Friday, February 26, 2010

مصر مشت منين؟


هي االبلد دي ايه اللي حصلها؟
محدش يقولي هي طول عمرها كده، عشان هي عمرها ماكانت كده ، اه هي فيها فساد واستعباط لكن مش كده
انا فعلا مش فاهمه هي كان مالها امبارح، امبارح انا مكنتش قادره اني اتعرف عليها بجد ولا أعرف مصر اللي أنا اعرفها راحت فين؟
احنا قضائنا نضيف ومحترم، ومع ذلك وكيل النيابه بيحفظ التحقيق من غير مايحقق فيه أصلا
فنون اتفصلت من شغلها عشان قالت رأيها في مدونتها، البنت ماقالتش انها هتنتخب البرادعي ولا انها هتقف وراه في الانتخابات، كل اللي قالته ان دوايتنا مسدوده ومش بيمشي فيها الكهربا
أحمد مصطفي مخطوف من امبارح والانباء متضاربه بين ان أمن الدوله هم اللي خطفوه بتهمة الاساءة للدوله وان المخابرات الحربيه هي اللي خطفته بتهمة الاساءة للجيش بسبب البوست ده
أنا عن نفسي أتمني ان الرواية الاولي هي اللي تطلع صح لأن حتي مع اعتراضنا بس ده متوقع من امن الدوله، لكن الجيش بتاعنا طول عمره محترم وأكبر من الحاجات دي، ولو طلع فعلا مع امن الدوله لازم الجيش يحاسب اللي وصلوا لأهل أحمد ان الجيش هو اللي خطفه
أحمد متحول لمحكمه عسكرية رغم ان جواسيس اسرائيل مش بيتحاكموا عسكري، ممكن تعتبروا أحمد اسرائيلي وتحاكموه مدني؟
الاخبار دي كانت كتيره عليا اوي في يوم واحد وخلتني بجد مش فاهمه مصر حصلها ايه ولا راحت فين؟
اللي شاف مصر وهي ماشيه يقولي مشت منين ، يمكن أجري وراها ألحقها وأقنعها ترجع تاني بقي

13 comments:

Diyaa' said...

نزلت تستحمى في الترعة
اللي ساهم فيها ولادها
سواء بالتواطئ السلبي أو الإيجابي
واللي يستحمى في الترعة
البلهارسيا بتعمل إيه في بدنه الطاهر ؟:(
ربنا يستر ويطمن أهل أحمد عليه
ويخرج ولاد الحلال منها على خير :)
أو ينصرهم على إحباطهم وشياطين الإنس والجن
ويجعله عامر

يا مراكبي said...

تابعت البوست اللي قبل اللي فات وكان عندي أمل .. وجالي شوية إحباط من البوست اللي فات .. بس برضه كان عندي أمل

فوجئت هنا بالبوست ده وراهم على طول وفيه موضوعين تانيين خالص غير موضوع بلاغك إنتي .. والموضوعين خارج حدود العقل بجد

ليه الاتنين دول يتعاقبوا؟ وعملوا ايه؟ وسايبين الناس اللي بتنهب ليل نهار وماسكين في دول ليه؟

مصر ما مشيتش .. مصر نايمة

Unknown said...

ضياء:

يعني مش هنعرف نلحقها

أحمد اتحول لمحاكمه عشكريه خلاص

Unknown said...

يا مراكبي :

المشكله ان الحاجات اللي خارج حدود العقل بقت بتحصل عادي جدا وكأنها شئ طبيعي

فنون فعلا مالهاش ذنب

وأحمد انا مش فاهمه هو اتحول لمحاكمة عسكريه ليه؟

انا قربت أؤمن انهم مش بينفذوا القانون لأنهم مش فاضين غير للقبض علي المدونين والناشطين السياسين والحقوقين

طيب نايمه فين، أروح أزعق تحت أوضتها يمكن تصحي؟

just waiting said...

مصر هاجرت كندا ومش راجعة
انتي ماعندكيش خبر ولا ايه
ممكن تشتري ماتزوقيني ياماما من اي ناصية
والله مش هضحك لان هو دا الهم اللي يبكي بجد ومبيضحكش

bastokka طهقانة said...

دي بلطجة
مصر مخطوفة و اللي خاطفها شوية حرمية
بيسرقوا حتى الحلم


اوروفوار

Israa El-sakka said...

مصر تذهي للهاوية يا جميلة ..لو فضلنا كده

Anonymous said...

مصر هربت من البلد من ساعه ماحملت من ركوب الاوتوبيسات و راحت تشتغل في الخليج

Unknown said...

Just waiting :

:)

طيب انا بحب كندا
مش كانت تقولي عشان اروح معاها

Unknown said...

bastokka طهقانة :

صح ياطقطوقه

طيب مش هنروح نجيبها بقي؟.

Unknown said...

Israa El-sakka :

ماهو عشان كده ماينفعش نفضل كده

نورتي هنا

Unknown said...

Anonymous :

:/

Ahmad Hegab said...

هترجع تانى قريب إن شاء الله

 

The Lost Princess © 2008. Design By: SkinCorner