ادعوا لأحمد

أخونا العزيز الغالي أحمد فؤاد مع نفسه عنده امتحانات مهمه يوم 28/6 و 2/7

وزي مانتم عارفين أحمد في سنة 5 طب ولسه ياعيني ماتخصصش

وعشان كده احنا لازم ندعيله كتيييير ان ربنا يوفقه ويحل كويس ويتخصص بقي بدل ماهو كاسفنا كده

ربنا يوفقك ياحمد

وتبقي أحسن دكتور في الدنيا يارب

ادعوا بضمير وانتوا متوضين

------------------

البانر الحلو ده, والبانر التاني الحلو بردو, من تصميم أخويا العزيز أحمد مبرمج حر

----------------------

تحديث:

أحمد حل كويس الحمدلله في الامتحان الأول

دعاوتكم بقي عشان الامتحان التاني ان شاء الله

ولادك يابلدي

أنا مكنتش ناويه انزل البوست الجديد دلوقتي

بس الموضوع اللي عايزه أتكلم فيه مش بس يحرق

. الدم, ده يوجع القلب كمان
انا هتكلم عن المصرين اللي اتخطفوا في سوريا
أنا تقريبا مكنتش أعرف حاجه عن الموضوع ده غير انهم دخلوا دخول غير رسمي

.وعشان كده اتقبض عليهم
لكن ده كلام, وكلام الضحايا اللي رجعوا من هناك كلام

. تاني خالص
هم كانو موجودين في برنامج 90 دقيقه و العاشره مساء, للأسف انا مشوفتش الاتنين من الأول , لكن حقيقي اللي انا شفته كان كفايه
الموضوع مش زي ماقرأتوه في الأخبار, وزي ماعلاء أحد الضحايا قال : كل الكلام المكتوب في الأخبار كدب ومش هو ده اللي حصل
الحقيقه انهم كانو مسافرين بباسبورات سليمه والتأشيره كانو أخدينها من السودان وعلاء عرضها علي الشاشه
واللي أنا فهمته انهم اتخطفوا في سوريا من عصابه أخدت منهم كل الفلوس اللي معاهم , بعد مافتشتهم تفتيش ذاتي
وأخدوا فلوسهم كلها , ده طبعا غير الضرب والتعذيب والبهدله والاهانه
هم اتخطفوا في حمص بسوريا , كانو نايمين في غرفه ماتاخدش أكتر من 16 واحد وهم كان عددهم 86 طول المده اللي كانو فيها هناك كانو نايمين علي البلاط , المده دي امتدت لأكتر من شهرين بالنسبه لبعض الناس وماكنوش بياكلوا غير رغيف واحد في اليوم , والضرب

.والاهانه كان كل يوم
ابراهيم كان بيضرب عشانه دافع عن المصرين وقال لواحد فيهم ماتشتمش المصرين, ورغم ده ابراهيم قال انه كان بيعط مش عشان هو بيضرب ولكن من ضرب زميل ليهم كان بيحاول انه يهرب واتظبط
كانو بيطلبوا منهم انهم يقلدوا الكلاب والحمير عشان

.العصابه تضحك
ولما جمعوا الأكل وقالو لواحد فيهم يطبخه, واحد من العصابه قاله سيب أكل الشباب وأطبخ أكل الكلب (أكل

.(الكلب كان لحمه
طبعا غير ده أخدوا كل فلوسهم وكانوا عايزين فلوس كمان وعلاء مكنش راضي يدفع وقالوله هنقتلك وعلاء قال اقتلوني أنا كده كده ميت, لكنهم اتصلو بنسيب علاء

.في لبنان اللي وافق انه يدفع الفلوس
رضا اضرب عليه نار ولولا ستر ربنا وان واحد منهم زق الراجل اللي ضربه كان زمان رضا مات دلوقتي
المهزله دي انتهت لما الشباب هربوا واحد منهم بيعرف يجري بسرعه أول مالباب اتفتح وده كان 7 الصبح وهو راح بلغ البوليس السوري اللي وصل بعد الساعه 12 (بالليل ( من 7 الصبح : 12 نص الليل
العصابه مشيت قبل مداهمة القوات السوريه للموقع ب 10 دقايق ورئيس العصابه خرج قدامهم قبل مايدخلوا المكان والشاب المصري اللي معاهم قالهم هو ده وكان رد الظابط مش معانا أمر بالقبض عليه
بعد كده دخلو فتحوا الباب للمصرين وقالولهم فيكوا حد سوري, قالو لأ كلنا مصرين, الظباط قالو واحنا جاين عشانكم
وأخدوهم أمن الدوله عشان يتحقق معاهم
السفاره والقنصليه اتحركت لما الشباب المصري عملو اضراب عن الطعام لمدة 3 أيام في أمن الدوله وساعتها راح القنصل المصري وأفرجوا عنهم وبدأت رحلة

.عودتهم لمصر
مسؤلين مصر اللي قالوا انهم سافروا سفر غير قانوني وبمعني أصح كان ناقص يقولوا

.يستاهلوا اللي يحصل لهم

الشباب دول مش طالبين كتير , هم طالبين فلوسهم اللي اتسرقت منهم هناك, في ناس وصل المبلغ المسروق منهم 25 ألف جنيه , وكل الفلوس دي سلف هيرودوها ازاي؟
معتز الدمرداش مقدم برنامج 90 دقيقه مكنش عارف يلوم مين؟ وسأل ابراهيم وعلاء ليه البهدله والسفر وليه مقعدتوش في بلدكم
علاء رد وهو بيعيط انه بيشتغل من وهو عنده 9 سنين عشان يصرف علي أخوه وفعلا طلعه دكتور صيدلي بيقبض 400 جنيه مش بيكفوه لبس, ماهو دكتور ولازم يلبس زي زمايله ورغم ده قدر انه يشتري شقه ويتجوز لكن اللي جاي علي قد اللي رايح وهو مش عايز عياله يتبهدلوا زيه ويشتغلوا في طفولتهم وهو عارف انه لو مات مفيش حد هيسأل عنهم لأن احنا في زمن مفيش حد بيسأل فيه عن حد, وقاله احنا سافرنا السودان لأن مصر مش بتوفر الفيزا اللي أخدناها من

