The Lost Princess

شهادة المشير طنطاوي في محاكمة مبارك

2011-09-25T17:01:00.003+02:00

س١ : حصل اجتماع يوم 22 يناير، هل ورد إلي رئيس الجمهورية السابق ما دار في هذا الاجتماع وما أسفر عنه وما كان مردوده ؟

ج1 : الاجتماع كان برئاسة رئيس الوزراء واعتقد أننه بلغ

س2 : بداية من أحداث 25 يناير وحتي 11 فبراير هل تم اجتماع بينك وبين الرئيس السابق حسني مبارك ؟

ج2 : ليست اجتماعات مباشرة ولكن يوم 28 يناير لما أخذنا الأمر من السيد رئيس الجمهورية كان هناك اتصالات بيني وبين السيد الرئيس ؟

س3: ما الذي أبداه رئيس الجمهورية في هذه اللقاءءات ؟

ج3: اللقاءات بيننا كانت تتم لمعرفة موقف القوات المسلحة خاصة يوم 28 وعندما كلفت القوات المسلحة للنزول للبلد ومساعدة الشرطة لتنفيذ مهامها يتبع

ج٣-2: كان هناك تخطيط مسبق للقوات المسلحة وهذا التخطيط يهدف لنزول القوات المسلحة مع الشرطة وهذه الخطة تتدرب عليها القوات المسلحة يتبع

ج٣-3: القوات المسلحة بتنزل لما الشرطة بتكون محتاجة المساعدة وعدم قدرتها علي تنفيذ مهامها وأعطي الرئيس الأمر لقائد القوات المسلحة – يتبع

ج٣-4 : أعطي الرئيس الأمر لقائد القوات المسلحة اللي هي نزول القوات المسلحة لتأمين المنشآت الحيوية وهذا ما حدث

س4 : هل وجه رئيس الجمهورية السابق المتهم محمد حسني مبارك أوامر إلي وزير الداخلية حبيب العادلي باستعمال قوات الشرطة القوة ضد المتظاهرين؟ يتبع

س٤-2: استعمال قوات الشرطة القوة ضد المتزاهرين بما فيها استخدام الاسلحة الخرطوش والنارية من 25 يناير حتي 28 يناير ؟

ج4 : ليس لدي معلومات عن هذا واعتقد ان هذا لم يحدث

س5 : هل ترك رئيس الجمهورية السابق للمتهمين المذكورين من أساليب لمواجهة الموقف ؟

ج5 : ليس لدي معلومات

س6: هل ورد أو وصل إلي علم سيادتك معلومات أو تقارير عن كيفية معاملة رجال الشرطة ؟

ج6 : هذا ما يخص الشرطة وتدريبها ولكني أعلم ان فض المظاهرات بدون استخدام النيران

س7 : هل رصدت الجهات المعنية بالقوات المسلحة وجود قناصة استعانت بها قوات الشرطة في الأحداث التي جرت؟

ج7 : ليس لدي معلومات

س8 : تبين من التحقيقات إصابة ووفاة العديد من المتظاهرين بطلقات خرطوش أحدثت إصابات ووفيات..هل وصل ذلك الأمر لعلم سيادتك وبم تفسر ؟

ج8: إنا معنديش معلومات بكده.. الاحتمالات كتير لكن مفيش معلومة عندي

س9 : هل تعد قوات الشرطة بمفردها هي المسئولة دون غيرها عن إحداث إصابات ووفيات بعض المتظاهرين ؟

ج9 : إنا معرفش ايه اللي حصل

س10 : هل تستطيع سيادتك تحديد هل كانت هناك عناصر أخري تدخلت ؟

ج10 : هيا معلومات غير مؤكدة بس اعتقد ان هناك عناصر تدخلت

س11 : وما هي تلك العناصر ؟

ج11 : ممكن تكون عناصر خارجة عن القانون

س12 : هل ورد لمعلومات سيادتك ان هناك عناصر اجنبية قد تدخلت ؟

ج12 : ليس لدي معلومات مؤكدة ولكن ده احتمال موجود
س13 : وعلي وجه العموم هل يتدخل الرئيس وفقا لسلطته في ان يحافظ علي أمن وسلامة الوطن في إصدار أوامر أو تكليفات في كيفية التعامل ؟
ج13 : رئيس الجمهورية ممكن يكون أصدر أوامر - طبعا من حقه ولكن كل شئ له تقييده المسبق وكل واحد عارف مهامه
س14 : ولمن يصدر رئيس الجمهورية علي وجه العموم هذه الأوامر ؟
ج 14 : التكليفات معروف مين ينفذها ولكن من الممكن ان رئيس الجمهورية يعطي تكليفات مفيش شك
س15 : وهل يجب قطعا علي من تلقي أمر تنفيذه مهما كانت العواقب ؟
ج15 : طبعا يتم النقاش والمنفذ يتناقش مع رئيس الجمهورية وإذا كانت الأوامر مصيرية لازم يناقشه
س16: هل يعد رئيس الجمهورية السابق المتهم محمد حسني مبارك مسئول مسئولية مباشرة أو منفردة مع من نفذ أمر التعامل مع ألمتظاهرين الصادر منه شخصيا
ج16 : إذا كان أصدر هذا الأمر وهو التعامل باستخدام النيران أنا اعتقد ان المسئولية تكون مشتركة وأنا معرفش ان كان أعطي هذا الأمر أم لا
س17: وهل تعلم ان رئيس الجمهورية السابق كان علي علم من مصادره بقتل المتظاهرين ؟
ج17: يسأل في ذلك مساعديه الذين ابلغوه هل هو علي علم أم لا
س18: وهل تعلم سيادتكم ان رئيس الجمهورية السابق قد تدخل بأي صورة كانت لوقف نزيف المصابين ؟
ج18 : اعتقد انه تدخل وأعطي قرار بالتحقيق فيما حدث وعملية القتل وطلب تقرير وهذه معلومات
س19: هل تستطيع علي سبيل القطع والجزم واليقين تحديد مدي مسئولية رئيس الجمهورية السابق عن التداعيات التي أدت إلي إصابة وقتل المتظاهرين ؟
ج19 : هذه مسئولية جهات التحقيق
س20: هل يحق وفقا لخبرة سيادتكم ان يتخذ وزير الداخلية وعلي وجه العموم ما يراه هو منفردا من اجراءات ووسائل وخطط لمواجهة التظاهرات دون العرض علي رئيس الجمهورية؟

ج20: اتخاذ الاجراءات تكون مخططة ومعروف لدي الكل في وزارة الداخلية ولكن في جميع الحالات يعطيه خبر بما يخص المظاهرات ولكن التظاهر وفضه ولكن التظاهر وفضه هي خطة وتدريب موجود في وزارة الداخلية
س21 : وهل اتخذ حبيب العادلي قرار مواجهة التظاهر بما نجم عنه من إصابات ووفيات بمفرده بمساعدة المتهمين الاخرين في الدعوى المنظورة وذلك من منظور ما وصل لعلم سيادتك؟

ج 21 : معنديش علم بذلك
س22 : علي فرض إذا ما وصلك تداعيات التظاهرات يوم 28 يناير إلي استخدام قوات الشرطة آليات مثل اطلاق مقذوفات نارية أو استخدام سيارات لدهس المتظاهرين..هل كان أمر استعمالها يصدر من حبيب العادلى يصدر من حبيب العادلى ومساعديه بمفردهم ؟
ج 22 : ما أقدرش أحدد اللي حصل أيه ولكن ممكن هو اللى اتخذها وأنا ما أعرفش واللى اتخذها مسئول عنها
س23: هل يصدق القول تحديداً وبما لا يدع مجالاً للشك أو الريبة أن رئيس الجمهورية السابق لا يعلم شيئاً أو معلومات أيا كانت عن تعامل الشرطة بمختلف قواتها أو أنه لم يوجه إلى الأول سمة أوامر أو تعليمات بشأن التعامل والغرض أنه هو الموكل إليه شئون مصر والحفاظ على أمنها ؟

ج23 : أنا ما أعرفش اللى حصل أيه لكن أعتقد إن وزير الداخلية بيبلغ وممكن ما يكونش مش عارف بس أنا ما أعرفش
س24 : هل هناك اصابات أو وفيات لضباط الجيش ؟
ج 24 : نعم هناك شهداء
س25 : هل تعاون وزير الداخلية مع القوات المسلحة لتأمين المظاهرات ؟
ج 25 : لأ
س26 : هل أبلغت بفقد ذخائر خاصة بالقوات المسلحة؟
ج26: مفيش حاجة ضاعت لكن هناك بعض الخسائر في المعدات واتصلحت ومفيش مشكلة
س27: هل أبلغت بدخول عناصر من حماس أو حزب الله عبر الأنفاق أو غيرها لإحداث إضرابات ؟
ج27 : هذا الموضوع لم يحدث أثناء المظاهرات واحنا بنقاوم الموضوع ده واللي بنكتشفه بندمره وإذا كان فيه حد محول لمحكمة فهذا ليس أثناء المظاهرات
س28: هل تم القبض على عناصر أجنبية في ميدان التحرير وتم إحالتهم للنيابة العسكرية ؟
ج28: لا ..لم يتم القاء القبض على أى أحد
س29: فى الاجتماع الذي تم يوم 20 يناير هل تم اتخاذ قرار بقطع الاتصالات؟
ج29 : لم يحدث
س30: بعض اللواءات قالوا طلب منا فض المظاهرات بالقوة..هل طلب من القوات المسلحة التدخل لذلك ؟
ج30: أنا قلت فى كلية الشرطة في تخريج الدفعة إن أنا بأقول للتاريخ إن أي أحد من القوات المسلحة لن يستخدم النيران ضد الشعب
كانت هذه شهادة المشير فى محاكمة الرئيس المخلوع والفضل الأول والأخير في نشرها ليس لي

لمن الملك اليوم

2011-08-03T20:48:00.002+02:00

اللهم لا شماتة

رمضان

2011-08-01T16:21:00.001+02:00

رمضـــــــــــــــــان كــــــــــــــــريـــــــــــــــــــــــم

لا للمحاكمات العسكرية للمدنين

2011-06-01T17:05:00.005+02:00

أنا ضد المحاكمات العسكرية للمدنين

المدني يتحاكم قدام قاضيه الطبيعي ولازم كل المدنين اللي اتحكم عليهم بأحكام عسكرية يتعاد محاكمتهم تاني أمام قضاء مدني

جيشنا من غير حبيبي

2011-05-22T23:00:00.003+02:00

أنا زي كل المصرين طلعت لقيت نفسي بحب الجيش المصري، جيشنا الشريف النضيف واللي عندي استعداد كامل إني أفديه بروحي بدل ماهو يفديني ويفدي الوطن
لما الثورة قامت في تونس وزين الهاربين نزل الشرطة تقتل الشعب زي أي حاكم ديكتاتور ونزل الجيش بعدها ، كان واضح أوي إن الجيش مش واقف على الحياد وإنه أخد جانب الشعب، عمري ماهنسى لما شباب تونس كانوا بيجروا من رصاص الشرطة ودخلوا شارع كان فيه عربية جيش واستنجدوا بظابط الجيش اللي حماهم بالفعل ولما وصل ظابط الشرطة وعساكره وطالبه الثوار رفض وقاله إنه لو حاول ياخدهم هيؤمر عساكره إنهم يضربوا ظابط الشرطة وعساكره بالرصاص فما كان منه إلا إنه إنسحب، يومها انا لما شيرت الخبر ده علقت عليه بإن الجيش النضيف لازم ياخد صف الشعب
لما بدأنا نحضر لنزول الشارع في مصر ، زي ماكنا حاطين في دماغنا إن ممكن اليوم يعدي عادي جدا وماينزلش فيه اكتر من 200 شخص كمان فكرنا إن اليوم ممكن يكبر رغم إننا ماكناش حاطين أمل على ده، بس دايما فكرة نزول الجيش الشارع كانت على بالي، وكنت بتمنى أوي إنه وقت الجد ياخد صفنا زي جيش تونس
لما حصلت أحداث يوم 28 بدأ الشعب في مصر كلها يهتف واحد اتنين الجيش المصري فين بالرغم من عدم التنسيق المسبق أو حتى أي اتصالات وسط قطع خدمة الموبيلات والنت، طيب إيه اللي خلى المصرين وقت الجد يستنجدوا بجيشهم ، ماحدش يعرف غير إن وقت الخطر المصري فكر إن أكيد جيشه هو اللي هينزل يحميه
وفعلا نزل الجيش المصري وكان وقتها ماحدش يعرف الجيش نازل عشان ياخد صف مين، وبالرغم من ده المصرين أخدوا القرار بنفسهم، استقبلوا الجيش بهتافات الجيش والشعب ايد واحدة، حضنوا الظباط، ركبوا فوق الدبابات، وفي كل المواجهات اللي كانت بتحصل بين الشرطة والشعب في الأيام اللي بعد كده كان الشعب بيستنجد بالجيش ضد الشرطة ويتحامى فيه
يمكن دور الجيش يوم 2/2 كان سلبي في القاهرة لكن في بورسعيد الجيش عمل كاردون حوالين المعتصمين المطالبين برحيل مبارك وفرق مظاهرة التأيد اللي طبعا كانت من بلطجية مسلحين
لحد ماتنحي مبارك والمجلس العسكري مسك البلد وبدأت الحقايق تبان، زي إنهم كانوا أخدين أوامر بضرب المظاهرات والمشير وسامي عنان رفضوا ينفذوا وحاجات كتير من النوعية دي ، وأنا بقيت بقول عليه جيشنا حبيبي
جه يوم 9 مارس وإعتصام مجلس الوزراء اللي تم فضه بالقوة، كان ليا أصحاب في الاعتصام عند مجلس الوزراء أو في التحرير، لما كلموني يحكولي اللي بيحصل كنت في حالة صدمة ومش مصدقة إن الجيش هو اللي بيفرقهم بالعنف ده، وجملة إن شاب قعد على الأرض وفتحلهم قميصه وقالهم اقتلوني وجعتلي قلبي أكتر من إستشهاد شهدائنا في الثورة ، بس كنت واثقة إن دي غلطة وإن المجلس العسكري هيعتذرلنا عنها، ويومها قبل ماأنام قلت هيعتذرولنا إعتذار رسمي و مش هنقبل أي حاجة تانية، وأول حاجة عملتها تاني يوم أول ماصحيت هي إني سألت الجيش إعتذر، وفعلا الجيش كان نزل إعتذاره الشهير نعتذر ورصيدنا لديكم يسمح وللحق فالرصيد فعلا كان يسمح وإحنا صالحناه على طووول
إيه اللي حصل من يوم 19 مارس للنهاردة؟ ايه اللي حصل في خلال الشهرين دول يخليني أقول عليه جيشنا بس من غير حبيبي، أكون بطلت أحب الجيش؟ لأ طبعا أنا لسه بحبه وبحبه أوي كمان وده اللي مزعلني منه أوي كده، بس ماينفعش ابدا إن النشطاء والثوار يتقبض عليهم من ميدان التحرير ويتحاكموا محاكمات عسكرية ويتحكم عليهم على إنهم بلطجية، ماينفعش إن الشرطة العسكرية تنزل تفض عتصام كلية إعلام جامعة القاهرة بالعنف ده وتضرب وتكهرب الطلاب، أنا بعد الوقعتين دول كنت بقيت بخاف من الشرطة العسكرية ومش بحب أشوفهم، ولما قابلت واحد فيهم في الشارع واتكلم معايا وطلب مني أغير مكان ركنة العربية بكل ود والابتسامة مافرقتش وشه طول الحوار إستغربت وبقيت ماشية أقول ماهم بيعرفوا يبتسموا أهو ياربي أمال إيه لزوم العنف بقى
بس اللي مش هقدر أنساه ومش عارفة ممكن أسامح فيه ولا لأ وماعرفش المسامحة أصلا حقي ولا لأ هو فض اعتصام سفارة الكيان الصهيوني، مش هقدر أنسى صورة الشاب اللي وقف يقول بأعلى صوته ليه ده كله هو إحنا كنا عملنالكم إيه؟؟
الجيش جاب للثوار الأمن المركزي عشان يضربهم، كل ده عشان الثوار أحرار وطالبوا بتنكيس علم الكيان الصهيوني في ذكرى النكبة، ونكتشف الحقايق بعد كده إن مش الأمن المركزي بس هو اللي ضربهم لكن وبشهادة الشهود وفيديوهات اليوتيوب ظباط وعساكر الجيش اشتركوا في ده
أنا أكيد مصدومة المرة دي أكتر من أي مرة فاتت، جيشنا بيضرب ثورانا وبيشتمهم عشان علم سفارة الكيان الصهيوني؟
جيشنا اللي لما اتسربلنا كلام إن فلول الوطني ممكن يضربوا ظباط الجيش بالرصاص كان رد الشعب إحنا ننزل ونحميهم بعمرنا؟ جيشنا اللي إحنا وهو إيد واحدة؟ جيشنا اللي أقسم على حماية مكتسبات الثورة؟
طيب أنا بقى ماعملتش ثورة عشان الثوار يتحاكموا عسكري ومبارك يتحاكم مدني؟ ولا عشان ناخد من مبارك شوية فلوس حتى لو هيدينا مليارات العالم، أنا دم المصري عندي أغلى من العالم ومن اللي فيه
أنا ماعملتش ثورة عشان عيال الناس الأغنيا يخرجوا بأحكام مع وقف التنفيذ من النيابة العسكرية على خلفية اعتصام السفارة وعيال الناس الغلابة يستنوا لما يبقى يجي عليهم الدور بقى ويبقوا بيضربوا ويتعذبوا عقبال مايجي عليهم الدور
أنا عملت الثورة عشان كرامة المصري الغلبان قبل الغني، عملت الثورة عشان نبقى دولة قانون وعدل وحرية ومساواة
أنا زعلانة من جيشنا أوي وعلى قد حبي له صدمتي فيه، وبالرغم من كل حاجة حصلت مستنية الجيش يصحح مساره ويصالحنا ويراضينا وينفذلنا كل طلباتنا لأننا إحنا الشعب

ملحوظة:
البوست ده مكتوب في يوم للكتابة عن الجيش
ملحوظة كمان:
ماحدش يدخل يشتم في المجلس العسكري ويقولي جيشنا حلو لكن المجلس كخ، وكأن أعضاء المجلس هم اللي نزلوا الشارع يفضوا الإعتصامات ويضربوا الثوار، في حاجة غلط بتحصل والحاجة دي لازم تتصلح أو يجيبولنا مجلس رئاسي بقى، على الأقل نعرف نمسك في خناقة لما يغلط في حق الشعب

أول مرة أكتب عنك

2011-03-28T00:07:00.003+02:00

وحشتني بجد، أنا قلتلك كده لما وقفت قدامك النهاردة، وعارفة إني كمان كنت وحشاك وإني كل مرة وأنا ماشية أقولك هاجي قريب وأخلف كلامي معاك

دي أول مرة اكتب فيها عنك، بس أنا عارفة إنك مش زعلان لأنك عارف السبب، عارف إني زمان أوي لما حاولت ماعرفتش ويومها بطلت كتابة خالص لأني شفت إنها كده مابقاش ليها لازمة، وحتى لما رجعت أكتب إنت مازعلتش إني ماكتبتش عنك، لأنك عارف إني كنت أجبن من إني أعترف بالحقيقة، وعارف إن القوة دي قناع أنا لبسته بإختياري وماقلعتوش رغما عني

الحقيقة اللي عشانها ماكنتش باجي أشوفك واللي اعترفت بيها مرغمة لما وقفت قدامك وأجبرت عيني إنها ماتنزلش عن الشاهد اللي مكتوب عليه إسمك

يومها كان اعترافي الأول بإنك مابقتش عايش، وكلمة الله يرحمه اللي بقولها بعد إسمك دايما عمرها ماكانت اعتراف مني بده، أصل الرحمة بتجوز على الميت والحي

النهاردة حسيت إنك واقف جنبي وبتطبطب عليا، سمعت نصيحتك ليا وإنت عارف إني هعمل بيها

ماتتخيلش كنت متضايقة إزاي قبل ما أجيلك، وأكيد كان باين عليا، لكن لما وقفت قدامك ارتحت وحسيت بسكينة ماحستش بيها من زمان، من أخر مرة كنت فيها عندك

إنت عارف إن أنا كان نفسي مامشيش بس زي كل حاجة بتتفرض علينا كان لازم أمشي

مشيت وأنا بوعدك إني هرجع تاني قريب وعارفة إنك مش هتزعل لما أتأخر

الست دي أمي

2011-03-21T04:37:00.000+02:00

أنا بجد بحبها اوي وعارفة إني مغلباها معايا، الست دي مارتاحتش ولا أيام النظام البائد ولا أيام الثورة ولا بعد الثورة
زمان أوي من كام سنة كده لما ماكنش في أحداث في بورسعيد وكنت بغطي أخبار المظاهرات اللي بتحصل في كايرو غالبا وألكيس أحيانا وكنت اتضايق أوي عشان الناس بتتسحل في الشوارع وأنا قاعدة في بيتنا كانت دايما بتقولي إن كل واحد فينا له دوره وإن أدوارنا دي بتكمل بعضها وكل واحد بيعمل اللي يقدر عليه
ومن سنة لما حملة البرادعي والجمعية الوطنية للتغير اتأسسوا وبدأت حملات جمع التوقيعات وتوعية الناس ونزلت عشان أشتغل في الشارع كانت معترضة في الأول زي أي ام في الدنيا بتدعي للشباب اللي عايزين يغيروا البلد بس تخاف أوي لو الشباب دول حد من أولادها ورغم ده مامنعتنيش
من المواقف اللي مش ممكن أنساها لما بدأنا حملة طرق الأبواب، يومها ماكنتش راضية إني أنزل لأن جورج إسحاق كان هنا في بورسعيد وأكيد الأمن هيبقى موجود، وأنا قلتلها إني هحضر الاجتماع بس ، حضرت الاجتماع وقرروا انهم نازلين الشارع ولما سألوني جاية رديت من غير تفكير أها، ورغم إننا لما خلصنا قعدت أكتر من ربع ساعة أنفض في هدومي والشوز من رمل البحر ورجعت البيت زي البرئية إلا إن بعدها بيومين جت تسألني، إنت أول إمبارح حضرتي الاجتماع بس مش كده، رديت بكل براءة من غير ماأبصلها عشان ماتكتشفش إني بنصب أها، فما كان منها إلا انها قالتلي أمال صورة مين دي ،ورغم ده سابتني أنزل معاهم تاني
أيام التحضيرات للثورة كان دوري إني أكون غرفة عمليات، وبناء عليه يوم 25/1 أنا مانزلتش الشارع، اليوم ده اتقبض فيه على 3/4 الناس اللي بشتغل معاهم، والربع الباقي على بالليل ماقدرتش اعرف أي حد فيهم فين لأن الموبيلات متراقبة، وعلى الساعة 12 بالليل كنت وصلت لمرحلة من الضغط العصبي إني فضلت أعيط، ساعتها ماما جتلي وقالتلي بتعيطي ليه؟ قلتلها العيال اتقبض عليهم واللي بره مش عارفة أوصلهم عشان الموبيلات متراقبة، قالتلي بتعيطي عشان إتقبض عليهم وعايزين تغيروا مصر؟ لازم تجمدوا شوية عشان تقدروا تغيروها، والجملة دي كانت السبب إني أقدر اتماسك تاني عشان أقدر أعمل دوري
يوم الخميس 27/1 نزلت مظاهرة نقابة المحامين من وراها، قلتلها إننا عندنا ميتنج هناك ، رغم إني كنت عارفة إن إحتمال كبير أتاخد يومها ومارجعش، ولما كلمتني وعرفت إنها مظاهرة كان صوتها مليان قلق لكن ماضغطتش عليا إني أروح ولما رجعت ماتخانقتش معايا
من يوم بداية الثورة وأنا كل ماأنزل من البيت تيجي معايا عشان بتبقى خايفة إني هيتقبض عليا أول ماأنزل، ماأنكرش إني لحد دلوقتي مش فاهمة منطقها في ده ولا إزاي وجودها معايا هيحميني من أمن الدولة لو حبوا ياخدوني ، بس هي كأم كانت شايفة إنها كده بتحميني وأنا كبنت كنت أتمنى لو ماعرضتهاش لكل ده
رغم إن مداخلاتي على الجزيرة لو كانت الثورة لا قدر الله فشلت كانت أقرب مكان هتودهوني له هو وراء الشمس إلا إنها عمرها ماقالتلي بلاش الكلام ده ولا هتودي نفسك وتودينا في داهية
حتى بعد مالثورة نجحت وإنتشرت حالات البلطجة في بورسعيد ولما عرفت إن اللي مأجر البلطجية دول أحد أعضاء الجزب الوطني كانت بترفض تماما إني أنزل لوحدي وكان ممكن إن أختي توديني وتجيبني لكن أنا مانزلش لوحدي ، وأنا كنت بقدر قلقها ده رغم إني متأكدة إن الراجل ده أصلا مايعرفش شكلي عشان يبقى بلطجيته في الشارع مستنين يخطفوني
ممكن نكون إحنا كشباب اللي فكرنا نغير البلد أو نجحنا إننا نعمل ثورة لكن الأكيد إننا ماكناش هنطلع كده لو ماكنوش دول أهالينا
كل سنة وإنت طيبة يا أمي وربنا يخليكي لينا ويباركلنا فيكي وسامحيني لأني تعباكي معايا على طوووووووول

