للأسف انا مشوفتش الاتنين من الأول , لكن حقيقي اللي انا شفته كان كفايه
الموضوع مش زي ماقرأتوه في الأخبار, وزي ماعلاء أحد الضحايا قال : كل الكلام المكتوب في الأخبار كدب ومش هو ده اللي حصل
الحقيقه انهم كانو مسافرين بباسبورات سليمه والتأشيره كانو أخدينها من السودان وعلاء عرضها علي الشاشه
واللي أنا فهمته انهم اتخطفوا في سوريا من عصابه أخدت منهم كل الفلوس اللي معاهم , بعد مافتشتهم تفتيش ذاتي
وأخدوا فلوسهم كلها , ده طبعا غير الضرب والتعذيب والبهدله والاهانه
هم اتخطفوا في حمص بسوريا , كانو نايمين في غرفه ماتاخدش أكتر من 16 واحد وهم كان عددهم 86 طول المده اللي كانو فيها هناك كانو نايمين علي البلاط , المده دي امتدت لأكتر من شهرين بالنسبه لبعض الناس وماكنوش بياكلوا غير رغيف واحد في اليوم , والضرب

.والاهانه كان كل يوم
ابراهيم كان بيضرب عشانه دافع عن المصرين وقال لواحد فيهم ماتشتمش المصرين, ورغم ده ابراهيم قال انه كان بيعط مش عشان هو بيضرب ولكن من ضرب زميل ليهم كان بيحاول انه يهرب واتظبط
كانو بيطلبوا منهم انهم يقلدوا الكلاب والحمير عشان

.العصابه تضحك
ولما جمعوا الأكل وقالو لواحد فيهم يطبخه, واحد من العصابه قاله سيب أكل الشباب وأطبخ أكل الكلب (أكل

.(الكلب كان لحمه
طبعا غير ده أخدوا كل فلوسهم وكانوا عايزين فلوس كمان وعلاء مكنش راضي يدفع وقالوله هنقتلك وعلاء قال اقتلوني أنا كده كده ميت, لكنهم اتصلو بنسيب علاء

.في لبنان اللي وافق انه يدفع الفلوس
رضا اضرب عليه نار ولولا ستر ربنا وان واحد منهم زق الراجل اللي ضربه كان زمان رضا مات دلوقتي
المهزله دي انتهت لما الشباب هربوا واحد منهم بيعرف يجري بسرعه أول مالباب اتفتح وده كان 7 الصبح وهو راح بلغ البوليس السوري اللي وصل بعد الساعه 12 (بالليل ( من 7 الصبح : 12 نص الليل
العصابه مشيت قبل مداهمة القوات السوريه للموقع ب 10 دقايق ورئيس العصابه خرج قدامهم قبل مايدخلوا المكان والشاب المصري اللي معاهم قالهم هو ده وكان رد الظابط مش معانا أمر بالقبض عليه
بعد كده دخلو فتحوا الباب للمصرين وقالولهم فيكوا حد سوري, قالو لأ كلنا مصرين, الظباط قالو واحنا جاين عشانكم
وأخدوهم أمن الدوله عشان يتحقق معاهم
السفاره والقنصليه اتحركت لما الشباب المصري عملو اضراب عن الطعام لمدة 3 أيام في أمن الدوله وساعتها راح القنصل المصري وأفرجوا عنهم وبدأت رحلة

.عودتهم لمصر
مسؤلين مصر اللي قالوا انهم سافروا سفر غير قانوني وبمعني أصح كان ناقص يقولوا

.يستاهلوا اللي يحصل لهم

الشباب دول مش طالبين كتير , هم طالبين فلوسهم اللي اتسرقت منهم هناك, في ناس وصل المبلغ المسروق منهم 25 ألف جنيه , وكل الفلوس دي سلف هيرودوها ازاي؟
معتز الدمرداش مقدم برنامج 90 دقيقه مكنش عارف يلوم مين؟ وسأل ابراهيم وعلاء ليه البهدله والسفر وليه مقعدتوش في بلدكم
علاء رد وهو بيعيط انه بيشتغل من وهو عنده 9 سنين عشان يصرف علي أخوه وفعلا طلعه دكتور صيدلي بيقبض 400 جنيه مش بيكفوه لبس, ماهو دكتور ولازم يلبس زي زمايله ورغم ده قدر انه يشتري شقه ويتجوز لكن اللي جاي علي قد اللي رايح وهو مش عايز عياله يتبهدلوا زيه ويشتغلوا في طفولتهم وهو عارف انه لو مات مفيش حد هيسأل عنهم لأن احنا في زمن مفيش حد بيسأل فيه عن حد, وقاله احنا سافرنا السودان لأن مصر مش بتوفر الفيزا اللي أخدناها من