.هناك وفرولنا شغل واحنا نقعد في مصر
ابراهيم قال انه عنده 30 سنه ونفسه يتجوز, لو فضل في مصر هيتجوز امتي ولما يبقي عنده كام سنه؟
كان في ولد معاهم عنده 16 سنه ولما سألوه سافرت ليه, قالهم عنده 3 اخوات بنات, هيجوزهم ازاي؟

كان معاهم راجل عجوز عنده 54 سنه, وهم مخطوفين كان دايما بيقول , هجوز بناتي ازاي؟
كلهم حمدوا ربنا انهم رجعوا بالسلامه بس عايزين حقهم
لكن رضا قال انه كان بيتمني الموت ولا انه يرجع بالطريقه دي, قال أنا أهلي مبسوطين بيا دلوقتي, انما لما الباب يخبط عشان الناس اللي ليها فلوس جايه تطلبها أهلي هيجبوها منين؟
أكبر حلم ليهم انهم يجيبوا شقق ويتجوزوا, واللي متجوز حلم حياته انه يعرف يربي أولاده
قالوا ان مفيش حد حاسس باللي هم حاسين بيه, واننا مش ممكن نعرف ايه هو شعورهم
مني الشاذلي مقدمة العاشره مساءا حاولت تفهمهم اننا زعلانين عليهم أكتر من أهلهم وان اللي حصلهم مش في حقهم هم بس ده في حقنا كلنا
بس هم مكنوش مقتنعين

أنا مش عارفه أقول ايه؟ أنا عارفه اني نكدت عليكم, بس حق الشباب دول اننا نكتب عنهم, وعلي الأقل نقول ايه هي حقيقة اللي حصل
أعتقد ان البلويس السوري لازم يقبض علي الناس دي, والمفروض انهم كانو محاصرين المكان قبل مايدخلوه بساعتين علي الأقل, يعني المفروض انهم شافوا العصابه كلها وهي خارجه
الدكتور اللي كان في أمن الدوله اللي طلب فلوس عشان يكشف علي علاء مش عارفه أقوله ايه, لأن هو نسي انه دكتور, وافتكر انه مقاول.
المسؤلين بتوعنا عايزه أقولهم لحد امتي ولادنا هيتبهدلوا بره واحنا نفقعد نتفرج عليهم, اللي حصل مش اهانه ليهم هم بس, دي اهانه لينا كلنا, ليكم انتوا قبلنا, لو كانت الناس دي عارفه اننا عندنا حكومه هتقلب الدنيا لما مواطن يتهان مكنوش قدورا يعملو

.معاهم حاجه
ولو كان انسان تاني من جنسيه تانيه حصل ده فيه في مصر كان ايه اللي هيحصل؟
اخوتنا في سوريا, عايزه أقولهم ان انا عن نفسي بحبهم, أصلي بحب بلاد الشام, فلسطين ولبنان وسوريا والأردن
بس أكيد مش بحبهم أكتر من ولاد بلدي, وان كان لفلسطين قيمة خاصه عندي
بس انتو ليه عملتو فيهم كده, دول ولاد عمكم, عايزين تخطفوا وتسرقوا الموضوع مش صعب, اطلعوا الجولان واخطفوا اليهود من هناك واسرقو فلوسهم, يمكن ساعتها يحسوا ان في سوريا رجاله بتدافع عن أرضها, ويمكن ترجعولنا الهضبه اللي أذن عليها بلال
السفير المصري والقنصل اللي الشباب شكروهم هناك, أنا شايفه انهم ماعملوش غير الواجب والواجب ميستاهلش الشكر, دول كمان عملوه متأخر, ومحسوش غير لما الشباب كانو هيموتوا من الاضراب عن الطعام
للشباب اللي اتبهدلو أي كلام هقوله مش هيديهم حقهم وليهم حق يقولو ان مفيش حد حاسس بيهم, بس والله احنا قلوبنا اتوجعت عشانكم ودموعكم غاليه أوي علينا, وياريتنا كنا نقدر نعمل حاجه غير كده

حسبي الله ونعم الوكيل

---------------------

ياريت ياجماعه ماتنسوش تدعوا لمنة

بس ادعوا بضمير وذمه شويه

وياريت يكون الدعاء وانتم متوضين

•«ρяoιd»•™ البانر ده من تصميم رامي

ليه بتحبني؟

هي: أنا عايزة اعرف انت ليه بتحبني؟؟ ايه اللي خلاّك تحبني؟؟
هـو: ماقدرش اقولك السبب بس أنا فعلاً بحبك
هي: ماتقدرش تقولّي السبب؟ أمال انت بتحبني ازاي وانت مش عارف ليه بتحبني؟؟
هـو: صدقيني.. معرفش السبب.. بس انا بحبك موت
هي: لا مش ممكن.. لازم اعرف السبب.. حبيب صديقتي دايماً يقولها ليه هو بيحبها.. لكن انت ماتعرفش
هـو: اوكي اوكي.. انا بحبك لانك حلوه قوي، ولان صوتك حلو يهوس، ولانك بتهتمّي بيّـا وبتحبيني، ولان روحك كلها امل وتفاؤل.. ولان ابتسامتك ساحرة وجذابة، واحبك لكل حركة تعمليها وكل خطوة تمشيها

