Wednesday, July 7, 2010

ضحية جديدة للتعذيب في مصر بلد اللفافات


اللي في الصورة ده محمد صلاح
طيب ايه اللي حصل لمحمد صلاح؟
محمد سواق توك توك في المنصورة عنده 18 سنة وركب معاه اتنين مخبرين عايزين يروحوا مدرية الأمن ولما محمد وصلهم رفضوا انهم يدفعوا الأجرة ومحمد رفض انه يتنازل عنها فما كان منهم غير انهم أخدوه على المدرية وعذبوه وفي الاخر رموه من الشباك لكن الحمدلله محمد نزل عايش
طبعا الحكومة جهزت ليستة التهم وكان أولها انه اتقبض عليه لأنه سايق توك توك من غير ترخيص رغم ان مفيش ترخيص للتوك توك في مصر أساسا ولما اكتشفوا ان ترخيص التوك توك مش موجود قالو انه كان معاه لفافة بانجو أه والله لفافة بانجو مش عارفة هي نفس اللفافة اللي خرجوها من جثة خالد الله يرحمه 3 مرات ولا دي واحدة جديدة
أنا الصراحة مش عارفة ايه البلد اللي شاببها غاوين لفافات دول من سن 18 لسن 28
لمتابعة أخبار محمد في المستشفى والضغوط اللي بيتعرض ليها هو أهله عشان يغير أقواله ويقول ان محدش ضربه وانه نط من الشباك لوحدة عشان يهرب باللفافة ادخل عند احمد

7 comments:

عايش... ولكن !!!! said...

عااااااااااااادى انا مبقتش باخد بالى من الكلام ده
محدش مقتنع بردو اننا فى مصر يا جماعه
انتم فى مصررررررررررررر
ما فى حاجات كتير من دى كانت بتحصل بردو كل يوم بس محدش بيعرف عنها حاجه لانها مبيتسلطش عليها الضوء
بس الموضوع بس علشان كبر شويه
واحب اعرفك حاجه مهمه جداااا
مع سياسة يومين والشعب ينسى اللى الحكومه متبعاها محدش هيوصل لحق ولا باطل

صوت من مصر said...

سيمعت انه بلع توكتوك
ناس بتهزر ياخال
حسبى الله ونعم الوكيل

moodysalihamidzic said...

من تنظيم المرضى النفسيين الى لفافات البانجو ..يا قلبى لا تحزن
شكرا للنيابة..فعلا البطل الجديد فى احقاق العدل
لا صحفيين ولا اعلاميين ولا قضاة ولا محاميين

رجل من غمار الموالى said...

حسبى الله ونعم الوكيل

يا مراكبي said...

هو خلاص بقت الحكاية دي كل يوم والا ايه؟

عموما دي بداية النهاية

التاريخ دايما بيقول كده

بس هما مش مصدقين لأنهم مش بيتعظوا أبدا

t3ban said...

ما هو اللي غلطان
فيها اه لو كان حاسبهم ميري نص تذكرة

P A S H A said...

كل سنة وحضرتك طيبة وبألف خير وصحة وسلامة إن شاء الله

:)

رمضان كريم

 

The Lost Princess © 2008. Design By: SkinCorner