إنك تكون أنا

2011-03-16T16:47:00.002+02:00

إنك تكون أنا دي مش حاجة سهلة أبدا وحاجة أنا شخصيا ماتمنهاش لأي حد

إنك تكون أنا معناه إنك ماتقدرش على زعل غيرك في الوقت إنك كلك ممكن تكون مابتفرقش مع غيرك ده مش زعلك بس يعني

إنك تكون أنا معناه إنك لما تكون زعلان بس اللي مزعلك متضايق شوية فإنت هتنسى إنه زعلك عشان تحاول تخليه مبسوط وعلى فكرة هو كمان هينسى إنه زعلك ومش هيصالحك وإنت كمان هتعمل نفسك نسيت

إنك تكون أنا معناه إنك تلاقي ناس كتير عليك وبيغلطوك وإنت عارف إنك مظلوم وعندك اللي تقدر تدافع بيه عن نفسك لكن مش هتقدر تقوله لأنك لو قلته مش هتبقى أنا

إنك تكون أنا معناه إنك لما تتجرح تيجي على نفسك عشان اللي جرحك

إنك تكون أنا معناه إنك تحاول ترضي كل الناس في نفس الوقت وتطلع نفسك غلطان عشان ماتزعلهمش وهم هيعتبروا ده واجب عليك وماحدش هيحاول يعرف انت بقى زعلان ولا لأ

إنك تكون أنا يعني حتى لما تكون مخنوق مش هتقدر تعيط لأن دموعك دي هتجرح ناس قريبين منك وهم مالهمش ذنب فيها وهيبقى حرام عليك تجرحهم

إنك تكون أنا معناه إنك هتسامح اللي غلط في حقك رغم إنه ماحاولش يعتذر بس عشان إنت هتحس بالذنب طول مانت مش مسامح

إنك تكون أنا معناه إن رغم مميزاتك الكتير اللي كل الناس بتتكلم عنها طول الوقت ورغم أهميتك في حياتهم اللي دايما بيكلموك عنه عنها، لكن وقت مايتعرضوا لأي مشكلة سواء إنت كنت طرف فيها ولا لأ وباختلاف الأشخاص والمواقف لكن أول حل هيجي في بالهم إنهم يخرجوك من حياتهم دي رغم إنهم عارفين إن دي أكتر حاجة بتوجعك

إنك تكون أنا معناه إن أقرب حد ليك والوحيد اللي بتكون محتاج إنه يطبطب عليك وياخدك في حضنه ويحميك حتى من نفسك مش هتلاقيه والمفروض إنك تقدر ده أيا كان سببه رغم إنك محتاج اللي يحس بيك ويقدره

إنك تكون أنا معناه إنك هتزعل أوي من كل اللي سيبتهم يقنعوك بإن دورك في الثورة من البيت كان أهم بكتير من دورك في الشارع لأنهم حرموك إنك تكون أحد شهداء الثورة خصوصا إنك مابقتش بتتمنى حاجة غير كده

إنك تكون أنا معناه إنك في أشد لحظات ضعفك مش مسموحلك تنهار عشان دايما هيكون في ناس محتاجينك تمثل دور القوي وتقف جنبهم وتكون موجود عشانهم

إنك تكون أنا معناه إن كل الناس يبقى ليها خاطر عندك لكن إنت مالكش خاطر عند أي حد

إنك تكون أنا معناه إنك تسمع كل الناس لكنك مش هتلاقي حد يسمعك

إنك تكون أنا معناه إنك بعدها بإسبوع هتخبط رأسك في الحيطة عشان ترتاح رغم إن أنا مش هعمل كده

يامصر هانت وبانت

2011-02-07T00:56:00.002+02:00

يامصر هانت وبانت كلها كام يوم...

نهارنا نادي ونهار الندل مش باين

الدولة مفضلش منها إلا حبة شوم..

لو مش مصدق تعالي ع الميدان عاين

ياناس مفيش حاكم إلا من خيال محكوم..

واللي هيقعد في بيته بعدها خاين

اللي هيقعد كأنه سلم التانيين للأمن بإيديه وقاله هما ساكنين فين..

وصلت لضرب الرصاص ع الخلق في الميادين

حتى الجثث حجزوها اكمنهم خايفين..

يامصر أصبحنا أحياء وميتين مساجين

فاللي هيقعد في بيته يبقى مش مفهوم..

واللي هينزل الهي حارسه صاين

يامصر هانت وبانت كلها كام يوم..

نهارنا نادي ونهار الندل مش باين.

نهارنا نادي وبايدينا علي فكرة..

الصبح عنده فضول راح نعمل إيه بكرة.

إيده علي الباب وخايف يلمس الأكرة..

ادخل ياأستاذ براحتك والبلد حرة.

إحنا زهقنا نشوف الصبح من برة..

ادخل وخرج بقايا العتمة بالمرة.

الناس ديه حرة وجنود الأمن مضطرة..

ياصبح طلعت روحنا لجل تيجي ياخي.

طالعين نجبيها أهو فى كل حارة وحي..

حتى لو ضربونا بالرصاص الحي.

شوف المداين كدة مفروشة خلق وضي..

دايما مفاجأة ودايما وقتها معلوم.

الحكم لينا وليك الحق يامداين..

يامصر هانت وبانت كلها كام يوم .

نهارنا نادي ونهار الندل مش باين..

ياصف عسكر بدال الدرع شيلوة اثنين.

25 يناير ياشباب فاكرين..

كان فيه انجليز ووزير الداخلية تخين...

كان عنده برضه عساكر زيكم جامدين.

سابهم يموتوا علولا لم سأل فيهم..

كانوا شبهكم اساميكم اساميهم.

ياعسكري البهوات اللي بتحميهم..

ممكن يردوا عليك لما تناديهم.

ياعسكري أنا أصلي بس بستغرب..

لو لاقي تأكل وتشرب قوم ياعم اضرب.

اضرب عشان الوزير من ضربتك يطرب..

لكن هتشتغل ايه لما الوزير يهرب.

أما الشديد القوي القادر أبو القادر..

برميل تلامة نشع علي مصر من الآخر.

لو شافته معددة تكتب ادب ساخر..

ثابت يقول للهرم ياكابتن اتاخر.

ولم يزل معتقد ان الهرم هيقوم..

ادي الحجر والبشر قايمين ياسيد القوم.

والدين هيترد ياللي عشت متداين..

يامصر هانت وبانت كلها كام يوم.

نهارنا نادي ونهار الندل مش باين..

ده حكم أسرة ولا خوفو ولا خفرع.

ولا وجع بطن يتعالج بزيت خروع..

عمل مسوجر بعيد عنك ولايطلع.

جربنا فيه كل شىء ملقينا شىء ينفع..

ماطلعش بالأدوية جربنا ألف طبيب..

ولا بعطارة شيوخ ليهم بلح وزبيب.

ولا بجحفل مغولى وضرب بالقباقيب.

. عمل مسوجر وسفلي شغل تل أبيب.

وشغل أمريكا متغلف وختمة عليه..

ضيف زارنا ياعم من غير دعوة لابس بيه.

قعد 30 سنة مابيقولش قاعد لية..

والنية يديها لابنه النابغة بعديه.

ويقول قضا وقدر بين البشر محتوم..

قولناله طيب ومين قال للقدر معلوم.

واش عرفك يافخمتك بالذي كاين..

يامصر هانت وبانت كلها كام يوم..

نهارنا نادي ونهار الندل مش باين

ليه 25 يناير

2011-01-23T21:37:00.005+02:00

ليه هننزل يوم 25 لأن دي بلدنا لكن خيرها مش لينا،إحنا اللي بنشقى ونتعب ونتمرمط وفي الأخر مابتكافئناش على تعبنا، خيرها رايح لغيرنا، البطالة في ازدياد، عيالنا بيتبهدلوا في الأقسام وبقوا بيتقتلوا في الشوارع، الفساد في البلد بقى له رأس وايدين ورجلين، البلد باظت مننا ولو مالحقنهاش دلوقتي هنصحي الصبح في يوم نلاقيها لمت نيلها وأهرامتها وأثارها وقناة سويسها وطفشت وسابتنا مع الحكومة لوحدنا
هيجي يوم أولادك هيلموك إنك سكت زي مااحنا بنلوم أهاليا، ماتقولش عايز أربي العيال لأنهم كده مش هيتربوا، الذل والخوف عمره ماكان تربية
ماعدش ينفع تفضل ماشي جنب الحيطة لأن اللي ماشي جنبها قدامك وقعت عليه وقتلتله
إحنا هننزل يوم 25 عشان نقول إننا مش موافقين على اللي بيحصل في البلد دي، عشان نقول إننا والله بنحبها ومش عايزنها تتبهدل أكتر من كده، عايزين نعيش بكرامة وعلى فكرة ده مش طلب صعب ولا كبير ولا مستحيل، ده أصلا أقل حق من حقوقنا
إنزل في محافظتك في أقرب مكان فيه تجمع، حاول ماتبقاش لوحدك، لازم يكون معاك حد، ماقدرتش توصل لحد من الناس اللي هينظموا وقفات إنزل انت وأصحابك أو قرايبك، غني لمصر الغناء مش ممنوع في القانون، إمسك علم بلدك نمسكه مرة من غير ماتش كورة، لو شفت حد ماشي في الشارع اتكلم معاه، قوله تعبنا من الظلم والقهر والذل، قوله نفسنا نمشي رافعين راسنا، اشكيله همك لأنه أكيد عنده نفس الهم
ماتشتبكش مع الأمن ، لو ظابط كلمك رد عليه باحترام، الظابط هو كمان عينه طالعة ونفسه بلده تبقى نضيفة، وفيهم ناس كتير نفسهم البلد تتغير بس مش قادرين يقولو ده بصوت عالي
لو عدد الناس النازلين كان كبير إحنا مش هنروح، هنفضل في الشارع ونتمسك بمطالبنا، لو حد اتقبض عليه مش هنروح، اللي اتقبض عليهم لازم يخرجوا الأول
أعتقد إن الأمن هيكون أذكى من إنه يتعامل مع الناس بعنف، ولو حصل العنف هيكون ضرب ومافيهاش حاجة لما نضرب عشانها، ماهي ياما اتضربت عشانا
هنقف وهنثبت عشان نثبت للناس إننا كمان نقدر، لو اليوم خلص وروحنا ماتضايقش نفسك لأنك عملت اللي عليك وحطيت رجلك على أول خطوة في الطريق، واللي ماحصلش المرة دي هيحصل المرة الجاية إن شاء الله

لو عرفت إن حد اتقبض عليه كلم جبهة الدفاع عن متظاهري مصر
0120624003 - 0129295510 - 0106701470

سيب اسمه ومحافظته ، ولو تعرف حد في محافظتك كلمه وبلغه

لو كنت من بورسعيد تقدر تتواصل على الارقام دي عشان تعرف هتنزل فين أو لو حصل أي حاجة يومها
0180969971/0180937763

عقبالنا يااااارب

2011-01-21T02:37:00.002+02:00

بجد مش لاقية كلام أقوله غير إني مبسوطة جداااا وفخورة جداااااااا
ربنا يكملكم ثورتكم ويحرركم من بقايا النظام السابق ويارب نشوف مصر قريب زي تونس

عن عبده عبد المنعم وكل اللي اتحطوا في موقفه

2011-01-18T00:27:00.001+02:00

إحنا ولاد ناس وماتحطناش في مواقف من دي قبل كده

أقصى بهدلة بالنسبة لينا إن حد يكلمنا بإسلوب مايعجبناش رغم إنه ممكن يكون بالنسبة لناس تانية أسلوب كويس جدا وبيتمنوا إن حد يعاملهم بيه

ماجربناش مرة نبات من غير عشاء

ولا جربنا ندور في الزبالة عشان ناكل

ولا حد حاربنا في رزقنا

وعارفين إنه لو حصل الحمدلله لينا أهل يصرفوا علينا

ماجربناش اليأس

ولا إننا نشوف الدنيا سوداء ومافيهاش نقطة نور

وماجربناش الظلم غير في الحب

إحنا الصدمات اللي في حياتنا صدمات عاطفية ودي الناس بيشوفها حاجات هايفة

يبقى ماينفعش نقعد في بيوتنا الدافية ، ورا شاشات الكوبيوتر الغالية ،على النت اللي هو أصلا باشتراك نحكم على ناس لو اتحطينا في موقفهم 5 دقايق بس الله أعلم هنعمل إيه في نفسنا مش بس هنولع فيها

أه الانتحار حرام

بس ماحدش فينا يعرف لو ده حصله هيعمل ايه

وساعتها أصلا هيفكر في ربنا ولا هيشوف إن ربنا نفسه ظلمه بإنه سايبه في الغلب ده

يبقى إحنا نحمد ربنا إننا مش كده وندعيه إن ده مايحصلش معانا وندعيه إنه يغفرلهم ويرحمهم

غير كده هو بس اللي يحكم على الناس وإحنا مش الهة عشان نقعد نكفر في الناس وننظر على واحد شاف اليأس والحياة سودا، عشان دي مش غلطته لوحده دي غلطة كل اللي حواليه اللي ماحدش فيهم حاول يغير الواقع ده ولا حاول يقف جنبه ولا حاول يمد إيده ينورله شمعة في السواد اللي هو عايش فيه

واللي ضامن نهايته هتكون إيه وضامن إنه هيموت مؤمن وإن ربنا هيرحمه ويغفرله ويدخله جنته يكفر خلق الله براحته، لكن أنا بقى مش ضامنه وكل اللي أقدر عليه ادعيلهم وأدعي ربنا إنه يحسن خاتمتي

القديسين وسيد بلال وأسامة

2011-01-11T22:17:00.000+02:00

إحنا في مصر اتنازلنا عن حاجات كتير أوي قصاد الأمان، احنا تقريبا اتنازلنا عن حريتنا ونسينا ان الحرية هي مصدر الأمان، ورغم ده فتفجيرات الاسكندرية الأخيرة أثبتت لنا كلنا إننا والحمدلله ماعندناش حرية ولا أمان
التفجيرات دلوقتها بقالها 11 يوم ولحد دلوقتي الأمن فشل في إنه يحدد سبب التفجير كان إيه، عربية مفخخة ماسابتش حفرة في الأرض، ولا أنتحاري ماتبقاش منه ولا فتفوته بما إن الصورة اللي طلعوها علينا في كل وسائل الاعلام طلعت لضحية مسيحي زي مامواقع الأخبار قالت، ولا حتى عبوة ناسفة اتحطت قدام الكنيسة واتفجرت عن بعد، كل اللي قالوه انها جهات أجنبية وإن في 15 أجنبي دخلو مصر في الأيام السابقة للتفجيرات، طيب هم 15 أجنبي بس؟ دي مصر بيدخلها ألاف الأجانب كل يوم
المهم إن الأمن أثبت فشله في تأمين أي حاجة غير الكرسي، ، وقفات المعارضة مابتكملش 100 شاب بتتحاوط بألف عسكري، لكن كنايس كانت مهددة بالتفجير ماكنش واقف عليها غير ظابط و3 عساكر وماكنوش في مكانهم كمان لانهم لو كانو في مكانهم كان زمانهم هم كمان أشلاء وخبراء التجميل بيحاولوا يرسمولنا شكلهم
ومازالت الكنايس في مصر مش مؤمنة ، انا روحت كنيسة النهاردة أنا وأختي نجيب حاجة من هناك ودخلنا وخرجنا ولا حد سألنا رايحين فين، مافيش غير انهم عاملين بلوكات قدام رصيف الكنيسة عشان ماحدش يركن، على أساس ان اللي عايز يفجر لازم يركن الأول

سيد بلال مواطن مصري عادي، يعرف ربنا شويتين، مقتدي برسوله في تربية الدقن متزوج وعنده طفل سنة ونصف، جاله تليفون من امن الدولة بعد الحادث بكام يوم والراجل راحلهم، لأنه ماعملش حاجة تخليه مايروحش رغم انه كان من حقه مايروحش لأن مافيش إذن نيابة بالقبض عليه، أهل سيد جالهم تليفون بعدها بيوم من مستشفى جنب مقر أمن الدولة بتقولهم يروحوا يستلموا جثة ابنهم، أخوه وجوز أخته رفضوا إنهم يستلموا الجثة لما شافوا أثار التعذيب الوحشي عليها وأصروا على تقديم بلاغ للنيابة وربنا رزقهم بوكيل نيابة عنده ضمير كتب في البلاغ كل أثار التعذيب اللي شافها بعينه واتهامهم لظباط أمن الدولة بقتل سيد، اللي تقرير الطب الشرعي قال إنه توفي نتيجة إنخفاض في الدورة الدموية ومافيش أي شبهة جنائية في وفاته وكأننا هنصدق أو كأننا ماشفناش الصور اللي بتقول إن مش في شبهة جنائية وبس دي بتؤكد إن الراجل اتقتل من التعذيب، حضرة الطبيب الشرعي نشوفك إن شاء الله مكان سيد بلال وخالد سعيد وربنا بردو يرزقك بطبيب زميل يقول إن مافيش شبهة جنائية في وفاتك وإحنا هنصدقه ومش هنعترض
الأمن بيمارس جميع حيلة عشان اهل سيد يتنازلوا عن القضية، بالترهيب شوية والترغيب شوية، عرضوا عليهم 100 ألف جنية كانهم قتلوا قطة في الشارع، وشقة باسم ابنه ووظيفة لأخوه، أو أمرين اعتقال لأخوه وجوز أخته ماحنا بلد الغابة بقى كل اللي عايز يعتقل حد يعتقله ويعذبه ويقتله ويرجع يهدد أهله، الناس دي محتاجة اننا نقف جنبهم عشان مايحسوش إنهم لوحدهم ومايضعفوش قدام ضغط الأمن، الضغط ده اللي جاب لأخو سيد شلل نصفي نفسي
على فكرة مصر ماضية على اتفاقية دولية بموجبها عقوبات التعذيب السجن 15 سنة والتعذيب المؤدي للقتل الاعدام

أسامة مشرف بقى هو مصري شغال في السعودية ومنسق الجمعية الوطنية وحملة البرادعي بالسعودية وهو صديق على موقع تويتر
أسامة كان سهران معانا يوم 2/1 على تويتر وكان عادي جدا، يوم 3/1 إتصل بجمال عيد وقاله انه في السفارة المصرية وإن أمن السفارة ضربوه وجبوله البوليس السعودي، اها والله السفارة اللي المفروض أنها ملاذ أي مواطن بره وطنه وهي وطنه أساسا في الغربة جايبه البوليس الغريب لمواطنها، بس ده مش غريب في مصر إذا كانت حكومتك جوه بلدك بتقتلك في الشارع أقل حاجة تعملها ممثلة الحكومة دي برة بلدك إنها تجيبلك بوليس دولة الغريب
من يومها وموبيل أسامة مقفول وماحدش يعرف عنه أي حاجة أهله هنا في مصر ولا أصحابة في السعودية وإحنا مش عارفين قتلوه ولا سجنوه ولسه عايش
أي مصري بيشتغل في السعودية أو يعرف أي حد هناك أو أي سعودي بيدخل البلوج ويقدر يسألنا عنه ياريت يعمل كده وأكيد مش هنقول مين اللي جابلنا أخباره
احنا بس عايزين نعرف هو فين وعامل ايه ، عشان نعرف نتصرف

قبل مانشر البوست عرفت ان أسامة الحمدلله خرج مانعرفش خرج منين ولسه ماعنديش أي معلومات تانية

بتنذكر مابتنعاد

2010-12-27T17:07:00.003+02:00

Today 27/12 marks the memory of the massacre of around 1400 old men, women and children at Gaza were killed two years ago. Just like the world insists on remembering 9/11, it must never forget what happened to Gaza

عايز تخرج؟

2010-12-21T17:12:00.002+02:00

عايز تخرج؟ أخرج، اعذرني إني مش هقدر أقوم أوصلك للباب، خد انت الباب في إيدك وإقفله بالمفتاح وإرمي المفتاح في البحر ووصي أي قرش معدي إنه يبلعه، عشان يوم ماتقرر ترجع تلاقي الباب مقفول ، وعشان أي حد من الموجودين يوم مايحب يخرج يضطر إنه ينط من الشباك ويبقى عارف إنه كده هيموت ومش هيعرف يرجع تاني
أخرج وماتقلقش عليا، خروجك مش هو اللي هيكسرني، أنا مابيكسرنيش غير الموت وإنت مش عزرائيل
أخرج لإني مليت من الوقوف بين الجنة والنار، مليت من الوقوف بين الأه واللأ ، مليت من الوقوف بين الدخول والخروج
أخرج وأنا هفضل واقفة في مكاني ومش هحاول أمنعك، لأني تعبت من إني أفضل شارية ناس مصرة إنها تبيع
أخرج بس لما تندم وماتستغربش من إني متاكدة إنك هتندم ، وتقرر الرجوع إفتكر إن قرار الخروج كان قرارك إنت وإن قرار الرجوع هيكون قراري، قراري أنا وبس
أخرج لأن منير كان ساذج لما غنى إياك تكون زيهم، وانا كنت ساذجة أكتر منه لما صدقت و غنيتها بأعلى صوتي معاه
أخرج من غير ماتفضل تدور على مبررات، قولي بس إنك إخترت الخروج وأنا مش هسألك عن الأسباب
أخرج وخد الباب في إيدك وأقفله بالمفتاح وإرمي المفتاح في البحر ووصي أي قرش معدي إنه يبلعه، عشان يوم ماتقرر ترجع تلاقي الباب مقفول، وعشان أي حد من الموجودين يوم مايحب يخرج يضطر إنه ينط من الشباك ويبقى عارف إنه كده هيموت ومش هيعرف يرجع تاني