---------------------------

لسوء الحظ ..بعد بضعة ايام حصل للمرأة حادث بليغ واصيبت فيه اصابات بالغة وعندما اتى الرجل لزيارتها.. وضع بجانبها رسالة قصيرة كتب فيها

عزيزتي لجمال صوتك أحببتك.. ولكن الآن هل تستطيعين الكلام؟
كلاّ..
إذن فأنا لا أستطيع أن احبكِ
ولانك تهتمين وتحبين.. احببتكِ، ولكن الآن هل تستطيعين اظهار هذه المشاعر؟
كلا..
اذن.. فأنا لا استطيع ان احبكِ
ولابتسامتك الساحرة.. احببتكِ.. ولكل حركة تتحركينها كنت احبكِ
ولكن.. الآن
هل تستطيعين الابتسام؟؟.. هل تقدرين على الحركة؟
كلاّ..
لهذا السبب فانا لا استطيع ان احبكِ
عزيزتي
لوكان الحب يتطلب أسباباً.. فانت الآن لا تملكين اي سبب لكي احبك ِ من أجله
إذن
هل يحتاج الحب أسباباً ؟؟
أبـــداً.....
فانا لا أزال أحبـكِ.. وسأظل أحبـك ما حييت

------------------------

طبعا حملة الدعاوي لموني لسه شغاله

بس ادعوا بذمه ربنا يخليكوا

الامتحانات رخمه وأكيد هحكيلكوا علي اللي بيحصل في بوست مخصوص ان شاء الله

:ملحوظه

البانر ده من تصميم أحمد فؤاد مع نفسى

الحمدلله

في حاجات بتحصل في حياتنا وبيبقي نفسنا نعرف حصلت ازاي

أو ايه اللي حصل عشان تحصل

وطبعا مش بنريح نفسنا وبنفضل نحاول اننا نعرف حصلت ليه؟

أحيانا بننجح وأحيانا أكتر مش بنعرف

لكن الغريبه اني فعلا بقيت بعرف كل حاجه, حتي لو مكنتش بدور علي سببها , يعني مثلا لو حد ضحك عليا وقالي حاجه غير الحقيقه, ربنا بيبعتلي الحقيقه وبعرفها

ساعتها بحس بجد ان ربنا بيحبني جدا, وانه مش

.عايزني أبقي مضحوك عليا وعبيطه

دلوقتي لما بقي أي حد بيقولي أي حاجه ببقي واثقه اني هعرف هو بيقول الحقيقه ولا لأ بعد كده

عشان أنا واثقه ان ربنا هيعرفني بعد كده

بجد أنا عايزه أقول شكرا لربنا

ربنا لك الحمد كما ينبغي لجلال وجهك وعظيم سلطانك

ربنا لك الحمد حمدا كثيرا طيبا مباركا فيه

ربنا لك الحمد ملء السموات وملء الأرض وملء مابينهما وملء ماشئت من شئ بعد

------------------------

طبعا حملة الدعاء لمنة أختي لسه مستمره

اوعوا تبطلو دعاء

وياريت ترفعو البنارات دي علي مدوناتكم

البانر ده من تصميم أحمد فؤاد مع نفسى

وبانر البوست اللي فات من تصميم أحمد مبرمج حر

pray 4 mony

أختي منة في ثالثة ثانوي أزهري
عندها 20 ماده
بتوع الثانويه العامه يحمدوا ربنا ويبوسوا ايدهم وش وظهر ويعرفوا النعمه اللي هما فيها
هتمتحن كل يوم من 2/6 : 24/6
هتقولوا وايه المطلوب؟
المطلوب من حضراتكم انكم تدعولها عشان ربنا يوفقها كده ويسهلها, ويبقي كتر خيركم لو نزلتوا بوستات تضامن عندكم في مدوناتكم تقولوا فيها ادعوا لمنة وتبعتوا تقولو لبعض
.البنت مش هتدخل ثانويه كل سنه
عايزين نشوف دعواتكم بقي

----------------------------

في خبر كده ياجماعه لازم أقولكم عليه

خطيبة حسام, اللي كتب كتابه عليها

جالها وعكة صحية وحسام مش هينضم للمنتخب عشان هيقعد جنبها

أنا ماليش دعوه ياجماعه

أنا سامحته وشهدتكم علي ده

يبقي انا ذنبي ايه بقي

والله بريــــــئه

كتب كتاب حسام يوم الخميس

أول مره شفته فيها علي الحقيقه كنت في ثانوي

كان هو بالنسبه ليا عادي, شفته وهو نازل من الباص وماعرفش ايه اللي حصل

حاجه كده حصلت من أول نظره

ولقيتني بقوله حسام

حسام: نعم

أنا عايزاك تمضيلي

حسام : حاضر

ولقيته جه وقف جنبي, أنا طبعا اتلبخت وحتي ماعرفتش أطلع القلم من الشنطه واخدت قلم منة ومضيته وفضلت أتلكم معاه شويه وقولتله انه كان بيلعب في ماتش فرنسا كويس بس عشان مكنش بيلعب في مركزه

طبعا مش ممكن تتخيلو سعادته بالكلمتين دول خصوصا اننا اتغلبنا الماتش ده 5 لأن حسام كان واقف دفاع, فأكيد أنا الوحيده في العالم اللي قولتله كده

طبعا ضحك وقالي ربنا يخليكي ليا

واتكلمنا شويه وبعد كده دخل الفندق , واكتشفت ان العيبه كلهم دخلو خلاص, منة أختي كانت مضت لاعيبة الزمالك كلهم وأنا واقفه معاه بس

السنه اللي بعدها كان المنتخب هنا بردو في بورسعيد بس المره دي كلمته في التليفون

علي تليفون الفندق, وكان لسه محترف في فينورد ومكنش بيلعب أساسي, قلتله مبروك علي الاحتراف وان شاء الله هتلعب أساسي, وقالي أه ياسراء ربنا يخليكي ادعيلي
طبعا مش محتاجين اني أقولكم انه بعد الدعوه دي لعب أساسي

