Monday, November 29, 2010

أسيبك لمين؟



أنا زعلانة منك يامصر، زعلانة أويييييي ومش عارفة أقولك ايه؟
طيب أنا ليه ماروحتش لما منعوني أدخل أراقب من جوه مدرسة الأمين الإبتدائية؟ ليه فضلت واقفة ال12 ساعه قدام بابها وطنشت كل محاولات الظابط لتزهيقي وتطفيشي
طيب ليه كتبت محضر شراء الأصوات لصالح طارق عمار بإيدي عشان مندوبة الوفد مالقتش حد يكتبهولها وأنا خفت تزهق وتطنش؟
ليه فضلت واقفة على الباب أعد الناس اللي داخلين واللي خارجين وأسالهم انتخبتوا ولا لأ وطنشت إحتجاجات مندوبة الوطني اللي كانت مستعده تعمل أي حاجة وأبطل أعد وكانت السبب في إن الظابط يطردني للمرة التانية؟
ليه كان أي حد من مندوبي المرشحين لما بيشتكيلي من مخالفة بتحصل جوه المدرسة كنت بنقلها فورا؟
أنا عملت كده عشان نتيجة المدرسة دي ماتطلعش وتتعاد سواء عشان لجنة 111 كانت بتتقفل لطارق عمار واحمد سليمان (الاتنين اللي نجحوا بالفعل في الدايره دي) أو لأن كان في شراء للأصوات من أغلب المرشحين أو لأن نسبة الحضور في المدرسة كلها كانت 6% يعني أقل من النسبة القانونية ولازم تتعاد الانتخابات فيها
إزاي بقى أصحى النهاردة الصبح ألاقي إن مافيش إعادة وان طارق عمار وسليمان نجحوا بالفعل؟؟
ده لما الساعة جت 7 والناس قالولي الانتخابات خلصت كده؟ طيب المرة الجاية امتى قلتلهم الأحد الجاي، المدرسة دي لازم يكون فيها إعادة لأنها ماجبتش النسبة القانونية
والله كان عندي استعداد أطحن تاني الأسبوع الجاي قصاد إن إرادة عيالك ماتتزورش

طيب أنا إيه اللي مزعليني أوي كده؟ إن الكل كانو ضدنا؟ رؤساء لجان وظباط وحتي مفتش أمن الدولة اللي كان جاي أول مرة عشان يشوف نسبة الحضور هتسمح بتقفيل الصناديق ولا لأ؟
ولا يمكن اللي مزعلني إن احمد خرجوه متهرب من مدرسة النصر عشان خافوا علي حياته من إن بلطجية محمد نور يقتلوه وهو خارج لأنه رفض التزوير وهو بيراقب في المدرسة؟
طيب إحنا لو أخدنا قرار جماعي دلوقتي بإعتزال السياسة وريحنا دماغنا وبطلنا نزعل عليكي طالما إنت أصلا مش زعلانة على نقسك هنسيبك لمين؟
هنسبك ليهم يبهدلوا فيكي وفي عيالك أكتر من كده؟
ده انت والله ماليكي غيرنا ومش هتلاقي حد بيحبك قدنا ولا حد مستعد يتبهدل و يعمل أي حاجة في الدنيا عشانك حتى لو قتلونا
أنا طول عمري بعيط عليكي يامصر، بس النهاردة أنا بعيط منك والأغنية اللي فوق دي هي الحاجة الوحيدة اللي مصبراني ومخلياني مش عارفة أسيبك لمين؟

5 comments:

بيتنا القديم said...

"أنا طول عمري بعيط عليكي يامصر"
.
.
.
مأتم الحريات كبير بعرض وطول الوطن..
والعزاء لا زال مستمراً..
ربنا يجعله في ميزان حسناتك..
ولا تيأسي..
لابد ان ندفع نحن الفاتورة..
كما دفعتها شعوب انتزعت حريتها واسقطت شرعية جلاديها..
(:
متعيطيش..!
تحياتي.

رجل من غمار الموالى said...

الله يكون فى عونك
.............
بصراحة خلاص أنا زهقت
بقيت باسمع الأخبار بحس ميت
بقيت عايش فى الدنيا كأنى باشوف فيلم سينما
أو حلم مزعج

يا مراكبي said...

ما تزعليش من مصر

مصر مالهاش ذنب في اللي بيجرالها ده

العيب كلُه على اللي سرقوا مصر وهما القائمين على أمورها

Diyaa' said...

أغنية رائعة

وربنا يدي كل حد على قد نيته وأكتر شوية

بس أنا مؤمن بالمبدأ المستخلص من المقولة دي

يظن المرء في ظل وضع فاسد أن الحياة يملكها أصحاب الحيل وأن الدَّهْماء هم الذين يضعون قوانين اللعبة!.كثير من التعساء لا يدركون أن للحياة قوانين لا تحيد، حتى وإن غامت قليلا لحكمة إلهية


متقلقيش. مصر لها ربنا
وإنتي مش هتسيبيها :)

الحصان الأسود said...

سعد زفلول قالها من ييجي 100 سنة

ماااافيش فاااايدة

 

The Lost Princess © 2008. Design By: SkinCorner