ربنا يخليك من غير ليا

2010-12-14T02:39:00.000+02:00

اللي يعرفني كويس عارف إن جملة ربنا يخليك ليا لها عندي معزة خاصة، مش بقولها غير للناس اللي بحبهم اوي، والسبب في معزتها هي بالذات إن حسام غالي كان قالهالي كذا مرة فربطت معايا، وبعدين بقيت بحبها
لكن النهاردة لما كنت مبسوطة من اسلام وزيزو ومي ماعرفتش أقولهم ربنا يخليك ليا، اكتفيت بس بربنا يخليك، لأني إكتشفت إن كل حد قلتله ربنا يخليك ليا خرج من حياتي ورزع الباب وراه رغم كل محاولاتي المستميتة للإبقاء عليه فيها وساب فراغ مؤلم في القلب والروح، وإعادة التكيف على عدم وجودهم وملئ الفراغ ده عمره ماكان شئ سهل أو ألمه محتمل
كأن الجملة دي أصبحت تقريبا تعويذة للإبعاد بدل من دعوة لحفظ الناس الغالين علينا في حياتنا
ولأن معزتهم عندي هم التلاتة كبيرة جدا وأتمنى إنهم يفضلوا في حياتي للأبد ماكنش ينفع اقولهالهم وماعتقدش اني هعرف أقولها لأي حد تاني لأني أتمني الاحتفاظ بكل الناس الموجودين في حياتي دلوقتي لأخر يوم في عمري
ياربنا كفاية الناس اللي راحوا لأن لا قلبي ولا روحي عادوا حمل عملية الشفاء من البعد من جديد، لو أي حد هيدخل حياتي هيرجع يخرج منها أرجوك امنعه من الدخول من البداية

أسيبك لمين؟

2010-11-29T12:10:00.003+02:00

أنا زعلانة منك يامصر، زعلانة أويييييي ومش عارفة أقولك ايه؟
طيب أنا ليه ماروحتش لما منعوني أدخل أراقب من جوه مدرسة الأمين الإبتدائية؟ ليه فضلت واقفة ال12 ساعه قدام بابها وطنشت كل محاولات الظابط لتزهيقي وتطفيشي
طيب ليه كتبت محضر شراء الأصوات لصالح طارق عمار بإيدي عشان مندوبة الوفد مالقتش حد يكتبهولها وأنا خفت تزهق وتطنش؟
ليه فضلت واقفة على الباب أعد الناس اللي داخلين واللي خارجين وأسالهم انتخبتوا ولا لأ وطنشت إحتجاجات مندوبة الوطني اللي كانت مستعده تعمل أي حاجة وأبطل أعد وكانت السبب في إن الظابط يطردني للمرة التانية؟
ليه كان أي حد من مندوبي المرشحين لما بيشتكيلي من مخالفة بتحصل جوه المدرسة كنت بنقلها فورا؟
أنا عملت كده عشان نتيجة المدرسة دي ماتطلعش وتتعاد سواء عشان لجنة 111 كانت بتتقفل لطارق عمار واحمد سليمان (الاتنين اللي نجحوا بالفعل في الدايره دي) أو لأن كان في شراء للأصوات من أغلب المرشحين أو لأن نسبة الحضور في المدرسة كلها كانت 6% يعني أقل من النسبة القانونية ولازم تتعاد الانتخابات فيها
إزاي بقى أصحى النهاردة الصبح ألاقي إن مافيش إعادة وان طارق عمار وسليمان نجحوا بالفعل؟؟
ده لما الساعة جت 7 والناس قالولي الانتخابات خلصت كده؟ طيب المرة الجاية امتى قلتلهم الأحد الجاي، المدرسة دي لازم يكون فيها إعادة لأنها ماجبتش النسبة القانونية
والله كان عندي استعداد أطحن تاني الأسبوع الجاي قصاد إن إرادة عيالك ماتتزورش

طيب أنا إيه اللي مزعليني أوي كده؟ إن الكل كانو ضدنا؟ رؤساء لجان وظباط وحتي مفتش أمن الدولة اللي كان جاي أول مرة عشان يشوف نسبة الحضور هتسمح بتقفيل الصناديق ولا لأ؟
ولا يمكن اللي مزعلني إن احمد خرجوه متهرب من مدرسة النصر عشان خافوا علي حياته من إن بلطجية محمد نور يقتلوه وهو خارج لأنه رفض التزوير وهو بيراقب في المدرسة؟
طيب إحنا لو أخدنا قرار جماعي دلوقتي بإعتزال السياسة وريحنا دماغنا وبطلنا نزعل عليكي طالما إنت أصلا مش زعلانة على نقسك هنسيبك لمين؟
هنسبك ليهم يبهدلوا فيكي وفي عيالك أكتر من كده؟
ده انت والله ماليكي غيرنا ومش هتلاقي حد بيحبك قدنا ولا حد مستعد يتبهدل و يعمل أي حاجة في الدنيا عشانك حتى لو قتلونا
أنا طول عمري بعيط عليكي يامصر، بس النهاردة أنا بعيط منك والأغنية اللي فوق دي هي الحاجة الوحيدة اللي مصبراني ومخلياني مش عارفة أسيبك لمين؟

عيد سعيد

2010-11-17T14:16:00.001+02:00

كل عيد وكلكم طيبين ويارب يكون عيد جميل علينا كلنا

ياحكومة حافية

2010-10-26T04:08:00.001+02:00

يوم السبت كان اليوم المحدد لإحدى جلسات محاكمة قتلة خالد سعيد الله يرحمه وكالمعتاد النشطاء قرروا ان يكون في وقفة قدام المحكمة وفعلا سافر من بورسعيد 3 نشطاء أنا أعرفهم شخصيا لحضور الوقفة
ولأن الجلستين اللي فاتوا ماحصلش فيهم أي حاجة غير ان بلطجية الأمن نظموا وقفة مضادة على سلم المحكمة فأنا دخلت أنام الفجر وقلت إن لو حصل حاجة المرة دي أكيد هيكلموني يصحوني
اللي حصل إن قبل مالساعة تيجي 9 وهو الميعاد المحدد للوقفة الشباب كانوا ماشين قدام المحكمة بيشوفوا إجرائات الأمن إيه ، طلعلهم واحد ووقفهم وطلب بطايقهم وهم طبعا طلبوا إثبات شخصية منه فكان إثبات الشخصية اللي قدمهولهم هو مجموعة من المخربين ظهروا من العدم وأخدوا الشباب على القسم وهناك أخدوا بطايقهم وسألوهم في اسكندرية بيعملوا إيه وبعدين دخلوهم حجز عبارة عن متر في متر وربع وكان فيها واحد مقبوض عليه قبلهم شوية والمساحة دي بقى فيها 18 بني ادم وماحدش يسأل إزاي لأن دي واحدة من إنجازات عصر مبارك وداخلية العادلي
بعد كده أخدوهم على عربية الترحيلات اللي فضلت تلف بيهم في الشمس وهم جواها من غير تهوية وموبيلاتهم وبطايقهم في القسم وإحنا طبعا قاعدين مش عارفين عنهم أي حاجة
الخبر جالي أول ماصحيت من زميل لينا كان بيتأكد مني إتقبض عليهم ولا لأ وأنا طبعا ماكنتش أعرف حاجة، كلمت إسلام اللي قالي إنهم اتقبض عليهم من 9 الصبح وإن ده كل اللي يعرفه، كلمت ميدو بما إنه سكندراني قالي إنه لما راح المحكمة مالقاش حد هناك غير الوقفة بتاعة بلطجية الأمن وإن الناس هناك قالوله إن البوليس قبض على كل اللي كانوا واقفين الصبح، كلمت حسام قالي إن الوقفة اتنقلت لقسم سيدي جابر وإن الناس اللي راحوا المحكمة ماكنوش يعرفوا والأمن قبض عليهم كلهم وقالي إنهم غالبا هيكونو في معسكر الأمن المركزي وإني ماقلقش واإنهم على 6 هيخرجوهم
أنا كان عندي سؤال واحد ومش لاقية حد يجاوبني عليه، هم أخدوهم ليه؟ الوقفة بتتعمل كل مرة وأخرهم بلطجية الأمن يقولوا عليهم يهود ويرموا عليهم خشب وأزايز الماية والأمن يضبق عليهم الكردون ويفعصهم، لكن قبضوا عليهم ليه ماحدش يعرف، طيب قبضوا على مين بردو ماحدش يعرف، كل اللي نعرفه إنهم قبضوا على التلاتة بتوع بورسعيد وإحتمال معاهم كمان اربعة، طبعا ماكناش نعرف حكاية ال18 دي خالص
كلمت أنا بتوع هشام مبارك وبلغتهم واللي كانوا زي بالظبط مايعرفوش إن في حد اتقبض عليه
الشباب في الوقت ده كانوا قسموا العربية بينهم شوية يقفوا وشوية يناموا وهكذا وكانو بيحسبوا مواعيد الصلاة ويصلوا جوه العربية
الوقت بيعدي ومافيش أي أخبار عنهم ،كلمت مؤمن لأن في حد مش فاكرة هو مين قالي إن مؤمن عنده أخبار ، ومؤمن قالي إن في كلام انهم خرجوا قلتله إزاي وموبيلاتهم مقفولة قالي إنها هتفضل مقفولة لأن الأمن عندنا بياخد الفلوس والموبيلات، أنا بقى اسبهليت، أنا أه عارفة ان ده بيحصل وكانت أول مرة يوم 6 أبريل في القاهرة، بس فكرة إن ده يحصل مع حد تعرفه شخصيا بتكون غريبة أوي، قلتله إن ده مش بيحصل عندنا وإنهم المرة اللي فاتت خرجوهم بالموبيلات والفلوس ، الحقيقة مؤمن ضحك وقالي إن الأمن عندكم محترم
للأسف الشديد طلع خبر خروجهم مش صحيح وإسلام قالي ماقلقش وإنهم أكيد هيخرجوا لما المحاكمة تخلص ويمكن لسه خاطفينهم لأن الجلسة طولت وشكل القاضي هيحكم النهاردة، الجلسة فعلا اللي كانت بتكمل ساعتين بالعافية كانت الساعة بقت 4 وهي لسه شغاله
الساعة بقت 6 والجلسة أخيرا خلصت وماخرجوش بردو، في الوقت ده كان المغرب أذن وده معناه في عربية الترحيلات إن جميع أنواع الحشرات بدأت تتحرك عشان تأكل البني ادمين اللي جوه العربية
الساعة بقت 8 وبقى كل التحركات دلوقتي إن إيه الإجرائات اللي هتحصل لو الناس دي ماخرجتش النهاردة وبدات الترتيبات لوقفة قدام النائب العام وإعتصام لحد الإفراج عنهم وتقديم بلاغ له هيتعمل معاها وقفة هنا في بورسعيد
في الوقت ده كان الشباب في عربية الترحيلات بيحقق معاهم ظابط أمن دولة وفي الأخر قرروا نقلهم للقسم وقالوهم هتخرجوا من القسم وهيتنقلوا في عربية ميكروباص بس قبل مايركبوها يطلعوا الفلوس الي معاهم كلها ودي طبعا كانت مئات من كل واحد وأخدوا الشنط اللي كانت معاهم وأخيرا طلبوا منهم الجزم والشربات
ركبوا الميكروباص وهم مغمضين عنيهم عشان مايعرفوش رقمه ولا يعرفوا ماشين فين، ومارحوش على القسم طبعا لكن كانو بيرموهم على الطريق الصحراوي ويرموهم وراسهم للأرض عشان مايشفوش رقم العربية وطبعا اتعرضوا للضرب المبرح سواء في عربية الترحيلات أو في العربية الميكروباص
أخيرا إسلام كلمني الساعة 9 وقالي إنهم خرجوا واحد واحد وإنهم مش معاهم فلوس ولا موبيلات ولا أي حاجة ، المهم عندنا كان إنهم خرجوا بالسلامة كلمت باقي الشباب طمنتهم، وكلمت حسام طلبت منه إنه يبعتلهم أي حد او يتصرف ويشوف فلوس ويوديهالهم وهو عرض عليا إنهم يباتوا هناك وأنا قلتله إنهم أكيد هيقرروا الرجوع
واحدة صاحبتنا كلمتني وسألتني عليهم وقلتلها إنهم كويسين قالتلي إنهم أخدوا منهم الجزم وأنا قلتلها لأ ، لأني فعلا ماكنتش أعرف والأهم إني ماكنتش متوقعة ده وكنت بنفيه نفي قاطع، ماأنا الصراحة مش متصورة يعني
الشباب في اسكندرية وصلولهم الحمدلله وودوهم المحطة وبجد كتر خيرهم على كل حاجة عملوها، وخلاص بقوا في السكة الحمدلله، لما وصلوا بكلم واحد فيهم على موبيل إسلام قالي على حكاية الشوزات دي
أهو انا بقى جيت عند الموضوع ده ووقفت، موبيلات ماشي، فلوس ماشي، ضرب ماشي، لكن الجزم كمان؟
يعني إحنا عارفين إنكم حكومة حرامية وجعانة ومحدثين وأخدتوا الفلوس والموبيلات والشنط لكن انتم كمان حكومة حافية؟ ماهو ماحدش يسرق الجزم دي غير واحد أصلا كان طول عمره حافي، أه والله
طيب يعني هيعملوا بيها ايه؟ هيبعوها مستعملة؟ طيب هتجبلهم كام؟ ولا حضرة الظابط هيستنى رجله تصغر ويلبسها، ولا هيستنى لما المحروس ابنه يكبر وتيجي على مقاسه ويديهاله، طيب الظابط اللي كان اخد نظارة أحمد وهو خطفها من إيده لما رموه على الصحراوي كان أخد النظارة ليه؟ هيبعها بردو ولا هيستنى لما يتعمي إن شاء الله ويحتاجها؟
طيب اشمعنى دول يتاخدوا وبلطجيتهم يعملوا الوقفة في حمى الأمن، طيب هو الأمن أصلا عايز ايه؟ فاكر إنه كده هيخلي الشباب دول يبعدوا عن الحق ونصرة المظلوم؟ أكيد طبعا بيحلم ، لأنهم الأول كانو متضامنين مع واحد اتقتل ظلم لكن دلوقتي بقى ليهم ثأر شحصي عند كل واحد مد إيده عليهم وعند كل حرامي اخد مليم من فلوسهم
بجد مش هقول غير حسبي الله ونعم الوكيل ياحكومة حافية

مقال الدكتور البرادعي المتسبب في إقالة إبراهيم عيسى من رئاسة تحرير الدستور ..

2010-10-05T17:35:00.006+02:00

المقال منقول عن موقع الحملة الشعبية لدعم البرادعي ومطالب التغير

.ماهو اكبر من الانتصار

تمر اليوم الذكرى السابعة والثلاثين لانتصار أكتوبر المجيد، والذي اقتحم فيه الجيش المصري قناة السويس وانتصر على جيش الاحتلال الإسرائيلي، بعد سنوات ست من الهزيمة والانكسار. يعد احتفال مصر والعالم العربي بذكرى حرب أكتوبر مناسبة عظيمة لنسترجع مرة أخرى «طريق النصر»، والذي هو في الحقيقة أهم من الانتصار ذاته، فنصر أكتوبر لم يكن وليد الصدفة إنما كان نتاج جهد وعرق ودماء دفعها الشعب المصري وقواته المسلحة الباسلة من أجل تحرير الأرض واستعادة الكرامة.

فقد كان اعتراف القيادة السياسية بمسئوليتها عن هزيمة 67 الفادحة وتقديم عبد الناصر لاستقالته في خطاب التنحي الشهير، ومحاسبة كبار الضباط المسئولين عن الهزيمة، ثم إعادة بناء القوات المسلحة على أسس جديدة متسمة بالتخطيط العلمي والانفتاح على التكنولوجيا الحديثة، وضم المؤهلين بين صفوف الجنود، وإعادة الثقة في قدرة المقاتل المصري وغرس ثقافة النصر والعمل والقدوة الحسنة بين صفوف الجنود، وكان استشهاد البطل عبد المنعم رياض أثناء حرب الاستنزاف رسالة واضحة من القوات المسلحة إلى الشعب المصري، بأن القائد الحقيقي هو الذي يبقى وسط جنوده، وأن القيادة لم تكن في أي يوم مجرد تشريفٍ إنما هي في المقام الأول مسئولية وتكليف وقد يصل ثمنها أحيانًا إلى الاستشهاد.

لقد كان نصر أكتوبر انتصارًا للانضباط والتخطيط في العمل، وهو بالتأكيد يمثل عكس ثقافة الفوضى والعشوائية التي عرفها المجتمع المصري بعد ذلك. كما يمثَّل أيضًا رسالة قوية لكل المجتمع بأنه لا تقدم ولا نصر إلا بالاعتراف بالخطأ والبدء في تصحيحه. لقد قام الجيش المصري بعمل تاريخي وبطولي في مثل هذا اليوم من عام 1973 وقدم آلاف الشهداء الذين لولا تضحياتهم وبطولاتهم لما نجحت مصر في استرداد أرضها المحتلة ولما فتح الباب أمام بناء مصر المستقبل.

وللأسف الشديد و بعد مرور 37 عامًا على هذا الانتصار فإننا لم نستلهم قيم أكتوبر في « معركة السلام» ولم نتقدم اقتصاديًّا ولا سياسيًّا، وتعمقت مشاكلنا الاجتماعية والثقافية بل والأكثر أسفًا أن العديد من قيم أكتوبر مثل: المواطنة، والعمل الجماعي، والتفكير العقلاني، والتخطيط المدروس، والانضباط، والوفاء، والصدق، والشفافية، والتواضع، وإنكار الذات، وغيرها من القيم التي تشكل البنية الأساسية لتقدم المجتمعات لم يعد لها مكان يذكر في مجتمعنا.

إن إصلاح مصر لن يكون إلا باستلهام هذه القيم التي جسدتها القوات المسلحة، والتي يجب أن تعود مرة أخرى لتكون هي قيم الشعب المصري بأكمله. تحية إلى شهداء مصر الأبرار ورحمة الله عليهم وتحية إلى قيم أكتوبر التي حان وقت عودتها وبعثها من جديد، لتعوض مصر ما فاتها وتبني نظامًا ديمقراطيًّا يقوم على الحرية وكفالة الحقوق الاقتصادية والاجتماعية لكل مصري دون تفرقة أو تمييز.

محمد البرادعي

طيب دول ندعي عليهم بإيه وهم فيهم كل العبر؟

2010-09-29T00:40:00.002+03:00

البوست ده منقول من عند نوارة

كنت نازلة الشغل في امان الله جالي تليفون نقل نص التطورات اللي حصلت في قضية الشيخ محمد عزت محمد خضر وهو الشيخ اللي من كفر البطيخ ومحتجز بلا سبب ولا تهمة وقدم تظلمين وافرج عنه واعيد اعتقاله في المرتين

زي ما نقلت لكم شكوى الزوجة

حانقل لكم نص اللي حصل مع الشيخ محمد عزت محمد خضر

اللي حصل انه قدم تظلم تاني وافرج عنه تاني وتم نقله من امن الدولة بالقاهرة لامن الدولة بدمياط

زي ما هو موجود في اللنك الراجل ده عنده سبع امراض، وهو محجوز في امن دولة دمياط المفروض انه كان بيستعد لانهاء الاجراءات عشان يخرج، جاله نزيف، فقال للسجان انا عايز اروح المستشفى لاني معايا الادوية بتاعتي بس جالي نزيف وحاسس اني محتاج اسعاف

فالسجان قال له الظابط بيقول اوامر من فوق انك ما تروحش المستشفى، قال له طب خليني اقابل الظابط ده

غموا له عينيه وبعدين دخلوا بيه على مكتب طبعا هو مش عارفه بس عرف من الصوت انهم اتنين، غالبا اتنين ظباط

واحد منهم قال له: يا شيخ محمد انت راجل محترم، ومثقف، ومستواك الفكري مرتفع، وكنت مؤدب، ايه اللي خلاك تتجاوز وتروح للصحافة والنت والجزيرة؟ انت مش عارف ان كل ده ولا يفرق معانا في حاجة؟ احنا اللي حاكمين البلد، واي حاجة ضد النظام مش حتمشي يا شيخ محمد احنا عايزينك تعقل

- اعقل ازاي يا باشا؟ اللي اقدر عليه عملته، صحيح مش حاطلع بمقال ولا ببرنامج، بس الرسول امرنا بالاخذ بالاسباب ودي الاسباب اللي في مقدرتي اني اعملها

الظابط 2: انت عايز تطلع يا شيخ محمد؟

الشيخ محمد: طبعا يا باشا

الظابط2: وعايز ترجع تخطب تاني الجمعة؟

الشيخ محمد: ياريت

الظابط 1: بس الناس بتحبك يا شيخ محمد

الشيخ محمد: الحمد لله

الظابط 1: الحمد لله ازاي يا شيخ محمد انت كده عملت لنا مشكلة.. ما تبقاش تصلي الجمعة في جامع كبير يا شيخ محمد، ابقى صلي في جامع صغير، وبعدين احنا مش كنا منعناك من الخطبة؟ تقوم تقرا آيات تخلي الناس تعيط؟

(الشيخ محمد صوته حلو)

وتطول في القراءة؟ يعني انت بتتحايل علينا؟ انت مش عارف احنا مين؟

الشيخ محمد: طب ايه رأيك يا باشا ما اصليش الجمعة خالص

الظابط1: لا انا ما اقدرش اتحمل الوزر ده.. احنا بس عندنا مشكلة انك عامل لنا بلبلة

الشيخ محمد: انا عامل بلبلة؟ يا باشا انا باخطب في الدين، ومش بادخل في السياسة، وبأمر الناس بصالح الاعمال، والحمد لله عملنا جمعيات خيرية، وأصلحنا بين عائلات كان بقالها سنين مش بتكلم بعضها

الظابط 1: عليك نوووور، مش عايزينك تصلح بين الناس تاني

الشيخ محمد: حضرتك مش عايزني اصلح بين الناس تاني

الظابط1: خالص يا شيخ محمد، ما تدخلش في المصالحات نهائي والا حتئذي نفسك

الظابط 2: قلت لي بقى انك عايز ترجع تخطب تاني

الشيخ محمد: يا ريت

الظابط 2: ماشي، ايه رأيك احنا حنخرجك ونرجعك تخطب الجمعة تاني، بس فيه تلات شروط: اولا: تهدا على نفسك شوية، مافيش احسن من الهدوء، يعني بلاش الحماس اللي في صوتك ده وانت بتتكلم، ثانيا: في مواضيع خط احمر ما تتفتحش، احنا اللي حنقولك تخطب في ايه كل مرة وموضوع الخطبة وتقول فيها ايه، ثالثا: تخلص الخطبة وتروح بيتك على طول ما تقعدش في الجامع

الشيخ محمد: طب ماهو حضرتك انا عندي اقتراح احسن، ما اخطبش خالص، اقعد في البيت، اكمل الماجيستير والدكتوراه بتاعتي دي قدامها ولا عشر سنين

الظابط2: ما الناس حتجيلك البيت

الشيخ محمد: طب انا ممكن انزل دمياط البلد، حاسيب امي العيانة واسيب حياتي واخد ولادي ونسيب كفر البطيخ خالص

الظابط1: ماشي

الظابط 2: ماشي ايه؟ لا لا لا لا.. احنا عارفين نلمك في كفر البطيخ لما تروح تعمل لنا مشكلة في دمياط البلد؟

الظابط1: ماهو انت مش حتعمل حاجة في دمياط البلد يا شيخ محمد مش كده؟

الشيخ محمد: ايوة يا باشا

الظابط2: لا برضه

الشيخ محمد: يعني لا ولا اه؟

الظابط1: بص يا شيخ محمد، سيبنا نفكر، وحنعرض الامر على عقلنا وقلبنا ونقول لك

(ملحوظة: الحوار منقول بالنص، وقالوا له عقلنا وقلبنا)