بس ياجماعه, وفضلت أحبه, وفجأه عرفت انه خطب, ويومها كنت عارفه ان الموضوع مش هيكمل, أصلكم مش ممكن تتخيلو بركاتي

مفيش حد مارضاش عنه وجوزاته تكمل, عندي لعنه كده غريبه بتنزل علي الناس, ده لو كنت بسخر جن مكنش ده حصل, يعني مثلا توم ونيكول اطلقو عشان انا مش عاجبني نيكول, عادي جدا, وماتجوزش كيتي غير لما أنا رضيت عنها, رونالدو ياعيني عليه مش بتنجحلو جوازه, عادي جدا بردو

فاكرين لما بيكهام كان هيطلق فيكتوريا؟ أصلي مش بحبها, بس العيال صعبو عليا عشان أنا بحبهم فشيلتها من دماغي وربنا ستر

فكان طبيعي اني أعرف انه ساب خطيبته بعد كده

طب فين المشكله بقي

المشكله انه خطب تاني, هتقولولي ودي فيها ايه؟ زي ماساب الأولي يسيب التانيه

الصراحه أيام ماعرفت انه خطب تاني كنت مشغوله في موضوع كده فمعرفتش أركز معاه, وقلت هو يعني هيطير لما أفضاله أبقي أفركشها

لكني عرفت ان هيكتب كتابه يوم الخميس, وهو كان مبسوط وهو بيتكلم, فصعب عليا, طب أنا مش عارفه أسيبه يتجوز وأسامحه بقي وأشيل لعنتي من عليه, ماهو عيب يعني كل مايخطب واحده يسيبها الناس يقولو عليه ايه يعني, وبعدين هو كمان قاعد في انجلترا لوحده فصعبان عليا بزياده

وعشان كده انا قررت اني أسامحه وأسيبه ربنا يسهله ويتجوز ياجماعه, خلاص ياحسام ربنا يوفقك, أنا مسمحاك

3 تاجات

أنا كان عليا تاجات مكنتش حليتها

قلت عيب بقي لازم أحلها دول قربو يحمضوا, وبعدين الناس يقولو عليا ايه

وأعتقد ان دول كلهم لو حد دبسني في حاجه وانا نسيتها ياريت يقول ياجماعه

------------------------------------

الأول من متعهد التاجات أحمد مبرمج حر

تكلم عن هواية لما بتمارسها بتستغرق فيها تماماً وتنفصل عن عالم الواقع لفترة من الوقت أثناء ممارستها؟

أيام زمان كانت الكتابه, أصل أنا كنت بألف قصص وكده, بس مش عارفه ايه اللي حصل, والله أنا ناويه أرجع اكتب تاني, بس مش عارفه النيه دي هتبقي عمل امتي؟

دلوقتي ممكن القرأه , والنت والكلام في التليفون

-------------------------

التاج التاني من yuri

section 1:
last beverage?:
شاي

2- last phone call ?
some one

3-last instant message ?:

the same one

4- last cd played ?
جنات وأمال ماهر, يوم ماسرقت العربيه, بنت خالتي شغلته

5-last time u cried

النهارده

section 2 hv u ever
1-date some one twice?

كل أصحابي

2- been cheated on ?

لأ

3-kissed some one ®retted it ?

لأ, أنا ببوس صحباتي كلهم بس مش بندم بعد كده

:4-lost some one special?

اها

5- been depressd ?
النهارده

6- been drunk & thruw up ?

لأ الحمدلله

section 3

list 3 favourit coulers
الأحمر, والأسود والوردي

section 4

this month hv u:
1-made anew friend ?

اها, الحمدلله

2-fallen out of love ?

لأ

3-laughed untill u cried?

لأ

4-met some one who changed ur life?

لأ

5-found out who ur true friends were?

ماهم معايا علي طول

6- is there some thing u want to tell some one?

اها

7-u kissed any one on ur top friends:?

كلهم طبعا

8- how many ppl in ur top friends do u know in ur real life?

كلهم

9- how many kids do u want to hv?

مش عارفه, اللي يجيبو ربنا كويس

10-do u wanna change ur name?

لأ طبعا, ده انا بحبه جدا

11-wt did u do 4 ur last birth day?

اصحابي كلموني, وعملولي حفله في البيت, وأحمد مبرمج حر( كل سنة وانتى طيبة يا اسراء) ومودي (فقرة التهانى..هىء هىء) عملولي بوستات في مدوناتهم, وكانو صحباتي عملولي حفله قبله باسبوع

12-wt time u wake up to day?

1.15 pm

13- wt were u doing at last mid night?

بتكلم في التليفون

14-name some thing u cant wait 4 ?

أخلص دراسه وأفتح محل هدايا

15-last time u saw ur father?

لما كان معايا النهارده في العربيه, قاعد جنبي وانا بسوق عشان يتأكد اني بعرف أسوق كويس, وانا خلصت وطلعت وهو راح يعمل مشاوير.

16-wt is one thing wish u change about ur life ?

أقرب من ربنا أكتر

17- wt r u listening now?

أفكاري

18- hv u ever talk to some one behind their back?

للأسف اها, بس بحاول أبطل الموضوع ده علي أد ماقدر, وربنا معايا

19- wts the last piece of cloth u borrowed 4om some one ?

ايشارب من أفنان وانا نازله

20-who getting in ur mind right now ?

هخلص التاج ده امتي

21-most visited web page ?

مدونتي, وصفحة الرسايل بتاعتي, ومدونات أصحابي, وموقع عمرو خالد

22-hv u been kissed 4om any one last weak ?

