Tuesday, December 21, 2010

عايز تخرج؟



عايز تخرج؟ أخرج، اعذرني إني مش هقدر أقوم أوصلك للباب، خد انت الباب في إيدك وإقفله بالمفتاح وإرمي المفتاح في البحر ووصي أي قرش معدي إنه يبلعه، عشان يوم ماتقرر ترجع تلاقي الباب مقفول ، وعشان أي حد من الموجودين يوم مايحب يخرج يضطر إنه ينط من الشباك ويبقى عارف إنه كده هيموت ومش هيعرف يرجع تاني
أخرج وماتقلقش عليا، خروجك مش هو اللي هيكسرني، أنا مابيكسرنيش غير الموت وإنت مش عزرائيل
أخرج لإني مليت من الوقوف بين الجنة والنار، مليت من الوقوف بين الأه واللأ ، مليت من الوقوف بين الدخول والخروج
أخرج وأنا هفضل واقفة في مكاني ومش هحاول أمنعك، لأني تعبت من إني أفضل شارية ناس مصرة إنها تبيع
أخرج بس لما تندم وماتستغربش من إني متاكدة إنك هتندم ، وتقرر الرجوع إفتكر إن قرار الخروج كان قرارك إنت وإن قرار الرجوع هيكون قراري، قراري أنا وبس
أخرج لأن منير كان ساذج لما غنى إياك تكون زيهم، وانا كنت ساذجة أكتر منه لما صدقت و غنيتها بأعلى صوتي معاه
أخرج من غير ماتفضل تدور على مبررات، قولي بس إنك إخترت الخروج وأنا مش هسألك عن الأسباب
أخرج وخد الباب في إيدك وأقفله بالمفتاح وإرمي المفتاح في البحر ووصي أي قرش معدي إنه يبلعه، عشان يوم ماتقرر ترجع تلاقي الباب مقفول، وعشان أي حد من الموجودين يوم مايحب يخرج يضطر إنه ينط من الشباك ويبقى عارف إنه كده هيموت ومش هيعرف يرجع تاني

3 comments:

Anonymous said...

أخرج وأنا هفضل واقفة في مكاني ومش هحاول أمنعك، لأني تعبت من إني أفضل شارية ناس مصرة إنها تبيع


يااه
حلوه قوي قوي وخصوصا الحته دي

غباء انك تشتري حد بايعك قوي

انا حره said...

فاكر لما تقولى هسيبك يعنى انا هجرى وراك !! ولا هموت فى هواك !! ولا انا هترجاك

روح ياحبيبى مع الف سلامه .. روح والقلب معاك

خد لياليك وياك

:::::::::::

فكرتينى بالاغنيه دى

احمد خليل said...

اخرج وخد الباب في إيدك وأقفله بالمفتاح وإرمي المفتاح في البحر ووصي أي قرش معدي إنه يبلعه، عشان يوم ماتقرر ترجع تلاقي الباب مقفول، وعشان أي حد من الموجودين يوم مايحب يخرج يضطر إنه ينط من الشباك ويبقى عارف إنه كده هيموت ومش هيعرف
يرجع تاني.....كلام جميل جدا ..رائع

 

The Lost Princess © 2008. Design By: SkinCorner