كل ده وهم مغميين عينيه وبشربوه نعناع والراجل عنده نزيف اساسا

الشيخ محمد: طب انا عايز اروح المستشفى دلوقت انا عندي نزيف

احد الظباط: طب ثانية واحدة

جه حد اخده وهو مغمي كده ودخله مكتب تاني، لما دخل المكتب التاني، قيل له انه في مكتب رئيس الامن في دمياط، والله اعلم لانه اساسا ما كانش شايف حاجة

ودار الحوار الاتي:

الظابط: بقى بتشتكينا يا شيخ محمد

الشيخ محمد: انا باعمل اللي في ايدي عشان اخرج

الظابط: انا حاجيب لك من الاخر عشان ما عنديش وقت لك.. مافيش اي حاجة ضد النظام ده حتمشي في البلد، احنا اللي حاكمين البلد دي فاهمني

الشيخ محمد: يا باشا انا عملت ايه ضد النظام؟

الظابط: انت كويس يا شيخ محمد، والناس بتحبك، واحنا حنرجعك تخطب وتطلع شرايط وتعمل كل اللي انت عايزه

الشيخ محمد: يا باشا انا مستعد اسيب البلد، لا عايز اخطب ولا عايز اعمل حاجة

الظابط: لا حترجع وحتخطب وحتعمل كل حاجة، بس تنسق معانا

الشيخ محمد: ازاي يا باشا؟

الضابط: يعني الناس بتحبك، اولا احنا بس عايزينك تبعد عن العمل الخيري شوية، وتروح المسجد، انت الناس بتحبك وبتتلم حواليك، حتلاقي عيل جاي بيقول لك نفسي اجاهد، عيل بيكلمك عن ظلم الحاكم، بيسألك اسئلة سياسية.. مش حتعمل حاجة، بس تقول لنا اسمه، وما تخافش مش حيتئذي

الشيخ محمد: رب السجن أحب إلي مما يدعونني إليه.. يا باشا انت عايزني ابلغ في الناس عشان تعملوا فيهم اللي عملتوه فيا؟

الضابط: باقولك مش حيتئذي

الشيح محمد: لو كنتوا قلتوا لي الكلام ده قبل ما ادخل السجن كنت صدقت ويمكن كنت قبلت، بس بعد الجحيم اللي شفته هنا يا باشا اعمل في الناس اللي اتعمل فيا؟ انا باكلمك وانا بانزف يا باشا

راح الظابط شاتمه شتيمة قذرة اللي نقل لي ما رضيش يقول لي هي ايه، ورجعوه للزنزانة

وبعدين رجعوه من امن دمياط لامن الدولة في القاهرة

وانا باعيط دلوقت

ملحوظة: النص من مصدر شديد الثقة

وحسبي الله ونعم الوكيل

انا مش طالبة منكم حاجة.. مش طالبة منكم غير ان البوست ده يتوزع على اوسع نطاق، وربنا شاهد علي اني نقلت كل اللي جالي بامانة
تحديث:
عشان انا مشهدة عليا ربنا بس فيه جملة نسيتها في الحوار
لما الظابط الاخير عرض عليه انه يبلغ اسامي العيال اللي بتتكلم في السياسة وقال له مش حاعمل الناس اللي اتعمل فيا قال له حاجة كمان وغالبا هي دي اللي خلت الظابط يشتمه قال له:
انا واحد اكاديمي، نابغ في دراستي وباعمل ماجيستير، عايزني اشتغل عندك مرشد؟ ده ما يليقش بيا
ويمكن عشان كده الظابط شتمه لانه افتكره بيتنطط عليه

افرجوا عن طل

2010-09-13T04:35:00.003+03:00

طل الملوحي لم تعقد الصفقات مع الصهاينه

لم تعرقل جهود سلالة الاسد لتحرير الجولان

قالت كلمة حق ارادت بها حق

فكان جزاوءها الاختفاء القسري

في سجون رئيس بالصدفة و الوراثة

تعاطف مع طل :

قالت المنظمـة العربيـة لحقـوق الإنسـان في سوريا أن جهاز أمن الدولة استدعى بتاريخ 27/12/2009 الآنسة طل بنت دوسر الملوحي لسؤالها عن مقال كانت كتبته ووزعته على الإنترنت ، وأضافت المنظمة في بيان ورد الى المرصد السوري "بعد أيام من استدعائها حضر إلى منزلها عدد من عناصر الجهاز المذكور وأخذوا جهاز الحاسوب الخاص بها وكل ما يتعلق بذلك ، ومنذ ذلك التاريخ وبعد مرور أكثر من شهرين لم تعد إلى بيتها وذويها ، على الرغم من مراجعة أهلها للجهاز المذكور عدة مرات دون جدوى" .

جدير بالذكر ان المدونة الشابه طل الملوحى من مواليد مدينة حمص عام 1991 أي لم تبلغ العشرين من عمرها وهي تحضر لتقديم فحوص الشهادة الثانوية وتعتبر من المتميزات في دراستها ومعلوماتها وشدة ذكائها وقد بدأت بكتابة الشعر والمقالات منذ عدة سنوات وجميع من اطلع على كتاباتها كان يتوقع بأنها تتعدى الأربعين عاما للأفكار والآراء التي كانت تطرحها وحكمة مناقشتها للكثير من الأمور العامة والجرأة التي تتحلى بها .

ورأت المنظمــة العربية لحقوق الانسان ضرورة الإفراج الفوري عن طل الملوحي وعودتها إلى منزلها وأهلها للاستمرار في استعدادها لتقديم فحوص الثانوية التي أضحت قريبة ( إن كانت بعد هذا الاعتقال لا تزال تتمتع بنفسية وصحة تؤهلها لذلك ) واعتبرت هذا الاعتقال غير مبرر لأي سبب كان .

المصدر : المرصد السورى

الموقع الرئيسى لحملة الافراج عن طل

وقع للافراج عن طل ملوحي

ارسل رسالة لاسماء الاسد للافراج عن طل ملوحي

مجموعة طل ملوحي على الفيس بوك

المدونات المشاركه فى حملة افرجوا عن طل :

مدونة مناكيش

مدونة النمر الاسود

مدونة طراطيش كلام

مدونة جبهة التهييس الشعبيه

مدونة قصص من حياتى

مدونة حكايات مصريه

مدونة العميد ميت

مدونة دهوم

مدونة رسايل البحر

مدونة ريم

مدونة ملقتلهاش عنوان

فالفـرحـة فـي يـوم الـعـيد لـمـا نعـطـي مـنـها تـزيد

2010-09-09T23:00:00.000+02:00

يـحـكـى أن هنـــاك مـديـنـة طـل علـيها هـلال الـعـيـد
وامـتـلاءت طرقـاتـها زيـنـة لـبس الكـل ثـوب جـديـد
الا أن هــنـــاك ســـؤال مــاذا يــشـغــل هـالأطــفــال
لـما أخـذوا الأغـراض خـلـسـة كل كان يـسأل نـفسـه
قـبـل وجـبـة الـعـشـــاء صعـدوا غـصــن الــبــازلاء
وجـدوا الـغـول هـنـاك وحـيـد ودعـوه لـلـقـاء العـيـد
وكـشـفوا عن كرسـي جديد جلـس عليه الغول سعيـد
فالفـرحـة فـي يـوم الـعـيـد لـمـا نعـطـي مـنـها تـزيـد

إحالة العمال للمحاكم العسكرية موت وخراب ديار

2010-08-29T11:39:00.012+02:00

يرجى توقيع البيان هنا

لا تكتفي الدولة بتشريد وإذلال وقتل العمال بدم بارد نتيجة سياساتها المعادية لهم، بل تسعى أيضا لإسكات أصواتهم باستخدام أكثر الأساليب قهرا بتقديمهم للمحاكمة العسكرية التي لا يتوافر بها أي ضمانات أو حقوق دفاع.

يحاكم الآن ثمانية عمال من مصنع 99 الحربي (شركة حلوان للصناعات الهندسية) أمام المحكمة العسكرية بتهم إفشاء أسرار عسكرية والامتناع عن العمل والاعتداء بالضرب على اللواء محمد أمين رئيس مجلس إدارة الشركة، كان العمال الثمانية قد تم القبض عليهم مع 17 آخرين من زملائهم عقب اعتصام عمال المصنع يوم 3 أغسطس الجارى احتجاجا على انفجار أنبوبة نيتروجين ( غلاية ) داخل المصنع مما أدى إلى وفاة العامل أحمد عبد الهادي(37 عاما) وإصابة ستة عمال آخرين بجروح.

وعلى أثر تلك الاحتجاجات سعت أجهزةالدولة إلى ترهيب العمال وتأديبهم لتجرأهم على الاحتجاج فاتخذت ضد 25 عامل إجراءات تحقيق تلاها إحالة 8 من عمال المصنع إلى النيابة العسكرية تمهيدا لتقديمهم لمحاكمة عسكرية رغم أنهم عمال مدنين ورغم أن الأمر يتعلق بنزاع عمل تحكمه القوانين العادية.
وقامت النيابة العسكرية يوم السبت الموافق 14 أغسطس بحبسهم أربعة أيام على ذمة التحقيقات ثم تجديد حبسهم مرة أخرى يوم الثلاثاء الماضى، ثم تحويلهم للمحكمةالعسكرية التى بدأت أولى جلساتها الأحد 22 أغسطس ليتم تأجيل المحاكمة إلى الأربعاءالمقبل، كما رفضت النيابة العسكرية إعطاء المحامين صورةملف القضية للإطلاع عليه، وتحددت جلسة مفاجئه سريعة للمحاكمة.

وبالرغم من ادعاء وزيرة القوى العاملة عائشة عبد الهادي دائما في جميع المحافل بأنها تقف بجانب حقوق العمال، إلاأنها لم تحرك ساكنا إذاء ما يحدث للعمال، هذا بالإضافة للصمت المعهود من اتحاد عمال مصر و تقاعصه عن الدفاع عن حقوق العمال والتصدي لما يحدث لهم من انتهاكات.

ونعلن نحن المتضامنين مع العمال رفضنا لتقديم عمال مدنيين لمحاكمة عسكرية، وتطالب بإحالة القضية للقضاء العادي، وتطالب أيضا بمحاكمة المسؤلين عن موت العامل ومحاكمة إدارة المصنع التي تسببت في أكثر من انفجار وإصابات ووفيات بين العمال بسبب الإهمال، ونحذر أن تكون المحاكمة صورية وحكمها جاهز سلفا، ونعلن بدأ حملة تشهير واسعة محليا ودوليا ضد المسؤلين عن تلك المذبحة

--------
المشاركون في الحملة
جبهة التهيس الشعبية

me myself and I

ماحدش فاهم

جنين

دهووم

انسانة

طراطيش كلام

غريب

ياباني

ميزو

ثورة مصر

صرير قلم

ادهم

مدونة شاب مصري

الحلم العربي

رسائل البحر

أنا وهؤلاء

ايجي فويس

مدونة دودا

مصري

تأملاتي

مصري في فرنسا

مركز الدراسات الاشتراكية

تضامن

المنتدى النقابي الح ر

اخوان اون لاين (اياد جاي؟ :)

هرش مخ

حكايات مصرية

كومة ورق

مصر الحرة

Mostahfazana

اما نعيمة

المحلة مصر

مصريون من اجل سيادة القانون

ذات

Marwa Learns

مدونة بهية

محمد نجم

الخوجة

زنوبيا

مناكيش

ونرجوا من الجميع نشر البيان في كل المدونات

عشان ماننساش

2010-08-16T00:43:00.000+02:00

ضحية جديدة للتعذيب في مصر بلد اللفافات

2010-07-07T03:51:00.000+03:00

اللي في الصورة ده محمد صلاح
طيب ايه اللي حصل لمحمد صلاح؟
محمد سواق توك توك في المنصورة عنده 18 سنة وركب معاه اتنين مخبرين عايزين يروحوا مدرية الأمن ولما محمد وصلهم رفضوا انهم يدفعوا الأجرة ومحمد رفض انه يتنازل عنها فما كان منهم غير انهم أخدوه على المدرية وعذبوه وفي الاخر رموه من الشباك لكن الحمدلله محمد نزل عايش
طبعا الحكومة جهزت ليستة التهم وكان أولها انه اتقبض عليه لأنه سايق توك توك من غير ترخيص رغم ان مفيش ترخيص للتوك توك في مصر أساسا ولما اكتشفوا ان ترخيص التوك توك مش موجود قالو انه كان معاه لفافة بانجو أه والله لفافة بانجو مش عارفة هي نفس اللفافة اللي خرجوها من جثة خالد الله يرحمه 3 مرات ولا دي واحدة جديدة
أنا الصراحة مش عارفة ايه البلد اللي شاببها غاوين لفافات دول من سن 18 لسن 28
لمتابعة أخبار محمد في المستشفى والضغوط اللي بيتعرض ليها هو أهله عشان يغير أقواله ويقول ان محدش ضربه وانه نط من الشباك لوحدة عشان يهرب باللفافة ادخل عند احمد

تدوينة حداد لخالد سعيد

2010-06-25T00:32:00.003+03:00

رغم إن تقرير اللجنة الثلاثية للطب الشرعي حاول يضيع حقك ياخالد وحاول إنه يحمي كلاب النظام بس ماتقلقش إحنا مش هنسكت ولا هنهدى لحد ماللي قتلك يتحاكم
النهاردة تدوينة حداد على خالد سعيد وكل شهداء التعذيب في مصر والنهاردة كمان كل المصرين هينزلوا في كل المحافظات الساعة 6 ونص عشان يقفوا وقفة صامتة على الكورنيش حداد عليهم
إحنا مش هنصدق كلامهم ومش هنسكت عن حق اللي اتقتلوا غير لما يرجع

عم عبد السميع الله يرحمه ضحية جديدة للفافة

2010-06-17T00:35:00.002+03:00

وطبعا عم عبد السميع الله يرحمه هيطلع كان صاحب مزاج وكان مهرب معاه لفافة بانجو أو حشيش الحجز ولما الظابط كان بيمر عم عبد السميع اتخض فبلع اللفافة واتخنق منها ووقع على راسه قام مات
الموضوع منقول عن انجي
اشترك في صفحة عم عبد السميع علي الفيس بووك هنا

ضحية جديدة من ضحايا التعذيب في أقسام الشرطه
الحكاية عرفتها من النت وكانت أخبار وكلام متضارب ومن غير مصدر بس وصلت لرقم بنت الضحية اسمها رضا كلمتها وفهمت منها اللي حصل لوالدها واتفقنا علي ميعاد أقابلها ونسجل وهي تحكي اللي حصل لأبوها والميعاد الساعه 6 م في مدينة نصر الحي العاشر أمام شبراوي فضلنا ندور عليه نص ساعه لحد ما وصلنا أنا ومصطفي الشامي ومحمود سامي
أنا كنت متحمسة جدا لمقابلتها خصوصا انها في التليفون كانت مش خايفة ووافقت تسجل وتتكلم وقولتلها تجهز صوره لوالدها ونسجل مع اهله ولو فيه شهود شافوا اللي حصل مع رئيس الحي وقالتلي مش هنسيب حق أبونا وحكتلي بالتفصيل حكايته في التليفون خاصة بعد ما الكلام بدأ يتنشر إنه صاحب عربية كبدة وكانت خناقة مع الحي
الحكاية الحقيقية من بنته رضا
عم عبدالسميع صابر 60 سنة عنده 6 بنات منهم رضا
عنده كشك قدام الحي واخده من 40 سنه وهو مصدر رزقه له ولعياله
مره رئيس الحي( الليثي) معدي مش عجبه منظر الكشك نزل هو والمهندسين وطلب ازالة الكشك ,عم صابر قاله ازاي ده مترخص والورق كله موجود وسليم ورئيس الحي طبعا أمر بالإزاله وجاب البلدوزر وشال الكشك
عم صابر كل جريمته انه قاله حرام عليك هجيب عشايا منين أنا وعيالي هأكلهم منين
وطبعا معالي رئيس الحي إضايق فخلى المهندسين ياخدوه القسم وعمله محضر تعدي علي رئيس الحي والمأمور قعده شوية في القسم وخرجه
روح وهو مش عارف هيجيب منين عشاه وعشا عياله بعد ما أزالو الكشك
قرر إنه يقعد في الشارع اللي كان فيه الكشك وحتي الشارع حرموه منه .
رئيس الحي معدي لاقاه قاعد في الشارع قاله انت تاني قوم من هنا
وخلى المهندسين يمشوه بالعافيه
الجريمة الشنعاء اللي ارتكبها عم صابر ودفع تمنها حياته إنه قال لرئيس الحي إيه الإفترا ده إنت راجل مفتري وكانت أخر جملة قالها عم صابر وهو حر بيدافع عن لقمة عيشه مش بيطلب تعديل دستور ولا بيطلب إنهاء حالة الطوارئ ولا بيطلب إسقاط نظام فاسد ومنظومة فاسدة
كل اللي طلبه الكشك اللي بياكل منه وبيأكل منه عياله
رئيس الحي معالي الليثي باشا خده القسم ووصي عليه دخل قسم أول مدينة نصر وخرج منه في اليوم الخامس جثة مشوهة
خلال 4 الايام كان بناته وولاده بيسالوا عليه وليه حاجزينه يقولولهم تشابه أسماء وبيكشفوا علي إسمه وهيخرج
طيب عايزين نشوفه والدنا ونطمن عليه ده راجل كبير دخلوله أكل بيردو عليهم بإهانه وممنوع وبره وإلا تتدخلوا معاه
ويخرجوا من القسم ومعاهم أمل إن والدهم هيخرج معاهم تاني يوم لحد اليوم الخامس كلموا أهله وقالولهم تعالوا
استلموا والدكم والبقاء لله توفي
وقع علي الارض اتخبط وماات
استغربوا معاملة الظباط ليهم بعد الإهانه في الأيام الأولي دلوقتي بيعاملهم كويس وبيقولوهم سرعوا في اجراءات الدفن والبقاء لله وإكرام الميت والكلمتين اللي عارفينهم
دخلوا يستلموا جثة والدهم برغم الحزن والوداع من غير سلام لكنهم مؤمنين بالله وقالوا قدره ودخلوا شافوا والدهم لكن الصدمة كانت أكبر من خبر وفاته
الصدمة والدهم 60 سنه دماغه مفتوحة وعلامات ضرب علي ضهره وجسمه وطفي سجاير في رجله وضهره
ابنه انهار وبناته انهاروا لما شافوا والدهم وأثار التعذيب علي جسمه والدكتوره قالتلهم إنه مات من التعذيب والخبطة علي دماغه بألة حادة أو بطبنجة مش واقعة علي الأرض زي ما بيدعوا
الحكاية وقفت لحد هنا وقالتلي انا عايزه أجيب حق ابويا قولتلها حق أبوكي وحقنا كلنا هناخده ومش هنسكت وحددنا ميعاد الساعه 6م
ورحت الميعاد أنا والشامي وسامي
العزا كله لو 30 بيعزو ف28 واحد مخبرين وظباط من ال30
المنطقه كلها متلغمة مخبرين وظباط في العزا وفي الشارع
انا دخلت عزيتهم ورضا قالتلي انت انجي حمدي تعالي وخدتني علي جمب قالتلي محدش يعرف هنا اللي حصل احنا بس بناته اللي نعرف قلتلها طيب تعالي نطلع فوق نتكلم و نسجل طبعا عينها مش في راسها عينها على المكان وعلى المخبرين ومرعوبة
قولتلها يالا يا رضا قالتلي طيب مش تتطلعي صورتي صوت بس قلتلها طيب وجت واحدة متعصبة في البداية وانت مين وعايزة ايه ومش عايزين صحفين هنا قولتلها أنا مش صحفية أنا إنجي حمدي من شباب 6 ابريل وهنزل موضوع والدكم واللي حصله في موقع علي النت وفضلت ساعة احلفلها إني مش صحفية ولا بعمل ده بأجر خصوصا انها كل ما أمسك الموبايل تترعب وتقولي لو صورتي هرفع عليكي قضية واتكلمت معاها بهدوء وفهمتها إنه لازم تتكلم ولازم نبطل خوف وده في مصلحتها ومصلحة أبوها قالتلي كل اللي حواليكي وبيبوصلنا مخبرين وظباط امشي من هنا إحنا مش ناقصين مشاكل وعرفت من رضا إنهم متتهددين ورعبينهم وخايفين يتكلموا او ينطقاو وكل شوية تيجي بنت من بناته تقول لاخواتها الواقفين معايا إحنا قولنا إيه قولنا ده قضاء ربنا والحمدلله راضين
اتفضلي امشي من هنا مش ناقصين مشاكل لو مش خايفة علي نفسك إحنا خايفين وخسرنا أبونا ومش عايزين نخسر ولادنا أو رجالتنا والوحيدة المتفهمة هي رضا قولتلها إحنا متفقين نصور وتتكلمي ونفضحهم لازم تفضحوهم انتم أصحاب حق انتم الأقوي خايفين من إيه
و رضا متحاصرة منهم زيي بالظبط وممنوعة تتكلم معايا حتي بكمية الحجج اللي عملتها عشان أخد رضا لوحدها وهما حواليها ويقولولي امشي من هنا اتكلم معاهم تقولي حقنا هناخده ولو مش بالقانون إحنا صعايده وهناخده بطريقتنا
بدأ المخبرين ينتشروا والظباط المدني قررت إني مش أستسلم لخوفهم ودخلت لعزا الرجالة لقيت الشامي ومعاه بن الضحية بيحكيله اللي حصل لما شاف جثة ابوه
قعدت معاهم قلتله تسجل وتحكي اللي حصل ولا خايف زيهم قالي وطي صوتك عشان اللي في وشنا دول مخبرين وظباط وهسجل معاكم وأنا مش خايف وفعلا أخدته وقمنا من العزا وأخدنا كرسين وهو بيكلمني بصوت واطي بيحكيلي التهديدات والرعب اللي شايفنه من ظباط القسم ولو اتكلمو هيلبسوا قضايا بس برضه الولد مش خايف وأول ما الكامير طلعت المخبرين والظباط قاموا وأخته جت زعقت جامد جداا وقالتلي برضه تاني امشي من هنا ولو صورتي صورة واحدة أنا هرفع عليكي قضية وانا برضه بقنعها انها لازم تتكلم قالتلي بأعلي صوت بره امشو بره وربنا لانده الظباط والمخبرين وأسيبهم عليكي إمشي من هنا الولد زعقلها قالها محدش يقدر يجي جمبهم وأهلها اتلموا واعتذرولي واني لازم أقدر حالتها أنا مقدرة بس مخنوقة إنها خايفة تتكلم قالتلي برة امشوا من هنااا والمخبرين والظباط بيتفرجوا والاول مش كانوا موافقين أتكلم مع ابنه أو يمشي معانا بس لما هي عملت كده وكشفتنا الولد خاف علينا وقالهم هطلعهم علي أول الشارع
وطلعنا ببركة دعاء الوالدين وابنه قالنا علي التهديدات ويلبسوا قضية مخدرات أو سلاح وكمية الرعب اللي هم شافينه بس مش هسكت ولازم أخد حق ابويا وهخسر إيه انت عارفة يعني إيه أشوف ابويا في سنه ده أبويا اشوفه كده علامات الضرب والسجاير في جسمه ودماغه محفورة نص إيدي تدخل جوة الحفرة اللي في دماغه
ده ابويا عمل إيه عشان يعملوا فيه كده كانوا بيتسلوا عليه ال 4 أيام بس وربنا ماهسيب حقه مهما عملوا يلبسوني قضية يموتوني برضة مش هسيب حقه وكان بيتكلم بإنهيار وطبعا المخبرين واقفين وهدناه أنا والشامي واتكلمنا معاه والشامي خد رقمه وقالنا هنتقابل تاني بس مش هنا ووعد مش هسيب حق أبويا ولازم تقفوا معايا وخلوا بالكم علي نفسكم أوي وأهله بدأو يجولنا والمخبرين طبعا راشقين فيكل مكان
وخرجنا من المنطقه وركبنا العربية إاحنا العين كلها علينا
لكن طول الطريق أنا والشامي بيدور في دماغنا نفس السؤال
الخووف ممكن يعمل كده في الناس؟؟
الخوف والرعب اللي هم عايشينه من مين؟؟
من اللي المفروض بيحمونا
اللي المفروض هم الي يحسسونا بالأمان
لكن راح الأمان مع نظام مبارك الفاسد
طول الطريق وإحنا بنفكر الناس دي ممكن فعلا تاخد حقها؟؟
الناس دي أهلي وأهلك لا هم من كبار وأعيان البلد ولا هم من حرامية البلد
أهلي وأهلك اللي ماشيين جنب الحيط وبيدورا على أكل عيشهم
عم صابر برضة بيدور علي أكل عيشه ومات مشوه
مات غدر
مات متعذب
مات وذنبه في رقبتنا
هنعرف نجيب حقه وحق خالد وحق الألاف اللي في الأقسام والسجون وكلاب الشرطة بيتسلوا عليهم وبيمارسوا أبشع أنواع الشذوذ وهم عارفين إنهم أقوي وإنهم في حماية العادلي وممكن كمان ياخدوا مكفأة لو حكاية عم صابر فضلت مدفونة معاه

