Wednesday, March 16, 2011

إنك تكون أنا



إنك تكون أنا دي مش حاجة سهلة أبدا وحاجة أنا شخصيا ماتمنهاش لأي حد
إنك تكون أنا معناه إنك ماتقدرش على زعل غيرك في الوقت إنك كلك ممكن تكون مابتفرقش مع غيرك ده مش زعلك بس يعني
إنك تكون أنا معناه إنك لما تكون زعلان بس اللي مزعلك متضايق شوية فإنت هتنسى إنه زعلك عشان تحاول تخليه مبسوط وعلى فكرة هو كمان هينسى إنه زعلك ومش هيصالحك وإنت كمان هتعمل نفسك نسيت
إنك تكون أنا معناه إنك تلاقي ناس كتير عليك وبيغلطوك وإنت عارف إنك مظلوم وعندك اللي تقدر تدافع بيه عن نفسك لكن مش هتقدر تقوله لأنك لو قلته مش هتبقى أنا
إنك تكون أنا معناه إنك لما تتجرح تيجي على نفسك عشان اللي جرحك
إنك تكون أنا معناه إنك تحاول ترضي كل الناس في نفس الوقت وتطلع نفسك غلطان عشان ماتزعلهمش وهم هيعتبروا ده واجب عليك وماحدش هيحاول يعرف انت بقى زعلان ولا لأ
إنك تكون أنا يعني حتى لما تكون مخنوق مش هتقدر تعيط لأن دموعك دي هتجرح ناس قريبين منك وهم مالهمش ذنب فيها وهيبقى حرام عليك تجرحهم
إنك تكون أنا معناه إنك هتسامح اللي غلط في حقك رغم إنه ماحاولش يعتذر بس عشان إنت هتحس بالذنب طول مانت مش مسامح
إنك تكون أنا معناه إن رغم مميزاتك الكتير اللي كل الناس بتتكلم عنها طول الوقت ورغم أهميتك في حياتهم اللي دايما بيكلموك عنه عنها، لكن وقت مايتعرضوا لأي مشكلة سواء إنت كنت طرف فيها ولا لأ وباختلاف الأشخاص والمواقف لكن أول حل هيجي في بالهم إنهم يخرجوك من حياتهم دي رغم إنهم عارفين إن دي أكتر حاجة بتوجعك
إنك تكون أنا معناه إن أقرب حد ليك والوحيد اللي بتكون محتاج إنه يطبطب عليك وياخدك في حضنه ويحميك حتى من نفسك مش هتلاقيه والمفروض إنك تقدر ده أيا كان سببه رغم إنك محتاج اللي يحس بيك ويقدره
إنك تكون أنا معناه إنك هتزعل أوي من كل اللي سيبتهم يقنعوك بإن دورك في الثورة من البيت كان أهم بكتير من دورك في الشارع لأنهم حرموك إنك تكون أحد شهداء الثورة خصوصا إنك مابقتش بتتمنى حاجة غير كده
إنك تكون أنا معناه إنك في أشد لحظات ضعفك مش مسموحلك تنهار عشان دايما هيكون في ناس محتاجينك تمثل دور القوي وتقف جنبهم وتكون موجود عشانهم
إنك تكون أنا معناه إن كل الناس يبقى ليها خاطر عندك لكن إنت مالكش خاطر عند أي حد
إنك تكون أنا معناه إنك تسمع كل الناس لكنك مش هتلاقي حد يسمعك
إنك تكون أنا معناه إنك بعدها بإسبوع هتخبط رأسك في الحيطة عشان ترتاح رغم إن أنا مش هعمل كده

8 comments:

safa7_karmooz said...

وليه "انا" دى متعذبة اوى كده عندك؟؟

shabfa2re said...

رائعة

Unknown said...

سفاح كرموز:
عشان تتعبني أنا :/

Unknown said...

شاب فقري:
رأيك يسعدني

رجل من غمار الموالى said...

أن تكونى أنتى
أنتى تكونى رائعة
..............
تحياتى

Unknown said...

:)

Halwasaa said...

والله لو تعرفي كيف أنا مريت بكل الأمثلة اللي ذكرتيها ودايماً الناس ما بتهتم لأنهم ليسوا أنا لكني أعتبرهم أنا!

Wish I were a Butterfly ... said...

إني أكون انت معناه إني حد جميل أوي، حد قريب من القلب أوي، حد عارفة إني لو كـنت زعلانة هلاقيكي تساعديني حتى لو انت همك أكبر من همي

إني أكون انت... ساعتها برده هحس إني أنا عشان حسيتك شبهي أوي في الشوية بوستس اللي شفتهم بس لما وصلت هنا حسيتك أوي أكتر :). ربنـا يسعدك و يفرج عنك كل همك

سعدت بإني أعرف المكان دة صدفة

 

The Lost Princess © 2008. Design By: SkinCorner