كل عام وأنتم بخير

رمضان كريم

كل سنة وكلكم طيبين ورمضان سعيد علي كل الناس

جمعت بينهما أشجار الزيتون

لم ينقش رسم غرناطة ولا البيازين. مالت السكين في يده تحز خطا مقوسا ثم خطا مقوسا غيره. كان ينقل الصورة التي أمامه ويقلدها. ضغط أكثر فتعمق الحز حفرا وتحددت القبتان. لماذا ينقش المكان البعيد, مالذي تعنيه له القدس؟
نجمة مضيئه في السماء أم يجرب يده لتدريبها قبل أن تشرع في تصوير غرناطة؟ جاءهم الروم وغزوا أرضهم تماما كما حدث لنا، ولكنهم طردوا الصليبين، فلماذا استطاعوا مالم نستطعه وكيف استطاعوه؟ هل كانوا يفوقوننا عزما أم أن الجواب في سؤل يختلف؟ تري مالذي حدث بالتفصيل هناك؟ لن يجد من يحكي له الحكاية كلها من البداية للختام، وهو لا يعرف سوي أن صلاح الدين طردهم من القدس مرة، ولكن للحكاية بقية فمن يحكيها له؟ لماذا رجحت الكفه في المشرق وهنا خفت الموازين؟ هل بنا عيب ليس فيهم، أم أن مصيبتنا أننا مقطوعون بالبحر، لا مصر جارتنا، ولا حولنا عراق ولا شام؟ قال الحاج إن في القدس نصارى من أهل البلد، فلماذا يفرضون علينا التنصير هنا ولماذا يزدروننا، ولم يكن سيدهم روميا ولا كان له عينان زرقاوان؟ كان السكين في يده يحز خطا رأسيا ثم قطعه بخط أفقي أقصر، يحفر في الصليب. بعث الله في عباده عيسي المسيح. حدق في الصليب علي اللوح، بدا أليفا ووديعا والهلال يجاوره. ماعلاقة هذا الصليب بجيوش خوان دي أستوريا وذبح أهالي البشرات؟ ماعلاقة الوجه الشاحب والرأس المائل بتاج الشوك، وما نحن فيه من عذاب؟ وأي رابطة تربط الجسد العاري النحيل لمسيح تبكيه أمه، بالأسياد وملاك الأرض والضرائب والمكوس والملك وديوان التحقيق ؟! ـ

---------------------
ثلاثية غرناطة
رضوى عاشور

أجازة

أراكم بعد الفاصل

....

الكتابه عن حد قريب من الكاتب هي أصعب أنواع الكتابه من وجهة نظري
يمكن لأني مهما قلت من كلام استحاله أقول هم ايه بالنسبه ليا وناس قليلين اوي هم اللي بيعرفوا يوفوا القريبين منهم حقهم في الكتابه وبيكونو من وجهة نظري أبرع الكتاب

يمكن هي مش اللي معايا طول الوقت احنا اه كل خروجتنا مع بعض لكن في المشاوير العاديه مش بتكون موجوده
رغم ده في حاجه بتربط بيني وبينها ممكن أي حد يلاحظها, أقرب تعبير عن الحاجه دي كان من اختها لما قالت اننا روحنا قريبه من بعض
لكن أعتقد ان التعبير الأصح هو اننا فينا من روح بعض
طبيعي اني مهما اتكلمت وضحكت انها تسالني في ايه وتصمم علي السؤال وإن جميع محاولاتي للنصب واني كويسه تعدي علي الجميع الا هي لحد ما أعترف, طبيعي اني لو مخنوقه هي تعيط قبلي, وطبيعي اني لو مبسوطه هي تضحك من قلبها قبلي
طبيعي انها تعرف حالتي الحقيقيه من كلمة ألو أو من أول نظره لما تشوفني
طبيعي إنها تساندي في جميع قرارتي حتي لو مكنتش فاهمه إيه سببها, كان طبيعي كمان انها تقولهم زمان سيبوها محدش له دعوه بيها مش هنبقي احنا كمان عليها رغم انها زيهم مكنتش فاهمه ايه اللي حصل
وعشان كل ده طبيعي فكان بردو طبيعي ان قلبها يوجعني , وإني أتمني أنا بس اللي أحس بده بالنيابه عنها
ياربي انت عارف كلهم مهمين عندي ازاي, وعارف هم عندي ايه, وانت الوحيد اللي تقدر تعمل كل حاجه
يارب حلها من عندك
صافي قلبك وجعني اوي, وأكيد مفيش أعز منك أدعيله من قلبي