اها واحده صاحبتي

-----------------------------------------------
التاج الثالث من محمد عادل مصر هى أمى و شادي فايد

أحب شخص لقلبك فى الدنيا؟
ربنا , والرسول, وأمي, وبابا واخواتي, وعيلتي وأصحابي

انسان مستعد تضحي بحياتك – ركز فى كلمة حياتك - عشانه؟

نفسي أضحي بيها عشان خاطر فلسطين, نفسي أستشهد هناك أوي بجد

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

كل جندي يهودي في فلسطين, أو أمريكي في أرض العراق

ما هو:اسم أجمل كتاب كتبه بشر قرأته ومحتفظ به حتى الان؟
انت متعلق بيه وبتقرأه كل فترة؟
لا تحزن لدكتور عائض القرني

اهم جهاز منزلى انت متعلق بيه او بتستخدمه كتير؟

الكمبيوتر

شىء تحس بالراحة النفسية عندما تنظر اليه؟

طفل بيضحك

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

بيتنا

اجمل مدينة زرتها داخل مصر؟

الصراحه مفيش أحلي من بورسعيد

أجمل مكان طبيعي رأيته داخل مصر؟

منظر البحر الأحمر, بحبه أوي, وبحب أفضل بصاله

شخصية كارتونية بتحبها؟

لوسي

كانت بتيجي وانا في المدرسة

وكنت بحبها جدا لدرجة اني كنت بصحي في الأجازه بدري عشان أتفرج عليها وكنت بحب أغنيتها جداااااا

لسه الدنيا بخير , مهما نشوف من الغير

نوع هاتفك المحمول؟

سام سونج

سرعة بروسيسور جهازك؟

مش عارفه هبقي أسأل أحمد

حجم ذاكرة –هارد- جهازك؟

هسأل أحمد بردو

المساحة التى تشغلها المواد الاسلامية على جهازك؟

مش عارفه بس احنا عندنا برامج اسلاميه كتير

نفس المساحة السالف ذكرها فى قلبك-الاجابة لنفسك عشان الرياء يا اخواننا-؟

أتمني انها تكون كل قلبي

أهم هدف انت واضعه لحياتك دلوئتى؟

في مقوله بتقول ان كل الناس بتموت لكن مش كل الناس بتعيش

أتمني اني أكون من الناس اللي بتعيش

مواصفات فتاة –أو فتى للبنات- الأحلام بالنسبة لك؟
يكون طيب, وحنين, وبيحبني, ويكون فارس, مش شايل سيف وراكب حصان يعني, لأ يكون عنده أخلاق الفرسان

صف ما يأتى:

شعورك لما بتسمع كلمة مصر؟

انتماء ليها وبحبها جدا بس مش عارفه رايحه فين

شعورك لما بتسمع كلام عن اليهود؟

حسب الكلام لما بيكون عن الأرض بستغرب جدا, ازاي هم متمسكين بيها أوي

كده رغم انهم علي باطل, واحنا بايعنها اوي كده رغم اننا علي حق

شعورك لما بتشوف ظابط شرطة؟

انا عارفه ان في منهم كويسين, بس معرفش ليه بفتكر حوادث التعذيب

شعورك لما بتشوف الكناس العجوز فى الطريق؟

بيصعب عليا أوي

لون البطانية اللى بتتغطى بيها فى الشتاء؟

دلوقتي لونها بني, بس كانت الأولي حمرا وكنت حبها جدااااااا

لون الجورب-الشراب- المفضل لديك؟

أي حاجه الصراحه , بس يبقي عليه رسومات حلوه

احساسك اذا داست قدمك فى الطريق على مخلفات اخراج حيوان- *** ولا مؤاخذة-؟

باخد بالي اني مش أدوس عليها عشان فعلا بقرف

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

انه ياريت يبقي من جوه زي بره

احساس يراودك فى اشارة مرور مغلقة بسبب مسئول كبير؟
الصراحه مش ببقي عارفه هم عاملين كده ليه

اللي مكتوبله يموت بطريقه هيموت بيها حتي لو جوه برج حصين , مالسادات اهو اتقتل في وسط رجالته وعرضه العسكري, بس تقول لمين؟

------------------------------------

كده الحمدلله خلصت التاجات كلها

الحكمه الشهيره بتقول ايه؟

اللي اتدبس يدبس

بس ادعولي ربنا يخليكيو وماتدعوش عليا انا امتحناتي هتبدأ الاسبوع الجاي

أحمد مبرمج حر

شريف فبركة

شادي فايد

محمود شاب فقري
محمد عادل مصر هى أمى
فيمتو فى زمن المعجزات اصبح للمجانين مدونات

يوسف يوسيفيهات

أماني لمحات أماني

أحمد فؤاد مع نفسى

أشرف أخف دم

شاب شنكوتي

ممكن تسامحه؟

أنا : عايزه أسألك سؤال.

هي ضاحكه: طب ماتسألي , من امتي وانت بستأذني قبل ماتسألي عن أي حاجه عايزه تعرفيها يعني؟

أنا: سامحتيه؟

هي مندهشه: سامحته؟

أنا : أها سامحتيه؟

هي: ليه انت عايزاني أسامحه؟

أنا : أها

هي: طب عايزاني أسامحه علي ايه؟

علي خيانته ليا؟ ولا علي غدره بيا؟

يمكن عايزاني أسامحه علي كذبه عليا

أسامحه علي انه باعني, ولا انه سابني؟

علي جرحه ليا ولا علي انه كسر قلبي.

طب يمكن أسامحه علي الأيام اللي أنا شفتها؟

ولا تقصدي علي العذاب اللي اتعذبته؟

ولا علي انه خلاني انسانه تعرف ماتسامحش, وانا اللي عمري ماحد عمل فيا حاجه وحشه الا وسامحته.