خالد اتقتل مع سبق الاصرار والترصد

2010-06-11T17:04:00.003+03:00

تحديث:

ده الفيديو اللي خالد اتقتل بسببه
المفروض ان الفيديو بيوضح ظباط القسم ومخبريه وهم واقفين قدام ضبطية حشيش وواحد فيهم بياخد جزء منها لزوم المزاج ورئيس المباحث بيعرض علي واحد تاني لفة
حسب المعلومات إن الضبطية دي بتتفرق عليهم هي والفلوس المضبوطه واللي كانو بيعدوا عددهم عشان تتقسم عليهم وبيسيبو جزء بيعملو بيه المحضر واللي صور الفيديو ده واضح جدا إنه واحد منهم وإن الفيديو اتسرب بعد كده ووصل لخالد اللي بدوره وزعه علي أصحابه وكان ناوي يرفعه علي النت بس كلاب الداخلية عرفوا ودخلو عليه السايبر وهو رايح لصاحبة وكانوا عايزين يفتشوه عشان ياخدو الميموري وهو رفض وطبعا انتم عارفين الباقي
الفيديو ظاهر فيه المخبر اللي متهم في قتل خالد هو اللي لابس الطاقية
طبعا انشروه في الدنيا كلها وافضحوهم عشان يتحاكموا ويارب يتعدموا

ده خالد كان عنده 28 سنة ومقيم بالأسكندرية
اللي حصل إن خالد دخل سيبر نت ودخل اتنين مخبرين وكانوا عايزين يفتشوه، ولأن خالد عارف حقوقه كويس وكمان عارف هو بيعمل ايه وحط تحت بيعمل ايه دي 100 خط رفض انه يتفتش لأن طبعا المخبرين مش معاهم إذن بتفتيشه
كان رد المخبرين إنهم مسكوا خالد وشلوا حركته وبدأوا يضربوه ضرب مبرح وركلات في البطن والصدر والوجه، ثم إقتادوه لبوابة العماره المجاورة وأكملوا ضربه ، خالد كان أغمى عليه وبدأ ينزف من فمه وأنفه واعتقد المخبرين إن خالد بيمثل فخبطوا راسه في السلم عشان يفوقوه، وطبعا خالد مافقش فشالوه وحطوه في البوكس وطلعوا بيه علي القسم وبعد مرور ربع ساعة رجعوا ورموا جثته من مكان ماخدوه
وبعد كده جت قوات أمن لتفتيش المنطقة والبحث عن موبيل وكارت ميموري ظن الناس الموجودين إن أحد الشهود صور الجريمة
طيب نرجع للأول تاني
خالد كان حصل علي فيديو بيفضح ظابط واتنين مخبرين أثناء اتجارهم في المخدرات وقام بتوزيعه علي أصدقاءه في المنطقة وكان ناوي يفتح مدونة عشان ينشر عليها الفيديو عشان يفضح اللي حصل, المخبرين عرفوا ودخلوله عايزين يفتشوه عشان ياخدوا منه الموبيل وهو طبعا رفض لأنه عارف حقوقه وعارف انه بيصورهم، ومن الواضح إن عملية التفتيش اللي حصلت بعد قتله كانت علي الكارت ميموري بتاعته عشان الصور اللي عليها
أخو خالد لما عرف اللي حصل راح القسم عشان يقابل حضرة الظابط اللي قاله أخوك كان مدمن مخدرات ومات بجرعة أقراص مخدرة زيادة في الحجز
طيب ياحضرة الظابط عشان الموضوع يبقي مظبوط قول انه كان مدمن أقراص مفجرة، وانه بعضها انفجر في معدته مما أدي للكسور اللي في جسمه والنزيف الداخلي وبعضها انفجر في فمه قبل بلعها مما أدي لكسر جمجمته وقطع شفته وخلع أسنانه وتمزيق شعره، أقراص مخدرة ايه اللي تحول الوجه البرئ ده للصورة البشعة اللي شفناها كلنا؟
أخوه طبعا حس إن الموضوع بيطبخ وان حق خالد هيضيع فما كان منه الا انه طلع علي السفارة الأمريكية بما انه بيحمل الجنسية الأمريكة وطالبهم بالتدخل لحفظ حق أخوه من الضياع
خالد زينا، بيحاول إنه يدافع عن البلد دي وعن شباب البلد دي، حاول يفضح اللي بيروجوا المخدرات رغم إنهم المفروض يحموا شباب مصر منها
احنا ازاي بقينا كده ووصلنا للحال ده، إزاي الناس وقفت تتفرج عليه وهو بيتقل ومحدش اتدخل غير انهم توسلو للمخبرين انهم يسيبوه، وازاي بقى اللي عايز ياخد حقه أو حق اخوه لازم يكون معاه جنسية تانيه تحميه؟
يعني ايه يهددوا كل الشهود إن لو حد اتكلم مع الاعلام هيعتقلوه، إيه الغابة اللي إحنا عايشين فيها دي؟
اللي قتلوا خالد قتلوه عشان مايتكلمش، يعني ماعدش موضوع تعذيب أفضى إلي الموت، لأ بقى قتل مع سبق الاصرار والترصيد ، والاتنين مخبرين اللي مسكوه وحضرة الظابط اللي كان في القسم لازم يتحاكموا أسماء المعتدين على خالد سعيد من واقع اطلاع محامى النديم على تحقيقات النيابة العامة رقم 7438 لسنة 2010 ادارى سيدى جابر أمين شرطة سرى محمود صلاح محمود 26 سنة ورقيب سرى عوض اسماعيل سليمان ومحرر محضر التحريات بالقسم الرائد محمد ثابت وقائد سيارة البوكس الرائد أحمد عثمان "
احنا عايزين حق خالد ومش هنسكت غير لما ناخده وغير لما يتعدم جلاده
اضغط هنا للاشترك والتضامن ومتابعة أخبار خالد
وهنا لو عايز تشوف صورة قبل حادثة تعذيبة
وعشان تشوف صور خالد بعد التعذيب واللي لازم تشوفها رغم بشاعتها عشان تدرك اللي حصل اضغط هنا

أسطور الحرية، غزة، مصر

2010-06-02T02:48:00.000+03:00

أنا مش هتكلم عن أسطول الحرية ولا عن الغاية النبيلة السامية اللي كان بيمثلها
أنا كمان مش هتكلم عن الهجوم الارهابي الصهيوني علي الاسطول ولا هتكلم عن الجنود اللي كانو بيطلقوا الرصاص أثناء عملية الإنزال ولا عن إحتلال الأسطول واقتياده تحت القوة الجبرية والعسكرية من المياة الدولة لاسرائيل
كمان مش هتكلم عن تماسك المتضامنين بداخل الأسطول ولا عن المرأة التركية اللي كانت مكبلة زي كل رهائن الأسطول وجلست بجوار جثة زوجها تنتحب في صمت ولما حاول باقي الرهائن التخفيف عنها طالبتهم بعدم مواستها لأنها قدمتة هدية لغزة
مش هتكلم عن الرجل الألماني اللي عدي (80 سنة) واللي بيختلف معانا في الجنسية والديانة واللغة واللي رفض شكر النائب حازم فاروق له وقال إن ده واجبه اللي بيتحتم عليه انه يعمله بصفته إنسان حر
أنا كمان مش هتكلم عن القتلى ولا الجرحى اللي محدش يعرف عددهم ولا جنسيتهم للآن
ومش هتكلم عن تركيا اللي خرج منها الأسطول لفك الحصار عن غزة ولا هتكلم عن قطع أردوغان لزيارته لأمريكا الجنوبية ولا عن جلسة مجلس الأمن الطارئة اللي تركيا طالبت بها
وأكيد مش هتكلم عن أمريكا وحمايتها المستمرة لإسرائيل من تحمل جميع مسئوليات أعمالها الاجرامية
ومش هتكلم عن المظاهرات اللي عمت جميع أنحاء العالم ولا الناس الجديده اللي انضمت للقضيه ولا حتي عن السفينة رتشيل كوري اللي معرضة إنها تلاقي نفس مصير السفينة مرمرة ولا عن المراسلين الدولين اللي إنضمولها بعد أحداث أمس
وأكيد بردو مش هتكلم عن بيان مصر اللي بيدين إستخدام العنف المفرط وكأن العنف اللي مش مفرط ماشي ومفيش مشاكل فيه
ولا هعلق علي قناة النيل للأخبار اللي دونا عن العالم كله حملت حماس مسؤلية اللي حصل لأنها رافضة الافراج عن شاليط الأسير الصهيوني لديهم وإحنا عظم أسرانا مش لاقي اللي يدفنه
أنا كمان مش هتكلم عن خطاب أوردغان قدام البرلمان التركي ولا إنه وجه لاسرائيل خطاب لم يوجهه لها أحد منذ انشائها ولا هعلق على تأكيده بضرورة معاقبة الجاني ولا اجتماعه بوزير دفاعه مرتين للآن ولا علي تأكيده بأن تركيا عدو لدود كما هي صديق جيد
أنا مش هتكلم عن كل ده لكن هتكلم عن فتح مصر لمعبر رفح ومش هقول إن ده ماحصلش غير بعد خطاب أردوغان واللي خلى شكل العرب كلهم وحش اوي ولا هقول ان كان أقل رد علي مذبحة أمس هو فتح المعبر
أنا بس هقول إن مصر فتحت معبر رفح لأجل غير مسمى وماعرفش ليه قالو لأجل غير مسمي وكأنه ممكن يتسمى في أي وقت وليه مكنش فتح نهائي
أنا هتكلم عن مصر اللي أخيرا فاقت من نومها بعد ماكانت بتطالب اسرائيل امبارح برفع الحصار عن غزة وكأنها ماتعرفش إنها تقدر ترفعه من جانبها وبمفردها
أنا بس نفسي أعرف لما مصر تقدر تفتح المعبر لأجل غير مسمى وفي أي وقت هي عايزاه ليه المعبر ده ظل مقفول طوال الفترة اللي فاتت وليه أهل غزة بيموتوا من الجوع وليه شرفاء استشهدوا في محاولة لكسر الحصار ده وانقاذ الناس دي من الموت جوعا
لما مصر تقدر تعمل كده ليه قالت قبل كده إنها ماتقدرش؟؟؟
أتمني إن حكومة مصر تكون فاقت واستعادت ولو شئ قليل من عقلها وانسانيتها وإن المعبر يفضل مفتوح والحصار يتم رفعه نهائيا من جهة مصر على الأقل

الأمن يعتدي على عمال «أمونسيتو»

2010-05-24T15:23:00.001+03:00

جهة مجهولة تقوم بازالة روح شاكيد من على موقع اليوتيوب

2010-05-10T19:46:00.000+03:00

البوست ده منقول من عند نوارة

فيلم روح شاكيد هو الفيلم اللي فيه اعترافات الجنود الاسرائيليين بقتل الاسرى المصريين
الفيديو ده كان منتشر على اليوتيوب وابتدت حاجات منه تتشال زي الفيديوهات اللي هنا واللي هنا
وفيه فيديوهات تانية اتشالت وكانت لسه موجودة واتفرجت عليها اول امبارح بس
المهم احنا عايزين بسرعة نلحق نحمل الفيديوهات اللي لسه باقية لان اسرائيل ناوية ترفع قضية على الدستور لانها فتحت موضوع الاسرى المصريين الظاهر لما عرفوا ان فيه قضية حتترفع من جانبنا بيسبقوا
رجاء تحميل الفيديوهات اللي هنا
وهنا
وهنا
وهنا فيديو فيه شهادات المصريين بس اهم حاجة شهادات الاسرائيليين نفسهم
وده اللي مكتوب على الويكيبيديا قبل ما يتشال عشان لو شالوه يبقى عندنا،.

روح شاكيد (فيلم)
من ويكيبيديا، الموسوعة الحرة
المراجعة الحالية (غير مراجعة)
اذهب إلى: تصفح, البحث

روح شاكيد هو فيلم وثائقي من إنتاج إسرائيلي، يعرض لما قامت به وحدة من الجيش الإسرائيلي بعد انتهاء حرب يونيو 67، حيث قامت بقتل 250 أسيرا مصريا عزلا ودفنهم في سيناء. وجاء في الفيلم أن بعضا من الجنود المصريين دفنوا أحياءا. الفرقة العسكرية الإسرائيلية "روح شاكيد" قادها بنيامين بن إليعيزر الذي شغل لاحقا عدة مناصب وزارية. أثار الفيلم انتقادات واسعة في مصر [1]فقد قام التليفزيون الإسرائيلي بعرض الفيلم الوثائقي وحدة شاكيد.وتضمن الفيلم الجرائم والمجازر الرهيبة التي قام بها المجرمين الإسرائيليين ضد الاسري العزل من المصريين في حربوتبدأ القصة بالفيلم الذي يصف أحداث نهاية حرب 1967 التي اضطرت فيها وحدة شاكيد لمطاردة وتصفية عناصر كوماندو مصريين كانوا في قطاع غزة وحاولوا الوصول إلى سيناء، في أثناء المطاردة لعدة أيام بواسطة طائرات الهليكوبتر، وفي النهاية، "تم إحصاء حوالي 250 جندي مصري كوماندو قتيلا" 1967 ذالك الفيلم يمثل جزءا صغيرا من الواقع فهناك العديد من الروايات عن قتل الاسري المصريين منها شهادة لجندي مصري، أُسر مع 50 آخرين في منطقة في جوار قلعة العريش، قال «أثناء تجميعنا في مطار العريش يوم 8 حزيران 1967 أمرونا بالنوم داخل حظائر الطائرات بعضنا فوق بعض، وفي الصباح توفي 70 أسيراً من الاختناق وتم دفنهم في حفر داخل المطار».وروى جندي آخر في سلاح المشاة المذبحة التي قامت خلالها الدبابات الإسرائيلية بمطاردة نحو 150 من الأسرى المصريين ودهسهم بلا رحمة. قال «بمجرد استسلامهم قامت الدبابات الإسرائيلية بمطاردتهم ودهسهم مثل العصافير». والجندي، الذي يحمل الرقم العسكري 46295، قال «أثناء وجودنا في معسكر عتليت، روى لي أحد الجنود المصريين أن أرييل شارون داس بالدبابات على بعض الجنود فقتلوا جميعاً». وقال أسير آخر «أثناء وجودنا في معسكر بئر السبع، شاهدتهم يقومون بدفن مصابين من الجنود الأسرى وهم أحياء، بعدما يأمرونهم بحفر قبورهم ثم يردمون التراب عليهم». ولعل أخطر الاعترافات تلك التي تتعلق بتجارة الأعضاء، حيث شكّل الأسرى المصريون مستودعاً هائلاً لقطع الغيار البشرية، وكان السماسرة يجنون أرباحاً خيالية من بيع الأعضاء في أوروبا وإسرائيل. كما كان طلبة الطب هناك يتدربون على العمليات الجراحية على هؤلاء الأسرى. وقد اعترف أحد التجار، وهو إسرائيلي يعيش في باريس، «لقد رأيت بعيني عشرات من الأسرى وقد شقّت بطونهم أمامي بأيدي طلبة الطب الصغار، واقشعرّ بدني لهذه الطريقة البشعة». وأكبر دليل علي ذلك اعترافات بنيامين بن إليعازر وزير البنية التحتية الإسرائيلي الخطيرة حيث انه كان قائدا في وحدة شاكيد قامت الدنيا ولم تقعد عندما قتل هتلر اليهود في اربيعينات القرن الماضي (الهولوكوست) ونصبت المحاكم للنازيين اما العرب فلا عزاء لهم ليتذكر الإسرائيليون أن جرائم النازى ضدهم إذا كانت لم تسقط حتى الآن من ذاكرتهم فإن جرائمهم لن تسقط من ذاكرة الشعب المصري وأمته العربية
وده لنك يدعوت احرنوت عن روح شاكيد اللي بيتضمن اعترافات الجيش الاسرائيلي بالمذابح
اولا، يتاخد سكرين شوت
ثانيا عايزين حد بيترجم عبري كويس
وانا حانزله هنا لبعدين يمسحوه من العلى الموقع
لو سمحتوا انا ما اعرفش حيعملوا ايه في المدونة بعد البوست ده مدام اتجننوا كده رجاء نشر اللنكات على كل المدونات والمواقع والجروبات واي حد يلاقي اي فيديوهات اتشالت يبلغنا
בעקבות "רוח שקד": בן-אליעזר ביטל הביקור במצרים

המתיחות בין ישראל למצרים עולה. שר התשתיות ושלטונות מצרים החליטו במשותף כי ביקורו של בן-אליעזר שנועד ליום חמישי השבוע, יידחה לפי שעה. הסיבה: הסרט ששודר בשבוע שעבר בערוץ הראשון ובו נטען כי סיירת שקד, בפיקודו של בן-אליעזר, הרגה 250 שבויים מצרים לא חמושים בסיני בתום מלחמת ששת הימים. בתוך כך, זומן שגריר ישראל בקהיר לבירור במשרד החוץ המצרי בעקבות הסרט ובישיבת הפרלמנט כינו אותו שני חברים "כלב" ו"משוּמד"

רועי נחמיאס
עדכון אחרון: 05.03.07, 00:32

שתפו בטוויטרשתפו בפייסבוק
שתף

שר התשתיות, בנימין בן-אליעזר, החליט אמש (יום א') לדחות את נסיעתו למצרים, בתיאום עם הממשל בקהיר. ההחלטה התקבלה בעקבות המתיחות שיצר הסרט "רוח שקד" שהכין העיתונאי רן אדליסט וששודר בערוץ הראשון בשבוע שעבר, ובו נטען כביכול כי סיירת שקד, תחת פיקודו של בן-אליעזר, היתה אחראית להריגתם של 250 שבויים מצרים לא חמושים בסיני בתום מלחמת ששת הימים.

בן-אליעזר היה אמור לבקר במצרים ביום חמישי השבוע לצורך פגישה עם ראש המודיעין המצרי, עומר סולימאן, ופגישות מדיניות נוספות. מלשכת שר התשתיות נמסר: "לאור הפרסומים האחרונים בעיתונות המצרית - שאגב אינם נכונים - ולאור האווירה שאינה נוחה לביקור, הסכימו שני הצדדים לדחות את הביקור למועד אחר בזמן הקרוב".
גם בישראל יש מי שכועס

יוסי שריד: "הרג שבויים מצרים - פשע מלחמה" / רועי נחמיאס

השר לשעבר שריד אמר בראיון לעיתון המצרי "אל אהראם" כי הרג השבויים המצרים הוא "פשע מלחמה שאין עליו התיישנות". שריד נשאל בראיון על פרטים שעלו בסרט תעודה על סיירת שקד, ששודר בערוץ הראשון בתחילת השבוע
לכתבה המלאה

בן-אליעזר העביר תגובה מפורטת לעיתון הממסדי המצרי "אל-אהראם" ובה כתב: "בימים האחרונים התפרסמו בתקשורת בעולם הערבי, ובעיקר במצרים, קטעים מסרט שבו נאמר כי סיירת שקד בפיקוד פואד בן אליעזר הרגה 250 חיילי קומנדו במלחמת ששת הימים, לפני ארבעים שנה.

"אכן, באחד הקרבות נהרגו באותה מלחמה חיילי גדוד פדאיון פלסטיני, שפעל ברצועה כנגד מדינת ישראל, ובייחוד כנגד הסיירת עליה פיקדתי. לא 'נרצחו', כפי שפורסם, אלא נהרגו במהלך קרב. הפקודה שקיבלתי היתה לנהל קרב עם גדוד פדאיון פלסטיני שפעל מתוך הרצועה, שיתק את דרום ישראל וגרם לעשרות אבדות ונפגעים בקרב חיילי הסיירת שלי וחיילי צה"ל.

"על מנת להסיר כל ספק, מעיון במסמך מודיעין של פיקוד הדרום, מ-4 ביוני 1967, אשר הועבר לבקשתי ממחלקת ההיסטוריה של צה"ל ומפרט את היערכות סדר כוחות האויב ברצועה, עולה בבירור, כי הסד"כ הינו של גדודי פדאיון פלסטינים ולא מצרים. הבלבול אולי נובע מהעובדה ההיסטורית, כי יומיים לפני הקרב המדובר, סיירת שקד פגשה גדוד מצרי, אשר הפסיק את הלחימה ליד נחל. חיילי הסיירת סייעו לגדוד המצרי והעבירו לו מים ומזון".

בלשכתו של בן-אליעזר ביקשו להדגיש כי השר זועם על הפרסומים אשר אינם נכונים ומבלבלים בין חיילי פדאיון פלסטינים לבין חיילים מצרים. הבלבול נובע מכך ששניים מן המרואיינים בסרט התייחסו למצרים - ולא כך הדבר; אכן המלחמה היתה עם מצרים, אך האויב בקרב זה היו חיילי פדאיון פלסטינים.

סערה פוליטית ותקשורתית

אתמול זימן משרד החוץ של מצרים לפגישת בירור את שגריר ישראל בקהיר, שלום כהן, על רקע שידור הסרט, על מנת שיסביר את תכניו. במקביל התבקש השגריר המצרי בתל אביב להשיג עותק של הסרט מממשלת ישראל. ממשרד החוץ בירושלים נמסר: "שגריר ישראל בקהיר, שלום כהן, הוזמן למשרד החוץ המצרי לשיחה בנושא הסרט 'רוח שקד' והבהיר את מה ששר התשתיות בן-אליעזר אמר בעצמו בראיונות שהעניק לעיתונות".

העיתונות היומית במצרים הקדישה לפרשה מקום נרחב בעמודיה הראשיים בשבוע האחרון וגם הפוליטיקאים המצרים עטו על הדיווח כמוצאי שלל רב. השיא נרשם בדיון שהקדישו לכך הוועדות הפרלמנטריות לזכויות אדם, לענייני ערבים וליחסי החוץ של מועצת העם המצרית, בו כינו שני חברי פרלמנט מצרים את השגריר כהן "כלב" ו"משוּמד" ואף דרשו לגרשו משטח מצרים.