أحمد البيت من غيرك وحش جدا
ماتتخيلش احنا مفتقدينك إزاي
انت أه مش طول اليوم معانا وزي أي حد خارج طول اليوم
بس الوقت اللي بتقضيه معانا فارق معانا أوي, بس يالا ياسيدي ولا يهمك, المهم انك تقضي وقت جميل وتتبسطوا, ترجعوا بالسلامه ان شاء الله

كان حبيبها وكانت همه

كان ينتظرها ليخبرها بما لديه من أخبار سعيده, هنأته كثيرا ثم جاء دورها لتخبره بزواج احدي صديقاتها وتمنياتها له بالزواج هو الأخر
ولكنه أخبرها انه لن يأخذ هذه الخطوه حاليا لأنه استفاد كثيرا من تجارب أصدقائه , وعندما استفسرت عن هذة الاستفاده , أخبرها أن تسرعهم في اتخاذ هذه الخطوات والزواج وتحمل المسؤليه مبكرا قد أدي الي تحملهم الهم مبكرا
استوقفتها الفكره كثيرا فسألته في اندهاش, هم؟؟
أجاب بالايجاب وأكمل بأن المسؤليه المبكره هم يعاني منه أصدقائه
لم تستطع أن تصارحه بما مر بخاطرها فهي لا تريد أن تفسد يومه السعيد
سألها عن سبب وجومها ولكنها نفت ذلك وأكدت له أنها سعيده من اجله
استفسر ان كان قد قال ماضايقها فنفت ذلك أيضا وأخبرته أن كل حديثه اليوم كان مفرح وسعيد
لم يقتنع بكلامها تماما ولكنه طلب منها أن تنبه إن قال مايضايقها خلال أحاديثهم القادمه فهو يعلم أنه ربما يقول كلمات حمقاء دون قصد
أخبرته أن ذلك لم يحدث اليوم, فابتسم أخيرا وأكملا حديثهما
عندما انتهيا ودعته مبتسمه وأخفت دمعه كادت ان تخذلها وتخبره أن ماعكر صفوها هو اكتشافها أنها كانت همه وأن قراره بالانفصال عنها, كان قرارا بالانفصال عن الهم

تمت

من يرتكب الأخطاء

هو من يرتكب الأخطاء دائما
لكنها علاقه والناس يرتكبون الأخطاء, وأنت تراقبينه في انتظار أن يخطئ لتجدي سببا للانسحاب من هذة العلاقة

------------
grey's anatomy season 4

الفرصة الثانية

لما كنت في ثالثه ثانوي كان عندي امتحان في درس الفيزياء
ويوم توزيع الورق المدرس بتاعي ساب ورقتي للأخر خالص و قبل مايديني الورقه قالي غلطتي , هي اه غلطه صغيره لكنها نقصتك درجه, غلطه لو كنتي ركزتي مكنتيش غلطتيها
انا قلتله اني معنديش مشكله اني اغلط, لأن الحاجه اللي بغلط فيها مش ممكن انساها, وعشان كده استحاله اني اغلط فيها تاني في امتحان أخر السنه, يعني اني اغلط مش حاجه وحشه بالعكس دي حاجه مفيده
يومها هو ضحك وقال حبيت احرجها لأنها غلطت فحرجتني هي وطلع الغلط حق مكفول للجميع