طب أسامح ازاي وهو حتي ماقلش انه أسف, ولا قالي سامحيني؟

طب هو لو كان في مكاني وانا عملت فيه ربع اللي عمله هو فيا كان هيسامحني؟

طب انت بتطلبي مني اني أسامحه ازاي؟

ده انت الوحيده اللي عارفه كل حاجه حصلت.

طب أسامحه ازاي وعلي ايه؟

كان نفسي أرد عليها وأقولها حاجات كتير, كان نفسي أقولها بردو سامحيه, أها هو صحيح مكنش هيسامحها, بس كون الناس وحشين ده مش مبرر لينا عشان نكون وحشين احنا كمان.

كان نفسي أقولها فوايد اللي يسامح, واننا لازم نسامح عشان ربنا يسامحنا.

بس مقدرتش أقول أي حاجه من دي, أصلي هقولها ايه؟ وفعلا انا الوحيده اللي عارفه كل حاجه.

هي ماقلتش لبقيت صاحبتنا الحقيقه, جميلتها عشان تحسن من صورته في عيونهم, مقدرتش تتخيل ان حد يقول عليه خاين, وأنا فهمت ده, وعشان كده أنا كمان مقلتش.

كلهم مش فاهمين ليه هي مش مسامحاه, ومش قادرين يصدقو انها ممكن ماتسامحش حد, كتير واحنا معاهم بيكون نفسي أقولهم أصلكم مش فاهمين حاجه, بس ماينفعش اني أتكلم, ماينفعش انها تحافظ علي صورته وانا أشوهها, ولازم اني أحترم رغبتها.

كتير مكنتش بفهم هي مش مسامحاه عشان فعلا اللي عملو, ولا عشانه حتي ماطلبش منها انها تسامحه.

أتمني ان يجي يوم تقولي فيه أنا سامحته.

تفتكروا هتقدر؟

وما الحب الا للحبيب الأول

بصراحه ياجماعه انا افتكرته نساني خلاص, وان خطيبته قدرت تخليه ينسي إسراء

لكنه أثبتلي ان أنا كمان مابتنسيش

هو صحيح انا اللي فركشت الموضوع, بس مش عشان فرق السن والله, انتو عارفين هو قلبه شباب جدا, عمري ماحسيت معاه بفرق السن, لكن باباه هو اللي كان السبب.

عارفه ان مش مفروض أخده بذنب باباه, بس أعمل ايه بقي

رغم اننا سيبنا بعض من أيام ثانوي, لأن سياسة باباه اتجاه فلسطين أياميها مكنتش عاجباني, (شوفوا دلوقتي بقي) ورغم انه قالي طب أنا ذنبي ايه, لكني قلتله انت ابنه ماينفعش

الحقيقه ان الراجل كان بيسأل عني علي طول, وكان أول واحد بيقولي كل سنة وانت طيبه في عيد ميلادي

وعرفت انه خطب, والبنات الوحشين شمتوا فيا , وقالولي انه خلاص نساني, خصوصا انه ماحولش يتصل بيا من ساعتها

وفضلت أفكر يعني مش هيحتفل بعيد ميلادي السنه دي

ورد عليا بالمفجأه انه هيحتفل بعيد ميلادي السنه دي وكل سنه, وان أنا وباباه اهم اتنين في حياته

جيمي هيكتب كتابه النهارده في عيد ميلادي عشان يخلده, والجواز يوم عيد ميلاد الراس الكبيره

قال نساني قال

ياجماعه مش قادر يعمل ايه بس

عرفت بقي يابن ناصر اني مش ممكن أغير من ديجه

الحب للحبيب الأول يابني

The sweetest love

The sweetest love is the one who come when you think that you`ll never love again

مابتتنسيش

هو : عملت كل حاجه عشان أنساها, سيبتها, بعدت عنها, خطبت غيرها عشان أقدر أنساها , جرحتها,حاولت أعمل كل حاجه عشان أبعدها عني, ولما مانسيتهاش قلت عشان هي مش راضيه تبعد , لكن لما استسلمت وبعدت, قلت ان الموضوع موضوع وقت وهنساها, لكن رغم مرور الوقت مقدرتش أنساها ومش عارف أعمل ايه أكتر من كده عشان انساها.

هي: هو صحيح عمل كل حاجه عشان ينساني, لكنه نسي أهم حاجه ان أنا مابتنسيش.

إرادة ربنا

في قصة انا بحبها أوي, انتو ممكن تكونو تعرفوها , لكني بردو هحكيهالكم.

الحكاية دي حصلت في عهد المأمون بن هارون الرشيد.

كان في رجل دايما بيتكلم عن المأمون وحش, وعشان كده المأمون سجنه, لكنه عرف ان الرجل ده وهو في السجن لسه بيغلط فيه.

فقرر انه يقتله, وفعلا بعت رساله للقائم علي السجن وقاله يصلب

فوجئ المأمون ان القائم علي السجن أفرج عن الرجل ده, وطبعا المأمون اضايق جدا وبعتله وسأله انه ازاي يعصي أوامره ويفرج عنه؟

القائم علي السجن قاله انت بعتلي رساله مكتوب فيها يطلق.

طبعا المأمون قال ان ده محصلش.

فالقائم علي السجن وراه الورقه عشان يفاجئ المأمون ان فعلا مكتوب فيها يطلق.

المأمون أمره انه يروح ويقبض عليه, وأرسله رساله تانيه وكتب فيها يصلب.

فوجئ المأمون ان القائم علي السجن أفرج عن الرجل للمره التانيه, طبعا غضبه زاد وبعت جابه وسأله, وكان رده نفس الرد الأول ووراه الورقه اللي مكتوب فيها يطلق.

أمره المأمون انه يمشي ويروح يقبض عليه, وكتبله رساله وقال فيها والله ليصلبن.

وفوجئ المأمون ان القائم علي السجن أفرج عنه للمره الثالثه.