העיתונות המצרית אף עשתה שימוש בדבריו של יו"ר מרצ לשעבר, יוסי שריד, כפי שאלה פורסמו שלשום בעיתון "אל-אהראם". שריד אמר בראיון: "הרג שבויים מצרים במלחמת קדש ובמלחמת ששת הימים הוא פשע מלחמה שאין עליו התיישנות, ואולם הבעיה היא שהאזור מלא בפשעי מלחמה".

באחרונה שוררת מתיחות ניכרת במצרים כלפי ישראל ומאז שפרץ המשבר הנוכחי סביב העבודות בשער המוגרבים בהר הבית התלהטו עוד יותר הרוחות. ביקורו של ראש הפלג הצפוני של התנועה האסלאמית, השייח ראא'ד סלאח, במצרים בסוף השבוע לבטח לא תרם לרגיעה בנושא זה. סלאח יצא למצרים למסע הסברה סביב "הסכנות האורבות בפני מסגד אל-אקצה" בה בשעה שסגנו, השייח כמאל חטיב, יצא לטורקיה למטרה דומה.

גם דחיית ישראל את הסכם מכה שאמור להביא להקמת ממשלת אחדות ברשות הפלסטינית היה לצנינים בעיני המצרים וגרם לישראל להיראות כמי שמערימה קשיים

أخبار اعتصام 2 مايو

2010-05-02T15:01:00.019+03:00

تحديث 5:18
المتظاهرين يتوجهون الي نقابة الصحفين
الأمن يخرج المتظاهرين مجموعات من اربعه او خمس أفراد
إنتهت منذ قليل مظاهرة الحد الأدني للأجور للمطالبة بوضع حد عادل للأجور وبدء المتظاهرين فى الخروج من المظاهرة فى مجموعات وذلك بعد أن شارك فيها أكثر من آلف متظاهر ومتظاهرة وممثلي من القوي السياسية والحقوقية المختلفة، ولم تحدث حالات قبض أو اعتقال فى صفوف المتظاهرين وحدثت بعض الاشتباكات بين المتظاهرين والأمن أثناء محاولة الأخير منع دخول بعض المتظاهرين لمكان المظاهرة فى شارع حسين حجازي بوسط القاهرة.

فيديو من مظاهرة اليوم

تحديث 4:50

صور من المظاهره

تحديث 4:40
أنباء عن انتهاء المظاهره والتوجه لنقابة الصحفين لعقد مؤتمر صحفي الساعه 6

----------------

تحديث 4:35
القائد اليسارى كمال خليل يلقى بيان العمال ونحو 1000 متظاهر يرددون البيان
الافراج عن اتنين من المتظاهرين كان تم اعتقالهم منذ قليل

-----------------

تحديث 4:22
القبض على متظاهر وتصاعد الهتافات للإفراج عنه

-------------

تحديث 4:20
محاولات للمتظاهرين للخروج من الكاردون الحديد والأمن يضيق الحصار عليهم
اشتباكات طفيفه بين الامن والمتظاهرين القبض على متظاهر وتصاعد الهتافات للإفراج عنه

-----------------

تحديث 4:10

صورة لعناصر الشرطة النسائيه

-------------------

تحديث 4:05
أكتر من 30 عربية امن مركزي وشارع حسين حجازي ممتلئ بالمتظاهرين والأمن أغلق الشارع لمنعهم من الخروج لشارع القصر العيني

----------------

تحديث 3:50
وصول العدد ل750 متظاهر

-------------------

تحديث 3:30
منظمات المجتمع المدنى والمنظمات الحقوقية الجاده تشارك فى الإعتصام وغياب تام من الجنجوز
المظاهره تتجه للشارع والامن يقفل الشارع

-------------

تحديث 3:15
قوات الامن تتحرك الآن لمحاصرة المتظاهرين ،حيث الزيادة المستمرة لعدد المتظاهرين ووصولهم لأكثر من 500 متظاهر

-----------------

تحديث 3:11
لمشاهدة فيدوهات من ساحة الاعتصام اضغط هنا

-------------

تواجد امني مكثف مع عناصر نسائيه عديده
طريق القصر العيني مقفول تماما
المتظاهرون يهتفون: حاكموا نشأت القصاص اللي عايزنا نموت بالرصاص
وصول محامين الشبكه العربيه لمكان الاعتصام ووفد من اصحاب المعاشات
المتظاهرون يهتفون : عاش كفاح الطبقه العامله
عناصر من الشرطة النسائيه موجوده بالمكان
الاعتصام بدأ قبل ميعاده بوجود محمد عبد القدوس وأخرون

اعتصام رفع الحد الأدني للأجور يوم 2 مايو

2010-04-21T17:26:00.001+02:00

مرتبك كام؟
وياتري بتقدر إنك تدفع فاتورة الكهرباء والمياة وإيجار الشقة من المرتب ده؟ طيب بعد ماتدفعهم بيتبقى معاك فلوس تجيب أكل أو ملابس ليك أو لأولادك، طيب لو لا قدر الله احتاجت إنك تروح لدكتور مرتبك كمان هيكفي ثمن الكشف والأدوية، طيب هو مرتبك يساعدك انك تفتح بيت وتتجوز أو تخطب حتي؟؟
خط الفقر في مصر 1200 جنية، ياترى إنت وصلت لخط الفقر ده ولا مرتبك تحت خط الفقر بكتير، يعني انت عشان تستحق لقب فقير لازم يكون مرتبك 1200 جنية ومحدش يسألني اللي مرتبه 70 جنية وطالع اسمه ايه
احنا مش بنطالب بالمستحيل، احنا بنطالب برفع الحد الأدني للأجور لخد الفقر
1مايو هو ميعاد انتهاء مهلة العمال للحكومة برفع الحد الأدني للأجور أو الاستقالة، وبناء عليه في اعتصام أمام مجلس الوزراء بشارع حسين حجازي يوم 2 مايو، والاعتصام مفتوح حتي الاستجابة ورفع الحد الأدني للأجور أو استقالة الحكومة
محدش يقولي هيجيبوا فلوس منين؟ مصر خيرها يعيش كل أولادها ملوك ومش ذنبنا إن الخير ده مسروق وأولادها بيموتو من الجوع
شاركنا في الدعوة للاعتصام اكتب عنه واحكي عنه لكل اللي حواليك
للاشتراك في جروب الاعتصام علي الفيس بووك اضغط هنا

لمتابعة أحداث الاعتصام والدعاية له اضغط هنا

هؤلاء النواب من هذا الحزب

2010-04-18T20:28:00.001+02:00

لو عايز تسقط أو تضعف أي نظام حاكم في العالم عليك انك تقوي المعارضة وتقوم الشعب عليه، بس ده في أي مكان الا مصر

في مصر انت مش محتاج غير انك تسيب رجالة النظام يدافعوا عنه
يعني لو عايز تعرف الشعب علي الدكتور البرادعي وتعملة دعايو مجانية مش عليك غير انك تخلي الشعب يقرأ جرايد الحكومة وهم لوحدهم هيفهموا ان الراجل ده عايز يعمل حاجة للبلد بجد
في مظاهرات 6 أبريل الشباب كانوا عايزين العدد يكون كبير لكنه كان 200 متظاهر بس، والأمن حققلهم الأمنية دي لما تعامل معاهم بكل عنف وبلطجة مما أدي لنزول أكتر من 1000 مواطن يوم 13 للاعتراض علي أحداث العنف في يوك 6 وردوا علي عنف الأمن معاهم بالتشابك بالأيدي
طيب الشباب نفسهم ان الأعداد في اعتصام 2 مايو أمام مجلس الوزراء للمطالبة بارتفاع الحد الأدني للأجور في مصر يكون عدده كبير وبيحاولو يعملوا دعايو واسعه للاعتصام ده
يقوم عضو مجلس الشعب عن الحزب الوطني كتر خيره يقصر عليهم الطريق ويطالب بفتح النار علي المتظاهرين بدل فتح خراطيم المياه
لأ بجد كده كتير هو في ايه؟
هو أنتم أصلا معارضة ومتخفين عشان تجيبوا توقعوا النظام؟؟
الناس بطلت تخاف خلاص، وتصريحاتكم وتصرفاتكم بتستفزهم وبس، ده مش بعيد الشعب المصري كله ينزل الاعتصام الجاي طمعا في الشهادة وبدل مانقول عندنا 20 معتقل و 50 مصاب في المظاهرة الأخيره نقول عندنا عدد كذا شهيد
ياحضرة النائب الناس أصلا قرفانة ومش طايقة نفسها ولولا الكفر والخوف من النار كانو انتحروا من زمان، تقوم انت فاكر لما هتقولهم هنخلصكم من حياتكم اللي انتم كرهتوها وكمان هندخلكم الجنة لأنكم ان شاء الله هتكونوا شهداء هيخافوا ويقعدوا في البيت؟
ده انت بتضمن للداعين للمظاهرة او الاعتصام نجاح غير مسبوق النظير
هو الحزب ده مافيهوش رجل رشيد ؟ مفيش حد كده يشخط في باقي أصحابة ويقولهم كفاية بقي قليتوا قيمتنا وفرجتوا علينا الناس وضحكتوا علينا الشعب؟

بهاء صابر

2010-04-14T19:24:00.003+02:00

تحديث:
الحمدلله بهاء خرج يوم الخميس
اضغط هنا لمشاهدة صور أثار التعذيب علي جسم بهاء

بهاء صابر كان المعتقل الوحيد في مظاهرة امبارح واللي كانت احتجاجا علي الاعتداء علي المتظاهرين يوم 6 أبريل
والمظاهره كانت ناجحه سواء من حيث العدد اللي تخطي 1000 متظاهر أو من تفاعل الناس وعدم سكوتهم علي تحرش الأمن وبلطجته وردوا علي الامن وعنفه معاهم

ودي صورة بهاء لما الأمن مسكه في المره الأولي

وهنا رجالة الأمن بيقومو بالوظيفه اللي يعرفوها

وهنا والمتظاهرين بيحاولو بياخدوا بهاء من الأمن

وهنا لما نجحوا أول مره في انهم ياخدوه فعلا منهم

اللي حصل بعد كده ان الأمن قدر انه يخطف بهاء في عربية تاكسي
وبالليل عرفنا ان بهاء في مستشفي الهلال لأن النيابة حولته علي هناك لما شافت وشه وكان الجانب الأيمن متورم تماما بسبب ان احد الظباط داس علي وشه لمدة ساعه
طبعا الظباط هيقول هو اللي داس بوشه علي رجلي

وبهاء في النيابه حاليا ودي صوره بعد ماراح المستشفي والمفروض انه كده تم علاجه

طيب هو كان شكل وشه ايه بقي قبل مايروح المستشفي؟؟؟
احنا بقي عايزين حق بهاء، واللي عمل فيه كده لازم يتحاكم

صور بهاء بعد الضرب من عند سامية بكري

مقتطفات عن أحداث 6 أبريل

2010-04-07T18:24:00.002+02:00

أمبارح كان ذكرى إضراب 6 أبريل، وبناء عليه كان فيه دعوه لمسيرة سلميه من ميدان التحرير الي مجلس الشعب والوقوف هنا وقفه احتجاجيه
الشباب المنظمين للوقفه أخطروا الأمن بميعاد الوقفه والأمن نشر في جميع الجرايد يوم 6 أبريل الصبح ان ده ممنوع
ورغم ده الناس نزلت الشارع شباب وكبار في السن وده مش تحدي منهم للأمن لأنهم أصلا مكنوش بيستأذنوا الأمن، هم كانوا بيخطروه بانهم هيمارسوا احدي الحقوق اللي بيكفلهلهم الدستور وهو التعبير عن رأيهم في مسيرة ووقفه سلمية والمفروض ان وظيفة الأمن تكون تأمينهم في الشارع وتنظيم المرور، أو المفروض ان دي تكون وظيفة الأمن في أي دوله حكومتها بتحترم نفسها وبتحترم الشعب اللي المفروض انها بتخدمه
لكن طبعا ده مش بيحصل عندنا احنا الامن عندنا له وظيفة واحده بس، ضرب وسحل وعجن وتكسير عظم المتظاهرين عشان يتعلوا الأدب ومايكرروهاش تاني، وللأسف هم مش قادرين يفهموا ان ده بيستفز الناس ومش بيخوفهم والدليل علي كده ان في بنات مكنوش نازلين المسيرة ولما شافوا بنات زيهم بيتسحلوا انضموا ليهم ودافعوا عنهم عشان يضربوا معاهم
الملفت للنظر ان كان في عناصر شرطة نسائية لضرب المتظاهرات وده طبعا مامنعش ان الرجاله يضربوهم هي كانت اوبشن زياده في الضرب بس، يعني المتظاهر الولد الظابط الراجل هو اللي هيضربه، لكن البنت الظابط والظابطه هيضربوها
الأمن كان بيحقق في البطايق من الصبح وأي حد يشتبهوا في اسمه ياخدوه علي عربية الترحيلات ولما زادة مطاردة الأمن للمتظاهرين اتفرقوا, في منهم اللي راح لحزب الغد أو مركز هشام مبارك أو نقابة المحامين للاحتماء بيهم وحزب التجمع رفض انه يدخلهم بناء علي شهادة المتظاهرين نفسهم
والأمن طبعا لجأ لخطف الناس من الشوارع وده قام بيه ظباط بلبس مدني علي اساس ان الناس مش هتعرفهم لو لبسوا مدني ، علي رأي خالد الصاوي في فيلم الباشا تلميذ حضرتك ليك هيبه ياباشا، وربنا لو لبسوا ايه بردو بيتعرفوا
ورغم ان الأمن صادر كل الكاميرات وسرق كل شرايط التصوير واعتقل جميع المراسلين الا ان في بردو صور اتهربت وفي فيديوهات اتنشرت

وده فيديو لمحاولة اعتقال أحد المتظاهرين من أمام مجلس الشوري

الأستاذه أمل شرف الأمن كسرلها ايدها وغيرها بنات اتضربوا علي وشهم وبالرجلين واتعاملوا معاهم بكل وحشه وبلطجه

وده فيديو لوقفة نقابة المحامين

وطبعا مصادرة شرايط التصوير كمان كانت لمراسلي الجزيرة والموقع نشر ده وكذالك نشرات أخبارهم والبي بي سي كتبت ان الشرطة المصرية تفرق بالقوة مظاهرة لشباب حركة 6 أبريل في القاهرة
والأمن هدد اكتر من مره بافتحام نقابة المحامين واعتقال الشباب اللي جواه لكن الحمدلله اليوم خلص من غير اقتحام للنقابه
والجامعات المصريه شهدت وقفات احتجاجيه ومعارض صور قام بيها الطلاب لكن كان قصاد ده ان الجامعات نظمت أنشطه رياضيه وحفلات وبلطجيه لتخريب اليوم
وكان من اهم الحفلات حفلة حماقي في جامعة عين شمس وياريته عمل الحفله وسكت او عمل نفسه مش أخد باله انه بيساعد علي تغيب الطلاب عن المطالبه بحقوقهم لأ حضرته صرح انه سعيد ان حفلته ساعدت في منع الاضراب وانه كان ناوي يعمل أغنيه للريس بس الظروف ماساعدتش وطبعا تم إنشاء جروب علي الفيس بووك يطالب بمقاطعة حماقي رد علي موقفه المتخاذل
وحسب الأنباء اللي اتقالت فحمدي قنديل كان موجود أمام مجلس الشوري وكذلك أيمن نور وابنه والأمن اعتقل ابن أيمن وسابوه بعدها

وده فيديو تاني لمحاولة اعتقال

وده فيديو باللغه الانجليزيه فيه مقتطفات من اللي حصل

ودي بعض شهادات الناس اللي اتسحلت امبارح والأمن اتعامل معاهم بكل عنف
جبهة الدفاع عن متظاهري مصر
ودي شهادة أحمد عبد الفتاح وبيشد من خلالها بالفنانة محسنة توفيق وموقفها النبيل جدااا معاه
ودي شهادة أحد الأشخاص اللي ماذكرش اسمه
ودي شهادة زميلنا أحمد عن اللي حصل في جامعة المنصورة
ودي تغطية لأحداث اليوم علي مدونة لسه عايش
المعتقلين تم اخلاء سبيلهم جميعا من النيابه الحمدلله رغم اتهام الأمن ليهم بتهم منها اتلاف خوذات ودروع، يعني ياربي فشله حتي في تلفيق التهم، هم مازنجرات عشان يتلفوا الخوذات والدروع، ولما هم جامدين أوي كده قدرتوا تعتقلوهم ازاي

اليوم أثبت ان لسه في شباب بتحب البلد دي ومستعدين يعملوا أي حاجه عشان يصلحوها ويغيروها للأحسن
ولمعلومات أكتر ممكن تزورا نوارة
وبجد بشكر كل الناس اللي ساعدوا في نشر اللي حصل سواء علي مدوناتهم أو علي تويتر أو الفيس بووك
وبشكر جدا مالك مصطفي اللي كان مصدر المعلومات الرئيسي بالنسبه لينا في اللي بيحصل مع المعتقلين
وكل يوم وانت بخير يامصر واولادك أحرار وانت نفسك حره

ورجالة الأمن وظباط العادلي بهديلهم الفيديو ده

افرجوا عن أحمد مهنى

2010-04-03T18:01:00.007+02:00

تحديث:
أحمد خرج الحمدلله وده نوت بيحكي فيه عن اللي حصل معاه

ده أحمد مهنى
حاليا معتقل من قبل أمن الدوله لأنه مدير نشر دار دون واللي نشرت كتاب اسمه البرادعي وحلم الثورة الخضراء عن الدكتور البرادعي
المطلوب من الأمن الافراج عن أحمد هو وكل الشرفاء اللي مسجونين في معتقلات الوطن ويبقي كتر خيرهم لو أفرجوا عن الوطن نفسه
المطلوب مننا التضامن مع أحمد والمطالبه بالافراج عنه في كل مكان
ومش المفروض ان اعتقال أحمد يخوف أي حد كان ناوي يروح الوقفه الاحتجاجيه يوم 6 أبريل أمام مجلس الشعب، ودي الوقفه اللي نادي بيها المحترم حمدي قنديل
سؤال برئ: ليه الجرايم زادت في مصر في الفترة الأخيره
جواب برئ: لأن داخلية مبارك مش فاضيه غير للقبض علي المدونين والنشطاء الحقوقين والسياسين وسايبين الحراميه والبلطجيه وتجار المخدرات يعثوا في البلد فسادا

--------------------
اشترك في جروب الحرية للناشر أحمد مهنى علي الفيسبوك

ربنا يخليكي لينا

2010-03-21T00:00:00.002+02:00

أول حياتي ياأمه اداريت فيكي
شيلتني باديكي
ولما قلت الأه شيلتيني في عنيكي

وكبرت ياأمه وانت وانت سنداني
حتي في نهياتي ياامه مش مفرقاني

يوم القيامه اتناديت بيكي

أول حياتي ياامه اداريت فيكي
شيلتيني باديكي
ولما قلت الأه شيلتيني في عنيكي

في ضمتك ماسك
محضون باحساسك
من تحتك الجنه
وأنا شيلاني فوق راسك

وكبرت ياامه وانت انت سنداني
حتي في نهايتي ياامه مش مفرقاني
يوم القيامه اتناديت بيكي

أول حياتي ياأمه اداريت فيكي
شيلتيني ياديكي
ولما قلت الأه شيلتيني في عنيكي

--------------
أغنية: ياأمه
غناء: فريق وسط البلد

show me

2010-03-15T00:38:00.004+02:00

Show me the meaning of being lonely
So many words for the broken heart
It's hard to see in a crimson love
So hard to breathe
Walk with me, and maybe...

Nights of light so soon become
Wild and free, I could feel the sun.
Your every wish
Will be done.
They tell me...

Show me the meaning of being lonely
Is this the feeling I need to walk with?
Tell me why
I can't be there where you are
There's something missing in my heart

Life goes on as it never ends
Eyes of stone observe the trends
They never say forever gaze if only
Guilty roads to an endless love
There's no control
Are you with me now?
Your every wish will be done
They tell me

Show me the meaning of being lonely
Is this the feeling I need to walk with?
Tell me why
I can't be there where you are
There's something missing in my heart

There's nowhere to run
I have no place to go
Surrender my heart, body and soul
How can it be you're asking me to feel
The things you never show?