.هناك وفرولنا شغل واحنا نقعد في مصر
ابراهيم قال انه عنده 30 سنه ونفسه يتجوز, لو فضل في مصر هيتجوز امتي ولما يبقي عنده كام سنه؟
كان في ولد معاهم عنده 16 سنه ولما سألوه سافرت ليه, قالهم عنده 3 اخوات بنات, هيجوزهم ازاي؟

كان معاهم راجل عجوز عنده 54 سنه, وهم مخطوفين كان دايما بيقول , هجوز بناتي ازاي؟
كلهم حمدوا ربنا انهم رجعوا بالسلامه بس عايزين حقهم
لكن رضا قال انه كان بيتمني الموت ولا انه يرجع بالطريقه دي, قال أنا أهلي مبسوطين بيا دلوقتي, انما لما الباب يخبط عشان الناس اللي ليها فلوس جايه تطلبها أهلي هيجبوها منين؟
أكبر حلم ليهم انهم يجيبوا شقق ويتجوزوا, واللي متجوز حلم حياته انه يعرف يربي أولاده
قالوا ان مفيش حد حاسس باللي هم حاسين بيه, واننا مش ممكن نعرف ايه هو شعورهم
مني الشاذلي مقدمة العاشره مساءا حاولت تفهمهم اننا زعلانين عليهم أكتر من أهلهم وان اللي حصلهم مش في حقهم هم بس ده في حقنا كلنا
بس هم مكنوش مقتنعين

أنا مش عارفه أقول ايه؟ أنا عارفه اني نكدت عليكم, بس حق الشباب دول اننا نكتب عنهم, وعلي الأقل نقول ايه هي حقيقة اللي حصل
أعتقد ان البلويس السوري لازم يقبض علي الناس دي, والمفروض انهم كانو محاصرين المكان قبل مايدخلوه بساعتين علي الأقل, يعني المفروض انهم شافوا العصابه كلها وهي خارجه
الدكتور اللي كان في أمن الدوله اللي طلب فلوس عشان يكشف علي علاء مش عارفه أقوله ايه, لأن هو نسي انه دكتور, وافتكر انه مقاول.
المسؤلين بتوعنا عايزه أقولهم لحد امتي ولادنا هيتبهدلوا بره واحنا نفقعد نتفرج عليهم, اللي حصل مش اهانه ليهم هم بس, دي اهانه لينا كلنا, ليكم انتوا قبلنا, لو كانت الناس دي عارفه اننا عندنا حكومه هتقلب الدنيا لما مواطن يتهان مكنوش قدورا يعملو

.معاهم حاجه
ولو كان انسان تاني من جنسيه تانيه حصل ده فيه في مصر كان ايه اللي هيحصل؟
اخوتنا في سوريا, عايزه أقولهم ان انا عن نفسي بحبهم, أصلي بحب بلاد الشام, فلسطين ولبنان وسوريا والأردن
بس أكيد مش بحبهم أكتر من ولاد بلدي, وان كان لفلسطين قيمة خاصه عندي
بس انتو ليه عملتو فيهم كده, دول ولاد عمكم, عايزين تخطفوا وتسرقوا الموضوع مش صعب, اطلعوا الجولان واخطفوا اليهود من هناك واسرقو فلوسهم, يمكن ساعتها يحسوا ان في سوريا رجاله بتدافع عن أرضها, ويمكن ترجعولنا الهضبه اللي أذن عليها بلال
السفير المصري والقنصل اللي الشباب شكروهم هناك, أنا شايفه انهم ماعملوش غير الواجب والواجب ميستاهلش الشكر, دول كمان عملوه متأخر, ومحسوش غير لما الشباب كانو هيموتوا من الاضراب عن الطعام
للشباب اللي اتبهدلو أي كلام هقوله مش هيديهم حقهم وليهم حق يقولو ان مفيش حد حاسس بيهم, بس والله احنا قلوبنا اتوجعت عشانكم ودموعكم غاليه أوي علينا, وياريتنا كنا نقدر نعمل حاجه غير كده

