Monday, February 22, 2010

مش عايزه غير حقي


كان بقالي فتره في رقم بيشتغلني،بس الرقم اللي كان بيتصل بيا عليه أنا أصلا مش بشغله كتير، لكنه دايما كان بيتصل لما أفتحه، ودي كانت أول مره في حياتي أشوف واحد يتقاله ماتتصلش بالرقم ده تاني بدل ماتتهزأ ويتصل بردو، غاوي تهزئ مثلا؟
لما اشتغل في قلة الادب أنا قلتله اني هبلغ عنه واوديه في داهيه والغريب انه اتصل تاني بمجرد ماقفلت في وشه
صاحبتي اللي كانت معايا ساعتها استغربت اوي اني هعمله محضر بجد، هو المفروض اننا نسكت علي قلة الادب ونقفل احنا خطوطنا ولا الاشكال دي هي اللي تتربي؟؟؟؟
الحقيقه ان الناس في مباحث التليفونات كانو محترمين جدا (احنا بردو نقول اللي لينا واللي علينا) هو صحيح في ظابط اعترض علي اني قلت عليه عيل وقالي 20 سنة يبقي راجل حتي لو أصغر منك بس انا قلتله انه لما يكون قليل الادب ومش متربي يبقي عيل وان الرجوله مش سن
وأمين الشرطه اللي كان بيكتب المحضر الصراحه قدر اني عمري ماقلت الالفاظ دي في حياتي وعملهولي محضر سب من غير مااقول ايه اللي اتقال بالظبط
وتاني يوم روحت اخدت رقم المحضر ورقم الصادر وكانو متعاو جدا فعلا
وروحت النهارده جبت رقم الجنحهمن القسم وسألت في النيابه مكنش لسه وصل
بس انا مش عارفه ليه أغلب الناس شايفين اني مش هوصل لحاجه واني تاعبه نفسي علي الفاضي واني اريح نفسي واقفل الخط خالص
هو ليه لازم أكون سلبيه، مش الغلطان المفروض انه يتعاقب؟؟
أنا مواطنة صالحه، مش برمي زباله في الشارع، بربط حزام الأمان وأنا سايق، معايا بطاقه انتخابيه من يوم ماكملت 18 سنة، يبقي من حقي اعيش في بلدي بأمان ومن حقي إن الحكومه تجيبلي حقي
مش المفروض ان كل ما موبيلي يرن اتخض ليكون الكائن ده
انا من حقي ان القانون يطبق ومن حقي انه يتقبض عليه ومن حق اي بنت بتتعرض للسفاله دي انها تاخد حقها
ومحدش يقولي كبري دماغك واقفلي الخط لأن أنا واحده بتصعب عليها نفسها وعمري ماشتمت بألفاظ خارجه ومش بعرف أقولها أصلا وطبيعي اني أحس بالاهانه وكرامتي توجعني اوي واعوز حقي لما ده يحصل معايا
أنا مش عايزه كتير، أنا بس بطالب بتطبيق القانون واني أخد حقي

20 comments:

Unknown said...

ربنا يستر

safa7_karmooz said...

احييكى

بس حاولى تجيبى واسطة تساعدك انك تاخدى حقك

لانه مش هيتجاب الا بالواسطة

زى والدتى حد سافل بردوا اشتغل باتصالات ومسجات...وبعد ما هددناه اننا هنجيبه ونعمل فيه محضر ...فلط فلطة عمره واتصل وسجلنا المكالمة باللى فيها + الواسطة

اخدنا حقنا وقتها

عايش... ولكن !!!! said...

كل قانون وانتى طيبه
ربنا يستر

Tamer Nabil Moussa said...

رغم السلبيات دى

الا انا معاكى فى ما عملتى

ومهما كانت النتيجة المهم انك حاولتى تصدى الاهانة وتدافعى عن نفسك

ربنا يوفقك ويكرمك

مع خالص تحياتى

AHMED SAMIR said...