You are missing in my heart
Tell me why
I cannot be there where you are

Show me the meaning of being lonely
Is this the feeling I need to walk with?
Tell me why
I can't be there where you are
There's something missing in my heart

---------------
show me
backstreet boys

مصر مشت منين؟

2010-02-26T19:25:00.002+02:00

هي االبلد دي ايه اللي حصلها؟
محدش يقولي هي طول عمرها كده، عشان هي عمرها ماكانت كده ، اه هي فيها فساد واستعباط لكن مش كده
انا فعلا مش فاهمه هي كان مالها امبارح، امبارح انا مكنتش قادره اني اتعرف عليها بجد ولا أعرف مصر اللي أنا اعرفها راحت فين؟
احنا قضائنا نضيف ومحترم، ومع ذلك وكيل النيابه بيحفظ التحقيق من غير مايحقق فيه أصلا
فنون اتفصلت من شغلها عشان قالت رأيها في مدونتها، البنت ماقالتش انها هتنتخب البرادعي ولا انها هتقف وراه في الانتخابات، كل اللي قالته ان دوايتنا مسدوده ومش بيمشي فيها الكهربا
أحمد مصطفي مخطوف من امبارح والانباء متضاربه بين ان أمن الدوله هم اللي خطفوه بتهمة الاساءة للدوله وان المخابرات الحربيه هي اللي خطفته بتهمة الاساءة للجيش بسبب البوست ده
أنا عن نفسي أتمني ان الرواية الاولي هي اللي تطلع صح لأن حتي مع اعتراضنا بس ده متوقع من امن الدوله، لكن الجيش بتاعنا طول عمره محترم وأكبر من الحاجات دي، ولو طلع فعلا مع امن الدوله لازم الجيش يحاسب اللي وصلوا لأهل أحمد ان الجيش هو اللي خطفه
أحمد متحول لمحكمه عسكرية رغم ان جواسيس اسرائيل مش بيتحاكموا عسكري، ممكن تعتبروا أحمد اسرائيلي وتحاكموه مدني؟
الاخبار دي كانت كتيره عليا اوي في يوم واحد وخلتني بجد مش فاهمه مصر حصلها ايه ولا راحت فين؟
اللي شاف مصر وهي ماشيه يقولي مشت منين ، يمكن أجري وراها ألحقها وأقنعها ترجع تاني بقي

مش هقبل اني أتهان والنيابه تتهاون كمان

2010-02-25T18:34:00.000+02:00

وكيل النيابة حفظ التحقيق، هو وكيل النيابه استدعاني أصلا وسمع أوقوالي عشان يحفظ التحقيق؟ وهو حقق مع مين أصلا؟
بابا قدم طلب للمحامي العام لاعادة فتح التحقيق والناس كانو متعاونين ويسروله الطلب والامضا عليه، لكن الكلام العام اللي كان بشكل ودي ان في احتمال كبير يتحفظ تاني وان مفيش حاجه هتحصل عشان هم بيتتبعوا التلفونات في حالات القتل وسرقة الشقق
طيب هو قانون الاتصالات ده لزومه ايه؟ وهم فاتحين مباحث التليفونات وبيصرفوا عليها من مزانية الدوله ليه اصلا؟
هو مش في قانون بيقول ان أنا ليا حق والمفروض اخده؟
وهو مش في جهاز في الشرطه أصلا وظيفته انه يساعدني في اثبات الحق ده؟
الواحد كان ممكن يتوقع التهاون من جهاز الشرطه وده محصلش والناس عملو واجبهم وزياده، لكن ان النيابه هي اللي تخذلني ده شئ أنا ماتوقعتوش ولا خطر علي بالي
سيادة وكيل النيابه هو حضرتك حققت مع مين عشان تحفظ التحقيق، والأهم هي لو كانت أختك أو زوجتك أو والدتك كنت بردو هتحفظ التحقيق؟؟

اشترك في جروب مش هقبل اني اتهان والنيابه تتهاون كمان للتضامن معايا

مش عايزه غير حقي

2010-02-22T01:58:00.002+02:00

كان بقالي فتره في رقم بيشتغلني،بس الرقم اللي كان بيتصل بيا عليه أنا أصلا مش بشغله كتير، لكنه دايما كان بيتصل لما أفتحه، ودي كانت أول مره في حياتي أشوف واحد يتقاله ماتتصلش بالرقم ده تاني بدل ماتتهزأ ويتصل بردو، غاوي تهزئ مثلا؟
لما اشتغل في قلة الادب أنا قلتله اني هبلغ عنه واوديه في داهيه والغريب انه اتصل تاني بمجرد ماقفلت في وشه
صاحبتي اللي كانت معايا ساعتها استغربت اوي اني هعمله محضر بجد، هو المفروض اننا نسكت علي قلة الادب ونقفل احنا خطوطنا ولا الاشكال دي هي اللي تتربي؟؟؟؟
الحقيقه ان الناس في مباحث التليفونات كانو محترمين جدا (احنا بردو نقول اللي لينا واللي علينا) هو صحيح في ظابط اعترض علي اني قلت عليه عيل وقالي 20 سنة يبقي راجل حتي لو أصغر منك بس انا قلتله انه لما يكون قليل الادب ومش متربي يبقي عيل وان الرجوله مش سن
وأمين الشرطه اللي كان بيكتب المحضر الصراحه قدر اني عمري ماقلت الالفاظ دي في حياتي وعملهولي محضر سب من غير مااقول ايه اللي اتقال بالظبط
وتاني يوم روحت اخدت رقم المحضر ورقم الصادر وكانو متعاو جدا فعلا
وروحت النهارده جبت رقم الجنحهمن القسم وسألت في النيابه مكنش لسه وصل
بس انا مش عارفه ليه أغلب الناس شايفين اني مش هوصل لحاجه واني تاعبه نفسي علي الفاضي واني اريح نفسي واقفل الخط خالص
هو ليه لازم أكون سلبيه، مش الغلطان المفروض انه يتعاقب؟؟
أنا مواطنة صالحه، مش برمي زباله في الشارع، بربط حزام الأمان وأنا سايق، معايا بطاقه انتخابيه من يوم ماكملت 18 سنة، يبقي من حقي اعيش في بلدي بأمان ومن حقي إن الحكومه تجيبلي حقي
مش المفروض ان كل ما موبيلي يرن اتخض ليكون الكائن ده
انا من حقي ان القانون يطبق ومن حقي انه يتقبض عليه ومن حق اي بنت بتتعرض للسفاله دي انها تاخد حقها
ومحدش يقولي كبري دماغك واقفلي الخط لأن أنا واحده بتصعب عليها نفسها وعمري ماشتمت بألفاظ خارجه ومش بعرف أقولها أصلا وطبيعي اني أحس بالاهانه وكرامتي توجعني اوي واعوز حقي لما ده يحصل معايا
أنا مش عايزه كتير، أنا بس بطالب بتطبيق القانون واني أخد حقي

ليه بعيده كده

2010-01-22T03:54:00.003+02:00

هو انت ليه بعيده كده ومستحيله بالشكل ده
فرحة حياتي ومرها أيامي بيكي عيشتها

بس أنا مش بعيده
بس انا دايما بتعب لحد مااوصلك
طيب مش المهم انك بتوصل في الأخر

طيب بيطاردوني ليه، مش أنا قلت خلاص هنسلم طيب ده وقته ده؟

انت الحقيقه في دنيا زيف وانت اللي دبت في حبها
بقدر علي الناس كلها وببقي قدامك ضعيف وبتعندي وانا ادوب ندا

قلت لأ يبقي خلاص اسمعي الكلام
طيب عشان خاطري
ماشي بس طمنيني عليكي دايما

طيب ايه اللي غير الخاطر ده، لأ الخاطر ماتغيرش ، الظروف بس هي اللي اتغيرت، غير كده كل حاجه زي ماهي

قلبي علي كفي افتحيه هتلاقي صورتك ساكنه فيه
وانا حتي قلبي في المرار مابشوفش غيرك ليل نهار

أنا تعبان في البعد وبفكر فيكي ليل نهار وكتير مش بعرف أنام من كتر الحنين

طيب احنا ليه بنختار عذابنا بايدينا، صح احنا مش بنختار، احنا بس بيتفرض علينا

ياورده مغسوله بندي ، صافيه ورقيقه وطيبه وبعيده وانت قريبه
يامحيره كل القلوب بكتب غرامك عالدروب وارسم ملامحك عالمدي

انت مش من هنا أصلا، إنت من الجنة

بس أهل الجنة مش بيتعبوا ولا بيزعلوا، أهل الجنة بيعيشوا في سعادة وراحة للأبد ، أمال ايه الفرق بين أهل الدنيا وأهل الجنة بقي

بصحي علي صورتك وانام والاقيكي ينساني الكلام
ارسم أمل يبقي سراب وأحلم بفرح ألقاه عذاب وأنده يجاوبني الصدا

أنا حاولت كتير، مفيش حاجه كان ممكن اعملها او اقولها وماحولتهاش أنا ماضيعتيكيش بالساهل

طيب ماهو مش كل حاجه لازم احنا اللي نعملها، في حاجات بتكون بتاعة ربنا وبس، مش يمكن بطلت تدعي؟؟

عاشق أنا قلبي عنيد

مانا مابقتش أنا، الدنيا مابقتش واقفه عليا ولا علي أنا عايز ايه؟

بس مفيش حد لسه يعرف أخر الطريق فيه ايه، ليه دايما بنكون معتقدين اننا وصلنا لأخره رغم اننا لسه ماشين في أوله؟؟

ومسيري هوصلك أكيد وألقاكي ياقمري البرئ
لو حتي يخلص طريق ألقي طريق غيره ابتدا

الدنيا دي فترة وهتخلص ومهما حصل أوعدك إني هجيلك في الجنة وإنت حره ساعتها إنك تقبلي أو ترفضي

بس أنا لسه عندي أمل ولسه مؤمنة بالأحلام وعارفه إن زمن المعجزات لسه ماخلصش

---------------------

أغنية هو انت ليه بعيده كده لممدوح بيرم

التدوينة السوداء

2010-01-15T14:08:00.001+02:00

أشهد الله العظيم أني براء من ذلك الجدار

--------------------
ملحوظه:
تم القبض علي 17 ناشط ومدون خلال توجهم لنجع حمادي التفاصيل عند نوارة

وقالها لأ

2010-01-05T04:25:00.001+02:00

ولا تنسي أنني أيضا مجرد فتاة تقف أمام فتي وتطلب منه أن يحبها

-------------------

Anna

Nothing hill movie

أنا عندي صوت، انت عندك صوت؟؟؟

2010-01-01T16:51:00.001+02:00

أنا عندي صوت من إنتخابات الرئاسه اللي فاتت، أنا ماكتفتش بإني أقعد في البيت وأقول إن مفيش حاجه هتتغير، لأ أنا نزلت وقلت رأي في المكان الوحيد اللي مهم انه يتقال رأيك فيه
لو عايز تقول لأ لحد معين ماتقولش لأ بتاعتي مش هتأثر، لأن لو كل واحد فينا اتمسك بصوته مش هيلاقوا أصوات فاضية عشان يزوروها
حتي لو حال مصر كده عاجبك انزل وقول انه عاجبك وماتكتفيش بانك شايف إن الوضع مش هيتغير
أنا حتي لما بيكون جميع المرشحين مش عاجبني ببطل صوتي عشان أطمن إنه مش هيتزور
أنا عارفة إني هقف يوم القيامة قدام ربنا بكل فخر وهقوله إني ماشاركتش في ظلم حد اتظلم، وإني حتي ماسيبتش حد يظلم حد معتمد علي صوتي اللي اتزور
من حق البلد دي علينا إنك تقف جنبها ومن حقها عليك إنك تحافظ علي صوتك وماتخليش حد يسرقة أو يزوره
صوتك أمانة هتتحاسب عليها وده الوقت المناسب عشان تبطل سلبية وتطلع بطاقة انتخابية
مصر دلوقتي محتجالك، بس إنت عمرك ماهتقدر تساعدها إلا لو كان عندك صوت
أنا عندي صوت، يالا إنت كمان لازم تخلي عندك صوت

----------------
شاركنا واكتب عن حملة خلي عندك صوت عندك
جروب الجمله علي الفيس بووك
جميع من كتب عن الحملة

خدعوك فقالوا بورسعيد بتحبك ياريس

2009-12-29T00:57:00.000+02:00

بورسعيد مدينة اشتهرت بانها منطقة حرة، مثلها مثل دبي وان كان الفرق أن الله حبي بورسعيد بموقع جغرافي لا ينافسها فيه أي مكان أخر في العالم، ومع ذلك فالفرق واضح تماما بين بورسعيد وأي منطقة حرة أخري
وإن أردت معرفة السبب فما عليك الا الرجوع بالذاكرة إلي أخر زيارة للرئيس مبارك تم الاعلان عنها رسميا
كما أعلنت أجهزة الأمن ووسائل الاعلام فان الرئيس تعرض لمحاولة اغتيال في بورسعيد
وكما أعلن المتعاطفين مع أبو العربي فهو ذهب لتقديم شكوي للرئيس وكان الرد عليه هو قتلة بمجرد وصولة لشباك سيارة الرئيس
أكد أصحاب الفريق الأول أنها كانت محاولة اغتيال وأن أبو العربي نجح في إصابة الرئيس بذراعه وهذا السبب لتغيرة جاكيت البدلة
وجاء الرد من أصحاب الفريق الثاني بأن دم أبو العربي هو من لطخ ملابس الرئيس فاضطر لتبديلها
وجاء الرأي الوسط بأن أبو العربي مريض نفسيا (كان موضوع مريض نفسي دي أول مره تتقال) وأنه اتراهن مع ناس يعرفهم انه هيعور الريس وان المحاولة مكنتش اغتيال وانه كان قاصد يعوره بس
أيا كانت الحقيقه بين الثلاث أراء فالحقيقه الوحيده إن بورسعيد وشعبها دفعوا ثمن هذه الزياره ومازالو يحاولون التعافي من أثارها حتي الآن
طبعا أصبح معروف لدي الجميع أن المدينة الباسلة تحولت إلي المدينة المغضوب عليها أمنيا وبدأت خطة مسلسلة لإلغاء المنطقة الحرة كعقاب لأهل البلد علي تطاولهم علي العيلة الحاكمة في المظاهرات التي خرجت للشوارع تندد بالعقاب الجماعي الذي تم تطبيقه علي المحافظه بأكملها
زيارات مبارك التالية لبورسعيد كانت بعد فترة طويلة وكانت زيارات سرية ومحدش بيعرف عنها حاجه غير بعد ماتخلص وكمان كانت زيارات جوية، يعني الريس مش بيمشي في الشوارع لكن بينزل بالطيارة علي المكان اللي رايحه لدرجة انهم أشاعوا ان تم استحداث مطار بمبني المحافظة لهبوط طيارة الرئيس
كان ده طابع زيارات مبارك إلي أن تم الاعلان عن زيارتة للبلد لافتتاح المستشفي العسكري وبعض مصانع المنطقة الصناعية وأن الموكب هيمشي بالشوارع
طبيعي إن أهل البلد يقلقوا جدا من الزيارة ويدعوا ربنا بخروجه منها سالما لأنهم لم يتعافوا من أثار أخر زيارة بعد
وبالفعل تم احتلال بورسعيد أمنيا في اليوم السابق للزيارة وتحولت لثكنة عسكرية، أعتقد ان ماتبقاش عربية أمن مركزي واحده ماجتش البلد، شكل العساكر الكثيف كان بيدي إيحاء ان عددهم أكثر من سكان بورسعيد
الشوارع امتلأت بلافتات الترحيب وأخري مؤكده إن بورسعيد بتحبك ياريس
طبعا الأمن شدد علي سكان العمارات المطلة علي شوارع مرور الموكب بأنه ممنوع تماما فتح الشبابيك والبلكونات وإن القناصة الموجودين لديهم أوامر بإصابة أي شخص تسول له نفسه الوقوف في بلكونة بيته أثناء مرور الموكب
الغريب انهم بيقولوا ان الريس كان سعيد بالزيارة واستقبال أهل بورسعيد له
أهل البلد كانو محبوسين في بيوتهم ياريس واللي حاول يروح كليتة أو شغله فضل ساعتين عشان يقدر يوصل في بلد تلفها كلها في نص ساعه
لافتات الترحيب مش كلها نفاق لأن في منها كتير كان بالأمر الأمني ، يعني الأمن يروح للناس المشهورين ورجال الأعمال ويطالبهم باللافتات دي
خدعوك فقالوا ان بورسعيد بتحبك ياريس
انت جيت عشان تثبت انك مش أخد منها موقف خصوصا وأن الانتخابات قربت، وهم رحبوا بيك خوفا من عقاب عدم الترحيب
لكن انت ازاي تصدق ان بعد سياسة العقاب الجماعي اللي فرضتها علي البلد وبعد قرار إلغاء المنطقة الحرة إن بورسعيد ممكن تكون بتحبك ياريس

------------------
الزيارة كانت بالأمس الاثنين 28-12

عندي حنين بعرف لمين

2009-12-20T18:05:00.002+02:00

عندما تنخفض درجات الحراره وتزداد البرودة يفاجئك الحنين من حيث لا تدري

في بداية الأمر لا تعلم لمن هذا الحنين أو ربما تتظاهر بأنك لا تعلم ولكن تظاهرك لن يستمر طويلا فأنت عاجلا أم أجلا ستعترف لنفسك لمن هذا الحنين

تفكرجديا في كراهية فصل الشتاء رغم عشقك اللا محدود له، فالشتاء هو من أيقظ هذا الحنين

تمر من أحد الأماكن، هذا المكان الذي يحمل لك احدي الذكريات ليزداد الحنين يضاعفه ملاين المرات صوت فضل وهو يصدح في الخلفيه بس الغرام فينا بقي مطرح ماكنا بنلتقي وكأنك كنت تنتظر تصريح فضل لتعلم بأن بعض الأشياء لا تموت حتي وإن اعتقدنا ذلك

تنظر لهاتفك فيأتيك ذلك الحنين لصوته فينفجر الغضب بداخلك من جديد، تفكر أن تتصل به لتصب عليه جام غضبك، هو سيستمع لك ولن يعترض علي حرف واحد وسيتركك تقول كل ماتريد ولكنك لن تفعل ذلك، فأنت لا تريد للغضب أن ينتهي كما أنك لن تحقق له أمنية دفينة بسماع صوتك الذي اشتاق له كثيرا،ستعاقيه بحرمانه من صوتك ، لكنك في الحقيقه لا تعاقب أحد سواك، فأنت تعاقب نفسك بالحرمان من صوته وتصب جام غضبك علي نفسك التي تشعر بكل هذا الحنين

تفتقد صديقك المقرب، تفتقد التحدث معه والتشاور حول مايحدث من أحداث ، تفتقد ضحكاتكما معا وحوارتكما الطويله التي تضمن كل شئ، ليت أحدهم يستطيع أن يذهب تاركا الصداقه، ولكن العرف جري علي أن من يرحل يأخذ معه جميع صفاته ولا يجب عليك أن تشعر بهذا الحنين إلي احدي هذه الصفات ، حتي إن رأيته فأنت لن تحدثة عما بداخل فقط ستتبادلوا بعض الكلمات إلي أن تعود للالتزام بالصمت

كل ماتشعر به يفوق طاقتك علي الاحتمال ، تريد أن تصرخ الآن، تعلم أن صوتك سيسمعه جميع الأحياء علي وجه الأرض، تعرف أن صرختك ستكون قويه وعالية ولن تترك شخص دون أن يشعر بها ولكنك تتراجع خوفا من ايقاظ النائمين حول العالم الآن

إذن هذا فهذا وقت الانهيار، أنت لن تستطيع تحمل كل ذلك وأن تلتزم بهذا الصمت ، فما بالك بالحنين الذي دائما مايهاجمك في مقتل، هذا هو الوقت المثالي لسقوطك وانهيارك ولكنك أيضا ستؤجل هذا الانهيار ليوم أخر لأن اليوم هناك من يحتاج إليك،فهناك دلئما من يحتاج وقوفك بجواره والاستناد إليك في اللحظه التي تقرر فيها أن وقت الانهيار قد حان

جميع التفاصيل في ذاكرتك وكأنها حدثت هذا الصبح، تتعجب من قدرتك علي تذكر أدق التفاصيل رغم أن ذاكرتك تتداعي، فأنت أصبحت كثير النسيان لأبسط الأشياء، وكأن الذاكره اللعينة تسقط باقي الأشياء لتحتفظ بما يخصه حيا نابضا إلي الأبد

إصرارك ليس له حدود، لا يمنعك عن شئ تريده سوي الموت، هو فقط من يستطيع أن يقف في وجهك، فلماذا استسلمت الآن بالرغم من أن كلاكما أحياء، لما توقفت عن المحاوله، لابد من أنك مللت المحاوله وحدك، أو ربما جرحك هذه المره أكبر من اصرارك وقدرتك علي معاودة المحاولة وإصلاح الأمور

ستحتفظ بقناع القوة، ولن يعلم أحد شيئا عن ذلك البحر الثائر بداخلك، فأنت مازلت تبقي الجدار أمام موجاته العاتيه وتراهن علي صمود جدارك أمام ثورة أمواجه في انتظار يوم لن يستطيع فيه الجدار أن يصمد أكثر من ذلك

تتمني باخلاص ان تفقد ذاكرتك فمن المستحيل ان تشعر بهذا الكم الهائل من الحنين لأشياء وأشخاص وذكريات لا تستطيع أن تتذكرها، فما أجمل ان تستيقظ صباحا ليخبروك أن هؤلاء هم أهلك أما أولائك فهم أصدقائك وأنك لا تملك من الدنيا سوا هؤلاء وأولائك، هل تعلم كم ستستريح وقتها؟؟؟

إلهي الرحيم، هلا أوقفت هذا الحنين، فأنت تعلم تمام ان هذا القلب الصغير لم تعد لديه القدرة علي الاحتمال ولو لقدر ضئيل أخر

--------------------------

العنوان مقتبس من اغنية انا عندي حنين مابعرف لمين لفيروز

أغنية فضل شاكر افترقنا

من هنا وهناك

2009-12-14T20:32:00.001+02:00

إنت عارفه أنا مش بعيط، كل ماأكون خلاص هعيط أرجع أقول لأ مش هعيط، بس أول ماشفتك دلوقتي حسيت إني لازم أعيط بقي
خلاص عيطي وأنا هعيط معاكي طبعا
لأ لو عيطنا هنتفضح وأول مايشفونا هيعرفوا

---------------------------

ربنا يهديه ويريحه
ويريحك إنت كمان
أمين ياسيدي هو أنا هقولك لأ يعني
لأ أصلك غريبه اوي بتدعيله ومش بتدعي لنفسك

---------------------------

أنا أصلا اتعقدت
بس أنا لسه عندي امل
أموت وأعرف بتجيبي الأمل ده منين
هههههه، بجد معرفش بس لسه عندي أمل ولسه مؤمنة بالمعجزات

---------------------------

أنا مش عارفه ايه حكاية الوقت الغلط معانا
احنا شكلنا جينا الدنيا في وقت غلط أصلا
خلاص بقي احنا قلنا مش هنعيط

---------------------------

طب احكيلي التفاصيل بقي
تفاصيل ايه؟ ماهومالحقش يكون فيه تفاصيل أصلا، بقولك شهرين ، بس انا لحد دلوقتي معرفش ايه اللي حصل ولا حصل ليه؟
مممممممممم (f)

---------------------------

اللي بشوفه وبسمعه بيخليني أقول الحمدلله مليون مره اننا موجودين لبعض
ماهو مش هيبقي الأصحاب كمان يعني، احنا ماطلعناش غير بيها
الحمدلله بجد لأن هي دي الأهم

---------------------------

انت مش بتتكلمي ليه؟
هتكلم أقول ايه؟
اللي جواكي
صدقيني خليني ساكته أحسن

يارب يكون عيد سعيد

2009-11-27T22:26:00.001+02:00

كل عيد وكلنا طيبين
ويارب يكون عيد جميل علينا كلنا

بين مضروب ورهينة يامصري لا تحزن

2009-11-20T19:39:00.005+02:00

لحد دلوقتي مش قادره أفهم اللي حصل ده حصل ازاي والأهم ليه؟
من المعروف ان الجمهور الجزائري عنيف جدا لدرجة ان عندهم 120 مباراه اتلعبت في الدوري من غير جمهور ده غير التهديدات بالقتل وحرق بيت رابح سعدان في حالة الخسارة
بس العنف اللي احنا نعرفه ان حد يشتمنا أو حتي يوم مالموضوع يكبر يتشابكوا بالأيادي أو الطوب
لكن اللي حصل ده غير مفهوم من وجهة نظري علي الأقل
جريدة الشروق الجزائريه جريده تابعه للجيش وبدأت في التسخين قبل ماتش القاهرة والادعاء ان في قتلي بعد الماتش
الجيش بردو هو اللي اتاخر في انقاذ كامب اوراسكوم تليكوم يوم الأحد
والطيارات اللي كانت بتنقل البلطجيه اللي تواجدوا في السودان كانت طيارات القوات الجوية الجزائريه
احنا اللي اتقال علينا يهود مصر, واحنا اللي اضربنا بالطوب والسكاكسن والخناجر وسيوف وائل الابراشي قال عنها انه ماشفهاش غير في فيلم صلاح الدين
مصر شغلت جسر جوي علي مدار 24 ساعه لاجلاء البعثة المصرية والمشجعين المصرين هناك اللي كانو نخبة من المثقفين والاعلامين والممثلين والساسين ورجال الأعمال
من حق كل مصري انه يغضب من اللي حصل ويستني تفسير عن ده حصل ليه؟
احنا طالبنا بالتهدئه قبل الماتش وذكرنا اننا أخوه عشان اللي حصل ده مايحصلش في السودان ولا في الجزائر
وبعد الماتش لما خسرنا قلنا مبروك للجزائر وقلنا لمصر اتغلبي ولا يهمك
ورغم ده احنا اللي اضربنا، من امتي والخسران بيضرب؟؟؟؟
لو الخسران ضرب ماشي له عذر انه متضايق لأنه اتغلب لكن الفائز يضرب الخسران ليه؟
وموقف الجزائر السياسي مريب جدا بالتزامهم الِصمت والرد الوحيد كان من السفير الجزائري هنا بيذكرنا بالاستثمرات المصرية في الجزائر وكأنه بيخوفنا علي أولادنا اللي هناك، واعلان تاني من وزير الرياضة اللي أشاد بجمهور الجزائر قبل وأثناء وبعد المباراة
مطلوب رد فعل رسمي علي اللي حصل حتي لو كان بسحب الاستثمارات المصرية من الجزائر
والأهم عودة المصرين اللي هناك
احنا مش بنشعل فتنة ولا بنفرق بين اخوات، لأ، بس الأخ لما يغلط في أخوه ويعتدي عليه لازم يتعاقب الأول قبل مأخوه يرجع معاه زي الأول تاني
ويعني ايه المصرين اللي في الجزائر عايزين يرجعوا مصر ومش عارفين يرجعوا، يعني ايه ناس يتصلو بيهم يقولوهم انتم رهاين هنا، يعني ايه بقالهم اسبوع مفيش عندهم أكل واللي بيهربلهم الأكل يضرب ويتقاله يبلغهم انهم هيفضلو كده لحد مايظهرلهم صاحب
الناس دي عايزه ترجع ومن حقها انها ترجع، هم كده فعلا يبقوا رهاين ومخطوفين
زي ماأولادنا في السودان رجعوا بالسلامه عايزين كل مصري في الجزائر عايز يرجع يوصل بيته بالسلامه