حسبي الله ونعم الوكيل

---------------------

ياريت ياجماعه ماتنسوش تدعوا لمنة

بس ادعوا بضمير وذمه شويه

وياريت يكون الدعاء وانتم متوضين

•«ρяoιd»•™ البانر ده من تصميم رامي

ليه بتحبني؟

هي: أنا عايزة اعرف انت ليه بتحبني؟؟ ايه اللي خلاّك تحبني؟؟
هـو: ماقدرش اقولك السبب بس أنا فعلاً بحبك
هي: ماتقدرش تقولّي السبب؟ أمال انت بتحبني ازاي وانت مش عارف ليه بتحبني؟؟
هـو: صدقيني.. معرفش السبب.. بس انا بحبك موت
هي: لا مش ممكن.. لازم اعرف السبب.. حبيب صديقتي دايماً يقولها ليه هو بيحبها.. لكن انت ماتعرفش
هـو: اوكي اوكي.. انا بحبك لانك حلوه قوي، ولان صوتك حلو يهوس، ولانك بتهتمّي بيّـا وبتحبيني، ولان روحك كلها امل وتفاؤل.. ولان ابتسامتك ساحرة وجذابة، واحبك لكل حركة تعمليها وكل خطوة تمشيها

---------------------------

لسوء الحظ ..بعد بضعة ايام حصل للمرأة حادث بليغ واصيبت فيه اصابات بالغة وعندما اتى الرجل لزيارتها.. وضع بجانبها رسالة قصيرة كتب فيها

عزيزتي لجمال صوتك أحببتك.. ولكن الآن هل تستطيعين الكلام؟
كلاّ..
إذن فأنا لا أستطيع أن احبكِ
ولانك تهتمين وتحبين.. احببتكِ، ولكن الآن هل تستطيعين اظهار هذه المشاعر؟
كلا..
اذن.. فأنا لا استطيع ان احبكِ
ولابتسامتك الساحرة.. احببتكِ.. ولكل حركة تتحركينها كنت احبكِ
ولكن.. الآن
هل تستطيعين الابتسام؟؟.. هل تقدرين على الحركة؟
كلاّ..
لهذا السبب فانا لا استطيع ان احبكِ
عزيزتي
لوكان الحب يتطلب أسباباً.. فانت الآن لا تملكين اي سبب لكي احبك ِ من أجله
إذن
هل يحتاج الحب أسباباً ؟؟
أبـــداً.....
فانا لا أزال أحبـكِ.. وسأظل أحبـك ما حييت

------------------------

طبعا حملة الدعاوي لموني لسه شغاله

بس ادعوا بذمه ربنا يخليكوا

الامتحانات رخمه وأكيد هحكيلكوا علي اللي بيحصل في بوست مخصوص ان شاء الله

:ملحوظه

البانر ده من تصميم أحمد فؤاد مع نفسى

الحمدلله

في حاجات بتحصل في حياتنا وبيبقي نفسنا نعرف حصلت ازاي

أو ايه اللي حصل عشان تحصل

وطبعا مش بنريح نفسنا وبنفضل نحاول اننا نعرف حصلت ليه؟

أحيانا بننجح وأحيانا أكتر مش بنعرف

لكن الغريبه اني فعلا بقيت بعرف كل حاجه, حتي لو مكنتش بدور علي سببها , يعني مثلا لو حد ضحك عليا وقالي حاجه غير الحقيقه, ربنا بيبعتلي الحقيقه وبعرفها

ساعتها بحس بجد ان ربنا بيحبني جدا, وانه مش

.عايزني أبقي مضحوك عليا وعبيطه

دلوقتي لما بقي أي حد بيقولي أي حاجه ببقي واثقه اني هعرف هو بيقول الحقيقه ولا لأ بعد كده

عشان أنا واثقه ان ربنا هيعرفني بعد كده

بجد أنا عايزه أقول شكرا لربنا

ربنا لك الحمد كما ينبغي لجلال وجهك وعظيم سلطانك

ربنا لك الحمد حمدا كثيرا طيبا مباركا فيه

ربنا لك الحمد ملء السموات وملء الأرض وملء مابينهما وملء ماشئت من شئ بعد

------------------------

طبعا حملة الدعاء لمنة أختي لسه مستمره

اوعوا تبطلو دعاء

وياريت ترفعو البنارات دي علي مدوناتكم

البانر ده من تصميم أحمد فؤاد مع نفسى

وبانر البوست اللي فات من تصميم أحمد مبرمج حر