انتي صح
استمري
ربنا يوفقك

just waiting said...

خدي حقك ماتسكتيش عليه
انا كمان اتعرضت لسفالة كتير
مكنتش بعمل محضر فعلا
بس بكل بساطه كنت بدخل مواقع على النت واحط الرقم
هي كلها مواقع اعلانات
والصراحة لما كنت بعمل كدا بلاقيهم بطلو

hasona said...

السلام عليكم

لازم كلنا نعيش بالقانون ليعاد اليه روحه ويتنفس من جديد

ولو كل شخص تعرض لسخفات ومعاكسات وتحرش لفظي عن طريق التليفون قدم شكوي
بعد فترة ستكون هذه البداية ومن ثم سيكون الطبيعي ان مفيش حد سيتدخل ويكلم حد غصب عنه

حتي لو هيتعمل له محضر بعدم الاتصال بك مرة أخري
لأن هيكون صعب اثبات السب والقذف لأنه بكل سهولة هينكر
لكن مع زيادة عدد الشكاوي سيتم التعامل مع الموضوع بجدية أكثر

Unknown said...

نوارة:
مش متفائله ولا ايه؟

Unknown said...

safa7_karmooz :

هو لحد دلوقتي الموضوع ماشي كويس الحمدلله
انا سجلتله فعلا اخر مكالمه

Unknown said...

عايش... ولكن :

وانت طيب
يارب

Unknown said...

Tamer Nabil :

ادعيلي ياتامر انه يتقبض عليه

Unknown said...

AHMED SAMIR :

يارب يااحمد
ادعيلي كتيير

Unknown said...

Just waiting :

ماهو في حاجات ينفع فيها انك تنشري الرقم او تديه لأخوكي واصحابك يشتغلوه

وحالات تانيه بيكون لازم يتربي ويتعلم الادب
وده ماينفعش غير بالقانون

Unknown said...

hasona :

وعليكم السلام ورحمة الله وبركاته
مانا لسه مؤمنه بالقانون اهو وماشيه معاه للأخر

هو فعلا الناس بياخدو موضوع مباحث التليفونات تهريج

بس الاتنين بيشيلو مسؤلية ده
الناس اللي بتكست علي حقها
والمباحث اللي احيانا فعلا مش بتعمل حاجه

حكاية السب انا سجلتله لأني حطيت في دماغي انه ممكن يقول ماقلتش حاجه

ادعيلي بقي يتمسك

Israa El-sakka said...

أيوة محدش قالك قبل كده المرأة عورة و أتستري ..و الله حليم ستار و إذا بُليتم فأستتروا !! لا مش هو اللي ممبلي للأسف بالنسبلهم أنتي المبلية لأنك بنت :)
منطقك صح يا إسراء
هههههههه
مش عايزة أقولك أني بعد ما شفت صاحباتي بيتحرشوا بيهم في الشارع قلت لنفسي لقدر الله لو حد عملي حاجة حضربوا بطوبة في راسه و أجره من قفاه على القسم :)

Ana keda said...

والله برافو عليكى بس انتى فى مصر برضه
يعنى السلبية تبقى بنتنا وحفيدتنا كمان محتاجة فعلا واسطة زى ما قال سفاح اى حاجة جوه قسم محتاجة حد وراكى مينفعش منك للهوا كده انتى فى مصر يا عبلة :)

-_- said...

انهي حكومة ؟؟

Unknown said...

Israa El-sakka :

طيب اعمل ايه
ماهو اللي بيجيلي علي الفون وانا قاعده في بيتنا

ياجامد انت يابتاع الطوب

ربنا يحميكي وماتتعرضيش لحاجه زي دي
ويهدي الشعب ده

Unknown said...

Ana keda :

القسم فعلا مكنش فيه مشكله
المشكله كانت في النيابه

Unknown said...

Sharm :

حكومتنا النظيفه

 

The Lost Princess © 2008. Design By: SkinCorner