من فضلك أكتب عن الموضوع عندك وطالب بعودة المصرين الراغبين في العودة لمصر من الجزائر

اتغلبي يامصر

2009-11-18T23:32:00.004+02:00

اتْغِلْبِي يامصر ولا يِهِمِّك

ولا يفرق

ولا يحرَق دَمِّك والله مسامحِك وبحبِك

ولا فوز هيزيدك يا جميلة

ولا غُلب العالم هيقِلك

هاني وجيه

لعن الله من أيقظها

2009-11-16T21:26:00.002+02:00

أنا مقاطعه الشروق الجزائرية
اليوم السابع المصرية
الخبر الجزائرية
القاهرة اليوم (عمرو اديب/ احمد موسى) - اوربيت
ومودرن سبورت - مدحت شلبي
الناس اللي فوق دول ولعوا الدنيا بين مصر والجزائر وكان أخر نتيجه للي هم بيعملوه الاعتدائات اللي حصلت امبارح في الجزائر علي المصرين اللي بيشتغلو هناك
الشروق قالت ان في جزائرين اتقتلو في مصر والاشاعه دي كانت السبب في اللي حصل امبارح في الجزائر واليوم السابع بترد عليهم النهارده عشان الحريقه تكمل
عيب اوي ان ماتش كوره يكون السبب في كل اللي بيحصل ده, عيب أوي ان يكون في بينا دم واحنا اللي في يوم دفعنا دمنا عشان نحمي بعض
عيب لما نكون اخوات ونقف نشتم بعض ونخوض في أعراض بعض
وعيب أكبر لما نكون عايزين نقتل بعض بدل مانقف نحمي بعض
عيب ان الأمن المصري يحمي الجزائرين في مصر
وفضيحه ان الجيش هو اللي يحمي المصرين في الجزائر
الشعب المصري هو اللي يحمي الجزائرين في مصر وشعب الجزاير يحمي المصرين هناك
احنا اخوات والفتنه نائمه لعن الله من أيقظها
لو واحد بس من الشعبين اتقتل يوم الأربع أعتقد ان دمه هيكون علي ايدنا كلنا
عدونا الحقيقي قاعد في أسيا علي قلبنا والاشاعات بتقول انه كان بينقل اللي بيحصل امبارح في الجزاير علي شريط التليفزيون الرسمي
أنا بحب الكوره جدا لكني بحب وطني العربي اكتر
أيا كان اللي هيكسب يوم الأربع فهو هيكون العربي الوحيد في المونديال
وأيا كانت نتيجة الماتش فمصر والجزائر هيفضلو اخوات، واللي بيولعوا في الدنيا مايهمهمش في الموضوع غير انهم يبعوا عدد نسخ أكبر أو يبقي عندهم اعلانات أكتر
انضم لحملة المطالبه بمقاطعة الجرايد والبرامج دي وأطلب من كل عاقل تعرفه انه يكتب عن الموضوع ويفكر الشعبين اننا اخوات غصب عن الناس دي
الصوره من مدونة البريد اليومي الجزائريه

الله يرحمك

2009-11-12T00:46:00.001+02:00

امبارح كانت ذكري اغتيال ياسر عرفات
كل حاجه حصلت ورا بعضها وبسرعه
نشطاء فلسطنين يطلبهم جيش الاحتلال ، هو يرفض يسلمهم، النشطاء يستخبوا عنده في مقره في رام الله، جيش الاحتلال بيعرف بيهدد بقصف المقر او تسليم المطلوبين
ياسر يرفض تسليم النشطاء، يبدأ جيش الاحتلال بقصف مقره في رام الله، العالم كله يتفرج، اوربا بتعرض انها تاخد النشطاء كحل للموقف المتأزم وفعلا بيتم توزيعهم علي دول أوربيه
فجأه صحته بتدهور، بيكون لازم نقله لمستشفي خارج فلسطين، عشان نصحي كلنا الصبح يوم 11/11 علي خبر وفاته
قبل موته بيوم أخويا قالي ماتخافيش مش هيموت، حاوله يقتلوه 6 مرات قبل كده وعاش
يومها انا قلته القط له 7 أرواح بس ودي روحه الاخيره والمره دي هيموت
في حياته عمرنا ماسمعنا ان فتح وحماس اتخانقو سوا، في حياته كان عادي انك تشوف صوره مع الشيخ ياسين بيتكلمو او بيسلمو علي بعض وابو عمار يبوس راسه
ظروف موته كانت غريبه للكل ومحدش قدر يعرف ايه اللي حصله ولا تعب فجأه ازاي، وده كان السبب ان أغلب الناس تشك انه مامتش لكنه اتقتل
فعلا بتمر السنين ويطلع اللي يعلن عن اغتيال عرفات وان أبو مازن ودحلان اشتركو في مؤامرة اغتياله
أنا شايفه انه كان بيحب فلسطين أوي، وكل حاجه عملها كانت عشان حبه للبلد دي، حتي النشطاء الفلسطنين اللي كانت السلطه بتعتقلهم كان دايما بيقول اعتقلهم أنا بدل ماجيش الاحتلال هو اللي يعتقلهم
فلسطين خسرت كتير بموته، اغتياله واغتيال الشيخ ياسين والرنتيسي وسجن مروان البرغوثي فضي الساحه للصغار عشان يلعبو فيها
انا عمري ماشكيت في وطنيته ولا في عشقة لفلسطين واعتقدت ان أي حد شك في ده اغتياله كان أكبر رد عليهم
لكن الغريب ان النهارده ورغم مرور السنين دي علي مقتله لسه في ناس شايفين أبو عمار خاين وعميل للشيطان
بجد ربنا يرحمك ويغفرلك ويجمعنا بيك في الجنة ان شاء الله ويصبرنا علي من ابتلينا بهم من بعدك

اشتروني

2009-11-03T02:30:00.002+02:00

اشترونى واشترو خاطر عيونى
ريحونى
ياللى غاويين تتعبونى ريحوني
صدقونى النهارده انا بين اديكوا صدقونى
بس بكره حتدوروا مش حتلقونى
اشترونى واسهروا على راحتى ياما
ياللى جوه قلبى علمتو علامه
واسالونى وديتى فين لابتسامه
قبل منسى وافتكر واتفكرونى
صدقونى النهارده انا بين اديكوا صدقونى
بس بكره حتدوروا مش حتلقونى
اشترونى واعرفوا قيمة غلاوتى
واسمعونى ياللى مش عارفين حكايتى
بالكلام الحلو ترجعلى ابتسامتى
دالزمان والحب ياما توهونى
صدقونى النهارده انا بين اديكوا صدقونى
بس بكره حتدوروا مش حتلقونى
اشترونى
اشترونى وازرعوا فى الحب ورده
اشترونى وغيروا حب الزمن ده
اشترونى خايفه لتحيونى النهارده
وترجعو من بكره تانى تموتونى
صدقونى النهارده انا بين اديكم صدقونى
بس بكره حتدوروا مش حتلقونى

الثقة

2009-10-24T21:13:00.003+02:00

أتعرف إلي أين تقودك الثقة، إلي طعنة في القلب دون أن تتوقع ذلك

---------------
Ronny
the last ride movie

زجاجة العطر الصغيرة

2009-10-05T00:47:00.009+02:00

كانت تحبه بجنون، فهي تعشق جميع تفاصيلة الصغيرة، ودائما ماكانت تحتفظ معها بزجاجة صغيره من عطره لتشعر انه بجانبها، وكلما ذهبت للنوم نثرت قطرات منها علي وسادتها لتشعر بوجوده لتستطيع النوم
عندما جاء ليخبرها أنه لن يستطيع الاستمرار معها اعتقدت انه يمزح، وعندما تأكدت من جديته ظنت انه يختبر حبها وتمسكها به، وعندما تيقنت انه لا يختبرها لم تستطع ان تعترف لنفسها بتركه اياها وبانها خسرته للأبد ، فهي تعلم جيدا انها لن تسطيع الحياه حينها
ولذلك أوهمت نفسها أن مابينهمها شجار مثل أي شجار بين الأحبه ، وأن هذا اختلاف ليس أكثر ولكنها لا تميزه لأنهما لم يختلفا من قبل
أشفق عليها من حولها وظن البعض أنها ستستطيع نسانه فلقد عرفوا عنها أنها اقوي من الأحداث ، أما البعض الأخر فكان متأكدا أن نسيانها له دربا من دروب المستحيل
مرت الأيام والأشهر، هي لم تعد تتحدث عنه منذ فترة طويلة فلقد كرهت نظرات الشفقة في عيون جميع المحيطين بيها
ظن البعض الأول أنها نسيته تماما وظن البعض الأخر أن ربما أحد دروب المستحيل قد صار واقعا، ورغم ذلك لم يجرؤ أحد علي سؤالها للتأكد من حقيقة الأمر، فمن يريد أن يفتح جرحا من المؤكد عنده أنه اندمل؟
أما هي فكانت كلما ذهبت للنوم تخرج زجاجة عطر صغيرة وتنثر منها بعض قطرات علي وسادتها لكي تشعر أنه معها وتستطيع النوم

تمت

عيد سعيد

2009-09-20T19:44:00.001+02:00

كل سنة وانتم طيبين
ويارب يكون عيد سعيد عليكم كلكم
كل اللي عايز بلونه ياخد واحده

صحبتك السلامة

2009-09-03T01:13:00.000+02:00

مودي يمكن احنا مش بنتكلم كتير، لكني دايما عارفه اني لما أحب أتكلم فانت موجود
لما سمعت انك هتسافر لأول مره ماشتركتش في الكلام ولا حتي سألت، وكأني بعدم سؤالي بنفي امكانية سفرك، حتي لما انت قلت انك هتفتقد القاهره بردو ماعلقتش علي الصورة وكأني بعدم تعليقي همنع بعدك عن القاهره, لكن لما تسنيم كتبت عن سفرك كان واضح ان الموضوع أصبح أمر واقع
أنا ماعرفتش تفاصيل سفرك غير قبل السفر بيوم وده لأني فعلا مكنتش عايزه اعرف، أصل أنا مش بحب الفراق وبخاف منه
أتمني ان السنتين دول يعدوا بسرعه وانك ترجع بالسلامه، وأتمني ان ربنا يوفقك هناك وتحقق كل اللي انت بتتمناه
هستناك لما ترجع إن شاء الله عشان أحكيلك كل اللي حصل خلال السنتين دول
هتوحشنا بجد وخلي بالك من نفسك وترجعلنا بالسلامه ان شاء الله

كل عام وأنتم بخير

2009-08-23T02:37:00.002+02:00

رمضان كريم

كل سنة وكلكم طيبين ورمضان سعيد علي كل الناس

جمعت بينهما أشجار الزيتون

2009-08-08T03:56:00.000+03:00

لم ينقش رسم غرناطة ولا البيازين. مالت السكين في يده تحز خطا مقوسا ثم خطا مقوسا غيره. كان ينقل الصورة التي أمامه ويقلدها. ضغط أكثر فتعمق الحز حفرا وتحددت القبتان. لماذا ينقش المكان البعيد, مالذي تعنيه له القدس؟
نجمة مضيئه في السماء أم يجرب يده لتدريبها قبل أن تشرع في تصوير غرناطة؟ جاءهم الروم وغزوا أرضهم تماما كما حدث لنا، ولكنهم طردوا الصليبين، فلماذا استطاعوا مالم نستطعه وكيف استطاعوه؟ هل كانوا يفوقوننا عزما أم أن الجواب في سؤل يختلف؟ تري مالذي حدث بالتفصيل هناك؟ لن يجد من يحكي له الحكاية كلها من البداية للختام، وهو لا يعرف سوي أن صلاح الدين طردهم من القدس مرة، ولكن للحكاية بقية فمن يحكيها له؟ لماذا رجحت الكفه في المشرق وهنا خفت الموازين؟ هل بنا عيب ليس فيهم، أم أن مصيبتنا أننا مقطوعون بالبحر، لا مصر جارتنا، ولا حولنا عراق ولا شام؟ قال الحاج إن في القدس نصارى من أهل البلد، فلماذا يفرضون علينا التنصير هنا ولماذا يزدروننا، ولم يكن سيدهم روميا ولا كان له عينان زرقاوان؟ كان السكين في يده يحز خطا رأسيا ثم قطعه بخط أفقي أقصر، يحفر في الصليب. بعث الله في عباده عيسي المسيح. حدق في الصليب علي اللوح، بدا أليفا ووديعا والهلال يجاوره. ماعلاقة هذا الصليب بجيوش خوان دي أستوريا وذبح أهالي البشرات؟ ماعلاقة الوجه الشاحب والرأس المائل بتاج الشوك، وما نحن فيه من عذاب؟ وأي رابطة تربط الجسد العاري النحيل لمسيح تبكيه أمه، بالأسياد وملاك الأرض والضرائب والمكوس والملك وديوان التحقيق ؟! ـ

---------------------
ثلاثية غرناطة
رضوى عاشور

أجازة

2009-07-16T11:11:00.001+03:00

أراكم بعد الفاصل

....

2009-07-09T15:26:00.000+03:00

الكتابه عن حد قريب من الكاتب هي أصعب أنواع الكتابه من وجهة نظري
يمكن لأني مهما قلت من كلام استحاله أقول هم ايه بالنسبه ليا وناس قليلين اوي هم اللي بيعرفوا يوفوا القريبين منهم حقهم في الكتابه وبيكونو من وجهة نظري أبرع الكتاب

يمكن هي مش اللي معايا طول الوقت احنا اه كل خروجتنا مع بعض لكن في المشاوير العاديه مش بتكون موجوده
رغم ده في حاجه بتربط بيني وبينها ممكن أي حد يلاحظها, أقرب تعبير عن الحاجه دي كان من اختها لما قالت اننا روحنا قريبه من بعض
لكن أعتقد ان التعبير الأصح هو اننا فينا من روح بعض
طبيعي اني مهما اتكلمت وضحكت انها تسالني في ايه وتصمم علي السؤال وإن جميع محاولاتي للنصب واني كويسه تعدي علي الجميع الا هي لحد ما أعترف, طبيعي اني لو مخنوقه هي تعيط قبلي, وطبيعي اني لو مبسوطه هي تضحك من قلبها قبلي
طبيعي انها تعرف حالتي الحقيقيه من كلمة ألو أو من أول نظره لما تشوفني
طبيعي إنها تساندي في جميع قرارتي حتي لو مكنتش فاهمه إيه سببها, كان طبيعي كمان انها تقولهم زمان سيبوها محدش له دعوه بيها مش هنبقي احنا كمان عليها رغم انها زيهم مكنتش فاهمه ايه اللي حصل
وعشان كل ده طبيعي فكان بردو طبيعي ان قلبها يوجعني , وإني أتمني أنا بس اللي أحس بده بالنيابه عنها
ياربي انت عارف كلهم مهمين عندي ازاي, وعارف هم عندي ايه, وانت الوحيد اللي تقدر تعمل كل حاجه
يارب حلها من عندك
صافي قلبك وجعني اوي, وأكيد مفيش أعز منك أدعيله من قلبي

أحمد البيت من غيرك وحش جدا
ماتتخيلش احنا مفتقدينك إزاي
انت أه مش طول اليوم معانا وزي أي حد خارج طول اليوم
بس الوقت اللي بتقضيه معانا فارق معانا أوي, بس يالا ياسيدي ولا يهمك, المهم انك تقضي وقت جميل وتتبسطوا, ترجعوا بالسلامه ان شاء الله

كان حبيبها وكانت همه

2009-07-03T15:12:00.001+03:00

كان ينتظرها ليخبرها بما لديه من أخبار سعيده, هنأته كثيرا ثم جاء دورها لتخبره بزواج احدي صديقاتها وتمنياتها له بالزواج هو الأخر
ولكنه أخبرها انه لن يأخذ هذه الخطوه حاليا لأنه استفاد كثيرا من تجارب أصدقائه , وعندما استفسرت عن هذة الاستفاده , أخبرها أن تسرعهم في اتخاذ هذه الخطوات والزواج وتحمل المسؤليه مبكرا قد أدي الي تحملهم الهم مبكرا
استوقفتها الفكره كثيرا فسألته في اندهاش, هم؟؟
أجاب بالايجاب وأكمل بأن المسؤليه المبكره هم يعاني منه أصدقائه
لم تستطع أن تصارحه بما مر بخاطرها فهي لا تريد أن تفسد يومه السعيد
سألها عن سبب وجومها ولكنها نفت ذلك وأكدت له أنها سعيده من اجله
استفسر ان كان قد قال ماضايقها فنفت ذلك أيضا وأخبرته أن كل حديثه اليوم كان مفرح وسعيد
لم يقتنع بكلامها تماما ولكنه طلب منها أن تنبه إن قال مايضايقها خلال أحاديثهم القادمه فهو يعلم أنه ربما يقول كلمات حمقاء دون قصد
أخبرته أن ذلك لم يحدث اليوم, فابتسم أخيرا وأكملا حديثهما
عندما انتهيا ودعته مبتسمه وأخفت دمعه كادت ان تخذلها وتخبره أن ماعكر صفوها هو اكتشافها أنها كانت همه وأن قراره بالانفصال عنها, كان قرارا بالانفصال عن الهم

تمت

من يرتكب الأخطاء

2009-06-26T13:32:00.003+03:00

هو من يرتكب الأخطاء دائما
لكنها علاقه والناس يرتكبون الأخطاء, وأنت تراقبينه في انتظار أن يخطئ لتجدي سببا للانسحاب من هذة العلاقة

------------
grey's anatomy season 4

الفرصة الثانية

2009-06-14T19:02:00.001+03:00

لما كنت في ثالثه ثانوي كان عندي امتحان في درس الفيزياء
ويوم توزيع الورق المدرس بتاعي ساب ورقتي للأخر خالص و قبل مايديني الورقه قالي غلطتي , هي اه غلطه صغيره لكنها نقصتك درجه, غلطه لو كنتي ركزتي مكنتيش غلطتيها
انا قلتله اني معنديش مشكله اني اغلط, لأن الحاجه اللي بغلط فيها مش ممكن انساها, وعشان كده استحاله اني اغلط فيها تاني في امتحان أخر السنه, يعني اني اغلط مش حاجه وحشه بالعكس دي حاجه مفيده
يومها هو ضحك وقال حبيت احرجها لأنها غلطت فحرجتني هي وطلع الغلط حق مكفول للجميع

يمكن عشان كده انا مؤمنة تماما بالفرصه التانيه, لأني مش ممكن هغلط نفس الغلطه مرتين
وطالما انا شايفه ان الفرصه التانيه من حقي اللي ممكن احارب عشان اخادها, فأكيد ماينفعش اني احرم منها غيري وتكون حق مكتسب ليا أنا بس
بس كمان تجارب الحياة أثبتت ان الناس اللي بتتعلم من اخطائها قليلين جدا وإن في ناس كتير لو اتحطوا في نفس الموقف مليون مره هيعملوا فيه نفس اللي عملوه في المره الاولي حتي لو كانوا متاكدين انهم غلط 100% ومعندهمش شك في ده
لكن لما تكون محطوط في موقف انك تدي لغيرك فرصه تانيه فمش من حقك انك تحرمه منها وترجع تطالب بيها لنفسك الفرصه التانيه حق لكل الناس وهم احرار انهم يتعلموا من الاولي او يغلطوا نفس الغلطه تاني
لكن الأكيد ان مفيش فرصه ثالثه مهما حصل

منك لله

2009-06-09T01:15:00.006+03:00

عارفه حارقة قلبها لأني عشتها قبل كده وجربتها
وكأن الحياه مش مكفيها ان حد فينا يجربها
وكأنها مكتوبه علينا ولازم ندوقها
الألم اللي فوق الوصف, والأمنية الوحيده بان القلب يبطل يدق لأن ده طوق النجاه الوحيد والحل الاوحد لايقاف الألم
الوجع اللي مفيش كلام يوصفه, والاحساس باننا اضعف بكتير من اننا نستحمله
الشعور بان الناس مهمها حاولت تفهم عمرها ماهتقدر لأنها ماجربتش
الاستعداد التام بمقايضة العمر براحة القلب
الدموع اللي بتنزل علي القلب تحرقه عشان مش قادرين ننزلها قدام الناس

مش هقولك غير حسبي الله ونعم الوكيل فيك
وان شاء الله هتدوق كل اللي انت عملته فيها
هتلف الأيام وربنا هيحرق قلبك
ربنا هينتقملها منك وهيجبلها حقها لحد عندها
هتندم ندم عمرك , وهي هتحس ساعتها براحة البال والقلب
روح ياأخي منك لله

حرررررررر

2009-06-03T19:24:00.003+03:00

س:هم ليه بيمتحنونا في الصيف بالنهار
ج: عشان دي الخطه القوميه لحرق الطلبه والطالبات
-----------------------
طب انا نفسي افهم لو امتحنونا بعد العصر في حد هيعترض؟
طب يعملو استفتاء بس ويشوفوا الطلاب هيوافقوا ولا لأ
ولا هم مصدقين ان الجو عندنا ربيع طول السنة

:(

2009-05-26T16:04:00.003+03:00

أضحك عليكي
لأ

ياريتك كنت ضحكت

البقاء لله ياريس

2009-05-19T00:23:00.000+03:00

يمكن انا مختلفه معاه في حاجات كتير
ويمكن انا مادتلوش صوتي في الانتخابات الاخيره
يمكن نكون بنتمني انه يتغير
لكن الأكيد ان مفيش اي مشاكل بينا وبين حفيده
الأكيد ان كلنا لما سمعنا الخبر اتصدمنا وقلنا ربنا يرحمه
ربنا يرحمه ويصبر أهله والبقاء لله
مفيش اي حاجه اتقالت لحد دلوقتي غير انها وعكه صحيه مفجأه حصلت من يومين
ربنا يرحمه ويرحم موتي المسلمين
والبقاء لله ياريس

هيطاردوه لحد امتي

2009-05-09T16:57:00.003+03:00

لو كان معايا فلوس كنت فتحت لحمدي قنديل قناة يقول فيها كل اللي هو عايزه

أدركت أخيرا

2009-05-02T14:51:00.000+03:00

حينها فقط أدركت أنه لم يرحل بمفرده
أصبحت تعلم تماما أنه يصطحب قطعة من روحها معه

ان ماقدرتش

2009-04-19T15:53:00.002+02:00

ان ماقدرتش تضحك
ماتدمعش ولا تبكيش
وان مافضلش معاك غير قلبك
اوعي تخاف
مش هتموت هتعيش
وان سألوك الناس عن ضي
جوه عيونك مابيلمعش
ماتخبيش
قولهم العيب مش فيا
ده العيب في الضي
وانا مش عاشق ضلمه
ولا زعلت الضي
مسير الضي لوحده هيلمع
مسير الضحك لوحده هيطلع
مابيجرحش ولا يئذيش