طبعا انتوا متخيلين غضب المأمون ممكن يكون عامل ازاي, وبعتله تاني.

المأمون كان غضبان جدا وقاله انت ازاي تعصاني؟

القائم علي السجن قاله أنا نفذت أوامرك يأمير المؤمنين.

المأمون قال , لكني أمرتك انك تصلبه وأرسلتلك رساله مكتوب فيها والله ليصلبن.

القائم علي السجن قال الرساله مكتوب فيها والله ليطلقن ياأمير المؤمنين.

المأمون أخد منه الورقه وبصلها وضحك وقال:

من أراد الله أن يطلقه ماكان للمأمون أن يصلبه.

كلنا بنمر بمواقف كتير وبنعتقد انها حصلت بسبب ذكأنا أو تخطيطنا ليها, وبننسي انها رغم ده حصلت عشان ربنا هو اللي رايد كده.

وكتير بنخطط لحاجات , وبنخطط كويس جدا كمان, ومش بنعرف محصلتش ليه؟

وده عشان مش بناخد بالنا ان ربنا مش رايدها تحصل.

أنا بحب القصه دي جدا بجد, لأني بشوف انها تجسيد رائع لارادة ربنا.

تاج تاني .......... أه ياني

أولا: أنا عايزه أوضح حاجه وهي اني لما قلت عايزينك ترحل وتغور أنا مقصدتش بيها اني أشتم الريس, لأني ضد اسلوب الشتيمه حتي لو لناس احنا معارضنهم, يعني كون الناس وحشين مش مبرر عشان احنا كمان نكون وحشين.

لكن كلمة تغور أنا قصدتها بمعناها وهي الذهاب في الأرض والاختفاء, وهي ذكرت في القران الكريم بلفظ (غورا) في قصة صاحب الجنة الذي أتاه الله المال والأولاد وكان بيحاور صاحبه.

-------------------------------

أحمد مبرمج حر مررلي تاج بقاله فتره, ويجي القدر ان أحمد فؤاد مع نفسى يستجيب أخيرا ويرجع عالم التدوين عشان يدبسني في نفس التاج وتاج تاني كمان, علي العموم هعديهالك المره دي ياحمد عشان انت لسه راجع.

التاج الأول اللي مراروهولي هم الاتنين

هل كنت طالب شاطر فى المدرسة ؟

الحمدلله أه

ايه كانت احب مادة و اكره مادة ليك فى المدرسة والكليه ؟

كنت بحب الرياضه جدا وأنا في المدرسه, وكنت مؤمنه ان مفيش حاجه اسمها ان مسأله درست طريقة حلها ممكن ماتتحلش, أي مسألة تتحط قدامي لازم أحلها, وخصوصا المسائل الصعبه, بحبها جدا عشانها بتحتاج تشغيل مخ, وبيبان فيها الذكاء, ولنفس السبب حبيت الفيزياء جدا وأنا في ثالثه ثانوي.

ومكنتش بحب النحو والصرف أبدا ومحدش يقولي انت عربيه ازاي؟ ومش بحب الجغرفيا وعشان كده دخلت علمي وأنا ضميري مستريح.

في الكليه كنت بحب الفسيولوجي , والفيزياء, والرياضه طبعا, ومكنتش بحب الأورجانك رغم اني كنت بحبها في ثانوي, انما معرفش ليه كل اللي دخلو كليات علوم عندهم عقده من الكيمياء العضويه.

وكليتي حاليا, طبعا مش بحب النحو والصرف, وفي ماده اسمها قضايا معاصره أعتقد اني هحبها لأنها بتتكلم عن الاستنساخ والهندسه الجينية والحاجات دي أنا بحبها.

كنت عايز تطلع ايه وأنت صغير ؟

مش عايزين ضحك ماشي

كان نفسي جدا أطلع آلانه

أنا مش عارفه انت فاكرينها ولا لأ, بس هي كانت بتيجي في مسلسل أجنبي كده وأنا صغيره, هي غالبا كانت جايه من المستقبل, وكانت بتحارب راجل كده شرير, فانا كان نفسي اني أحارب الراجل ده جدا, وان يكون معايا المعدات اللي معاها عشان أحارب بيها كل الأشرار.

طبعا عمروكو مهتلاقو حد كان نفسه يطلع كده.

كده خلص التاج الأول الحمدلله نيجي بقي للتاج التاني بتاع أحمد فؤاد.

هل تسعد عندما يمرر لك أحدهم تاجا؟

الصراحه أنا بسعد لما التاج يمرر للناس مش ليا, وأحب أوي اني أدخل عندهم عشان أعرف كتوا ايه.

لكني مش بحبه يتمررلي وبحاول أهرب منه, بس دلوقتي بقيت بخاف لموت وأنا عليا تاج, أو بعد فتوة شيخ الأزهر الأخيره ممكن أكون كتمت الشهاده لو محلتهوش وكده يبقي أثم قلبي.

هل مقدار سعادتك أو شعورك أيا كان - عند تمرير التاج لك يختلف حسب المدون الذي يمرر لك التاج؟

الصراحه بتبسط برضو لما يتممرلي عشان بحس ان في ناس عايزه تعرف عني حاجات, وانهم عايزين يعرفوني أكتر, وبتبسط جدا لما يتمررلي من حد مش متوقعاه, لكن برجع أفتكر اني لازم أحله وأقعد أعيط.

هل تستمتع عند إجابتك عن أسئلة التاج؟

حسب السؤال, الأسئله اللي بتخليني أفكر أو أرجع لورا دي بحبها أوي.

هل ترى للتاج أهمية حقيقية ؟

أكيد طبعا, لأنه بيعرفنا علي بعض من جوه أكتر, وبيقربنا من بعض.

