Wednesday, April 21, 2010

اعتصام رفع الحد الأدني للأجور يوم 2 مايو


مرتبك كام؟
وياتري بتقدر إنك تدفع فاتورة الكهرباء والمياة وإيجار الشقة من المرتب ده؟ طيب بعد ماتدفعهم بيتبقى معاك فلوس تجيب أكل أو ملابس ليك أو لأولادك، طيب لو لا قدر الله احتاجت إنك تروح لدكتور مرتبك كمان هيكفي ثمن الكشف والأدوية، طيب هو مرتبك يساعدك انك تفتح بيت وتتجوز أو تخطب حتي؟؟
خط الفقر في مصر 1200 جنية، ياترى إنت وصلت لخط الفقر ده ولا مرتبك تحت خط الفقر بكتير، يعني انت عشان تستحق لقب فقير لازم يكون مرتبك 1200 جنية ومحدش يسألني اللي مرتبه 70 جنية وطالع اسمه ايه
احنا مش بنطالب بالمستحيل، احنا بنطالب برفع الحد الأدني للأجور لخد الفقر
1مايو هو ميعاد انتهاء مهلة العمال للحكومة برفع الحد الأدني للأجور أو الاستقالة، وبناء عليه في اعتصام أمام مجلس الوزراء بشارع حسين حجازي يوم 2 مايو، والاعتصام مفتوح حتي الاستجابة ورفع الحد الأدني للأجور أو استقالة الحكومة
محدش يقولي هيجيبوا فلوس منين؟ مصر خيرها يعيش كل أولادها ملوك ومش ذنبنا إن الخير ده مسروق وأولادها بيموتو من الجوع
شاركنا في الدعوة للاعتصام اكتب عنه واحكي عنه لكل اللي حواليك
للاشتراك في جروب الاعتصام علي الفيس بووك اضغط هنا
لمتابعة أحداث الاعتصام والدعاية له اضغط هنا

6 comments:

AHMED SAMIR said...

مش هاقوللك و الحكومة تجيب منين لأني عارف كويس قوي ان مصر مواردها كتير قوي انما في سوء في الانفاق بشكل رهيب
بس بدون دعوة للأحباط و لا حاجة
مفيش فايدة

صوت من مصر said...

والله انا مثلا مرتبى 0000 جنيه كتير قوى

Anonymous said...

بالتوفيق نحييكم من هناك

قلم رصاص said...

العجيب بقى انهم يطلعوا لنا كام خبير اقتصادي مرتشي سياسيا من الحزب الوطني عشان يقنعنا باستحالة وجود موارد في الوقت الحالي لتغطية الفرق بين الحد الادنى الجديد والقديم في الموازنه العامه لدوله

مصر خيرها فعلا كتير ودا مش بالكلام ولكنه منهوب وعلى عينك ياتاجر

دا لما واحد زي احمد عز لوحده وامثاله كتير في البلد ، ثروته بقت في اقل من 15 سنه تخطت ال 50 مليار جنيه دا يبقى معناه اييييييييييه ياناس؟

فكرتيني بكلمه لمفكر بريطاني في معرض حديثه عن مصر لاحد المصريين قال له :

لو حدثت واقعة فساد واحده في بريطانيا زي اللي ماليه مصر ، لسقطت الحكومات بل ولانهار النظام بأكمله .. أما مصر بلدكم فبتنهب منذ 7 ألاف سنه ومازالت واقفه على قدميها

تقبلي مروري وتحيتي

يا مراكبي said...

أحلى جملة عجبتني: محدش يقولي هيجيبوا فلوس منين؟ مصر خيرها يعيش كل أولادها ملوك ومش ذنبنا إن الخير ده مسروق وأولادها بيموتو من الجوع

ياسر سليم said...

ربنا يقويكوا

تحياتي من الغربة

 

The Lost Princess © 2008. Design By: SkinCorner