يمكن عشان كده انا مؤمنة تماما بالفرصه التانيه, لأني مش ممكن هغلط نفس الغلطه مرتين
وطالما انا شايفه ان الفرصه التانيه من حقي اللي ممكن احارب عشان اخادها, فأكيد ماينفعش اني احرم منها غيري وتكون حق مكتسب ليا أنا بس
بس كمان تجارب الحياة أثبتت ان الناس اللي بتتعلم من اخطائها قليلين جدا وإن في ناس كتير لو اتحطوا في نفس الموقف مليون مره هيعملوا فيه نفس اللي عملوه في المره الاولي حتي لو كانوا متاكدين انهم غلط 100% ومعندهمش شك في ده
لكن لما تكون محطوط في موقف انك تدي لغيرك فرصه تانيه فمش من حقك انك تحرمه منها وترجع تطالب بيها لنفسك الفرصه التانيه حق لكل الناس وهم احرار انهم يتعلموا من الاولي او يغلطوا نفس الغلطه تاني
لكن الأكيد ان مفيش فرصه ثالثه مهما حصل

منك لله

عارفه حارقة قلبها لأني عشتها قبل كده وجربتها
وكأن الحياه مش مكفيها ان حد فينا يجربها
وكأنها مكتوبه علينا ولازم ندوقها
الألم اللي فوق الوصف, والأمنية الوحيده بان القلب يبطل يدق لأن ده طوق النجاه الوحيد والحل الاوحد لايقاف الألم
الوجع اللي مفيش كلام يوصفه, والاحساس باننا اضعف بكتير من اننا نستحمله
الشعور بان الناس مهمها حاولت تفهم عمرها ماهتقدر لأنها ماجربتش
الاستعداد التام بمقايضة العمر براحة القلب
الدموع اللي بتنزل علي القلب تحرقه عشان مش قادرين ننزلها قدام الناس


مش هقولك غير حسبي الله ونعم الوكيل فيك
وان شاء الله هتدوق كل اللي انت عملته فيها
هتلف الأيام وربنا هيحرق قلبك
ربنا هينتقملها منك وهيجبلها حقها لحد عندها
هتندم ندم عمرك , وهي هتحس ساعتها براحة البال والقلب
روح ياأخي منك لله

حرررررررر

س:هم ليه بيمتحنونا في الصيف بالنهار
ج: عشان دي الخطه القوميه لحرق الطلبه والطالبات
-----------------------
طب انا نفسي افهم لو امتحنونا بعد العصر في حد هيعترض؟
طب يعملو استفتاء بس ويشوفوا الطلاب هيوافقوا ولا لأ
ولا هم مصدقين ان الجو عندنا ربيع طول السنة

:(

أضحك عليكي
لأ

ياريتك كنت ضحكت

البقاء لله ياريس

يمكن انا مختلفه معاه في حاجات كتير
ويمكن انا مادتلوش صوتي في الانتخابات الاخيره
يمكن نكون بنتمني انه يتغير
لكن الأكيد ان مفيش اي مشاكل بينا وبين حفيده
الأكيد ان كلنا لما سمعنا الخبر اتصدمنا وقلنا ربنا يرحمه
ربنا يرحمه ويصبر أهله والبقاء لله
مفيش اي حاجه اتقالت لحد دلوقتي غير انها وعكه صحيه مفجأه حصلت من يومين
ربنا يرحمه ويرحم موتي المسلمين
والبقاء لله ياريس