هل فكرت في عمل تاج خاص لك من قبل؟

الصراحه لأ, بس دلوقتي ممكن أفكر , عشان أدبس فيه الناس اللي بتدبسني.

هل تفضل قراءة أجوبة التاج عند المدونين الآخرين ؟ أم لا تهتم سوى بالتدوينات الأخرى فقط؟

ازاي بس, ده أنا بحب أقرأها جداااااااااااااااااااااا, لأني فعلا بكون عايزه أعرفهم أكتر.

عندما ترد على التاج ما الذي تراعيه أكثر؟

حسب الحاجه اللي التاج بيتكلم عنها, بس أنا بكون صريحه وحقيقي أنا مهربتش من سؤال أسوأ مدون في التاج اللي فات, لأني فعلا مش بدخل علي مدونات وحشه الحمدلله.

إلى من تحرص على تمرير التاج؟

لأصحابي الحلوين.

وللناس اللي أنا عايزه أعرفهم أكتر.

هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟

انا مش لسه من شويه قايله اني طبعا بحب أقرأها, وطبعا اجابتهم للتاج هي اللي بتعرفني هم مين, ده طبعا بجانب كتاباتهم.

هل تلتزم حرفيا بأسئلة التاج ؟

أها

ما هي نوعية التاجات التي تفضلها ؟

حتي التاجات كمان هيبقي فيها أفضليه, يعني أي حاجه تبن اللي جوه الناس أكتر.

الحمدلله التاج التاني خلص, وكده يبقي أنا لسه في ذمتي تاج بتاع يوري وأوعدك اني هجاوب عليه ان شاء الله.

الحكمه الشهيره بتقول ايه؟

برافو عليكم

اللي اتدبس يدبس, وعشان كده جه بقي الدور علي الناس اللي هندبسهم.

مودي عالم سي مودي

أماني لمحات أماني

محمود شاب فقري

محمد عادل مصر هى أمى

فيمتو فى زمن المعجزات اصبح للمجانين مدونات

عادل كراكيب عادل

ابن ناصر ابن ناصر Ibn Nasser

فارس لماذا نرحل

يوسف يوسيفيهات

العريس عايز أتجوز

أحمد مبرمج حر

يوري yuri

مش عايزين تعديل دستور

أنا الحمد لله روحت عشان أصوت, وأقول لأ.

طبعا واحنا داخلين من باب المدرسه انا وتسنيم وأحمد اللي كان جاي يوصلنا, قالولنا ان حروفنا أنا وتسنيم مش هنا.

انا وتسنيم قولنالهم اننا بننتخب هنا علي طول, فدخلونا.

المهم كان في امين شرطه ربنا يكرمه, طلعلي اسمي من الكشف, ودخلت لجنتي, وقلتلهم ان اسمي موجود في الكشف بره, فدور علي اسمي ومضيت قدامه واداني قسيمة الاستفتاء ودخلت وراء الستاره وقلت لأ, وطبقت الورقه وحطيتها في الصندوق وعكيت ايدي حبر, وكان عمو مش ماضيلي في البطاقه قصاد التاريخ فخليته يمضي وخرجت.

كان أحمد واقف يستناني بره وقالي ان تسنيم دخلت لجنتها وبتصوت.

وخرجت تسنيم وهي بتقول أنا صوتي اتزور, , قلنالها ازاي؟ قالت اسمي ممضي جنبه

قلتلها احنا مش عندنا مدونات , يالا يالا.

روحنا واحنا في العربيه حكتلي انهم من الأول فضلو يقولولها ان اسمها مش هنا, وانها في مدرسه تانيه, وانهم فصلو اللجان, ومعندهومش حد هنا اسمه تسنيم , وكانو هيموتو ويمشوها, وانها فعلا كانت هتدور عليه في حته تانيه لولا ان أمين الشرطه ربنا يكرمه اللي جابلي اسمي جابلها اسمها, ودخلت قالتلهم ان اسمها موجود في الكشوف بره, فضطرو انهم يطلعولها.

وفعلا لقتهم مضين قدام اسمها, فقالتلهم عشان كده بقي اسمي مش موجود, قالولها لأ, يمكن اللي فوقك مضت مكانك غلط.

ردت أختي عليهم, واللي فوقي كتبت اسمي مكان اسمها كمان غلط؟

فقلها ماحنا هنديكي قسيمة استفتاء , فقالتله مانا طبعا هاخد, مستعجلين علي ايه, طب قفلوها لما تيجي الساعه 7 , مش من دلولقتي.

وطبعا مارضيوش ان أحمد أخويا يصوت ببطاقته الشخصيه وقالولوه انه لازم البطاقه الانتخابيه.

أحمد لما رجعنا كلم أصحابه عشان ينزل يجيب بطاقته من القسم, ماصوت أخته اتزور, مش هيسيب صوته هو كمان بقي, ده شاف بعينه.

أنا نزلت بعد كده كورس السواقه عقبالكم وقابلت أحمد في الشارع وسألته عمل ايه؟

قالي انه راح لقي اللجنه اتقفلت بس صاحبه صوت.

قلتله اتقفلت ايه الساعه لسه 6 وثلث.

قالي هي اتقفلت مش قفلت, قفلوا الصناديق والكشوفات خلاص.

عمو العادلي وعدنا بحياد أمني , طبعا كلكم شفتوه سواء في المظاهرات أو الاعتصامات أو حتي في التصويت اللي

كان نزيه طبعا زي مانتو شفته مع أختي وأخويا

حسبنا الله ونعم الوكيل بجد.

أمال لما يشيلو ااشراف القضلئي هيعملو ايه؟؟؟

وبعدين هو ليه مش فاهم اننا مش عايزين الدستور يتغير؟

احنا عايزينه هو اللي يمشي.

مش عايزين تعديل دستور, عايزينك ترحل وتغور