هيطاردوه لحد امتي

لو كان معايا فلوس كنت فتحت لحمدي قنديل قناة يقول فيها كل اللي هو عايزه

أدركت أخيرا

حينها فقط أدركت أنه لم يرحل بمفرده
أصبحت تعلم تماما أنه يصطحب قطعة من روحها معه

ان ماقدرتش

ان ماقدرتش تضحك
ماتدمعش ولا تبكيش
وان مافضلش معاك غير قلبك
اوعي تخاف
مش هتموت هتعيش
وان سألوك الناس عن ضي
جوه عيونك مابيلمعش
ماتخبيش
قولهم العيب مش فيا
ده العيب في الضي
وانا مش عاشق ضلمه
ولا زعلت الضي
مسير الضي لوحده هيلمع
مسير الضحك لوحده هيطلع
مابيجرحش ولا يئذيش

مروان وحسن ومصر

النهارده بتعدي سنة جديده علي اعتقال أسد العروبه الجريح الشهير بمروان البرغوثي
مروان كان أخر الاصوات والوجوه النظيفه في حركة تحرير فلسطين الشهيره بفتح
أعتقد ان المنظمه نست اسمها قبل الاختصار واكتفت بانها فتح أي حاجه وخلاص الا انها تكون فتح أرضها وتحريرها
غريبه فعلا ان يجي ميعاد ذكري اعتقال البرغوثي في الوقت اللي مشاكل الحكومه المصريه مع حزب الله وقائده السيد حسن نصرالله بتغطي علي كل الأخبار التانيه وكأن التاريخ ده هيفضل نقطه سودا ضد المقاومه والمقاومين الشرفاء
الشعوب العربيه عموما بتفخر بوجود حزب الله فيها وانهم عرب زينا, ناس كده يخلونا نقدر نرفع راسنا لما نقول اننا عرب, ناس ردولنا كرامة العروبه وكل فترة بيأكدو ان الوهم الصهويني مش أكتر من وحش علي الورق وإن العزيمه القويه لأصحاب الحق تستطيع تمزيقه بكل سهوله
كلنا تقريبا جربنا كلام السيد حسن نصر الله قبل كده, الصهاينه نفسهم قالوا كتير انهم بيثقوا في كلام الراجل لأنهم جربوه وعمره ماكدب
وكلنا كمان جربنا كلام الحكومه المصريه بدل المره أكثر من 25 سنة
لما حسن نصر الله يقول ان أعضاء من حركته تواجدو في مصر من أجل تقديم مساعدات لغزة وتهريب سلاح للمقاومة وان أمن مصر خط احمر عنده هو وحركته وتيجي الحكومه تقول إن أعضاء حزب الله في مصر كانو موجودين عشان يعملو عمليات تخريبيه وإغتيالات وأفلام هندي يبقي إحنا نصدق مين؟
الراجل اللي الدنيا كلها بتصدقه لأنه عمره ماكدب دي حاجه, وتاني حاجه لأنه مش بيخاف من حد عشان يكدب أصلا والأهم بقي اننا عارفين ان أخلاق حزب الله تقول انهم يساعدو المقاومه في غزه اه لكن انهم يخربو في دوله عربيه تانيه أكيد لأ
ولا نصدق الحكومه اللي بتكدب علينا كل يوم قبل الأكل وبعده؟
أي بني أدم عاقل هيصدق كلام حسن نصر الله طبعا خصوصا ان الراجل بتاعه مقبوض عليه من شهر 11 اللي فات
ويتبقي السؤال اشمعني الحكومه افتكرت تنشر الموضوع ده دلوقتي؟؟؟ ويجي الرد من أستاذ فهمي هويدي في صيغة سؤال في برنامج العاشره مساءا ويسأل هو التوقيت ده له علاقه بالانتخابات في لبنان
أعتقد ان كده المسأله بقي شكلها وحش أوي وعيب علينا أوي
ربنا يهدي أبو الغيط لأنه شكله مافيش وراه أي حاجه غير حسن نصر الله, مايروح يشوف المركبتين اللي مخطوفين في الصومال ولا دي مش مسؤلية الخارجيه ولا هي الخارجيه المصريه تخصص حزب الله وحسن نصر الله وبس؟